Papablien nen Jehova so Intiron-Kamarerwan Serbisyom
“Dinanman a gawaen yo, gawaen yon mabulos [intiron-kamarerwa, NW], a singa nipaakar ed Katawan, et aliwan dia ed saray totoo.”—COLOSAS 3:23.
1, 2. (a) Anto so sankabalgan a pribilihyon posiblin niwala ed sikatayo? (b) Akin no maminsan et agtayo nagawaan ya amin so labay tayon gawaen ed panaglingkor ed Dios?
SAY sankabalgan a pribilihyon posiblin niwala ed sikatayo et say panlingkor ed si Jehova. Diad satan a sengegan ya abayag lan papasesegen na sayan dyurnal iray Kristiano a mibiang ed ministeryo, ya ‘ondakel ni komon’ so panlingkor da kapiganman a posibli. (1 Tesalonica 4:1) Balet, agtayo lawas sarag a gawaen ya amin so kaliktan na puso tayon gawaen nipaakar ed serbisyo ed Dios. “Lapud sirkumstansiak et kaukolan koy mantrabahon sigpot-panaon,” ontan so salaysay na walad-kasuloan ya agin bii a bautismado ed ngalngali 40 taon la. “Agak mantratrabaho lapud pangayarian na ankablin kawekawes odino panbakasyon diad sakey a panlayag ed barko, noagta pian nasapotan iray pankaukolan ko, a lalaktipen toy gagastosen ed medikal tan dental. Liknaen kon singano say niiiter ko ed si Jehova et kera-kera labat.”
2 Say aro ed Dios so mamapakiwas ed sikatayon gawaey mas ni unong ed nayarian tayo ed panagpulong. Balet mabetbet a lilimitaan na sirkumstansia ed bilay so nagawaan tayo. Wadtan so panangasikaso ed arum niran Makasulatan a responsabilidad, pati saray obligasyon ed pamilya, a makapangupot na baleg a panaon tan biskeg tayo. (1 Timoteo 5:4, 8) Diad sarayan “panaon a maatap [a mairap a pidenengan],” lalon oniirap so panagbilay. (2 Timoteo 3:1) Sano agtayo nagawaan ya amin so labay tayon gawaen ed ministeryo, mairap so linawa tayo. Anganko ta umamengen tayo no kasin naliliketan so Dios ed panagdayew tayo.
Say Karakpan na Intiron-Kamarerwan Serbisyo
3. Anto so iilaloan nen Jehova ed sikatayon amin?
3 Diad Salmo 103:14, sililigsan ipapaseguro na Biblia ed sikatayo a si Jehova et “kabat to so inkagawa tayo; sikato nanodnonotan to a sapok itayo.” Nagkalalo ni nen say siopaman, natatalosan toray kakulangan tayo. Agto kakaukolanen so mas ni nen say nayarian tayon iter. Anto ta so iilaloan to? Say bengatlan nayarin iter na balang sakey, antokamay situasyon to’d bilay: “Dinanman a gawaen yon mabulos [intiron-kamarerwa, NW], a singa nipaakar ed Katawan, et aliwan dia ed saray totoo.” (Colosas 3:23) On, iilaloan itayo nen Jehova—amin tayo—a manlingkor ed sikaton intiron-kamarerwa.
4. Anto so kabaliksan na panlingkor ed si Jehova ya intiron-kamarerwa?
4 Anto tay kabaliksan na panlingkor ed si Jehova ya intiron-kamarerwa? Say Griegon termino ya “intiron-kamarerwa” et literal a kabaliksan toy “manlalapud kamarerwa.” Tutukoyen na “kamarerwa” so intiron persona, pati amin a pisikal tan mental iran abilidad to. Say panlingkor ya intiron-kamarerwa sirin et kabaliksan toy pangitalaga tayoy inkasikatayo, ya uusaren so amin a pakayari tan biskeg tayo ed sankasigpotan a laknab diad serbisyo ed Dios. Diad antikey et kabaliksan toy panggawa na amin a nayarian na kamarerwa tayon gawaen.—Marcos 12:29, 30.
