Ag-itayo Komon Onsener ya Ompugta ed Kadederal!

“Aliwa itayon nengneng ya onsener ya ompugta ed kadederal.”​—HEBREOS 10:39.

1. Antoran sirkumstansia so sengegan a pinmayakot si apostol Pedro?

MASEGURON ameneng iray apostoles sanen imbaga ed sikara na pinabpabli ran Katawan, a Jesus, a sikaray nabuybuyak tan sikatoy ikaindan da. Panon a nagawa itan a bengatla, anta saya so oras na pankakkaukolan toy suporta? Oniay impilit nen Pedro: “Anggano nagapol lan amin so arum, siak balet et andi.” Diad tua, si Pedro et masebeg tan makpel a too. Balet sanen intapat tan inerel si Jesus, abuybuyak iray apostol, pati si Pedro. Diad saginonor, legan ya uusayen si Jesus diad abung na Atagey a Saserdoten si Caifas, mapagpagan akusmeng si Pedro diad patio. Diad panaralem lay ambetel a labi, maseguron tinmakot si Pedro ed nayarin pamatey la’d si Jesus tan say siopaman a kaiba to. Sanen si Pedro so alupaan na arum a wadman a midudumog bilang sakey ed saray maapit a kaulop nen Jesus, sikatoy akebbiew a maong. Amitlo ton imburi so pisisiglaotan to ed si Jesus. Imburi ni ingen nen Pedro so pikabat to ed sikato!​—Marcos 14:27-31, 66-72, NW.

2. (a) Akin a say intakot nen Pedro ed samay labin inkaerel nen Jesus so agmangipasen ed sikato a “nengneng ya onsener”? (b) Anto so nepeg a determinasyon tayo?

² Satan so kipapasen ed bilay nen Pedro a tinayeran to, sakey a bektan maseguron nagbabawian to ed legay impanbilay to. Balet kasin say inkiwas nen Pedro ed saman a labi et sengegan lay impagmaliw ton payakot? Kasin sikatoy nipasen a “nengneng” na saramay deneskribe nen Pablo ed saginonor sanen insulat to: “Natan aliwa itayon nengneng ya onsener ya ompugta ed kadederal”? (Hebreos 10:39, NW) Nayarin mipakna so maslak ed sikatayo ya ag-onaplika irayan salita nen Pablo ed si Pedro. Akin? Lapud temporaryo lambengat so intakot nen Pedro, sakey a temporaryon intayer ed bilay ya akabidbiran lay matalonggaring ya inkakpel tan pananisia. Mipadpara, nayarin walara nensaman so agawa ed bilay na dakel ed sikatayo a makapabaing no nodnonoten, agawgawan adaeg itayo na takot tan agtayo nitalindeg a makpel so katuaan unong a kakaliktanen tayo. (Ikompara so Roma 7:21-23.) Makaseguro itayo a saratan a temporaryon intayer et agto itayo pagmaliwen a nengneng ya onsener ya ompugta ed kadederal. Siansia, nakaukolan a determinado itayo ya agbalot magmaliw ya ontan a nengneng. Akin? Tan panon tayon napaliisan so pagmaliw ya ontan a nengneng na too?

No Anto so Kabaliksan na Onsener ya Ompugta ed Kadederal

3. Panon a pinmayakot iray propetan si Elias tan Jonas?

³ Sanen insulat nen Pablo so nipaakar ed saramay “nengneng ya onsener,” agto tutukoyen iramay nayarin makasagmak na temporaryon kakulangay inkakpel. Maseguron amta nen Pablo so naeksperiensia nen Pedro tan ed arum nin miparan agawa. Si Elias, sakey a makpel tan prangkan propeta, so aminsan a pinmayakot tan nanamot-amot makasengeg ed impangigagaem nen marelmeng a Reyna Jezebel a sikatoy papatey to. (1 Arari 19:1-4) Si propetan Jonas so awalaan na mas graben takot. Sikatoy ginanggan nen Jehova a manbiahen mamaarap ed Ninive, a kabkabat bilang maramsak tan marelmeng a syudad. Tampol a linmugan si Jonas ed sakey a baloton amaarap ed Tarsis​—3,500 a kilometro diad basil a direksion! (Jonas 1:1-3) Ingen, agmakatunongan a deskribien irayan matoor a propeta nisay si apostol Pedro bilang nengneng ya onsener. Akin ya andi?

4, 5. (a) Panon itayon natulongan na konteksto pian nadetermina no antoy labay ya ibaga nen Pablo ed “kadederal” diad Hebreos 10:39? (b) Anto so labay ya ibaga nen Pablo sanen inkuan ton: “Aliwa itayon nengneng ya onsener ya ompugta ed kadederal”?

⁴ Imanoen pa so kompleton salita ya inusar nen Pablo: “Natan aliwa itayon nengneng ya onsener ya ompugta ed kadederal.” Anto so labay ton ibaga ed say “kadederal”? Say Griegon salita ya inusar to so ontukoy no maminsan ed andi-anggaan a kadederal. Ontukoy iyan impanguker ed konteksto. Oniay kapkapangipasakbay nen Pablo: “No mankasalanan itayo manlapu ed linawa dia ed kayari pangawat ed pakaamta na tua, anggapo la so pankaukolan tayo na bengatlan bagat nisengeg ed saray kasalanan, noag say sakey a makapataktakot a panalagar na kaukom, tan sakey a kasebegan na apoy a mangakmon naani ed saray kabusol.”​—Hebreos 10:26, 27.

