Antoy Ibabaga na Biblia Nipaakar ed Panangasawa?

Say ebat na Biblia

Nen pinalsa na Dios so unonan laki tan bii, pinan-iba to ra bilang sanasawa. Inggapo toy panangasawa bilang espisyal ya relasyon na sakey a laki tan sakey a bii, tan magmaliw itan ya pundasyon na pamilya.—Genesis 1:27, 28; 2:18.

Labay na Dios ya magmaliw a maliket so sanasawa. (Proverbio 5:18) Diad Biblia, angiter so Dios na saray estandarte parad panangasawa tan saray prinsipyo ya makatulong pian maliket so ulopan da.

Diad sayan artikulo

Anto ray estandarte na Dios parad panangasawa?

Manlapu lad gapo, inletneg na Dios so panangasawa pian mankasakey so sakey a laki tan sakey a bii. (Genesis 2:24) Aglabay na Dios so poligamya o pangasawa na piga-pigara, homoseksualidad, odino panamong ya agni kasal. (1 Tesalonica 4:3) Imbangat nen Jesus iray papatumbok to ya unoren so orihinal ya estandarte na Dios parad panangasawa.—Marcos 10:6-8.

Parad Dios, permanente so panangasawa. No mankasal so sakey a laki tan sakey a bii, i-promisa da ya magmaliw iran matoor ed sakey tan sakey tan maniba ira legay bilay da. Iilaloan na Dios ya tooren da itan ya sipan da.—Marcos 10:9.

No nipaakar ed pansian tan pandiborsyo ey?

Wala ray panaon ya agmakapaniba so sanasawa, singa bilang no kaukolan ya manbiahe so sakey lapud walay emergency ed pamilya. Balet ag-ipapaseseg na Biblia so pansian lapu labat ta walay problema dan sanasawa. Imbes, ipapaseseg na Biblia ya ayosen day problema da.—1 Corinto 7:10.

Say saksakey ya basiyan na pandiborsyo ya aabuloyan na Biblia et say pikakalugoran. (Mateo 19:9) Kanian no mandesisyon so sanasawa ya mansian odino mandiborsyo balet ta aliwan pikakalugoran so rason, ibabaga na Biblia ya pareho iran agnayarin mikarawan o miasawa lamet.—Mateo 5:32; 1 Corinto 7:11.

Nepeg kasin legal ya irehistro so kasal pian aprobaan na Dios?

Iilaloan na Dios ya unoren na saray Kristiano iray ley na gobierno nipaakar ed panangasawa. (Tito 3:1) No posiblin legal ya iparehistro na sanasawa so kasal da tan iparehistro da itan, ipapanengneng dan rerespetoen day sekular ya autoridad tan say estandarte na Dios ya say panangasawa et permanente.a

Anto ran betang tan responsabilidad so inter na Biblia ed asawan laki tan asawan bii?

Saray responsabilidad dan dua. Nepeg ya aroen tan respetoen na sanasawa so sakey tan sakey. (Efeso 5:33) Nepeg ya maaro dan iter so seksual ya pankaukolan na sakey tan sakey tan iwasan day antokaman ya paraan na agpanmatoor. (1 Corinto 7:3; Hebreo 13:4) No wala ray anak da, responsabilidad dan sanasawa ya pabalegen ira.—Proverbio 6:20.

Anggapoy detalyadon ibabaga na Biblia no panon ya panapagan na sanasawa iray sekular ya trabaho odino kimey ed abung. Sarag day saniban mandesisyon no antoy sankaabigan parad pamilya da.
Say betang na asawan laki. Ibabaga na Biblia ya “say asawan laki et ulo na asawa to.” (Efeso 5:23) Sikatoy ulo ta kaukolan ton igiya so pamilya to tan manggawa na saray desisyon parad pankaabigan na asawa tan ananak to.

