Kapitulo 29

Panganta ed Balon Kanta na Pananalo

Pasingawey 9​—Apocalipsis 14:1-20

Tema: Say 144,000 so kaiba na Kordero ed Palandey Sion; nipapaknol iray anunsio na anghel ed interon dalin; gagapasen laray aanien

Panaon na kasumpalan: 1914 anggad baleg a kairapan

1. Anto la so naaralan tayo nipaakar ed Apocalipsis kapitulo 7, 12, tan 13, tan anto so aralen tayo natan?

AGAYLAN makarepresko so pangimano ed ontumbok a pasingawey nen Juan! Misunian ed makapataktakot a singa-ayep iran organisasyon na dragon, nanengneng tayo natan iray matoor a lingkor nen Jehova tan saray kimey da kaleganan na agew na Katawan. (Apocalipsis 1:10) Imparungtal la ed sikatayo na Apocalipsis 7:1, 3 a say apatiran dagem na kadederal so popokpokan ya anggad natatakan so amin na sarayan 144,000 ya alanaan ya ariripen. Impakabat na Apocalipsis 12:17 a sarayan “nakdaan [a] kailalakan [na bii]” so nagmaliw a nagkalalon puntirya nen Satanas, say dragon, legan na satan a panaon. Tan malinew ya indeskribe na Apocalipsis kapitulo 13 iray mapolitikan organisasyon a pinalesa nen Satanas diad dalin pian mangitarok na pirmin desdes tan maruksan panamasegsegang ed saray matoor a lingkor nen Jehova. Ingen say gagala na Dios so agnaamper na satan a manunan kabusol! Aralen tayo natan ya anggaman ed makaderal a kimey nen Satanas, amin iray 144,000 so matalonan atipon.

2. Anton pasimar na maliket a kasampotan so iiter nen Juan ed sikatayo diad Apocalipsis 14:1, tan siopa so Kordero?

² Si Juan, a kaiba to natan iray Juan a klase, so naikdan na pasimar ed sayan maliket a pansumpalan: “Tan ninmengneng ak, tan say Kordero manal-alagey ed tapew na palandey na Sion, et niulop ira ed sikato so sanlasus tan apataplo tan apat a libo, a wala a nisulat so ngaran to tan ngaran nen Ama to ed saray moling da.” (Apocalipsis 14:1) Unong ya anengneng tayo la, sayan Kordero et sikato lanlamang si Miguel a nanlinis ed katawenan diad impangibasileng to ed Diablo tan saray demonyo to. Sikato si Miguel a deneskribe nen Daniel ya ‘akatalindeg nipaakar ed saray anak na baley [na Dios]’ legan a manpaparaan ya “ontalindeg” diad pangipaakseb ed matunong iran panangukom nen Jehova. (Daniel 12:1; Apocalipsis 12:7, 9) Nanlapula’d 1914 sayan masakripisyon Kordero na Dios so manal-alagey la ed Palandey Sion bilang Mesianikon Ari.

3. Anto so ‘Palandey Sion’ a ditan “manal-alagey” so Kordero tan saray 144,000?

³ Mipadpara itan a mismo ed impasakbay nen Jehova: “Impasen ko la so arik ed tapew na masantos a paludpor ko a Sion.” (Salmo 2:6; 110:2) Agla iya ontutukoy ed mangaraldalin a Palandey Sion, a pakaromogan ed mangaraldalin a Jerusalem, a diad satan a syudad so datin nanuleyan na totoon arari ed linya nen David. (1 Awaran 11:4-7; 2 Awaran 5:2) Andi, lapud kayari na impatey tan inkioli nen Jesus nen 33 C.E., sikatoy inletneg bilang pundasyon ed mangatatawen a Palandey Sion, say mangatatawen a pasen a denesidi nen Jehova a pangiletnegan ed “baley na Dios a mabilay, say Jerusalem a mangatatawen.” Kanian, irerepresenta dia na ‘Palandey Sion’ so nitandoron posisyon nen Jesus tan saray kaiba ton mananawir, a manugyop ed mangatatawen a Jerusalem, salanti say Panarian. (Hebreos 12:22, 28; Efeso 3:6) Satan so magloria tan maarin kipapasen a pangitandoroan nen Jehova ed sikara legan na agew na Katawan. Diad inlabas na saray siglo, saray alanaan a Kristiano, bilang ‘mabilay iran bato,’ so siseseet a maniilalon onalagey ed satan a mangatatawen a Palandey Sion, a mikasakey ed maglorian Katawan a Jesu-Kristo ed engranden Panarian to.—1 Pedro 2:4-6; Lucas 22:28-30; Juan 14:2, 3.

