Tepetepet Manlapud Managbasa

Panon a saray gungguna ed panaglingkor nen Kristo Jesus bilang atagey a saserdote, ya asaglawi ed Hebreos 4:15, 16, so onaaplika ed “arum a carnero” natan?

Anggaman say betang nen Jesus bilang Atagey a Saserdote so walaay manunan kaimportantian parad saramay nakaulop to ed tawen, saray Kristianon walaan na mangaraldalin ya ilalo so nagugunggunaan anggan natan manlapu ed panaglingkor nen Jesus bilang saserdote.

Nanlapulad si Adan, saray kapolian to so pabebelatan na say kasalanan. Maniirap tayo lapud atawir ya ag-inkaayadyari, a singa agawa ed saray Israelita. Sikaray nanilalo ed abayag ya impantutumbokan na saray atagey a saserdote tan kaiban saserdote, ya angiyapay na saray bagat parad saray kasalanan da tan parad totoo. Asabi panaon, si Jesus so nilanaan bilang sakey a saserdote “a nialig ed inkasacerdote nen Melquisedec.” Kayarin apaoli, si Jesus so inmarap ed si Jehova pian iparungtal so balor na ayadyarin bagat bilang too.​—Salmo 110:1, 4.

Anto so kabaliksan na saya parad sikatayo natan? Diad sulat to ed saray Hebreo, siningbat nen Pablo so panaglingkor nen Jesus bilang Atagey a Saserdote. Diad Hebreos 5:1 et nabasa tayo: “Balang atagey a sacerdote a naala ed saray totoo, sikato so niyan lapu ed saray totoo dia ed saray bengatla a nipaakar ed Dios, pian isaklang to so saray iyapay tan bagbagat lapu ed saray kasalanan.” Insan, diad Heb 5 bersikulo 5 tan 6, impanengneng nen Pablo a si Jesus so nagmaliw ya atagey a saserdote, a nayarin manggungguna ed sikatayo.

Panon? Insulat nen Pablo: “Angan sikato so Anak, inaral to so katotolok lapu ed saray bengatlan intepel to; tan sanen agawa ya ayadyari, nagmaliw a sikato so nangawa na andi angaan a kilalaban ed saray amin ya ontolok ed sikato.” (Hebreos 5:8, 9) Diad gapo, nayarin panisipen to itayo itan no panon tayon nagunggunaan ed balon mundo, sano saramay matoor ed Dios tan ed si Jesus so naekal la ed makasalanan a kipapasen da tan makagamor na bilay ya andi-anggaan. Satan so maligen ya iilaloan, a based mananondon a kablian na bagat nen Jesus tan ed panaglingkor to bilang Atagey a Saserdote.

Balet, diad tua, sikatayo lay nagugunggunaan natan manlapud betang odino panaglingkor to bilang Atagey a Saserdote. Imanoen so Hebreos 4:15, 16: “Ta angapo so sakey ya atagey a sacerdote tayo ya agmakayarin mangasi ed saray kakapuyan tayo; no ag say sakey a tinokso ed amin a singa sikatayo, ingen angapo so kasalanan to. Onsinger itayo sirin a mailalo ed trono na gracia pian makagamor itayo na panangasi, tan makalmo itayo na gracia, pian natolongan to itayo sano panaon a kinepeg to.” Kapigan so “panaon a kinepeg to”? Sano sikatayoy mankakaukolan na panangasi tan agkanepegan a kaabigan. Amin tayo, lapud ag-inkaayadyari, so nepeg a makalikna ed sayan pankaukolan natan.

Say Hebreos 4:15, 16 so mangidadanet a si Jesus​—a sakey la natan a saserdote ed tawen—​so nagmaliw a too met, kanian sikatoy nayarin mililikna. Ed siopa? Ed sikatayo. Kapigan? Natan. Sanen sikatoy sakey a too, si Jesus so akasagmak na gonigon tan desdes a kaslakan ed totoo. Diad sakey ya inkagawa, si Jesus so narasan tan napgaan. Tan anggaman ayadyari, sikatoy akesawan. Satan so kaukolan a mangiter ed sikatayo na panamaseguro. Akin? Lapud si Jesus so akasagmak na natural ya inkakesaw, kabat toy nalilikna tayo. Tandaan met, si Jesus so mabetbet met a nipaarap ed saray maimon a pantataloan ed limog na apostoles to. (Marcos 9:33-37; Lucas 22:24) On, sikatoy akasagmak na saray inkadismaya. Agta mangiter itan ed sikatayo na panagmatalek a natalosan to itayo sano sikatayoy nadidismaya? Maseguron ontan.