5. Panon ya ipapanengneng na alimbawa na saray apostol ya agnepeg a parparehoy nagawaan na amin ed ministeryo?
5 Kasin say pagmaliw ya intiron-kamarerwa et kabaliksan ton nepeg a pareparehoy nagagawaan tayon amin ed ministeryo? Imposiblin tuloy itan, ta nandurumay sirkumstansia tan abilidad na sakey a too ed sananey. Isipen paray matoor ya apostol nen Jesus. Agda ayarian a gawaey parehon karakel. Singa bilang, dagdaiset so amta tayo nipaakar ed arum ya apostoles, a singa di Simon a Canaanita tan Santiago ya anak nen Alfeo. Anganko ta agetaran so aktibidades da bilang apostol. (Mateo 10:2-4) Diad pidumaan, asarag nen Pedro a sakbaten iray ambelat a responsabilidad—initer ni ingen nen Jesus so “saray tombok na panarian” ed sikato! (Mateo 16:19) Ingen, agnipaatagey si Pedro ed say arum. Sanen inawat nen Juan so pasingawey na Balon Jerusalem diad Apocalipsis (ed ngalngali 96 K.P.), akanengneng na 12 letnegan a bato a ditan so akasulatan na “saray ngaran na saray labindua ya apostoles.”a (Apocalipsis 21:14) Pinabli nen Jehova so serbisyo na amin ya apostol, anggaman mapatnag a dakel so agawaan na pigara nen say arum.
6. Diad ilustrasyon nen Jesus ed managtanem, anto so nagawa ed bukel a nitanem ed “maong a dalin,” tan antoran tepet so onlesa?
6 Mipadpara, agkakaukolanen nen Jehova a pareparehoy nagawaan tayon amin ed panagpulong. Impanengneng iya nen Jesus ed ilustrasyon na managtanem, ya angiyaliling ed panagpulong bilang panagsibwag na bukebukel. Dinmapo iray bukel ed nambabangil a klasen dalin, a mangiyiilustra ed nanduruman kipapasey kapusoan ya ipapatnag na saramay onderengel ed mensahe. “Et say nitanem ed maong a dalin,” insalaysay nen Jesus, “saya man so makadngel na salita, tan natalosan to; a sikato so manbunga a tua, tan mangiter na bunga, saray arum tunggal lasus, saray arum sananemaplo, saray arum santatlomplo.” (Mateo 13:3-8, 18-23) Anto irayan bunga, tan akin ya agparparehoy kinarakel na bunga to?
7. Antoray bunga na bukel a nitanem, tan akin ya aliwan parparehoy kinarakel na bunga to?
7 Lapud say bukel ya itatanem et say “salita na panarian,” say panbunga so manutukoy ed kikakayat na salita, pangitongtong ed arum. (Mateo 13:19) Nandurumay napapawalan kinarakel na bunga—manlapud talomplo ya anggad sanlasus—lapud nanduruma met iray abilidad tan sirkumstansia ed bilay. Say sakey a toon mabunigas tan walad kaksilan so makapangusar na malaglaem nin panaon ed panagpulong nen say samay toon pakakapuyen na graben sakit odino itatatken. Say kalangweran a walad-kasuloan ya anggapoy responsabilidad to’d pamilya et nayarin malaglaem so nagawaan to nen say samay kaukolan toy mantrabahon sigpot-panaon pian legpeten toy pamilya.—Ikompara so Uliran 20:29.
