Kapitulo Otso

‘Pitutulot a Sumpad Marelmeng Iran Espiritun Puersa’

1. Akin a saray gawa na marelmeng ya espiritu so nagkalautlan makapainteres ed sikatayo?

DAKEL a totoo so manbabalaw ed ideya a walaray marelmeng ya espiritu. Balet ta aliwa itan a ludlurey. Balanglan sisiaen itan na totoo odino andi, talagan walaray marelmeng ya espiritu, tan dedetdetan da so siopaman. Agnipuera iray managdayew ed si Jehova. Diad tua, sikara so manunan puntirya. Sikatayo so papasakbayan nen apostol Pablo ed satan a katuaan, a kuanto: “Ag-itayo mitulot ed laman tan dala, noag ingen onsumpa itayo ed saray [agnanengneng a] manunaan, onsumpa ed saray pakayari, onsumpa ed saray manuley ed mundo na sayan kabilungetan, sumpa ed saray mauges ya espiritu [puersa] ed pasen a mangatatawen.” (Efeso 6:12) Say panedetdet na marelmeng iran espiritu ed panaon tayo so amantok lan tuloy lapud si Satanas so apagit ed tawen tan sinmanosanok, ta amta ton antikey la so panaon to.​—Apocalipsis 12:12.

2. Panon a posible ed sikatayo so pananalo diad pitutulot ed saray espiritun mabiskeg-nen-too?

² Kasin posible so ontalona diad pipupuligesgesan ed saray espiritun puersa a mabiskeg-nen-too? On, balet ta diad sigpot labat a panagmatalek ed si Jehova. Kaukolan ya ontalineng itayo ed sikato tan unoren so Salita to. Diad panggawa na ontan, napaliisan tayo so baleg a kasakitan ed pisikal, moral, tan emosyonal a singa sasagmaken na saramay kokontrolen nen Satanas.​—Santiago 4:7.

Saray Manuley na Mundo ed Mangatatawen Iran Pasen

3. Siopa so masebeg a susumpaen nen Satanas, tan panon?

³ Mabitabitar a dedeskribien nen Jehova ed sikatayo so kipapasen na mundo a singa pakanengneng to ed atagey a pasen to ed katawenan. Impasingawey to ed si apostol Juan a si Satanas so niretrato bilang “sakey a baleg a dragon ya ambalanga.” Sikato so akaparaan a manabsab, no nayari, ed Mesianikon Panarian na Dios bektaman a satan so nianak ed tawen nen 1914. Diad insaew na satan a gagaem, impaarap nen Satanas so dakerakel a masebeg ya isusumpa ed saray mangaraldalin a manangilaman na satan a Panarian. (Apocalipsis 12:3, 4, 13, 17) Panon so impibakal nen Satanas? Diad panamegley na saray mismon atooan a manangilaman to.

4. Siopa so lapuan na pakayari na saray gobierno na too, tan panon so pikabat tayo ed satan?

⁴ Ontumbok a nipanengneng ed si Juan so sakey ya atap ya ayep a walaan na pitoran ulo tan samploran saklor, sakey ya ayep a walaan na pakauley “ed amin a poli tan baley tan salita tan nasyon.” Satan ya ayep so mangirerepresenta ed mapolitikan sistema ed interon globo. Nipakabat ed si Juan a “say dragon [si Satanas a Diablo] inter to ed sikato so pakapanyari to, tan say trono to, tan say baleg a pakauley.” (Apocalipsis 13:1, 2, 7) On, si Satanas so lapuan na pakayari tan pakauley na saray gobierno na too. Sirin, singa insulat nen apostol Pablo, say tuan “manuley na mundo” et ‘saray mauges ya espiritun puersa ed saray pasen a mangatatawen,’ a mangokontrol ed saray gobierno na totoo. Amin a mandayew ed si Jehova so kaukolan a makatebek ed sigpot a kabaliksan na satan.​—Lucas 4:5, 6.

5. Diad anto so katitiponan natan na saray mapolitikan manuley?

⁵ Anggaman ibabaga na dakel iran mapolitikan manuley a relihyoso ira, anggapo ed saray nasyones so manpapasakop ed pananguley nen Jehova odino ed samay tinuro ton Ari, si Jesu-Kristo. Amin so masebeg a mipupuligesgesan a mamemben ed dilin pakayari ra. Natan, singa ipapanengneng na salaysay ed Apocalipsis, “saray balbalikas a pinuyanan na saray demonyo” so manitipon ed saray manuley na mundo diad “bakal na say baleg ya agew na Dios a Makapanyarin-amin” diad Armagedon.​—Apocalipsis 16:13, 14, 16, NW; 19:17-19.

