Panon so Italindeg Yo ed Arap na Yurongan a Panangukom?

“Sano say Anak na too so onsabi ed gloria to, tan amin ya anghel et kaiba to, insan sikatoy onyurong ed maglorian trono to.”​—MATEO 25:31.

1-3. Antoy rason tayo no akin a walaan tayo na positibon panmoria nipaakar ed inkahustisya?

‘WALAY KASALANAN ODINO ANGGAPO?’ Dakel so manduaruwa diad pakakadngel da na saray report nipaakar ed pigaran kaso ed korte. Nayarin gunaet na saray ukom tan membro na hurado a magmaliw a matua, balet kasin naynay a walay inkahustisya? Agta akabalita ka la na ag-inkahustisya tan ag-inkasimbang a nagagawa’d hudisyal a proseso? Say ontan ya ag-inkahustisya so aliwa lan balo, a singa nanengneng tayo’d ilustrasyon nen Jesus a naromog ed Lucas 18:1-8.

² Antokaman so naeksperiensiam ed hustisya na too, imanoen pay konklusyon nen Jesus: “Agta maseguron gawaen na Dios ya ikdan na inkahustisya iray pinili ton onkekelyaw ed sikato ed agew tan labi . . . ? Ibagak ed sikayo, maples Ton gawaen a naikdan ira na inkahustisya. Anggaman kuan, sano say Anak na too so onsabi, talaga ta’n naromog to so pananisia ed dalin?”

³ On, seguroen nen Jehova a saray ariripen to diad kaunoran et makaawat na inkahustisya. Nalalanor met si Jesus, lalo la natan lapud sikatayoy manbibilay diad “kaunoran iran agew” na kaplesan a marelmeng a sistema. Magano lan usaren nen Jehova so makapanyarin Anak to pian kompleton mangekal na karelmengan ed dalin. (2 Timoteo 3:1; 2 Tesalonica 1:7, 8; Apocalipsis 19:11-16) Makagamor tayo na aralem a pakatalos nipaakar ed betang nen Jesus manlapud sakey ed saray kaunoran ya inter ton ilustrasyon, a mabetbet a tatawagen a parabolo na saray karnero tan saray kanding.

4. Antoy pakatalos tayo ed panaon na kasumpalan na parabolo na saray karnero tan saray kanding, balet akin ya ikdan tayo na imano natan itan a parabolo? (Uliran 4:18)

⁴ Abayaglan atalosan tayo a saray parabolo so mangililitrato ed si Jesus ya akayurong bilang Ari nen 1914 tan nanlapulad satan et manguukom la​—andi-anggaan a bilay parad totoon papaneknekan dan sikaray karnero, permanentin ipapatey parad saray kanding. Balet say panangikonsidera lamet ed parabolo so mangituturo na sakey a nauman a pakatalos ed panaon tan say ililitrato to. Sayan panagdalisay so mangidadanet ed kaimportantian na kimey tayon panagpulong tan kabaliksan na kiwas na totoo. Pian nanengneng so basiyan parad say araldalem a pakatalos ed parabolo, konsideraen tayo pa no antoy ipapanengneng na Biblia nipaakar ed si Jehova tan si Jesus, nampara bilang Arari tan bilang Uko-ukom.

Si Jehova Bilang say Supremon Ukom

5, 6. Akin a matukotukoy a moriaen si Jehova a namparan Ari tan Ukom?

⁵ Si Jehova so manuuley ed uniberso tekep na pakayari ed amin a pinalsa. Lapud andian na gapoan tan anggaan, sikato so “Ari na inkamagnayon.” (1 Timoteo 1:17; Salmo 90:2, 4; Apocalipsis 15:3) Sikatoy walaan na autoridad a manggawa na saray totontonen, odino saray ganggan, tan iyimpuersa iraya. Balet katekep na autoridad to et say pagmamaliw to ya Ukom. Onia so kuan na Isaias 33:22: “Si Jehova so Ukom tayo, si Jehova so Manangiter-totontonen tayo, si Jehova so Ari tayo; sikaton mismo so mangisalba ed sikatayo.”

