Kapitulo 38
Idayew si Jah Lapud Saray Panangukom To!
1. Antoran salita so narerengel nen Juan ed “sakey a baleg a boses na baleg ya ulop dia ed tawen”?
ANGGAPO la so Babilonia a Baleg! Peteg a makapaliket iyan balita. Agpankelawan a narerengel nen Juan so makapalikliket iran panangikelyaw na dayew ed tawen! “Kayari na sarayan bengatla nadngel ko so sakey a baleg a boses na baleg ya ulop dia ed tawen, a kuanto, Aleluya; say panangilaban, tan gloria, tan pakayari kien ira na Katawan a Dios tayo: Ta saray panangukom to sikara so tua tan matunong; ta sikato inukom to so baleg a balangkantis, a sikato so nanderal ed dalin lapu ed impilawan to, tan insingil to so dala na saray aripen to dia ed lima to. Tan dia ed komadua kuanda, Aleluya. Tan say asewek to sinmegep ed ando lan ando.”—Apocalipsis 19:1-3.
2. (a) Anto so kabaliksan na salitan “Aleluya,” tan anto so ipapatnag na amiduan impakadngel nen Juan diad sayan punto? (b) Siopa so mangawat na gloria lapud impaneral ed Babilonia a Baleg? Ipaliwawa.
2 Peteg ya Aleluya! Say kabaliksan na sayan salita et “Idayew si Jah, sikayoran totoo,” a say “Jah” so pinatikey a porma na madibinon ngaran a Jehova. Ipapanonot ed sikatayo na saya so panamaseseg na salmista ya: “Amin a bengatla a wala so panlinlinawa to idayew to si Jehova. Idayew yo si Jehova.” (Salmo 150:6) Say amiduan impakadngel nen Juan ed magayagan mangatatawen a pananganta na koron “Aleluya” diad sayan punto ed Apocalipsis so mangipapatnag a mantutultuloy so madibinon panangiparungtal ed katuaan. Say Dios na Kristianon Griegon Kasulatan et sikato lanlamang so Dios na akadkaunan Hebreon Kasulatan, tan say ngaran to et Jehova. Say Dios ya angigeba ed kadaanan a Babilonia so angukom tan aneral la natan ed Babilonia a Baleg. Iter ed sikato so amin a gloria lapud satan ya agawaan! Say pakapanyari ya angimaneobra ed inkagba na satan et nanlapu ed sikato aliwan diad saray nasyon ya inusar to a mangigeba ed satan. Utang tayo so kililiktar ed si Jehova lambengat.—Isaias 12:2; Apocalipsis 4:11; 7:10, 12.
3. Akin a talagan kanepegan na baleg a balangkantis so kaukom to?
3 Akin a talagan kanepegan na baleg a balangkantis iyan pangukom? Unong ed ganggan ya inter nen Jehova ed si Noe—tan diad panamegley to et niiter met ed amin a totoo—say agmanundan panagpaagus na dala so makanepegan na sentensian patey. Saya so sinaglawi lamet ed Ganggan na Dios ed Israel. (Genesis 9:6; Numeros 35:20, 21) Niarum ni, diad silong na satan a Mosaikon Ganggan, patey so dusa na namparan pisikal tan espiritual a pikakalugoran. (Levitico 20:10; Deuteronomio 13:1-5) Diad loob na nilibon taon, say Babilonia a Baleg so nankasalanan ed dala, tan sikatoy sankagrabian a milalawanan. Alimbawa, say totontonen na Iglesia Katolika Romana a panangisebel ed pangasawa na papari so nanresulta ed graben imoralidad na maslak ed sikara, tan aliwan pigpigara ed saraya natan so adapoan na sakit ya AIDS. (1 Corinto 6:9, 10; 1 Timoteo 4:1-3) Balet saray manunan kasalanan to, ‘a sinmabi angga ed tawen,’ et say makapakebbiew ya espiritual a pilalawanan to—gagawaen to iya diad pangibabangat ed saray katilaan tan piaalyansa ed kurakot iran politiko. (Apocalipsis 18:5) Lapud nipaakseb a siansia so dusa to, say mangatatawen ya abalbaleg ya ulop so mangikekelyaw natan ed komaduan Aleluya.