⁵ Kanian sanen inkuan nen Pablo ed saray kapananisiaan to ya, “Aliwa itayon nengneng ya onsener ya ompugta ed kadederal,” say labay ton ibaga et sikato tan saray matoor a Kristianon mambabasa ed sulat to so determinado ya agbalot onkasipa ed si Jehova tan ag-ontundan manlingkor ed sikato. Mansumpal labat ed andi-anggaan a kadederal so panggawa’d satan. Sakey lan sinmener a nansumpal ed ontan a kadederal et si Judas Iscariote, a singa met say arum nin kakabusol na katuaan a sigagagalan sinmumpa ed espiritu nen Jehova. (Juan 17:12; 2 Tesalonica 2:3) Kabiangan iratan a totoo ed saramay “matakot” a makasagmak na andi-anggaan a kadederal diad simbolikon dayat na apoy. (Apocalipsis 21:8) Andi, agtayon balot labay so magmaliw ya ontan a nengneng na totoo!

6. Anton kurang so labay nen Satanas a Diablo a gawaen tayo?

⁶ Labay nen Satanas a Diablo ya onsener itayo ya ompugta ed kadederal. Bilang onsiano ed saray “masilib iran gawa,” amta ton mabetbet ya onggagapo ed melag iran paraan so ontan a makaderal a kurso. (Efeso 6:11, paimano’d leksab, NW) No agto adampot iray getma to diad panamegley na direktan panamasegsegang, panggunaetan ton pakapuyen so pananisia na saray tuan Kristiano diad panamegley na mas masilib iran paraan. Labay ton nanengneng ya ontunda iray makpel tan maseseg a Tastasi nen Jehova. Imanoen tayo no antoran taktika so inusar to ed saray Hebreon Kristiano a sinulat nen Pablo.

No Panon ya Adetdetan Iray Kristiano Pian Onsener

7. (a) Anto so awaran na kongregasyon diad Jerusalem? (b) Anto iray kipapasen ed espiritual na arum a mambabasa ed sulat nen Pablo?

⁷ Ipapabitar na ebidensia ya insulat nen Pablo so sulat to ed saray Hebreo nen ngalngali 61 K.P. Magulo so awaran na kongregasyon ed Jerusalem. Kayari impatey nen Jesus, binmasig so daluyon na maruksan panamasegsegang, ya inkabuybuyakan lay dakel a Kristiano a walad syudad. Anggaman ontan, niwala lanlamang so sakey a peryodo na kareenan, ya angiyabuloy ed indakel na saray Kristiano. (Gawa 8:4; 9:31) Diad inlabas na saray taon, sagpaminsan ya agawa so arum nin panamasegsegang tan kairapan. Ompatnag a sanen insulat nen Pablo so sulat to ed saray Hebreo, panggagayagaan lamet na kongregasyon so sakey a peryodo na relatibon kareenan. Siansia, wala niray pakakadetdetan. Ngalngali taloran dekada lay linmabas nanlapulad impasakbay nen Jesus so kaderal na Jerusalem. Nayarin inisip na arum ya ombayag ni so isabi na anggaan tan nayarin agni itan onsabi ed panaon na pambibilay da. Say arum, nagkalalo la ed saramay balobalo ni ed pananisia, so agni asubok ed pirmin panamasegsegang tan dagdaiset ni so amta ra nipaakar ed pankaukolan na panagsungdo no nasusubok. (Hebreos 12:4) Maseguron inanamot nen Satanas so ontan iran kipapasen. Anto so inusar ton “masilib iran gawa”?

8. Anto so awawey na dakel a Judio ed balobalo nin Kristianon kongregasyon?

⁸ Binusol na komunidad na Judio a walad Jerusalem tan Judea so balobalo nin Kristianon kongregasyon. No ibase ed lugan na sulat nen Pablo, makala tayo na pigaran ideya nipaakar ed panangantiaw na saray mapangayan relihyoson lider na Judio tan saray patumbok da diad saray Kristiano. Singano ibabaga ran: ‘Walay baleg a templo mi diad Jerusalem, ya akaalagey ed loob na dakel lan siglo! Walaan kami na matalonggaring ya atagey a saserdote a mangiimaton diman, a kaiba toray katangbayan ton saserdote. Inagew-agew a walaray niyaapay a bagat. Walaan kami na Ganggan, a nipasabi ed si Moises panamegley na saray anghel tan apaletan itan tekep na makapakelkelaw iran tanda diad Palandey Sinai. Sayan balobalo nin sekta, sarayan Kristiano, a nanapostata manlapud Judaismo so andian na sarayan bengatla!’ Inmepekto kasi itan a panagmelmelag? Mapatnag ya agonigon so arum a Hebreon Kristiano ed saratan ya impangataki. Akatulong ed sikara so sulat nen Pablo diad dugan panaon.

No Akin a Sikaray Agnepeg ya Onsener ya Ompugta ed Kadederal

9. (a) Anton tema so nidatdatak ed sulat a parad saray Hebreo? (b) Diad anton pantalos a nanlingkor iray Kristiano ed magmaong a templo nen samay walad Jerusalem?

⁹ Usisaen tayo so duaran rason ya inter nen Pablo ed saray agagi ton walad Judea nipaakar ed agbalot isener ya ompugta ed kadederal. Say pilimero​—say inkatalonggaring na sistemay panagdayew na saray Kristiano​—a nidatdatak ed sulat a parad saray Hebreo. Diad intiron sulat to, tinibukel nen Pablo iyan tema. Say templo ed Jerusalem so mangililitrato lambengat na mas babaleg ya inkapeteg, say espiritual a templo nen Jehova, sakey a paalagey ya “aliwan ginawa na saray lima.” (Hebreos 9:11) Saraman a Kristiano so walaan na pribilihyo a manserbi ed silong na satan ya espiritual ya uksoyan na puron panagdayew. Nanlingkor ira ed silong na magmaong a sipanan, say abayaglan insipan a balon sipanan, a walaan na Manamegley a matalonggaring nen si Moises, si Jesu-Kristo.​—Jeremias 31:31-34.

