Saray Bagat na Panangidayew a Makapaliket ed si Jehova
“Ipatnag yo so saray laman yo a mabilay a bagat, masantos, makapaliket ed Dios.”—ROMA 12:1.
1. Anto so ibabaga na Biblia nipaakar ed relatibon balor na saray bagat ed silong na Mosaikon Ganggan?
“TA say ganggan, wala ed sikato so sakey ya anino na saray penel na bengatla ya onsabi, ya aliwan dili a talintao na saray bengatla, a dia ed panamegley na saray dilin bagat ed tinaon-taon, anggan kapigan agto nayarian a payadyarien so saray onsingger.” (Hebreos 10:1) Diad satan a mapuersan balikas, pinekderan nen apostol Pablo ya amin a bagat a niyapay diad silong na Mosaikon Ganggan so andian na permanentin balor no say nalalanor la et kilalaban na too.—Colosas 2:16, 17.
2. Akin ya aliwan kaapaan so pantalos ed detalyadon impormasyon ed Biblia nipaakar ed saray apay tan bagat unong ed Ganggan?
2 Kabaliksan kasi na saya a say impormasyon ed Pentateuch nipaakar ed saray apay tan bagat et andian lay kakanaan parad saray Kristiano natan? Diad katuaan to, diad panat na masudsulok a sakey taon, agano nin abasa na saray nampalista ed Teokratikon Eskuelaan Parad Panagministro diad saray kongregasyon na Tastasi nen Jehova ed sankamundoan so pilimeron limaran libro na Biblia. Arum so nanseet a nambasa tan tinalosan dan amin iray detalyi. Kasin anggapoy kakanaan na amin a sagpot da? Aliwan ontan so kipapasen, lapud “ta saray bengatla a nisulsulat nensaman, nisulat ira ya onkana ed kibanga ‘tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.” (Roma 15:4) Say tepet, sirin, et, Anton ‘kibangatan’ tan ‘pakaligliwaan’ so nagamoran tayo manlapud satan a tugyop na impormasyon ed Ganggan nipaakar ed saray apay tan bagat?
Parad Kibangatan tan Pakaligliwaan Tayo
3. Anto so manunan pankaukolan tayo?
3 Anggaman agla kaukolan so pangiyapay na literal iran bagat unong ed paraan ya indatak na Ganggan, siansia nin kakkaukolan tayo no anto iray agawaan na saray bagat ed saray Israelita, salanti, say pakaperdona na saray kasalanan tayo tan panggayaga ed abobon na Dios. Lapud agtayo la mangiyaapay na literal iran bagat, panon tayon nagamoran iratan a gungguna? Kayari ton impabitar iray limitasyon na saray bagat ya ayayep, oniay inyabawag nen Pablo: “Kanian sano onloob [si Jesus] dia ed mundo, kuanto: Bagat tan patanir sikara so agmo ginabay, ingen sakey a laman so imparaan mo ed siak; Dia ed saray patanir a napoolan [“intiron apay a popoolan,” NW] tan saray bagbagat [“apay,” NW] nisengeg ed kasalanan agka linmiket: Sirin inkuan ko, Nia, siak onsabi ak (Dia ed lukot na libro walan nisulat so nipaakar ed siak), pian gawaen ko, O Dios, so linawam.”—Hebreos 10:5-7.
4. Panon ya inyaplika nen Pablo so Salmo 40:6-8 ed si Jesu-Kristo?
4 Diad impangaon ed Salmo 40:6-8, impabitar nen Pablo ya agsinmabi si Jesus pian pagnayonen to so ‘bagat tan apay,’ say ‘intiron apay a popoolan tan apay nisengeg ed kasalanan,’ ya amin na saratan so agla aabobonan na Dios sanen insulat iraya nen Pablo. Imbes, linma dia si Jesus a silalaman ya intarya na Mangatatawen ya Ama To, a diad amin ya aspekto et misimbangan ed samay laman ya intadia na Dios sanen pinalsa To si Adan. (Genesis 2:7; Lucas 1:35; 1 Corinto 15:22, 45) Bilang ayadyarin Anak na Dios, si Jesus so walaan na betang ed “bini” na bii, unong a nipasakbay la ed Genesis 3:15. Sikato so manggawa na saray kundang pian ‘mekmeken to so ulo nen Satanas,’ anggaman si Jesus a mismo imay ‘nasugat ed mukor.’ Diad onian paraan, si Jesus so nagmaliw a paraan ya intarya nen Jehova parad kilalaban na katooan, ya inilaloan la na saray totoo na pananisia nen panaon ni nen Abel.