6. Akin a kaukolan so alwar pian napaliisan so pakasuporta ed satanikon sistema?

⁶ Kada agew, nalalanor so bilay na totoo diad gotgotan ed politika, sosyedad, ekonomya, tan relihyon a mamubuyak ed pamilya na too. Diad sarayan gotgotan, natural la’d totoo so ondapag​—ed salita odino ed kiwas—​diad kawalaan dan nasyon, tribu, ulop na lenguahe, odino ed sosyal a kabiangan ira. Anggan sano saray totoo so agdirektan nalalanor ed gotgotan, mabetbet a sikara so ondadapag ed sakey odino ed sananey. Balet anggano dinan a too odino pakurang so iyaalibansa ra, siopan talaga so susuportaan da? Malinlinew ya ibabaga na Biblia: ‘Say sankamundoan mandukdukol ed mauges a sakey.’ (1 Juan 5:19) Panon sirin ya agnibalang so sakey a too kaiba so amin a katooan? Dia lambengat ed sigpot a panuporta to ed Panarian na Dios tan diad pansiansia ton nagnap a neutral ed saray gotgotan na mundo.​—Juan 17:15, 16.

Saray Kasiliban na Sakey a Marelmeng

7. Panon a nipatnag so kasiliban nen Satanas diad panangusar to ed palson relihyon?

⁷ Diad interon awaran, inusar nen Satanas so insalita tan pisikal a panamasegsegang pian pabenegen toray sinansakey manlapud tuan panagdayew. Inusar to met iray kasiliban tan patipatit. Masilib ton binulag so baleg a bilang na katooan panamegley na palson relihyon, a paniisipen to ran sikara so manlilingkor ed Dios. Lapud kakulangan na suston pikakabat ed Dios tan aro ed katuaan, nayarin sikara so natangguyor ed mistikal tan emosyonal iran relihyoson serbisyo odino nasagyat ed saray pakpakelaw. (2 Tesalonica 2:9, 10) Balet apasakbayan itayo ya anggan saramay aminsan a kaiba ed tuan panagdayew, “arum onsian ira ed pananisia  . . , a dengelen da so saray espiritu a manangilawan tan saray bangat na saray demonyo.” (1 Timoteo 4:1) Panon a nagawa so ontan?

8. Panon itayon nasagyat nen Satanas diad palson relihyon anggaman mandadayew itayo ed si Jehova?

⁸ Masilib ya aanamoten na Diablo iray kaleteyan tayo. Kasin wala ni so takot tayo ed too? No ontan, nayarin sikatayo so onsuko ed pananesdes na kakanayon odino kakaabay a mibiang ed gawagawan nanlapu ed palson relihyon. Kasin mapaatagey itayo? No ontan, nayarin sikatayo so onsyodot sano nasimbawa odino sano ag-awaten na arum iray ideyan iyaalibansa tayo. (Uliran 15:10; 29:25; 1 Timoteo 6:3, 4) Imbes ya itukoy tayo so panmoria tayo ed ehemplo nen Kristo, nayarin onkiling itayo ed saraman so ‘mangiki na saray layag tayo’ diad pangibagan masarag la so basta pambasa na Biblia tan pambilay na maabig. (2 Timoteo 4:3, NW) Aliwan importante ed si Satanas no sikatayoy aktual a miuulop ed sananey a relihyon odino basta mansiansia ed dilin relihyon tayo, daput no agtayo dadayewen si Jehova diad paraan a pangiwawanwan To panamegley na Salita tan organisasyon To.

9. Panon a masilib ya uusaren nen Satanas so sekso pian nagawaan to so getma to?

⁹ Masilib met a sasagyaten nen Satanas iray totoon mamenek ed normal iran pilalek ed lingon paraan. Saya so agawaan to diad seksual iran kagletan. Diad impangipulisay ed moralidad na Biblia, moriaen na dakel ed mundo a say seksual a relasyon ed baetan na agsanasawa so makanepegan a panliketan odino bilang paraan na pamaneknek a sikara la so walad edad. Komusta balet iray walay asawa? Dakel so mikakalugoran. Tan anggano anggapo so panagkalugoran ed panamaley da, dakel so manggunaet a midiborsyo odino misian ta pian makapiamong ira ed sananey. Say masilib a paraan nen Satanas so ginetman mangimpluensya ed totoon manbilay ed panliliket natan, a sasagyaten to ran mangibaliwala ed magnayon iran epekto ya aliwa labat lan diad sikara tan ed arum noagta nagkalalo la diad relasyon da ed si Jehova tan diad Anak to.​—1 Corinto 6:9, 10; Galacia 6:7, 8.

