Makapansungdo Ka Anggad Anggaan

“Batiken tayo a siaanos komon so babatiken a niyan ed arap tayo.”​—HEBREOS 12:1.

1, 2. Antoy kabaliksan na panagsungdo?

“WALA so pakapankaukolan yo ed anos [“panagsungdo,” NW],” so insulat nen apostol Pablo ed saray Hebreon Kristiano nen inmunan-siglo. (Hebreos 10:36) Diad pangidanet ed kaimportantian na sayan kualidad, ontan met so impaseseg nen apostol Pedro ed saray Kristiano: “Ipatnag yo komon ed pananisia yo so . . . anos.” (2 Pedro 1:5, 6) Balet anton talaga so panagsungdo?

² Inukeran na diksionaryo a Griego-Ingles so Griegon verb parad “sungdo” bilang “mansiansia imbes ya ombatik . . . akatalindeg, ag-onsusuko.” Nipaakar ed Griegon noun parad “panagsungdo,” oniay nikuan ed sakey a reperensia: “Satan et awawey a pakapananos ed saray bengatla, ya agbengatbengat ya onsuko, noagta walaay masimoon a panilalo . . . Satan et kualidad a mamasiansia ed sakey a too ya akatalindeg legan ton susubaen so dagem. Birtud itan a pagmaliwen ton gloria so nengneng na sankairapan a subok lapud diad labas na ot-ot et nanenengneng toy kalat.” Say panagsungdo, sirin, et ontulong ed sakey ya ontalindeg a malet ed arap na saray babeng tan ir-irap pian agnaandiay ilalo. Siopa so nagkalalo lan mankaukolan ed sayan kualidad?

3, 4. (a) Sioparay mankaukolan na panagsungdo? (b) Akin a nepeg itayon mansungdo anggad anggaan?

³ Amin a Kristiano et piguratibon mibibiang ed lumba a mankaukolay panagsungdo. Nen manga taon 65 K.P., insulat nen apostol Pablo irayan panamaseguro ed si Timoteo, a kakimeyan tan matoor a kaiba to ed panagbaroy: “Akibakal ak ed maabig a pibabakal, asumpal ko so binati’ko, inunor ko so pananisia.” (2 Timoteo 4:7) Diad balikas a ‘sumpalen so babatiken,’ inyulibay nen Pablo ed sakey a lumba so bilay to bilang sakey a Kristiano, a walaan na babatiken tan pansampotan. Diad saman a panaon, matalonan manasingger lay Pablo ed sampot na pilulumba to, tan sikatoy matalek a maniilalo ed pakaawat toy tumang. “Manlapu ed natan,” so intuloy ton inkuan, “angga ed arapen wala a niparaan ed siak so balanget na kaptekan, ya iter naani ed siak na Katawan, say maptek ya ukom, ed saman ya agew.” (2 Timoteo 4:8) Segurado si Pablo a nagamoran toy tumang lapud ta sikatoy nansungdo anggad kasampotan. Komusta itayo balet?

⁴ Pian napaseseg iramay milulumba, oniay insulat nen Pablo: “Batiken tayo a siaanos komon so babatiken a niyan ed arap tayo.” (Hebreos 12:1) Bilang Kristianos, akibiang itayo ed sayan lumba a mankaukolay panagsungdo sanen indedika tayoy inkasikatayo ed si Jehova a Dios diad panamegley nen Jesu-Kristo. Importanti so maabig ya inggapo ed kurso na inkababangatan, balet say sankaimportantian ed kaunoran et say pakasumpal tayo ed babatiken tayo. Inyabawag nen Jesus: “Say misungdo ya angga ed kasampotan, sikato lamlamang so nilaban naani.” (Mateo 24:13) Say premyo a nisagana parad saramay matalonan makapangisumpal ed babatiken et andi-anggaan a bilay! Kanian sano sinononot ed sakey a kalat, nepeg itayon mansungdo anggad anggaan. Antoy ontulong ed sikatayo pian narapat itan a kalat?

