Apresiaen Iray ‘Langkap a Totoo’
“Pablien iramay impasyan mankikimey ed limog yo tan . . . ikdan ira na nagkalalo nen say nikaduman konsiderasyon ed aro lapud kimey da.”—1 TESALONICA 5:12, 13, NW.
1. Unong ed Gawa 20:35, antoy walan pakayari na panangiter? Iyilustra.
“LALO a mapalar so mangiter nen say mangawat.” (Gawa 20:35) Kasin nanonotan moy unor ya impakaeksperiensiam ed katuaan na saratan a salita nen Jesus? Anganko et sanen pinalangkapan moy sakey a pinabpablim. Pinilim iman a maong, ta labay mon napabli itan na ina’d-arom. Say maliket ya itsura na ina’d-arom—et agaylan paligsaen toy pusom! No suston apakiwas, say panangiter et sakey a balikas na aro, tan say pangipatnag ed aro et walaan na pakayarin mamaliket ed sikatayo.
2, 3. (a) Akin a nibagan anggapo lay mas maliket nen say si Jehova, tan panon a say probisyon a ‘langkap a totoo’ so mamagayaga ed puso to? (b) Antoy agtayo labay a gawaen ed sakey a langkap a nanlapud Dios?
2 Siopa ni sirin so mas maliket nen say si Jehova, say Manangiter na “amin a maong a palangkap”? (Santiago 1:17; 1 Timoteo 1:11) Balang langkap ya iiter to et papakiwasen na aro. (1 Juan 4:8) Petepeteg itan nipaakar ed langkap ya inter na Dios diad panamegley nen Kristo ed kongregasyon—saray ‘langkap a totoo.’ (Efeso 4:8) Say probisyon a mamatatken a mangasikaso ed pulok et sakey a balikas na aralem a panangaro na Dios ed totoo to. Sarayan totoo so pinilin maong—nepeg a makakapet ira ed Makasulatan iran kualipikasyon. (1 Timoteo 3:1-7; Tito 1:5-9) Kabat da a nepeg dan “tratoen so pulok tekep na inkatamoy,” ta pian saray karnero so nawalaan na rason a manliknan misalsalamat lapud saratan a maaron papastol. (Gawa 20:29; Salmo 100:3) Sano naiimano nen Jehova iray karnero ton manleppua ed kapusoan da so ontan ya otang a linawa, seguradon manliket so dilin puso to!—Uliran 27:11.
3 Maseguron agtayo labay a melmelagen so kablian na langkap a nanlapud Dios; nisay labay tayoy magmaliw ya agmaapresia ed saray langkap to. Duaran tepet sirin so onlelesa: Panoy nepeg a panmoria na mamatatken ed betang da ed loob na kongregasyon? Tan panon a nipanengneng na pulok ya aapresiaen day ‘langkap a totoo’?
‘Sikami Kapara Yon Komikimey’
4, 5. (a) Antoy angiyalilingan nen Pablo ed kongregasyon, tan akin a matukoy iyan ilustrasyon? (b) Antoy ipapanengneng na ilustrasyon nen Pablo nipaakar ed paraan a nepeg tayon panmoria tan pantrato ed sakey tan sakey?
4 Angimatalek si Jehova ed ‘langkap a totoo’ na sukat na autoridad ed loob na kongregasyon. Siempre, aglabay na mamatatken ya abusoey autoridad da, balet amta ra bilang ag-ayadyarin totoo a magmainomay a nagawaan itan. Panon sirin so nepeg a panmoria ra’d inkasikara nipaakar ed pulok? Konsideraen pay ilustrasyon ya inusar nen apostol Pablo. Kayari ton siningbat no akin a nitatarya iray ‘langkap a totoo,’ insulat nen Pablo: “Ed loob na aro, et ombaleg kayo komon ed amin a bengatla ed sikato, a sikato so Ulo, salanti si Kristo; a manlapud sikato say amin a laman maong so inkasangal to tan mankakasakey ed sikato met lamlamang ed panamegley na mangiter na nanlalangoan, unong ed panggagawa na sukat na balang sakey a kabiangan, pabalegen to so laman ed pangipaalagey to ed sikaton dili ed aro.” (Efeso 4:15, 16) Kanian inyaliling nen Pablo so kongregasyon, kalaktip iray mamatatken tan arum niran membro, ed laman na too. Akin a matukoy iyan ilustrasyon?