4. Anto so isisimbolo na katuaan a say asewek na Babilonia a Baleg so “sinmegep ed ando lan ando”?
4 Say Babilonia a Baleg so pinoolan a singa kinubkob a syudad, tan say asewek to so “sinmegep ed ando lan ando.” Sano say literal a syudad so pinoolan na mangukubkob iran armada, mantultuloy a mamaatagey so asewek na satan anggad ampetang ni so dapol. Siopaman a manalin mangipaalagey lamet ed satan leleg a manasewek ni, so napuldakan ed ngalab na saray geray. Lapud say asewek na Babilonia a Baleg so mamaatagey “ed ando lan ando” a pakapatnagan ya agla nauman so kaukom to, anggapon balot so makapangipawil ed satan a makasalanan a syudad. Naandi ed ando lan ando so palson relihyon. Peteg ya Aleluya!—Ikompara so Isaias 34:5, 9, 10.
5. (a) Anto so gagawaen tan ibabaga na 24 a mamasiken tan say apatiran mabilay a pinalsa? (b) Akin a say Aleluya a koro et mas marakep ya aminpigapiga nen saray koron Aleluya a kakantaen ed saray simbaan na Kakristianoan?
5 Diad akadkaunan pasingawey, anengneng nen Juan so apatiran mabilay a pinalsa ya akapaliber ed trono, kaiba na 24 a mamasiken a mangirerepresenta ed saray mananawir na Panarian diad maglorian mangatatawen a kipapasen da. (Apocalipsis 4:8-11) Natan et nanenengneng to ira lamet leleg ya ikekelyaw da so mikatlon Aleluya lapud kadederal na Babilonia a Baleg: “Tan saray duamplo tan apat a mamasiken tan saray apatira a pinalsa a mabilay dinmakmomo ra tan inggalgalang da so Dios a wala a manyurong ed trono, a kuanda, Amen; Aleluya.” (Apocalipsis 19:4) Sayan engranden Aleluya a koro so kaaruman sirin ed say “balon kanta” na panangidayew ed Kordero. (Apocalipsis 5:8, 9) Kakantaen da natan so marakdakep a koro na pananalo, ya iter so amin a gloria ed Soberanon Katawan a Jehova lapud seguradon impanalo to sumpad baleg a balangkantis, say Babilonia a Baleg. Sarayan Aleluya so mas marakep ya aminpigapiga nen say anggan dinan a koron Aleluya a kakantaen diad saray simbaan na Kakristianoan, a ditan et agnapapagalangan tan napapabanday ni ingen si Jehova odino si Jah. Satan a pansimpisimpitan a pananganta a mamapabanday ed ngaran nen Jehova so napepe la natan ed ando lan ando!
6. Siopa so ‘makan-boses’ ed nadngel, anto so ipapaseseg to, tan sioparay akibiang a kinmiwas?
6 Nen 1918, ginapoan nen Jehova a tumangan ‘iramay tinmakot ed ngaran to, saray angkelag tan angkabaleg’—say akauna ed saraya et saray alanaan a Kristiano ya inatey a matoor, a pinaoli to tan impasen to ed mangatatawen a rangko na saray 24 a mamasiken. (Apocalipsis 11:18) Walaray arum ya akibiang ed panagkanta na saray Aleluya, lapud oniay irereport nen Juan: “Tan pinmaway so sakey a boses dia ed trono, a kuanto, Iter yoy galang ed Dios tayo, amin yo ya ariripen to, tan sikayo ya antakot ed sikato, ankekelag man o angkakabaleg.” (Apocalipsis 19:5) Saya so “boses” na Pinagkasangiyan nen Jehova, say Anak ton dili, si Jesu-Kristo, a manal-alagey ed “pegley na trono.” (Apocalipsis 5:6) Aliwa lambengat a diman ed tawen noagta pati diad dalin et ‘amin ya ariripen to’ so mibibiang ed panagkanta, kaiba so alanaan a Juan a klase a mangidadaulo ed dalin. Agaylay liket na saraya diad itutulok ed ganggan ya: “Iter yoy galang ed Dios tayo”!
