Say Mangiiter na Tumang ed Saramay Masimoon a Manaanap ed Sikato

Kasin papablien nen Jehova so gagawaen na saray mandadayew ed sikato pian napaliket da? Ompan ibaga na arum ya andi, ta parad sikara et ag-interesado so Dios ed sikatayo. Balet sakey itan ya katilaan nipaakar ed Dios. Ibabaga na Salita to, say Biblia, no antoy tua. Ipapaseguro na satan ed sikatayo ya papablien nen Jehova iray sagpot na saray matoor ya mandadayew ed sikato. Imanoen pay imbaga nen apostol Pablo diad Hebreos 11:6.

Panon tayon napaliket si Jehova? Oniay insulat nen Pablo: “No anggapoy pananisia et agbalot napaliket so Dios.” Imanoen ya ag-imbaga nen Pablo ya mairap a napaliket so Dios no anggapoy pananisia. Imbes, say imbaga to et agbalot nagawaan itan. Labay ton ibaga, importante so pananisia pian napaliket so Dios.

Anton klase na pananisia so mamaliket ed si Jehova? Say pananisia tayod Dios et walaan na duaran aspekto. Unona, nepeg tayon “manisia a sikatoy wala.” Diad arum iran patalos et “manisia ya sikatoy tua” tan “manisia ya walay Dios.” Ta panon tayon napaliket so Dios no agtayo seguradon sikatoy wala? Balet mas ni so nalalanor ed tuan pananisia, ta anggan saray demonyo et manisia ya wala si Jehova. (Santiago 2:19) No talagan tudtua ed sikatayo so Dios, napakiwas tayon paneknekan itan a pananisia tayo diad pambilay ed paraan ya makapaliket ed sikato.​—Santiago 2:20, 26.

Komadua, “nepeg a manisia” tayon say Dios et mangiiter na tumang. Say toon walaan na tuan pananisia et talagan kombinsidon say pansasagpot ton manbilay diad paraan ya makapaliket ed Dios et aliwan andi-kakanaan. (1 Corinto 15:58) Panon tayon napaliket si Jehova no agtayo kombinsido ya sarag to odino labay to itayon tumangan? (Santiago 1:17; 1 Pedro 5:7) Say toon maniisip ya say Dios et anggapoy pibabali to, agmaapresya, tan masiblet et agto kabat so Dios ya ibabaga na Biblia.

Siopa ray tutumangan nen Jehova? Saramay “masimoon a manaanap ed sikato,” so kuan nen Pablo. Sakey a reperensya na saray managpatalos na Biblia so angibagan say Griegon salita ya nipatalos a “masimoon a manaanap” et agto labay ya ibagan “onlan mananap,” noagta ipapanengneng na satan so pansagpot “diad pandayew” ed Dios. Ipapaliwawa na arum nin reperensya ya satan a Griegon salita et mangipapatnag na pampokus tan impasyan pansagpot. On, tutumangan nen Jehova iramay napapakiwas na pananisia ra pian sikatoy interon puso tan maseseg dan dayewen.​—Mateo 22:37.

Panon ya tutumangan nen Jehova iray matoor ya mandadayew ed sikato? Walay impromisa ton mabmablin tumang ed arapen ya mangipapanengneng ed inkamaiter tan panangaro to​—say bilay ya andi-angga ed Paraiso diad dalin. (Apocalipsis 21:3, 4) Natan ni labat et nai-eksperiensya la na saramay masimoon a manaanap ed si Jehova iray dakerakel a bendisyon. Diad tulong na masanton espiritu to tan say karunongan ya walad Salita to, walaan ira na maliket a bilay.​—Salmo 144:15; Mateo 5:3.

Talagan maapresyan Dios si Jehova tan papablien toy matoor ya panseserbi na saray mandadayew ed sikato. Agta lapud satan et napakiwas kan lalon onapit ed sikato? No ontan sirin, maabig no aral mo nin maong no panon mon napabiskeg tan nipanengneng so klase na pananisia ya tumangan nen Jehova. ▪