Maabig ya Indengan ed Personal

SAY personal ya indengan mo so mangibaga na dakel nipaakar ed sika. Anggaman say puso so nenengnengen nen Jehova, maslak et walay nibaga na totoo unong “ed mapaway a nengneng.” (1 Sam. 16:7) No sika so malinis tan pineng, nayarin ibaga na arum a walay respetom ed inkasika, tan lalon ontalineng ira ed sika. Say matukoy a panangawes mo so paborablin mangiyaaninag met ed organisasyon ya irerepresentam tan diad panmoria na saray dumerengel mo nipaakar ed Dios a dadayewen mo.

Saray Totontonen ya Iyaplika. Ag-idadatak na Biblia so dakel a totontonen nipaakar ed personal ya indengan. Balet ta intarya to so asimbang iran prinsipyo ya ontulong ed sikatayon manggawa na maabig iran desisyon. Manuna ed amin na saraya et say katuaan a ‘gawaen [tayo] so amin a bengatla para ed kigloriaan na Dios.’ (1 Cor. 10:31) Antoran prinsipyo so nasasaglawi nipaakar ed personal ya indengan tayo?

Unona, papasesegen itayo na Biblia a magmaliw a malinis, namparan diad laman tayo tan ed kawes tayo. Diad Ganggan to ed Israel nensaman, indatak nen Jehova iray kakaukolanen nipaakar ed kalinisan. Alimbawa, sano mantrabaho iray saserdote, sikara so manames tan ipesak daray kawes da ed ingganan panaon. (Lev. 16:4, 24, 26, 28) Saray Kristiano so anggapo ed silong na Mosaikon Ganggan, balet saray prinsipyon lugan na satan so siansia nin matukoy. (Juan 13:10; Apoc. 19:8) Nagkalalo la sano sikatayo so onla ed pasen na panagdayewan odino manpupulong, say laman tayo, panlinawa tayo, tan kawes tayo so nepeg a malinis ta pian agda itayo moriaen ya ambanget. Saramay manpaliwawa odino mangiparungtal na demostrasyon diad kongregasyon so nepeg a mangipanengneng na maabig ya ehemplo nipaakar ed saya. Say pangimano tayo ed personal ya indengan so panangipanengneng na respeto ed si Jehova tan ed organisasyon to.

Komadua, bibilinen itayo na Biblia a bayuboan so kasimpitan tan inkalimpio na kanonotan. Pinaseseg nen apostol Pablo iray Kristianon bibii a ‘palesan da so inkasikara . . . na kasimpitan tan inkalimpio na kanonotan, aliwan diad estilo na panaglapir na buek tan balitok odino perlas odino mabmablin kawes, noagta diad paraan a matukoy ed bibiin mangibabagan mangigagalang ed Dios.’ (1 Tim. 2:9, 10, NW) Say kasimpitan tan inkalimpio na kanonotan so importante met diad panangawes tan panag-ayos na lalaki.

Say toon masimpit so mapaga ed pakaopendi ed arum tan agmanawag na agmanepeg ya imano ed inkasikato. Say inkalimpio na kanonotan so mansumpal ed makabat, odino maong a panagdesisyon. Say toon mangipapanengneng ed sarayan kalidad so walaan na inkasimbang a resulta na panagrespeto ed maridios iran estandarte. Say pangipatnag ed sarayan kalidad so agmangipuera ed marakep a panangawes noagta tulongan to itayon magmaliw ya asimbang ed indengan tayo tan paliisan so maar-arten estilo na panangawes tan panag-ayos. (1 Juan 2:16) Labay tayon iyaplika irayan prinsipyo balanglan wala itayo ed pasen na panagdayewan, manpupulong, odino mibibiang ed arum ya aktibidad. Anggan say para inagew-agew a kawes tayo so nepeg a mangipatnag na kasimpitan tan inkalimpio na kanonotan. Diad eskuelaan odino diad pantratrabahoan tayo, walaray pankanawnawan makapanpulong itayo ya impormal. Anggaman say panangawes tayo et aliwan singa sano onatendi ed saray miting, kombension, tan asamblea, say kawes tayo so siansia nin nepeg a pineng, malinis, tan masimpit.