4. Panon ya amin a 144,000 so manal-alagey ed Palandey Sion?

⁴ Aliwa labat lan si Jesus so nanenengneng nen Juan noag pati say interon ulop na 144,000 a kaiban mananawir ed mangatatawen a Panarian a manal-alagey ed Palandey Sion. Diad panaon ya inrepresenta na sayan pasingawey, dakel la, anggaman aliwan amin na 144,000, so wala la’d tawen. Diad saginonor na saya met lanlamang a pasingawey, naamtaan nen Juan ya arum ed saray masanto so kaukolan ni a mansungdo tan ompatey a matoor. (Apocalipsis 14:12, 13) Mapatnag, sirin, ya arum ed saramay 144,000 so wadia ni ed dalin. Kanian panon a nibagan nanenengneng iran amin nen Juan a manal-alagey a kaiba si Jesus ed Palandey Sion?a Bilang membro na kongregasyon na alanaan a Kristiano, saraya natan so ‘akaasingger la ed palandey na Sion, tan dia ed baley na Dios a mabilay, say Jerusalem a mangatatawen.’ (Hebreos 12:22) Singa si Pablo sanen wadia ni ed dalin, sikara—diad espiritual a pantalos—so apaoli la pian mikasakey ed si Kristo Jesus diad mangatatawen iran pasen. (Efeso 2:5, 6) Niarum ni, nen 1919 et sikara so inmebat ed imbitasyon ya, “onsegep kayo dia,” tan diad piguratibon paraan et “sinmegep ira ed tawen dia ed sakey a lurem.” (Apocalipsis 11:12) Diad sarayan teksto, nanengneng tayo ya amin a 144,000—diad espiritual a panangibaga—so nipasen ed Palandey Sion a kaiba si Jesu-Kristo.

5. Siopan kangaranan so nisulat ed kamolingan na 144,000, tan antoy kabaliksan na kada ngaran?

⁵ Saray 144,000 so agkabiangan na saray managdayew ed atap ya ayep, ya amarkaan na simbolikon numero a 666. (Apocalipsis 13:15-18) Diad pisunian, sarayan matoor so walaan na ngaran na Dios tan say Kordero a nisulat ed kamolingan da. Seguradon anengneng nen Juan, a sakey a Judio, so ngaran na Dios ed Hebreon letra a, יהוה.b Diad impakawalaan da na ngaran na Ama nen Jesus a simbolikon nisulat ed kamolingan da, sarayan atatakan so mangipapaamta ed amin a sikaray tasi nen Jehova, saray ariripen To. (Apocalipsis 3:12) Say impakawalaan da na ngaran nen Jesus a nisulat met ed kamolingan da so pakapatnagan a bibidbiren da a sikaray kayarian to. Sikato so akisipanan da ya “asawan laki,” tan sikara so “nobya,” “sakey a balon pinalsa” a manlilingkor ed Dios tan maniilalon manbilay ed tawen. (Efeso 5:22-24; Apocalipsis 21:2, 9; 2 Corinto 5:17) Say maapit a relasyon da ed si Jehova tan si Jesu-Kristo so mangaapekta ed amin a nonot tan kiwas da.

Mangakanta na Singa Sakey a Balon Kanta

6. Anton pankakanta so narerengel nen Juan, tan panon so panedeskribe to ed satan?

⁶ Mitunosan ed saya, inreport nen Juan: “Tan nadngel ko so sakey a boses ed tawen, a singa ungol na dakerakel a danum, tan singa tanol na sakey a baleg a karol: et nadngel ko so sakey a boses na tomotogtog na arpa a totogtogen da so kaarpaan da, tan mankakanta ra na sakey a singa kanta a balo ed arap na trono, tan dia ed arap na saray apatira a mabilay ya ayep tan saray mamasiken: et anggapo so makayari a makaaral na saman a kanta noag saray sanlasus apataplo tan apat a libo, a sikara so asaliw dia ed saray taga dalin.” (Apocalipsis 14:2, 3) Agpankelawan a si Juan, diad impakadngel to ed boses na 144,000 a nankakasakey ed alay abig a koro, nipanonot ed sikato so manungol ya ompepelag a danudanum tan manlaldis iran karol. Alay dakep na satan a malinew a singa-arpan mibabansag a togtog! (Salmo 81:2) Anton koro ed dalin so makapipara ed karakpan na sayan koro?