⁶ Abayag lan bibidbiren na ariripen na Dios a si Jehova so Ukom na saray kaso tan saray isyu. Alimbawa, kayari impanimbang ed ebidensya na “Ukom ed interon dalin” nipaakar ed karelmengan na Sodoma tan Gomorra, namparan inukom toray manaayam a manepeg a naderal tan inyimpuersa itan a matunong a panangukom. (Genesis 18:20-33; Job 34:10-12) Agaylan mamaseguro itan ed sikatayo a naamtaan a si Jehova so sakey a matunong ya Ukom a lawas manusumpal ed saray panangukom to!

7. Panon so inyakto nen Jehova bilang Ukom diad impideneng to ed Israel?

⁷ Diad kadaanan ya Israel, no maminsan et direktan manguukom si Jehova. Agta sikayo so naligliwa ed saman diad pakaamtan say sakey ya ayadyarin Ukom so mandedeside ed saray pamaakaran? (Levitico 24:10-16; Numeros 15:32-36; 27:1-11) Angitarya met so Dios na “hudisyal iran desisyon” a nagnap a maong bilang estandarte ed panangukom. (Levitico 25:18, 19; Nehemias 9:13; Salmo 19:9, 10; 119:7, 75, 164; 147:19, 20) Sikato so “Ukom ed interon dalin,” kanian sikatayon amin so apektado.​—Hebreos 12:23.

8. Anton nisisiglaot a pasingawey so anengneng nen Daniel?

⁸ Walaan tayo na paneknek na “tasin-akanengneng” nipaakar ed sayan pamaakaran. Si propetan Daniel so naikdan na pasingawey na maatap ya ayayep a mangilalaman ed saray gobierno odino imperyo. (Daniel 7:1-8, 17) Inkuanto ni: “Walaray trono ya impasen tan yinmurong so Kadaanan na saray Agew. Say kawes to so amputi a singa niyebe.” (Daniel 7:9) Imanoen ya akanengneng si Daniel na saray trono “tan yinmurong so Kadaanan na saray Agew [si Jehova].” Tepetan moy inkasika, ‘Kasin tatasian dia nen Daniel a say Dios so nagmaliw ya Ari?’

9. Anto so sakey a kabaliksan na ‘akayurong’ ed trono? Mangiter na saray alimbawa.

⁹ Bueno, sano nabasa tayo a say sakey et “yinmurong” ed trono, nayarin isipen tayoy pagmaliw ton ari, ta no maminsan et uusaren na Biblia so ontan a balikas. Alimbawa: “Sanen ginmapon manari [si Zimri], kayurong to ed trono to, sikato . . .” (1 Arari 16:11; 2 Arari 10:30; 15:12; Jeremias 33:17) Oniay inkuan na sakey a Mesianikon propesiya: “Sikatoy nepeg ya onyurong tan manguley ed trono to.” Kanian, say ‘iyurong ed trono’ so nayarin mankabaliksan na pagmaliw ya ari. (Zacarias 6:12, 13) Nadedeskribe si Jehova bilang sakey ya Ari ya akayurong ed sakey a trono. (1 Arari 22:19; Isaias 6:1; Apocalipsis 4:1-3) Sikato so “Ari na inkamagnayon.” Ingen, bangta sikato so manusumpal na sakey a balon aspekto na inkasoberano, nibagan sikato so nagmaliw ya Ari, a singano akayurong ed trono to ed sakey a balon paraan.​—1 Awaran 16:1, 31; Isaias 52:7; Apocalipsis 11:15-17; 15:3; 19:1, 2, 6.

10. Anto so sakey a manunan betang na ararin Israelita? Iyilustra.

¹⁰ Balet nia so manunan punto: Say manunan betang na inmuunan arari et say idengel ed saray kaso tan pangukom. (Uliran 29:14) Nonoten pay makabat ya impangukom nen Solomon sanen duaran bibii so mangakayarian ed saksakey ya ugaw. (1 Arari 3:16-28; 2 Awaran 9:8) Sakey ed saray paalagey ed panuuleyan to et say “Balkon na Trono a ditan so pangukoman to,” a tatawagen met a “balkon na panangukom.” (1 Arari 7:7) Say Jerusalem so adeskribe bilang “akapasenan na saray trono parad panangukom.” (Salmo 122:5) Malinew, say ‘iyurong ed trono’ so nayari met a mankabaliksan na pangagamil na hudisyal ya autoridad.​—Exodo 18:13; Uliran 20:8.

