Say Kualidad na Pananisiam—Nasusubok La
“Agagik ira, ibilang yo ya amin a liket no napelag kayo ed nambabangil a katuksoan, amtaen yo a say panalsali ed pananisia yo gawaen to so anos [“panagsungdo,” NW].—SANTIAGO 1:2, 3.
1. Akin a nailaloan na Kristianos so subsubok ed pananisia ra?
AGPA labay na tuan Kristianos a manirap, tan agda panliketan so pakasagmak na ot-ot odino pakapabpaabeba. Ingen, sinononot ira ed saray salita ed tagey ya insulat na agi nen Jesus ed ina a si Santiago. Inlinew nen Kristo ed saray babangatan to a nailaloan day kapasegsegang tan arum niran kairapan lapud panutumbok da ed saray estandarte na Dios. (Mateo 10:34; 24:9-13; Juan 16:33) Anggaman ontan, mansumpal ed gayaga iratan a subok. Panon ya ontan?
2. (a) Panon a mansumpal ed gayaga iray pakasubokan na pananisia tayo? (b) Panon a nayadyari na panagsungdo so gawa to ed kipapasen tayo?
2 Say manunan rason a naromog tayoy gayaga ed silong na saray pakasalsali odino subsubok na pananisia et lapud saraya so makapawala na maong iran bunga. Singa kuan la nen Santiago, say pananos ed arap na saray subok odino kairapan et ‘gawaen to so panagsungdo.’ Nagunggunaan tayo diad pamaaligwas ed satan a makanakanan Kristianon kualidad. Insulat nen Santiago: “Paulyan yo komon so anos [“panagsungdo,” NW] a wala so ayadyarin gawa to, pian ayadyari kayo komon tan napnek kayo ya andi-kulang.” (Santiago 1:4) Walay kimey a susumpalen na panagsungdo, sakey a “gawa.” Apabtangan itan a pagmaliwen to itayon nagnap ed amin a pamaakaran, a tulongan to itayon magmaliw ya asimbang tan matatken a Kristianos. Kanian, diad pangiyabuloy ya onlabas iray pakasalsali ya agsasalien ya usaren so agmakasulatan a paraan pian panganggaen itan a tampol, bilang resulta et nasubok tan napino so pananisia tayo. No onkukulang tayo na tepel, panangabagey, kaabigan, odino aro ed pidedeneng ed saray situasyon odino ed saray kaparan too, lalo itayon pagmaliwen a nagnap na panagsungdo. On, say mantutumbokan et: Pawalaen na subsubok so panagsungdo; padaaken na panagsungdo so kualidades bilang Kristiano; saraya so pansengegay gayaga.—1 Pedro 4:14; 2 Pedro 1:5-8.
3. Akin ya agtayo onsesener lapud takot ed saray pakasalsali odino ed subok ed pananisia?
3 Impabitar met nen apostol Pedro no akin ya agtayo ontakot odino onsener manlapud pakasubsubokay pananisia tayo. Insulat to: “A sikato so panliketan yo na baleg, anggaman nagonigon kayo la ni natan na saray nambabangil a katuksoan, no ontan so nakaukolan. Pian say pakamintuan na pananisia yo, a mamabli nen say balitok, ta saya et naderal. Anggaman nisali ed apuy, naalmo ed dayew, gayaga tan galang yo no ompanengneng si Jesu-Kristo.” (1 Pedro 1:6, 7) Sarayan salita so nagkalalo lan makapaseseg natan lapud say “baleg ya irap”—say panaon na panangidayew, panangigloria, panangigalang, tan kililiktar—so mas asingger nen say isisipen na arum tan mas asingger ni sanen nagmaliw itayon mananisia.—Mateo 24:21; Roma 13:11, 12.
