Kapitulo 17
Makaromog na Kaligenan ed Limog na Totoo na Dios
1, 2. Panon a say kipapasen na katooan so nipareng ed kipapasen na totoo ed lugar a pinaspas na maksil a bagyo?
ISIPEN pan sakey a maksil a bagyo so amaspas ed lugar a panaayaman yo. Aderal so ayaman yo, tan amin a kayarian yo so naandi. Makisir so tagano. Say kipapasen so ompapatnag ya andiay-ilalo. Insan, sinmabi ag-inilaloan a tulong. Daakan a nitarok so tagano tan kawesen. Sakey a balon abung so impaalagey parad sikayo. Maseguron misalamat kayo ed toon angiter ed sarayan probisyon.
2 Walay bengatlan kiparaan na satan a nagagawa natan. Singa satan a bagyo, say impanrebelde nen Adan tan Eva so sengegan na baleg a desyang ed atooan a rasa. Say Paraison ayaman na katooan so naandi. Nanlapulad saman, agla nasalimbengan na atooan iran gobierno so totoo manlapud bakal, krimen, tan ag-inkahustisya. Say relihyon so angitilak na dakel a naeerasan parad makagunggunan espiritual a tagano. Anggaman ontan, diad espiritual a paraan, si Jehova a Dios natan so mangitatarok na tagano, kawesen, tan siruman. Panon ton gagawaen itan?
SAY “MATOOR TAN MAKABAT YA ARIPEN”
3. Panon ya itatarok nen Jehova iray probisyon parad katooan, a singa ipapanengneng na antoran alimbawa?
3 Saray tulong so inkalapagan a niiiter ed panamegley na sakey ya organisadon paralanan, tan diad ontan met a paraan a niiiter nen Jehova so espiritual a probisyon ed totoo to. Alimbawa, saray Israelita so nagmaliw a “kongregasyon nen Jehova” ed loob na ngalngalin 1,500 a taon. Say arum ed sikara so nanlingkor bilang paralanan na Dios pian ibangat so Ganggan to. (1 Awaran 28:8; 2 Awaran 17:7-9, NW) Diad inmunan siglo K.P., pinawala nen Jehova so Kristianon organisasyon. Aporma iray kongregasyon, tan saratan so nipakurang ed silong na pangiderihe na mananguley ya ulop a tugyopen na saray apostol tan mamasiken. (Gawa 15:22-31) Ontan met natan, pidedenengan nen Jehova so totoo to ed panamegley na sakey ya organisadon ulop. Panoy pikabat tayo ed saya?
4. Siopa so apaneknekan a say “matoor tan makabat ya aripen” ed moderno iran panaon, tan panon a saray espiritual a probisyon na Dios so naala?
4 Inkuan nen Jesus a diad panaon na kiwawala to ed pakayari na Panarian, say “matoor tan makabat ya aripen” so naromogan a mangitatarya na “tagano ed kinepegto” parad saray patumbok To. (Mateo 24:45-47) Sanen nitrono si Jesus bilang mangatatawen ya Ari nen 1914, apaneknekan a siopa iyan “aripen”? Maseguron aliwan saray klero na Kakristianoan. Lapud kaslakan, sikaray mamapakan ed saray pulok da na propaganda a manusuporta ed dilin nasyonal iran gobierno ra nen Guerra Mundial I. Balet say susto tan nipanpanaon ya espiritual a tagano so niiiter na grupo na tuan Kristianos a nilanaan na masanton espiritu na Dios tan kabiangan na tatawagen nen Jesus a “melag a pulok.” (Lucas 12:32, NW) Ipupulong na sarayan alanaan a Kristiano so Panarian na Dios imbes a saray gobierno na too. Bilang resulta, minilyon ya onkiling ed inkatunong ya “arum a carnero” so akiulop ed alanaan ya “aripen” diad panangagamil na tuan relihyon ed apalabas iran taon. (Juan 10:16) Diad panamegley na ‘matoor ya aripen’ tan ed kaplesan a Mananguley ya Ulop to, idederehi na Dios so organisadon totoo to pian mangitarya na espiritual a tagano, kawes, tan siruman ed amin a manpilalek a nawalaan na sarayan probisyon.