10. Diad anton paraan a sasalien nen Satanas a deralen so awawey tayo nipaakar ed imoralidad tan karawalan?

¹⁰ Sananey nin natural a pilalek et nipaakar ed panligliwaan. No maabig, nayarin makarepresko ed pisikal, ed nonot, tan ed emosyon. Balet panon so ikiwas tayo sano masilib ya usaren nen Satanas iray panagrelaks pian salien ton iyarawi so panagnonot tayo manlapud panagnonot na Dios? Alimbawa, amta tayo a kagula nen Jehova so seksual ya imoralidad tan karawalan. Sano saratan a bengatla so ipaparungtal na sine, programa ed telebisyon, odino diad teatro, kasin itultuloy tayon bantayan iratan? Nonoten met a seseguroen nen Satanas a saratan a bengatla so lalon onuges legan a manasingger so kaderal to, lapud “saray totoo a mauges tan saray managsaol onuges laran onuges, a managsaol ira, tan nasaol ira met a dili.” (2 Timoteo 3:13) Sirin nakaukolan a naynay itayon manbantay a sumpad saray kasiliban nen Satanas.​—Genesis 6:13; Salmo 11:5; Roma 1:24-32.

11. Diad antoran dalan a nayarin napatitan so anggan say toon mikabat la ed katuaan nipaakar ed espiritismo no sikato so aliwan alerto?

¹¹ Sikakabat itayo met a saray mibibiang ed anggan anton nengneng na espiritismo​—panagparles, panananem, odino panalin pitongtong ed inatey—​so makapadimla ed si Jehova. (Deuteronomio 18:10-12) Nodnonoten itan, agtayo isipen so piumen ed saray espiritun medyum, tan agtayoran balot abrasaen ed abung tayo pian agamilen iray gawa na demonyo. Balet kasin talinengen tayo ira no ompatnag ira ed telebisyon tayo odino diad Internet? Anggaman agtayon balot manpapatambal ed inaponan, kasin berberan tayo so ngalu-ngaloan na anak tayo, diad panisip a manalimbeng itan ed ugaw manlapud kasakitan? Diad pikabat a kokondenaen na Biblia so pananem ed arum, kasin abuloyan tayo so sakey a hipnotistan mangontrol ed nonot tayo?​—Galacia 5:19-21.

12. (a) Panon a nausar so musika pian panisipen itayo na satan nipaakar ed saray ideyan amta tayon mauges? (b) Panon a nayarin say panangawes na sakey a too, estilo na buek, odino paraan na panagsalita so mangipatnag na pandinayew to ed saramay ag-aabobonan nen Jehova so estilo na panagbilay da? (c) Anto so kakaukolan ed biang tayo pian ag-itayo nabiktima ed saray masilib a patipatit nen Satanas?

¹² Ibabaga na Biblia a say pilalawanan tan karutakan ed amin a nengneng so nepeg ya ag-anggan nasalambit ed limog tayo (a walaay marutak iran motibo). (Efeso 5:3-5) Balet anto no saray ontan a tema so antabayen na musikan walaan na balibalin togtog, makatenyeg a tono, odino mabanugbog a kompas? Kasin igapo tayon uliten iray lirikon mangirarayew ed andiay kasal a pisekso, ed panagdruga a para ed liket, tan arum niran makasalanan a gawa? Odino anggaman amta tayo ya agtayo nepeg ya aligen so panagbilay na totoon nipaglet ed ontan iran bengatla, kasin onkiling itayon mipara ed sikara diad pangalig ed paraan na panangawes da, saray estilo na buek da, odino paraan na panagsalita ra? Agaylan maamot iray metodon uusaren nen Satanas diad pangayat ed totoon mangalig ed mismon abulok a panagnonot to! (2 Corinto 4:3, 4) Pian ag-itayo nabiktima na masilib iran patipatit to, nepeg a paliisan tayo so kiyanor ed mundo. Kaukolan tayon nodnonoten no siopa so “saray manuley ed mundo na sayan kabilungetan” tan mitulot na impasya sumpad impluensya ra.​—1 Pedro 5:8.