7. Kayari kaderal na Babilonia a Baleg, siopara so mangidayew ed si Jehova?
7 On, say baleg ya ulop so kabiangan met ed sarayan ariripen. Nanlapu la nen 1935 et ginmapo irayan pinmaway ed Babilonia a Baleg tan naeksperiensya ray kasumpalan na sipan na Dios: “Sikato papalaren to so ontatakot ed Jehova, balang la ed melag tan baleg.” (Salmo 115:13) Sano say singa-balangkantis a Babilonia so naderal, minilyon ed sikara so mibiang ed ‘pangiter na galang ed Dios tayo’—a kaiba so Juan a klase tan amin a mangatatawen ya armada. Diad saginonor, saramay napaoli ed dalin, balanglan datin prominente odino andi, so seguradon manganta met na saray Aleluya diad pakaamta a say Babilonia a Baleg so naandi la ed ando lan ando. (Apocalipsis 20:12, 15) Amin so mangidayew ed si Jehova lapud matalonggaring ya impanalo to sumpad bangkulaw a balangkantis!
8. Anton panamabiskeg so nepeg ya iter natan ed sikatayo na mangatatawen iran koro na panangidayew ya atasian nen Juan, sakbay a deralen so Babilonia a Baleg?
8 Agaylan panamabiskeg so iiter na saya ed sikatayo pian sigpot a mibiang ed kimey na Dios natan! Komon ta amin a lingkor nen Jah so impapuso tan interon kamarerwa a mangideboto ed inkasikara ed panangiyabawag ed saray panangukom na Dios, ontan met ed say engranden ilalo ed Panarian, natan, sakbay ya ekalen tan deralen so Babilonia a Baleg.—Isaias 61:1-3; 1 Corinto 15:58.
‘Aleluya—si Jehova so Ari!’
9. Akin a say tanol na unor ya Aleluya et ontan lan nagnap, tan santing?
9 Wala niray arum a sengegay panggayaga, unong ya itutuloy ya ibabaga nen Juan ed sikatayo: “Tan nadngel ko so singa boses na sakey a baleg ya ulop, tan singa ungol na dakerakel a danum, tan singa tanol na angkakabaleg a karol, a kuanto, Aleluya: ta [“ginmapon,” NW] manari so Katawan [“Jehova,” NW] tayo a Dios, a Makapanyarin-amin.” (Apocalipsis 19:6) Sayan unor ya Aleluya so mamapagmaliw ed proklamasyon a kuadrado, odino nagnap. Sakey iyan makapanyarin mangatatawen a tanol, a mas marakdakep nen say dinanman a koro na too, mas pandinayewan nen say dinanman ya ompepelag a danum diad dalin, tan mas makapataktakot nen say dinanman a bagyon-karol ed mundo. Sinelebraan na pigamplon libon mangatatawen iran boses so katuaan a “[ginmapon] manari so Katawan tayo a Dios, a Makapanyarin-amin.”
10. Diad anton pantalos a nayarin ibaga a si Jehova so onggagapon manuley bilang ari kayari inkaderal na Babilonia a Baleg?
10 Balet, panon a nibaga a si Jehova so onggagapon manuley? Nilibon taon la so linmabas nanlapula nen inyabawag na salmista a: “Say Dios sikato so Arik a nanlapu ed una.” (Salmo 74:12) Anggan diad saman ya impangiyabawag na salmista et abayag lan manaari si Jehova, kanian panon a say sankatalbaan a koro so mangikakanta a “[“ginmapon,” NW] manari so Katawan”? Diad pantalos a sano say Babilonia a Baleg so naderal, agla nasamsam na satan a mapalakbat a karibal so katutulok ed si Jehova bilang say Sankatalbaan a Soberano. Agla nasugsogan na palson relihyon iray manuley ed dalin ya onsumpa ed sikato. Sanen naandi so pananguley na kadaanan a Babilonia ed sankamundoan, nadngel na Sion so mananalon panangiyabawag a: “Say Dios mo so nagmaliw ya ari!” (Isaias 52:7, NW) Kayari inkiletneg na Panarian nen 1914, onia so inyabawag na 24 a mamasiken: “Misalamat kami ed sika, Jehova a Dios . . . lapud inalam la so matalonggaring a pakapanyarim tan ginmapo kan manuley bilang ari.” (Apocalipsis 11:17, NW) Natan, kayari inkaderal na Babilonia a Baleg, say kelyaw so imbalikas lamet: “[“Ginmapon,” NW] manari so Katawan [“Jehova,” NW].” Anggapo lay nakekeraan a ginaway-too a dios a manangat ed inkasoberano na tuan Dios, si Jehova!
