Panalona ed “Sabit ed Laman”

“Say grasyak so masarag ed sika.”​—2 CORINTO 12:9.

1, 2. (a) Akin ya agtayo nepeg a nawetwet ed katuaan a nidudunget itayo ed saray subok tan problema? (b) Akin a makapanmatalek itayo anggaman ed saray subsubok?

“Amin so saray malabay a manbilay ed sinasanto ed Kristo Jesus, manako’ra naani pamasegsegang.” (2 Timoteo 3:12) Akin ya ontan? Lapud ipipilit nen Satanas a manlilingkor labat ed Dios so too makasengeg ed sinisiblet iran rason, tan sikato so desperadon mamapaneknek ed punto to. Aminsan et pinasakbayan nen Jesus iray matoor ya apostol to: “Si Satanas kinerew to [kayo], pian nagalpong to [kayo] a singa trigo.” (Lucas 22:31) Kabat a tuloy nen Jesus ya aabuloyan na Dios si Satanas a manubok ed sikatayo panamegley na saray makapaot-ot a problema. Siempre, agkabaliksan na satan ya amin a paniirapan tayo ed bilay so direktan manlalapu ed si Satanas odino ed saray demonyo to. (Eclesiastes 9:11) Balet magunaet si Satanas a mangusar ed antokaman a paraan a walad pakayari to pian nabuyak so katooran tayo.

² Ibabaga ed sikatayo na Biblia ya agtayo nepeg a nawetwet ed saray subok ed sikatayo. Antokaman so nayarin onsabi ed sikatayo, aliwa la itan a nikadkaduma odino ag-ilaloan. (1 Pedro 4:12) Diad tua, ‘saratan a kairapan so nagagawa met ed utel na agagi [tayo] a wala ed mundo.’ (1 Pedro 5:9) Natan, si Satanas so pirmin manedesdes ed balang lingkor na Dios. Panliliketan na Diablo so pakanengneng ed paniirap tayo ed saray singa-sabit a problema anggad posibli. Pian nagawaan itan, uusaren to iyan sistema na bengabengatla diad paraan a maseguron mangarum odino mamaloor ni ed antokaman ‘iran sabit ed laman tayo.’ (2 Corinto 12:7) Anggaman kuan, saray panangataki nen Satanas so agnepeg a mamuyak ed integridad tayo. No panon a si Jehova et ‘manggawa na dalan a makapaliis’ itayo pian nasungdoan so tukso, ontan met so gawaen to sano nipapaarap tayo ed saray problema a singa saray sabit ed laman tayo.​—1 Corinto 10:13.

No Panon a Natalonaan so Sabit

3. Panon ya inmebat si Jehova sanen inkerew nen Pablo a naekal so sabit ed laman to?

³ Masimoon a kinerew nen apostol Pablo ed Dios a naekal so sabit ed laman to. “Nipaakar ed saya akikasi ak ed Katawan ya amitlo, pian naekal komon ed siak.” Anto so ebat nen Jehova ed masimoon a kerew nen Pablo? “Say grasyak [“agkanepegan a panangasi,” NW] so masarag ed sika; ta say pakayarik agawan ayadyari ed kakapuyan.” (2 Corinto 12:8, 9) Analisaen tayo iyan ebat tan imanoen tayo no panon iyan makatulong ed sikatayo a makatalona ed antokaman a singa-sabit iran problema a makapaot-ot ed sikatayo.

4. Diad antoran dalan ya agunggonaan si Pablo ed agkanepegan a panangasi nen Jehova?

⁴ Imanoen a pinaseseg na Dios si Pablo a pablien to so agkanepegan a panangasi a ninatnat la ed sikato panamegley nen Kristo. On, si Pablo so abendisyonan a tuloy diad dakel iran paraan. Si Jehova so maaron angiter ed sikato na pribilehyon magmaliw a babangatan, anggaman sikato so datin panatikon sumusumpa ed saray patumbok nen Jesus. (Gawa 7:58; 8:3; 9:1-4) Diad saginonor et si Pablo so mapangasin inikdan nen Jehova na dakel a makapalikliket iran asainmin tan pribilehyo. Malinew ed sikatayo so leksion. Anggaman ed sankaugesan iran panaon, dakel nin siansia so panamendisyon ed sikatayo a nepeg tayon pisalamatan. Agtayon balot lilingwanan so daakan a kaabigan nen Jehova anggaman ed saray subok.​—Salmo 31:19.

