Saray Kalangweran a Walaan na Maligen ya Arapen

“ONTANLAN makapakebbiew tan makapadimla nen say dinanman ni [a kaso ed panagpasoot]”​—ontan so impaneskribe na angimaton a huis ed agano nin bista ed krimen. Sakey a pangkat na waloran tin-edyer, a mantaon na 14 ya anggad 18, so anambang ed sakey a turistan bii diad niutel a syudad na London, niiyan ed aminpigapigan seksual a panangataki, tan insan sikatoy imbuntok ed asingger a kanal anggaman inkuanton agmakalangoy. Natalosan, inkuan na ina na sakey ed saray tin-edyer a sikatoy kinmapuy sanen anengneng to’d balita ed TV so ginawa na anak ton laki.

Makapaermen, sayan inkagawa so mangisisindag ed nagagawa’d sosyedad natan. Say inkaruksa so magmamaliw lan kaslakan, balanglan diad gawan krimen, panlalaban ed abung, odino etnikon labanan na saray Balkan, sentral tan mamasagur ya Aprika, tan diad inerman nin pasen. Ombabaleg iray kalangweran ed pegley na ontan iran kipapasen, odino mabetbet dan narerengelan iratan. Agtanton pankelawan sirin, a dakel so magmamaliw a batingol, mangipapanengneng na “anggapo so aro ra a nianakan,” tan “aliwa ran maadia.”​—2 Timoteo 3:3.

“Maruksa”

Sanen insulat na Kristianon apostol Pablo so komaduan sulat to ed kapara ton matatken a si Timoteo, say Roma so manunan pakayari na mundo. Kasmak so inkasebeg tan karawalan diad saray arena na Roma. Ingen, impasakbay nen Pablo a diad arapen, say panaon so magmaliw a “mairap a pidenengan.” (2 Timoteo 3:1, NW) Makapainteres, say Griegon salita a manideskribe ed sarayan panaon bilang “mairap a pidenengan” so mangilalaktip ed ideyan pagmaliw dan “maruksa.” Sakey ya inkagawa legan na mangaraldalin a ministeryo nen Jesus masulok a 30 taon ed asasakbay so mangipapanengneng no antoy walad benegan na inkaruksa diad panaon to.

Kasabisabi nen Jesus panamegley na baloto diad mamabukig a gilig na Dayat na Galilea. Diad isasakbit to, duaran lalaki so inmabet ed sikato. Say aliwliwan itsura ra tan paneyag so angipatnag a walay dipirinsia ed sikara. “Mapalaloy sebeg da,” diad tua, aselepan na demonyo.a Say inkekelyaw da et manlalapud saray marelmeng ya espiritu ya angiwanwan ed marawal iran kiwas da. “Anto so pibiangan mi’d sika, Jesus, Anak na Dios?” so inyeeyag na lalaki. “Linma ka dia a mamairap ed sikami ed agni panaon?” Sigpot a kabat na marelmeng iran espiritu a sinmelep ed duara ya inggeter la na Dios so panaon ed kipaakseb na panangukom to ed saray demonyo. Mankabaliksan iya na andi-anggaan a kadederal da. Ambegya sikaray mangagamil ed labas nen too iran abilidad da ed pangisagyat na maruksan karawalan. Lapud mamilagron kiwas nen Jesus labat a manpataynan ed saraman a demonyo a nainawaan so duaran lalaki.​—Mateo 8:28-32; Judas 6.

Sano saray totoo natan, pati saray tobonbalo, so onkikiwas diad inaambagel a paraan, maabig parad sikatayon nonoten itan ya inkagawa. Akin? Lapud diad sayan koma-20 siglo, onaarap itayo ed misiglaotan a kaatapan, a singa ipapaliwawa na unor a libroy Biblian Apocalipsis: “Kasi lara so dalin tan dayat; ta say Diablo inmakseb ed sikayo, a wala ed baleg a sanok to, ya amta to a daiset la so panaon to.” (Apocalipsis 12:12) Ipangasi pan imanoen a sayan inkabaingan nen Satanas et atekepan na “baleg a sanok” lapud kabat ton antikey lay panaon to.

Aatakien

A singa mabetbet a nasasalambit diad saray pahina na sayan palapagan, atebek nen taon 1914 so inkitrono nen Kristo Jesus bilang Ari na Panarian na Dios diad tawen. Kinmiwas a tampol si Jesus sumpad manunan kabusol na Dios, si Satanas. Sirin, say Diablo tan saray demonyo to so apagit manlapud tawen, tan iyaapasakey da natan so imano ra ed sayan dalin. (Apocalipsis 12:7-9) Lapud apegetan a tuloy so impluensia to ed katawenan, si Satanas so “singa omoang a leon a mananap na buagen to.” (1 Pedro 5:8) Sioparay magmainomay ton kalotan? Agta natalosan a nagkalautla ed saramay kulang na eksperiensia ed bilay tan pisisiglaotan ed too? Kanian say puntirya na Diablo et saray kalangweran natan. Diad pirmin pangegemtan day musika tan panagpalabasay oras, sikaray magmainomay a tengtengen na Diablo.​—Efeso 6:11, 12.