Asingger la so Bansal na Kordero!
11, 12. (a) Panoy impanawag na kadaanan a Jerusalem ed kadaanan a Babilonia, a mangileletneg na anton padron nipaakar ed Balon Jerusalem tan Babilonia a Baleg? (b) Diad impakatalo ed Babilonia a Baleg, anto so kakantaen tan iyaabawag na saray mangatatawen ya ulop?
11 “O kabusol ko”! Ontan so impanawag na Jerusalem, say kawalaan na templo na panagdayewan ed si Jehova, ed managtalintao a Babilonia. (Miqueas 7:8) Ontan met, say “masantos a syudad, say Balo a Jerusalem,” a tugyopen na nobyan walaan na 144,000 a membro, so makatunongan labat a manawag ed Babilonia a Baleg bilang kabusol to. (Apocalipsis 21:2) Balet asagmak a siansia na baleg a balangkantis so kairapan, kalamidad, tan inkaderal. Saray espiritistikon kagagawa to tan saray astrologo to so ag-akapangisalba ed sikato. (Ikompara so Isaias 47:1, 11-13.) On, sakey a baleg a pananalo parad tuan panagdayew!
12 Lapud naandi la ed ando lan ando so makapadimlan balangkantis, say Babilonia a Baleg, nipaarap la natan so imano ed maralus a birhen a nobya na Kordero! Kanian, say mangatatawen ya ulop so magaygayagan mankakanta na panangidayew ed si Jehova: “Manggayaga itayo tan manliket itayo na mapalalo tan iter tayo ed sikato so panangigalang: ta sinmabi la so bansal na Kordero, et say asawa to nantadia la. Tan niiter ed sikato a mankawes na pino a lienzo, masnag tan malinis: ta say pino a lienzo sikato so matunong a gawa na saray sasantos.”—Apocalipsis 19:7, 8.
13. Diad inlalabas na saray siglo, anton panagparaan so nagagawa parad bansal na Kordero?
13 Diad ilalabas na saray siglo, maaron manpaparaan si Jesus parad sayan mangatatawen a bansal. (Mateo 28:20; 2 Corinto 11:2) Lilinisan to la so 144,000 ya espiritual ya Israel pian “isaklang to so iglesia ed sikaton dili a sakey ya iglesia a sigogloria, ya anggapoy tilol to odino kumanet odino anton bengatla; noag ingen komon masantos tan anggapo so pakabalawan to.” (Efeso 5:25-27) Lapud panadampot ed “tumang na atagey a panatawag na Dios,” nilakseb na balang alanaan a Kristiano so daan a personalidad a pati ag-agamil na satan, ya angikawes ed balon Kristianon personalidad, tan nanggawa na matunong a kimkimey a “sigpot-kamarerwa a singa ed si Jehova.”—Filipos 3:8, 13, 14; Colosas 3:9, 10, 23, NW.
14. Panon a sinali nen Satanas a dutakan iray prospektibon membro na asawa na Kordero?
14 Manlapud Pentecostes 33 C.E. a manpatuloy, inusar nen Satanas so Babilonia a Baleg bilang instrumento to ed panasalin panutak ed saray prospektibon membro na asawa na Kordero. Nen mansamposampot lay inmunan siglo, sikatoy angitanem na saray bini na Binababilonian relihyon ed kongregasyon. (1 Corinto 15:12; 2 Timoteo 2:18; Apocalipsis 2:6, 14, 20) Deneskribe nen apostol Pablo iramay mamapakapuy ed pananisia diad oniaran balikas: “Ta saratan a totoo pakalala ran apostoles, matitilan komikimey, omparungtal iran singa apostoles nen Kristo. Tan aliwan makapakelaw; ta si Satanas ni magmaliw a singa anghel na liwawa.” (2 Corinto 11:13, 14) Diad tinmumbok iran siglo, say apostatan Kakristianoan, a singa ed amin nin arum a kabiangan na Babilonia a Baleg, so angawes a singa mayaman tan walaan to, “purpura tan eskarlata, . . . balitok tan . . . batobato ya ankabli tan perperlas.” (Apocalipsis 17:4) Saray klero tan papa to so akidipongdipong ed napgaan-ed-dala iran emperador, a singa si Constantino tan Carlomagno. Sikatoy agbalot akawesan na “matunong a gawa na saray sasantos.” Bilang impostor a nobya, sikatoy peteg ya obra-maestra na satanikon panamalikdo. Sikatoy naandin siansia ed ando lan ando!
