Mamerdona Ka Manlapu ed Pusom
“Ontan met naani gawaen nen Amak a mangatatawen ed sikayo, no sakey tan sakey ed sikayo agto perdonaen so agi to a manlapu ed puso yo.”—MATEO 18:35.
1, 2. (a) Panon ya impanengneng na kabkabat a managkasalanan so panangapresia to ed si Jesus? (b) Anton punto so impabitar nen Jesus bilang ebat?
SIKATO so nayarin sakey a balangkantis, ya agmo ilaloan a naromog ed abung na sakey a relihyoson too. No abigla so arum ed inkiwala to diman, mas abigla ira ed walan ginawa to. Inasinggeran to so lakin walaay sankatageyan a moralidad tan impanengneng toy panangapresia to ed walan gagawaen na saman a laki, ya inyuras toray lua to ed sali na laki tan impunas toy buek to.
2 Saman a laki, si Jesus, et agto inablog iyan bii, a “kabkabat ed syudad bilang sakey a managkasalanan.” Balet si Simon a Fariseo, a makan-abung, so napapagaan lapud ta say bii et managkasalanan. Inmebat si Jesus diad impanaglawi to’d duaran laki ya akaotang. Say sakey et baleg so otang to—a ngalngali duay taon a sueldoen na sakey a trabahador. Say sakey et kakaplo labat na satan so otang to, a kulang a taloy bulan a sueldoen. Sanen agda la nabayaran so otang da, say nampaotang so “mabulos ya amerdona ed sikaran dua.” Mapatpatnag, samay aperdona a babaleg so otang to et walaay babaleg a rason pian onkiwas unong ed aro. Kayari ton insiglaot so maabig a ginawa na bii, inyarum nen Jesus so prinsipyon: “Siopaman a naperdonay daiset, mangaaroy daiset.” Insan inkuanto ed bii: “Aperdona laray kasalanan mo.”—Lucas 7:36-48, NW.
3. Anto so nakaukolan tayon nonoten nipaakar ed inkasikatayon dili?
3 Tepetan mo pay inkasika, ‘No bilang ta siak imay bii odino no nipaarap ak ed onman met a kipapasen tan nipanengneng ed siak so panangasi, kasin magmaliw ak la’d satan a maruksa ya agmamerdona ed arum?’ Nayarin oniay iyebat mo, ‘Andin balot!’ Anggaman kuan, talaga kasin labay moy mamerdona? Manuna kasi itan ya impanwalnam? Mabulos mo kasin gagawaen itan a lanang, tan nadeskribe ka kasi na arum bilang manamerdona? Nengnengen tayo no akin a nepeg a manimano so balang sakey ed sikatayo a malinew tan tekep na dilin-panangusisa.
Nakaukolan so Pamerdona Lapud Ninatnat Itan ed Sikatayo
4. Anton katuaan so nepeg tayon aksobien nipaakar ed inkasikatayon dili?
4 Singa ed pakaantam la, sika et ag-ayadyari. No natepetan ka et aksobien mo ni ingen itan, anganko et nanonotan moray salitan walad 1 Juan 1:8: “No kuan tayo ya anggapo so kasalanan tayo, papalingoen tayoy inkasikatayon dili, et anggapo so katuaan ed sikatayo.” (Roma 3:23; 5:12) Parad arum, say inkamakasalanan et nayarin napatnagan diad butarbutar tan makapakigtot iran kasalanan. Balet anggano agmo naam-amtaan ya ontan iray nankasalananan mo, seguradon aminpigapiga la tan dakerakel lan paraan a sinmaew ka ed saray estandarte na Dios—nankasalanan ka. Agta ontan?
