Lawas Imatonan Moy Ibabangat Mo

“Imatonan mo so kaabigan na laman mo tan say ibabangat mo. Mansiansia ka ed sarayan bengatla; ta no gawaen mo so saraya, nilaban mo so inkasika tan saray ondengel met ed sika.”​—1 TIMOTEO 4:16.

1, 2. Akin a saray maseseg a managbangat so kakkaukolan natan?

“ONLA kayo . . . , tan manggawa kayo na saray babangatan ed amin a nasyones, . . . ya ibangat yo ’ran mangunor na amin a bengabengatla ya ingganggan ko ed sikayo.” (Mateo 28:19, 20) Nipaakar ed sayan ganggan nen Jesu-Kristo, amin a Kristiano so nepeg a manggunaet a magmaliw a managbangat. Nakakaukolan iray maseseg a managbangat pian tulongan iray matuan impanpuso a nakabatay Dios legan a wala ni panaon. (Roma 13:11) Impaseseg nen apostol Pablo: “Ipulong mo so salita; manseet ka no panaon to; tan agto panaon.” (2 Timoteo 4:2) Mankakaukolan iya na panbangat ed loob tan paway na kongregasyon. On, mas ni sasaglawien na panagpulong a kimey nen say basta pangiyabawag ed mensahe na Dios. Nakaukolan so epektibon panagbangat no magmaliw lan babangatan iray interesado.

² Manbibilay itayo la ed “saray panaon a maatap [“a mairap a pidenengan,” NW].” (2 Timoteo 3:1) Naiimpluensiaan iray totoo na saray pilosopiya na mundo tan palson bangat. Dakel iray “abilungetan so kalakal da” tan ‘abalang day moral a liknaan da.’ (Efeso 4:18, 19, NW) Nasasakitay liknaan na arum. On, talagan ‘maermen tan abuybuyak iray totoo, a singa ira karnero ya anggapoy pastol da.’ (Mateo 9:36) Anggaman kuan, diad pangikanay dunong ed panagbangat, natulongan tayoray matuan impanpuso a manggaway nakakaukolan iran pananguman.

Saray Managbangat ed Loob na Kongregasyon

3. (a) Antoy lalaktipen na ipapagawa nen Jesus a panbangat? (b) Siopa so manunan responsabli a manbangat ed loob na kongregasyon?

³ Diad panamegley na areglon panangiyaral na Biblia, minilyon lay personal a nibabangat. Balet, kayari bautismo ra, kaukolan a natulongan niray balo ni a ‘nilamot tan nipasen ed pundasyon.’ (Efeso 3:17) Diad panusumpal tayo’d ipapagawa nen Jesus a nirekord ed Mateo 28:19, 20 tan pangiwawanwan ed saray balo ni diad organisasyon nen Jehova, sikara so nagunggunaan diad kibabangat da ed loob na kongregasyon. Unong ed Efeso 4:11-13, aturo iray lalaki pian manserbi bilang “pastor tan manangibangat, ya onkana a pakayadyarian na saray sasantos, a nipaakar ed gawa na panaglingkor, angga ed kipaalagey na laman nen Kristo.” Panapanaon, lalanoren na dunong da ed panagbangat so pankaukolan na ‘pamaat, panimbawa, pamilin, tekep na lawas inkatayadno.’ (2 Timoteo 4:2) Ontanlan importanti so kimey na saray managbangat, kanian diad sulat nen Pablo ed saray taga-Corinto et intumbok ton tampol iray managbangat ed saray apostol tan propeta.​—1 Corinto 12:28.

4. Panon a say abilidad a manbangat ed arum et ontulong ed sikatayon tuloken so simbawa nen Pablo a nirekord ed Hebreos 10:24, 25?

⁴ Tua, agmanseserbi so amin a Kristiano bilang mamatatken, odino manangasikaso. Balet, amin so napapaseseg a manaayatan ed “aro tan dia ed saray maabig a gawa.” (Hebreos 10:24, 25) Pian nagawaan itan diad saray miting, nakaukolan iray niparaan a maong tan impapuson komento a makapabiskeg tan pakapasesegan na arum. ‘Pakaayatan met na maabig iran kimey’ iray eksperiensiadon manangipalapag na Panarian diad panginabang day pikakabat tan eksperiensia ra ed saray balo ni sano nakaulop da ra ed lawak na kimeyan. Diad ontan iran pankanawnawa tan ed impormal iran kipapasen nainabang so mablin instruksion. Alimbawa, papasesegen iray matatken lan bibii a magmaliw a ‘managbangat na kaabigan.”​—Tito 2:3.