11, 12. (a) Anto so kabaliksan na iyurong nen Jehova, ya asalambit diad Daniel kapitulo 7? (b) Panon a pepekderan na arum niran teksto a si Jehova so yinmurong pian mangukom?

¹¹ Pawilen tayo pa natan so eksenan akanengnengan nen Daniel ya ‘akayurong so Kadaanan na saray Agew.’ Inkuan ni na Daniel 7:10: “Yinmurong so Korte, tan walaray libron alukasan.” On, say Kadaanan na saray Agew so akayurong pian mangipakseb na panangukom nipaakar ed pananguley ed sankamundoan tan pian ukomen so Anak na too no makanepegan a manguley. (Daniel 7:13, 14) Insan nabasa tayo a “sinmabi so Kadaanan na saray Agew tan say panangukom a mismo so initer ed saray sasanto,” saramay naukom a matukoy a miuley ed Anak na too. (Daniel 7:22) Diad kaunoran et “say Korte a mismo so yinmurong” tan angipakseb na pirmin panangukom ed kaunoran a pakayari mundo.​—Daniel 7:26.a

¹² Kanian, say impakanengneng nen Daniel ed Dios ya ‘akayurong ed trono’ so mankabaliksan ed isasabi Ton mangipakseb na panangukom. Asasakbay et nankanta si David: “Sika [Jehova] so angipakat na panangukom ko tan say salisalan ko; yinmurong ka ed trono a manguukom tekep na inkatunong.” (Salmo 9:4, 7) Tan nansulat si Joel: “Paulyanan ya onalagey iray nasyon tan ontatdang ed abeban patar nen Jehosapat; ta diman ak [si Jehova] ya onyurong pian mangukom ed amin a nasyon.” (Joel 3:12; ipareng so Isaias 16:5.) Namparan si Jesus tan si Pablo so walad hudisyal iran kipapasen a say sakey a too et yinmurong pian dengelen tan mangukom na kaso.b​—Juan 19:12-16; Gawa 23:3; 25:6.

Say Posisyon nen Jesus

13, 14. (a) Anton panamaseguro so niwala ed totoo na Dios a si Jesus so magmaliw ya Ari? (b) Kapigan so inyurong nen Jesus ed trono to, tan diad anton pantalos a sikato so anguley nanlapulad 33 K.P. a manpatuloy?

¹³ Si Jehova so namparan Ari tan Ukom. Komusta met si Jesus? Say anghel a mangiyaanunsio ed kiyanak to so nankuan: “Iter nen Jehova a Dios ed sikato so trono nen David ya ama to, . . . tan anggapoy anggaan na panarian to.” (Lucas 1:32, 33) Si Jesus so magmaliw a permanentin mananawir na Davidikon inkaari. (2 Samuel 7:12-16) Sikatoy manguley manlapud tawen, ta inkuan nen David: “Say inkuan nen Jehova ed Katawan ko [si Jesus] so: ‘Yurong ka ed nikawanan a limak anggad pangipasen ko ed saray kabusol mo bilang totuonan na salisalim.’ Say tayukor na biskeg mo so pasabien nen Jehova manlapud Sion, a mangikuan: ‘Onla kan mamatulok ed leet na kakabusol mo.’”​—Salmo 110:1-4.