5, 6. (a) Panon so impangibangat nen Jehova ed si Pablo a say pakayari To et “agawan ayadyari ed kakapuyan”? (b) Panon a pinaneknekan na alimbawa nen Pablo a matila si Satanas?

⁵ apaneknekan a magenap so agkanepegan a panangasi nen Jehova diad arum nin dalan. Say pakayari na Dios so magenagenap ya ontulong ed sikatayo pian natalonaan iray subok. (Efeso 3:20) Imbangat nen Jehova ed si Pablo a say pakayari To et “agawan ayadyari ed saray kakapuyan.” Panon? Sikato so maaron angiter ed si Pablo na amin a biskeg a nakaukolan to ta pian natalonaan so subok ed sikato. Bilang resulta, nipatnag ed amin so panagsungdo tan say mapekder a panagmatalek nen Pablo ed si Jehova ya ontatalona so pakayari na Dios ed kipapasen na sayan makabos tan makasalanan a too. Konsideraen pa so epekto ed Diablo, a mankuan a manlilingkor labat so totoo ed Dios no mainawa so bilay da tan anggapoy problema ra. Say katooran nen Pablo so kinmanan tampal ed satan a managpauges!

⁶ Si Pablo, a datin kamuyong nen Satanas ed pitutulot to ed Dios, sakey a maruksan manamasegsegang ed saray Kristiano, maseseg a Fariseo, so andi-duaruwan nanggayaga ed dakel iran pakainawaan ed bilay lapud sikato so nianak ed mayaman a pamilya. Si Pablo so nanlingkor la ed si Jehova tan si Kristo bilang “kamelagan ed saray apostoles.” (1 Corinto 15:9) Sirin, sikato la so mapaabeban nampasakop ed autoridad na inmunan-siglon Kristianon mananguley ya ulop. Tan sikato so matoor a nansungdo anggaman ed sabit ed laman to. Lalon inmunganget si Satanas lapud saray subok ed bilay so ag-amatayer ed seseg nen Pablo. Agbalot nilingwanan nen Pablo so ilalo a sikatoy magmaliw a kabiangan ed mangatatawen a Panarian nen Kristo. (2 Timoteo 2:12; 4:18) Anggapoy sabit a mamatayer ed seseg to, anggan panon lay ot-ot na satan. Komon ta mantultuloy met a mabiskeg so inkaseseg tayo! Diad panutulong nen Jehova ed sikatayo diad saray subok ed sikatayo, itatandoro to itayo panamegley na pribilehyon makatulong ed pamaneknek a matila si Satanas.​—Uliran 27:11.

Makana Iray Probisyon nen Jehova

7, 8. (a) Diad anton paraan a papabiskegen nen Jehova iray lingkor to natan? (b) Akin a makanakana so inagew-agew a panagbasa tan panagaral na Biblia diad panalona ed sabit ed laman tayo?

⁷ Papabiskegen natan nen Jehova iray matoor a Kristiano panamegley na masanton espiritu to, say Salita to, tan say Kristianon impanaagi tayo. Singa si apostol Pablo, nayarian tayon ipaawit ed si Jehova iray pakakabelatan tayo diad panamegley na pikakasi. (Salmo 55:22) Anggaman ag-ekalen na Dios iray subok ed sikatayo, iter to ed sikatayo so kakabatan pian natalonaan iratan, anggaman ed saramay subok a mair-irap ya anosan. Sikatayo so ikdan met nen Jehova na biskeg​—a mangiter ed sikatayo na “sankatageyan ya inkabaleg na pakayari”​—pian makapansungdo itayo.​—2 Corinto 4:7.

⁸ anon tayon nagamoran itan a tulong? Nepeg a maseet itayon manaral na Salitay Dios, lapud naromog tayo ditan so seguradon pananambayo to. (Salmo 94:19) Diad Biblia, nabasa tayo so makapatenyeg iran salita na saray lingkor na Dios ya onkekerew na tulong To. Saray ebat nen Jehova, a mabetbet a mangilaktip ed makaligliwa iran salita, so maabig a dalepdepen. Say panagaral so mamabiskeg ed sikatayo ta pian say “sankatageyan ya inkabaleg na pakayari kien komon na Dios, ya agmanlapu ed sikatayo.” No panon a nakaukolan tayo so mangan na pisikal a tagano ed kada agew pian ombunigas tan ombiskeg, nepeg met a regular itayon mantagano ed saray salita na Dios. Kasin gagawaen tayo iya? No gawaen tayo itan, naimano tayon say “sankatageyan ya inkabaleg na pakayari” so ontulong ed sikatayo pian nasungdoan so antokaman a piguratibo iran sabit a nayarin mamairap ed sikatayo natan.