5, 6. Anto so niwalad saray Kristiano a matalonggaring a paraan pian makaasingger ira ed Dios?
5 Diad impanaglawi to ed sayan nikaduman betang nen Jesus, inkuan nen Pablo: “Say ag-akaamta na kasalanan, ginawa [na Dios] a kasalanan lapu ed sikatayo; pian magmaliw itayo a katunongan na Dios dia ed sikato.” (2 Corinto 5:21) Say balikas a “ginawa a kasalanan” so nipatalos met a ‘ginawa bilang sakey ya apay nisengeg ed kasalanan.’ Inkuan nen apostol Juan: “Sikato so manamaandi kasalanan tayo, tan aliwa lambengat ed saray kasalanan tayo, noag met kasalanan na lapag a mundo.” (1 Juan 2:2) Kanian, anggaman saray Israelita et walaan na saray bagbagat bilang temporaryon paraan pian makaasingger ira ed Dios, saray Kristiano so walaan na matalonggaring a basiyan diad iyasingger ed Dios—say bagat nen Jesu-Kristo. (Juan 14:6; 1 Pedro 3:18) No agamilen tayo so pananisia ed dondon bagat ya intarya na Dios tan Sikatoy unoren tayo, naperdona met iray kasalanan tayo tan napanggayagaan tayo so pabor tan bendision na Dios. (Juan 3:17, 18) Agta sakey itan a lapuan na ligliwa? Panon tayo balet a nipanengneng a walaan itayoy pananisia ed dondon bagat?
6 Kayari ton impaliwawa a saray Kristiano so walaan na matalonggaring a basiyan pian makaasingger ed Dios, indatak nen apostol Pablo so taloran paraan a nipatnag tayo so pananisia tan panamabli ed maaron probisyon na Dios, unong a nabasa tayo ed Hebreos 10:22-25. Anggaman say simbawa nen Pablo et manunan nipaarap ed saramay “onloob ed masantos a pasen”—salanti, saray alanaan a Kristiano a walaay mangatatawen a tawag—maseguron nakaukolan ya imatleken na amin a katooan so apuyanan iran salita nen Pablo no labay day nagunggunaan ed manamakepan bagat nen Jesus.—Hebreos 10:19.
Iyapay Iray Bagat a Malinis tan Andi-tilol
7. (a) Panon ya impatnag na Hebreos 10:22 no anto so gagawaen nensaman ed sakey a bagat? (b) Anto so kinaukolan a gawaen pian naseguro a say bagat et makapaliket ed Dios?
7 Pilimero, pinaseseg nen Pablo iray Kristiano: “Onsingger itayo komon ed puso a matua, ed napno a katuaan na pananisia, a walan awalsikan so saray kapusoan tayo pian nalinisan itayo ed sakey a mauges a konsiensia tan naurasan so laman tayo ed danum a malinew.” (Hebreos 10:22) Saray balikas ya inusar dia so maseguron mangipatnag ed no antoy ginawa ed kaslakan a bagat ed silong na Ganggan. Matukoy itan lapud ta pian naabobonan so sakey a bagat, nakaukolan ya iyapay itan tekep na dugan motibo tan nepeg a malinis tan andi-tilol. Say ibagat ya ayep so nanlapud kasimpukokan odino pulok, salanti manlapud saray malinis ya ayep, tan nepeg a “mabunigas” itan, andiay depekto. No say bagat et nanlapud saray manok, nepeg a nanlapu iratan ed saray palekpek odino sibong niran malapati. No nakapet iratan a kakaukolanen, satan so “naako nipaakar ed sikato a gawaen a pakapatunongan nipaakar ed sikato.” (Levitico 1:2-4, 10, 14; 22:19-25) Say iyaapay a tapong so ag-alaokan na lebadura, a simbolo na inkabulok; nisay alaokan itan na dilo, a nayarin manutukoy ed tabol na prutas, a walaan na tendensian mamaakseng. Sano niyapay ed altar iray bagat—ayep man itan odino tapong, aruman itan na asin a panagpreserba.—Levitico 2:11-13.
8. (a) Anto so kinaukolan ed sakey a too a mangiyaapay? (b) Panon tayon naseguro a say panagdayew tayo et makapaliket ed si Jehova?
