Bilin Pian Maabig so Relasyon Tayod Arum

Mamerdona

“Itultuloy yon . . . perdonaen so sakey tan sakey anggano walay rason na sakey ya ireklamo imay sakey.”—COLOSAS 3:13.

Nalilingo tayon amin. Nayarin nasakitan itayo na arum, odino nasakitan tayo ra. Antokaman so situasyon, kaukolan tayon amin so mamerdona tan kaukolan tayo met so panamerdona na arum. No amerdona tayo la, agtayo la maneem-em na sakit na linawa ed samay toon akasakit ed sikatayo. Agtayo “babalesen na mauges so siopaman a nanggaway mauges,” tan agtayo la lanang ya ipapanonot iray lingo to. (Roma 12:17) Pero panon to no asakitan tayon maong tan agtayo nalingwanan so agawa? Kaukolan tayoy marespeton mitongtong ed samay akasakit ed sikatayo ya agsankarengel na arum. Say gagala tayo et pian mikareenan, aliwan pian patunayan ya duga tayo tan sikatoy aliwa.—Roma 12:18.

Manpaabeba tan Marespeto

“Magmaliw kayon mapaabeba, ya ipasen yon mas atagey so arum nen say sikayo.”—FILIPOS 2:3.

No mapaabeba tan marespeto tayo, labalabay da tayon kaiba. Amta da ya maomaong tayo ta ikokonsidera tayoy nalilikna da tan agtayo gagagalaen ya sakitan ira. Pero no isipen tayon mas atagey tayo nen say arum odino ipilit tayoy labay tayo, mangigagapo tayoy agpantatalosan tan gulo. Iwasan itayo na totoo, tan daiset odino anggapo ni ingen so mikaaro ed sikatayo.

Agmanangidumaduma

“Anggapoy lalabien na Dios, noagta diad balang nasyon et makapaliket ed sikato so toon ontatakot ed sikato tan manggagaway duga.”—GAWA 10:34, 35.

Anggapoy papaboran na Amalsa ya lahi, lenguahe, kipapasen ed bilay, odino kolor na totoo. “Manlapud sakey a too et ginawa toy amin a nasyon na totoo.” (Gawa 17:26) Kanian sanaagi sirin so amin ya totoo. No marespeto tan maabig so pantrato tayod amin, napaliket tayo ra, magmaliw tayon mas maliket, tan napaliket tayo so Amalsa.

Magmaliw ya Mauyamo

“Isulong yo so . . . inkaulimek.”—COLOSAS 3:12.

No mauyamo tayo, komportable so arum ed sikatayo. Nibaga dad sikatayo so amin ya nalilikna da tan ag-ira natatakot ya mangipetek ed sikatayo ta amta da ya agtayo manpasnok. Sakey ni, no kalmado tayo labat no walay manpapasnok ed sikatayo, nayarin napakepa tayo so pasnok to. “Say maulimek ya ebat et pakepaen toy pasnok, balet say ansakit a panagsalita et palooren toy sanok,” so kuan na Proverbio 15:1.

Magmaliw ya Maiter tan Maapresya

“Mas makapaliket so mangiter nen say mangawat.”—GAWA 20:35.

Dakel ya totoo natan so maagum tan sarili da labat so iisipen da. Pero no maiter tayo, nalikna tayoy tuan liket. (Lucas 6:38) Mas maliket iray maiter ta mas inaro da iray totoo nen saray materyal ya bengatla. Atan met ya aro so mamapakiwas ed sikara ya pisalamatan tan apresyaen so inkamaiter na arum. (Colosas 3:15) Tepetan moy sarilim, ‘Siopay labay kon kaiba—amay agto amtay misalamat tan masiblet odino amay maiter tan maapresya?’ Antoy naaralan mod saya? Gawam ed arum ya totoo so labay mon gawaen da ed sika.—Mateo 7:12.