5. Anto so nepeg tayon pisalamatan ed Dios?
5 Sirin, nayarin mitukoyan so kipapasen mo ed walan deneskribe nen apostol Pablo: “Bangta, inatey kayo lapud saray kasalanan yo tan say ag-inkagalsiman na laman yo, sikayo pinabilay kayo na Dios ya impiulop ed sikato [Jesus], bangta pinerdona to so amin a kasalanan tayo.” (Colosas 2:13; Efeso 2:1-3) Imanoen so balikas a “pinerdona to so amin a kasalanan tayo.” Malaknab so sasaglawien na satan. Balang sakey ed sikatayo so walaay magenap a rason pian mikasin singa si David: “Nisengeg ed ngaran mo, O Jehova, perdonam so kasulitan ko, ta abalbaleg.”—Salmo 25:11.
6. Anto so naseguro tayo nipaakar ed si Jehova tan ed panamerdona?
6 Panon so pakagamor mo, odino siopaman ed sikatayo, na panamerdona? Say tombok et akaparaan si Jehova a Dios a mamerdona. Satan et kabiangan na personalidad to. (Exodo 34:6, 7; Salmo 86:5) Natalosan met ya iilaloan na Dios ya ontupleg itayo ed sikato diad pikakasi tan onkerew na panamerdona, ya ikerew tayon perdonaen to itayo. (2 Awaran 6:21; Salmo 103:3, 10, 14) Tan inyuksoy to lay basiyan unong ed ganggan pian ninatnat itan a panamerdona, salanti, say dondon bagat nen Jesus.—Roma 3:24; 1 Pedro 1:18, 19; 1 Juan 4:9, 14.
7. Diad anton paraan a kaliktan mon aligen si Jehova?
7 Kaukolan ya imanoen mo so padron ed inkamabulos na Dios a mamerdona no panon so nepeg a pantratom ed arum a totoo. Oniay impaimano nen Pablo, ya insulat to: “Manaanosan kayo ed sakey tan sakey, mapangasi, manpeperdonaan so sakey tan sakey, a singa met say Dios pinerdona to kayo [panamegley nen] Kristo.” (Efeso 4:32) Andi-duaruwan say punto nen Pablo et sasaglawien toy pakaaral tayo ed alimbawa na Dios, lapud oniay intuloy na ontumbok a bersikulo: “Aligen yo sirin so Dios, singa anak to kayon inararo.” (Efeso 5:1) Kasin naimanom so siglaotan? Unong ed mapuersan impankatunongan nen Pablo, pinerdona to ka nen Jehova a Dios kanian Sikatoy nepeg mon aligen tan magmaliw ka met a ‘mapangasi, mabulbulos a mamerdona’ ed arum. Balet tepetan mo pay inkasika, ‘Gagawaen ko kasi itan? No aliwan ontan so sipor a gagawaen ko, panggugunaetan ko kasi so magmaliw ya ontan, a talagan pambabanikelan kon aligen so Dios diad pagmaliw a manamerdona?’
Nakaukolan Tayon Pankimeyan so Pagmaliw a Manamerdona
8. Anto so nepeg a bidbiren tayo nipaakar ed inkatugyop na kongregasyon tayo?
8 Maabig no isipen a diad loob na Kristianon kongregasyon, walay pigaran pankanawnawa a kaukolan tayon agamilen so maridios a kurso na panamerdona. Duma balet so nagagawa. Tua, pambabanikelan na Kristianon agagi tayo so ontumbok ed padron nen Jesus nipaakar ed aro. (Juan 13:35; 15:12, 13; Galacia 6:2) Abayag da lan pankikimeyan, tan siansia nin pankikimeyan da, so pangitalirak ed paraan na panag-isip, panagsalita, tan kakikiwas a kaslakan ed sayan marelmeng a mundo. Labay dan talaga ya ipatnag so balon personalidad. (Colosas 3:9, 10) Ingen, agtayo nibaliwala so katuaan a say ingglobon kongregasyon, tan kada lokal a kongregasyon, so tugyopen na ag-ayadyarin totoo. Diad intiraminti, maseguron magmaong ira nen say dati, ingen ta siansia nin ag-ira ayadyari.
9, 10. Akin ya agtayo pankelawan sano onlesa iray problema ed baetan na agagi?