7. (a) Anto so balon kanta ed Apocalipsis 14:3? (b) Panon a balo ed panaon tayo so kanta na Salmo 149:1?

⁷ Tan anto iyan ‘balon kanta’? Singa naimano tayo la diad impaningbat ed Apocalipsis 5:9, 10, say kanta so mitukoyan ed saray gagala nen Jehova ed Panarian tan ed alay abig a probisyon to, diad panamegley nen Jesu-Kristo, pian pagmaliwen so espiritual ya Israel a “panarian tan saserdote nipaakar ed Dios [tayo].” Kanta itan na panangidayew ed si Jehova a mangiyaabawag ed balo iran bengatla a gagawaen to diad panamegley na Israel na Dios tan parad pankaabigan na satan. (Galacia 6:16) Saray membro na sayan espiritual ya Israel so inmebat ed imbitasyon na salmista: “Idayew yo si Jehova. Kantaan yo si Jehova na balo a kanta, tan say dayew to kantaen yo ed duypo na saray sasantos. Manggayaga so Israel ed nanggawa ed sikato: mansayaksak so saray anak na Sion ed Ari ra.” (Salmo 149:1, 2) Tua, saraman a balikas so nisulat la ed apalabas la iran siglo, balet diad panaon tayo, saraman so kakantaen tekep na balon pakatalos. Nen 1914 et nianak so Mesianikon Panarian. (Apocalipsis 12:10) Nen 1919 et inggapo na totoo nen Jehova ed dalin ya iyabawag so “salita na panarian” tekep na apasimbalon seseg. (Mateo 13:19) Lapud apakiwas ed tinaon a teksto nen 1919 (Isaias 54:17) tan apaseseg lapud inkipawil da ed espiritual a paraiso, ginapoan da ed saman a taon so ‘mankanta ed si Jehova diad kapusoan da.’—Efeso 5:19.

8. Akin a saray 144,000 lambengat so makayarin makaaral ed balon kanta ed Apocalipsis 14:3?

⁸ Balet, akin a saray 144,000 lambengat so makayarin makaaral na kantan abitla ed Apocalipsis 14:3? Lapud misiglaotan itan ed saray eksperiensya ra bilang pinilin mananawir ed Panarian na Dios. Sikara lambengat so tinagibi bilang ananak na Dios tan nilanaan na masanton espiritu. Sikara lambengat so sinaliw manlapud dalin pian magmaliw a kabiangan na mangatatawen a Panarian, tan sikara lambengat so “nagawa a saserdote . . . tan miari” ed si Jesu-Kristo ed loob na sanlibon taon pian itarok so katooan ed inkayadyari. Sikara lambengat so anengneng a “mankakanta . . . na sakey a singa kanta a balo” diad mismon arap nen Jehova.c Sarayan nikaduman eksperiensya tan iilaloan so mangiiter ed sikara na nikabiig ya apresasyon ed Panarian tan nayarian dan kantaen so nipaakar ed satan diad paraan ya agnasarag na arum.—Apocalipsis 20:6; Colosas 1:13; 1 Tesalonica 2:11, 12.

9. Panon a say baleg ya ulop so kinmiwas ed pankakanta na saray alanaan, tan anton panamaseseg so susumpalen da?

⁹ Anggaman ontan, arum so tinmalineng tan inmebat ed pankakanta ra. Nanlapula’d 1935 et sakey ya ondaraak a baleg ya ulop na arum a karnero so akadngel ed kanta na impanalo ra tan apakiwas a mibiang ed sikara diad panangiyabawag ed Panarian na Dios. (Juan 10:16; Apocalipsis 7:9) Tua, agsarag ya aralen na sarayan balo ni iyan mismon balon kanta a kantaen na saray arapen a manuley ed Panarian na Dios. Balet ta sikara met so mamapaknol na alay abig a koro na panangidayew ed si Jehova a satan so manseserbin kanta na panangigloria ed si Jehova lapud balo iran bengatla a gagawaen to. Susumpalen da sirin so panamaseseg na salmista a: “Kantaan yo si Jehova na sakey a balo a kanta: kantaan yo si Jehova, sikayon amin a dalin. Kantaan yo si Jehova, galgalangen yo so ngaran to; ipanengneng yo so panangilaban to ya inagew-agew. Ipaamta yo so gloria to ed leeleet na nasyon, tan ipaamta yo so makapakelaw a gawagawa to ra ed leeleet na amin a katooan. Ipabtang yo ed Jehova, O sikayo a kapamilyaan na katooan, ipabtang yo ed Jehova so gloria tan kabiskegan. Ibaga yo ed saray nasyones a, Si Jehova manari.”—Salmo 96:1-3, 7, 10; 98:1-9.