8 Komusta balet so toon mangiyapay? Indalatdat na Ganggan a siopaman ya onasingger ed si Jehova so nakaukolan a malinis tan andi-tilol. Say sakey ya atilolan lapud antokaman a rason so mangiyapay ya unona na apay lapud kasalanan odino apay lapud impakasumlang pian napapawil toy malinis a talindeg to’d arap nen Jehova, a magmaliw a makapaliket ed Sikato so apay to a popoolan odino bagat to a pandurungoan. (Levitico 5:1-6, 15, 17) Kasin papablien tayo so kaimportantian na lawas a panmantini ed malinis a talindeg ed arap nen Jehova? No labay tayo a magmaliw a makapaliket ed Dios so panagdayew tayo, tampol tayo komon ya ipetek iray impakasumlang tayo ed ganggan na Dios. Nepeg a patulongan itayon tampol ed inter na Dios iran paraan—“saray mamatatken na kongregasyon” tan say “manamaandi kasalanan tayo,” si Jesu-Kristo.—Santiago 5:14; 1 Juan 2:1, 2.
9. Anto so manunan pandumaan na saray bagat ed si Jehova tan saramay inyapay ed palson dirios?
9 Say pangidadanet ed pakaandi na antokaman a tilol, so diad tua et say manunan pandumaan na saray bagat ya inyapay ed si Jehova tan saramay inyapay ed palson dirios na saramay totoo ed nasyones a walad kaliberliber na Israel. Oniay impaimano na sakey a reperensia nen kinomentoan na satan so nikabkabiig a kabiangan na saray bagat ed Mosaikon Ganggan: “Naimano tayo ya anggapoy pisiglaotan ed panagbuyon odino panagparles, anggapo iray relihyoson pan-aligewgew, panagsalger ed dilin laman, odino sagradon panagbalangkantis, minumundo tan garangandyang iran ritual nipaakar ed inkamabuna a parungtalan ya insebel; anggapo iray panangibagat ed too; anggapo ray bagat parad saray inaatey.” Amin na saraya so mangipapaimano ed sakey a katuaan: Si Jehova et masanto, tan agto kokonsintien odino aabobonan so kasalanan odino antokaman a klase na kaugsan. (Habacuc 1:13) Say panagdayew tan saray bagat a nisaklang ed sikato so nepeg a malinis tan andi-dumsis—dia ed pisikal, moral tan espiritual a paraan.—Levitico 19:2; 1 Pedro 1:14-16.
10. Mitunosan ed simbawa nen Pablo a nikurit ed Roma 12:1, 2, anto so nepeg ya usisaen tayo’d inkasikatayon dili?
10 Nipaakar ed saya, nepeg tayon usisaen so inkasikatayo ed amin ya aspekto na bilay pian naseguro tayon makapaliket ed si Jehova so panlilingkor tayo’d sikato. Agtayon balot iisipen a daput no mibibiang itayo ed saray Kristianon miting tan diad ministeryo et agla importanti no antokaman so gagawaen tayo ed pribado. Agtayon balot nepeg ya isipen a say pibibiang ed saray Kristianon kimey et mangipuera ed sikatayo ed pankaukolan ya ontumbok ed saray ganggan na Dios diad arum ya aspekto na bilay tayo. (Roma 2:21, 22) Agtayo nailaloan so bendision tan pabor na Dios no abuloyan tayo so antokaman a marutak odino atilolan ed imaton to a manutak ed panag-isip odino kakikiwas tayo. Nodnonoten iray salita nen Pablo: “Kanian, pikasik ed sikayo, agagi, lapu ed saray panangasi Dios, ya ipatnag yo so saray laman yo a mabilay a bagat, masantos, makapaliket ed Dios, ta sikato so maespiritu a lingkor yo. Tan agkayo miaabobon unong ed sayan mundo: noag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.”—Roma 12:1, 2.
Intiron-Kamarerwan Mangiyapay na Saray Bagat na Panangidayew
11. Anto so nilaktip ed terminon “panangiparungtal,” ya asalambit ed Hebreos 10:23?
11 Diad impanulat to’d saray Hebreos, impaimano dia nen Pablo so makanan aspekto na tuan panagdayew: “Mansiansia itayo komon a malet tan agnagiing ed panangiparungtal na ilalo tayo; ta matoor iman so angisipan:” (Hebreos 10:23) Say balikas a “panangiparungtal” so literal a mankabaliksan na “panangipatua,” tan sinaglawi met nen Pablo so “bagat a panangidayew.” (Hebreos 13:15) Saya so mangipanonot ed sikatayo nipaakar ed bagat ya inyapay na totoon singa si Abel, Noe, tan si Abraham.
