Nayarian Moy Onaligwas ed Espiritual

MAIRAP a nabidbir so tuan kablian. Ontan so kipapasen na saray diamante. Anggaman say apasileng a diamante so mankirkirlap, say agni akortin diamante so agtanton onkirlap. Anggaman kuan, diad karaldalman na agni akortin diamante wadtan so malinew a rason na panilalo ed marakep a mablin-bato.

Miulibay so Kristianos ed agni akorti iran diamante diad dakel a dalan. Anggaman arawi itayo ni ed inkayadyari, walaan itayo na asaniban a kablian a papablien nen Jehova. Singa saray diamante, amin tayo so walaan na dilin nikabiig iran kualidad. Tan balang sakey ed sikatayo so onaligwas ni ed espiritual no satan so masimoon a pilalek tayo. Saray personalidad tayo so nayarin napasileng, ta pian onsinag iratan a maliwliwawa diad kigloriaan nen Jehova.—1 Corinto 10:31.

Kayarin akorti tan apasileng, say diamante so iyan ed pormaan a mamarakep ed inkabrilyo to. Mipadpara, nayarian nen Jehova itayon usaren nen Jehova ed nanduruman pormaan, odino asainmin, no ‘ikawes [tayo] so too a balo, a sikato so pinalsay Dios ed loob na kaptekan tan matuan kasantosan.’—Efeso 4:20-24.

Say ontan ya iyaaligwas ed espiritual so agmaininomay a nagawa, no panon a say diamante ed gendat a kipapasen to et mataltalag ya onkirlap a singa say mablin-bato. Nayarin kaukolan tayon iwaklit ed inkasikatayo so pigaran mansiasiansia nin kaleteyan, ya umaney awawey tayo ed panangawat na responsabilidad, odino isekar tayo ni ingen so inkasikatayon patundaey apasakey a rotina ed espiritual. Balet nayarian tayoy onaligwas no talagan labay tayo, lapud sarag nen Jehova a Dios itayon ikdan na na “pakayari ed labas nen say gendat.”—2 Corinto 4:7, NW; Filipos 4:13.

Papabiskegen nen Jehova so Ariripen To

Say pankorti ed saray diamante et mankaukolay kompiyansa a resultay eksakton pikakabat, lapud bektan nakutyap so kabiangan na agni akortin diamante, gendagendat a naperdi la itan. Mabmablin materyal—no maminsan anggad 50 porsiento ni ingen na ag-akutyap a bato—so kaukolan a kutyapen pian napawalay labalabay ya uhas. Nakaukolan tayo met so kompiyansa a resultay suston pikakabat ta pian namoldi so personalidad tayo tan onaligwas ed espiritual a paraan. Nagkalalo lan nepeg itayon nawalaan na kompiyansa ya ikdan itayo nen Jehova na pakayari.

Balet, nayarin liknaen tayoy ag-inkamagenap odino isipen ya ag-itayo makagawa na malaglaem. Nensaman, ontan met so alikna na matoor ya ariripen na Dios. (Exodo 3:11, 12; 1 Arari 19:1-4) Sanen pinabtangan na Dios a magmaliw a “propeta ed saray nasyon,” inkelyaw nen Jeremias: “Nia, agko amta so mansalita; ta ugaw ak.” (Jeremias 1:5, 6) Balet, anggaman ed inkamasuyat to, nagmaliw si Jeremias a makpel a propeta ya angipasabi na diritsaan iran mensahe ed maramsak a totoo. Panon itan a posibli? Naaralan toy manmatalek ed si Jehova. Insulat nen Jeremias ed saginonor: “Mapalar so too a manmatalek ed Jehova, tan say ilalo to sikato si Jehova.”—Jeremias 17:7; 20:11.

Natan, papabiskegen met nen Jehova iramay manmamatalek ed sikato. Si Edward,a ama na apatira a matantan ed espiritual ya iyaaligwas, so akaimanon tua ed saya. Insalaysay to: “Sakey ak ed Tastasi nen Jehova ed loob la na siam taon, balet singa agak ni inmaligwas ed espiritual. Say problema et kulang ak na motibasyon tan anggapoy kompiyansak. Kayarin inyalis ed España, aromog koy inkasiak ed melag a kongregasyon a walaan labat na sakey a matatken tan sakey a ministeryal ya aripen. Nisesengeg ed sayan pankaukolan, kinerew na matatken ya asikasoen koy dakel ya asainmin. Manggiwgiw ak leleg na inmunan paliwawak tan saray betang ed miting. Balet, naaralan koy onsaral ed si Jehova. Naynay ak a kokomendaan na matatken tan mangiiter na mataktika iran suhestion parad iyaligwas.