Nakaukolan so Suston Pakatagano

5, 6. (a) Pian makapansungdo ed lumba a parad bilay, anto so nepeg tayon imanoen? (b) Antoran espiritual a probisyon so nepeg ya anamoten tayo, tan akin?

⁵ Diad kaabay a syudad na Corinto, Gresya, so lugar a pakagagawaan nensaman na Isthmian Games. Andi-duaruwan amta nen Pablo a kabisado na saray agagi ed Corinto iray gagalawen na saray atleta tan arum niran kompetisyon a nagagawa diman. Diad impangusar ed walan kabat da la, pinanonotan tora nipaakar ed akilumbaan dan parad bilay: “Agyo ta amta a saray manlulumba ombatik ira ya amin, et saksakey so makala na upa? Batik kayo siri ontan; ta pian makala kayo.” Indanet nen Pablo so kaimportantian na pansiansia ed lumba tan mantultuloy anggad pakasabi’d sampot na satan. Balet antoy makatulong ed sikara pian nagawaan da itan? “Amin a mampapasal ed batikan, sikara so mandangka ed ami ganagana,” so inyarum to. On, saray mibibiang ed saray pagalaw nensaman so dinmalan ed pirmin panagpasal, ya aalwaran dan maong no anto so kanen tan inumen da, tan kokontrolen da so kada aktibidad da pian manalo ira.​—1 Corinto 9:24, 25.

⁶ Komusta balet so lumba ya akibiangan na saray Kristiano? “Nakaukolan ya asikasoen moy espiritual a katataganom ta pian makapansungdo ka ed lumba a parad bilay,” so inkuan na sakey a matatken ed sakey a kongregasyon na Tastasi nen Jehova. Nonoten pa no anton espiritual a tagano so itatarya ed sikatayo nen Jehova, “say Dios na anos.” (Roma 15:5) Say manunan panlalapuay espiritual a tagano tayo et diad Salita to, say Biblia. Agta kaukolan tayon mantinien so maong ya eskedyul ed panagbasa na Biblia? Diad panamegley na “matoor tan makabat ya aripen,” itatarya met nen Jehova so nipanpanaon iran dyurnal a Say Panag-Bantayan tan Awake! tan arum nin nibase’d-Biblian publikasyon. (Mateo 24:45) Say makulin panaral ed saraya so mamabiskeg ed sikatayo diad espiritual a paraan. On, nepeg tayon ipanaon​—‘saliwen so pankanawnawan panaon’​—parad personal a panagaral.​—Efeso 5:16, NW.

7. (a) Akin ya agtayo nepeg a mankontento lambengat ed pakaamta ed manunaan iran Kristianon doktrina? (b) Panon itayon ‘ontundas ed inkatatken?

⁷ Pian mansiansia itayo ed kurso na Kristianon inkababangatan, nakaukolan tayon aralen so mas ni nen say manunaan ya “unonan bangat” tan “ontundas itayo ed inkatatken.” (Hebreos 6:1, NW) Kanian nepeg tayon bayuboan so interes ed “kaawang tan karukey tan kaatagey tan kaaralem” na katuaan tan mantagano ed “anawet a tagano a parad saray matatken a totoo.” (Efeso 3:18; Hebreos 5:12-14, NW) Alimbawa, konsideraen pa so apatiran napanmatalkan a salaysay nipaakar ed bilay nen Jesus diad dalin​—saray Ebanghelyo nen Mateo, Marcos, Lucas, tan Juan. Diad maalwar a panaral ed sarayan rekord na Ebanghelyo, agtayo lambengat naaralan iray ginawa nen Jesus tan say nengneng na inkatoo to noagta natebek tayo met so padron na panag-isip ya anagdag ed saray kiwas to. Diad ontan et nawalaan itayoy “kanonotan nen Kristo.”​—1 Corinto 2:16.

