“Nonoten Iray Agew ya Apalabas”​—Akin?

“NONOTEN iray agew ya apalabas.” Sayan simbawa nen apostol Pablo, a nisulat ed ngalngalin 61 K.P., so nipaarap ed saray Hebreon Kristianos ed Judea. (Hebreos 10:32, The New English Bible) Anto so anagdag ed sayan panonot? Akin a wala so pankaukolan parad saraman ya inmunan-siglon managdayew nen Jehova ya aglingwanan so apalabas? Nagunggunaan itayo ta diad italineng ed parehon panonot natan?

Diad apalabas iran siglos, paulit-ulit ya amasakbay iray managsulat na Biblia sumpad panangibaliwala odino say agpanangimano ed apalabas. Kaukolan a lawas isipen tan konsideraen so inmuna iran panaon tan ebento. Inkuan nen Jehova: “Nonoten yo so saray inmuna a bengatla nen abayag la: ta siak so Dios, et anggapo la so sananey; Dios ak, et anggapo so mipara ed siak.” (Isaias 46:9) Usisaen tayo pa so taloran mabiskeg a rason diad italineng ed sayan simbawa.

Motibasyon tan Panamaseseg

Unona, saya so magmaliw a baleg ya lapuan na motibasyon tan panamaseseg. Sanen insulat nen Pablo so sulat to ed Hebreon kongregasyon, susulaten to iray kaparan Kristianon inagew-agew a nasusubok so pananisia ra lapud isusumpa na saray Judio. Diad pakakaimano ed pankaukolan da na pamabiskeg ed panagsungdo, inkuan nen Pablo: “Nonot yo so saray agew ya inmuna, ed kayari yo ya asilewan, nantepel kayo na baleg a bakal na saray irirap.” (Hebreos 10:32) Mangiter na nakaukolan a pakpel so pannonot ed saray apalabas a gawa na katooran ed espiritual a pibabakal pian sumpalen so pilulumba. Diad parehon paraan, insulat nen propeta Isaias: “Nonoten yo so saya, tan ipatnag yo so inkalaki yo.” (Isaias 46:8) Inbaga nen Jesu-Kristo so mipadparan kaliktan to ed kongregasyon na Efeso: “Pakanonoten mo sirin no iner so naplagan mo [akauna ya arom], tan magbabawi ka, tan gawam so saray manonaan a gawa.”​—Apocalipsis 2:4, 5.

Say panamaseseg a ‘nonoten so saray agew ya inmuna, isisipen so saray taon na dakel a kailalakan’ so aminpigan danay a tema ed saray paliwawa nen Moises a niiter ed Israel, a pinaseseg to so nasyon a mangipatnag na andi takot a katooran ed si Jehova. (Deuteronomio 32:7) Imanoen iray salita to a nirekord ed Deuteronomio 7:18: “Agmo nepeg so ontakot ed sikara [saray Canaanita]. Nepeg mo a nodnonoten a maong so ginawa nen Jehova a Dios mo ed kinen Faraon tan dia ed amin a Ehipto.” Say pannonot ed manangisalba iran gawa nen Jehova ed totoo to et sakey a pakasagyatan ed nantultuloy a katooran da diad pananulok ed saray ganggan na Dios.​—Deuteronomio 5:15; 15:15.

Makapaermen, naynay ya onsusuko iray Israelita ed kasalanan a panangilingwan. Diad anton resulta? “Lanti, binmeneg ira tan tinokso ra so Dios, tan pinasanok da so Santo na Israel. Sikara agda ninodnonot so lima to, nisay agew ya impangiliktar to ed sikara ed kabusol.” (Salmo 78:41, 42) Diad kaunoran, say panangilingwan da ed saray ganggan nen Jehova so nansumpal ed impangipulisay to ed sikara.​—Mateo 21:42, 43.

Inletneg na salmista so sakey a maabig ya alimbawa ya insulat to: “Salangbiten ko so saray kimkimey nen Jehova; tan nodnonoten ko so gawam a makapakelaw nen una. Omamengen ko so amin a kimey mo, tan mandalepdep ak ed saray gawagawam.” (Salmo 77:11, 12) Say ontan a maomameng a pannonot ed apalabas a matoor a serbisyo tan maaro iran gawa nen Jehova so mangitarya ed sikatayo na nakaukolan a motibasyon, panamaseseg, tan apresasyon. Ontan met, “say pannonot ed inmuna iran agew” so onkanan mangekal ed inkakesaw tan managyat ed sikatayon gawaen so anggaay nayarian tayo tan mamasiansia’d matoor a panagsungdo.

Pakaaral Manlapud Apalabas Iran Lingo

Komadua, say agpangilingwan so mankabaliksan na pakaaral ed apalabas iran lingo tan saray nansumpalan da. Diad pannonot ed saya ed kanonotan, sinimbawa nen Moises iray Israelita: “Nodnonot mo ya aglilingoanan so impamapasanok mo ed kinen Jehova a Dios mo a pian manpasnok diman ed kalawakan. Nanlapu ed samay agew ya intainan mod’man ed Ehipto ya angga ed inyakar yo ed saya a pasen, sinmusumpa kayo ed kinen Jehova.” (Deuteronomio 9:7) Say resulta na ontan ya itutunganga na Israelitas, a singa impaimano nen Moises, so ‘angibasbasan nen Jehova a Dios ed sikara ed saray apataplo a taon ed kalawakan.’ Akin a pinaseseg iran nonoten iya? Ta pian manpaabeba ed sikara tan onkanan panametek ed saray rebelyoson dalan da pian “onoren so saray ganggan nen Jehova a Dios [da], a manonton [ira] ed saray dalan to tan sikato so takotan [da].” (Deuteronomio 8:2-6) Sikaray makaaral ed pantalos ya agda la uliten so apalabas iran lingo ra.