5 Say laman na too et tugyopen na dakel a nanduruman kabiangan balet walaan labat na saksakey ya ulo. Anggaman ontan, anggapo ed laman—anggan say masel, nerve, ulat—so andiay-kana. Kada kabiangan et walay kablian tan walaay nitulong ed bunigas tan karakpan na intiron laman. Mipadpara, say kongregasyon so tugyopen na dakel a nanduruman membro, balet kada membro—ugaw man odino matatken, mabiskeg odino maletey—et walay nitulong ed intiramintin espiritual a bunigas tan karakpan na kongregasyon. (1 Corinto 12:14-26) Agkomon ipasen na sakey a sikatoy ag-importantin tuloy. Diad kasunian, anggapoy nepeg a mangipasen a superyor, ta amin tayo—papastol tan ontan met ed saray karnero—et kabiangan na laman, tan wala labat so saksakey ya ulo, si Kristo. Sirin et ipapanengneng nen Pablo so maligsan litrato na aro, panangiyansakit, tan respeto a nepeg a niwala ed sakey tan sakey. Diad pamidbir na mamatatken ed saya, natulongan iran nawalaan na mapaabeba, asimbang a panmoria ed betang da diad loob na kongregasyon.
6. Anggaman walaan na autoridad bilang apostol, panon ya impatnag nen Pablo so mapaabeban awawey?
6 Sarayan ‘langkap a totoo’ so agmanggugunaet a mangontrol ed kabibilay odino pananisia na kapara ran managdayew. Si Pablo, anggaman walaan na autoridad bilang apostol et sipapaabeba ton inkuan ed saray taga-Corinto: “Aliwan say uleyan mi pananisia yo, noag ingen mananulong kami ed liket yo; ta lapu ed pananisia sialagey kayo.” (2 Corinto 1:24) Agpinirawat nen Pablo a kontrolen so pananisia tan kabibilay na agagi to. Peteg, anggapoy naimano ton pankaukolan a gawaen itan, ta imbalikas toy kompiyansa ton sikara lay matoor a lalaki tan bibii a walad loob na organisasyon nen Jehova lapud labay dan gawaen so duga. Kanian, diad panasaglawi to’d inkasikato tan ed si Timoteo a kaiba ton managbaroy, bilang resulta et inkuan nen Pablo: ‘Trabaho mi so pikimey ed sikayo a manlingkor ed Dios tekep na gayaga.’ (2 Corinto 1:1, NW) Agaylan mapaabeban awawey!
7. Antoy panmoria na saray mapaabeban mamatatken nipaakar ed betang da ed kongregasyon, tan anton kompiyansa so walad sikara ed saray kakimeyan da?
7 Saray ‘langkap a totoo’ natan so walaan met na ontan a trabaho. Sikaray ‘mananulong parad liket tayo.’ Namomoria na mapaabeban mamatatken ya agda idedesidian so arum no kaunongay nagawaan da ed serbisyo’d Dios. Amta ra ya anggaman nayarin pasesegen day arum a mamalaknab odino mamaaligwas ed ministeryo ra, say serbisyo ed Dios so nepeg a manlapud mabulos a puso. (Ikompara so 2 Corinto 9:7.) Matalek ira a no magayaga iray kakimeyan da, gawaen day anggaay nayarian da. Impapuso sirin a pilalek dan tulongay agagi ra pian ‘manlingkor ed si Jehova a tinekepay liket.’—Salmo 100:2.
