Akin a Misalsalamat?
LAPUD naoperaan ed tenten, kaukolan a salatan nen Harley so anapan ton mekaniko ed sakey a mangopisina. Sanen atepetan no antoy liknaan to ed sayan impansalat, inkuanen Harley: “Talagan anap-anapen koy panmekaniko. Balet, prangkaan, mas maliket ak ed peles a trabahok nen say dati.”
Diad pangiiter na rason ed inkakontento to, onia so insalaysay nen Harley: “Lapud awawey na saray katrabahoan ko. Aliwan singa ed saramay datin pantratrabahoan ko, say peles a superbaysor ko tan saray katrabahoan ko so maapresia ed gagawaen ko, tan akaparaan iran mangomenda. Saya so nanggaway baleg a pandumaan.” Lapud liknaen ton mausar tan nakaukolan, si Harley so maliket la natan ya impleyado.
Saray balikas na komendasyon odino otang a linawa, sano makanepegan et talagan makapalikliket. Diad biek a dapag, say epekto na andiay otang a linawa so kasinagem na singa inkuan nen Shakespeare: “Onsibok ka, onsibok ka, sikan dagem ed panaoy ambetel, ya aliwan ontan met lan agmapangasi a singa ed andiay otang a linawa na too.” Makapaermen, dakel lay akasagmak na ontan ya ag-inkapangasi.
Manbantay Sumpad Andiay Otang a Linawa
Mataltalag la natan so masimoon a panangibalikas na otang a linawa. Singa bilang, onia so intepet na sakey a managsulat: “No walay panaon na nobya ya addressan so 200 ya imbitasyon ed kasal, akin et sikatoy andian na panaon a mansulat na antikey pian pisalamatay 163 a nanregalo?” Mabetbet ya anggan say simplin salitan “salamat” et agla nibaga. Ompapalalon nasasalatan so otang a linawa na awawey a siak-ni. Sayan situasyon so sakey ed pakabidbiran iran tanda na kaunoran iran agew. Impasakbay nen apostol Pablo: “Nepeg mon namoria a diad kaunoran iran agew saray panaon so napano na kapeligroan. Saray totoo so magmaliw a nagnap a makasarili . . . Sikaray magmaliw a nagnap ya andian na otang a linawa.”—2 Timoteo 3:1, 2, Phillips.
Diad arum a kaso, say otang a linawa so sasalatan na panaglarog. Saray balikas na otang a linawa so manlalapud puso ya agnononotey personal a pakagunggunaan. Balet, say panaglarog, a kaslakan et pankuankuanan tan alablabas, so nayarin onggagapo’d niamot a motibon onasenso odino pakagamor na pigaran personal a pankaabigan. (Judas 16) Nilikud ed pambolatis ed lalarogan, say ontan a maamoyot a salita so nayarin magmaliw a bunga na inkamaapatagey tan inkakinon. Diad ontan, siopay malabay a nabiktima na panaglarog? Balet say masimoon ya otang a linawa so talagan makarepresko.
Say toon mangibalikas na otang a linawa so nagunggunaan ed panggawa’d satan. Say ligsan naeekperiensia to lapud impapuson pisasalamat so mangarum na liket tan kareenan ed sikato. (Ikompara so Uliran 15:13, 15.) Tan bilang sakey a positibon kualidad, say otang a linawa so manasalimbeng ed sikato ed negatibo iran liknaan a singa say sanok, pan-imon, tan panimbel.
“Ipanengneng Yoy Inkasikayon Misalsalamat”
Papasesegen itayo na Biblia a bayuboan so espirituy otang a linawa, odino inka-masalamat. Onia so insulat nen Pablo: “Dia ed amin a bengatla misalamat kayo. Ta sikatoya so linawa na Dios ed Kristo Jesus nipaakar ed sikayo.” (1 Tesalonica 5:18) Tan sinimbawa nen Pablo iray taga-Colosas: “Abuloyan a say kareenan nen Kristo so mangontrol ed kapusoan yo . . . Tan ipanengneng yoy inkasikayon misalsalamat.” (Colosas 3:15, NW) Lugan na dakel a salmo so balikas na pisalsalamat, ya ipapanengneng ton say impapuson otang a linawa et maridios a birtud. (Salmo 27:4; 75:1) Malinew, napapaliket si Jehova a Dios sano ipapatnag tayoy pisalsalamat ed inagew-agew a pamaakaran na bilay.
Balet antoran sengegan ed sayan agmisalsalamat a mundo so mamapairap ed sikatayon mamayubo ed espirituy otang a linawa? Panon tayon nipanengneng so misalsalamat ya awawey ed inagew-agew a kabibilay? Sarayan tepet so singbaten ed ontumbok ya artikulo.