Onia so inkuan na sakey a managsulat: “Nagunggunaan so maalwar a too ed personal ya eksperiensiya to, balet say makabat et diad eksperiensia na arum.” Bangta impaimano nen Moises ed baley na Israel a nagunggunaan ed pangonsidera ra ed apalabas iran lingo ra, sinimbawa nen apostol Pablo so arum​—say inmunan-siglon kongregasyon na Corinto tan, diad inkinatnat to, sikatayo​—pian makalay leksion manlapud parehon maawaran a rekord. Insulat to: “Natan sarayan bengatla agawa ed sikara [saray Israelita] a singa uliran, tan nisulat ira a bilin ed sikatayo, ya asabian da so kasumpalan na sayan panaon.” (1 Corinto 10:11) Walad kanonotan nen Jesu-Kristo so sananey nin kadaanan a Biblikon agawa tan say pankaukolan ed pakaaral manlapud satan sanen kuanto: “Nodnonoten yo so asawa nen Lot.” (Lucas 17:32; Genesis 19:1-26) Insulat na sakey a manag–anlong tan pilosopo ya Ingles a si Samuel Taylor Coleridge: “No makaaral so totoo manlapud awaran, agaylan karakel na leksion a makapangibangat ed sikatayo!”

Kasimpitan tan Panamabli

Komatlo, say pannodnonot so mamawala ed sikatayo na makapaliket-ed-Dios iran kualidad na kasimpitan tan panamabli. Legan a panggagayagaan tayo so dakel ya aspeto ed sankamundoan ya espiritual a paraiso tayo, agtayo komon lilingwanan ya akadependi iya ed saray prinsipyo. Saraya so manasaglawi ed katooran, aro, dilin-sakripisyo, inkakpel ed arap na kairapan, panagsungdo, anos tan pananisia​—kualidades a nipanengneng na saray Kristianon agagi tayo ya angilukas na kimey ed nanduruman daldalin pigaran dekada lay apalabas. Diad pansaran report nipaakar ed modernon-agew ya awaran na Dios ed Mexico, inkuan na say 1995 Yearbook of Jehovah’s Witnesses: “Diad totoon agano nin akilimog ed saray Tastasi nen Jehova, naromogan dan makasurprisa ed sikara so inkidunget ed saray subok na saramay akibiang ed panangilukas na kimey ed Mexico. Nipasal ira ed espiritual a paraiso no iner daakan so espiritual a tagano, wala so nilasus nilibo iran matakot ed Dios a kakaiba, tan say serbisyo ed Dios so nagagawa ed organisadon maong a paraan.”

Mabetbet a nankimey iraman ya asasakbay a manangilukas a manbokbokor odino diad saray nisulinek iran ankekelag a grupo. Inarap da so inkabegtebegtew, inkaandian, tan arum niran pirmin subok na katooran legan a mansiasiansia ed panangiproklama na mensahe Panarian. Anggaman dakel ed sarayan ariripen ed akauna iran panaon so inatey la, agaylan makapaligsay puso a nakabatan a sankanonot nen Jehova so matoor a serbisyo ra! Pinekderan iya nen apostol Pablo, sanen insulat to: “Say Dios aliwan agmatunong pian nalingwanan to so gawa yo tan say aro ya inpanengneng yo ed ngaran to.” (Hebreos 6:10) No siaapresyan nononoten nen Jehova, agta kaukolan tayo met a gawaen so ontan diad espiritu na panamabli?

Makagamor iray balobalo nin akapikabat ed katuaan na pakaamta ed sayan awaran diad panamegley na publikasyon a Jehovah’s Witnesses​—Proclaimers of God’s Kingdom.a Niarum ni, no apribilihyoan tayo a kabiangan ed sakey a pamilya odino diad Kristianon kongregasyon a saray membro et laktipen na saray abayag lan manseserbi a maedad lan agagin lalaki tan bibii, napaseseg itayo ed espiritu na Deuteronomio 32:7 a “nonoten mo so saray inmuna iran agew, isisip mo saray taon na dakel a poli; kerew ka ed amam, et sikato ipanengneng to ed sika; saray mamasiken mo, et sikara salitaen da ed sika naani.”

On, nasagyat itayon mantultuloy a mansungdon magayaga ed Kristianon serbisyo diad pannonot tayo ed saray inmuna iran gawa na maridios a debosyon. Ontan met, lugan na awaran iray leksyon a kaukolan tayon naaralan. Tan say pandelepdep ed benindisyonan na Dios ya espiritual a paraiso a kipapasen tayo et pabulaslasen to ed sikatayo iray maabig a kualidad na kasimpitan tan panamabli. Peteg, “nonoten iray agew ya apalabas.”

[Paimano ed leksab]