4. Komustay liknaan na sakey ya agi tan arum niran alanaan a Kristiano nipaakar ed saray subok a naeksperiensia ra?
4 Diad akadkaunan artikulo, akonsidera tayoray subok ya inarap na alanaan a nakdaan nanlapulad 1914 a manpatuloy. Kasin basiyan iraya na panggayaga? Initer nen A. H. Macmillan iyan panmoria ed apalabas: “Anengneng ko so dakel a pirmin pakasalsali a sinmabi’d organisasyon tan impakasubokay pananisia na saramay kabiangan to. Diad tulong na espiritu na Dios et nansiansia tan nantultuloy itan a binmulaslas. Anengneng ko so kakabatan na siaanos a panalagar ed si Jehova a mamalinew ed pakatalos tayo’d Makasulatan iran bengatla imbes a panermenay balon punto. . . . Anggano antokaman niray pananguman a panapanaon a gawaen tayo’d saray panmoria tayo, agto itan umaney maabig a probisyon na dondon tan say sipan na Dios a magnayon a bilay. Kanian agtayo papaleteyey pananisia tayo lapu labat la’d ag-asumpal iran iilaloan odino pananguman ed saray panmoria.”—The Watchtower, Agosto 15, 1966, pahina 504.
5. (a) Antoran gungguna so nanresulta ed pakakasagmak na say nakdaan ed saray subok? (b) Akin a say pamaakaran na pakasubokan et paninteresan tayo natan?
5 Saray alanaan a Kristianon nilabas day panaon a panagsubok na 1914-19 so nibulos manlapud manodominan impluensia na mundo tan manlapud dakel a Binababilonian relihyoson agagamil. Inmabanti so nakdaan bilang alinisan tan agogolan a totoo, a sibubulos dan iyaapay iray bagat na panangidayew ed Dios tan napapaseguroan a bilang totoo et abobonan to. (Isaias 52:11; 2 Corinto 6:14-18) Ginmapon inmuna so panangukom diad abung na Dios, balet ta agnakompleto itan ed sakey a nigetar a peryodo. Mantutultuloy ni so panagsubok tan panagyakayak ed totoo na Dios. Saramay manilalon makaliktar ed manasingger lan ‘baleg a kairapan’ bilang kabiangan na “baleg ya ulop” so nasusubok met ed pananisia ra. (Apocalipsis 7:9, 14) Nagagawa iya ed saray paraan a mipara’d naeksperiensia na saray alanaan a nakdaan tan ed arum niran paraan.
Panon Kan Nasubok?
6. Antoy sakey a nengneng na pirmin subok a naeeksperiensia na dakel?
6 Inisip la na dakel a Kristiano so nipaakar ed angat a natalindegan iray subok diad pormay direktan arap-arapan a panangataki. Nanonotan da iyan report: “Nen impatawag [na Judion papangulo] so saray apostoles, tan kayari da ran nilewet imbilin da ed sikara ya agda salitaen so ngaran nen Jesus, et imbulos da ra. Sikara siri’ pinmaway ed arap na singbatan, a malikeliket ira lapud kinmana ra a nantepel na baing ed ngaran nen Jesus.” (Gawa 5:40, 41) Tan say modernon awaran na totoo na Dios, nagkalalo la legan na saray guerra mundial, so mangipapabitar a dakel ed Tastasi nen Jehova so aktual ya akaeksperiensia na panagpekpek, tan mas alabas ni, diad lima na saray managpasegsegang.
7. Diad anton laknab so ginawa na pigaran modernon-agew a Kristianos diad panangipatnag na pananisia?
7 No nipaakar ed pagmamaliw na Kristianos a puntirya na panamasegsegang, ag-iduduma na mundo iray alanaan a nakdaan ed say baleg ya ulop na “arum a karnero.” (Juan 10:16) Diad inlabas na taotaon, pirmin nasusubok iray membro na namparan grupo diad inkipangaw tan inkamartir ni ingen lapud aro ra’d Dios tan pananisia ra’d sikato. Kaukolan na namparan grupo so espiritu na Dios, antokamay ilalo ra. (Ikompara so Say Panag-Bantayan, Hunyo 15, 1996, pahina 31.) Kaleganay dekada na 1930 tan 1940 ed Nazi Alemanya, dakerakel ya aripen nen Jehova, pati ugugaw, so angipatnag na ekstraordinaryon pananisia, tan dakerakel so alablabas ya asubok. Diad agano niran panaon et sinasagmak na totoo nen Jehova so panamasegsegang diad daldalin a singa say Burundi, Eritrea, Ethiopia, Malawi, Mozambique, Rwanda, Singapore, tan Zaire. Tan tuloytuloy ni so oniaran subok.
8. Panon a saray komento na agin Aprikano so mangipapanengneng a mas ni so nasasaglawi ed pakasubok na pananisia tayo nen say pansungdo ed panamasegsegang diad pormay panagpekpek?