Kaukolan ton seguroen ya naasikaso so pisikal, emosyonal, tan espiritual ya pankaukolan da. (1 Timoteo 5:8) Nipanengneng ton papablien to ray kualidad tan abilidad na asawa to no mikimeyan ed sikato tan ikonsidera toy opinyon tan liknaan to no manggagaway desisyon. (Proverbio 31:11, 28) Ibabaga na Biblia ya dapat gawaen na laki iray responsabilidad to diad maaron paraan.—Colosas 3:19.
Say betang na asawan bii. Ibabaga na Biblia ya “say asawan bii et nepeg a walaan na aralem a respeto ed asawa to.” (Efeso 5:33) Maliket so Dios no nanenengneng ton rerespetoen na bii so betang ya inter To ed asawan laki.

Say betang to et tulongan toy asawa to ya manggawa na maabig iran desisyon tan suportaan toy inkaulo to. (Genesis 2:18) Irarayew na Biblia so asawan bii ya gagawaen toy importantin betang to ed relasyon dan sanasawa.—Proverbio 31:10.

Kasin igaganggan na Dios ya nepeg a nawalaan na anak iray sanasawa natan?

Andi. Nensaman, ingganggan na Dios so arum ed saray mandadayew ed sikato ya kaukolan day mananak. (Genesis 1:28; 9:1) Balet agla itan igaganggan ed saray Kristiano natan. Agbalot ingganggan nen Jesus iray papatumbok to ya nepeg iran nawalaan na ananak. Anggapo met ed saray disipulo to nensaman so angibagan nepeg ya nawalaan na ananak iray sanasawa. Akauley so sanasawa ya mandesisyon no kasin labay day nawalaan na ananak.

Panon ya makatulong so Biblia ed relasyon min sanasawa?

Wala ray prinsipyo na Biblia ya makatulong ed saray sanasawa pian duga so igapo na ulopan da. Makatulong met irayan prinsipyo na Biblia pian naiwasan odino nasarag da iray onsabin problema.

Makatulong iray prinsipyo na Biblia ed sanasawa pian . . .

nipanengneng day tuan panangaro.—1 Corinto 13:4-7; Colosas 3:14.
naresolbe da ray agpantatalosan.—1 Corinto 10:24.
magmaliw iran maong ya ondengel.—Santiago 1:19.
nipanengneng day respeto.—Roma 12:10.
naperdona day sakey tan sakey.—1 Pedro 4:8.
makapanmatoor ira.—Marcos 10:9.
naynay iran mananos.—Efeso 4:2, 3.
mantulongan ira.—Eclesiastes 4:9.
determinado dan tooren iray sipanan da.—Kansion nen Solomon 8:7.

a No nipaakar ed panmoria na Biblia ed tradisyonal ya kasal odino saray kasal ya base ed kustombre na saray tribu, nengnengen so Say Panag-bantayan ya Oktubre 15, 2006, pahina 21, parapo 12.

Saray teksto ed Biblia nipaakar ed panangasawa

Proverbio 18:22: “Samay akaromog na maong ya asawan bii et akaromog na maong a bengatla.”

Labay ton ibaga: Positibo so ibabaga na Biblia nipaakar ed panangasawa.

Malaquias 2:15: “Manmatoor kayod asawa yo ed inkaugaw yo.”

Labay ton ibaga: Labay na Dios ya manmatoor so sanasawa ed sakey tan sakey, tan lanang dan ipanengneng so respeto anggano abaybayag la ran sanasawa.

Marcos 10:9: “Say impankasakey na Dios et agnepeg a pansianen na too.”

Labay ton ibaga: Labay na Dios ya permanentin maniba so sanasawa.

Hebreo 13:4: “Komon ta say panangasawa et galangen na amin a totoo.”

Labay ton ibaga: Nepeg ya pablien na sanasawa so relasyon da, tan pansagpotan dan protektaan itan.

1 Corinto 7:28: “Saramay mangasawa et nawalaay irap ed laman da.”

Labay ton ibaga: Anggapoy perpekton panangasawa; nepeg ya mantulongan so sanasawa pian nasarag iray problema.