¹⁴ Kapigan so kagawa na satan? Agnanuley si Jesus bilang Ari legan a sikatoy sakey a too. (Juan 18:33-37) Nen 33 K.P., sikatoy inatey, pinaoli, tan sinmegep ed tawen. Onia so kuan na Hebreos 10:12: “Sayan too so angiyapay na sakey a bagat parad saray kasalanan ya anggapoy anggaan tan yinmurong ed nikawanan a lima na Dios.” Anton autoridad so niwala ed si Jesus? “Sikatoy pinayurong [na Dios] ed nikawanan to diad mangatatawen a paspasen, ya atagtagey ni nen amin a gobierno tan autoridad tan pakayari tan inkakatawan . . . tan ginawa ton ulo ed amin a bengatla ed kongregasyon.” (Efeso 1:20-22) Lapud diad saman et awalaan ni si Jesus na maarin autoridad ed saray Kristiano, nayarian ya isulat nen Pablo a si Jehova so “angiliktar ed sikatayo manlapud autoridad na kabilungetan tan inyalis itayo ed panarian na Anak na aro to.”​—Colosas 1:13; 3:1.

15, 16. (a) Akin ya ibabaga tayo a si Jesus so agnagmaliw ya Ari na Panarian na Dios nen 33 K.P.? (b) Kapigan ginmapon manuley si Jesus ed Panarian na Dios?

¹⁵ Balet diad satan a panaon et ag-inmakto si Jesus bilang Ari tan Ukom ed nasyones. Sikatoy akayurong ed abay na Dios, a manatalaran ed panaon na iyakto to bilang Ari ed Panarian na Dios. Nipaakar ed sikato et insulat nen Pablo: “Nipaakar ed siopa ed saray anghel so angibagaan na: ‘Yurong ka ed nikawanan a limak, ya anggad pangipasen ko ed kakabusol mo bilang totuonan na salisalim’?”​—Hebreos 1:13.

¹⁶ Akapangipalapag laray Tastasi nen Jehova na dakel ya ebidensya a say panaon na panaalagar nen Jesus et anampot nen 1914, sanen sikatoy nagmaliw a manuley ed Panarian na Dios diad agnanengneng a katawenan. Oniay kuan na Apocalipsis 11:15, 18: “Say panarian na mundo so nagmaliw a panarian na Katawan tayo tan say Kristo to, tan sikato so manguley bilang ari ed ando lan ando.” “Balet saray nasyon so sinmanok, tan say dilin sanok mo so sinmabi.” On, saray nasyon so angibalikas na sanok ed sakey tan sakey legan na Guerra Mundial I. (Lucas 21:24) Saray bakal, yegyeg, salot, kakisiran na tagano, tan saray mipadpara ed saya so naiimano tayo nanlapulad 1914 a mamepekder a si Jesus so manuuley la natan ed Panarian na Dios, tan asingsingger lay pinal ya anggaan na mundo.​—Mateo 24:3-14.

17. Antoran manunan punto so niletneg tayo la anggad sayan bekta?

¹⁷ Bilang antikey a repaso: Nibaga a say Dios so akayurong ed trono bilang Ari, balet diad sakey nin pantalos et sikato so akayurong met ed trono to pian mangukom. Nen 33 K.P., si Jesus so yinmurong ed nikawanan a lima na Dios, tan sikato natan so Ari na Panarian. Balet kasin si Jesus, a natan et manuuley bilang Ari, so manseserbi met bilang Ukom? Tan akin a saya so nepeg a panpagaan tayo, lalo ed sayan panaon?

18. Antoy walan ebidensya a si Jesus so magmaliw ya Ukom met?

¹⁸ Si Jehova, a walaay kanepegan a manuro na saray ukom, so nampili ed si Jesus bilang Ukom ya akakapet ed saray estandarte To. Impanengneng iya nen Jesus sano sasaglawien to so nipaakar ed totoo a magmamaliw a mabilay diad espiritual a paraan: “Say Ama so agmanguukom ed siopaman, noagta impabtang ton amin so pangukom ed Anak.” (Juan 5:22) Ingen, say hudisyal a betang nen Jesus so mas ni nen say satan a klase na panangukom, ta sikato so ukom na saray mabilay tan inaatey. (Gawa 10:42; 2 Timoteo 4:1) Aminsan et inyabawag nen Pablo: “Inggeter [na Dios] so sakey ya agew a ginagala ton pangukom ed panaayaman a dalin diad inkatunong ed panamegley na sakey a laki [si Jesus] a tinuro to, tan angitarok na garantiya ed amin a too diad impamaoli to ed sikato.”​—Gawa 17:31; Salmo 72:2-7.