8. Panon so panmoria nen Jehova ed saramay iiter day sankaabigan a niiter na kamarerwa ra?
8 Diad panmoria na Dios, kasin agtanton debotado so intiron-kamarerwan too a mamapawala na talomplo nen say samay mamapawala na sanlasus? Andin balot! Agpareparehoy kinarakel na bunga, balet naliliketan si Jehova daput no say nitalagan serbisyo et samay sankaabigan a niiter na kamarerwa tayo. Tandaan, a say nanduruman kinarakel na bunga et amin da so manlalapud kapusoan a “maong a dalin.” Say Griegon terminon (ka·losʹ) a nipatalos a “maong” so manideskribe ed bengatlan “marakep” tan “makapaligsa ed puso, tan makaroyroyo ed kamataan.” Agaylan makapaligliwan naamtaan a sano gawaen tayoy anggaay nayarian tayo et say puso tayo so marakep ed imaton na Dios!
Agmankokomparaan
9, 10. (a) Nayarin itonton itayo na puso tayo ed anton nengneng na negatibon panagkatunongan? (b) Panon ya ipapanengneng na ilustrasyon ed 1 Corinto 12:14-26 a si Jehova et agto ikokompara ed arum so nagagawaan tayo?
9 Balet, nayarin duma so panaghusga na ag-ayadyarin puso tayo. Anganko ta ikompara toy panagserbi tayo’d panagserbi na arum. Ompan ikatunongan ton, ‘Mas dakel so nagagawaan na arum ed ministeryo nen say siak. Panon ni kasin naliketan si Jehova ed serbisyok?’—Ikompara so 1 Juan 3:19, 20.
10 Saray kanonotan tan paraan nen Jehova so atagtagey a tuloy nen say sikatayo. (Isaias 55:9) Makala tayo na aralem a pakatalos ed no panon a momoriaen nen Jehova so pansasagpot tayo bilang indibidual manlapud 1 Corinto 12:14-26, a niyaliling ditan so kongregasyon ed sakey a laman a walaay dakel a kabiangan—kamataan, lima-lima, sali-sali, kalayagan, tan arum nira. Isipen pan magano, so literal a laman. Agaylan makapalek no ikomparam iray matam ed saray limam odino ed saray salim ed saray layag mo! Kada kabiangan et walay kana to, balet amin so mausar tan papablien. Mipadpara, papablien nen Jehova so intiron-kamarerwan serbisyom balanglan mas dakel odino daiset so nagagawaan na arum.—Galacia 6:4.
11, 12. (a) Akin a liknaen na arum a sikaray “nagkalalon makapuy” odino “kulang na galang”? (b) Panon so panmoria nen Jehova ed serbisyo tayo?
11 Lapud limitasyon a palolooren na makapuy a bunigas, itatatken, odino arum niran sirkumstansia, no maminsan et liknaen na arum ed sikatayon “nagkalalon makapuy” odino “kulang na galang.” Balet aliwan ontan so panmoria nen Jehova. Oniay ibabaga ed sikatayo na Biblia: “Saray kabiangan na laman ya iisipen iran nagkalalon makapuy sikara so nakaukolan, tan saray kabiangan . . . ya isipen tayo ra a kulang na galang, sikara so kawesan tayo na daakan a galang . . . Balet say Dios inuksoy to so laman ed sikato ya initdan to na lalon daakan a galang so kabiangan a makulang.” (1 Corinto 12:22-24) Kanian balang indibidual et nayarin makapagmaliw a mablin tuloy ed si Jehova. Parad sikato et walaay balor so panseserbi tayo unong ed saray limitasyon tayo. Agta pakikiwasen kayo na puso yon kaliktanen a gawaen ya amin a nayarian yo ed panserbi ed ontan a makatalos tan maaron Dios?
12 Say importanti ed si Jehova, sirin et aliwan say piparam ed dakel a nagagawaan na sananey noagta gagawaen mo no antoy personal a nasarag mo—say kamarewam. Nidemostra a talagan papablien nen Jehova iray sagpot tayo bilang indibidual diad makatenyeg a paraan ya impideneng nen Jesus ed duaran mandumaan a bibii diad pinal iran agew na bilay to ed dalin.