Atangguyor a Manisia

5, 6. (a) Panon a midumaan so tuan Inkakristiano ed palson panagdayew? (b) Panon a natulongan na saray mamatatken iray balo ni a manggawa na makabat iran desisyon?

⁵ Say tuan Inkakristiano sirin so sigpot a midumaan ed saray palson relihyon a dakel ed saratan so mangokontrol ed panag-isip na saray membro ra. Sanen wadia’d dalin si Jesus, akontrol na saray relihyoson pangulo so amin lawari ya aspekto na kabibilay na totoo diad panamegley na maruksa iran tradisyon a gaway too. (Lucas 11:46) Ontan met so naynay a gagawaen na klero na Kakristianoan.

⁶ Balet say tuan panagdayew so “maespiritu a lingkor” ya isasaklang tayo tekep na “pakayari katunongan,” tayo. (Roma 12:1, NW) Saray ariripen nen Jehova so “atangguyor a manisia.” (2 Timoteo 3:14, NW) No maminsan, saramay mangidadaulo so kaukolan a mangiter na pigaran giya tan tutumboken parad marlas a kikurang na kongregasyon. Balet, imbes ya idesisyonan iray kaparan Kristiano, ibabangat ira na mamatatken no panon so “panangibiig na maong tan mauges.” (Hebreos 5:14) Manunan nagagawaan iya na mamatatken diad panagano ed kongregasyon “ed saray salita na pananisia, tan say maabig a tinumbok [“bangat,” NW] mo.”​—1 Timoteo 4:6.

Imatonan Moy Ibabangat Mo

7, 8. (a) Panon a saray totoo a limitadoy abilidad da et nayarin magmaliw a managbangat? (b) Antoy mangipapanengneng a say personal a panagsagpot et nakaukolan pian magmaliw ya epektibon managbangat?

⁷ Pawilen tayo pa so manunan niganggan ed sikatayo a manbangat. Mankakaukolan ta itan na espisipiko iran dunong, edukasyon, odino abilidad pian mibiang ed sayan kimey? Aliwa met ya ontan. Ta say inkalaknab na sayan sankamundoan a panagbangat so gagawaen na ordinaryo iran indibidual a limitadoy abilidad da. (1 Corinto 1:26-29) Isasalaysay nen Pablo: “Wala so sayan kayarian [ministeryo] tayo ed baso a pitek [ag-ayadyarin lamalaman], pian say sankatageyan ya inkabaleg na pakayari kien komon na Dios, ya agmanlapu ed sikatayo.” (2 Corinto 4:7) Say pirmin itatalona na sankagloboan a kipupulong na Panarian so paneknek ed pakayari na espiritu nen Jehova!

⁸ Anggaman kuan, nakaukolan so masimoon tan personal a pansagpot pian magmaliw a “tometeger ya anggapo so ibaing to, ya agamilen . . . ed matunong so salita a tua.” (2 Timoteo 2:15) Pinaseseg nen Pablo si Timoteo: “Imatonan mo so kaabigan na laman mo tan say ibabangat mo. Mansiansia ka ed sarayan bengatla; ta no gawaen mo so saraya, nilaban mo so inkasika tan saray ondengel met ed sika.” (1 Timoteo 4:16) Panon ya imatonan na sakey so panagbangat to, balanglan diad loob odino paway na kongregasyon? Kasin say panggawa ed satan et kakaukolanen toy pangikabisado ed pigaran dunong odino paraan ed panagbangat?

9. Antoy mas importanti ni nen saray natural ya abilidad?

⁹ Maseguron nipanengneng nen Jesus so ekstraordinaryon impamemben na saray metodo’d panagbangat diad bantog a Sermon to ed Palandey. Sanen asumpal lan nansalita et “dakel a katooan so nankelkelaw ed panagbanga’to.” (Mateo 7:28) Siempre, anggapo ed sikatayo so makapanbangat a singa ed abilidad nen Jesus. Anggaman ontan, agtayo kaukolan so magmaliw a marunong ya espiker ta pian magmaliw ya epektibon managbangat. Agayla, unong ed Job 12:7, anggan saray “monanakap” tan “saray manok” so makapanbangat ya andi-esel! Katekep ed antokaman iran natural ya abilidad odino dunong a walad sikatayo, say nagkalalon importanti et say “nengneng na inkatoo” tayo​—saray kualidad a kayarian tayo tan saray niyugali tayo ed espiritual a nayarin aligen na saray iyaaralan.​—2 Pedro 3:11; Lucas 6:40.