Siempre, aliwan parepareho so panangawes tayon amin. Ag-itayo nailaloan ya ontan. Saray totoo so walaan na nanduruman panlabay, tan susto met labat iya. Balet saray totontonen ed Biblia so nepeg ya iyaplikan naynay.

Impanengneng nen apostol Pedro a say lalon importante nen say estilo na buek tan saray kawes et samay nisiglaot ed “niamot a too na puso.” (1 Ped. 3:3, 4) No say kapusoan tayo so napno na aro, gayaga, deen, panangasi, tan pananisian niletneg a malet, saraya so magmaliw ya espiritual iran kawes tayo a tuan mamagalang ed Dios.

Komatlo, papasesegen itayo na Biblia ya imanoen no kasin say indengan tayo so mauksoy. Diad 1 Timoteo 2:9, abitla so ‘mauksoy a kawes.’ Anggaman tutukoyen nen apostol Pablo so kawes na bibii, say prinsipyo so onaplika met ed lalaki. Say bengatlan mauksoy et pineng tan masinop. Balanglan mayaman itayo odino andi, nasarag tayo so masinop ya indengan.

Say buek tayo so sakey ed saray unonan aspekto na personal ya indengan a naimano na arum. Nepeg a malinis, odino mauksoy. Say kustombre ed lokal tan saray abangonan so misiglaotan ed no panon so panlabay na totoo ed estilo na buek da. Diad 1 Corinto 11:14, 15, naromog tayo so konseho nen apostol Pablo ed saray estilo na buek, a mapatnag a manutukoy ed sarayan aspekto. Anggaman ontan, no say estilo na buek na sakey a too so mangipatnag na impresyon a sikato so singa la mipara ed agto kapara ed sekso, saya so misumlangan ed prinsipyo na Biblia.​—Deut. 22:5.

Para ed lalaki, say malinis a personal ya indengan so nayarin mangilaktip ed pangiskis ed balbas. Diad arum a pasen a say bigote so momoriaen a pormal, siopaman a walaan na saya so nepeg a pansiansiaen ton masimpit ya akatlian.

Komapat, say indengan tayo so agnepeg a mangipatnag na aro ed mundo tan ed saray paraan to. Impasakbay nen apostol Juan: “Aleg ya aroen yo so mundo, ni saray bengatla a wala ed mundo.” (1 Juan 2:15-17) Dakel iran makasalanan a pilalek so ipapatnag na sayan mundo. Arum ed saratan et sinaglawi nen Juan bilang say pilalek na makasalanan a laman tan say inkamapangta na kaykayarian na sakey. Impaimano met na Kasulatan so espiritu na rebelyon, odino agkatutulok ed autoridad. (Uli. 17:11; Efe. 2:2) Sarayan pilalek tan awawey so mabetbet a nipapatnag ed paraan na panangawes na totoo tan panag-ayos da. Bilang resulta, say indengan da so nayarin aliwan masimpit, makaayat, maar-arte, akeskes, aliw-liwa, odino akulkulastay. Bilang lingkor nen Jehova paliisan tayoray estilon mangipatnag na ontan iran agmakristianon paraan.

Imbes ya aligen so mundo, magmaong a say mangimpluensya ed panangawes tan panag-ayos mo et say maabig ya ehemplo na matakken ed espiritual iran lalaki tan bibii ed loob na Kristianon kongregasyon! Saray kalangweran a lalaki a pilalek day magmaliw a managpaliwawa ed publiko ed arapen so mangimano ed panangawes na saraman so kualipikado lan manpapaliwawa ed publiko. Amin so makaaral ed ehemplon impanengneng na saray indibidual a sitotoor a manpupulong ed publiko ed dakel lan taon.​—1 Tim. 4:12; 1 Ped. 5:2, 3.