10, 11. (a) Akin a say kapolian nen Jesus so ag-aniskualipika ed sikaton manserbi bilang Atagey a Saserdote diad espiritual a templo? (b) Diad antoran dalan a si Jesus et mas matalonggaring ya Atagey a Saserdote nen samay manseserbi ed templo na Jerusalem?

¹⁰ Saraman a Kristiano so walaan met na mas magmaong ya Atagey a Saserdote, si Jesu-Kristo. Andi, sikato so agnanlapud kapolian nen Aaron. Imbes, sikato so Atagey a Saserdote a “nialig ed inkasaserdote nen Melquisedec.” (Salmo 110:4) Si Melquisedec, ya agnikurit so kapolian to, so ari tan atagey met a saserdote na kadaanan a Salem. Sikato sirin so matukoy a mapropetikon manangilitrato ed si Jesus, a say inkasaserdote to so akadependi, aliwan ed siopaman ya ag-ayadyarin inmuunan atateng, noagta diad mas matalonggaring​—say mismon panamalet nen Jehova a Dios. Singa si Melquisedec, aglambengat manlilingkor si Jesus bilang Atagey a Saserdote noagta sakey met ya Ari, ya agbalot ompatey.​—Hebreos 7:11-21.

¹¹ Niarum ni, aliwan singa say atagey a saserdote diad templo na Jerusalem, agla nakaukolan ed biang nen Jesus so tinaon a pangiyapay na saray bagat. Say bagat to et say mismon ayadyarin bilay to, ya aminpinsan lan inyapay to. (Hebreos 7:27) Amin na saramay bagat a niyapay ed templo so manangiyanino lambengat, a mangililitrato ed inyapay la nen Jesus. Say ayadyarin bagat to so angitarya na peteg a kaperdona na saray kasalanan na amin a mangaagamil na pananisia. Makapaligsay-puso met iray inkomento nen Pablo a mangipapanengneng a sayan Atagey a Saserdote so siansia nin si Jesus ya akabkabat nensaman na saray Kristiano ed Jerusalem. Sikato so mapaabeba, maong, tan makayarin “mangasi ed saray kakapuyan tayo.” (Hebreos 4:15; 13:8) Saramay alanaan a Kristiano so walaan na ilalon manserbi bilang katangbayan iran saserdote nen Kristo! Panon da nin naisip so onsener a mansumpal ed “say maletey tan duka” iran bengabengatla na mauges a Judaismo?​—Galacia 4:9, NW.

12, 13. (a) Anto so komaduan rason ya inter nen Pablo nipaakar ed agbalot isener? (b) Akin a say apalabas a rekord na impansungdo ra so mamaseseg ed saray Hebreon Kristiano ya agbalot onsener ya ompugta ed kadederal?

¹² Lapud ompatnag a singa aliwa nin magenap so ebidensia, inter nen Pablo ed saray Hebreo so komaduan rason nipaakar ed agbalot isener ya ompugta ed kadederal​—say mismon rekord na impansungdo ra. Oniay insulat to: “Mantultuloy yon nodnonoten iray agew ya inmuna, a kayari yon aliwawaan, sinungdoan yo so baleg a pipupuligesgesan ed silong na saray ir-irap.” Pinanonotan ira nen Pablo a sikara so “nipaparungtal a singa wala ed teatro” pian pabpabandayen tan pabpairapen. Arum so nipangaw; arum so akilikna tan anuporta ed saramay nipriso. On, impatnag da so napanalimbawaan a pananisia tan anos. (Hebreos 10:32-34, NW) Ingen, akin a kinerew nen Pablo ed sikara a “nodnonoten” da iratan a makapaot-ot ya eksperiensia? Agta makapadismaya itan?

¹³ Midumaan, say ‘pannodnonot ed inmuuna iran agew’ so mangipanonot ed saray Hebreo ed no panon iran inantabayan nen Jehova legan na kasusubok da. Diad tulong to, aresistian da so dakel iran panangataki nen Satanas. Insulat nen Pablo: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.” (Hebreos 6:10) On, ninodnonot nen Jehova so amin a matoor a gawa ra, ya inyatol to iratan diad anggapoy limitasyon a memorya to. Napanonotan itayo ed panamaseseg nen Jesus a mantipon na kaykayamanan ed tawen. Anggapoy matakew a makasikwat ed sarayan kayamanan; ag-iratan naderal na bokbok odino lati. (Mateo 6:19-21) Diad tua, naderal lambengat irayan kayamanan no onsener so sakey a Kristiano ya ompugta ed kadederal. Satan so mamerdi ed antokaman a kaykayamanan a tinipon to ed tawen. Agaylan mapuersan rason so inter nen Pablo ed saray Hebreon Kristiano pian agbalot gegemtanen so ontan a kurang! Akin a perdien da so amin na saray taon na matoor ya impanlingkor da? Manepeg tan mas magmaong so pantultuloy a mansungdo.

No Akin ya Ag-itayo Nepeg ya Onsener ya Ompugta ed Kadederal

14. Antoran angat so arapen tayo a mipadpara ed saramay inarap na saray inmunan-siglon Kristiano?

¹⁴ Walaan met na mabiskeg iran rason iray tuan Kristiano natan nipaakar ed ag-isener. Unona, nodnonoten tayo no anto so walan bendision tayo diad puron nengneng na panagdayew ya inter nen Jehova ed sikatayo. Singa say inmunan-siglon Kristiano, manbibilay itayo ed panaon a sikatayo so eelek-elekan tan mumudmoraen na saray membro na saray mas popular a relihyon, ya ilalastog da iray angkakabaleg a simbaan da tan say inkabayag la na saray tradisyon da. Balet, papaseguroan itayo nen Jehova ya aabobonan toy nengneng na panagdayew tayo. Diad tua, panggagayagaan tayoray bendision natan ya ag-agamoran nensaman na saray inmunan-siglon Kristiano. Nayarin panumamengan mo, ‘Panon a magmaliw ya ontan?’ Nonoten, nambilay ira sanen ginmapon kinmurang so espiritual a templo. Si Kristo so nagmaliw ya Atagey a Saserdote na satan nanlapud inkabautismo to nen 29 K.P. Arum ed sikara so akanengneng ed Anak na Dios bilang managgaway milagro. Anggan sanen kayari impatey to, wala niray dakel a milagro. Balet, unong a nipasakbay la, saratan a langkap so ontunda ed saginonor.​—1 Corinto 13:8.