Akinlongan a Mananalo

13. Panon a posible ed anggan siopa ed sikatayo, lapud agtayo inkayadyari, a talonaan so mundon uuleyan nen Satanas?

¹³ Sakbay na impatey to, imbaga nen Jesus ed saray apostoles to: “Manpakpel kayo! Tinalok so mundo.” (Juan 16:33, NW) Sikara met so nayarin mananalo. Manga 60 taon ed saginonor, insulat nen apostol Juan: “Siopa so manaeg ed mundo noag satay manisia a si Jesus sikato so Anak na Dios?” (1 Juan 5:5) Nipanengneng so ontan a pananisia diad pangunor ed saray ganggan nen Jesus tan manmatalek ed Salita na Dios, a singa ginawa nen Jesus. Anto ni so kaukolan? Kaukolan a mansiansia itayon maapit ed kongregasyon a sikato so Ulo. Sano makapankasalanan itayo, kaukolan a sikatayo so magunaet a magbabawi tan kerewen so panamerdona na Dios diad letnegan na bagat nen Jesus. Diad onian paraan, anggaman ed agtayo inkayadyari tan kalilingo, nayarian tayo met so magmaliw a mananalo.​—Salmo 130:3, 4.

14. Basaen so Efeso 6:13-17, tan usaren iray tepet tan teksto ed sayan parapo bilang basiyan diad panalaysay ed saray gunggona manlapud kada parte na espiritual a kinlong.

¹⁴ Pian ontalona, nakaukolan tayon isulong “so sankabukel a kinlong na Dios,” ya agpapaulyanan so antokaman a kabiangan na satan. Ipangasin lukasan so Bibliam ed Efeso 6:13-17, tan basaen so salaysay to nipaakar ed satan a kinlong. Insan, diad pangebat ed tepetepet ya ontumbok, imanoen no panon kan nagunggonaan diad proteksion ya intarya na kada piraso na kinlong.

‘Balkesan so awak na katuaan’

Anggaman nayarin kabat tayo la so katuaan, panon itayon nasasalimbengan na maparanay a panagaral, panagdalepdep ed katuaan na Biblia, tan say iyaatendi ed saray miting? (1 Corinto 10:12, 13; 2 Corinto 13:5; Filipos 4:8, 9)

“Kinlong na kaptekan”

Siopan estandarte na kaptekan iya? (Apocalipsis 15:3)

Iyilustra no panon a say isaew a panumbok ed saray matunong a dalan nen Jehova so mangipaarap ed sakey diad espiritual a desyang. (Deuteronomio 7:3, 4; 1 Samuel 15:22, 23)

‘Sinapinan a salisali na panangiparaan ed ebanghelyo’

Panon a magmaliw a salimbeng ed sikatayo so mabetbet a pangusar ed sali a manakar pian mitongtong ed totoo nipaakar ed saray tarya na Dios para ed kareenan? (Salmo 73:2, 3; Roma 10:15; 1 Timoteo 5:13)

Kinlong [“Baleg a samper,” NW] na pananisia’

No walaan itayo na pananisian niletneg a malet, panoy ikiwas tayo ed saray getman mangiter ed sikatayo na panduaruwa odino takot? (2 Arari 6:15-17; 2 Timoteo 1:12)

“Pamulaw na kilalaban”

Panon a say ilalo ed kilalaban so ontulong ed sakey ya agnapatitan na alablabas a kapagaan ed materyal iran kaykayarian? (1 Timoteo 6:7-10, 19)

“Kampilan na espiritu”

Diad anto so nepeg tayon panmatalkan a naynay sano lalabanan so mangaataki ed espiritualidad tayo odino ed arum? (Salmo 119:98; Uliran 3:5, 6; Mateo 4:3, 4)

Anto ni so makana ed italona diad espiritual a pibabakal? Panon kabetbet so kausar na satan? Nisesengeg ed siopa? (Efeso 6:18, 19)

15. Panon itayon makalubak diad espiritual a pibabakal?

¹⁵ Bilang sundalo nen Kristo, kabiangan itayo na baleg ya armadan mibabakal nipaakar ed espiritual. No mansiansia itayon alerto tan usaren a sankaabigan so kompleton kinlong a pibabakal a manlapud Dios, ag-itayo nadesyang ed sayan bakal. Imbes, magmaliw itayon makapabiskeg a tulong ed saray kaparan lingkor na Dios. Sikatayo so akaparaan tan magunaet ya onlubak, ikayat so maong a balita na Mesianikon Panarian na Dios, say mangatatawen a gobiernon marawal a susumpaen nen Satanas.

Repason Pantongtongan

• Akin a pansiasiansiaen na saray managdayew ed si Jehova so sigpot a neutralidad no nipaakar ed saray gotgotan na mundo?

• Anto so arum ed saray masilib a patit ya uusaren nen Satanas pian deralen so espiritualidad na saray Kristiano?

• Panon itayon nasalimbengan na espiritual a kinlong ya intarya na Dios diad espiritual a pibabakal tayo?

[Saray litrato ed pahina 76]

Saray nasyones so natitipon ed Armagedon