10. Panon a posible ed saray 144,000 so pankanta ed “arap” na simbolikon 24 a mamasiken?

¹⁰ Panon a makapankanta iray 144,000 ed “arap” na mamasiken, anta say 24 a mamasiken et saray 144,000 lanlamang a walad maglorian mangatatawen a pasen da? Diad banda’d gapo na agew na Katawan, saramay “inaatey [ya akikasakey] ed Kristo” so apaoli bilang espiritun pinalsa. Kanian, saray matoor ya alanaan a Kristiano a tinmalona so wala la’d tawen natan, a simbolikon susumpalen da iray kimey a mipara ed kimey na saramay 24 a dibisyon na makasaserdoten mamasiken. Kaiba ira ed pasingawey na mangatatawen ya organisasyon nen Jehova. (1 Tesalonica 4:15, 16; 1 Awaran 24:1-18; Apocalipsis 4:4; 6:11) Saray nakdaan na 144,000 a wadia ni ed dalin so mankakanta sirin na sakey a balon kanta ed arap, odino diad pakanengneng, na saray apaolin agagi ra ed tawen.

11. Akin a saray mananalon alanaan so atukoy bilang 24 a mamasiken tan bilang 144,000?

¹¹ Diad sayan punto et nayarin nitepet tayo met: Akin a sarayan alanaan a mananalo so atukoy bilang simbolikon 24 a mamasiken tan bilang 144,000? Say rason et momoriaen na Apocalipsis iyan sakey a grupo manlapud duaran nandumaan a punto de bista. Saray 24 a mamasiken so naynay a nipapanengneng ed kapantokan a posisyon da ya akapaliber ed trono nen Jehova, a niletneg bilang arari tan saserdote ed katawenan. Isisimbolo ra so interon grupo na 144,000 diad mangatatawen a posisyon da, anggaman dian kaplesan et walay melag a nakdaan na saraya a siansian wadia ni ed dalin. (Apocalipsis 4:4, 10; 5:5-14; 7:11-13; 11:16-18) Bangbalet, say Apocalipsis kapitulo 7 so akaapasakey ed 144,000 bilang sinaliw manlapud katooan, tan idadanet na satan so engranden gagala nen Jehova a tatakan so kompleton bilang na indibidual iran espiritual ya Israel tan mangipagamor na kilalaban ed agnabilang a baleg ya ulop. Itatarya na Apocalipsis kapitulo 14 so eksena a mamepekder a say kompleton klase na Panarian na 144,000 iran indibidual a mananalo so nitipon ed Kordero diad Palandey Sion. Saray kualipikasyon a nepeg a nakapet pian nibilang ed 144,000 so nipakabat met, a singa nanengneng tayo natan.d

Papatumbok na Kordero

12. (a) Panon ya intuloy nen Juan so deskripsyon to ed 144,000? (b) Diad anton pantalos a say 144,000 so atukoy bilang saray birhen?

¹² Diad pangitutuloy ed deskripsion nen Juan ed 144,000 ya “asaliw dia ed saray taga dalin,” ibabaga to ed sikatayo: “Saraya sikara so ag-arutakan ed saray bibii; ta sikara so birhen. Saraya sikara so mantumbok ed Kordero ed anggan iner a laen to. Saraya asaliw ira dia ed saray totoo, a panagka-unonan bungabunga ed Dios tan Kordero. Tan dia ed saray sangi ra anggapo so aromog a tila: ta sikara anggapo so tilol da.” (Apocalipsis 14:4, 5) Say katuaan a saray 144,000 “so birhen” et agmet mankabaliksan a saray membro na sayan klase so andian na asawa. Sinulat nen apostol Pablo iray Kristiano a walaan na mangatatawen a tawag ya, anggaman walaray pankaabigan na sakey a Kristianon walad kasuloan, say pangasawa so makagunggona diad pigara iran sirkumstansya. (1 Corinto 7:1, 2, 36, 37) Say sankaimano ed sayan klase et say espiritual ya inkabirhen. Pinaliisan da so espiritual a pikakalugoran ed minumundo iran politika tan ed palson relihyon. (Santiago 4:4; Apocalipsis 17:5) Bilang kasipan a nobya nen Kristo, impansiansia ray inkasikaran malinis, “anggapo so kabalawan . . . ed pegley na sakey a pikewet tan maramsak a kailalakan.”—Filipos 2:15.