“TAGANO ED SUSTON PANAON”
5. Anton espiritual a kipapasen so wala ed mundo natan, balet anto so gagawaen nen Jehova nipaakar ed saya?
5 Inkuan nen Jesus: “Aliwa a say tinapay labat so napanbilay na too, noag say amin a salitan onbesngaw ed sangi’ Dios.” (Mateo 4:4) Anggaman ontan, makapaermen a baleg a karaklan na totoo so agmangiimano ed ibabaga na Dios. A singa ed impasakbay na propeta nen Jehova a si Amos, wala so “[eras], aliwa ya eras ed tinapay, odino pega ed danum, no ag ingen pandengel ed saray salita nen Jehova.” (Amos 8:11) Anggan saray relihyoson totoo so naeerasan ed espiritual. Anggaman ontan, say linawa nen Jehova et “amin a totoo nilaban ira komon, tan ondago’ ra ed pakapikabat ed katuaan.” (1 Timoteo 2:3, 4) Kanian, sikatoy mangitatarok na espiritual a tagano ed inkadaakan. Balet iner so pakalaan ed satan?
6. Panon a tataganoen nen Jehova so totoo to ed espiritual diad apalabas iran panaon?
6 Diad interon awaran, nitatarok la nen Jehova so espiritual a tagano ed totoo to bilang sakey a grupo. (Isaias 65:13) Singa bilang, tinipon na saray saserdoten Israelita so lalaki, bibii, tan ananak bilang sakey a grupo pian ibangat ed Ganggan na Dios. (Deuteronomio 31:9, 12) Diad silong na pangiderihe na mananguley ya ulop, saray inmunan-siglon Kristiano so angorganisa na saray kongregasyon tan nantitipon parad kibangatan tan kapasesegan na amin. (Roma 16:5; Filemon 1, 2) Tutumboken na Tastasi nen Jehova iyan padron. Sikayo so ampeta-petang ya iimbitaan ya onatendi ed amin a miting da.
7. Panon a say maparanay ya iyaatendi ed saray Kristianon miting so misiglaotan ed pikakabat tan pananisia?
7 Siempre, nayarin dakel lay naaralan yo ed personal a panagaral yo na Biblia. Anganko et wala lay tinmulong ed sikayo. (Gawa 8:30-35) Balet say pananisia yo so niyaliling ed sakey a tanaman a nalenes tan ompatey no agnaikdan na matukoy a panangasikaso. Kanian, nepeg yon awaten so suston espiritual a katagano. (1 Timoteo 4:6) Saray Kristianon miting so mangitatarok na mantultuloy a programan panamilin a denisinyo pian taganoen kayo ed espiritual tan tulongan kayon mansiansian ombulaslas ed pananisia legan ya ondaraak so pikakabat yo ed Dios.—Colosas 1:9, 10.
8. Akin a papasesegen itayon onatendi ed saray miting na Tastasi nen Jehova?
8 Saray miting so walaan ni sananey ya importantin gagala. Insulat nen Pablo: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa, ya ag tayo paulian so saray panmomoyong tayo.” (Hebreos 10:24, 25) Say Griegon salitan nipatalos a “manaayatan” so mankabaliksan met na “napatarem.” Kuan na sakey a proverbio na Biblia: “Say balatyang otokan to so balatyang. Ontan say too otokan to so lupa na kaaro to.” (Uliran 27:17) Amin tayo so mankakaukolan na mantultuloy a ‘panamatarem.’ Saray inagew-agew a desdes a manlalapud mundo so mamaepel ed pananisia tayo. Sano onaatendi itayo ed saray Kristianon miting, wala ditan so pakapanpapasesegan. (Roma 1:11, 12) Tutumboken na saray membro na kongregasyon so simbawa nen apostol Pablo a “manbibilinan so sakey tan sakey, tan manpapaalageyan so sakey tan sakey,” tan saratan a bengatla so mamatarem na pananisia tayo. (1 Tesalonica 5:11) Say maparanay a kiwawala ed saray Kristianon miting so mangipapatnag met ya aaroen tayo so Dios tan mangiiter ed sikatayo na pankanawnawan mangidayew ed sikato.—Salmo 35:18.