Saray Estudyante na Salitay Dios

10. Panon ya impanengneng nen Jesus so maabig ya alimbawa bilang estudyante na Salitay Dios?

¹⁰ Say sakey ya epektibon managbangat na Makasulatan iran katuaan so nepeg met a magmaliw ya estudyante na Salitay Dios. (Roma 2:21) Impanengneng nen Jesu-Kristo so ekstraordinaryon alimbawa nipaakar ed saya. Legan na impanministro to, anukoy odino angibalikas na saray punto si Jesus a mipara ed saray estansa a ngalngali kapaldua lawari ed saray libro na Hebreon Kasulatan.a Apatnagay pikabisado to ed Salitay Dios nen sikatoy manedad na 12, sanen aromog “a manyudyurong ed pegley na saray doktores [“managbangat,” NW], ya ondedengel tan ontetepet ed sikara.” (Lucas 2:46) Bilang sakey a wala la’d edad, akaugalian la nen Jesus so onla ed sinagoga, a diman so kibabasaan na Salitay Dios.​—Lucas 4:16.

11. Anton maong ya ugali ed panag-aral so nepeg a bayuboan na managbangat?

¹¹ Kasin magunaet kan managbasa na Salitay Dios? Diad pankotkot et “natalosan mo so takot ed Jehova, tan naromog mo so pikakabat ed Dios.” (Uliran 2:4, 5) Kanian iyugali so maong a panag-aral. Panggunaetay inagew-agew a pakabasa na kabiangay Salitay Dios. (Salmo 1:2) Iyugali so pamasa ed kada paway na Say Panag-Bantayan tan Awake! bektan naawat itan. Manimaton a maong ed saray miting ed kongregasyon. Panpelengay panag-research. Diad pakaaral a ‘manupapet a maong ed amin a bengabengatla,’ napaliisan moray pakasobraan tan agsusto ed panagbangat mo.​—Lucas 1:3.

Aroen tan Respetoen Iramay Ibabangat

12. Antoy awawey nen Jesus ed saray babangatan to?

¹² Sakey nin importantin kualidad et say suston awawey ed saramay ibabangat mo. Kainglit na saray Fariseo iramay ontatalineng ed si Jesus. “Saraya a katooan ya agda amta so ganggan naayew ira,” inkuan da. (Juan 7:49) Balet ta aralem so panangaro tan respeto nen Jesus ed saray babangatan to. Inkuanto: “Agta kayo la tawagen ya ariripen, ta say aripen agto amta so gawaen na katawan to. Balet tinawag takayo a kakaaro, ta amin a bengabengatla a nadngel ko ed Amak impaamtak ed sikayo.” (Juan 15:15) Impabitar na saya a nepeg ya ituloy na saray babangatan nen Jesus so kimey dan panagbangat.

13. Antoy liknaan nen Pablo no nipaakar ed saramay ibabangat to?

¹³ Alimbawa, agminantini nen Pablo so ambetel tan praktikal a relasyon ed saray estudyante to. Oniay imbaga to ed saray taga-Corinto: “Anggan wala so samplon libo a bomabangat yo ed Kristo, anggaman ontan anggapo so dakel ya ama yo: ta inanak ta kayo ed Kristo Jesus lapu ed ebanghelyo.” (1 Corinto 4:15) No maminsan et tekep na luan binilin ni ingen nen Pablo iramay ibabangat to! (Gawa 20:31) Impanengneng to met so pirmin anos tan panangasi. Kanian imbaga to ed saray taga-Tesalonica: “Noag say mauyamo kami ed pegley yo, a singa sakey a sigsiwa a managano na dilin anak to.”​—1 Tesalonica 2:7.

14. Akin a say personal ya interes ed saray iyaaralan ed Biblia so ontanlan importanti? Iyilustra.

¹⁴ Kasin aaligen mo si Jesus tan Pablo? Say masimoon a panangaro ed saray iyaaralan tayo et mas palumbasan to ni so antokaman iran kakulangan tayo ed natural iran abilidad tayo. Kasin nalikas na saray iyaaralan tayoy Biblia a talagan walaan itayoy panangiyansakit ed sikara? Kasin mangipapanaon tayon kabaten ira? Sanen naiirapan so sakey a Kristianon bii a tulongan ya onaligwas ed espiritual so iyaaralan to, sipapangasin tinepetan to: “Wala tay panaaburidoan mo?” Diad saman la imbaga na bii iray dakel a problema tan kapagaan to. Saman a maaron tongtongan so nanresulta’d baleg ya impanguman na bii. Diad ontan iran kipapasen, saray Makasulatan a punto tan balbalikas na ligliwa tan panamaseseg so matukoy. (Roma 15:4) Balet nia so panonot: Nayarin maples so iyaaligwas na iyaaralan ed Biblia balet ta wala niray agmakristianon konduktan kaukolan ton talonaan. Kanian agmakabat so pagmaliw a maapit ed sikato diad sosyal a paraan. Kaukolan a pansiansiaen iray suston ketegan bilang Kristiano.​—1 Corinto 15:33.