9 Diad Biblia et inggagala na Dios ya impaamta ed sikatayo a nailaloan tayoy ag-inkayadyari ed loob na kongregasyon, ed limog na agagi tayo. Singa bilang, konsideraen pa iray salita nen Pablo a nikurit ed Colosas 3:13: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidalman to ed siopaman; unong ed impamerdona na Katawan ed sikayo, ontan met so gawaen yo.”
10 Makabkabaliksan ya ipapanonot dia na Biblia ed sikatayo so siglaotan na pameperdona na Dios ed sikatayo tan say obligasyon tan pankaukolan ed biang tayo a perdonaen so arum. Akin a mairap iya? Lapud inaksobi nen Pablo a nayarin walay “pangidalman [na sakey] ed siopaman.” Amoria ton onlesa so ontan iran sengegan. Linmesa iratan nen inmunan siglo, anggan diad limog na saray Kristianon “sasantos,” a walaay ‘ilalo ya inyatol ed tawen ya onkana ed sikara.’ (Colosas 1:2, 5) Kanian naisip tayo kasin magmaliw a duma la natan anta say maslak ed tuan Kristianos et andian na panamatua na espiritu a sikara so “pinili’ Dios, sasanto tan inararo”? (Colosas 3:12) Sirin, agtayo nepeg ya isipen a walay nikadkaduman bengatlan makapuy sano walaray sengegan na dalem ed loob na kongregasyon—asakitan iran liknaan lapud peteg odino ipapasen ya impankasalanan.
11. Nipaakar ed anto so amasakbayan ed sikatayo nen babangatan a Santiago?
11 Ipapabitar met na saray salita na agi’d-ina nen Jesus a si Santiago a nailaloan tayo a diad tunggal paminsan et nayarin nipaarap itayo ed saray situasyon a kaukolan tayon perdonaen iray agagi tayo. “Siopa so makabat tan makatalos ed sikayo? Ipatnag to komon ed maong a panagbilay to so saray gawa to ed kauyamoan na kakabatan. Bangbalet no wala so ampait ya imon yo tan panangibiig ed puspuso yo, agkayo manpasirayew tan agki mantila ya onsumpa ed katuaan.” (Santiago 3:13, 14) ‘Ampait ya imon tan panangibiig’ ed puspuso na saray tuan Kristiano? On, malinew ya isusuheri na saray salita nen Santiago a linmesa itan ed kongregasyon nen inmunan-siglo tan onlesa met natan.
12. Anton problema so linmesa ed kongregasyon na Filipos nensaman?
12 Say sakey a peteg a napanalimbawaan et say duaran alanaan a Kristiano a walaay maabig a reputasyon lapud benebenek ya insekar day inkasikara a kaibay Pablo. Nayarin nanonotan moy abasam nipaakar ed di Euodias tan Sintique, a membro na kongregasyon diad Filipos. Anggano aliwan detalyado so impaneskribe ed satan, ipapabitar na Filipos 4:2, 3 a walay problema ed baetan dan dua. Kasin makasengeg itan ed bengatbengat tan ansakit ya impansalita, parungtalan ya impanleglemew ed sakey a kanayon, odino arum a pakapatnagan na pirmin paniimonan? Antokaman itan, satan so nagmaliw lan seryoson tuloy kanian akasabi anggad si Pablo a wala la’d Roma. Nayarin agmantotongtong iyan duaran maespiritual ya agagin bibii, ya oniiwas ira ed balang sakey diad saray miting odino mandederalan iran dua sano katongtong da iray mismon kakaaro ra.