“KAWESAN YO SO INKASIKAYO NA ARO”
9. Panon ya angiletneg si Jehova na alimbawa ed panangipanengneng na aro?
9 Insulat nen Pablo: “Kawesan yo so inkasikayo na aro, lapud satan so nagnap a bedber na pankakasakey.” (Colosas 3:14, NW) Sibubunlok ya itatarok nen Jehova so kawesen parad sikatayo. Diad anton dalan? Nipanengneng na saray Kristiano so aro lapud satan so sakey ed inter-Dios iran bunga na masanton espiritu nen Jehova. (Galacia 5:22, 23) Impatnag a mismo nen Jehova so sankabalgan ya aro diad impangibaki to ed bogbogtong ya Anak to ta pian nawalaan tayo na andi-anggaan a bilay. (Juan 3:16) Sayan supremon panangipanengneng na aro so mangitatarok na modelo parad sikatayo diad pangibalikas ed sayan kualidad. “No say Dios ontan so inpangaro to ed sikatayo,” insulat nen apostol Juan, “nepeg met ya manaaroan so sakey tan sakey ed sikatayo.”—1 Juan 4:11.
10. Panon itayon nagunggunaan diad “aro parad interon panlilimog na agagi”?
10 Say iyaatendi yo’d saray miting ed Kingdom Hall so mangiter ed sikayo na sankaabigan a pankanawnawa ed pangipanengneng na aro. Ditan et nakabat yoray nanduruman totoo. Andi-duaruwan nasagyat kayo a tampol na dakel ed sikara. Siempre, nandurumay personalidad anggan ed limog na saramay manlilingkor ed si Jehova. Anganko diad apalabas et papaliisan yo iramay totoon say interes tan walna ra so midumaan ed sikayo. Anggaman kuan, saray Kristiano so kaukolan a “nawalaan na aro parad interon panlilimog na agagi.” (1 Pedro 2:17, NW) Sirin, gawaen yon kalat a nakabat iramay walad Kingdom Hall—anggan saramay say edad, personalidad, rasa, odino aral so nayarin miduma ed sikayo. Maseguron naromog yon kada sakey so matalona ed pigaran makapaaron kualidad.
11. Akin ya agnepeg a manigensigen ed sikayo so pandurumaan na personalidad ed limog na totoo nen Jehova?
11 Say pandurumaan na personalidad ed kongregasyon so agkaukolan a manigensigen ed sikayo. Diad pangiyilustra, isipen yoray dakel a luluganan a manbiabiahen kabansag yo ed dalan. Aliwan amin so pareparehoy batik, nisay pareparehoy kondisyon. Arum so nanbiahe la na dakel a kilometro, balet singa sikayo, say arum so onggagapo ni lambengat a manbiahe. Anggaman ontan, anggaman ed pandurumaan, amin so manbiabiahe ed dalan. Mipadpara iya ed totoon manitibukel ed sakey a kongregasyon. Aliwan amin so mamapaaligwas ed Kristiano iran kualidad ed parehon peles. Niarum ni, aliwan amin so pareho ed pisikal odino emosyonal a kondisyon. Say arum so mandadayew la ed si Jehova ed dakel laran taon; arum balet so onggagapo ni labat. Ingen, amin so manbiabiahe ed dalan a mamaarap ed andi-anggaan a bilay, a “saksakey [ed] nonot tan saksakey ya isip.” (1 Corinto 1:10) Sirin, onnengneng ed saray maabig a kualidad imbes ed saray kakapuyan na saramay walad kongregasyon. Say panggawa ed satan so mamaligsa na puso yo, lapud namoria yon say Dios so talagan kalimog na sarayan totoo. Tan maseguron saya so lugar a labay yon laen.—1 Corinto 14:25.
12, 13. (a) No wala ed kongregasyon so makakaopendi ed sikayo, anto so nagawaan yo? (b) Akin ya importanti so agpangimbel na linawa?
12 Lapud amin a totoo so ag-ayadyari, no maminsan et walay sakey ed kongregasyon a makapansalita odino makagawa na sakey a bengatlan mamaingongot ed sikayo. (Roma 3:23) Realistikon nansulat si babangatan a Santiago: “Dia ed akamayamay a nengneng nagapol itayo ya amin. No say siopaman a too et ag nagapol ed salita, sayan too ayadyari.” (Santiago 3:2) Antoy gawaen yo no walay makakaopendi ed sikayo? Oniay kuan na sakey a proverbio na Biblia: “Say kalakal na too mangawa ed sikato so matantan a manpasnok; et gayaga to so pamalabas na pakalokso.” (Uliran 19:11) Say pakawalaan na aralem a pakatalos et kabaliksan toy pakanengneng ed dalem na sakey a kipapasen, natatalosan so akindalem iran sengegan no akin ya akapansalita odino akakiwas na onman so sakey a too. Kaslakan ed sikatayo so mabetbet a manguusar na aralem a pakatalos pian ibaraan iray dilin lingo tayo. Akin ya agtayo met usaren itan pian talosan tan sakbongan iray ag-inkayadyari na arum?—Mateo 7:1-5; Colosas 3:13.