8. Panon a makatulong ed sikatayo iray Kristianon miting pian makapansungdo itayo ed lumba a parad bilay?

⁸ Sinimbawa nen Pablo iray kapananisiaan: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasingger so agew.” (Hebreos 10:24, 25) Agaylan lapuan na panamaseseg iray Kristianon miting! Tan agaylan makaparepresko so pakapilimog ed maaron agagi ya interesado ed sikatayo tan malabay ya ontulong ed sikatayo pian makapansungdo itayo anggad anggaan! Agtayo nayarian ya ibaliwala iyan maaron probisyon nen Jehova. Diad panamegley na makulin panagaral a bukor tan regular a pipiaral, “magmaliw [itayo komon] a matakken diad saray pakayari na pakatalos.”​—1 Corinto 14:20, NW.

Walaray Manbabantay a Managyat ed Sika

9, 10. (a) Diad anton paraan a nayarin saray manbabantay et magmaliw a lapuay panamaseseg diad lumba a mankaukolay panagsungdo? (b) Anto so ‘baleg a lurem na tastasi ya akapaliber ed sikatayo’ ya asalambit ed Hebreos 12:1?

⁹ Balet, anggan panon lay inkaparaan na sakey a bumabatik, nayarin walaray nagawa diad pambabatik to a pansengegay itunda to. “Mambabtik kayo nensaman a maong; siopa so anebel ed sikayo, pian agyo unoren so tua?” so tepet nen Pablo. (Galacia 5:7) Mapatnag, makapuy so akapiulopan na arum a Kristiano tan, bilang resulta et agirogiro ira ed pilulumba ra a parad bilay. Diad biek a dapag, say suporta tan panamaseseg na arum so mamainomay ed pakapansungdo ed sayan lumba. Mipadpara itan ed impluensia na saramay manbabantay ed saray mibibiang ed sakey a pagalaw. Saray entusiastikon manbabantay so mamabiskeg ed inkaligsa a pakadagdagan na saramay migagalaw manlapud gapo anggad pakasumpal. Lapud eyag a panamaseseg na saray manbabantay, a mabetbet ya atekepan na maksil a musika tan panagtipak, lalon ombibiskeg iray migagalaw a nakaukolan da legan a manasingger la ra ed anggaan. On, saray masimpatiyan manbabantay so makapangiter na positibon impluensia ed saramay milulumba.

¹⁰ Diad pilulumbaan na saray Kristiano a para ed bilay, sioparay manbabantay? Kayari ton indalatdat iray matoor a tastasi nen Jehova sakbay na saray Kristiano, a singa nikurit ed koma-11 a kapitulo na Hebreos, oniay insulat nen Pablo: “Kanian sikatayo met, bangta wala ed liberliber tayo so sakey a sankabalgan a lurem na saray tasi, . . . batiken tayo a siaanos komon so babatiken a niyan ed arap tayo.” (Hebreos 12:1) Diad impangusar nen Pablo ed lurem bilang pangiyulibayan, agto inusar so Griegon salita a manedeskribe ed lurem a mabitabitar so kurti to tan walaay pihon kabaleg tan uhas. Imbes, inusar to so salitan unong ed si leksikograpon W. E. Vine “a kabaliksan toy makapal, andiay uhas a lurelurem a manasanib ed katawenan.” Malinew, say walad kanonotan nen Pablo et say baleg a bilang na saray tastasi​—ya ontanlan dakerakel a singa ira makapal a lurem.

11, 12. (a) Panon itayon napaseseg na saray matoor a sakbay-Kristianon tastasi, a singa panangibaga, pian milumban atekepay panagsungdo? (b) Panon itayon nagkalalon nagunggunaan manlapud ‘baleg a lurem na tastasi’?

