“Say Deen na Dios, a Talonaan to’n Amin a Pakatalos”
DIAD interon awaran, say matoor ya ariripen na Dios so akasagmak la na saray panaon na agaylan emosyonal a gonigon. Agaylan tua itan natan, ta sikatayoy manbibilay ed “mairap a panaon a pidenengan”! (2 Timoteo 3:1, NW) Sinimbawa nen apostol Pablo iray Kristiano ya imatalek daray kapagaan da ed si Jehova diad panamegley na pikakasi. Anto so resulta? “Say deen na Dios, a talonaan to’n amin a pakatalos, bantayan to so kapusoan yo tan saray nonot yo ed Cristo Jesus.”—Filipos 4:7.
Anto iyan “deen na Dios”? Satan so inkakalmadon manlalapud pakawalaan na maapit a siglaotan ed Manamalsa. Say ontan ya inkaapit so mangiiter ed sikatayo na talek, ya antokaman iray pakadedesdesan tayo et “agpaulyan [nen Jehova] so baley to, agto ikaindan iray kien to.”—Salmo 94:14, Today’s English Version.
Agkabaliksan na saya a liktar tayo la’d saray kairapan. “Amayamay so pakapaermenan na matunong,” insulat na salmista. (Salmo 34:19) Balet say kareenan na Dios so mangitatarok na inawa. Panon?
Say deen na Dios et “talonaan to’n amin a pakatalos,” insulat nen Pablo—odino singa panangipatalos na Concordant Version, satan so “superyor ed antokaman a kipapasen na nonot.” Lapud kapagaan et makalikna tayo na nanduruman panaburidoan na emosyon. (Eclesiastes 7:7) Ingen, say deen na Dios so mamaligen ed sikatayo, nagkalautla sano kaukolan tayo so “sankatageyan ya inkabaleg na pakayari.”—2 Corinto 4:7; 2 Timoteo 1:7.
Niarum ni, say deen na Dios so sakey a proteksyon. Satan et nayarin “bantayan to so kapusoan,” a singa insulat nen Pablo ed saray taga Filipos. Say Griegon salitan nipatalos a “bantayan” so sakey a termino ed militar a maseguron mangipapanengneng na mental a retrato ed saray mantultuloy a sanlabi tan sanagew a panagbantay. Diad mipadparan paraan, say deen na Dios so makakiwas a singa 24-oras a guardiya ed saray kapusoan tan pakayari kanonotan tayo.—1 Corinto 10:13; ipareng so Efeso 4:26.
Kokonsideraen so makagonigon iran angat a kidudungetan tayo natan, agta say deen na Dios so bengatlan pisalamatan tayo?—Salmo 18:2; ipareng so Exodo 40:38.