13 Agbalot lilingwanan a nepeg tayon perdonaen so arum no labay tayon naawat so panamerdona nen Jehova. (Mateo 6:9, 12, 14, 15) No aagamilen tayo so katuaan, tratoen tayoray arum ed maaron dalan. (1 Juan 1:6, 7; 3:14-16; 4:20, 21) Sirin, no walay problema yo ed sakey ed loob na kongregasyon, labanay pangimbel na linawa. No akawesan kayo na aro, panbanikelan yon solbaren so problema, tan agkayo masuyat ya onkerew na dispensa no akaopendi kayo.—Mateo 5:23, 24; 18:15-17.
14. Antoran kualidad so nepeg tayon ikawes?
14 Nepeg ya isakop na espiritual a kawes tayo so arum a kualidad a maapit a misiglaotan ed aro. Insulat nen Pablo: “Manpales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kaoyamoan, kadeenan, kasondoan.” Sarayan ugali, ya atekepay aro, so kabiangan na maridios a “balon personalidad.” (Colosas 3:10, 12, NW) Kasin pansagpotan yon kawesay inkasikayo na onia? Legan a kakawesan yo so inkasikayo na inaagin aro, nagkalalon nawalaan kayo na pakabidbiran a marka na babangatan nen Jesus, lapud inkuanto: “Lapu ed saya amin a too nabirbiran da’ya sikayo ray babangatan ko, no wala so aro yo ed sakey tan sakey.”—Juan 13:35.
SAKEY A PASEN NA KALIGENAN
15. Panon a say kongregasyon so mipara ed siruman?
15 Onkakana met so kongregasyon bilang siruman, sakey a proteksion a salimbengan a nalikna yo ditan a sikayoy maligen. Ditan so pakaromogan yo na matuan-impanpuson totoo a manbabanikel a manggawa na maptek ed imaton na Dios. Dakel ed sikara so angekal la ed parehon mauges ya agagamil tan ugugalin nayarin pipupuligesgesan yon talonaan. (Tito 3:3) Natulongan da kayo, lapud nibaga’d sikatayon “mantatarokan kayo na awit na sinansakey.” (Galacia 6:2) Natural, say pangegemtan ed kurson mangitonton ed andi-anggaan a bilay so talagan dilin responsabilidad yo. (Galacia 6:5; Filipos 2:12) Ingen, nitarok la nen Jehova so Kristianon kongregasyon bilang sakey a makapakelkelaw a paraan na pananulong tan pananuporta. Kaunongan man kaseryoso iray problema yo, walaan kayo na seguradon nabatikan—sakey a maaron kongregasyon ya ontulong ed sikayo ed panaon na kairapan odino inkaandi.—Ipareng so Lucas 10:29-37; Gawa 20:35.
16. Anton tulong so itatarok na mamatatken ed kongregasyon?
16 Kabiangan na saramay akaparaan ya ontulong ed sikayo et say “langkap a lalaki”—aturon mamatatken ed kongregasyon, odino saray manangasikaso, a sibubulos tan sigugunaet a mamapastol ed pulok. (Efeso 4:8, 11, 12, NW; Gawa 20:28; 1 Pedro 5:2, 3) Nipaakar ed sikara et impropesiya nen Isaias: “Et sakey a too so magmaliw naani a singa sakey ya amotan na dagem, tan sakey a siroman ed bagyo, singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya apagaan.”—Isaias 32:2.
17. (a) Anton klase na tulong so nagkalautlan nilabay nen Jesus ya iter? (b) Anton probisyon so insipan na Dios a gawaen ed totoo to?
