-
Antoy Ibabaga na Biblia Tungkol ed Sex?Panliketan so Bilay ya Anggapoy Anggaan!—Panag-aral na Biblia
-
-
LEKSION 41
Antoy Ibabaga na Biblia Tungkol ed Sex?
Agkomportable so dakel ya totoo ya pantongtongan so sex. Balet diad Biblia, prangka tan marespeto so impangibaga to nipaakar ed satan. Makatulong ed sikatayo so ibabaga na Biblia ta nanlapu itan ed si Jehova, say Amalsa ed sikatayo. Amta toy pankaabigan tayo. Ibabaga tod sikatayoy gawaen tayo ya makapaliket ed sikato tan tulongan to tayon nawalaay bilay ya anggapoy anggaan.
1. Antoy panmoria nen Jehova ed sex?
Say sex et regalo nen Jehova. Labay ton na-enjoy itan na laki tan bii ya sanasawa. Lapud sayan regalo to, nawalaan na ananak iray sanasawa. Tan nipanengneng day panangaro da ed sakey tan sakey diad natural tan makapaliket ya paraan. Kanian oniay ibabaga na Salita na Dios: “Manliket ka komon ed bii ya asawam ed inkaugaw mo.” (Proverbio 5:18, 19) Iilaloan nen Jehova ya manmatoor ed sakey tan sakey so sanasawan Kristiano. Kanian ag-iran balot mikakalugoran.—Basaen so Hebreo 13:4.
2. Anto so seksual ya imoralidad?
Ibabaga na Biblia ya “saramay manggagaway seksual ya imoralidad . . . et agda natawir so Panarian na Dios.” (1 Corinto 6:9, 10) Saray nansulat ed Biblia diad lenguahen Greek et inusar day salitan por·neiʹa pian ideskribe so seksual ya imoralidad. Kaibad labay ya ibaga na satan so (1) seksual ya relasyona na aliwan sanasawa, (2) pagmaliw ya homoseksual, tan (3) pi-sex ed ayep. No ‘paliisan tayoy seksual ya imoralidad,’ napaliket tayo si Jehova tan sikatayo lanlamang so nagunggonaan.—1 Tesalonica 4:3.
DAKEL NI NAARALAN MO
Amtaen no panon mon napaliisan so seksual ya imoralidad tan no panon kan nagunggonaan no mansiansia kan malinis ed moral.
3. Ibatikan so seksual ya imoralidad
Walay sakey ya matoor ya laki, si Jose, ya ginawa toy anggaay nayarian ton mansiansian malinis ed moral. Basaen so Genesis 39:1-12, insan ebatan iraya:
Akin et binmatik si Jose?—Nengnengen so bersikulo 9.
Parad sika, duga kasi so desisyon nen Jose? Akin ey?
Panon ya naalig na saray kabataan si Jose tan nibatikan day seksual ya imoralidad? I-play so VIDEO.
Labay nen Jehova ya amin tayo et paliisan tayoy imoralidad. Basaen so 1 Corinto 6:18, insan ebatan iraya:
Anto ray situasyon ya nayarin natukso so sakey ya manggawa na imoral?
Panon mon ibatikan odino napaliisan so imoralidad?
4. Nalabanan mo so tukso
Akin et mairap no maminsan ya labanan so tukson manggaway imoral? I-play so VIDEO, insan ebatan iya.
Diad video, alikas na brother ya no agmanalwar ed iisipen tan gagawaen to, ompan agmakapanmatoor ed asawa to. Kanian antoy ginawa to?
No maminsan, anggan saray matoor ya Kristiano et naiirapan met ya pansiansiaen ya malinis so panag-isip da. Antoy gawaen mo pian naiwasan moy man-imadyin na imoral iran eksena? Basaen so Filipos 4:8, insan ebatan iraya:
Anto ray dapat tayon isipen?
Panon ya makatulong so panagbasa na Biblia tan pagmaliw ya busy ed panlilingkor ed si Jehova pian nalabanan tayoy tukson mankasalanan?
5. Parad pankaabigan tayo iray estandarte nen Jehova
Amta nen Jehova no antoy pankaabigan tayo. Bibilinen to itayo no panon tayon mansiansian malinis ed moral tan no anto ray nagunggona tayo ed satan. Basaen so Proverbio 7:7-27 odino i-play so VIDEO, insan ebatan iraya.
Panon ya impasubo na kabataan ya laki so sarili to ed makapatukson situasyon?—Nengnengen so Proverbio 7:8, 9.
Nabasa ed Proverbio 7:23, 26 ya mauges so pansumpalan na seksual ya imoralidad. No mansiansia tayon malinis ed moral, anto ray naiwasan tayon problema?
Panon ya makatulong so kalinisan ed moral pian nawalaan tayo na bilay ya anggapoy anggaan?
Iisipen na arum ya alabas tan makapasakit so ibabaga na Biblia tungkol ed homoseksualidad. Pero, say Dios et aro, tan labay to ya panliketan tayo so bilay ya anggapoy anggaan. Pian magmaliw tayon kualipikado, dapat tumboken tayo ray estandarte to. Basaen so 1 Corinto 6:9-11, insan ebatan iya:
Kasin saray homoseksual ya pilpilalek labat so makapuy parad Dios?