Tulongan so Amin a Manlingkor Tekep na Gayaga
8. Antoray pigaran paraan a makatulong iray mamatatken ed saray agagi ra a manlingkor ed si Jehova tekep na gayaga?
8 Mamatatken, panon yon natulongan iray agagi yo a manlingkor tekep na gayaga? Makapanpaseseg kayo diad panamegley na ehemplo. (1 Pedro 5:3) Ipanengneng so seseg tan gayaga yo ed ministeryo, pian napaseseg so arum a mangalig ed ehemplo yo. Komendaan so arum ed intiron-kamarerwa iran sagpot da. (Efeso 4:29) Say ampetang tan masimoon a komendasyon so ontulong ed arum a manliknan makana tan nakakaukolan. Mamaseseg itan ed saray karnero a mankaliktan a manggawa’d sankaabigan da a manlingkor ed Dios. Paliisay agmanepeg a panangikompara. (Galacia 6:4) Saray ontan a panangikompara so manismaya imbes a mamakiwas ed arum pian onaligwas. Likud ni, saray karnero nen Jehova et indibidual—a walaan na nanduruman sirkumstansia tan abilidad. Singa si Pablo, ibalikas so kompiyansa ed saray agagi yo. Say aro et “amin sisiaen to,” kanian maong no sisiaen tayon saray agagi tayo et mangaaro ed Dios tan sikatoy labay dan napaliket. (1 Corinto 13:7) Sano ‘pagalangan yoy arum,’ napapaway yo’y sankaabigan da. (Roma 12:10) Ilaloan a sano napapaseseg tan napapaligsa iray karnero, maslak et gawaen day anggaay nayarian dan manlingkor ed Dios, tan sikaray makaromog na gayaga ed satan a serbisyo.—Mateo 11:28-30.
9. Anton panmoria ed kaparan mamatatken so ontulong ed kada matatken a manlingkor tekep na gayaga?
9 Say sipapaabeban pangipasen mo’d inkasika bilang ‘kaparan komikimey’ et ontulong ed sika a manlingkor tekep na gayaga tan pian naapresia iray nikadkaduman langkap na kaparam a mamatatken. Balang matatken so walaan na dili toran dunong tan abilidad a nausar to parad kagunggunaan na kongregasyon. (1 Pedro 4:10) Nayarin maong a manbangat so sakey. Say sananey et epektibon manag-organisa. Bangta say sananey et nayarin alay inomay ya asinggeran lapud inkaligsa to tan maabagey. Say katuaan et anggapoy matatken a walaan na amin a langkap ed parehon sukat. Kasin say pakawalaan na sakey a langkap—singa bilang, say langkap ed panagbangat—et pagmaliwen toy sakey a matatken a superyor ed sananey? Andin balot! (1 Corinto 4:7) Diad biek a dapag, agnepeg ya ibegan so langkap a walad sakey odino liknaen ton makulang sano say abilidad na sakey a matatken et sengegay inkakomendaan to manlapud arum. Nonoten, sikan mismo so walaan na saray langkap a nanenengneng nen Jehova ed sika. Tan natulongan to kan mamayubo ed saratan a langkap tan usaren iratan parad kagunggunaan na agagim.—Filipos 4:13.
‘Ontulok tan Manpauley’
10. Akin et matukoy labat ya ibalikas tayoy apresasyon tayo ed ‘langkap a totoo’?
10 Sano makaawat itayoy langkap, matukoy labat so pangibalikas na apresasyon. “Sikayo komon so misalsalamat,” kuan na Colosas 3:15. Anto met so nipaakar ed ‘langkap a totoo,’ say mablin langkap ya inter nen Jehova ed sikatayo? Siempre, manunan misalsalamat itayo ed si Jehova, say mabunlok a Manangiter na Langkap. Balet anto met so nipaakar ed ‘langkap a totoo’? Panon tayon nipanengneng ya aapresiaen tayo ira?
11. (a) Panon tayon nipanengneng so apresasyon tayo ed saray ‘langkap a lalaki’? (b) Antoy kabaliksan na saray balikas ya ‘ontulok’ tan ‘manpauley’?