13. Akin a say 144,000 so manepenepeg a nobya parad si Jesu-Kristo, tan panon a sikaray “mantumbok ed Kordero ed anggan iner a laen to”?

¹³ Niarum ni, diad “saray sangi ra [et] anggapo so aromog a tila.” Diad saya, kapadpara ray Ari ra, si Jesu-Kristo. Bilang ayadyarin too, “anggapoy ginawa ton kasalanan, [anggapoy] bengatlan kapaklapan ya anengneng ed sangi to.” (1 Pedro 2:21, 22) Diad pagmaliw dan andian na kabalawan tan matua, say 144,000 so nipaparaan a singa sakey a malinis a nobya parad Atagey a Saserdote nen Jehova. Sanen wadia ed dalin si Jesus, inimbitaan to iray maptek-impanpuso ya ontumbok ed sikato. (Marcos 8:34; 10:21; Juan 1:43) Saramay kinmiwas so angalig ed paraan na kabibilay to tan tinmulok ed saray bangat to. Kanian, sanlegan na mangaraldalin a bilay da, sikaray “mantumbok ed Kordero ed anggan iner a laen to” legan to iran igigiya ya ombeltang ed mundo nen Satanas.

14. (a) Panon a say 144,000 so “unonan bungabunga ed Dios tan Kordero”? (b) Diad anton pantalos a say baleg ya ulop so unaan met a bungabunga?

¹⁴ Say 144,000 so “asaliw dia ed saray taga dalin,” ya “asaliw ira dia ed saray totoo.” Sikaray tinagibi bilang ananak na Dios, tan kayari kioli ra, aliwa la ran totoo a walaan na laman tan dala. Unong ya asalambit ed bersikulo 4, sikaray magmaliw ya “unonan bungabunga ed Dios tan Kordero.” Tua, nen inmunan siglo, si Jesus so “inmunan bunga na saray naugip [ed patey].” (1 Corinto 15:20, 23) Balet say 144,000 so “unona [iran] bunga” na ag-ayadyarin katooan, ya asaliw panamegley na bagat nen Jesus. (Santiago 1:18) Anggaman ontan, say pantitipon ed bunga manlapud katooan so agmangangga ed sikara. Impaimano la na libron Apocalipsis so panagani ed agnabilang a baleg ya ulop ya onkekelyaw ed maksil a boses: “Say inkilaban [so utang tayo] ed Dios tayo a wala a manyurong ed trono, tan dia ed Kordero.” Makaliktar iyan baleg ya ulop ed baleg a kairapan, tan legan a narerepreskoan ed “saray subol na danudanum na bilay,” sikaray magmaliw ya ayadyarin totoo diad dalin. Kayari na baleg a kairapan, say Hades so nabakante, tan agnabilang a minilyon nin totoo so napaoli pian nawalaan na pankanawnawa ya oninum ed saratan met a danudanum na bilay. Diad pannonot ed saya, manepeg a tawagen iray baleg ya ulop ya unaan a bungabunga na arum a karnero—sikaray unonan ‘manguras na kawekawes da tan paputien da iratan ed dala na Kordero’ tekep na ilalon manbilay na ando lan ando ed dalin.—Apocalipsis 7:9, 10, 14, 17; 20:12, 13.