19. Akin a susto so panaglawi a si Jesus so akayurong bilang Ukom?

¹⁹ Kanian makatunongan ta ya ibaga tayon si Jesus so akayurong ed maglorian trono diad espesipikon betang ya Ukom? On. Imbaga nen Jesus ed saray apostol: “Diad panamalsa-lamet, sano say Anak na too so onyurong ed maglorian trono to, sikayon ontutumbok ed siak so onyurong met a mismo ed labinduan trono, a mangukom ed labinduan tribu na Israel.” (Mateo 19:28) Anggaman si Jesus natan so Ari na Panarian, lalaktipen na kaaruman a kimey ton asalambit ed Mateo 19:28 so iyurong ed sakey a trono pian mangukom ed panaon na Milenyo. Diad satan a panaon et sikatoy mangukom ed amin a katooan, saray matunong tan saray agmatunong. (Gawa 24:15) Makatulong a nodnonoten iya legan ya iyapasakey tayo so imano tayo’d sakey ed saray parabolo nen Jesus a mitukoyan ed panaon tan bilay tayo.

Anto so Ibabaga na Parabolo?

20, 21. Anto so intepet na apostoles nen Jesus a mitukoyan ed panaon tayo, a mangitonton ed anton tepet?

²⁰ Ag-abayag sakbay na impatey nen Jesus, sikatoy tinepetan na apostoles: “Kapigan so kagawa na sarayan bengatla, tan anto so tanda na kiwawalam tan ed konklusyon na sistema na bengabengatla?” (Mateo 24:3) Impasakbay nen Jesus so makatantanda iran nagawgawa ed dalin sakbay na ‘isabi anggaan.’ Kasakbayan a tuloy na satan ya anggaan, “nanengneng [na nasyones] so Anak na too ya onsasabin walad saray lurem na tawen tekep na pakayari tan baleg a gloria.”​—Mateo 24:14, 29, 30.

²¹ Balet, komusta iramay totoo ed nasyones sano onsabi Anak na too ed gloria to? Amtaen tayo manlapud parabolo na saray karnero tan saray kanding, ya onggagapo ed saray salitan: “Sano say Anak na too so onsabi ed gloria to, tan kaibay amin ya anghel to, diad ontan et sikatoy onyurong ed maglorian trono to. Tan amin a nasyon so tiponen to ed arap to.”​—Mateo 25:31, 32.

22, 23. Antoran punto so mangipapanengneg a say parabolo ed saray karnero tan saray kanding so agginmapoy kasumpalan to nen 1914?

²² Kasin onaaplika iyan parabolo sanen yinmurong si Jesus ed maarin pakayari to nen 1914, a singa abayag lan pakatalos tayo? Bueno, sasaglawien na Mateo 25:34 so nipaakar ed sikato bilang Ari, kanian makatunongan a say parabolo et nasusumpal la nanlapulad impagmaliw nen Jesus ya Ari nen 1914. Balet antoy ginawa ton panangukom kayarin tuloy na satan? Aliwan say panangukom “ed amin a nasyon.” Imbes, inyarap toy imano to ed saramay mankuan a manitibukel ed “abung na Dios.” (1 Pedro 4:17) Mitunosan ed Malaquias 3:1-3, si Jesus, bilang mensahero nen Jehova, so manusukimat diad hudisyal a paraan ed saray alanaan a Kristianon nakekeraan ed dalin. Panaon met itan na hudisyal a panintensya ed Kakristianoan, a sititilan mangibabagan kabiangan na “abung na Dios.”c (Apocalipsis 17:1, 2; 18:4-8) Ingen anggapoy pakapatnagan a diad satan a panaon et, odino manlapulad saman et si Jesus so yinmurong pian mangukom ed totoo ed amin a nasyon bilang karnero odino kanding.