11 Nipanengneng tayoy apresasyon tayo ed ‘langkap a totoo’ diad pagmaliw a masiglat ya ontalineng ed nibase’d-Biblian simbawa tan saray desisyon da. Bibilinen itayo na Biblia: “Ontulo’kayo ed saray wala a manuley ed sikayo, tan pauleyan kayo ed sikara: ta manbabantay ira lapu ed saray kamarerwa yo, a singa sikara so mangiter naani pipalinewan: pian sikato ya so gawaen da a sigagayaga, tan aliwa a sieermen: ta saya agmakapaabig ed sikayo.” (Hebreos 13:17) Imanoen a nepeg ya ag-itayo labat ‘ontulok,’ noagta ‘manpauley’ met ed saramay mangidadaulo. Say Griegon salita parad ‘manpauley’ et literal a mankabaliksan na “manpasakop kayo.” Onia so inkuan nen iskolar na Biblia a si R. C. H. Lenski, diad pangokomento to’d saray balikas ya ‘ontulok’ tan ‘manpauley’: “Ontulok so sakey sano onabobon ed ipagagawa ed sikato, ya atangguyor ed inkasusto tan pakagunggunaan ed satan; onabuloy so sakey . . . sano sikatoy walaan na sumlang ya opinyon.” No natatalosan tan onabobon itayo ed panangidirehi na saramay mangidadaulo, say katutulok so mabulbulos. Balet anto no agtayo natatalosan so rason ed sakey a denisisyonan?
12. Akin a nepeg a magmaliw itayon manpauley, odino onabuloy, anggan agtayo sigpot a natatalosan so rason ed sakey a desisyon?
12 Ditan so pankaukolan tayoy manpauley, odino onabuloy. Akin? Say sakey a rason et kaukolan itayon manmatalek a sarayan kualipikado ed espiritual a lalaki et lawas dan pipilaleken a tuloy iray pankaabigan tayo. Tutal, kabat dan tuloy a walaan ira na eebatan ed si Jehova parad saray karneron nimatalek ed panangasikaso ra. (Santiago 3:1) Niarum ni, maong no nonoten tayon agtayo amtan amin so kompidensyal iran katuaan a nansumpal ed base’d pikakabat a desisyon.—Uliran 18:13.
13. Antoy makatulong ed sikatayo pian manpauley no nipaakar ed hudisyal iran desisyon na mamatatken?
13 Anto met so nipaakar ed pagmaliw a manpauley no nipaakar ed hudisyal iran desisyon? Tua, nayarin aliwan mainomay iya, nagkalalo la no say desisyon et kadispelosip na sakey ya inad-aro tayo—sakey a kanayon odino maapit a kaaro. Dia lamet et sankaabigan lay onabuloy ed impangukom na ‘langkap a totoo.’ Wala ira’d kipapasen a mas nasimbang da iray bengatla nen say sikatayo, tan mas dakel so amta ran detalyi. Sarayan agagi so mabetbet a naeermenan ed ontan iran desisyon; seryoson responsabilidad so ‘pangukom nipaakar ed si Jehova.’ (2 Awaran 19:6) Pambabanikelan day pagmaliw a mapangasi, ta sikaray sinononot a say Dios so ‘akaparaan a mamerdona.’ (Salmo 86:5) Balet nepeg da met a pansiansiaen a malinis so kongregasyon, tan iwawanwan na Biblia a nepeg dan dispelosipen iray agmagbabawin managgaway mauges. (1 Corinto 5:11-13) Diad dakel a kaso, say managgaway mauges mismo so mangaawat ed desisyon. Ompan say nakakaukolan et say disiplina pian namoria to. No sikatayo, bilang inad-aro to, so manpauley no nipaakar ed desisyon, diad ontan et sikatoy natulongan tayo a nagunggunaan manlapud disiplina.—Hebreos 12:11.
“Ikdan Ira na Nagkalalo nen say Nikaduman Konsiderasyon”
14, 15. (a) Unong ed 1 Tesalonica 5:12, 13, akin a makanepegan na konsiderasyon tayo iray mamatatken? (b) Akin a nibagan saray mamatatken so ‘impasyan mankikimey ed biang tayo’?