15. Saray tuan Kristiano natan so manbibilay legan na kasumpalan na anton propesiya, tan anto so kabaliksan na satan ed sikatayo?

¹⁵ Anggaman ontan, manbibilay itayo legan na makatantandan kasumpalan na malaknab a propesiya nipaakar ed templo diad Ezequiel kapitulo 40-48.a Kanian, nanenengneng tayo so inyareglo na Dios nipaakar ed puron panagdayew. Satan ya espiritual a templo so alinisan la manlapud amin a nengneng na relihyoson inkabulok tan idolatriya. (Ezequiel 43:9; Malaquias 3:1-5) Nonoten pa iray agungguna tayo manlapud ontan a panaglinis.

16. Anton makapadismayan agawa so inarap na saray inmunan-siglon Kristiano?

¹⁶ Kaleganan na inmunan-siglo, say arapen so pinmatnag a mauddiem parad say naorganisan Kristianon kongregasyon. Impasakbay la nen Jesus a magmaliw itan a singano alog ya aganggano nin tinanemay trigo ya asibwagan na saray sisañas, ya aglawari nibiig so trigo ed sisañas. (Mateo 13:24-30) Tan ontan so agawa. Diad pansamposampot lay inmunan siglo, sanen onaakto ni so masiken lan apostol a si Juan bilang ultimon manangamper sumpad inkauges, kinmayat lay apostasya. (2 Tesalonica 2:6; 1 Juan 2:18) Agnambayag kayari impatey na saray apostol, linmesa so akabiig a kleron klase, a manlalames ed pulok tan akasulong na nikabkabiig a sotana. Kinmayat so apostasya a singa gangrena. Agaylan makapadismaya itan parad saray matoor a Kristiano! Apamintuan day intalona na abulok a klase na panagdayew ed kapkapangiletneg ya uksoyan nipaakar ed puron panagdayew. Anggapo ni sakey a siglo et agawa itan kayarin inletneg nen Kristo so kongregasyon.

17. Diad anton pantalos ya apalumbasan na modernon-agew a Kristianon kongregasyon so inmunan-siglon kongregasyon?

¹⁷ Konsideraen pa natan so pidumaan. Diad kaplesan, andukdukey so impakapansiansia la na puron panagdayew nen samay peryodon angangga ed impatey na saray apostol! Manlapula’d inkipalapag na inmunan paway na sayan dyurnal nen 1879, benendisionan itayo nen Jehova na lalon alinisan a panagdayew. Si Jehova tan si Kristo Jesus so linmoob la ed espiritual a templo nen 1918 tekep na gagalan linisan itan. (Malaquias 3:1-5) Manlapula’d 1919, progresibon nagogogolan so uksoyan nipaakar ed panagdayew ed si Jehova a Dios. Onlilinew so pakatalos tayo ed saray propesiya tan prinsipyo na Biblia. (Uliran 4:18) Siopay nepeg a pagalangan lapud saya? Aliwan saray ag-ayadyarin totoo. Si Jehova lambengat, kaiba so Anak to bilang Ulo na kongregasyon, so makasalimbeng ed totoo To manlapud inkauges legan na sarayan mauges a panaon. Agtayo sirin onsasaew a misalamat ed si Jehova diad impangiyabuloy to ed sikatayon makapibiang ed puron panagdayew natan. Tan determinado itayo komon a maong ya ag-onsener ya ompugta ed kadederal!

18. Anton so walan rason tayo ed agbalot isener ya ompugta ed kadederal?

¹⁸ Singa saramay Hebreon Kristiano, walaan itayo met na komaduan rason pian ipulisay so payakot tan pasener a kurang​—say mismon rekord na impansungdo tayo. Balanglan ginmapo itayon nanlingkor ed si Jehova ed agano niran taon odino matoor itayon manlilingkor ed loob la na dakel a dekada, akagawa tayo lay rekord na saray kimey bilang Kristiano. Dakel la’d sikatayo so apasegsegang, inkipangaw man itan, pananebel, panagduksa, odino inkabalangay kaykayarian. Dakel ni so nidudunget ed isusumpa na pamilya, panagbalaw, panagludlurey, tan agpananginenen. Amin tayo so akapansungdo la, a mantutultuloy itayo ed matoor a panaglingkor tayo ed si Jehova anggaman ed saray angat tan subok ed bilay. Akagawa tayo lay rekord na impananos ya agnalingwanan nen Jehova, sakey a kamalir na kaykayamanan ed tawen. Segurado sirin ya aliwa la iyan panaon pian onsener ed abulok a daan a sisteman intalirak tayo la! Akin a perdien tayo so amin a nambunekan tayo? Nagkalalo lan tua iya natan, a “sankatikeyan [labat] a panaon” so natitilak sakbay na panganggaan.​—Hebreos 10:37.