²³ No analisaen tayo so aktibidad nen Jesus diad parabolo, naimano tayo a sikato diad kaunoran et mangukom ed amin a nasyon. Ag-ipapanengneng na parabolo a say ontan a panangukom so mantultuloy ed pinalaknab a dakel a taon, a singano kada toon ompapatey legan na sarayan apalabas a dekada so naukom a makanepegan ed andi-anggaan ya ipapatey odino andi-anggaan a bilay. Ompapatnag a maslak ed inaatey la diad agano niran dekada so linma’d kaslakan a lubok na katooan. (Apocalipsis 6:8; 20:13) Balet ililitrato na parabolo so panaon sano ukomen nen Jesus so totoo ed “amin a nasyon” a mabilay ed saman tan akaarap ed kipakat na hudisyal a sentensya.

24. Kapigan so kasumpalan na parabolo ed saray karnero tan saray kanding?

²⁴ Diad arum a salita, tutukoyen na parabolo so arapen sano say Anak na too so onsabi ed gloria to. Sikatoy onyurong pian mangukom ed totoon mabilay ed satan a panaon. Say panangukom to so base ed no panon dan impakabat so inkasikara. Diad satan a panaon “say pandumaan ed baetan na sakey a matunong ed sakey a marelmeng” so malinlinew a naseguro la. (Malaquias 3:18) Say aktual a panangiparungtal tan panangipakat na panangukom so gawaen ed limitadon panaon. Si Jesus so manggawa na maptek iran desisyon base ed apaneknekan nipaakar ed saray indibidual.​—Nengnengen met so 2 Corinto 5:10.

25. Anto so ililitrato na Mateo 25:31 diad impanaglawi ed Anak na too ya akayurong ed maglorian trono?

²⁵ Diad ontan, kabaliksan na saya a say ‘iyuyurong [nen Jesus] ed maglorian trono to’ pian mangukom, ya asalambit ed Mateo 25:31, so onaaplika ed arapen nin panaon sano say makapanyarin Ari so onyurong pian mangiparungtal tan mangipakat na panangukom ed nasyones. On, say eksena na panangukom a mangilalanor ed si Jesus diad Mateo 25:31-33, 46 so nikompara ed eksena diad Daniel kapitulo 7, a ditan et say manuuley ya Ari, say Kadaanan na saray Agew, so akayurong pian manumpal ed betang to bilang Ukom.

26. Anton balon salaysay ed parabalo so magmamaliw a mapatnag?

²⁶ Say onian pantalos ed parabolo na saray karnero tan saray kanding so mangipapanengneng a say panangipakseb na panangukom ed saray karnero tan saray kanding et diad arapen ni. Satan so nagawa kayari ibetag na “say kairapan” a sasalambiten na Mateo 24:29, 30 tan say Anak na too so ‘onsabi ed gloria to.’ (Ipareng so Marcos 13:24-26.) Sirin, legan a walad anggaan la so interon marelmeng a sistema, si Jesus so mangukom tan mangipakseb tan mangipakat na panangukom.​—Juan 5:30; 2 Tesalonica 1:7-10.

27. Anto so nepeg ya interesadon amtaen tayo nipaakar ed pinal a parabolo nen Jesus?

²⁷ Lilinewen na saya so pakatalos tayo ed panaon na kasumpalan na parabolo nen Jesus, ya ipapanengneng to no kapigan ya ukomen iray karnero tan saray kanding. Balet panon ton apektaen so seseg tayo ed panangipulong na maong a balita na Panarian? (Mateo 24:14) Kasin gawaen ton agtanton makabaliksan so kimey tayo odino kasin mangiiter itan na mas ambelat a responsabilidad? Nengnengen tayo so ontumbok ya artikulo no panon a naapektoan to itayo.

[Saray paimano ed leksab]

Kasin Natandaan Yo?

◻ Panon a manseserbi a namparan Ari tan Ukom si Jehova?

◻ Anto so duaran nayarin kabaliksan na ‘iyurong ed trono’?

◻ Anto so datin ibabaga tayo no nipaakar ed panaon na kasumpalan na Mateo 25:31, balet anto so basiyan tayo parad asalatan a panmoria?

◻ Kapigan ya akayurong so Anak na too ed trono to, a singa ipapanengneng na Mateo 25:31?