8 Balet, singa nipaimano la, say pananisia tayo so nasusubok met diad mas masilib iran paraan. Arum ed saray subok so aliwan tanton direkta tan mainomay a nabidbir. Konsideraen pay liknaan mo ed pigara’d onggendan. Sakey ya agin laki ed Angola a walaay samploran anak so kabiangay kongregasyon ya abayaglan apultot so pitatalosan ed saray responsablin agagi. Saginonor et posibli lay pakabisitay arum ed kongregasyon. Sikatoy atepetan no panon ton tataganoey pamilya to. Agtampol akaebat, tan say nibaga to labat et mairap so situasyon. Kasin asarag ton apakan so ananak to ya anggan panon et maminsan ed sakey agew? Inyebat to: “Bueno, ngalngalin andi. Inaral mi lan pasaragen no antoy walad sikami.” Insan tekep na kombiksion, inkuanto: “Balet agta onia so ilaloan tayo ed sarayan kaunoran ya agew?” Say ontan a pananisia so makatantanda ed mundo, balet ta kaslakan la itan ed limog na matoor a Kristianos, a walaan na sigpot a kompiyansa a nasumpal iray sipan nipaakar ed Panarian.
9. Panon tayon nasusubok a mitunosan ed 1 Corinto 11:3?
9 Say baleg ya ulop so nasusubok met ed panagpasakop da’d teokratiko iran totontonen. Say sankamundoan a Kristianon kongregasyon so nididirehi unong ed madibino iran prinsipyo tan teokratiko iran estandarte. Kabaliksan ton nia so pamidbir nin unona ed si Jesus bilang say Lider, samay tinuro bilang Ulo na kongregasyon. (1 Corinto 11:3) Say mabulos a panpasakop ed sikato tan ed Ama to so nipapatnag diad pananisia tayo’d teokratiko iran pananuro tan saray desisyon a nisisiglaot ed pankakasakey tayon manggaway linawa nen Jehova. Niarum ni, diad kada lokal a kongregasyon, walaray lalakin aturon mangidaulo. Sikaray ag-ayadyarin lalakin mainomay tayon naimano iray pakaluksoan da; ingen napapaseseg tayon respetoen so ontan iran manangasikaso tan manpasakop ed sikara. (Hebreos 13:7, 17) Kasin no maminsan et naromog mo itan a makapaangat? Kasin peteg iyan sakey a subok ed sika? No ontan, kasin nagugunggunaan ka ed sayan pakakasubok na pananisiam?
10. Anton subok so aarapen tayo no nipaakar ed lawak a ministeryo?
10 Nasusubok tayo met ed pribilihyo tan kakaukolanen a mibiang a maparanay diad lawak a ministeryo. Ta pian makalabas tayo ed sayan subok, nepeg tayon moriaen a say sigpot a pakapibiang ed ministeryo et sasaglawien toy mas ni nen say dagdaiset, odino paspasaray, a panagpulong. Tandaan so maapabor a komento nen Jesus nipaakar ed pobrin balo a bii ya inter ton amin so walad sikato. (Marcos 12:41-44) Nayarin tepetan tayoy inkasikatayo, ‘Iiter ko ta met so inkasiak nipaakar ed lawak a ministeryok?’ Amin tayo so kaukolan a Tastasi nen Jehova ed amin a panaon, sipaparaan a mangisindag na liwawa tayo ed amin a pankanawnawa.—Mateo 5:16.
11. Panon a say pananguman ed pantalos odino konseho ed kondukta et magmaliw a sakey a subok?
11 Sananey nin subok a nayarin arapen tayo et nisisiglaot ed kaaralem na apresasyon parad onaadilantan liwawa na katuaan ed Biblia tan ed konsehon intarok na matoor ya aripen a klase. (Mateo 24:45) No maminsan et kakaukolanen na saya so panangiyarunsa ed personal a kondukta, a singa sanen apalinew a saramay mantatabako so kaukolan ya ontunda ed satan no labay day mansiansia ed kongregasyon.a (2 Corinto 7:1) Odino say subok et nipaakar ed panangawat tayo ed pankaukolan ya umaney kaliktan tayon musiko odino arum niran pormay panagligliwaan.b Kasin suppiaten tayo so kakabatan na konsehon niiiter? Odino abuloyan tayoy espiritu na Dios a manmoldi’d kaisipan tayo tan ontulong ed sikatayon isulong so Kristianon personalidad?—Efeso 4:20-24; 5:3-5.
