Kasin Aalagaren Mo so “Syudad a Walaan na Saray Tuan Pundasyon”?

1. Anto ray isasakripisyo na dakel ya lingkor nen Jehova, tan akin et gagawaen da itan?

MINILYON ed saray lingkor na Dios natan so mansasakripisyo. Singa bilang, dakel ya agagi tayo so nansiansian single. Wala ray sanasawa ya nandesisyon iran agni ra mananak. Wala ray pamilya ya pansiasiansiaen dan simpli so panagbilay da. Saksakey so rason no akin ya ontan so desisyon da​—labay dan dakel so nagawaan da ed panlilingkor da ed si Jehova. Kontento ra tan manmamatalek ira ya iter nen Jehova so amin ya kaukolan da. Kasin pagbabawian da lanlamang so pansasakripisyo ra? Andi! Akin et segurado tayo? On ta manlapu la nensaman et intarya nen Jehova so pankaukolan na saray lingkor to ya singa ginawa tod si Abraham, say “ama na amin a walaan na pananisia.”​—Roma 4:11.

2. (a) Base ed Hebreo 11:8-10, 16, akin et aliwan mairap ed linawa nen Abraham ya taynan so Ur? (b) Antoy pantongtongan tayo ed sayan artikulo?

² Aliwan mairap ed linawa nen Abraham ya taynan so mainawan bilay to diad syudad na Ur. Akin? Lapud aalagaren to so “syudad a walaan na saray tuan pundasyon.” (Basaen so Hebreo 11:8-10, 16.) Anto itan ya “syudad”? Anto ran subok so dinalan nen Abraham legan ton aalagaren ya nipaalagey itan ya syudad? Tan panon tayon naalig si Abraham, pati saray agagi tayo natan ya angalig ed sikato?

ANTO SO “SYUDAD A WALAAN NA SARAY TUAN PUNDASYON”?

3. Anto so syudad ya aalagaren nen Abraham?

³ Say syudad ya aalagaren nen Abraham et say Panarian na Dios. Si Jesu-Kristo so Ari ed satan ya Panarian tan kaiba ton manuley so 144,000 ya alanaan iran Kristiano. Binitla nen Pablo ya satan a Panarian et “say syudad na mabilay a Dios, salanti say Jerusalem ed tawen.” (Heb. 12:22; Apo. 5:8-10; 14:1) Imbangat nen Jesus iray disipulo to ya ipikasi dan onsabi la komon itan ya Panarian pian nagawa so linawa na Dios diad dalin no panon ya agawa la itan ed tawen.​—Mat. 6:10.

4. Base ed Genesis 17:1, 2, 6, antoy amta nen Abraham nipaakar ed syudad odino Panarian ya insipan na Dios?

⁴ Kasin amta nen Abraham so amin ya detalye no panon ya nipaalagey so Panarian na Dios? Andi. Nilibon taon ya “sagradon sekreto” itan. (Efe. 1:8-10; Col. 1:26, 27) Balet amta nen Abraham ya wala ray ilalak ton magmaliw ya ari. Insipan ya mismo nen Jehova itan ed sikato. (Basaen so Genesis 17:1, 2, 6.) Mabisbiskeg so pananisia nen Abraham ed saray sipan na Dios ya singano anengneng to la imay Sakey a Nilanaan, odino say Mesias, a magmaliw ya Ari ed Panarian na Dios. Kanian oniay imbaga nen Jesus ed saray Judio: “Nanliketan a maong na ama yon si Abraham so ilalon makanengneng ed agew ko, tan anengneng to itan tan nanliket.” (Juan 8:56) Amta sirin nen Abraham ya saray ilalak to et magmaliw ya kabiangan na Panarian ya iletneg nen Jehova, tan maliket ton inalagar so pakasumpal na satan ya sipan.