13. Anto so nayarin akasolbar ed problema di Euodias tan Sintique, a mangitatarya na anton leksion ed sikatayo?
13 Wala kasi so antokaman a pipadparaan na satan, a singa agawa la ed arum a walad kongregasyon yo odino ed mismon akalanoran mo? Angga ni’d natan et nayarin onlesa no arum so ontan a problema. Antoy gawaen tayo? Diad samay kaso nensaman, pinaseseg nen Pablo so duaran dedikadon agagin bibii pian ‘manpara ira na nonot ed Katawan.’ Nayarin inmabobon ira a pantongtongan day problema, a linewen so bengatla pian nasolbar so agpantatalosan, pian ibesngaw na balang sakey so inkamabulos ton mamerdona, insan petepeteg a naalig da so awawey nen Jehova a manamerdona. Anggapo lay arum a rason a naisip noag say tinmalona si Euodias tan Sintique, kanian ontalona itayo met. Nayarin matalonan niyaplika natan so ontan ya awawey diad pagmaliw a manamerdona.
Mikareenan—Mamerdona
14. Akin a mabetbet a posibli tan sankaabigan lay basta pangilingwan ed personal ya agpantatalosan?
14 Anton talaga so nakaukolan ta pian makapanperdona sano walay problemam ed sakey a Kristiano? Tua, anggapo so simplin paraan, balet walay iyoopresi na Biblia a makatulong iran alimbawa tan matua iran bilin. Say manunan irerekomenda—anggano mairap ya awaten tan gawaen—et say pangilingwan la ed pamaakaran, a palabasen la itan. Mabetbet a no walay onlesan problema, a singa ed baetan di Euodias tan Sintique, iisipen na kada too a say arum so nalilingo odino makankasalanan. Kanian diad kipapasen a singa ontan, nayarin isipen mon say arum a Kristiano so manunan natetel o dino akapasakit a maong. Anggaman kuan, nayarian mo kasin basta palabasen lay agawa diad panamegley na panamerdona? Nayarin singa mairap iya, a nepeg mon moriaen a no samay sakey a Kristiano et sikato so manunaan odino sigpot ya akankasalanan, sika so manunaan lan mamalabas ed walan agawa unong ya aperdona tan angangga la.
15, 16. (a) Panoy impaneskribe nen Miqueas ed si Jehova? (b) Antoy kabaliksan na ‘lalabsanan lay Dios so impakasumlang’?
15 Agtayo komon lilingwanan so Dios bilang alimbawa tayo ed panamerdona. (Efeso 4:32–5:1) Nipaakar ed padron To diad pamalabas la’d saray impakalukso, oniay insulat nen propeta Miqueas: “Siopa so sakey a Dios a singa sika, a mamerdona na inkauges, tan labsanan to so impakasumlang na kera ed mananawir to? Sikato agto pagnayonen so sanok to ed ando lan ando, ta manliket ed maaro ya abig na linawa.”—Miqueas 7:18.
16 Diad panedeskribe ed si Jehova bilang sakey a ‘lalabsanan to lay impakasumlang,’ aglabay ya ibaga na Biblia ya agto la nanonotan iray impakalingoan, a singano malingwan la. Konsideraen pa iray kipapasen nen Samson tan David, a balang sakey ed sikara et akagaway seryoso iran kasalanan. Sarag na Dios a nodnonoten iratan ya impankasalanan kayari na andukey a panaon; ya anggan sikatayo et akabatan tayo so arum ed saray impankasalanan da lapud impairekord itan nen Jehova diad Biblia. Siansia, say manamerdonan Dios tayo so angipanengneng na panangasi ed sarayan dua, ya imparungtal to ira ed sikatayo bilang alimbawa ed pananisia ya aligen.—Hebreos 11:32; 12:1.
17. (a) Anton paraan so makatulong ed sikatayo pian napalabas tayo laray impakalingoan, odino impakaopendi, na arum? (b) No pambanikelan tayo itan, panon tayon naaalig si Jehova? (Nengnengen so paimano’d leksab.)