9. Panon a nasuportaan na mamatatken iramay manatalona ed saray problema ra?

⁹ Saray matakot ed Dios a Kristianon mamatatken so magmaliw ya ‘amotan manlapud dagem’ na gonigon, ‘sakey a siroman manlapud bagyo’ na saray problema. Saray mamatatken, a mankaliktan a mitunosan ed satan ya apuyanan a deskripsion, so mapaabeba tan masimoon ya onkekerew ed si Jehova ya ikdan to ira na “dila na saray abangatan” ta pian amta ra so susto iran salita ya iyebat da ed saray maniirap. Saray salita na mamatatken so singa alay abig ya uran a manrepresko tan manligliwa ed kipapasen na nonot tayo legan na mairap iran panaon ed bilay. Diad pansalita ya ‘ibalap so apunaw a puso,’ saray mamatatken so peteg a manusuporta ed espiritual ya agagi ra a nayarin onkakapuy odino nadidismaya lapu ed sabit ed laman da.​—Isaias 32:2; 50:4; 1 Tesalonica 5:14.

10, 11. Panon a napaseseg na saray lingkor na Dios so arum a manasagmak na pirmin subsubok?

¹⁰ Amin a lingkor nen Jehova so kabiangan ed nankakasakey a Kristianon pamilya to. On, sikatayo so “kabiangan na sakey tan sakey,” tan sikatayo so ‘nepeg met a manaaroan ed sakey tan sakey.’ (Roma 12:5; 1 Juan 4:11) Panon tayon nasumpal iyan obligasyon? Unong ed 1 Pedro 3:8, nagawaan tayo itan diad ‘pagmaliw a maabagey, manaaroan a singa sanaagi, tan pagmaliw a masibeg’ ed amin na saramay kapananisiaan tayo. Parad saramay manatalona ed sakey a makapaot-ot a sabit ed laman, kalangweran man odino matatken ira, amin tayo so makapangiter ed sikara na nikaduman panangimano. Panon?

¹¹ Nepeg a panggunaetan tayo so magmaliw a maimano ed paniirap da. No andian itayo na simpatya, andiay-liknaan, odino agmangisengansengan, nayarin agtayo nalimen a napapaloor tayo so paniirap da. Diad pakaamta tayo ed saray pakakasubokan da, sikatayo so nepeg a magmaliw a maalwar ed no anto so ibaga tayo, no panon so pangibaga tayo, tan no panon itayon onkiwas. Say pagmaliw tayon positibo tan makapaseseg so makatulong pian napakepa so pirmin ot-ot na antokaman a sabit a mamapairap ed sikara. Diad ontan et magmaliw itayon makapabiskeg a tulong ed sikara.​—Colosas 4:11.

No Panon a Tinmalona so Arum

12-14. (a) Anto so ginawa na sakey a Kristiano pian nasungdoan to so ir-irap makasengeg ed kanser? (b) Panon a sinuportaan tan pinaseseg na saray espiritual ya agagi iyan bii?

¹² Legan na panasingger tayo ed anggaan na sarayan kaunoran ya agew, saray “kairapan” so inagew-agew ya onloor. (Mateo 24:8) Kanian, saray subok so maseguron mangapekta ed amin diad dalin, nagkalalo la ed matoor iran lingkor nen Jehova, a manggugunaet a manggaway linawa to. Alimbawa, isipen pa so sakey a Kristiano a sigpot-panaon a manlilingkor ed ministeryo. Nalmoan a sikatoy walaan na kanser tan nakaukolan ya operaan pian ekalen iray salivary tan lymphatic gland to. Sanen naamtaan dan sanasawa ya ontan so sakit to, sikara so tampol a tinmupleg ed si Jehova panamegley na andukey tan masimoon a pikakasi. Inkuanto ed saginonor a sikaray awalaan na agnapanisiaan a kareenan na nonot. Balet, sinungdoan to so dakel iran tubat-tubat a mairap a kipapasen, nagkalalo la diad panatalona to ed saray mauges ya epekto na pantatambal ed sikato.

¹³ Pian natalonaan to so kipapasen to, ginawa na sayan agi so anggaay nayarian to pian mansukimat nipaakar ed kanser. Sikato so kinmonsulta ed saray doktor to. Diad Say Panag-Bantayan, Awake!, tan misiglaotan iran Kristianon publikasyon, abasa to iray estorya ed bilay a mangipapanengneng ed no panon ya atalonaan na saray indibidual iyan sakit diad emosyonal a paraan. Abasa to met so mitukoyan iran teksto ed Biblia a mangipapanengneng ed abilidad nen Jehova a manustuni ed totoo to legan na saray kairapan, tan arum nin makatulong ya impormasyon.