Amin tayo et kailangan ya manggawa na pananguman pian napaliket so Dios. Nabawbawi tayo kasi so pansagpot tayo? Basaen so Salmo 19:8, 11, insan ebatan iraya:
Parad sika, duga labat kasi iray estandarte nen Jehova ed moral, odino sobra? Akin ey?
Dakel lay atulongan nen Jehova ya manguman tan onunor ed saray estandarte to ed moral. Sarag to ka met ya tulongan
IBABAGA NA ARUM: “Ayos labat so mi-sex ed anggan siopa, basta inaro day sakey tan sakey.”
Antoy ibagam ey?
SUMARYO
Say sex et regalo nen Jehova ed sanasawan laki tan bii.
Rebyu
Antoy kaiba ed seksual ya imoralidad?
Panon tayon naiwasan so seksual ya imoralidad?
Anto ray nagunggona tayo no unoren tayoy estandarte nen Jehova ed moral?
DISKOBRIEN
Amtaen no akin ya labay na Dios ya mankasal so saninaro antis iran manamong.
“Antoy Ibabaga na Biblia Nipaakar ed Pan-live in?” (Artikulo ed website)
Amtaen no akin ya say estandarte na Biblia tungkol ed homoseksualidad et agto labay ya ibagan kabusol tayo ray homoseksual.
Amtaen no panon ya manprotekta ed sikatayo iray ganggan na Dios nipaakar ed amin ya seksual ya kagagawa.
Diad sakey ya eksperiensya ya say title to et “Nirespeto da Ak,” nengnengen no panon ya atulongan so sakey ya homoseksual ya umanen so kabibilay to pian napaliket so Dios.
“Uumanen na Biblia so Bilay” (Say Panag-bantayan, Abril–Hunyo 2011)
a Kaibad sarayan aglabay na Dios ya pirerelasyon so nanduruman kagagawa, singa say pan-sex na agsanasawa, oral sex, anal sex, tan pankarapas ed seksual a kayarian na sakey ya agto asawa pian peneken so seksual ya pilalek.
-
-
Antoy Ibabaga na Biblia ed Pagmaliw ya Single tan Walay Asawa?Panliketan so Bilay ya Anggapoy Anggaan!—Panag-aral na Biblia
-
-
LEKSION 42
Antoy Ibabaga na Biblia ed Pagmaliw ya Single tan Walay Asawa?
Papanisiaan na arum ya ag-ira magmaliw ya maliket no ag-ira mangasawa o miasawa. Pero, aliwan amin ya sanasawa et maliket. Tan aliwan amin ya single et maermen. Diad tua, ibabaga na Biblia ya say pagmaliw ya single tan walaay asawa et parehon regalo.
1. Anto ray gunggona na pagmaliw ya single?
Ibabaga na Biblia: “Siopaman a mangasawa et nagunggonaan, balet samay agmangasawa et mas nagunggonaan.” (Basaen so 1 Corinto 7:32, 33, 38.) Akin et nibagan “mas nagunggonaan” iray single? Saray single ya Kristiano et anggapoy asikasoen da ya asawa ra. Kanian mas dakel so panaon da. Singa bilang, diad panaglingkor da ed si Jehova, mas dakel so pankanawnawa da ya onlad arum ya lugar pian manpulong. Tan say sankaimportantian, mas dakel so panaon dan napaapit so relasyon da ed si Jehova.
2. Anto ray gunggona na legal ya pankasal?
Singa say pagmaliw ya single, wala met iray gunggona na pangasawa o piasawa. Ibabaga na Biblia ya “mas maong ni duara nen say sakey.” (Eclesiastes 4:9) Tudtua iya ed saray Kristiano ya iyaaplika da iray prinsipyo ed Biblia diad panamaley da. Saray legal ya nankasal et nansipanan iran aroen, respetoen, tan pablien so sakey tan sakey. Kanian walay deen na isip da nen saramay manli-live in. Tan lapud kasal ira, naprotektaan iray anak da.
3. Antoy pangipapasen nen Jehova ed panangasawa?
Nen kinasal nen Jehova so inmunan sanasawa, imbaga to: “Taynan na laki so ama tan ina to tan iyamong toy asawa to.” (Genesis 2:24) Labay nen Jehova ya manaroan so sanasawa tan legay bilay iran manamong. Papayagan to labat so pandiborsyo no akikalugoran so sakey. No ontan so situasyon, iikdan nen Jehova na karapatan so anggapoy kasalanan ya asawa ya mandesisyon no kasin idiborsyo toy asawa to.a (Mateo 19:9) Agpapayagan nen Jehova iray Kristiano ya mangasawa na pigapigara (poligamya).—1 Timoteo 3:2.
DAKEL NI NAARALAN MO
Amtaen no panon kan magmaliw ya maliket tan no panon mon napaliket si Jehova, balanglan single ka o walay asawam.