5. Panon tayon amta ya aalagaren nen Abraham so syudad ya denesinyo na Dios?

⁵ Panon ya impanengneng nen Abraham ya aalagaren to so syudad odino Panarian ya denesinyo na Dios? Unona, agbalot nagmaliw ya kabiangan si Abraham na anggan anton panarian diad dalin. Mas pinili to so manalis-alis nen say manpirmi ed sakey ya lugar tan suportaan so sakey ya ari. Sakey ni, ag-angipaalagey si Abraham na sarili ton panarian. Imbes, diad interon bilay to et inunor to si Jehova tan inalagar toy pakasumpal na sipan To. Diad satan et impanengneng nen Abraham ya mabisbiskeg so pananisia to ed si Jehova. Aralen tayo natan so pigara ed saray subok ya dinalan to tan no antoy naaralan tayo ed sikato.

ANTO RAN SUBOK SO DINALAN NEN ABRAHAM?

6. Anton klase na syudad so Ur?

⁶ Say syudad ya tinaynan nen Abraham et maligen tan komportable so panagbilay. Edukado tan mayaman iray totoo. Apaliberan itan na atataragey ya padir tan aralem ya banawang kanian agbastabasta nalooban na kalaban. Saray totoo ed Ur et marundunong iran mansulat tan mankuenta. Say syudad et sentro na negosyo ta dakdakel so nalmo ditan ya dokumento na saray transaksion ed negosyo. Saray abung et gawad laryo, apalitadaan, tan apintoraan na amputi. Walaan iratan na 13 odino 14 ya kuarto tan balibali iray sular da.

7. Akin ya kaukolan nen Abraham so manmatalek ya sikatoy protektaan nen Jehova pati say pamilya to?

⁷ Kaukolan nen Abraham so manmatalek ya sikatoy protektaan nen Jehova pati say pamilya to. Akin? On ta nen tinaynan nen Abraham tan Sara so maligen tan komportablen abung da diad syudad na Ur, say nanayaman to la et diad saray tolda ed kaumaan na Canaan. Anggapo lay padir tan banawang ya manprotekta ed pamilya to, kanian matmainomay la ran lusoben na kalaban.

8. Anto ran problema so inarap nen Abraham?

⁸ Inunor nen Abraham so Dios, balet asali toy aprobleman maong no iner so pangalaan toy naakan na pamilya to. Walay panaon ya grabe so eras ed Canaan kanian nandesisyon si Abraham ya onalis a magano ed Ehipto kaiba so pamilya to. Balet kasabi da ed Ehipto et inala na Faraon so asawa to. Isipen pa so impanaburidon maong nen Abraham. Dinmeen labat so nonot to nen ingganggan la nen Jehova so Faraon ya ipawil si Sara.​—Gen. 12:10-19.

9. Anto ray problema nen Abraham ed pamilya to?

⁹ Baleg met so problema nen Abraham ed pamilya to. Say inar-aro ton asawa ya si Sara et agmakaanak. Pigapigaran dekada iran nanalagar pero anggapon talaga, kanian agaylay ermen da. Lapud satan et inter nen Sara so lingkor ton si Hagar ed si Abraham pian nawalaan iray anak. Balet nen ilulukon la nen Hagar si Ismael, agto la nirespetoy Sara. Asakisakitan si Sara kanian pinalayas toy Hagar.​—Gen. 16:1-6.

10. Akin ya asubok so panagmatalek nen Abraham ed si Jehova?

¹⁰ Kalabas na dakel a taon, nanlukon ya siansia si Sara kanian awalaan na anak ed si Abraham ya inngaran day Isaac. Inar-aro nen Abraham si Ismael tan Isaac. Balet lanang ya iinsultoen nen Ismael si Isaac, kanian apilitan si Abraham ya pataynanen si Ismael tan Hagar. (Gen. 21:9-14) Insan nen baleg lay Isaac, ingganggan nen Jehova si Abraham ya ibagat to. (Gen. 22:1, 2; Heb. 11:17-19) Diad saratan ya agawa, kaukolan ya manmatalek si Abraham ya sumpalen nen Jehova iray sipan to parad saray ananak to.