Akaparaan la so Asawa na Kordero
15. Panon a nagagawa so panagtatak, tan anto so kakaukolanen ed sakey ya alanaan a Kristiano?
15 Kanian natan, kayari na ngalngali 2,000 a taon, amin a 144,000 na nobyan klase so namparaan la. Balet diad anton peryodo na panaon a nayarin nibaga a ‘say asawa na Kordero so nantadia [odino namparaan] la’? Diad progresibon paraan, nanlapu la’d Pentecostes 33 C.E. a nampatuloy, saray mananisian alanaan so “atatakan . . . na espiritu santo na sipan,” lapu ed onsasabin “agew na karondon.” Unong ed impangibalikas nen apostol Pablo ed satan, say Dios “met so [angiyan na tatak to] ed sikatayo, tan angiter ed sikatayo na sanla na espiritu dia ed kapusoan tayo.” (Efeso 1:13; 4:30; 2 Corinto 1:22) Balang alanaan a Kristiano so “atawag, tan apili,” tan pinaneknekan to so inkasikato a “matoor.”—Apocalipsis 17:14.
16. (a) Kapigan ya asumpal so inkatatakan nen apostol Pablo, tan panon tayon amta? (b) Kapigan a sigpot a ‘nitadia’ odino niparaan na asawa na Kordero so inkasikato?
16 Kayari na dakel a taon na subok, sarag nen Pablo a mismo ya iyabawag: “Akibakal ak ed maabig a pibabakal, asumpal ko so binati’ko, inunor ko so pananisia. Manlapu ed natan angga ed arapen wala a niparaan ed siak so balanget na kaptekan, ya iter naani ed siak na Katawan, say maptek ya ukom, ed saman ya agew: tan aliwa labat ed siak, noag dia met ed saray amin a mangaro ed ipayawar to.” (2 Timoteo 4:7, 8) Say impantatak ed apostol so ompatnag ya asumpal la, anggaman sikatoy siansian wala ni ed pisikal a laman tan napapatey ni labat bilang martir. Mipadpara, onsabi so panaon sano amin a nakdaan na 144,000 ed dalin so sansakey lan natatakan bilang kayarian nen Jehova. (2 Timoteo 2:19) Saya so nagawa sano sigpot lan akaparaan so asawa na Kordero—sano say baleg a karaklan na 144,000 so akaawat la na mangatatawen a tumang da tan saraman so wadia ni ed dalin so angawat la na pinal a panangabobon tan atatakan la bilang matoor.
17. Kapigan a nagawa so bansal na Kordero?
17 Diad sayan punto ed panag-orasan nen Jehova, sano nakompleto la so panagtatak ed 144,000, bulosan la na saray anghel so apatiran dagem na baleg a kairapan. (Apocalipsis 7:1-3) Unona, ipaakseb so panangukom ed singa-balangkantis a Babilonia a Baleg. Kasumpal na saya et tampol ya onkiwas so mananalon Kristo a mamaarap ed Armagedon pian deralen so nakekeraan a kabiangan na organisasyon nen Satanas ed dalin tan, kaunoran, ibantak ed kaaralman si Satanas tan saray demonyo to. (Apocalipsis 19:11–20:3) No wala ni iray alanaan a manbibilay ed dalin, seguradon sikaray onloob ed mangatatawen a tumang da, agmanbayag kayarin nasumpal nen Kristo so panangubkob to, tan miulop ira ed kapara ran membro na nobyan klase. Insan, diad manepeg a panaon na Dios, say bansal na kordero so nagawa!
18. Panon a pepekderan na Salmo 45 so panggegendanan na saray ebento nipaakar ed bansal na Kordero?
18 Say mapropetikon salaysay na Salmo 45 so manideskribe ed panggegendanan na saray ebento. Unona, say nitronon Ari so onlan mangubkob ed saray kakabusol to. (Bersikulo 1-7) Insan la nagawa so bansal, a say mangatatawen a nobya so aasikasoen na saray kaiba ton birhen ed dalin, say baleg ya ulop. (Bersikulo 8-15) Kayari to, say bansal so magmaliw a mabunga, diad kipawil ed inkayadyari na saray apaolin katooan ya idauloan na saray “prinsipes ed amin a dalin.” (Bersikulo 16, 17) Agaylan maglorian panamendisyon so katekep na bansal na Kordero!