14 Nipatnag tayo met so apresasyon tayo ed ‘langkap a totoo’ diad pangipanengneng ed sikara na konsiderasyon. Diad panusulat to ed kongregasyon ed Tesalonica, binilin nen Pablo iray membro ditan: “Pablien iramay impasyan mankikimey ed limog yo tan mangiimaton ed sikayo diad Katawan tan mamibilin ed sikayo; tan . . . ikdan ira na nagkalalo nen say nikaduman konsiderasyon ed aro lapud kimey da.” (1 Tesalonica 5:12, 13, NW) “Impasyan mankikimey”—agta dedeskribien na satan iray debosyonadon mamatatken ya agmangikikibot ed inkasikara ed biang tayo? Konsideraen pan magano so ambelat a sasakbaten na sarayan pinablin agagi.
15 Diad dakel a kaso sikaray de-pamilyaan a lalaki a nepeg met a mantrabaho ed sekular ta pian nalegpet iray pamilya ra. (1 Timoteo 5:8) No walaray ilalak na matatken, sarayan ugugaw ni so mankaukolan na panaon tan imano na ama ra. Nayarin kaukolan ton tulongan ira ed saray asainmin da ed eskuelaan, ontan met ed pangiyeskedyul toy pigaran panaon parad sikara pian nausar day inkatobonbalo ra ed maabig a panligliwaan. (Eclesiastes 3:1, 4) Sankaimportantian, sikatoy mangaasikaso ed espiritual a pankaukolan na pamilya to, regular a mangikokondukta ed panag-aral na Biblia bilang pamilya, uulopen tora ed lawak na ministeryo, tan ipipila tora ed saray Kristianon miting. (Deuteronomio 6:4-7; Efeso 6:4) Agtayo komon lilingwanan bilang kaaruman ed sarayan responsabilidad a kaslakan ed dakel ed sikatayo, walaan na kaaruman ya obligasyon iray mamatatken: panagparaan parad saray betang ed miting, panagpastol ya idadalaw, pangasikaso’d espiritual a pankaabigan na kongregasyon tan, sano kapilitan, pamenben na hudisyal iran kaso. Arum so walaan na kaaruman nin responsabilidad nipaakar ed saray sirkiton asamblea, distriton kombension, panagpaalagey na Kingdom Hall, tan Hospital Liaison Committees. Talagan sarayan agagi so “impasyan mankikimey”!
16. Deskribien iray paraan a nipanengneng tayoy konsiderasyon ed mamatatken.
16 Panon tayon nipanengneng ed sikara so konsiderasyon? Ibabaga na sakey a proverbio ed Biblia: “Say salita ed kanepegan to, agayla so abig to!” (Uliran 15:23; 25:11) Kanian saray masimoon a balikas na apresasyon tan panamaseseg so mangipanengneng ed sikara ya agtayo ibabaliwala iray impasyan kimey da. Ontan met, nepeg a magmaliw itayon makatunongan ed iilaloan tayo’d sikara. Diad biek a dapag, nepeg tayon liknaen a bulos itayon onasingger ed sikara parad tulong. Nayarin walaray panaon sano ‘say puso tayo so apasakitan a tuloy’ tan kaukolan tayoy Makasulatan a panamaseseg, giya, odino simbawa manlapud saramay “kualipikadon manbangat” ed Salita na Dios. (Salmo 55:4; 1 Timoteo 3:2, NW) Ontan met, kaukolan tayon nonoten a wala labat so magenap a panaon a niiter na sakey a matatken ed sikatayo, ta agto nayarin paulyanan iray pankaukolan na dilin pamilya to odino na arum ed loob na kongregasyon. Diad pakawalaan tayoy “maabagey [a liknaan]” ed sarayan impasyan mankikimey ya agagin lalaki, agtayo labay so agmakatunongan ya oney-ey ed sikara. (1 Pedro 3:8) Imbes, magmaliw tayo komon a maapresia ed antokaman a panaon tan imano a makatunongan dan niiter ed sikatayo.—Filipos 4:5.
17, 18. Antoran sakripisyo so gagawaen na dakel a kaasawaan na mamatatken, tan panon tayon nipanengneng ya agtayo ibabaliwala irayan matoor ya agagin bibii?