11. Akin ya kaukolan nen Abraham so maanos ya manalagar ed si Jehova?

¹¹ Diad saratan ya agawgawa, naaralan nen Abraham so maanos ya manalagar ed si Jehova. Masulok lan 70 so taon to nen tinaynan to so Ur kaibay pamilya to. (Gen. 11:31–12:4) Tan diad manga ya sanlasus ya taon, sikatoy nanayam ed saray tolda, tan alis-alis ira na ayaman diad dalin na Canaan. Inatey si Abraham nen 175 so taon to. (Gen. 25:7) Balet agto la anengneng ya sinumpal nen Jehova so sipan ya iter To so dalin na Canaan ed saray ilalak to. Tan agto la anengneng ya nipaalagey so syudad ya aalagaren to, say Panarian na Dios. Balet ibabaga na Biblia ya “napnek” si Abraham ed ‘andukey ya impanbilay to.’ (Gen. 25:8) Diad amin ya subok ya dinalan nen Abraham, nansiansian mabiskeg so pananisia to tan maliket ya nanalagar ed si Jehova. Akin et akapan-anos si Abraham? On ta diad interon bilay to et sikatoy prinotektaan nen Jehova tan impasen Ton kaaro.​—Gen. 15:1; Isa. 41:8; Sant. 2:22, 23.

12. Anto so aalagaren tayo, tan antoy pantongtongan tayo?

¹² Singa si Abraham, aalagaren tayo so syudad ya walaan na saray tuan pundasyon. Balet aliwan say pangipaalagey ed satan so aalagaren tayo, ta say Panarian na Dios et niletneg la nen 1914 tan manuuley la ed tawen. (Apo. 12:7-10) Kanian say aalagaren tayo et say panuley na satan diad dalin. Legan tayon manaalagar, dakdakel met ya subok so aarapen tayo ya singa si Abraham tan Sara. Kasin wala ray lingkor nen Jehova natan ya angalig ed si Abraham? Nanengneng tayo ed saray istoryay bilay ya im-publish ed Panag-bantayan ya dakel ya agagi tayo so mangaalig ed pananisia tan inkaanos nen Abraham tan Sara. Pantongtongan tayo so pigaran eksperiensya tan nengnengen tayo no antoy naaralan tayo ed saratan.

ALIGEN SI ABRAHAM

13. Antoy naaralan mo ed eksperiensya nen Brother Walden?

¹³ Akaparaan ya mansakripisyo. No labay tayon iyuna ed bilay tayo so syudad o Panarian na Dios, kaukolan tayon aligen si Abraham. Sikatoy akaparaan ya mansakripisyo pian napaliket toy Dios. (Mat. 6:33; Mar. 10:28-30) Nengnengen tayoy eksperiensya nen Brother Bill Walden.b Nen 1942, asingger lan man-graduate ed sakey ya unibersidad ed Amerika si Bill ed kurson Architectural Engineering. Tan diad saman met ya taon et sikatoy inyaralan na saray Tasi nen Jehova. Wala lay akatongtong na propesor nen Bill ya pantrabahoan to ka-graduate to, balet ag-itan inawat nen Bill. Impaliwawa to ya labay ton mas dakel so panaon ton manlingkor ed Dios nen say nawalaan na trabahon atagey so sueldo. Ag-abayag, tinawag na gobierno si Bill pian mansundalo. Lapud agto labay so mansundalo, pinan-multa da na $10,000 tan asentensiaan na limay taon ya pakapriso. Balet imbulos da kayari taloy taon. Insan sikatoy naimbitaan ya manaral ed Gilead School tan niyasain ya misionero ed Africa. Nankasal ira nen Eva tan saniba ran nanlingkor diad Africa, ya ditan et kaukolan day mansakripisyo. Kayari na pigaran taon et pinmawil ira ed Amerika pian asikasoen so nanay nen Bill. Oniay nibaga nen Bill no nanonotan toy impanlingkor to: “Makalua ak no pawilen koy masulok ya 70 taon na impanlingkor ko ed si Jehova. Balbaleg itan ya pribilehyok. Kanian lanang kon pisasalamatan ta inggiya to ak ed desisyon kon manlingkor ed sikato.” Sika ey, kasin labay mo met so manlingkor ya full-time?

14-15. Antoy naaralan mo ed eksperiensya nen Brother tan Sister Apostolidis?