17 Sanen wadiad dalin si Jesus, makapaermen a say maaron panangasikaso na relihyoson papangulo so anggapo. Say kipapasen na totoo so amakiwas a tuloy ed sikato, tan nagkalautlan labay ton tulongan ira nipaakar ed espiritual. Naabagey ira nen Jesus lapud “maermen tan abuybuyak ira, a singa saray carnero ya angapoy pastol da.” (Mateo 9:36) Agaylan matukotukoy a dedeskribien na saya so kaplesan a problema na dakel a manasagmak na sinagem lapud saray probleman anggapoy nabalingan parad espiritual a tulong tan ligliwa! Balet walaan na espiritual a tulong so totoo nen Jehova, lapud insipan to: “Mangipasen ak naani na saray pastol ed sikara; a sikara so mantagano ed sikara: et ag ira la naani ontakot, odino napunaw, angapo met naani so onkulang.”—Jeremias 23:4.
18. Akin a nepeg tayon asinggeran so sakey a matatken no nakaukolan tayo so espiritual a tulong?
18 Kabaten iray aturon mamatatken ed kongregasyon. Dakel so eksperiensia ra ed panangiyaplika ed pikakabat na Dios, lapud akapet daray kualipikasyon parad saray manangasikaso a nidatak ed Biblia. (1 Timoteo 3:1-7; Tito 1:5-9) Agmasuyat ya onasingger ed sakey ed sikara no nakaukolan yo so espiritual a tulong pian talonaan so bisyo odino walnan sumlang ed saray kakaukolanen na Dios. Naimano yon tutumboken na mamatatken so simbawa nen Pablo: “Ibalap yo so apunaw ed puso, tagano yo so saray makapuy, masungdo kayo komon ed amin.”—1 Tesalonica 2:7, 8; 5:14.
PANGGAYAGAAN SO KALIGENAN A KAIBAY TOTOO NEN JEHOVA
19. Antoran bendisyon so ipapagamor nen Jehova ed saramay manaanap na kaligenan ed loob na organisasyon to?
19 Anggaman manbibilay tayo ed utel na ag-ayadyari iran kipapasen, itatarok nen Jehova so espiritual a tagano, kawesen, tan siruman. Siempre, nepeg tayon alagarey insipan na Dios a balon mundo pian naeksperiensia iray gungguna na pisikal a paraiso. Balet saramay kabiangan la na organisasyon nen Jehova so peles a manggagayaga la’d kaligenan na sakey ya espiritual a paraiso. Nipaakar ed sikara, impropesiya nen Ezequiel: “Manayam ira naani a mataletalek, tan angapo ni manaktakot ed sikara.”—Ezequiel 34:28; Salmo 4:8.
20. Panon a tumangan nen Jehova so antokaman a nayarin isakripisyo tayo nisesengeg ed panangidayew ed sikato?
20 Agaylan misalsalamat tayo lapud mangitatarya si Jehova na espiritual iran probisyon diad panamegley na Salita tan organisasyon to! Onapit ed totoo na Dios. Agmagmaliw a masuyat lapud takot ed nayarin isipen na kakaaro odino kakanayon ed sikayo lapud pangaala yo na pikakabat na Dios. Nayarin say arum so agmipakna lapud sikayoy mililimog ed Tastasi nen Jehova tan onaatendi ed saray miting diad Kingdom Hall. Balet daakan a tumangan na Dios so antokaman ya isakripisyo yo nisesengeg ed panangidayew ed sikato. (Malaquias 3:10) Nagkalalo ni, inkuan nen Jesus: “Angapo’y too ya anainan na abung, ono agagin lalaki, ono agagi’n bibii, ono ina, ono saray anak, ono daldalin, nisengeg ed siak, tan nisengeg ed evangelio. Ingen awaten to so maminlasus natan ed saya’n panaon, abu-abung, tan agagi’n lalaki, tan agagi’n bibii, tan saray ina, tan saray anak, tan daldalin, pati saray kapasegsegang; tan dia ed mundo ya onsabi say bilay a maando.” (Marcos 10:29, 30) On, antokaman so tinaynan yo odino nepeg yon sungdoan, makaromog kayo na maliket a pipiulop tan espiritual a kaligenan ed limog na totoo na Dios.
SUBOKEN SO PIKAKABAT YO
Siopa so say “matoor tan makabat ya aripen”?
Anton probisyon so gagawaen nen Jehova pian taganoen itayo ed espiritual?
Panon a saramay walad Kristianon kongregasyon so makatulong ed sikatayo?
[Interon-pahina a litrato ed pahina 165]