“Ontan met, pinadaak koy kimey ko ed lawak a serbisyo tan pinaabig koy panangidaulo ed espiritualidad na pamilyak. Bilang resulta, awalaan na babaleg a kabaliksan so katuaan ed intiron pamilya, tan aliknak so nagkalalon inkapnek. Siak la natan so ministeryal ya aripen, tan pankikimeyan kon maong a bayuboan iray kualidad na Kristianon manangasikaso.”

‘Lakseben so Daan a Personalidad’

Singa amoria nen Edward, kakaukolanen na iyaaligwas ed espiritual so talek ed si Jehova. Makana met so pamayubo ed singa-Kriston ‘balon personalidad.’ Panon iyan nagawaan? Say unonan kundang et “lakseben” iramay ugali a kabiangan na daan a personalidad. (Colosas 3:9, 10) No panon a saray depekto, a singa say akalaok iran mineral et kaukolan ya ekalen ed agni akortin diamante pian napagmaliw a mankirlap a mablin-bato, ontan met a saray awawey a “bangat na mundo” so kaukolan ya iwaklit ta pian say balon personalidad tayo so onsinag.—Galacia 4:3.

Sakey ed ontan ya awawey et say inkamasuyat a pangawat na responsabilidad lapud takot a dakerakel so kaukolanen ed sikatayo. Tua, kabaliksan na responsabilidad so pankimey, balet satan so makapnek a kimey. (Ikompara so Gawa 20:35.) Inako nen Pablo a say maridios a debosyon et mankaukolan a sikatayoy ‘impasyan mankimey tan isekar so inkasikatayo.’ Gawaen tayon sililiket, inkuanto, “lapu ed wala kamin maniilalo ed Dios a mabilay,” a sikato so agbalot makalingwan ed kimey a ginawa tayo diad biang na kapara tayon Kristiano tan ed arum.—1 Timoteo 4:9, 10; Hebreos 6:10.

Arum a diamante so walaan met na “tension” diad inkaporma ra tan kaukolan ya asikasoen a maong. Balet, diad tulong na sakey ya instruminton tatawagen a polariscope, nanengneng na managpasileng so kawalaay tension tan nayarian ton naparakep so bato. Anganko makakasagmak itayo na akindalem a tension, odino kakapuyan ed personalidad, lapud abenegan odino makapagonigon ya eksperiensia. Antoy nayarin gawaen tayo? Unona, kaukolan tayon akoen so problema ed inkasikatayo tan determinadon talonaan itan anggad posibli. Peteg a kaukolan tayon palemewen so inkasikatayo ed imaton nen Jehova diad pikakasi, posibli met so ikerew na espiritual a tulong manlapud Kristianon matatken.—Salmo 55:22; Santiago 5:14, 15.

Say ontan ya akindalem a tension so angapekta ed si Nicholas. “Si amak et sakey ya alkoholiko, tan sikatoy sengegay pirmin impan-irap mi nen atsik,” so insalaysay to. “Sanen nangraduar ak, nansundalo ak, balet say rebelyoson tendensiak so angiter ed siak na problema. Inkulong ak na autoridad na sundalo lapud panlalakok na druga, tan diad sananey ya inkagawa siak so nan-awol. Diad kaunoran, inmekal ak a sundalo, balet siansian amroblema ed siak. Anggaman magulo so bilay ko lapud panag-abuso ed druga tan alabas a kakainum, interesado ak ed Biblia tan pirawat kon nawalaan na gagala ed bilay. Agnambayag, akapitongtong ak ed Tastasi nen Jehova, anguman so estiloy-bilay ko, tan inawat koy katuaan,

“Balet, kinaukolan toy pigaran taon sakbay kon naawat so depekto ed personalidad ko. Kabkabusol ko so autoridad tan agresibo ak sano niiter ed siak so antokaman a konseho. Anggaman labay koy magmaliw a sigpot ya usaren nen Jehova, sayan kaleteyan so manesebel ed siak. Diad kaunoran, diad tulong na duaran makatalos a mamatatken, inakok so problemak tan inggapok ya inyaplika so maaron Makasulatan a konseho ra. Anggaman tunggal paminsan ya onsigboy samet ya ingongot, nakontrol ko la natan so rebelyoson tendensiak. Misalsalamat ak tuloy ed maanos a pidedeneng nen Jehova ed siak tan ed maaron tulong na mamatatken. Lapud aligwas ko ed espiritual, agano ak nin aturo bilang ministeryal ya aripen.”