¹⁴ Agmo iisipen ya agka lan balot naproblema. Naaralan tayo ed bilay nen Abraham ya anggan saramay uusaren day interon bilay da pian manlingkor ed si Jehova et walan walay onsabin problema da. (Sant. 1:2; 1 Ped. 5:9) Imanoen pay naeksperiensya nen Aristotelis Apostolidis.c Sikatoy abautismoan nen 1946 diad Greece, tan nen 1952 et akisipanan ya pakasalan toy Eleni tan plano ra ya saniba ran manlingkor ya full-time. Balet nansakit si Eleni tan a-diagnose ya walay tumor tod utek. Sikatoy nampa-opera, balet pigaran taon ni labat kayari na impankasal da et pinmawil may tumor. Sikatoy nampa-opera lamet, balet aparalisado lay arum ya parte na laman to tan naapektoan so panagsalita to. Anggan onman so agawa et nansiansian maseseg si Eleni, anggan sanen papatundaen na gobierno so kimey na saray Tasi ed saman ya panaon.

¹⁵ Talomplon taon ya inasikaso nen Aristotelis so asawa to. Legan na saman ya panaon et sikatoy nanlingkor bilang elder, membro na komite na asemblea, tan tinmulong ed impangipaalagey na sakey ya Assembly Hall. Insan nen 1987, binmasig ed si Eleni so balatyang ya puerta legan ya sikatoy manpupulong. Lapud satan et sikatoy taloy taon ya a-comatose insan inatey. Oniay imbaga nen Aristotelis ed satan ya amin ya agawa ed bilay to: “Dakdakel so dinalan kon problema tan subok. Arum ed saratan et biglaan tan agko inilaloan. Kaukolan kon pakpelan so liknaan ko pian makapan-anos ak. Diad saratan ya amin et lanang ya iiter nen Jehova so biskeg ya kaukolan ko.” (Sal. 94:18, 19) Talagan inar-aro nen Jehova iramay matoor ya manlilingkor ed sikato anggano dakdakel so problema da!

16. Antoy bilin nen Brother Knorr ed asawa to?

¹⁶ Manpokus ed saray bendisyon ed arapen. Si Abraham et nampokus ed saray bendisyon ya iter nen Jehova ed sikato, tan akatulong itan pian nasarag to ray subok. Ontan so ginawa nen Sister Audrey Hyde. Sikatoy nansiansian positibo anggano say inmunan asawa to ya si Nathan H. Knorr et inatey lapud kanser tan say komaduan asawa to ya si Glenn Hyde et nansakit na Alzheimer’s.d Imbaga to ya akatulong imay inkuan nen Brother Knorr pigaran simba antis na impatey to. Imbaga nen Audrey: “Oniay impanonot ed siak nen Nathan: ‘Segurado so ilalo tayo kayari ipapatey, kanian agtayo lan balot manirap lamet.’ Insan oniay impaseseg to ed siak: ‘Nengneng ka ed arapen ta wadman so tumang mo.’ . . . Oniay inyarum to: ‘Mansiansia kan okupado​—usar moy bilay mo diad panggawa na bengatla parad arum. Saya so ontulong ed sikan nagamoran so liket ed pambilay.’” Talagan makatulong so panggawa na kamaongan parad arum tan “manliket ed ilalo”!​—Roma 12:12.

17. (a) Akin et mas dakel so rason tayo natan ya manpokus ed saray bendisyon ed arapen? (b) Panon ya makatulong so Miqueas 7:7 pian sakey tayo ed saray nabendisyonan diad arapen?

¹⁷ Mas dakel so rason tayo natan ya manpokus ed saray bendisyon ed arapen, ta nanenengneng tayod saray nagagawa ya wala tayo lad sampot a parte na kaunoran iran agew. Asingsingger lan nasumpal so panaalagar tayo ed syudad a walaan na saray tuan pundasyon ta magano lan uleyan na Panarian na Dios so interon dalin. Sakey ed saray bendisyon ya panliketan tayo et say kioli na saray inad-aro tayod bilay. Diad satan ya panaon, bendisyonan nen Jehova so pananisia tan anos nen Abraham. Sikato tan say pamilya to et bilayen nen Jehova diad paraison dalin. Kasin wadman ka ya mangabet ed sikara? Seguradon wadman ka no aligen moy Abraham ya akaparaan ya mansakripisyo parad Panarian na Dios, no pansiansiaen mon mabiskeg so pananisiam anggano wala ray problema, tan no maan-anos kan manalagar ed si Jehova.​—Basaen so Miqueas 7:7.