Say Biblia—Anggapoy Miparan Libro

Natatawag itan a san-kasaliwan ed mundo, tan ma-tukotukoy labat itan. Say Biblia so babasaen tan papablien a tuloy nen say dinanman nin libro. Natan et say inkibunog to la (diad intiro odino kabiangan to) et akalkula lan apatiran bilyon a kopya ed masulok a 2,000 lenguahe.

Balet, mas makapainteres ni nen say sirkulasyon na Biblia et say ibabaga ton madibinoy inka-autor to. “Amin a Sulat [so] inpuyan na Dios,” ontan so insulat na Kristianon apostol Pablo. (2 Timoteo 3:16) Antoy kabaliksan na saya? Diad literal et say balikas ya “inpuyan na Dios” (Griego, the·oʹpneu·stos) et kabaliksan toy “inlinawa-na-Dios.” Say misiglaotan a Griegon salita et pneuʹma, a say kabaliksan to et “espiritu.” Kanian, nibabaga a say masanton espiritu na Dios so amakiwas ed saray managsulat, ililinawa ed sikara, a singa panangibaga, ta pian say pawayan to et tudtuan natawag a Salita na Dios, ya agnanlapud too. On, pandinayewan na dakel ya akapanaral ed Biblia so pantutunosan na amin a libro to, say inkasusto to unong ed siensia, say inkamatua tan inkaprangka na saray managsulat to, tan sankaimportantian et say impakasumpal na saray propesiya to​—amin na satan so pakakokombinsian na minilyon a matudion managbasa a sayan libron so nanlapud superyor nen say too.a

Balet kaunongan kaapit so impangigiya na Dios ed inkisulat na say Biblia? Kuan na arum ya indikta to so Biblia a salita por salita. Ikuan met na arum ya inpuyan to labat iray kaisipan a naromog ed Biblia, aliwan saray salita. Balet, diad inkapeteg et agnilimita so panangipuyan ed saksakey a paraan, ta say Dios so nansalita “dia ed nagsisananey a nengneng . . . ed saray atateng dia ed panamegley na saray propeta.” (Hebreos 1:1; ikompara so 1 Corinto 12:6.) Diad ontumbok ya artikulo et usisaen tayoray dalan na impisalita na Dios ed 40 totoon nansulat ed Biblia.

[Paimano ed leksab]