12, 13. Anto so bidbiren na sakey ya Israelita sano sikatoy mangiyapay na bagat a popoolan, anto so gawaen tayo pian nipatnag tayo met so ontan ya awawey?
12 Sano mangiyapay so sakey ya Israelita na bagat a popoolan, gawaen to itan a “bulos-linawa diad arap nen Jehova.” (Levitico 1:3, NW) Panamegley na satan a bagat, sikato so boluntaryon angiyabawag ed publiko, odino amidbir, ed daakan iran bendision tan maaron-panangasi nen Jehova ed totoo to. Nodnonoten pa a say nikabiig a nengneng na bagat a popoolan et poolan ed altar so intiron apay—matukoy a simbolo na nagnap a debosyon tan dedikasyon. Misimbangan ed satan, nipatnag tayo met so pananisia tayo ed dondon bagat tan say pisasalamat tayo ed satan a probisyon sano mabulos tan sigpot-kamarerwa tayon mangiyapay na “bagat a panangidayew, salanti, say bunga na saray bibil” para ed si Jehova.
13 Anggaman agla mangiyaapay iray Kristiano na literal a bagbagat—ayep man odino pisipising—walaan ira na eebatan a mangipulong ed maong a balita na Panarian tan manggawa na babangatan nen Jesu-Kristo. (Mateo 24:14; 28:19, 20) Kasin aanamoten yo iray pankanawnawan mibiang ed mapublikon panangiyabawag ed maong a balita na Panarian na Dios ta pian naamtaan ni na dakel a totoo so alay abig iran bengatla ya ipaparaan na Dios parad matulok a katooan? Mabulbulos yo kasin uusaren so panaon tan biskeg yo diad panagbangat ed saray interesado tan tutulongan yo iran magmaliw a babangatan nen Jesu-Kristo? Say maseseg a pibibiang tayo ed ministeryo, a singa say ambalbalingit a samyong na sakey a bagat a popoolan, so makapaliket ed Dios.—1 Corinto 15:58.
Manliket ed Pituyaw ed Dios tan Totoo
14. Panon a misimbangan iray salita nen Pablo ed Hebreos 10:24, 25 diad ideya na say bagat a pandurungoan?
14 Diad kaunoran, impaimano nen Pablo so siglaotan tayo ed saray kaparan Kristiano legan tayon dadayewen so Dios. “Tan manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasingger so agew.” (Hebreos 10:24, 25) Saray balikas a “manaayatan itayo ed aro tan dia ed saray maabig a gawa,” “saray panmumuyong tayo,” tan ‘pansisimbawaan ed balang sakey’ so mangipanonot ed sikatayo no anto so agawaan na apay a pandurungoan parad totoo na Dios diad Israel.
15. Anton pampara so natebek tayo ed baetan na bagat a pandurungoan tan saray Kristianon miting?
15 Say terminon “apay a pandurungoan” so nipatalos no maminsan ya “apay parad kareenan.” Say Hebreon salita dia parad “kareenan” so walad plural, a nayarin mankabaliksan a say pibiang ed saratan a bagat so manresulta ed pikakareenan ed Dios tan ed kapara ran managdayew. Nipaakar ed bagat a pandurungoan, oniay naimano na sakey ya iskolar: “Saya so petepeteg a panaon na maliket a pituyaw ed Dios na Sipanan, a sikato so linmeksab pian magmaliw a Sankaili na Israel ed panangan a nisiglaot ed bagat, anggano Sikato so lawas a Managparawes ed sikara.” Saya so mangipanonot ed sikatayo nipaakar ed sipan nen Jesus: “Ta no iner so kawalaan na duara ono talora a nantitipon nisengeg ed ngaran ko, siak wala ak ed nanleleetan da.” (Mateo 18:20) Diad kada iyatendi tayo ed sakey a Kristianon miting, nagunggunaan itayo ed makapabiskeg a pililimog, say makapaseseg a bilibilin, tan manlapud pantalos a kalimog tayo so Katawan tayon Jesu-Kristo. Satan so manggawan peteg a makapaliket tan makapabiskeg-pananisia a Kristianon miting.
