Maliket Tayon Italaga so Inkasikatayo ed Panaglingkor ed si Jehova!
1 Maliket ya ‘inyupot’ nen apostol Pablo so inkasikato pian nagawaan toy ministeryo to. (2 Cor. 12:15) Mipadpara natan, dakel a Kristiano so makulin manpapayunir. Arum a walaan na ambelat iran responsibilidad ed pamilya so mangigagana na panaon ed okupadon eskedyul da pian makapibiang ed ministeryo kada simba. Arum met a walaan na saray seryoson problema ed bunigas so manguusar ed limitadon biskeg da pian niyalibansa so intereses na Panarian. Agaylan makapaseseg a nanengneng ya anggan antoy edad odino kipapasen na saray totoo nen Jehova et itatalaga ra so inkasikara ed panaglingkor!
2 Aro ed Kaparan Too: No gawaen tayoy amin a nayarian tayo ed panlingkor ed si Jehova, ya ipapatnag so panangaro ed Dios tan ed kaparan too, nawalaan itayo na malinis a konsiensia. Lapud intalaga nen Pablo so kamarerwa to ed panginabang na maong a balita, sikatoy maliket a makapangibaga: “Kanian patuaen ko ed sikayo ed sayan agew, a malinis ak ed dala na saray amin a totoo.” (Gawa 20:24, 26; 1 Tes. 2:8) Say pibiang ed ministeryo anggad iyabuloy na saray sirkumstansya tayo so mangamper ed sikatayo ed pankasalanan ed dala.—Eze. 3:18-21.
3 Magmaliw itayon maliket no pambanikelan tayon tulongan so arum. (Gawa 20:35) Inkuan na sakey ya agin laki: “No nasabi lay labi, tan onsempet ak la ed abung kayari na sanagew a panaglingkor ed si Jehova, tua a naliknak so kesaw. Balet maliket ak, tan pisalsalamatan koy Jehova ta pinagamoran to ak na liket ya anggapoy makasamsam.”
4 Aro ed Dios: Say sankaimportantian a rason no akin ya italaga tayoy inkasikatayo ed panaglingkor ed si Jehova et lapud makapaliket itan ed mangatatawen ya Ama tayo. Say aro ed Dios so mamapakiwas ed sikatayon tuloken iray ganggan to, a mangilaktip ed panagpulong tan panaggaway babangatan. (1 Juan 5:3) Anggan sano ag-interesado odino onsusumpa iray totoo, maliket tayon itultuloy so mankimey ya impasya parad si Jehova.
5 Aliwa iyan panaon pian ontantan. Manbibilay itayo la ed panaon na panagani. (Mat. 9:37) Say sakey a dumaralos et kaslakan lan mankimey na dakel ya oras legan na panagani lapud limitado so panaon to pian tiponen iray ani to antis a nabulok. Say panaon a niyabuloy parad espiritual a panagani so limitado met. Diad pannonot lawas ed panaon a pambibilayan tayo, komon ta itultuloy tayon amin ya isekar so inkasikatayo ed ministeryo.—Luc. 13:24; 1 Cor. 7:29-31.