Sano sikayo so nadidismaya, anto so nagawaan yo? Kasin imbaga nen Pablo a manalagar kayo lambengat, ed balon mundo, ta sikayo so tulongan na satan ya Atagey a Saserdote, si Jesus, pian magmaliw ya ayadyari ed isip tan laman? Andi. Inkuan nen Pablo: “Makalmo itayo na gracia, pian natolongan to itayo sano panaon a kinepeg to,” tan itetekep to so kaplesan. Sakey ni, sanen too si Jesus, asagmak to so kairapan tan ir-irap, a “tinokso ed amin a singa sikatayo.” Kanian sano sikatayoy nidunget ed saratan a bengatla, sikatoy akaparaan ya ontulong ed sikatayo, based pakatalos to ed nasasagmak tayo. Agta satan so manangguyor ed sikatayo ed sikato?

Natan imanoen so Heb 4 bersikulo 16. Inkuan nen Pablo a sikatayo​—tan lalaktipen na saya iray alanaan tan arum a karnero—​so makaasingger ed Dios tekep na kawayangan ed panagsalita. (Juan 10:16) Aglabay ya ibaga na apostol a nayari tayon bitlaen ed pikakasi so antokaman a labay tayo, anggan saray bengatlan makapasanok tan agmapagalang. Imbes, based bagat nen Jesus tan say betang to bilang Atagey a Saserdote, sikatayoy makaasingger ed Dios anggaman sikatayoy makasalanan.

Sananey nin paraan a nagunggunaan tayo anggan natan manlapud panaglingkor na Atagey a Saserdote tayo, si Jesu-Kristo, so manasaglawi ed saray kasalanan tayo, odino lingo-lingo tayo. Talagan agtayo nayarin ilaloan a diad kaplesan a sistema et sigpot a niyaplika ed sikatayo nen Jesus so interon epekto na bagat to. Anggan gawaen to ni itan, siansian agtayo nawalaan na andi-anggaan a bilay. Kasin natandaan yo ni nikurit ed Lucas 5:18-26, nipaakar ed paralisadon laki a say dukolan to so inlusor ed nilungawan ya atep? Imbaga nen Jesus ed sikato: “Too, saray kasalanan mo napaandi ra ed sika.” Agto tutukoyen so pigaran ispisipikon kasalanan a sengegay inkaparalitiko. Noagta tutukoyen iray kasalanan na laki ed inkalapagan, tan nayarin sasaglawien toray atawir ya ag-inkaayadyari, a sengegan na saray irap to.

Based bagat ya ibagat to, naekal nen Jesus so kasalanan na too, a singa say kanding para ed si Azazel ya angekal na kasalanan na Israel ed Agew na Pananakbong. (Levitico 16:7-10) Anggaman ontan, say paralisadon laki so too nin siansia. Sikatoy makapankasalanan lamet, tan diad saginonor et inatey, a singa nagagawa ed saray makasalanan. (Roma 5:12; 6:23) Say imbaga nen Jesus et agto kabaliksan a samay laki so tampol a magnayon a manbilay. Balet say laki so pinabtangan na sakey a sukat na panamerdona ed saman a panaon.

Natan kunsideraen tayo pay kipapasen tayo. Lapud ag-inkaayadyari sikatayoy nalilingon inagew-agew. (Santiago 3:2) Anto so nagawaan tayo nipaakar ed saya? Bueno, diad tawen et sikatayoy walaay mapangasin atagey a saserdote a diad panamegley to et makaasingger tayo ed si Jehova diad pikakasi. On, singa insulat nen Pablo, sikatayon amin so ‘makaasinger sirin a mailalo ed trono na gracia pian makagamor itayo na panangasi, tan makalmo itayo na gracia, pian natolongan to itayo sano panaon a kinepeg to.” Diad ontan amin natan a kabiangan na arum a karnero so maseguron makagamor na makapakelkelaw iran gungguna, pati say malinis a konsiensia, manlapud panaglingkor nen Kristo bilang atagey a saserdote.

Amin a Kristianon walaan na mangaraldalin ya ilalo so makapanilalo ed mas engrande iran gungguna ed onsabin balon mundo. No ontan et sigpot tayon niyaplika so Atagey a Saserdote tayo ed merito na bagat to, a mangipaarap ed sigpot a kaperdonay kasalanan. Sikatoy mangipapagamor na mas dakel a gungguna diad pangasikaso ed pisikal tan espiritual a bunigas na totoo. Tan lalon palaknaben nen Jesus so pangibangat ed totooy Dios ed dalin, lapud say pangibangat ed Ganggan so manunan eebatan na saray saserdote ed Israel. (Levitico 10:8-11; Deuteronomio 24:8; 33:8, 10) Kanian, legan a nagugunggunaan itayo ed panaglingkor nen Jesus bilang saserdote natan, nagkalalo ni manaalagar ed sikatayo!