¹⁴ Sakey ya artikulo nipaakar ed panalona ed pirmin kaermenan so angaon ed sarayan makabat a salita: “Say onsian anapen to so dili a pilalek to.” (Uliran 18:1) Kanian onia so insimbawa na sayan artikulo: “Agmanbubukbukor.”a Insalaysay na agin bii: “Dakel so angibaga ya ipipikasi ra ak; arum so tinmawag ed siak. Duaran mamatatken so regular ya ontatatawag pian komustaen ak. Akaawat ak na saray rosas tan dakerakel a kard. Arum so angiparaan ni ingen na saray panangan. Ontan met, dakel so namboluntaryon mangiba ed siak diad pampapatambalan ko.”

15-17. (a) Panon ya atalonaan na sakey a Kristiano iray irap a makasengeg ed impakaaksidente? (b) Anto so nitulong na saramay walad kongregasyon?

¹⁵ Sakey ya abayaglan lingkor nen Jehova ed New Mexico, U.S.A., so amiduan naaksidente ed luganan. Asakitan so beklew tan saray takeb to, ya amaloor ed arthritis ya aanosan to la ed loob na masulok a 25 a taon. Insalaysay to: “Agko nayarian a pansiansiaen ya akatangwa so ulok tan agko makaawit na antokaman a manbelat na masulok a duaran kilo. Balet siak so pirmin apabiskeg lapud masimoon a pikakasi ed si Jehova. Ontan met ed saray artikulo na Say Panag-Bantayan ya inaral tayo. Walay sakey a nankomento nipaakar ed Miqueas 6:8, ya angikuan a say pagmaliw a mapaabeba ed panakar a kaiba so Dios so mankabaliksan na pamidbir ed saray limitasyon na sakey. Saya so angipamoria ed siak ya anggaman oniay kipapasen ko et kaukolan ya agak nadismaya, anggano say panaon ya inusar ko ed ministeryo et daiset nen say kinaliktan ko. Say panlingkor ed sikato tekep na saray puron motibo so sankaimportantian.”

¹⁶ Inkuanto met: “Saray mamatatken so lawas mangokomenda ed siak lapud saray sagpot kon onatendi ed saray miting tan ompaway ed lawak na kimeyan. Saray kalangweran so mangibabano ed siak panamegley na lakap. Maan-anos ed siak iray payunir a ministro tan mabetbet dan itukoy iray eskedyul da no agak makapaway lapud sakit. Sano aliwan marakep so tiempo, mapangasi ra ak ya itagar ed saray panagpawil odino mila ed sikara a mangiyaral na Biblia. Tan lapud agak makabitbit na bag, ikakarga na arum a manangipalapag so literaturak diad bag da sano manpulong ak.”

¹⁷ Imanoen so impanulong na saray mamatatken ed kongregasyon tan saray kapananisiaan ed sayan duaran agin bii pian makatalona ed singa-sabit iran sakisakit. Angiyopresi ira na praktikal, mapangasin tulong pian nitarya so espesipikon pankaukolan ed espiritual, pisikal, tan emosyonal. Agta mamabiskeg itan ed sikayo ya ontulong ed arum ya agagin manasagmak na saray problema? Sikayoran kalangweran met so makatulong ed saramay walad kongregasyon yo a mipupuligesgesan ed saray sabit ed laman da.​—Uliran 20:29.

18. Anton panamaseseg so nayarin naromog tayo ed saray estorya ed bilay ya impalapag ed Panag-Bantayan tan Awake! iran magasin?

¹⁸ Impalapag ed Panag-Bantayan tan Awake! a magasin so dakel ya estorya ed bilay tan eksperiensya na saray Tastasi ya akatalona, tan siansia nin manatalona, ed saray problema ra ed bilay. No maparanay kayon manbasa ed saratan ya artikulo, naimano yon dakel ya agagi yo ed interon mundo so mansusungdo ed kairapan na panagbilay, impatey na inad-aro ra lapud saray desyang, tan mapeligron kipapasen ed panaon na bakal. Arum so manbibilay a walaan na makabaldadon sakisakit. Dakel so agmakapanggawa na simpli labat iran bengatla ed bilay bangta baliwala labat iratan ed saray mabunigas. Saray sakit da so pirmin manusubok ed sikara, nagkalalo la no ag-ira makapibiang ed saray kimey na Kristiano a kalkaliktan da. Agaylay pisalsalamat da ed tulong tan suporta ed sikara na agagi ran kalangweran tan mamatakken!