Maliket Iramay Inimbitaan
19. Anto so komapat ed pitoran likeliket ed Apocalipsis, tan siopa so mibiang ed sayan liket?
19 Ikukurit natan nen Juan so komapat ed pitoran likeliket ed Apocalipsis: “Tan sikato [say anghel a mangipaparungtal ed sarayan bengatla ed si Juan] kuanto ed siak, Isulat mo: Mapalar so saray natawag ed panamangdem ed bansal na Kordero. Tan kuanto ed siak, Saraya a salita na Dios sikara so matua.” (Apocalipsis 19:9)a Saramay inimbitaan ed ‘pangdem ed bansal na Kordero’ et saray membro na nobyan klase. (Ikompara so Mateo 22:1-14.) Amin a kaiban alanaan a nobya so manliket diad pakaawat ed sayan imbitasyon. Kaslakan ed saray inimbitaan so wala la ed tawen, say pakagawaan na pangdem na bansal. Saramay wadia ni ed dalin so maliket met a sikaray inimbitaan. Segurado la so pasen da ed pangdem na bansal. (Juan 14:1-3; 1 Pedro 1:3-9) Sano napaoli la ira ed tawen, insan la’d satan mibiang ed Kordero so intero tan nankakasakey a nobya diad satan ya alay liket a bansal.
20. (a) Anto so labay ya ibaga na saray salitan: “Saraya a salita na Dios sikara so matua”? (b) Panon a naapektoan si Juan ed saray salita na anghel, tan anto so imbaga na anghel?
20 Iyaarum na anghel a “saraya a salita na Dios sikara so matua.” Sayan salita a “matua” so patalos na Griegon a·le·thi·nosʹ tan mankabaliksan na “peteg” odino “napandependian.” Lapud sarayan balikas so talagan nanlapud si Jehova, sikaray matoor tan napanmatalkan. (Ikompara so 1 Juan 4:1-3; Apocalipsis 21:5; 22:6.) Bilang sakey ed saray inimbitaan ed satan a bansal, seguradon malikeliket a maong si Juan diad impakadngel ed saya tan diad panmomorekdek ed saray bendisyon ed arapen parad nobyan klase. Diad tua, si Juan so apakiwas a maong, kanian kinaukolan na anghel a sikatoy simbawaen, unong ya isasalaysay to: “Tan siak dinmakmomo ak ed saray sali to pian sikato so igalang ko. Et sikato kuanto ed siak, Nengneng mo ta agmo gawaen: siak aripen ak met a kaparam tan kapara na saray agagim a maneegna na pantasi ed Jesus: Igalang mo so Dios.”—Apocalipsis 19:10a.
21. (a) Anto so ipaparungtal na Apocalipsis no nipaakar ed saray anghel? (b) Antoy nepeg ya awawey na saray Kristiano no nipaakar ed saray anghel?
21 Diad interon Apocalipsis, sakey a matalonggaring a paneknek so niiter nipaakar ed katooran tan inkakuli na saray anghel. Sikaray kabiangan na paralanan na niparungtal a katuaan. (Apocalipsis 1:1) Sikaray mikikimey ed katooan diad panagpulong ed maong a balita tan panangikalbo ed simboliko iran salot. (Apocalipsis 14:6, 7; 16:1) Akibakal ira kaiba si Jesus pian napagit si Satanas tan saray anghel to ed tawen, tan mibakal ira lamet a kaiba to ed Armagedon. (Apocalipsis 12:7; 19:11-14) On, sikaray makaasingger ed mismon arapan nen Jehova. (Mateo 18:10; Apocalipsis 15:6) Anggaman ontan, sikaray mapaabeban ariripen labat na Dios. Agnayari ed puron panagdayew so pandayew ed saray anghel odino anggan anton panagdayew ed saray representasyon, a diad panamegley na “santo” odino anghel et ipasabi ed Dios so panagdayew. (Colosas 2:18) Say alenleneg a dadayewen na saray Kristiano et si Jehova, tan ipapasabi ray kerew da ed sikato diad ngaran nen Jesus.—Juan 14:12, 13.
