No Panon ya Ipanengneng so Respeto

NO AKIN YA MAIRAP

Imbaga na asawan laki: “Nen nankasal kami, naamtaan mi nen asawak ya mandumaan so opinyon mi no panon ya ipanengneng so respeto. Pero aglabay ya ibaga na satan ya siak so duga tan sikatoy aliwa—talagan mandumaan kami labat. Balet mabetbet kon nalilikna ya singa aliwan marespeto so pitotongtong tod siak.”

Imbaga na asawan bii: “Diad binalegan kon pamilya, normal labat so mansalitan maksil, ipanengneng so naliliknam diad ekspresyon na lupa, tan biglan onsalet no walay mansasalita. Agmi iisipen ya aliwan marespeto so onman. Balet duman maong ed pamilyan binalegan nen asawak.”

Say respeto et kaukolan ya lanang ya ipanengneng na sanasawa ed sakey tan sakey, aliwan no labay da labat. Panon mon nipanengneng ya rerespetoen moy asawam?

NO ANTOY NEPEG MON NAAMTAAN

Mas kakkaukolan na lalaki so respeto. Ibabaga na Biblia: “Kada asawan laki . . . et nepeg ton aroen so asawa to a singa ed dilin laman to.” Balet intuloy to: “Say asawan bii et nepeg a walaan na aralem a respeto ed asawa to.” (Efeso 5:33) Parehon kaukolan ya nalikna na sanasawa ya sikaray aaroen tan rerespetoen, balet mas kakkaukolan na asawan laki ya nalikna so respeto. “Kaukolan ya nalikna na lalaki ya sarasarag dan arapen so nanduruman situasyon, solusyonan iray problema, tan asikasoen so pamilya ra,” so imbaga na asawan laki ya si Carlos.a No rerespetoen na asawan bii so asawa to lapud saratan ya nagagawaan to, aliwan say asawa to labat so nagunggonaan, noagta pati sikato. “No rerespetoen koy asawak, mas ipapanengneng toy panangaro tod siak,” kuan na asawan bii ya si Corrine.

Kaukolan met na asawan bibii so respeto. Agnipanengneng na asawan laki ya inaro toy asawa to no agto rerespetoen. “Kaukolan kon respetoen iray opinyon tan suhestion nen asawak,” kuan nen Daniel. “Kaukolan ko met ya respetoen so liknaan to. Anggano agko natatalosan no akin ya onman so nalilikna to, agto labay ya ibagan ibaliwalak la so nalilikna to.”

Nibagan marespeto ka no nalilikna itan na asawam. Ompan iisipen mo ya marespeto ka, balet say talagan pakasukatan na respetom et no kasin nalilikna itan na asawam. Atan so naaralan na samay asawan bii ya abitlad gapo diad “No Akin ya Mairap.” “Anggano parad siak et marespeto ak balet parad si asawak et agak marespeto, siak sirin so kaukolan ya manguman.”

NO ANTOY NAYARIN GAWAEN MO

• Isulat so taloran labalabay mon ugali na asawam. Saratan so nayarin pangibasiyan mo pian mas respetoen moy asawam.

• Diad sakey simba, obserbaan moy sarilim (aliwan say asawam) ed saraya:

Saray salitam. Naamtaan ed sakey ya research ya “saray sanasawan maliket so ulopan da et mangibabaga na limaran positibon komento ed kada sakey ya negatibon komento no pantotongtongan day problema ra. Balet, saray sanasawa ya posiblin mandiborsyo et anggapo ni sakey (0.8) ya positibon ibabaga ra ed kada sakey ya negatibon komento.”b—Prinsipyo ed Biblia: Proverbio 12:18.

Tepetan so sarilim: ‘Kasin marespeto so pitotongtong kod asawak? Kasin say mas mabetbet ya iimanoen ko et saray makapuy ya nagagawaan to imbes ya saray balibalin nagagawaan to? Antoy tono na panagsalitak no walay naobserbaan ko odino walay agko agustoan ya ginawa to?’ Kasin onkompormi asawam ed ebat mod saratan ya tepet?—Prinsipyo ed Biblia: Colosas 3:13.

Salien iya: Diad kada agew, ibagam ed asawam so anggan sakey labat ya agustoan mon ginawa to. Suhestion: Nengneng mo iramay insulat mon labalabay mon ugali to. Ipasal mon ibaga ed asawam no anto ray labalabay mod sikato.—Prinsipyo ed Biblia: 1 Corinto 8:1.

Saray gagawaen mo. Imbaga nen Alicia: “Dakdakel so kimey kod abung, kanian no isinop nen asawak iray gamit to odino urasan to ray anganan, naliknak ya rerespetoen to ak, papablien to ray sagpot ko, tan importante ak ed sikato.”

Tepetan so sarilim: ‘Kasin nanengneng ya marespeto ak diad panagtratok ed asawak? Kasin seseguroen ko ya walay panaon kod asawak tan iikdan koy atension?’ Kasin onkompormi asawam ed ebat mod saratan ya tepet?

Salien iya: Isulat so taloran paraan ya labay mon ipanengneng na asawam so respeto ed sika. Ontan met so pagawam ed sikato. Insan ipanengneng yod sakey tan sakey so insulat yo pian naamtaan yo no anto ray nepeg yon gawaen pian nipalikna yoy respeto. Manpokus kad saramay kaukolan mon gawaen base ed samay insulat nen asawam. No sika lay unonan mangipanengneng na respeto, ontan met so gawaen na asawam.