4. Usar mod sankaabigan so regalon pagmaliw ya single
Parad si Jesus, regalo so pagmaliw ya single. (Mateo 19:11, 12) Basaen so Mateo 4:23, insan ebatan iya:
Panon ya inusar nen Jesus so regalon pagmaliw ya single pian lingkoran so Ama to tan tulongay arum?
Singa si Jesus, nausar na saray Kristiano so inka-single da pian magmaliw iran maliket. I-play so VIDEO, insan ebatan iya.
Panon ya na-enjoy na saray Kristiano so pagmaliw dan single?
Kasin antam?
Anggapoy ibabaga na Biblia ya edad na pangasawa o piasawa. Pero, bibilinen na Biblia so kada sakey ya manalagar ni anggad “linmampas lad taon na kalangweran to.” Ta diad satan et makmaksil ni seksual ya pilalek to ya nayarin makaapekto ed saray desisyon to.—1 Corinto 7:36.
5. Pilim ya maong so asawaen o piasawaan mo
Say pampili na asawaen o piasawaan mo et sakey ed saray sankaimportantian ya desisyon ya gawaen mo. Basaen so Mateo 19:4-6, 9, insan ebatan iya:
Akin et agdapat maganat so sakey ya Kristiano ya mangasawa o miasawa?
Makatulong so Biblia pian naamtaan no antoy anapen mo ed magmaliw ya asawam. Say sankaimportantian, pilim imay inar-aro to si Jehova.b Basaen so 1 Corinto 7:39 tan 2 Corinto 6:14. Insan ebatan iraya:
Akin et mangasawa o miasawa labat diad kapananisiaan?
Parad sika, anto kasi nalikna nen Jehova no say asawaen o piasawaan mo et agmangaaro ed sikato?
No panibaen ed sakey ya pako so duaran nandumaan ya ayayep, nairapan ira. Ontan met, no say sakey ya Kristiano et mangasawa o miasawa ed agkapananisiaan, dakel so magmaliw ya problema
6. Aligen so pangipapasen nen Jehova ed panangasawa
Nensaman diad Israel, ididiborsyo na saray lalaki iray kaasawaan da lapud makasarili tan ataptapew iran rason. Basaen so Malaquias 2:13, 14, 16, insan ebatan iya:
Akin et kabusol nen Jehova so pandiborsyo ya ataptapew so rason?
Nasakitan na pikakalugoran tan pandiborsyo so anggapoy kasalanan ya asawa tan ananak
I-play so VIDEO, insan ebatan iya.
No aliwan mananisia so asawam, antoy gawaen mo pian maliket nin siansia so panamaley yo?
7. Unoren iray estandarte nen Jehova ed panangasawa
Ompan mansagpot ya maong so sakey pian naunor to iray estandarte nen Jehova ed panangasawa.c Pero, bendisyonan nen Jehova no gawaen to ’tan. I-play so VIDEO.
Basaen so Hebreo 13:4, insan ebatan iraya:
Parad sika, duga labat kasi iray estandarte nen Jehova ed panangasawa? Akin ey?
Diad maslak ya bansa, igaganggan na gobierno ya iparehistro so kasal tan diborsyo. Kanian ontan met so iilaloan nen Jehova ed saray Kristiano. Basaen so Tito 3:1, insan ebatan iya:
No walay asawam, segurado ka ya legal ya akarehistro ed gobierno so kasal yo?
NO ITEPET NA ARUM: “Akin et manpakasal ni? Sarag to met so man-live in diba?”
Antoy ibagam ey?
SUMARYO
Say pagmaliw ya single tan walaan na asawa et regalo nen Jehova. Parehon makapaliket tan parad pankaabigan tayo iratan no unoren tayoy panlabayan nen Jehova.
Rebyu
Panon ya usaren na sakey so pagmaliw ton single diad sankaabigan ya paraan?
Akin ya imbaga na Biblia ya miasawa labat ed kapananisiaan?
Antoy ibabaga na Biblia ya saksakey ya rason na pandiborsyo?
DISKOBRIEN
Antoy labay ya ibaga na mangasawa o miasawa “dia labat ed Katawan”?
“Tepetepet Manlapud Saray Managbasa” (Say Panag-bantayan, Hulyo 1, 2004)
Bantayan so duaran dramatization ya ontulong ed sika pian makapandesisyon nipaakar ed pii-inaroan tan panangasawa.
Amtaen no akin ya parad sakey ya brother et mas importante ni relasyon to ed si Jehova nen say anggan anton insakripisyo to.
Anto ray ikonsidera na sakey antis ya midiborsyo o misian?
“Pagalangan no Antoy ‘Impankasakey na Dios’” (Say Panag-bantayan, Disyembre 2018)
a Nengnengen so Kaaruman ya Impormasyon 4 nipaakar ed pansian no anggapoy agawan pikakalugoran.
b Diad arum ya kultura, atateng so manpipili na asawaen o piasawaan na ananak da. No ontan so situasyon, aliwan say kuarta, kipapasen o estado ed bilay so manunan ikokonsidera na maaron atateng. Imbes, no kasin inaro na samay pipilien da si Jehova.
c No walay ka-live in mo, personal ya desisyon mo no kasin pakasalan mo odino pultoten mo lay relasyon mo ed sikato.
-