Say Betang nen Jesus ed Propesiya
22. Anto so inkuan na anghel ed si Juan, tan anto so kabaliksan na saratan a salita?
22 Insan oniay inkuan na anghel: “Ta say pantasi [“ed si,” NW] Jesus sikato so espiritu na propesiya.” (Apocalipsis 19:10b) Panon ya ontan? Kabaliksan na saya ya amin ya impuyan a propesiya so nibabalikas lapud si Jesus tan ed betang to ed saray gagala nen Jehova. Say unaan a propesiya ed Biblia so angisipan ed isabi na sakey a bini. (Genesis 3:15) Si Jesus imay nagmaliw a Bini. Saray tinmumbok a panangiparungtal so angitarya na baleg a paneknek na propetikon katuaan ed sayan manunan sipan. Oniay inkuan nen apostol Pedro ed mananisian Gentil a si Cornelio: “Sikato [si Jesus] patuaen na saray amin a propetas.” (Gawa 10:43) Manga 20 a taon ed saginonor, inkuan nen apostol Pablo: “Anggan dakel so saray sipan na Dios, dia ed sikato [Jesus] so kawalaan na on.” (2 Corinto 1:20) Kayari na 43 a taon, impanonot ed sikatayon mismo nen Juan: “Say . . . katuaan dinmateng ed panamegley nen Jesu-Kristo.”—Juan 1:17.
23. Akin a say atagey a posisyon tan pakauley nen Jesus so agmakabawas ed iyaapay tayon panagdayew ed si Jehova?
23 Makabawas kasi iya anggan panon ed panagdayew ya iyaapay tayo ed si Jehova? Andi. Tandaan so simbawa na anghel nipaakar ed panalwar: “Igalang mo so Dios.” Agbalot sinali nen Jesus a karibalen si Jehova. (Filipos 2:6) Tua, ingganggan iray anghel ya “igalang da [si Jesus],” tan amin a palsa so nepeg a mamidbir ed atagey a posisyon to pian “dia ed ngaran a Jesus so talimukoran na amin a pueg.” Balet imanoen a saya so parad “kidayewan na Dios Ama” tan saya so unong ed ganggan to. (Hebreos 1:6; Filipos 2:9-11) Si Jehova so angiter ed si Jesus na atagey a pakauley to, tan diad pamidbir ed satan a pakauley, iiter tayo so dayew ed Dios. No agtayo manpasakop ed uley nen Jesus, singa tayo met la ipupulisay si Jehova a Dios a mismo.—Salmo 2:11, 12.
24. Anton duaran pandinayewan iran ebento so aalagaren tayo, tan anto sirin iran salita so ikelyaw tayo?
24 Kanian, mankakasakey tayo sirin a mangikelyaw ed manangilukas iran salita na Salmo 146 anggad 150: “Idayew yo si Jehova”! Komon ta nikelyaw so Aleluya a koro bilang panatalaran ed panalo nen Jehova ed sankamundoan a Binababilonian empiryo na palson relihyon! Tan komon ta manleppua so gayaga legan a manasingger la so bansal na Kordero!
[Paimano ed leksab]
a Nengnengen met so Apocalipsis 1:3; 14:13; 16:15.
[Kahon ed pahina 273]
“Sulat a Parad Sodoma tan Gomorra”
Diad silong na sayan impabitar a paulo, say Daily Telegraph na London nen Nobyembre 12, 1987 so angireport nipaakar ed sakey a proponi ya inyarap ed General Synod na Church of England. Kakaukolanen na saya so pangekal ed saray homoseksual a “Kristiano” diad simbaan. Oniay inkuan na kolumnista a si Godfrey Barker: “Nen karuman et onia so maermen ya imbaga na Arsobispo na Canterbury: ‘No si San Pablo so mansulat ed Church of England, nayarin itepet tayo no anto kasin klase na sulat itan.’” Oniay inkomento met lanlamang nen Mr. Barker: “Say ebat et sakey a sulat a parad Sodoma tan Gomorra,” tan inyarum to: “Abaloan pa lagi nen Dr Runcie [say arsobispo] et singa itan samay walad Roma, Kap 1.”