16. Sinononot ed bagat a pandurungoan, anto so manggawa a nagkalalo lan makapaliket iray Kristianon miting?
16 Diad bagat a pandurungoan, amin a taba—a walad pait, saray bato, say naala ed altey, tan saray walad banel, ontan met ed mataba iran ikol na karnero—so iyapay ed si Jehova diad pamool, a paaseweken itan ed altar. (Levitico 3:3-16) Say taba et impasen a sankananaman tan sankaabigan a parti na sakey ya ayep. Say pangiyapay ed satan so mangisimbolo na pangiter na sankaabigan ed si Jehova. Say nagkalautlan makasengeg no akin a makapaliket iray Kristianon miting et agtayo lambengat makakaawat na bilin noagta makapangidadayew tayo met ed si Jehova. Gawaen tayo itan diad pibiang—tekep na mapaabeba balet ta sankaabigan a pansagpot tayo—diad impapuson panangansion, italineng a mapetepet, tan pankomento no posibli. “Idayew yo si Jehova,” so inkelyaw na salmista. “Kantaan yo si Jehova na balo a kanta, tan say dayew to kantaen yo ed duypo na saray sasantos.”—Salmo 149:1.
Manatalaran ed Sikatayo Iray Daakan a Bendision nen Jehova
17, 18. (a) Anton engranden imbabagat nen Solomon sanen inagurasyon na templo diad Jerusalem? (b) Antoran bendision so naawat na totoo manlapud seremonya ed inagurasyon na templo?
17 Nen inagurasyon na templo diad Jerusalem, dia ed komapiton bulan na taon 1026 K.K.P., angiyapay si Arin Solomon na “[engranden] bagat ed arap nen Jehova,” a tugyopen na “bagat a poolan, tan say bagat a tapong, tan say taba na saray bagat ed pipapakna.” Niarum ni ed insaklang iran apay a tapong, walay dagup a 22,000 a baka tan 120,000 a karnero so imbagat ed saman ya okasyon.—1 Arari 8:62-65.
18 Naisip yo la kasi so gastos tan kabaleg na kimey ed satan ya abalbaleg a seremonya? Ingen, saray nausar ed satan so mabitar ya apalumbasan na saray bendision a naawat na Israel. Kayari na ponsia, “pinasipot [nen Solomon] so baley: et benendisionan da so ari, tan linma ra ed saray tolda ra a malikeliket tan magaygayaga ed puso lapu ed amin a kaabigan ya impatnag nen Jehova ed David ya aripen to, tan ed Israel a baley to.” (1 Arari 8:66) Tua, singa ed impangikuan nen Solomon, “Say bendision nen Jehova makapayaman; tan agmangarum na ermen.”—Uliran 10:22.
19. Anto so gawaen tayo pian nagamoran tayo iray engranden bendision nen Jehova natan tan ed andi-anggaan?
19 Wala tayo la’d panat na panaon a sasalatan la na “talintao na saray bengatla” so “anino na saray penel na bengatla ya onsabi.” (Hebreos 10:1) Si Jesu-Kristo, diad betang to bilang baleg ya antitipikon Atagey a Saserdote, so linmoob la ed tawen a mismo tan impresenta to so balor na mismon dala to pian mangitarya na pananakbong ed amin na saramay mangaagamil na pananisia ed bagat to. (Hebreos 9:10, 11, 24-26) Base’d satan a matalonggaring a bagat tan diad intiron-puson panangiyapay ed Dios na saray malinis tan andi-tilol a bagat na panangidayew tayo, makapantultuloy tayo met a “malikeliket tan magaygayaga ed puso,” a manatalaran ed daakan a bendision nen Jehova.—Malaquias 3:10.
Panon Yon Ebatan?
• Anton kibangatan tan pakaligliwaan so nagamoran tayo manlapud impormasyon ed Ganggan nipaakar ed saray bagat tan apay?
• Anto so pilimeron kakaukolanen pian magmaliw a makapaliket so bagat tayo, tan anto so kabaliksan na satan ed sikatayo?
• Anto so niyapay tayo a mipadpara ed boluntaryon apay a popoolan?
• Diad antoran dalan a nikompara iray Kristianon miting ed apay a pandurungoan?
[Litrato ed pahina 18]
Intarya nen Jehova so dondon bagat nen Jesus parad kilalaban na katooan
[Litrato ed pahina 20]
Pian magmaliw a makapaliket ed si Jehova so panaglingkor tayo, nepeg a bulos itayo manlapud antokaman a klase na pakatilolan
[Litrato ed pahina 21]
Mapubliko tayon bibidbiren so kamaongan nen Jehova sano mibibiang itayo ed ministeryo