17 On, nayarian nen Jehova a ‘labsanan’ a laray impakalukso, unong ya aminpigan inkerew ed sikato nen David. (2 Samuel 12:13; 24:10) Sarag tayo kasin aligen so Dios ed onian paraan, a mabulbulos a palabasen laray impanleglemew tan impamasakit ed sikatayo na kapara tayoran lingkor lapud agda inkayadyari? Isipen mo pan akalugan ka ed eroplano ya ombuebuelo la’d patekkiaban. Diad intandag mo, anengneng mo ed asingger na patekkiaban so sakey a kabat mo a makapasyodot so imamari to a singano ugaw a mandilat. Antam a sikatoy adismaya tan nayarin sankanonot to ka. Odino nayarin lilingwanan to ka la. Antokaman so kipapasen, legan a mamapatayong lay eroplano, manatagey ka legan a dungdunglawan mo la imay bii, a singa lambengat tulnek so nengneng to. Diad loob na sakey oras et nilasus kilometro lay kaarawim, tan say makapasakit ya imamari to so agmo la nanengneng. Mipadpara, diad dakel a panaon et ontulong itan ed sikatayo pian mamerdona no aligen tayo si Jehova tan makabat a palabasen laray inkaopendian. (Uliran 19:11) Agta say inkaleglemew so ompatnag a baliwala la kayari na samploy taon odino duan lasus taon ed Milenyo? Akin ta no lingwanan mo la itan?
18. No ompatnag a singa agtayo nalingwanan so inkaopendian tayo, anton bilin so niyaplika tayo?
18 Balet no maminsan, nayarin impikasim la so walan agawa tan sinalim so mamerdona, balet ta naliknam ya agmo nasarag. Anto sirin ey? Impaseseg nen Jesus so iyakar ed samay sakey tan solbaren so agpantatalosan a sikayon dua labat pian nagamoran so kareenan. “Kanian no isasaklang mo so bagat mo ed altar, et nanonotan mod’man a say agim et walay bengatlan pamusolan to ed sika. Itilak mod’man so panangarom ed arap na altar, et onla ka, ta mipulangan ka nin unona ed agim, insan ka ed satan onla tan isaklang mo so panangarom.”—Mateo 5:23, 24.
19. Anto so nepeg ya awawey tayo tan anton awawey so nepeg tayon paliisan diad pikareenan tayo ed agi tayo?
19 Mabitabitar, ag-imbaga nen Jesus ya onla ka ed agim tan pekderan mo’d sikato a duga ka tan sikato so aliwa. Nayarin sikato so alingo. Balet nayarin walay kasalanan na balang sakey. Diad antokaman a kipapasen, say kalat et aliwan say paaminen, odino patalimukoren so arum, a singa panangibaga. No ontan so paraan mo ed pitongtong, segseguradon onsaew ka. Agmet la nakaukolan ya ipanonot so kada detalye na peteg odino ipapasen ya inkaopendian. Sano apatnagan ed kalmadon impantongtong yo ya atekepay espiritu na Kristianon aro so makapaermen ya ag-impakapantalosan ed pantok na problema, nayarian yon duan solbaren so pamaakaran. Balet anggano agmanresulta ed sigpot a pakapampaknaan so impantongtong, lawas kasin kaukolan so sigpot a pampaknaan? Agta magmaong ni a say pampaknaan yon dua et say masimoon a pankaliktan yon dua a makapanlingkor ed manamerdonan Dios tayo? Sano arapen mo itan a katuaan, nayarin mas mainomay ya ibaga na balang sakey manlapud puso to so, “Dispensam ak ta diad agtayo inkayadyari et agta akapantalosan. Ipangasim pan lingwanan ta’la iya.”
20. Anto so naaralan tayo manlapud alimbawa na saray apostol?
20 Tandaan ya anggan saray apostol et walaan na saray agpantatalosan, a singa nen pipilaleken na arum ed sikara so pakawalaay babaleg a kagalangan. (Marcos 10:35-39; Lucas 9:46; 22:24-26) Nansengegan itan na balingaan, anganko et sakit na linawa, odino inkaopendian ni ingen a maong. Balet ta apalabas da iratan ya ag-impakapantalosan tan siansian nankimey iran sankakaiba. Diad saginonor et insulat na sakey ed sikara: “Say maliket a mangaro na bilay, tan onnengneng na maong ira ya agew, nepeg to ya amperen so dila to ed mauges, tan aleg a saray bibil to mangibalikas ira na kapaklapan. Arawian to so mauges, tan gawaen to so kaabigan: Anapen to so kareenan tan tumboken to.”—1 Pedro 3:10, 11.