Komalima, diad pandeside ed no anto so matukoy, nepeg tayon nodnonoten a “si Kristo met agto pinaliket so inkasikaton dili.” (Roma 15:3) Say manunan nampagaan nen Jesus et say panggawa ed linawa na Dios. Inyuna met nen Jesus so pananulong ed arum nen say personal a pankaabigan to. Nipaakar ed arum ya estilo na panangawes tan panag-ayos, no wala so bengatlan onlesan problema ed baetan tayo tan saray totoon panseserbian tayo natan, anto so nepeg tayon gawaen? Say pangalig ed mapaabeban espiritun impanengneng nen Kristo so ontulong ed sikatayon makapandesidin makabat. Indatak nen apostol Pablo so prinsipyo: “Agkami mangiter na bengatlan kagapolan.” (2 Cor. 6:3) Lapud satan a rason, agtayo labay ya aligen iray estilo na buek odino klase na kawes a sengeg lay agpangawat na totoon labay tayon pulongan.

Postura. Lalanoren met na maabig ya indengan ed personal so manepeg a postura. Siempre, ag-itayo parparehon amin ed panamostura, tan agtayo panggunaetan a tumboken so sakey a pangaligan. Anggaman ontan, makatantanda ya unong ed impangusar na Biblia, say iyalagey a maptek so mangipasabi na personal a dignidad tan inka-positibo. (Lev. 26:13; Luc. 21:28) Anggaman kuan, lapud pankikimey ed dakel a taon ya akabukot odino lapud itatakken la odino pisikal a kakapuyan, say sakey ya agin laki odino bii so nayarin agla makasarag ya onalagey a maptek odino nayarin nakaukolan to so onsaral pian makaunat. Balet para ed saraman so makayarin manggawa, nirekomenda so dugarugan iyalagey a maptek sano manpapaliwawa ed arum ta pian agmangipasabi na makapuy odino midedespensan awawey. Ontan met, anggaman aliwan makapuy so sagpaminsan a pangitapew na managpaliwawa ed lima to diad podyum, say lalon positibon impresyon so kaslakan a nipasabi ed saray dumerengel no sikato so ag-ompapeg ed satan.

Masinop a Kagawaan. Aliwa lambengat a say personal ya indengan tayo so malinis tan mauksoy a maong noagta nepeg met a malinis tan masinop so uusaren tayo ed ministeryo.

Konsideraen so Bibliam. Aliwan posible ed amin tayo a makala na balon Biblia sano say Biblia tayo so nadederal la. Anggaman kuan, anggan kaunongan la so kabayag na Biblia a walad sikatayo, nepeg a napatnagan a satan so nalalaniran a maong.

Siempre, walaray dakel a paraan na pangkarga ed panagpulong a bag, balet nepeg a masinop itan. Kasin akanengneng ka la na manpaplag iran papel ed Biblia sano ibasa la na sakey a manangipalapag so sakey a teksto ed onabung odino nayarin sano say sakey ya agin laki so manpapaliwawa ed kongregasyon? Agta nabalang lay imanom? No pakabalangan lay imanom iray papel ya insigpit ed Biblia, nayarin say pangikarga ed saratan ed sananey a pasen so manggawan mauksoy a maong ed uusaren mo. Bidbiren met, a dia ed arum a kultura, say pangigaton na Biblia odino arum a relihyoson palapagan ed datal so ipasen a pirmin agpanagrespeto.

Say maabig ya indengan ed personal so nepeg ya importante ed sikatayo. Impluensyaan met na satan no panon so panmoria na arum ed sikatayo. Balet manuna ed amin, imanoen tayo itan lapud pilalek tayon “parakepen so bangat na Manangilaban tayo, say Dios, ed amin a bengatla.”​—Tito 2:10, NW.