Gayagan Nigana Parad Saramay Makakaromog na Katuaan

DIAD attic to, aromog na sakey a lakin taga Finland so libron The Divine Plan of the Ages. Tamtampol ton binasa itan, tan ag-abayag et inkuanto’d inkasikato, ‘Saya so katuaan, saya so katuaan.’ Diad inleksab nanlapud attic, imbaga to’d akulaw to, “Aromog ko lay tuan relihyon.”

Sayan eskperiensia so nikadkaduma diad paraan ya impakaromog na sayan laki ed katuaan, naisalaysay na dakel ed Tastasi nen Jehova so mipadparan reaksion. Amin da so makapangibaga ed sika ed gayagan itarok na pakaromog na katuaan. Saray onggendan ya eksperiensia so mangipabitar ed saya.

Mangitatarok na Gayaga so Tuan Bangabangat na Biblia

Si Margarita Königer so binmaleg diad Munich, Alemanya, legay Guerra Mundial II. Kaslakan a nabantag et abomba tan apoolan a kaabungan. Say kuya to so inatey ed bakal. Diad pimimisa to ed Iglesia katolika, nadngelan toray pikakasin nibalikas parad saray sundalon Aleman tan ed führer, si Hitler. Kayari bakal, naawat to so iskolarsip a man-kolehyo ed Estados Unidos bilang kabiangan na student-exchange program. Aromog ton makaaro iray totoo ed sikato, kanian nanumameng no antoy anagdag ed totoo, a say natural a pilalek da et say panbilay a mareen, pian agmanmatalek tan mamusol ed balang sakey legay bakal. Diad impawil to ed Munich, akapiabet ed Tastasi nen Jehova, tan diad panamegley na impangiyaral da na Biblia, aromog toray ebat ed tepetepet to. Kuanto: “Nipanengneng ed siak manlapud Biblia a nalalanor iray marelmeng ya espiritun puersa . . . Tatawagen ira na Biblia a ‘saray manuley na mundo,’ tan, diad tua et ibabaga ton si Satanas ‘so mamapalikdo ed interon atooan a dalin.’ . . . Diad pakakaimano’d agmaridios, dinidiablon kiwakiwas na nasyones tan totoo, agaylan makatunongan tan makapenek iyan ebat!”​—Efeso 6:12; Apocalipsis 12:9.

Intuloy nen Margarita: “Angitarok ed siak na baleg a gayaga so pakaamta nipaakar ed probisyon na Dios ed panresolbi ed saray problema ed dalin. Andi, aliwan diad panamegley na sakey ya ideolohya odino administrasyon na too, a singa improponi na minumundo iran edukador. Imbes, ipapanengneng na Biblia a sakey a balon mangatatawen a gobierno so mangasikaso’d saray kurang ed dalin. . . . Imbangat nen Jesu-Kristo iray patumbok ton manpikasi: ‘Onsabi komoy panarian mo.’ . . . Ginmapon akabatan kon sayan panarian so peteg a gobierno tan diad panamegley to lambengat a nadampot so sankamundoan a kareenan.” Diad loob na ngalngali 30 taon, akapanlingkor si Margarita bilang misionera ed limaran bansa ed Aprika​—say kaunoran a 19 a taon et inusar diad impangiyabawag na katuaan ed mapaabeban totoo na Ouagadougou, Burkina Faso.

Say eskperiensia nen Margarita so agnikadkaduma. Dakel so kinmiwas met na onman kapositibo sanen aromog dan say klero na Kakristianoan so manpipikasi ed Dios parad panbiktorya na parehon dapag ed panbabakal. Naiimano na saray matuan-impanpuso so inkamakatunongan na salaysay na Biblia a say Dios et andiay pibabali ed bakabakal na too noagta saraya so linmesa lapud “say sankamundoan so mandokdokol ed kaugsan.” Naaralan na sarayan manaanap na katuaan a saray tuan Kristiano so “agkabiangan na mundo” balet ta kaukolan a mansiansian neutral ed saray kurang to. Lapud naamtaan ya onia so talindeg na saray Tasi nen Jehova, sarayan balo nin interesado so kumbensido ya aromog day katuaan. Sikaray onaaligwas ed ilalo tan gayaga legan a gagamoran da so ondaraak a pikakabat no akin ya aabuloyan na Dios so karelmengan tan no panon ya agla manbayag et mangitarok na kareenan tan inkatunong ed dalin diad panamegley na Panarian to.​—1 Juan 5:19; Juan 17:16, NW; Mateo 6:9, 10.