Inaon na managsulat iray salita nen Pablo ed Roma 1:26-32: “Impalima ira na Dios ed marurutak a likeliket na kapusoan da. . . . Saray lalaki so manggagawa na kabandayan ed kapara ran lalaki . . . anggaman amta ra so ganggan na Dios a saramay manggagawa na ontan iran bengatla et makanepegan na patey, agda lambengat gagawaen iratan noag ingen abobonan da ni iramay manggagawa ed saratan.” Sinampotan to: “Say pampapagaan labat nen San Pablo et saray totoon mimimisa. Say problema nen Dr Runcie et saramay walad pulpito.”
Akin a walay ontan a problema na arsobispo? Onia so inyabawag na angkakabaleg a paulon-balita na Daily Mail na London nen Oktubre 22, 1987: “‘Sakey ed saray taloran pari et bakla’ . . . Say kampanya a pangekal ed saray homoseksual so ‘mangikapot ed Church of England.’” Inaon na saray report so imbaga na “reberendo” a sekretaryo heneral na Tomboy tan Bakla a Christian Movement: “No awaten iyan proponi, buyaken na saya so Iglesia, tan amta na Arsobispo na Canterbury iya. Diad inkalapagan, say tantia mi et 30 anggad 40 porsiento na klero ed Church of England so bakla. Tan sikaray sankaaktiboan a totoo ya ontutulong ed ministeryo na Iglesia.” Andi-duaruwan say idaraiset na mimimisa et sakey ed saray pakapatnagan na pandimla ed idarakel na saray homoseksual a miministro.
Anto so desisyon na komite na iglesia? Say karaklan a 388 a membro (95 a porsiento na saray klero) so binmuto a pabor ed agpanuporta ed proponi. Nipaakar ed saya, onia so inreport na The Economist nen Nobyembre 14, 1987: “Say Iglesia na Inglatera et sumpad ag-agamil na homoseksual, balet ta aliwan tanto. Diad sayan simba et nandesisyon so inkalapagan a komite, say parliamento na Iglesia, nipaakar ed saray homoseksual a klero, a saray gawan homoseksual, aliwan singa saray pilalawanan tan pikakalugoran, et aliwan kasalanan: saratan so ‘agpakaabot [lambengat] ed estandarte’ a say ‘seksual a piaakdol et sakey a gawan sigpot a panangiter-ed-dili, a manepeg labat ed permanentin relasyon na panangasawa.’” Diad pangikokompara ed talindeg na Arsobispo na Canterbury ed saray prangkan balikas nen apostol Pablo ed Roma 1:26, 27, inyan na The Economist so inaon iran salita nen Pablo ed tagey na kapsion a “Malinew itan ed nonot nen San Pablo.”
Malinew met itan ed nonot nen Jesu-Kristo tan imbaga to itan ed mabitar iran termino. Inkuan to a “lalo nin nitepel so nipaakar ed dalin na Sodoma diad Agew na Panangukom” nen saray relihyonista a mangipupulisay ed mensahe to. (Mateo 11:23, 24) Si Jesus so angusar dia na hyperbole pian ipanengneng a saraman a lider na relihyon ya angipulisay ed Anak na Dios tan ed bangat to so mas mauges nen saray taga-Sodoma. Ibabaga na Judas 7 a saramay taga-Sodoma so anagmak “na dusa na andi-anggaan ya apoy,” a kabaliksan toy magnayon a kaderal. (Mateo 25:41, 46) Agaylan mas grabe, sirin, so pangukom ed saray tatawagen a Kristianon lider a bulag a mangiyaarawi ed saray abulag iran pulok da manlapud atagey iran estandarte ed moral na Panarian na Dios ya ipapaarap da ira ed maabuloy, mabanday iran kagagawa na sayan mundo! (Mateo 15:14) Nipaakar ed palson relihyon, salanti, say Babilonia a Baleg, inkaganatan ya ontatawag so boses manlapud tawen: “Ompaway kayo ed sikato, baley ko, pian agkayo nalanor ed saray kasalanan to, tan agkayo manlikna ed saray bakbak to.”—Apocalipsis 18:2, 4.
[Saray litrato ed pahina 275]
Say tawen so maksil a mangikekelyaw ed apatiran Aleluya, a mangidadayew ed si Jah lapud seguradon impanalo to sumpad Babilonia a Baleg