¹¹ Nayari kasin magmaliw a literal a managbantay natan iray matoor a sakbay-Kristianon tastasi? Andin balot. Amin da so naugip la’d patey, a manaalagar ed kioli. Balet, sikaran mismo et matalonan bumabatik sanen mabilay nira, tan saray ehemplo ra so nirekord ni ed saray pahina na Biblia. Legan tayon aaralen so Kasulatan, sarayan matoor so magmaliw a malinew ed kanonotan tayo tan napapaseseg da itayo, a singa panangibaga, pian ombatik ed lumba anggad pakasumpal.​—Roma 15:4.a

¹² Singa bilang, sano natutukso itayo ed saray iyoopresi na mundo, agta say pannonot ed no panon so impangipulisay nen Moises ed saray kigloriaan ed Ehipto so mamakiwas ed sikatayo a mansiansia ed lumba? No ompatnag a pirmi so kasusubok tayo, say pannodnonot ed ambelat a subok ya inkipaarapan nen Abraham sanen sikatoy niganggan a mangibagat ed anak ton si Isaac so maseguron mamaseseg ed sikatayo ya ag-onsuko ed pilalaslasan nipaakar ed pananisia. Say laknab a kapasesegan tayo ed ‘baleg a lurem’ na sarayan tastasi ed onian paraan so mandependi ed no panon kalinew so pakanengneng tayo ed sikara diad panamegley na mata na pakatalos tayo.

13. Diad anton paraan a nadagdag itayo na modernon-panaon a Tastasi nen Jehova diad lumba a parad bilay?

¹³ Apaliberan itayo met na baleg a bilang na saray Tastasi nen Jehova ed modernon panaon. Agaylan abig ya ehemploy pananisia so impanengneng la na saray alanaan a Kristiano ontan met ed lalaki tan bibii a kabiangan na “baleg ya ulop”! (Apocalipsis 7:9) Panapanaon a nabasa tayo so istorya na bilay da ed sayan magasin tan arum nin publikasyon na Watch Tower.b Diad panmolimoli tayo ed pananisia ra, napaseseg itayon mansungdo anggad anggaan. Tan agaylan abig so pakawalaay suporta na saray maapit a kakaaro tan kakanayon a mismon manmamatoor ed panaglingkor ed si Jehova! On, dakel so managdag ed sikatayo pian mantultuloy ed lumba a parad bilay.

Makabat Mon Pansiansiaey Peles Mo

14, 15. (a) Akin ya importantin pansiansiaen a makabat so peles tayo? (b) Akin a kaukolan tayoy magmaliw a makatunongan ed pangiletneg na saray kalat?

¹⁴ Sano andukey so batiken, singa say marathon, nepeg a makabat a pansiansiaen na sakey a bumabatik so peles to. “No mapmaples kan tampol diad kagapo na lumba, nayarin natalo ka,” so kuan na magasin a New York Runner. “Say nayarin resulta et apos-aposan ka la diad unor lan pigaran milya odino ontunda ka la.” Nanonotan na sakey a bumabatik: “Malinew ya impasakbay na espiker ed sakey a lektyur ya inatendian ko bilang preparasyon ed lumba: ‘Agyo uusilan so mamaples iran bumabatik. Ombatik ka ed walan peles mo. Ta no andi et napunaw ka tan ontunda ka la.’ Akatulong ed siak so impangunor ed sayan bilin kanian asumpal koy lumba.”

¹⁵ Nipaakar ed lumba a parad bilay, nepeg a mabiskeg ya isekar na saray lingkor na Dios so inkasikara. (Lucas 13:24) Bangbalet, oniay insulat nen babangatan a Santiago: “Say kakabatan a manlapu ed tagey et . . . makatunongan.” (Santiago 3:17, NW) Anggaman nayarin napaseseg itayo a manggaway malaglaem lapud maong ya ehemplo na arum, say pagmaliw a makatunongan so makatulong ed sikatayo pian niletneg iray realistikon kalat a matukoy ed abilidad tan kipapasen tayo. Papanonotan itayo na Kasulatan: “Balang sakey patnagen to komon so gawa ton dili, et dia ed ontan wala naani sirin so like’to nipaakar ed sikato, [“ya agto ikokompara so inkasikato ed arum,” NW]. Ta balang sakey taroken to naani so awi’ton dili.”​—Galacia 6:4, 5.