Diad impakadiskobre nen Nicholas, aliwan mainomay ya umanen so nilamot iran awawey. Nayarin nipaarap itayo ed mipadparan angat. Anganko et mabarong tayon tuloy. Nayarin eem-eman tayo ni sakit na linawa, odino masyado tayon iikday importansya so inka-independenti. Kanian, nageteran so Kristianon iyaaligwas tayo. Mipadpara so naeeksperiensia na saray managpasileng na saray diamante ed saray bato a tatawagen dan naats. Saraya so peteg a duaran bato a nagmaliw a sakey sanen napopormay diamante. Bilang resulta, walaan so naats na duaran mandumaan ya ibabaleg a lalon mamairap a kortien. Diad kaso tayo, naromog tayon say “awawey” na mabulos ya espiritu a milalaban sumpad say “awawey” na ag-ayadyarin laman. (Mateo 26:41; Galacia 5:17) No maminsan, liknaen tayo lan onsuko ed pipupuligesgesan, ya ikakatunongan a say ag-inkayadyari ed personalidad tayo et baliwala met lanlamang. ‘Tutal,’ naibaga tayo, ‘inaro ak nin siansia na pamilyak tan kakaarok.’

Balet, no labay tayon serbian iray agagi tayo tan igloria so mangatatawen ya Ama tayo, nakaukolan a sikatayoy ‘napasimbalo ed puersan manamakiwas na kanonotan tayo’ diad pangisulong ed balon personalidad. Makagungguna so pansagpot, a singa napaneknekan nen Nicholas tan dakel nira. Amta na managpasileng na diamante a say sakey a depekto so maneral ed intiron diamante. Ontan met, diad pamaulyan ed makapuy ya aspekto na personalidad tayo, naderal tayoy espiritual ya itsura tayo. Lalo nin mauges, say seryoson kaleteyan so makapangitonton ed kapelag tayo’d espiritual.—Uliran 8:33.

Singa “Dalang” ed Dalem Tayo

Panggugunaetan na managpasileng na diamante a napapaway so sileng na diamante. Nagawaan iya diad panguksoy ed saray ketyang ta pian onletaw so nanduruman kolor. Diad dalem na diamante say amayamay a kolor a liwawa so mankidkidyam, a mamapawalay sileng a mamapakirlap ed saray diamante. Mipadpara, say espiritu na Dios so nayarin singa “dalang” ed dalem tayo.—1 Tesalonica 5:19; Gawa 18:25; Roma 12:11.

Balet anto no nalikas tayoy pankaukolan pian napakiwas ed espiritual? Panon iyan nagawaan? Kaukolan tayon ‘imanoen iray dalan tayo.’ (Salmo 119:59, 60) Lanoren na saya so pamidbir ed saramay bengatlan mamatayam ed sikatayo ed espiritual insan determinaen no dinan a teokratikon aktibidades so kaukolan tayon panpursigian a gemtanen. Napaaralem tayoy espiritual ya apresasyon diad panamegley na regular a personal a panagaral tan masimoon a pikakasi. (Salmo 119:18, 32; 143:1, 5, 8, 10) Niarum ni, diad pililimog ed saramay impasyan mankikimey ed pananisia, nagkalalon napabiskeg so determinasyon tayon manlingkor a maseseg ed si Jehova.—Tito 2:14.

Inaksobi nen Louise, sakey a Kristianon marikit: “Kinonsiderak so regular a panagpayunir ed loob na duay taon sakbay na aktual ya impanpalistak bilang payunir, odino sigpot-panaon a manangiproklama na Panarian. Anggapoy mangaamper ed siak, balet makapasawa lay rotinak, tan agko pansasagpotan a napaliisan itan. Insan biglan inatey si amak. Amoriak no panon kalupok so bilay tan agko gagawaey sankaabigan a pakausaran na bilay ko. Kanian inuman koy espiritual a panmoriak, pinadaak koy serbisyok, tan nagmaliw ak a regular payunir. Nagkalautlan akatulong ed siak et saray agagik ed espiritual a lawas manusuporta ed saray uksoyan ed lawak a serbisyo tan maparanay a manguulop ed siak ed ministeryo. Naaralan ko no kasin paborabli odino agpaborabli, nanliketan miray kablian tan kalat na kakaiba mi.”