19. Anto so singbaten ed ontumbok ya artikulo?

¹⁹ On, komon ta determinado itayo ya “aliwa itayon nengneng ya onsener ya ompugta ed kadederal”! Imbes, komon ta magmaliw itayon “nengneng a walaan na pananisia.” (Hebreos 10:39, NW) Panon tayon naseguro a mitukoyan itayo ed satan a deskripsion, tan panon tayon natulongan iray kaparan Kristiano pian ontan met so gawaen da? Sayan pamaakaran so konsideraen ed ontumbok ya artikulo.

Magmaliw Itayo Komon a Nengneng a Walaan na Pananisia

“Sikatayo so . . . nengneng a walaan na pananisia para ed kilabanan a mabilay na kamarerwa.”​—HEBREOS 10:39.

1. Akin a nibagan say pananisia na kada matoor a lingkor nen Jehova et mabmabli?

DIAD ontumbok a piaral mo’d Kingdom Hall a napnoy mandadayew ed si Jehova, imanoen mo iray wadman a kaibam. Nonot mo so nanduruman dalan ya impangipatnag day pananisia ra. Nayarin naimanom iray maedad la a manlilingkor ed Dios ed loob na dakel lan dekada, saray tobonbalo ya inagew-agew a mibabarangkaan ed pananesdes na saray kalimog, tan atateng a mankikimey a maong pian napabaleg daray ananak da a walaay takot ed Dios. Wadtan met iray mamatatken tan ministeryal a lingkor ed kongregasyon, a manasakbat na dakel a responsabilidad. On, nanengneng mo so maespiritual ya agagin nanduruma so edad da, a manatalona ed amin a nengneng a babeng pian makapanlingkor ira ed si Jehova. Agaylan kamabli so pananisia na balang sakey!​—1 Pedro 1:7.

2. Akin a makagungguna ed sikatayo natan so simbawa nen Pablo a walad Hebreos kapitulo 10 tan 11?

² No wala man bilang, pigpigaran ag-ayadyarin totoo so nagkalalo nin makatalos ed kaimportantian na pananisia nen say si apostol Pablo. Diad tua, impaimano ton say puron pananisia so mangitonton ed “kilabanan a mabilay na kamarerwa.” (Hebreos 10:39) Balet, amta nen Pablo a nidudunget so ontan a pananisia ed panangataki tan panamakapuy diad sayan mundon andiay pananisia. Sikato so mapagan tuloy nipaakar ed saray Hebreon Kristiano diad Jerusalem tan Judea, a mipupuligesgesan pian napansiansia ray pananisia ra. Diad panimano tayo ed saray kabiangan na Hebreos kapitulo 10 tan 11, imanoen tayo iray metodo ya inusar nen Pablo pian pabiskegen to so pananisia ra. Diad pantultuloy, nanengneng tayo no panon tayon napabiskeg a nagkalalo so mismon pananisia tayo tan ed saramay kalimog tayo.

Ibalikas so Panagmatalek ed Sakey tan Sakey

3. Panon ya impanengneng na saray salita nen Pablo a naromog diad Hebreos 10:39 a sikatoy walaan na panagmatalek ed saray agagi to ed pananisia?

³ Say pilimero a nayarin naimano tayo et say positibon awawey nen Pablo ed saray pangibabagaan to. Oniay insulat to: “Natan aliwa itayon nengneng ya onsener ya ompugta ed kadederal, noagta say nengneng a walaan na pananisia parad kilabanan a mabilay na kamarerwa.” (Hebreos 10:39, NW) Ninonot nen Pablo so sankaabigan, aliwan say sankaugsan, na saray matoor a kapara ton Kristiano. Imanoen met so impangusar to ed balikas ya “itayo.” Si Pablo et sakey a matunong a too. Ingen, agto minelmelag iray pangibabagaan to, a singano sikato et walad atagtagey a pasen na inkatunong ya arawrawi’d sikara. (Ikompara so Eclesiastes 7:16.) Imbes, impibali toy inkasikato ed sikara. Imbalikas to so masimoon a panagmatalek a sikato tan say matoor iran Kristiano a mambabasa ed sulat to so mangarap ed ompapalalo iran makapadismayan babeng, a makpel iran ag-onsener a mansumpal ed kadederal, tan diad ontan et napaneknekan da a kabiangan ira ed nengneng a walaan na pananisia.

4. Parad antoran rason so inkawalaan na panagmatalek nen Pablo ed saray kapananisiaan to?

⁴ Panon a niwala ed si Pablo so ontan a panagmatalek? Kasin agto lilimenen iray pakakaluksoan na saray Hebreon Kristiano? Diad pisunian, inikdan to ira na espisipikon simbawa pian natulongan iran makatalona ed saray kakulangan da ed espiritual. (Hebreos 3:12; 5:12-14; 6:4-6; 10:26, 27; 12:5) Siansia, anggan panon et walaan si Pablo na duaran maabig a rason diad panmamatalek to ed agagi to. (1) Bilang umaalig ed si Jehova, nanggunaetan nen Pablo a moriaen so totoo na Dios a singa ed panmoria nen Jehova ed sikara. Aliwa lambengat itan a nipaakar ed saray kakapuyan da noagta ontan met ed maong iran kualidad da tan say posibilidad a pilien da so panggaway maong ed arapen. (Salmo 130:3; Efeso 5:1) (2) Si Pablo so walaan na sigpot a pananisia ed pakayari na masanton espiritu. Amta ton anggapo iray makababeng, anggapo iray kakabosan na too, a makaamper ed panginanabang nen Jehova ed “sankatageyan ya inkabaleg na pakayari” ed siopaman a Kristiano a manggugunaet a manlingkor ed Sikato a sitotoor. (2 Corinto 4:7; Filipos 4:13) Kanian say panagmatalek nen Pablo ed agagi to et duga so angipaarapan to, realistiko, odino maseguro so iilaloan to. Satan so malet a nibase tan niletneg ed Kasulatan.

