LEKSION 36
Naynay ya Magmaliw ya Matua
Labay tayon amin so honest odino matua ya kakaaro. Labay met nen Jehova ya matua iray kakaaro to. Pero diad sayan mundo ya dakel so aliwan matua, ompan nairapan tayo. Anto ray gunggona no naynay tayon matua?
1. Antoy sankaimportantian ya rason no akin ya matua tayo?
No matua tayo ed arum, ipapanengneng tayon inaro tan rerespetoen tayo si Jehova. Tandaan, amta nen Jehova so amin ya iisipen tan gagawaen tayo. (Hebreo 4:13) Napapansin to no matua tayo, tan sikatoy napapaliket tayo. Oniay imbaga na Salita to: “Kabusol nen Jehova so sakey a mapalikdo, balet Sikatoy maapit a kaaro na maptek a too.”—Proverbio 3:32.
2. Panon tayon nipanengneng ya naynay tayon matua?
Labay nen Jehova ya “mansalita [tayoy] tua ed balang sakey.” (Zacarias 8:16, 17) Antoy labay ton ibaga? No mitotongtong tayo ed saray kapamilya, katrabaho, kaagian, odino opisyal na gobierno, agtayo mantitila. Agtayo met aaruman o babawasan iray impormasyon ya iiter tayo. Agmantatakew tan agmanloloko iray matuan totoo. (Basaen so Proverbio 24:28 tan Efeso 4:28.) Tan babayaran day amin ya buis da. (Roma 13:5-7) Diad saraya tan ed arum nin paraan, manbibilay tayo ya “matua ed amin a bengatla.”—Hebreo 13:18.
3. Anto ray gunggona no matua tayo?
No kabkabat itayo ya matua, pantiwalaan itayo na arum. Makakatulong tayo pian nalikna na arum ya maligen ira ed kongregasyon, ya singa sakey ya pamilya. Malinis so konsiensia tayo tan lapud matua tayo, “lalon naparakep . . . so bangat na Dios a Manangiliktar tayo,” kanian nagustoan la na arum so manlingkor ed si Jehova.—Tito 2:10.
DAKEL NI NAARALAN MO
Amtaen no antoy epekto ed si Jehova tan ed sika na pagmaliw a matua, tan aralen no panon kan magmaliw ya matua diad nanduruman situasyon.
4. Naliliketan si Jehova no matua tayo
Basaen so Salmo 44:21 tan Malaquias 3:16, insan ebatan iraya:
Parad sika, akin et singam lolokoen so sarilim no agmo ibagay tua?
Parad sika, anto kasi nalikna nen Jehova no ibagam so tua anggano mairap?
No ibaga na anak so tua, napaliket toy ateng to. No ibaga tayo met so tua, napaliket tayo si Jehova
5. Magmaliw ya matua diad amin a panaon
Parad dakel, aliwa lan praktikal no lanang kan matua. Balet amtaen no akin ya kailangan tayoy magmaliw ya matua diad amin a panaon. I-play so VIDEO.
Basaen so Hebreo 13:18, insan pantongtongan no panon tayon magmaliw a matua . . .
diad pamilya.
diad trabaho odino eskuelaan.
diad arum nin situasyon.
6. Nagunggonaan itayo no matua tayo
No matua tayo, ompan singa naproblema tayo diad gapo. Balet diad panakar na panaon, nanengneng tayo lanlamang ya atan so sankamaongan ya gawaen. Basaen so Salmo 34:12-16, insan ebatan iya:
Akin et mas mareen tan maliket so bilay no matua tayo?
No matua so sanasawa, malet so ulopan da
No matua iray empleyado, pantiwalaan ira na boss da
No matua iray totoo, maong so reputasyon da ed saray opisyal na gobierno
IBABAGA NA ARUM: “Ayos labat so mantila na daiset.”
Akin et manisia ka ya kabusol nen Jehova so amin ya tila?
SUMARYO
Labay nen Jehova ya saray kakaaro to et matua ed amin ya ibabaga tan gagawaen da.
Rebyu
Panon tayon nipanengneng ya matua tayo?
Akin et singam lolokoen so sarilim no agmo ibagay tua?
Akin et labay moy magmaliw ya matua ed amin ya panaon?
DISKOBRIEN
Panon ya nibangat na atateng iray anak da ya magmaliw a matua?
Anto ray gunggona no tooren tayo ray promisa tayo?
Amtaen no kasin bayaran tayo iray buis anggano aliway pangusaran ed saratan.
“Buis—Dapat Tayo Kasin Bayaran Iratan?” (Say Panag-bantayan-E, Setyembre 1, 2011)
Antoy akatulong ed sakey a laki ya umanen so panagbilay to tan magmaliw ya matua?
“Naamtaan Kon si Jehova et Mapangasi tan Manamerdona” (Say Panag-bantayan, Hulyo–Agosto 2015)