Anggan sano panggunaetan na saray kalangweran so onaligwas ed panagbilay da, sikaray nasesebelan. Nanlapulad impanampot na Guerra Mundial II, saray totoo ed dakel a bansa ya akasagmak na bakal tan inkaduka so manggugunaet a makabawi diad pangiyoopresi ra ed saray pamilya ra na inlambak ya estiloy kabibilay. Saray materyal a kaykayarian, agpupugeran a panagpalabasay oras, tan panagligliwaan so nagmaliw a manuna iran kalat. Bilang nansumpalan, dakel so maniirap. “Saray manpirawat ya onyaman,” pasakbay nen Pablo ed si Timoteo, “napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan . . . Ta say aro ed pilak sikato so sakey a lamot na saray amin a nengneng na mauges; sikato a sanen inaguman na saray arum, . . . atalos ira na dakel a kaermenan.” (1 Timoteo 6:9, 10) Diad inkalapagan, naiimano tayoray totoo na materyalistikon sosyedad natan a duduyoken na ekonomya, pinansyal, tan emosyonal iran ot-ot. Kaiba ed sikara iray dakel a kalangweran, a bibiktimaen na sayan kalot na baleg a kabusol na Dios.

Balet, makapaliket ta walay maong a balita. Tan nipaakar itan ed saray kalangweran, saramay walad arapan da so maligen ya arapen. Panon iyan posibli?

Anapen tan Naromog Mo

Dakel a kalangweran so walaan na maabig iran napanuliranan. Ipupulisay day makaderal iran estandarte a kaslakan la ed limog na saray wala la’d edad. Onaalinswag ira ed ag-inkahustisya tan agmakaliknan ugali na narasan ed pakayari iran politiko tan negosyante. No sakey kan kalangweran, anganko et onia so naliliknam.

Nonoten pay Cedric, sakey a kalangweran a laki ed unor lan inkatin-edyer to, a say eksperiensia to et aliwa lan nikaduma.b Sanen ugaw ni, dakel so pakakatakotan to, pati say takot ed ipapatey. Panumamengan to no antoy gagala na bilay. Lapud agnaebatan niray tepet to sanen mantaon na 15, inmatalek toy inkasikato ed panmolimoli ed kabaliksan na bilay diad limog na arum ya ideyalistikon katayatdang. “Nansusungap kami tan nankukumpog a mantotongtong ed loob na pigaran oras,” so nanonotan to ni. “Sisiaen mon pareparehoy nononoten yon amin, balet anggapoy walaan na ebaebat.”

Si Cedric, a singa ed dakel a kalangweran, so manpirawat na panliketan. Say pandruga labat so ag-amenek ed sikato. Ag-abayag et sikatoy alanor ed panagtakew tan panaglakoy druga. Siansian nanggunaetan toy balon panliketan. Ginapoan toy mantakew pian makakomisyon. “Panliketan ko iya,” so inaksobi to. “Balet agkon balot tinakeway kabanyakan a too. No mantakew ak na kotse, itilak kon limpio. No nilooban koy negosyo, ginawak labat itan ed amtak a bayaran na insurance. Saya so tinmulong ed siak pian ikatunongay ginawak.” A singa nayarin ilaloan mo, apriso si Cedric.

Nanonotan ni nen Cedric: “Si Mark, kaparan priso, so akitongtong ed siak. Diad impakaimano ton walay baleg a taton krus ed tagey na taklay ko, tinepetan toak no akin a walay tatok. Inisip ton relihyoson importanti itan ed siak.” Duay simba ed saginonor, inikdan nen Mark si Cedric na sakey a kopya na libron Makapambilay Kayo na Ando lan Ando ed Paraiso diad Dalin.c “‘Makapambilay Kayo na Ando lan Ando’​—saraman a salita so anagyat a tampol ed siak. Satan so naynay min pantongtongan, balet ta agmin balot aromogan so katuaan nipaakar ed pambilay ya ando lan ando.” Kayari dakel a diskusyon a kaibay sakey ed Tastasi nen Jehova a binmisita ed prisoan, amoria nen Cedric a say piugagep to et nadampot manaya​—balet dia labat ed paraan na Dios.

“Kapangitundak ed pililimog ko’d datin kakaarok, maples so inyaligwas ko,” so inkuanen Cedric. Say iyaaligwas to ed pakatalos tan liket so agmainomay. “Siansian panggugunaetan koy onaligwas ni,” so inkuanto. “Kaukolan kon alwaray paraan na panag-isip ko.” On, natatalosan la natan nen Cedric a say pagmaliw ya ideyalistiko so angitonton ed sikato ed patit na Diablo, diad paniisip a saray kalat to et nadampot labat diad pibiang ed aktibidades ya akasentro ed panliketan.

Makapaliket, abayag lan nibulos ed prisoan si Cedric, tan panggagayagaan toy regular a pililimog ed arum ya akaromog met ed aanapen da. Sakey la natan ed Tastasi nen Jehova tan inanabang day ilalo ran pambilay ya ando lan ando ed Paraiso diad dalin. Sikato met so onnenengneng ed arapen anggad panampot na satanikon impluensia tekep na amin a pankuankuanan na satan.