5. Panon tayon naalig so panagmatalek nen Pablo, tan anto so nayarin resulta?

⁵ Maseguron makaimpluensia so panagmatalek ya impatnag nen Pablo. Talagan baleg so epekto na makapaseseg a tuloy iran salita nen Pablo ed saray kongregasyon diad Jerusalem tan Judea. Diad arap na makaderal a panagbalaw tan mapangtan agpananginenen na saray Judion onsusumpa ed sikara, akatulong iratan a balikas ed saray Hebreon Kristiano pian magmaliw iran determinado ed kapusoan da bilang kaiba na saramay walaan na pananisia. Nagawaan tayo met kasi itan ed balang sakey natan? Magmainomay a say naimano lambengat ed arum et say dakerakel a kalilingoan tan duma iran personalidad da. (Mateo 7:1-5) Ingen, mas lalon makapantutulongan itayo no say imanoen tayo tan pablien tayo et say nikadkaduman pananisia na balang sakey. Tekep na ontan a panamaseseg, maseguron ombulaslas so pananisia.​—Roma 1:11, 12.

Matukoy a Panangusar ed Salitay Dios

6. Iner so angaonan nen Pablo sanen insulat toray salitan nikurit ed Hebreos 10:38?

⁶ Pinabiskeg met nen Pablo so pananisia na saray kapananisiaan to diad marundunong ya impangusar to’d Kasulatan. Alimbawa, oniay insulat to: “Ingen say matunong ko manbilay naani lapu ed pananisia: Et no wala naani onsener, ag-onliket so kamarerwak ed sikato.” (Hebreos 10:38) Inaon dia nen Pablo so inkuan nen propetan Habacuc.a Sarayan salita so maseguron kabisado na saray mambabasa ed sulat nen Pablo, saray Hebreon Kristiano a mikabisadon maong ed saray mapropetikon libro. No konsideraen so kalat to, salanti, pian pabiskegen so pananisia na saray Kristiano a walad loob tan kabangibang na Jerusalem diad intiron taon na 61 K.P., say alimbawa nen Habacuc so matukotukoy ya apili. Akin?

7. Kapigan so impangikurit nen Habacuc ed propesiya to, tan antoray walan kipapasen diad Juda ed saman a panaon?

⁷ Mabitar ya insulat nen Habacuc so libro to sanen masudsulok ni labat na duaran dekada sakbay na inkaderal na Jerusalem nen 607 K.K.P. Diad pasingawey, anengneng na propeta iray Caldeo (odino, taga-Babilonia), sakey ya “ampait tan masiglat a nasyon,” a maples ya amaarap ed Juda tan aneral ed Jerusalem, a nantutumbokan ya anakop ed saray totoo tan nasyon. (Habacuc 1:5-11) Balet ta nipasakbay la itan a kalamidad nanlapula’d nen panaon nen Isaias, masulok a sakey siglo ed akadkauna. Diad panaon nen Habacuc, si Joacim so sinmalat ed maong ya Arin Josias, kanian pinmalalo lamet so karelmengan diad Juda. Pinasegsegang tan impapatey ni ingen nen Joacim iramay mansasalita ed ngaran nen Jehova. (2 Awaran 36:5; Jeremias 22:17; 26:20-24) Agpankelawan sirin no akin a kinmelyaw so nagogonigon a propetan si Habacuc: “Jehova, panon [nin] kabayag?”​—Habacuc 1:2.

8. Akin a makatulong so alimbawa nen Habacuc ed saray Kristiano nen inmunan-siglo tan natan?

⁸ Ag-amta nen Habacuc no panon lay kinaasingger na kadederal na Jerusalem nensaman. Mipadpara, agmet amta na inmunan-siglon Kristianos no kapigan so pangangga na Judion sistema na bengabengatla. Nisay amta tayo natan so “agew tan oras” no kapigan so isabi na panangukom nen Jehova ed sayan marelmeng a sistema. (Mateo 24:36) Imanoen tayo sirin so nankaduan ebat nen Jehova ed si Habacuc. Unona, pinaseguroan to so propeta ya onsabi so anggaan ed dugan panaon. “Agmanbayag,” so kuan na Dios, anggaman diad punto de bista na too et singano naibayanbayan la. (Habacuc 2:3) Komadua, oniay impanonot nen Jehova ed si Habacuc: “Say matunong manbilay naani a lapu ed pananisia to.” (Habacuc 2:4) Agaylan abig tan simpli iran katuaan! Say sankaimportantian et, aliwan say no kapigan so isabi na anggaan, noagta no kasin mantultuloy itayon manbilay a walaan na pananisia.

9. Panon a nantultuloy a nambilay iray matulok a lingkor nen Jehova lapud impanmatoor da (a) nen 607 K.K.P.? (b) kayari 66 K.P.? (c) Akin ya importantin pabiskegen tayoy pananisia tayo?

⁹ Sanen asamsam so Jerusalem nen 607 K.K.P., si Jeremias, say sekretaryo ton si Baruc, Ebed-melec, tan saray matoor a Recabita so akanengneng ed katuaan na insipan nen Jehova ed si Habacuc. Sikaray ‘nansiansian nambilay’ diad inkiliktar da ed makapasinagem ya inkaderal na Jerusalem. Akin? Tinumangan nen Jehova so inkamatoor da. (Jeremias 35:1-19; 39:15-18; 43:4-7; 45:1-5) Mipadpara, maabig so inkiwas na saray inmunan-siglon Hebreon Kristiano ed simbawa nen Pablo, lapud sanen nilusob na Romanon armada so Jerusalem nen 66 K.P. insan ira inmatras ya ag-amtay rason, matoor a tinalineng na saraman a Kristiano so pasakbay nen Jesus ya ontaynan ira. (Lucas 21:20, 21) Nantultuloy iran nambilay lapu ed inkamatoor da. Ontan met, makapantultuloy itayon manbilay no napaneknekan a nanmatoor itayo sano onsabi so anggaan. Agaylan importantin rason so pamabiskeg ed pananisia tayo natan!