Say “Sankablian” a Regalo na Maapresian Bii
13. (a) Antoray kipapasen sanen kinalboan nen Maria so ulo tan salisali nen Jesus na pabalingit a larak? (b) Piga so kantidad na larak nen Maria?
13 Diad labi Biernes, Nisan 8, sinmabi Jesus ed Betania, sakey a melag a purok ed mamabukig ya alusadsar na Palandey Olibo, manga taloran kilometro manlapud Jerusalem. Walaray pinabpablin kakaaro nen Jesus ed sayan baley—di Maria, Marta, tan say agi ran, Lazaro. Asankaili da la si Jesus, anganko ta maparanay. Balet diad labi na Sabado, si Jesus tan saray kaaro to so nangpangdem ed abung nen Simon, datin akating a posiblin tinambal nen Jesus. Legan ya akayurong si Jesus ed dulang, mapaabeban indemostra nen Maria so aralem ya aro to ed amaoli’d agi to. Nilukasan toy botilyan nankargay pabalingit a larak, a “sankablian.” Talagan, mabmabli! Mankantidad itan na 300 denario, say kasimbangan na sakey taon a sueldoen. Inkalbo to iyan ambalingit a larak ed ulo tan salisali nen Jesus. Pinunasan to ni ingen iray sali nen Jesus na buek to.—Marcos 14:3; Lucas 10:38-42; Juan 11:38-44; 12:1-3.
14. (a) Anto so reaksion na saray babangatan ed ginawa nen Maria? (b) Panon ya indepensa nen Jesus si Maria?
14 Mansyodot iray babangatan! ‘Akin ya onian panagdarak?’ intepet da. Pian niyamot so motibo ton mantakew, insuheri nen Judas ya intulong la komon itan ed saramay mankakaukolan, diad impangikuan: “Akin et ag-inlako so sayan unguento ed talonlasus a denarios, tan inter ed saray duruka?” Ag-inmesel si Maria. Balet, imbaga nen Jesus ed saray babangatan: “Paulyan yon bukor. Akin et sikatoy gonigonen yo? Sikatoy nanggawa na maong [sakey a pormay ka·losʹ] a gawa ed siak . . . Sikato ginawa to so ayarian to; pinasakbayan to a pinuyokan so laman ko nipaakar ed kiponpon ko. Et tua kuanko ed sikayo, anggan iner a kipulongan na ebanghelyo ed lapag a mundo, satan met so ginawa na sayan bii nasalita naani ya onkanan pakanodnonotan ed sikato.” Seguradon amakalma ed puso nen Maria iray maligsan salita nen Jesus!—Marcos 14:4-9; Juan 12:4-8.
15. Akin ya atenyeg a tuloy si Jesus ed ginawa nen Maria, tan anto sirin so naaralan tayo nipaakar ed intiron-kamarerwan serbisyo?
15 Atenyeg a tuloy si Jesus ed ginawa nen Maria. Diad opinyon to et sikatoy akapanggawa na pandinayewan a gawa. Aliwan samay kantidad na materyal a regalo so importanti ed si Jesus noagta say bengatla a “sikato ginawa to so ayarian to.” Inanamot to so pankanawnawa tan initer to so nayarian ton iter. Diad arum a bersion et nipatalos irayan salita, “Ginawa to so anggaay nayarian to,” odino, “Ginawa to no antoy walad pakayari ton gawaen.” (An American Translation; The Jerusalem Bible) Say panangiter nen Maria so intiron-kamarerwa lapud inter toy sankaabigan to. Ontan so labay ya ibaga na intiron-kamarerwan serbisyo.
Say “Duaran Blankas” na Sakey a Balo
16. (a) Panon a naobserbaan nen Jesus so kontribusyon na pobrin balo a bii? (b) Piga so kantidad na saray sinsilyo na balo a bii?