21. Anto so intarya nen Jesus a marandanet a bilin nipaakar ed panamerdona?
21 Naimano tayo ed akadkauna a say sakey a pamaakaran ed inkidatdatak na saray bengatla et: Pinerdona na Dios so dakerakel ya impankasalanan tayo ed apalabas, kanian kaukolan a sikatoy aligen tayo tan perdonaen tayoray agagi tayo. (Salmo 103:12; Isaias 43:25) Balet wala ni sananey a pamaakaran. Kayari ton inter so modelon pikakasi, oniay inkuan nen Jesus: “No perdonaen yo iray totoo ed kaugsan da, say Ama yon mangatatawen perdonaen to kayo met.” Kayari na masulok a sakey taon, inulit to iyan punto, ya imbangat toray babangatan ton manpikasi: “Paandien mo ed sikami so saray kasalanan mi; ta sikami met paandien mi so balang sakey ya akaotang ed sikami.” (Mateo 6:12, 14; Lucas 11:4) Insan, pigaran agew sakbay na impatey to, inyarum nen Jesus: “Sano mikakasi kayon sialagey mamerdona kayo, no walaan kayoy bengatlan pamusolan ed siopaman; pian say Ama yo met a wala ed tawen perdonaen to kayo ed saray kasalanan yo.”—Marcos 11:25.
22, 23. Panon a naapektaan so arapen tayo diad inkamabulos tayon mamerdona?
22 On, saray iilaloan tayo pian tuloytuloy itayon perdonaen na Dios et akadependin tuloy ed inkamabulos tayon mamerdona ed agagi tayo. Sano onlesa so personal a problema ed baetan na saray Kristiano, tepetan moy inkasika, ‘Agta say pakagamor ed panamerdona na Dios so mas importanti ni nen say pamekder ko a nankasalanan so sakey ya agi lapud walaray angkelag ya impakaleglemew, andi-kakanaan ya inkaopendian, odino pigaran pakapatnagay ag-inkayadyari na too?’ Antam so ebat.
23 Balet, anto no say problema et mas seryoso nen say angkelag a personal ya inkaopendian odino problema? Tan kapigan onaplika so simbawa nen Jesus a nikurit ed Mateo 18:15-18? Ontumbok a konsideraen tayo irayan pamaakaran.
[Paimano ed leksab]
a Inkuan na sakey ya iskolar a say Hebreon metaphor ya inusar ed Miqueas 7:18 so “inyulibay ed awawey na sakey a managbaroy ya onlalabas ya agto iimanoen so bengatlan agto labay ya imanoen. Say punton ipapasabi na satan et aliwan say, agnaiimano na Dios so kasalanan, odino impasen ton anggapoy kakanaan odino baliwala itan, noagta say kabaliksan to et agto iimanoen itan diad partikular iran kaso pian walay panusaan to; ya agto manusa, noagta mamerdona.”—Uko-ukom 3:26; 1 Samuel 16:8.
Kasin Natandaan Yo?
◻ Panon so impangiter nen Jehova ed sikatayo na padron a tumboken nipaakar ed panamerdona?
◻ Anto so nepeg tayon nonoten nipaakar ed saramay walad loob na kongregasyon?
◻ Diad maslak a kipapasen, anto so nepeg tayon gawaen no aleglemew odino apasakitan itayo?
◻ No nakaukolan, antoy gawaen tayo pian makapikareenan ed agi tayo?
[Litrato ed pahina 15]
Sano onlesa so agpakapitalosan ed sakey a Kristiano, palabasen la itan; diad ilabas na panaon et kalkalnan nalingwanan lay agawa