16. Panon a makatulong ed sikatayo so pagmaliw a mapaabeba pian napansiansia tayoy peles tayo?

¹⁶ Diad Miqueas 6:8, nitepet ed sikatayo iyan makapatenyeg-kanonotan a tepet: “Anto ta so kaukolan nen Jehova ed sika, noag say . . . manakar a mauy-uyamo [“mapaabeba,” NW] ed Dios mo?” Lalaktipen na pagmaliw a mapaabeba so pamidbir ed saray limitasyon tayo. Kasin alimitaan lay nagagawaan tayo ed panaglingkor ed Dios lapud kinmapuy lay bunigas tayo odino tinmakken tayo la? Agtayo komon nadidismaya. Natalosan nen Jehova no panoy pansasagpot tan pansasakripisyo tayo ‘unong na wala ed sikatayo, aliwan unong na anggapo ed sikatayo.’​—2 Corinto 8:12; ikompara so Lucas 21:1-4.

Lawas Mon Nonoten so Tumang

17, 18. Akapansungdo si Jesus diad panamairapan a kiew lapud impannodnonot ed anto?

¹⁷ Sanen ipapabitar nen Pablo ed saray Kristianon taga-Corinto so pankaukolay panagsungdo ed lumba a parad bilay, sinalambit to so sakey nin aspekto na Isthmian Games a makanakanan imanoen da. Nipaakar ed saray mibibiang ed saraman a pagalaw, insulat nen Pablo: “Natan sikara [so ombatik] pian naawat da so naderal a balanget; balet sikatayo say agnaderal. Kanian onia ombatik ak, aliwa a singa panduaruwaan; onia mipunitian ak, aliwa a singa say manlewet ed dagem.” (1 Corinto 9:25, 26) Say premyoy manalo ed saraman a pagalaw nensaman et sakey a korona, odino balanget, a gawa’d tanaman a saleng odino arum niran masitas odino anggan say pinamagan wild celery​—talagan “naderal a balanget.” Balet, anto so manatalaran ed saray Kristiano a makapansungdo anggad anggaan?

¹⁸ Diad impanukoy nen Pablo ed Uliran tayo, si Jesu-Kristo, oniay insulat to: “Lapud gayaga a niyan ed arap to sinungdoan to so krus [“panamairapan a kiew,” NW], ya imbantak to so baing, et imyurong ed kawanan na trono na Dios.” (Hebreos 12:2) Akapansungdo si Jesus anggad anggaan na bilay to bilang too diad innengneng to ed tumang to ya aliwan ed say panamairapan a kiew, a laktipen na satan so gayagan niwala la ed sikato diad panamasantos ed ngaran nen Jehova, diad panondon ed sankatooan manlapud patey, tan diad panuley to bilang Ari tan Atagey a Saserdote legan ton ipapawil so kipapasen na matulok a totoo ed andi-anggaan a bilay diad paraison dalin.​—Mateo 6:9, 10; 20:28; Hebreos 7:23-26.