Malinew a Panangideskribe ed Saray Ehemplo na Pananisia

10. Panon so impaneskribe nen Pablo ed pananisia nen Moises, tan panon tayon naalig si Moises ed sayan pamaakaran?

¹⁰ Amabiskeg met si Pablo nipaakar ed pananisia diad panamegley na mapuersan impangusar to ed saray ehemplo. Diad pambasa yo ed Hebreos kapitulo 11, imanoen no panon so malinew ya impangideskribe to ed saray ehemplo na saray karakter ed Biblia. Singa bilang, inkuanto a si Moises so “nansiansia a singa to nengnengnengen so agnanengneng.” (Hebreos 11:27) Diad arum a panangibaga, talagan tudtua si Jehova parad si Moises, a singano nanenengneng to so Dios ya agnanengneng. Ontan met kasi so nibaga nipaakar ed sikatayo? Mainomay a pantongtongan so nipaakar ed relasyon ed si Jehova, balet ta say pamawala tan pamabiskeg ed satan a relasyon so mankakaukolan na gawa. Satan so gawan nakaukolan tayon pankimeyan! Kasin tudtua si Jehova ed sikatayo a sikatoy nononoten tayo kapagno mandesisyon itayo, kalaktip laray ompatnag ya angkelag a dedesisyonan? Say ontan a nengneng na pananisia so ontulong ed sikatayo pian makapansungdo anggan dia ed sankagrabian ya isusumpa.

11, 12. (a) Diad antoran kipapasen so inkasubokan na pananisia nen Enoc? (b) Anton makapaseseg a tumang so agamoran nen Enoc?

¹¹ Konsideraen met so pananisia nen Enoc. Say isusumpan inkidungetan to so mairap tayon naisip. Nakaukolan ya ipasabi nen Enoc so makapaot-ot a mensahe na panangukom sumpa ed marelmeng a totoon nambilay nensaman. (Judas 14, 15) Say panamasegsegang a manesesga ed sayan matoor a too so mapatnag a mauge-uges, tan maramramsak, kanian sikatoy ‘inyalis’ nen Jehova, manlapud mabilay a kipapasen angga ed inyugip to la ed patey sakbay a sikatoy nadisgo na kakabusol to. Kanian ag-anengneng nen Enoc so kasumpalan na propesiyan inyabawag to. Balet, sikatoy akaawat na langkap a, diad pigaran aspekto et magmaong ni ingen.​—Hebreos 11:5; Genesis 5:22-24.

¹² Oniay impaliwawa nen Pablo: “Sakbay na inkiyalis to [si Enoc] et sikatoy awalaan na paneknek ya apaliket ton maong so Dios.” (Hebreos 11:5, NW) Antoy kabaliksan na saya? Sakbay a naugip ed patey si Enoc, nayarin sikatoy awalaan na sakey a nengneng na pasingawey, nayarin sakey a nipaakar ed mangaraldalin a Paraiso a kiolian to ed arapen. Antokaman so agawa, impaamta nen Jehova ed si Enoc a Sikatoy apaliket a maong ed impanmatoor to. Apaliket nen Enoc so puso nen Jehova. (Ikompara so Uliran 27:11.) Agta makapatenyeg so pannodnonot ed bilay nen Enoc? Labay mo ta so manbilay a walaan na ontan a pananisia? Morekdeken mo sirin so ontan iran ehemplo; a moriaen ira bilang peteg a totoo. Magmaliw a determinadon manbilay unong ed pananisia, diad inagew-agew. Nodnonoten met a saramay walaan na pananisia et agmanlilingkor ed si Jehova a nibase labat ed petsa odino inggeter a panaon no kapigan so panumpal na Dios ed amin ya insipan to. Imbes, determinado itayon manlingkor ed si Jehova ed ando lan ando! Say panggawa’d satan et mankabaliksan na sankaabigan a tuloy a dalan na bilay ed sayan sistema na bengabengatla tan diad ontumbok.

No Panon so Lalon Ibiskeg ed Pananisia

13, 14. (a) Panon a makatulong ed sikatayo iray salita nen Pablo a nikurit ed Hebreos 10:24, 25 pian magmaliw a makapaliket iray miting tayo? (b) Anto so manunaan a rason parad saray Kristianon miting?

¹³ Impaimano nen Pablo ed saray Hebreon Kristiano so pigaran praktikal a paraan pian napabiskeg day pananisia ra. Konsideraen tayo lambengat so duara ed saratan. Maseguron kabisado tayo so simbawa to a walad Hebreos 10:24, 25, a papasesegen to itayon maparanay a mandaragup diad Kristiano iran miting tayo. Balet, tandaan a sarayan apuyanan a salita nen Pablo so agmankabaliksan a sikatayo et akamogakgak lambengat legan na saratan a miting. Imbes, deneskribe nen Pablo a saray miting et pankanawnawa pian makapankakabat ed balang sakey, makapanpapabiskegan pian lalon makapanlingkor a maong ed Dios, tan makapanpapasesegan ed sakey tan sakey. Wadtan itayo pian mangiter, aliwan basta mangawat labat. Satan so makatulong pian magmaliw a makapaliket iray miting tayo.​—Gawa 20:35.

¹⁴ Manunaan balet, onaatendi itayo ed Kristiano iran miting pian mandayew ed si Jehova a Dios. Nagawaan tayo itan diad pibiang ed pikakasi tan panagkanta, diad mapetepet ya italineng, tan diad pangiyapay tayoy “bunga na bibil”​—balbalikas na panangidayew ed si Jehova panamegley na saray komento tayo tan ed saray parti tayo diad miting. (Hebreos 13:15) No sinononot itayo ed saratan a kalat tan gawaen tayo iratan kada aral, seguradon ombiskeg so pananisia tayo diad kada piaral tayo.