16 Duay agew ed saginonor, nen Nisan 11, nansanagew si Jesus ed templo, a ditan asuppiat so autoridad to tan biglaan ya inebatan toray mairap a tepetepet nipaakar ed panagbuis, say kikioli, tan arum niran pamaakaran. Binaat nen Jesus iray eskriba tan Fariseos ta, nilikud ed arum ni et “akmonen da so saray abung na saray balo a bibii.” (Marcos 12:40) Insan yinmurong si Jesus, mapatnag diad Korte na saray Bibii, a ditan unong ed kinaugalian na Judio et walaray 13 panangisimpenan na kayamanan. Inmirong ya agano, a mapetepet a mamabantay ed pangipepelag na totoo ed kontribusyon da. Sinmasabi mayayaman a totoo, anganko say arum et nengneng day matunong, ya atekepan ni ingen na pankuankuanan. (Ikompara so Mateo 6:2.) Nipaarap so imano nen Jesus ed sakey a bii. Say toon kabanyakan et agto naimano so antokaman a makatantanda ed satan a balo a bii odino ed say regalo to. Balet si Jesus, a makaamta ed kapusoan na arum, et kabat to a sikato so “sakey a duka a biin balo.” Amta to met so eksakton balor na regalo to—“duaran blankas, a katiponan to so sakey a marabilis.”b—Marcos 12:41, 42.
17. Panon ya inapresia nen Jesus so kontribusyon na balo a bii, tan anto sirin so naaralan tayo nipaakar ed panangiter ed Dios?
17 Pinaasingger nen Jesus iray babangatan to ed sikato, ta labay ton nanengneng dan mismo so leksion ya ibangat to ed sikara. Sikato so “angipelag na dakdakel nen saray amin a manpepelag ed panangisimpenan na kayamanan,” inkuan nen Jesus. Diad panatantiya to et dakel ni initer to nen say initer na amin. Initer to so “amin [a] wala ed sikato”—say kalkalamor a kuarta to. Diad impanggawa ed ontan, ipapalima toy inkasikato ed mataliman lima nen Jehova. Say too sirin a nibiig bilang napanuliranan ed panangiter ed Dios et samay say regalo to so ngalngali anggapoy balor ed materyal a paraan. Balet, diad imaton na Dios satan so mabmabli!—Marcos 12:43, 44; Santiago 1:27.
Say Pakaaral ed Panmoria nen Jehova ed Intiron-Kamarerwan Serbisyo
18. Anto so naaralan tayo ed impideneng nen Jesus ed duaran bibii?
18 Manlapud saray impideneng nen Jesus ed sarayan duaran bibii et makaaral tayo na pigaran makapaligsan leksion ed no panon a momoriaen nen Jehova so intiron-kamarerwan serbisyo. (Juan 5:19) Ag-inkompara nen Jesus so balo a bii ed si Maria. Parehon inapresia to so duaran sinsilyo na balo a bii a singa met ed ginawa nen Maria ed “sankablian” a larak. Lapud initer na balang bii so sankaabigan to, diad imaton na Dios et sarayan regalo so namparan mabli. Kanian no onlesay liknaan ya anggapo lay kakanaan mo lapud agmo nagagawaan so amin a labay mon gawaen ed panlingkor ed Dios, ag-onleletey. Maliket si Jehova a mangawat ed sankaabigan a niiter mo. Tandaan, si Jehova so “onnengneng ed puso,” kanian amta ton tuloy so panpipirawatay pusom.—1 Samuel 16:7.
19. Akin ya agtayo uukomey nagagawaan na arum nipaakar ed panaglingkor ed Dios?
19 Say panmoria nen Jehova ed intiron-kamarerwan serbisyo so nepeg a mangimpluensia ed panmoria tan pantrato tayo ed balang sinansakey. Agaylan aliwan panangaro so pamalaw ed saray sagpot na arum odino ed pankokomparaay serbisyo na arum! Makapaermen, balet ta oniay insulat na sakey a Kristiano: “No maminsan et nipapatnag na arum a balanglan sika so sakey a payunir odino anggapoy kakanaan mo. Saramay walad limog tayo a mipupuligesgesan pian makapantultuloy ‘ta pian’ regular iran manangipalapag ed Panarian et nepeg dan liknaen a naaapresia met.” Tandaan tayo ya agtayo autorisadon maneside no antoy manutugyop ed intiron-kamarerwan serbisyo ed kaparan Kristiano. (Roma 14:10-12) Papablien nen Jehova so intiron-kamarerwan serbisyo na balang sakey ed minilyon a matoor a manangipalapag na Panarian, tan ontan tayo met komon.