19. Anto so nepeg a nodnonoten tayon lanang diad pangegemtan ed kurso na Kristianon inkababangatan?

¹⁹ Nodnonoten so gayaga a niiyan ed arapan tayo legan tayon gegemtanen so kurso na Kristianon inkababangatan. Inikdan itayo nen Jehova na talagan makapnek a kimey ya ipulong so maong a balita na Panariay Dios tan inabang ed arum so manangiliktar-bilay a pikakabat ed Biblia. (Mateo 28:19, 20) Agaylan makapaliket so pakaromog ed sakey ya interesado ed tuan Dios tan sikatoy tulongan a mibiang ed lumba a parad bilay! Tan antokaman so kiwas na saray totoon pupulongan tayo, pribilihyo tayo so mibiang ed kimey a misiglaotan ed panamasantos ed ngaran nen Jehova. Sano mansungdo itayo ed ministeryo anggaman ed agpanginenen odino isusumpa na saramay walad panpupulongan tayon teritorya, manggayaga itayo diad pamaliket ed puso nen Jehova. (Uliran 27:11) Tan say baleg a tumang ya isisipan to ed sikatayo et say bilay ya andi-anggaan. Agaylan makapagayaga itan! Nakaukolan a sankanonot tayon naynay irayan bendision tan mantultuloy itayo ed babatiken.

Legan a Manasingger so Anggaan

20. Panon a nayarin onirap lan onirap so lumba a parad bilay legan a manasingger so anggaan?

²⁰ Diad lumba a parad bilay, kaukolan a mitulot itayo ed manunan kabusol tayo, si Satanas a Diablo. Legan na panasingger tayo ed anggaan, pirmi so panasali ton maniror ed sikatayo odino mamatayer ed sikatayo. (Apocalipsis 12:12, 17) Tan aliwan mainomay so pantultuloy bilang matoor, dedikado iran manangiproklama na Panarian anggaman ed saray bakal, eras, tan salot, tan amin ya ir-irap a pakabidbiray “panaon na anggaan.” (Daniel 12:4, NW; Mateo 24:3-14; Lucas 21:11; 2 Timoteo 3:1-5) Niarum ni, nayarin no maminsan et ompatnag a singa mabayag ni so anggaan nen say inilaloan tayo, nagkalautla sano apalabas lay pigaran dekada manlapulad nen akibiang itayo ed babatiken. Ingen, papaseguroan itayo na Salitay Dios ya onsabi so anggaan. Inkuan nen Jehova ya agmanbayag itan. Asingsingger lay anggaan.​—Habacuc 2:3; 2 Pedro 3:9, 10.

21. (a) Anto so mamabiskeg ed sikatayo legan ya itutultuloy tayo so lumba a parad bilay? (b) Anto so nepeg a determinasyon tayo legan a mas manasingger so anggaan?

²¹ Pian ontalona itayo ed lumba a parad bilay, nepeg tayo sirin so onggamor na biskeg manlapud maaron itatarya nen Jehova a taganoen tayo ed espiritual. Nakaukolan tayo met so sigpot a panamaseseg a nagamoran tayo diad regular a pilimog ed saray kapananisiaan, a milulumba met. Anggano oniirap so babatiken tayo lapud pirmin panamasegsegang tan ag-ilaloan iran nagawa, makapansungdo itayo anggad anggaan lapud itatarya nen Jehova so “sankatageyan ya inkabaleg na pakayari.” (2 Corinto 4:7) Agaylan makapaseguron naamtaan a kaliktan nen Jehova a nasumpal tayon matalona so babatiken! Tekep na mapekder a determinasyon, “batiken tayo a siaanos komon so babatiken a niyan ed arap tayo,” a sigpot a manmatalek a “dia ed panaon to manani itayo, noag itayo pinmakil.”​—Hebreos 12:1; Galacia 6:9.

[Saray paimano ed leksab]

Kasin Natandaan Yo?

◻ Akin a nepeg tayoy mansungdo anggad anggaan?

◻ Antoran probisyon nen Jehova so agtayo nepeg ya ibaliwala?

◻ Akin ya importanti so makabat a pamasiansia ed peles tayo?

◻ Anton gayaga so niiyan ed arapan tayo legan a mantutultuloy itayo ed babatiken?

[Litrato ed pahina 18]

Onggamor na panamaseseg ed saray Kristianon miting