Pinatarem a Singano Balatyang

Saray diamante so sankaawetan a natural a substance ed dalin. Kanian, kaukolan so sakey a diamante a pangontyap ed sananey. Ipapanonot na saya ed saray estudyante na Biblia so ibabagay uliran: “Say balatyang utokan to so balatyang; ontan say too utokan [“napatarem,” NW] to so lupa na kaaro to.” (Uliran 27:17) Panon a “napatarem” so lupa na too? Nayarin ontalona so sakey diad pamatarem ed intelektual tan espiritual a kipapasen na sananey, a singa say piraso na balatyang so nausar pian pataremen so tarem a gawa ed parehon metal. Singa bilang, no sikatayo so nagogonigon lapud impakadismaya, nayarin makapaalagey so panamaseseg na sananey a too. Napasimbalo so akakuliseng a lupa tayo, tan nayarin napabilay tayo parad apasimbalon maseseg a kimey. (Uliran 13:12) Nagkalalo lan makatulong so mamatatken ed kongregasyon pian napatarem itayo diad panangiter da na Makasulatan a panamaseseg tan konseho parad iyaligwas. Tutumboken da so prinsipyo ya inkuan nen Solomon: “Itdan mo na panangibangat so makabat, et sikato naani makabkabat ni. Ibangat mo so matunong, et sikato so onlalo ed bangat.”—Uliran 9:9.

Siempre, say espiritual a kipasal so mankaukolay panaon. Diad loob na masulok a samploy taon, innabang nen apostol Pablo so eksperiensia tan saray metodo na panagbangat to ed si Timoteo. (1 Corinto 4:17; 1 Timoteo 4:6, 16) Say abayag ya impangipasal nen Moises ed si Josue na masulok a 40-taon a peryodo so angungguna ed nasyon na Israel ed andukey a panaon. (Josue 1:1, 2; 24:29, 31) Akiulop si Eliseo ed propeta Elias anganko ed loob na 6 taon, ya akaawat na maabig ya inkipasal ed dili ton ministeryo a nansumpal itan ed ngalngali 60 taon. (1 Arari 19:21; 2 Arari 3:11) Diad maanos a panangitarya ed mantultuloy a kipapasal, tutumboken na mamatatken so alimbawa di Pablo, Moises, tan Elias.

Say panangomenda so makanan kabiangan ed panangipasal. Saray masimoon a balikas na apresasyon parad saray asainmin a ginawaan a maong odino ed makapadinayew a gawa so nayarin managdag ed arum a malabay a manlingkor ed Dios a nagkalalo. Say komendasyon so mamaalagey na kompiyansa a, diad biek a dapag, mansagpot pian nadaeg so kakapuyan na sakey. (Ikompara so 1 Corinto 11:2.) Say panamaseseg pian onaligwas ed katuaan so manlalapu met ed pagmaliw a pirmin okupado ed panagpulong na Panarian tan arum nin aktibidad ed kongregasyon. (Gawa 18:5) Sano pabtangan na mamatatken so agagi na responsabilidad unong ed iyaaligwas da ed espiritual, mangiiter iya ed sarayan lalaki na mablin eksperiensia tan nayarin mamabiskeg ed pilalek da pian tuloy-tuloy ya onaligwas ed espiritual.—Filipos 1:8, 9.

Maabig a Rason Parad Pagmaliw a Maaligwas ed Espiritual

Ipapasen a mabli iray diamante. Tua met itan ed saramay mililimog la natan ed sankamundoan a pamilya na saray managdayew nen Jehova. Diad tua, tatawagen iran mismo na Dios a “kalkaliktan,” odino “mabli,” iran bengatla ed amin a nasyon. (Aggeo 2:7, NW, paimano’d leksab) Nen imbeneg a taon, 375,923 so nagmaliw a bautismadon Tastasi nen Jehova. Pian natulongan iyan indakel, kaukolan a ‘paawangen a nagkalalo so tolda.’ Diad iyaaligwas ed espiritual—tan diad pandampot parad saray pribilihyo ed Kristianon serbisyo—posibli so pakapibiang ed pakaasikaso na sayan ilalaknab.—Isaias 54:2; 60:22.

Aliwan singa say dakel a mablin diamante ya insinop ed saray kaha de yero na banko tan mataltalag a nanengneng, say espiritual a kablian tayo so onsinag a maliwliwawa. Tan leleg tayon regular a pipinoen tan ipapatnag iray Kristianon kualidad, nigloria tayo si Jehova a Dios. Sinimbawa nen Jesus iray patumbok to: “Pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.” (Mateo 5:16) Segurado, satan so mangiter ed sikatayo na maabig a rason ed pagmaliw a maaligwas ed espiritual.

[Paimano ed leksab]