Mangitarok na Gayaga Iray Tuan Prinsipyo ed Biblia

Alikna nen Daniel Rosero na Ecuador a say bilay et andiay kabaliksan, kanian ginapoan toy manbuanges. Say iglesian inatendian to so angibangat ed sikaton say mogmon bengatlan nailaloan to et say ipapatey tan mangapuy-apuy ya impierno. Inyebat to, “Napoolan ak met lanlamang di manbuanges ak la!” Waloray membro na pamilya to ya agto susustinien, tan naynay ton kokolkoley asawa to, si Delia. Baleg ya impanguman so agawa ed sakey a kabuasan na Simba sanen binisita ira na Tastasi nen Jehova tan nigapo so panagaral na Biblia. Diad inmunan inyatendi nen Daniel ed sirkiton asamblea na Tastasi nen Jehova et amoria ton aromog to lay katuaan. Kuanto: “Pandinayewan ko so inka-uksoy. Makapantatalosan iray totoo, dakel ed sikara. Naliknam so aro na dakel. Anggapoy mansisigarilyo. Anggapoy mansasalitay mabanday. . . . Nanonotan ko ni sanen naisip kon, ‘Saya so katuaan!’ Aliwan lapud takot ed ipapatey odino takot ed pangangga na mundo so amakiwas ed siak. Saman et say inkalinis na organisasyon.”

Nagmaliw a Tastasi nen Jehova so interon pamilyay Rosero. Inmaligwas so bilay na pamilya ra tan ontan met ed situasyon da ed pinansyal legan ya iyaaplika ra iray prinsipyo na Biblia. Onia so kuan nen Delia Rosero: “Amta yo, otang kon amin iya ed say katuaan na Biblia. Anto lay arapen na ananak ko no anggapoy Salitay Dios? Amin dan pito so abautismoan la tan maligen. Say katuaan so mankabaliksan na kumpleton balon bilay, balon liket, parad siak.”

Say eksperiensia na pamilyan Rosero so aliwan nikadkaduma. Dakel ed panaon tayo so gogonigonen na saray problema. Sakey a rason et saray moral ya estandarten intarok ed Biblia so inkalapagan ya agla narerespeto, aliwan singa saray asasakbay a kailalakan. Maslak a relihyon so ontutumbok ed sayan kurang, balanglan diad ngaran na panpasaol odino lapud liknaen dan lapud panguman-uman na panaon et say datin moralidad so anggapo la’d panaon. Kanian, singa say arum, saray Rosero so ataynan a kapa-kapa ya anggapoy panangiwanwan na Biblia. Anggaman ontan, sano naamtaan na saratan a mapaabeban totoo so panmoria na Dios ed saray moral tan bilay na pamilya, tamtampol dan iyaaplika iray naaaralan da. Manlapud saray istorya ra et nanengneng tayo so maabig iran resulta ed panggawa na ontan.

Nepeg a Bayuboan so Gayaga

Anggaman ontan, agkabaliksan na saya a say sakey a Kristiano so lawas a walad magayagan kipapasen. Mapatnag, apektado met iray Kristiano ed saray kairapan a kidudungetan na kaslakan, a singa say agpaka-impleyo, sakit, tan ipapatey. Saray Kristiano so kaukolan met a mibiang ed mantultuloy a pibabakal sumpad dilin ag-inkayadyari tan kaleteyan. Ibabaga na salaysay na Biblia ya “apaermen a toloy [si Lot] na sankaugsan ya inpanbilay na saray mauges a totoo” diad syudad na Sodoma. Agnapaliisan na matoor a Kristianos so pakalikna met na onman sano nanengneng a manatalonay marelmeng iran kipapasen.​—2 Pedro 2:7, 8.

Anggaman ontan, saramay akaromog na katuaan so walaan na bentaha. Alimbawa, say mananisian maneermen lapud sakey ya inatey so agnakaukolan a manliknan “onermen, onong na singa saray arum ya angapo so ilalo ra.” Walay anggaan na paneermen to. Tua met iya nipaakar ed arum niran problema. Kabat na toon akaromog na katuaan a temporaryo lambengat so peles a kairapan. Say ilalo so mamainomay ed pansungdo ed silong na saray kairapan. Ontutulong met so asimbang ya istiloy-kabibilay.​—1 Tesalonica 4:13.

Insimbawa iya nen Pablo ed saray Kristiano: “Mangayaga kayo ed Katawan lawas. Kuan ko lamet, Mangayaga kayo.” (Filipos 4:4) Ipapanengneng na saya a legan a nadampot tayon amin so gayaga, posibli met ya agnawalaan na satan. Saray kapagaan ed sayan daan a sistemay bengabengatla so napaneknekan a sakey a babeng. Niarum ni, ibabaga ed sikatayo na Biblia a kaukolan tayon bayuboan so gayaga, a sakey ed saray bunga na espiritu na Dios. (Galacia 5:22) No mantultuloy kan mangala na pikakabat ed katuaan tan ipanonot mo’d inkasika iray espiritual a kayamanan ya itatarok to tan siansian itarok to, say gayagam so agnabawasan. Satan so lalon onbiskeg legan a manasingger tayo ed panaon sano say Dios et “punasen toy amin a lua” manlapud kamataan na totoo tan sano say “nangis o dageyem, o ot-ot” so linmabas la.​—Apocalipsis 21:4.

[Saray litrato ed pahina 8]

Dakel so mandinayew ed gayaga tan maong ya inkaorganisa diad saray asamblea na Tastasi nen Jehova