15. Antoran piesta a sinelebraan ed Mosaikon Ganggan so pipetekan na taloran nanduruma ya unonan bungabunga?

¹⁵ Sarayan taloran unaan a bunga (si Jesu-Kristo, say 144,000, tan say baleg ya ulop) so walaan na makapainteres iran pipetekan ed saray piestan seselebraan unong ed kadaanan a Mosaikon Ganggan. Nen Nisan 16, kaleganan na Piesta na Andi-Lebaduran Tinapay, sakey a pungo na unaan iran bunga na sebada so inyapay ed si Jehova. (Levitico 23:6-14) Say Nisan 16 so agew a si Jesus so pinaoli. Diad koma-50 ya agew kayari na Nisan 16, diad komatlon bulan, seselebraan na saray Israelita so piesta na panag-ani ed saray unonan bunga na panag-ani ed trigo. (Exodo 23:16; Levitico 23:15, 16) Agnambayag et atawag iyan piesta a Pentecostes (a nanlapud sakey a salitan Griego a mankabaliksan na “koma-limamplo”), tan diad Pentecostes 33 C.E. a saray inmunan membro na 144,000 so alanaan na masanton espiritu. Kaunoran, diad komapiton bulan sano atipon lan amin so interon panagani, wala so Piesta na Saray Kobongkobong, sakey a panaon na maliket a pisasalamat no kapigan sakey simban nanayam iray Israelita ed kobongkobong a gawa ed saray sanga na palma, nilikud ni ed arum a materyales. (Levitico 23:33-43) Mipadpara ed saya, say baleg ya ulop, a kabiangan na baleg a natitipon, so misasalamat ed arap na trono a walaan na “palmas ed saray kalimaan da.”—Apocalipsis 7:9.

Panangiyabawag ed Andi-anggaan a Maong a Balita

16, 17. (a) Iner so akanengnengan nen Juan ed mantektekkiab ya anghel, tan antoy iyaabawag na anghel? (b) Sioparay nalalanor ed kimey a panangipulong ed Panarian, tan antoran eksperiensya so pakapatnagan ed saya?

¹⁶ Intumbok ya insulat nen Juan: “Tan anengneng ko so sananey ya anghel a mantektekkiab dia ed pegley na tawen, a wala ed sikato so andi angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley; et kuanto ed baleg a boses: Takotan yo so Dios, tan iter yo ed sikato so gloria: ta say oras na pangukom to sinmabi la; tan igalang yo so nanggawa ed tawen tan dalin tan say dayat tan saray subol na saray danum.” (Apocalipsis 14:6, 7) Say anghel so mantektekkiab “ed pegley na tawen,” a pantetekkiaban met na saray manok. (Ikompara so Apocalipsis 19:17.) Kanian, say boses to so narengel ed interon globo. Mas arawi ni so nasabi na sayan sankamundoan a panangiyabawag na anghel nen say dinanman a panagbalita ed telebisyon!

¹⁷ Balang sakey so napapaseseg ya ontakot, aliwan diad atap ya ayep tan ed talintao to, noagta ed si Jehova, ya agnaparaan a mas mabiskeg nen say dinanman a simbolikon atap ya ayep a kontrolado nen Satanas. Ona a, ta si Jehova so amalsa ed tawen tan dalin, tan panaon la natan pian ukomen toy dalin! (Ikompara so Genesis 1:1; Apocalipsis 11:18.) Sanen wadia ed dalin si Jesus, impropesiya to so nipaakar ed panaon tayo: “Tan saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.” (Mateo 24:14) Say kongregasyon na alanaan iran Kristiano so manusumpal ed sayan kimey. (1 Corinto 9:16; Efeso 6:15) Ipaparungtal dia na Apocalipsis a saray agnanengneng ya anghel so nalalanor met ed sayan panagpulong a kimey. Agaylan mabetbet a napatnagan iray panangiwanwan na anghel diad pangigigiya ed sakey ed saray Tasi nen Jehova ed abung na nagogonigon a kamarerwa, a manpipirawat, mangipipikasi ni ingen, parad espiritual a tulong!

18. Unong ed anghel a mantektekkiab ed pegley na tawen, sinmabi la so panaon parad anto, tan siopa so manggawa na kaaruman iran anunsio?

¹⁸ Unong ya inyabawag na anghel a mantektekkiab ed pegley na tawen, sinmabi la so panaon na panangukom. Anton panangukom so ipaakseb natan na Dios? Nagigi iray kalayagan diad saray anunsio ya iyabawag natan na komadua, komatlo, komapat, tan komalima ya anghel.—Jeremias 19:3.

[Saray paimano ed leksab]

[Saray litrato ed pahina 202, 203]

144,000

24 a mamasiken

Kaiban mananawir na Kordero, si Jesu-Kristo, a minoria ed duaran mandumaan a punto de bista