Say Panagsungdo so Mangitarok na Liket

19. Akin ya ayarian nen Pablo so manliket anggaman ed singa-sabit iran subok tan kaleteyan?

¹⁹ Nanliketan nen Pablo a naeksperiensya so panamabiskeg ed sikato na Dios. Inkuanto: “Sankabalgan so liket a lablabay ko so manpasirayew ed saray kakapuyan ko, pian say pakayari nen Kristo manayam ed siak. Kanian panliketan ko so saray kakapuyan, dia ed saray inkapabpabanday, dia ed saray pankaukolan, dia ed saray pakausil-usil, dia ed saray irirap a makalanor ed Kristo; ta sano siak so makapuy, dia ed satan mabiskeg ak.” (2 Corinto 12:9, 10) Lapud saray personal a naeksperiensya to, si Pablo so matalek a makapangibaga: “Aliwan nipaakar ed kaandian so salitaen ko: ta inaral ko so mamasarag na antokaman a kipapasen ko. Amtak so manpaabeba, tan amtak met so mamarakel: tan dia ed balang sakey tan dia ed amin a bengatla inaral ko so maamot ya anggan kapesel tan kaerasan, anggan mamarakel tan mankaukolan. Nayarian ko a gawaen so ganagana ed saman so mamabiskeg ed siak.”​—Filipos 4:11-13.

20, 21. (a) Akin a nayarin panliketan tayo so pandalepdep ed ‘saray bengatlan agnanengneng’? (b) Anto so arum a ‘bengatlan agnanengneng’ ya iilaloan yon nanengneng ed mangaraldalin a Paraiso?

²⁰ Kanian diad pansungdo sirin ed antokaman a piguratibon sabit ed laman tayo, makaromog tayo na pirmin liket diad pangipatnag ed amin a say pakayari nen Jehova so nagagawan ayadyari ed kakapuyan tayo. Insulat nen Pablo: “Agkami onkapuy; . . . say too mi ed loob ombalo ya inagew-agew. Ta say anlemew ya ermen mi a sikatoy maganggano, manggawa ed sikami ed tagey tan alablabas ni ed kaatagey na sakey a maando a belat na gloria. Bangta [sikami] onnengneng ed saray bengatlan . . . agnanengneng; ta saray . . . agnanengneng maando ra.”​—2 Corinto 4:16-18.

²¹ Maslak ed totoo nen Jehova natan so maniilalon manbilay ed mangaraldalin a Paraiso to tan manggayaga ed saray bendisyon ya insipan to. Saratan a bendisyon so nayarin ipasen ya “agnanengneng” parad sikatayo natan. Balet, say panaon so maples a manasingger sano nanengneng tayo iratan a bendisyon ed mismon kamataan tayo, on, tan panggayagaan tayo iratan ed ando lan ando. Sakey lan bendisyon et say pakainawa ya aglan balot manbilay a walaay antokaman a singa-sabit a problema! Say Anak na Dios so ‘maneral ed saray gawa na Diablo’ tan “bagbagen to so kawalaan na pakayari na ipapatey.”​—1 Juan 3:8; Hebreos 2:14.

22. Anton kompiyansa tan determinasyon so nepeg a niwala ed sikatayo?

²² TKanian, antokaman so sabit ed laman tayo a mamapasakit ed sikatayo natan, komon ta mantultuloy tayon talonaan itan. Singa si Pablo, nawalaan itayo na biskeg a manggawa ed satan diad tulong nen Jehova, a mabulos a manginanabang na pakayari ed sikatayo. Sano manbilay tayo ed mangaraldalin a Paraiso, benditoen tayo si Jehova a Dios ed kada agew lapud amin ya alay abig a gagawaen to parad sikatayo.​—Salmo 103:2.

[Paimano ed Leksab]

Panon Yon Ebatan?

• Akin tan panon a sasalien a buyaken na Diablo so integridad na saray tuan Kristiano?

• Panon a say pakayari nen Jehova so “agawan ayadyari ed kakapuyan”?

• Panon a napaseseg na mamatatken tan arum ni iramay nanairapan lapud saray problema?

[Litrato ed pahina 18]

Amitlon impikasi nen Pablo ya ekalen komon na Dios so sabit ed laman to