15. Panon tayon nipanengneng so respeto ed saray iyaaralan tayoy Biblia?

¹⁵ Lalaktipen na panrespeto ed saray iyaaralan so agtayo panalin pangontrol ed saray personal a bilay da. (1 Tesalonica 4:11) Singa bilang, nayarin say iyaaralan tayon bii et miaamong ed agto inkasal. Ompan wala lay ananak da. Lapud wala lay suston pikakabat ed Dios, labay na biin ipetek iray pamaakaran unong ed saray estandarte nen Jehova. (Hebreos 13:4) Kasin mikasal odino isian to so laki? Nayari palagin liknaen tayo a no mikasal ed sakey a lakin walaan na samet odino andian na interes ed espiritual et naamper so iyaligwas to ed arapen. Diad biek a dapag, itatakotan tayoy pankaabigan na ananak to tan isipen a magmaong no miasawa ed sikato. Antokaman so nagawa, agpanagrespeto tan ag-inkamaaro so pibali ed bilay na iyaaralan diad pangipilit ed saray opinyon tayo ed saratan a pamaakaran. Tutal, sikato so akauley ed saray pansumpalan na desisyon to. Kanian, agta marakdakep no ibangat so ontan ya iyaaralan ya usaren to so dili ‘iran pakayari ton mantalos’ tan sikaton mismoy mandesisyon no antoy kaukolan a gawaen to?​—Hebreos 5:14.

16. Panon a nipanengneng na mamatatken so aro tan respeto ed pulok na Dios?

¹⁶ Nagkalautlan importanti parad saray mamatatken ed kongregasyon a tratoen so pulok tekep na aro tan respeto. Inkuan nen Pablo ed sulat to ed si Filemon: “Kanian anggan dia ed kinen Kristo wala so dakel a panmatale’ko pian iganggan ko ed sika so manepeg, anggaman ontan lapud aro lablabayen kon pikasi ed sika.” (Filemon 8, 9) No maminsan, walaray makapadismayan situasyon ya onlesa ed loob na kongregasyon. Nayarin kapilitan so pagmaliw a mapekder. Pinaseseg nen Pablo si Tito a ‘baaten a sankaawetan [iray mankakasalanan], pian onkasil ira ed pananisia.’ (Tito 1:13) Anggan ontan ni, nepeg a manalwar iray mamatatken ya agda sipapasang a pansalitaay kongregasyon. Insulat nen Pablo, “say aripen na Katawan agto kanepegan so makolkol, noag ingen maamo ed ganagana, maong a mangibangat.”​—2 Timoteo 2:24; Salmo 141:3.

17. Antoy akalingoan nen Moises, tan antoy naaralan na mamatatken ed satan?

¹⁷ Lawas nepeg a tandaan na saray manangasikaso a say pidedenengan da et “saray pulok na Dios.” (1 Pedro 5:2) Anggaman mapaabeba si Moises et naandi itan ed sikato. Saray Israelita et “dinokirok da so espiritu to, kanian nansalita ed saray bibil to ya agla nannodnonot.” (Salmo 106:33) Naermenan a tuloy so Dios ed sayan impanmaltrato ed pulok To, anggaman sikaray natetel met. (Numeros 20:2-12) Sano nipapaarap ed mipadpara iran angat natan, kaukolan a panggunaetan na mamatatken so panbangat tan panbilin tekep na aralem a pakatalos tan panangasi. Mas onkiwas iray agagi tayo sano natrato ira tekep na konsiderasyon bilang indibidual a mankakaukolay tulong, aliwan singa saramay agla napapawil. Kaukolan a mantinien na mamatatken so parehon positibon punto de bista nen Pablo sanen inkuanto: “Wala so ilalo mi ed Katawan a nipaakar ed sikayo, a gagawaen yo tan gawaen yo met naani so saray bengatla ya ingganggan mi ed sikayo.”​—2 Tesalonica 3:4.

Onkiwas Unong ed Saray Pankaukolan Da

18, 19. (a) Panoy nepeg ya ikiwas tayo ed saray pankaukolan na saray iyaaralan tayo ed Biblia a walaay limitadon abilidad? (b) Panon tayon natulongan iray iyaaralan a nanairapan ed espisipiko iran pamaakaran?