15. Akin a pinaseseg nen Pablo iray Hebreon Kristiano a mansiansia ed ministeryo ra, tan akin a matukoy itan a simbawa natan?

¹⁵ Say sakey nin paraan pian napabiskeg so pananisia tayo et diad panamegley na panagpulong. Insulat nen Pablo: “Mansiansia itayo komon a malet tan agnagiing ed panangiparungtal na ilalo tayo; ta matoor iman so angisipan.” (Hebreos 10:23) Nayarin napaseseg yo so arum a mantultuloy ed sakey a bengatla sano ompatnag a dawitdawit laran ontunda. Maseguron dinesdes nen Satanas iramay Hebreon Kristiano pian ontunda ira ed ministeryo ra, tan dedesdesen to met natan iray totoo na Dios. Diad arap na saratan a pakadetdetan, antoy nepeg tayon gawaen? Konsideraen pa so ginawa nen Pablo.

16, 17. (a) Panon ya akapanpakpel si Pablo diad ministeryo? (b) Antoran kundang so gawaen tayo no talawan itayo ed arum ya aspekto na Kristianon ministeryo tayo?

¹⁶ Oniay insulat nen Pablo ed saray Kristiano diad Tesalonica: “Bangta nantepel kami nensaman, tan makapabaing so impakapairap mi ed Filipos, unong na kabat yo, apabayani [“akapanpakpel,” NW) kami ed Dios tayo a mangisalita ed sikayo na ebanghelyo na Dios ed dakel a sumpaan.” (1 Tesalonica 2:2) Panon so ‘makapabaing ya impakapairap’ di Pablo tan saray kaiba to diad Filipos? Unong ed pigaran iskolar, say Griegon salita ya inusar dia nen Pablo et mangipapabitar na makapainsulto, makapabaing, odino maruksan panagmaltrato. Sikara so pinepekpek na saray manuley diad Filipos, impapangaw da ira, tan imbabartolina dara. (Gawa 16:16-24) Panon a naapektaan si Pablo ed satan a makapaot-ot ya eksperiensia? Kasin aromog na saramay walad Tesalonica, say ontumbok a syudad a pambaroyan nen Pablo a sikatoy pinmayakot la? Andi, sikatoy “akapanpakpel.” Atalonaan to so takot tan sikatoy makpel a nantultuloy ed panagpulong.

¹⁷ Iner so nanlapuan na pakpel nen Pablo? Diad inkasikaton dili? Andi, imbaga ton sikatoy akapanpakpel ‘diad panamegley na Dios tayo.’ Oniay kuan na sakey a reperensia na saray managpatalos na Biblia a sayan balikas so nayarin impatalos ya “inekal na Dios so takot ed kapusoan tayo.” Kanian no nalikas mon talawan ka nipaakar ed ministeryom, odino ontatalaw ka ed arum ya aspekto na ministeryo, akin ya agkerewen ed si Jehova ya ontan met komon so gawaen to ed sika? Ikerew mo ed sikato ya ekalen to so takot ed pusom. Ikerew mo ed sikato a tulongan to kan makapanpakpel ed kimey. Niarum ni, gawaen so pigara nin praktikal a kundang. Alimbawa, mikimey ka ed sakey a maabilidar ed klase na panagpulong a pampapagaan mo. Nayarin saglawien na satan so panagnegosyoan, panagpulong diad karsada, impormal a panagpulong, odino panagpulong ed telepono. Nayarin mabulos so kaibam a mansalita nin unona. No ontan, obserbaan mo tan manaral ka. Insan manpakpel ka balet ta pian nasalim.

18. Antoran bendision so naeksperiensia tayo no makapanpakpel itayo ed ministeryo tayo?

¹⁸ No makapanpakpel ka, isipen mo no anto so nayarin resulta. No mantultuloy ka tan agmo abuloyan a nadismaya ka, maseguron nawalaan kay marakep iran eksperiensia diad panginanabang mo na katuaan, eksperiensian nayarin nasaew mo no agka manpakpel. (Imanoen so pahina 25.) Nagamoran moy inkapnek diad pakaamtan napapaliket mo si Jehova lapud gagawaen mo so bengatlan mairap parad sika. Naeksperiensiam so panamendision to tan tulong to diad pakatalonam ed takot mo. Lalon ombiskeg so pananisiam. On, agmo napabiskeg so pananisia na arum no agmo ni pabiskegen so mismon pananisiam.​—Judas 20, 21.

19. Anton mablin tumang so manatalaran ed saramay ‘walaan na pananisia’?

¹⁹ Itultuloy mo komon a pabiskegen so pananisiam tan say pananisia na saramay kalimog mo. Nagawaan mo itan diad pamabiskeg mo ed inkasika tan ed arum diad panamegley na marunong a panangusar ed Salitay Dios, diad panaral ed saray ehemplo na pananisia a walad Biblia tan malinew a panangideskribe ed saratan, diad pamparaan tan pibiang ed saray Kristianon miting, tan diad pantultuloy ed mablin pribilihyo na mapublikon ministeryo. Legan mon gagawaen iraya, petepeteg a makapanseguro ka, sika so “nengneng a walaan na pananisia.” Tandaan met, a saramay kabiangan ed saray walaan na pananisia so walaan na mablin tumang. Sikara so kabiangan ed “nengneng a walaan na pananisia a kilabanan a mabilay na kamarerwa.”b Komon ta mantultuloy ya ombulaslas so pananisiam, tan pansiansiaen komon nen Jehova a Dios so bilay mo diad ando lan ando!

[Saray paimano ed leksab]