17 Anto met so nipaakar ed kaasawaan na mamatatken? Agta makanepegan met ira na konsiderasyon tayo? Tutal, inanabang day kaasawaan da ed kongregasyon. Mabetbet a mankaukolan iya na panagsakripisyo ed biang da. Tunggal paminsan, kaukolan na mamatatken ya usaren iray oras ed labi diad pangasikaso’d saray pamaakaran na kongregasyon ya usaren da komon ed pamilya ra. Diad dakel a kongregasyon saray matoor a Kristianon bibii so mabulos a mangisasakripisyo ed saratan ta pian naasikaso na kaasawaan da iray karnero nen Jehova.—Ikompara so 2 Corinto 12:15.
18 Panon tayon nipanengneng ya agtayo ibabaliwala irayan matoor a Kristianon bibii? Maseguron diad agpagmaliw ya agmakatunongan a maey-ey ed saray kaasawaan da. Balet agtayo met lilingwanan so epekto na simpli iran balikas na apresasyon. Ibabaga na Uliran 16:24: “Saray makapaliket a salsalita sikara so singa kulaba na dilo, masamit ed kamarerwa, tan kasil ed saray pukel.” Konsideraen pay sakey ya eksperiensia. Kayari Kristianon miting, inasinggeran na sanasawa so sakey a matatken tan akitongtong ira ed sikato nipaakar ed tin-edyer ya anak dan laki. Legan a pitotongtongan na matatken so sanasawa, maan-anos a nanalagar so asawa to. Kayari to, inasinggeran na ina so asawa na matatken tan inkuanto: “Labay ta kan pisalamatan parad panaon ya inter nen masiken mo pian tulongay pamilyak.” Saraman a simpli, makapaliket iran balikas na apresasyon so talagan anenyeg ed puso na asawa na saman a matatken.
19. (a) Saray mamatatken, bilang grupo, so matoor a manusumpal ed antoran gagala? (b) Antoy nepeg a determinadon gawaen tayo?
19 Say probisyon na mamatatken pian mangasikaso ed saray karnero so sakey ed ‘saray maong a palangkap’ nen Jehova. (Santiago 1:17) Andi, ag-ayadyari irayan lalaki; singa met sikatayon amin, sikaray makakagaway lingo. (1 Arari 8:46) Ingen, bilang grupo, saray mamatatken ed saray kongregasyon ed sankamundoan so matoor a manusumpal ed saray bengatlan angigagalaan nen Jehova ed sikara—salanti, pangipetek lamet, pangipaalagey, pamakasakey, tan panalimbeng ed pulok. Komon ta determinado so balang matatken a sitatamoy a mantultuloy a mangiyansakit ed saray karnero nen Jehova, diad ontan et napaneknekan toy inkasikato bilang sakey a langkap, odino bendision, ed agagi to. Tan komon ta amin tayo so determinadon mangipanengneng na apresasyon tayo ed saray ‘langkap a totoo’ diad pagmaliw a matulok tan pauleyan ed sikara tan diad pangipanengneng ed sikara na konsiderasyon parad impasyan kimey da. Agaylan misalsalamat itayo ta simamaaron angitarya si Jehova na lalaki a, mangikuan ed karnero to: ‘Trabaho min tulongan kayon manlingkor ed Dios tekep na gayaga’!
Panon Yon Ebatan?
◻ Akin a matukotukoy a nikompara so kongregasyon ed sakey a laman?
◻ Panon a natulongan na mamatatken iray agagi ra a manlingkor ed si Jehova tekep na gayaga?
◻ Akin ya ag-itayo labat matulok noagta pauleyan met ed saramay mangidadaulo?
◻ Diad antoran dalan a nipanengneng tayoy konsiderasyon ed mamatatken?
[Litrato ed pahina 16]
Mamatatken, komendaan so arum lapud intiron-kamarerwa iran sagpot da
[Litrato ed pahina 17]
Diad panamegley na maseseg ya alimbawa ra ed ministeryo, makatulong iray mamatatken ed saray membro na pamilya tan ed arum a manlingkor tekep na gayaga
[Saray litrato ed pahina 18]
Apresiaen tayoray impasyan mankikimey a mamatatken tayo!