20. Kaslakan a sankaabigan so pangipasen ed anto nipaakar ed saray kapara tayon managdayew?
20 Panon to no say arum et ompatnag a dagdaiset so nagagawaan da ed ministeryo? Say idaraiset na oras na kapananisiaan ed kimey to so mangipatnag ed mamatatken a kaukolan toy tulong odino panamaseseg. Ontan met, nepeg ya agtayo lilingwanan a parad arum et say intiron-kamarerwan serbisyo et singano samay angkekelag a sinsilyo na balo a bii nen samay mabmablin larak nen Maria. Sankaabigan ya ipasen ya inaro na agagi tayo si Jehova tan say ontan ya aro so mamapakiwas ed sikaran gawaen so baleg—aliwan samsamet—a nayarian da. Maseguron anggapoy makulin aripen nen Jehova a pilien to so panggawa na daiset diad panaglingkor ed Dios!—1 Corinto 13:4, 7.
21. Anton makatumang a karera so gegegemtanen na dakel, tan antoray onlesan tepet?
21 Balet, parad dakel a totoo na Dios, say intiron-kamarerwan serbisyo et kabaliksan toy pangegemtan na agaylan makatumang a karera—say panagpayunir. Antoran bendision so nagagamoran da? Tan komusta balet iramay kabiangan tayo ya agda ni asali so nampayunir—panon tayon nipanengneng so espirituy panagpayunir? Sarayan tepet so nasingbat ed ontumbok ya artikulo.
[Saray paimano ed leksab]
a Lapud sinalatan nen Matias si Judas bilang sakey ya apostol, say ngaran to—aliwan si Pablo—so inmapireng ed saramay walad 12 letnegan a bato. Anggaman sakey ya apostol si Pablo, sikatoy agkabiangan na saray 12.
b Kada sakey ed saratan a sinsilyo et sakey a lepton, say sankamelagan a sinsilyo na saray Judion nauusar ed saman a panaon. Say duaran lepta et mankantidad na 1/64 a sueldo ed sanagew. Unong ed Mateo 10:29, diad sakey ya assarion a sinsilyo (say kantidad na waloran lepta), makasaliw lay sakey a too na duaran anuyaw, a kaiba ed saramay sankamuraan a manok a tagano na saray duruka. Kanian sayan balon bii et talagan pobri, ta walaan labat lay kapalduay kantidad a nakakaukolan ed panaliw na sakey ya anuyaw, kulang ni ingen parad sakey a panangan.
Panon Yon Ebatan?
◻ Anto so kabaliksan na panlingkor ed si Jehova ya intiron-kamarerwa?
◻ Panon ya ipapanengneng na ilustrasyon ed 1 Corinto 12:14-26 a si Jehova et agto itayo ikokompara ed arum?
◻ Anto so naaralan tayo nipaakar ed intiron-kamarerwan panangiter manlapud imbaga nen Jesus nipaakar ed mablin larak nen Maria tan ed samay duaran angkelag a sinsilyo na balon bii?
◻ Panon a mangimpluensia so panmoria nen Jehova ed intiron-kamarerwan serbisyo ed paraan na panmoria tayo ed balang sinansakey?
[Litrato ed pahina 15]
Inter nen Maria so sankaabigan to, a pinabalingitan to so laman nen Jesus na “sankablian” a larak
[Litrato ed pahina 16]
Saray sinsilyo na balo a bii—ngalngali anggapoy balor to balet ta mabmabli ed imaton nen Jehova