Siempre, aliwan saray kalangweran labat a singa si Cedric so walaan na maligen ya arapen; wadtan met iray arum a pinabaleg na maridios ya atateng, ya angipaslep ed ananak da na panangaro ed katuaan na Biblia.

Pakagunggunaan so Maridios a Panangipasal

“Ibangat mo so anak ed dalan a nepeg to a laen, tan anggan sano masiken la ag-onarawi ed sikato,” so insulat nen makabat ya Arin Solomon nensaman. (Uliran 22:6) Saya so apaneknekan ed kaso na dakel ya intiron-kamarerwa iran kalangweran a deniside ran tumboken iray estandarte na Biblia.

Onia so ginawa di Sheila, Gordon, tan Sarah. Nanonotan dan impurek a maong na atateng da so katutulok ed ganggan nen Kristo ya ‘onla tan manggawa na saray babangatan’ diad pangipulong ed maong a balita na Panarian. (Mateo 24:14; 28:19, 20) “Diad dinanman a kaukolan a pandesisyonan, si Nanay tan siak so nipasal a manpanonan, ‘Panon ya apektaan na satan so panagpulong?’” so natandaan ni nen Sheila. “Agmi intuloy so dakel a plano bilang resulta na sayan panagkatunongan,” so inaksobi to, tan inkuanto ni, “balet agaylan abendisionan kami!” Anggan diad sampot na andukey iran agew ya ibibisita ed saray ayaman na totoo tekep na maong a balita, si Sheila tan say ina to so nanakar a pasempet a mangankanta. “Manleppua so gayagak,” so inkuanto. “Naliliknak ni itan natan.”

Nanonotan ni nen Gordon so dakel a magayagan labi Sabado. “Siak so naimbitaan ed kaabungan na saray mamatatken ed kongregasyon, a no iner et nanggayagaan mi so makagungguna iran quiz tan diskusyon. Apaseseg kamin mangipatlep na saray bersikulo ed Biblia, mangitongtong ed Makasulatan iran tema, mangisalaysay na eksperiensia ed panagpulong, tan manaral ed no panon ya onlalaknab so kimey na Panarian,” so nanonotan ni nen Gordon. “Amin na saraya so tinmulong ed siak a mangiletneg na maong a pundasyon tan mamayubo ed aro parad si Jehova a Dios.”

Si Sarah so walaan na maliket a nanodnonotan iran labi diad imbibisita to ed Tastasi. “Mandurungo kami. Insan pian sampotan so imbisita, nantogtog kami na piano, a babansagan na saramay mangakanta nipaakar ed Panarian na Dios. Talagan tinmulong ed sikami so musika, nagkalalo la legan na impan-eskuela mi, lapud impagmaliw to kamin gawaen iray bengatla a saniiba bilang sakey a pamilya.”

Siempre, aliwan amin a kalangweran a manggugunaet a mamaliket ed si Jehova et walaan na panuliranan iran kipapasen ed pamilya. Balet, say maapit a pililimog ed arum a pamilyan Tasi ed kongregasyon so mangiiter ed sikara na kaligenan tan liknaan a kabiangan ira.

Pablien so Maligen a Pundasyon Parad Arapen

Saray kalangweran natan so walaan na panpilian. Nayarian day makapantultuloy ed sayan marelmeng a mundo legan a mapmaples a mamapaarap ed kadederal diad onsasabin “baleg ya irap” ya impasakbay nen Jesus. Odino “nipasen da ed Dios so ilalo ra, tan . . . unoren da so saray ganggan to,” a singa inkanta na apuyanan a salmistan si Asaf. Say katutulok ed Dios so mangamper ed sikara manlapud pagmaliw “a benger tan masumpa a kailalakan, sakey a kailalakan ya agda inapiger so puso ra, tan say espiritu ra aliwa a mapeket ed Dios.”​—Mateo 24:21; Salmo 78:6-8.

Diad masulok a 80,000 a kongregasyon na Tastasi nen Jehova ed sankamundoan, naromog moy dakel a kalangweran a napandinayewan mo. Tatalinengen day simbawa nen Pablo ed si malangwer a Timoteo a “manggawa ra komon na maabig, a mayaman ira komon ed saray maabig a gawa, a managpalangkap ira, a mainomay iran mangiter, a mantipon ira na nipaakar ed sikara ed sakey a maabig a pangiletnegan a niparaan ed panaon ya onsabi.” Bilang resulta, sikara la natan so ‘mamebenben ed bilay a peteg.’ (1 Timoteo 6:18, 19) Amtaen nin nagkalalo irayan tuan Kristianos diad iyatendi ed saray miting da. Diad ontan et nawalaan ka met na ilalon maligen ya arapen.

[Saray paimano ed leksab]

[Litrato ed pahina 7]

Saray marelmeng ya espiritu so walad benegan na “mapalaloy sebeg” a totoon pinaabig nen Jesus

[Litrato ed pahina 8]

Panangipaalagey na ‘maabig a pangiletnegan ed panaon ya onsabi’