¹⁸ Say sakey ya epektibon managbangat so mabulos a mibagay ed saray abilidad tan limitasyon na saray iyaaralan to. (Ikompara so Juan 16:12.) Diad ilustrasyon nen Jesus ni paakar ed saray talento, angiter so katawan na saray pribilihyo “ed balang sakey unong ed dili ton abilidad.” (Mateo 25:15, NW) Natumbok tayo so mipadparan padron sano mangikokondukta itayo na saray panangiyaral na Biblia. Natural labat a panpilalekay pakasumpal na nibase’d Biblian palapagan ed loob na makatunongan ya antikey a panaon. Balet nepeg ya aksobien ya aliwan amin so maong a manbasa odino maples a manebek na saray balon ideya. Kanian, nakaukolan so pakatebek no kapigan so iyalis ed sakey a punto manlapud sananey a punto diad panag-aral sano naiirapan a mibansag iray sinansakey. Mas importanti nen say pangobri ed materyal ed nigeter a peles et say panulong ed saray iyaaralan a talosan so naaaralan da.​—Mateo 13:51.

¹⁹ Ontan met so nibaga ed saray iyaaralan ed Biblia a naiirapan no nipaakar ed espisipiko iran pamaakaran, a singa say Trinidad odino relihyoso iran piestay opisyal. Anggaman inkalapagan lan agkapilitan so pangiyarum ed nibase’d-Biblian ni-research a materyal ed saray panag-aral tayo, nayarin tunggal paminsan a gawaen tayo itan no talagan makagungguna itan. Kaukolan so maong a panagdesisyon ta pian naamper so agkapilitan ya itantay iyaaligwas na iyaaralan.

Magmaliw ya Entusiastiko!

20. Panon ya impanengneng nen Pablo so entusiasmo tan kombiksion diad panagbangat to?

²⁰ “Marlang ed espiritu,” kuan nen Pablo. (Roma 12:11) On, balanglan mangikokondukta itayo na panangiyaral na Biblia odino walaan itayoy betang ed miting ed kongregasyon, gawaen tayo itan tekep na seseg tan entusiasmo. Imbaga nen Pablo ed saray taga-Tesalonica: “Say ebanghelyo tayo agsinmabi ed sikayo ed salita labat, noag dia ed pakayari met, tan dia ed espiritu santo, tan dia ed dakel a pamasekder.” (1 Tesalonica 1:5) Innabang sirin nen Pablo tan saray kaiba to so “aliwan say ebanghelyo na Dios labat, noag met saray dilin kakamarerwa [ra].”​—1 Tesalonica 2:8.

21. Panon tayon napansiansia so entusiastikon awawey ed saray asainmin tayo ed panagbangat?

²¹ Say puron entusiasmo so manlalapud pagmaliw a kombinsidon tuloy a saray iyaaralan tayo ed Biblia et kaukolan dan dengelen no antoy ibaga tayo. Agtayon balot momoriaen a rotina so antokaman ya asainmin ed panagbangat. Maseguron inimanon tuloy nen eskriban Esdras so impanbangat to nipaakar ed sayan pamaakaran. “Impasen to so puso to a mananap na tunong nen Jehova, tan manumpal ed sikato, tan mangibangat ed Israel.” (Esdras 7:10) Kaukolan tayo met a gawaen so ontan diad panparaan a maong tan panmolimoli ed kaimportantian na materyal. Ipikasi tayo ed si Jehova ya ikdan to itayo na pananisia tan kombiksion. (Lucas 17:5) Lapud entusiasmo tayo et nabayuboan na saray iyaaralan na Biblia so peteg ya aro parad katuaan. Siempre, nayarin lalanoren met na say pangimaton ed panagbangat tayo so panangusar na espisipiko iran paraan ed panagbangat. Singbaten na ontumbok ya artikulo so pigara ed saraya.

[Paimano ed leksab]

Kasin Natandaan Yo?

◻ Akin a nakaukolan natan iray marunong a Kristianon managbangat?

◻ Anton maong iran ugali ed panag-aral so nabayuboan tayo?

◻ Akin ya importantin tuloy ya aroen tan respetoen iramay ibabangat tayo?

◻ Panon tayon onkiwas ed saray pankaukolan na saray iyaaralan tayoy Biblia?

◻ Akin a say entusiasmo tan kombiksion so ontanlan makana sano ibabangat iray arum?

[Litrato ed pahina 10]

Saray maong a managbangat so estudyante met ira na Salitay Dios

[Litrato ed pahina 13]

Magmaliw ya interesado ed saray iyaaralan ed Biblia