12. Anto so nakakaukolan pian ombiskeg so pananisia kayari a nabautismoan so sakey?
12 Diad loob na saray dekada, say bilang na saramay kabiangay baleg ya ulop so ondarakel, tan kayari bautismo ra itutultuloy dan papabiskegen so relasyon da ed si Jehova. Sasaglawien na saya so mas ni nen say iyaatendi’d Kristianon asamblea, pipiaral ed Kingdom Hall, odino tunggal paminsan a pibibiang ed lawak a serbisyo. Pian iyilustra: Say sakey a too so nayarin literal ya akapaway la’d Babilonia a Baleg, say sankamundoan ya imperyo na palson relihyon, balet kasin talagan tinaynan to la itan? Siansia ni kasin ompepeket ed saray bengatlan mangisisindag ed awawey na Babilonia a Baleg—awawey ya agmangingalngalep ed saray matunong ya estandarte na Dios? Kasin leleglemewen to so moralidad tan katooran ed panamaley? Kasin manuna ton paniinteresay personal tan materyal a bengatla nen say espiritual? On, kasin sikatoy mansiasiansian andi-matik ed mundo?—Santiago 1:27.
Gungguna Manlapud Asubok a Pananisia
13, 14. Antoy ginawa na arum kayari inggapo ra ed dalan na tuan panagdayew?
13 No peteg a tinaynan ti la so Babilonia a Baleg tan pinmaway met la ed mundo, agti la onlilingaw ed saray bengatlan binenegan. Mitunosan ed prinsipyon naromog ed Lucas 9:62, siopaman ed sikatayo ya onlingay ed binenegan et mankabaliksay agto pakapagmaliw a sakop na Panarian na Dios. Inkuan nen Jesus: “Anggapo so too a sano inyan to so lima to ed araro, et onlingay ed beneg, et makana ed panarian na Dios.”
14 Balet arum ed saray nagmaliw a Kristiano ed apalabas et inabuloyan day inkasikaran miuso ed sayan sistema na bengabengatla. Agda niresistian so espiritu na mundo. (2 Pedro 2:20-22) Saray minumundon pakatalibagaan so angala’d interes tan panaon da, a nansengegay kaamper na ibubulaslas da. Imbes a sipepekder dan iteen iray nonot tan kapusoan da ed Panarian na Dios tan ed inkatunong to, ya iyuuna itan ed bilay, impireg da itan pian gegemtaney materyalistiko iran kalat. Likud no napakiwas iran mangaksobin maletey so pananisia ra tan walad malainem-em a kipapasen tan umaney kurang da diad pananap na madibinon simbawa, walara’d kaatapan na pakaandiy mablin relasyon da’d si Jehova tan say organisasyon to.—Apocalipsis 3:15-19.
15. Anto so nakakaukolan ta pian mansiansian naabobonan na Dios?
15 Say pagmamaliw tayon naabobonan tan napidasig parad kililiktar ed maples ya onsasabin baleg a kairapan so mandedependi’d pansiansia tayon malinis, a walan ‘inurasan iray kawes tayo ed dala na Kordero.’ (Apocalipsis 7:9-14; 1 Corinto 6:11) No agtayo mantinien so malinis, matunong a talindeg ed arap na Dios, agnaabobonan so sagradon serbisyo tayo. Maseguron kaukolan a moriaen na balang sakey ed sikatayo a say asubok a kualidad na pananisia so ontulong ed sikatayon mansungdo tan napaliisay pamaermen ed Dios.
16. Diad antoran dalan a say katilaan et napaneknekan a pakasubokay pananisia tayo?
16 Panapanaon, say news media tan saray autoridad ed mundo so sititilan mangaakusa’d totoo na Dios, a papaugesen iray Kristianon sisiaen tan kabibilay tayo. Agtayo iya pankelawan, lapud malinlinew ya ipapanengneng nen Jesus a ‘gulaen itayo na mundo lapud ag-itayo kabiangan ed satan.’ (Juan 17:14) Kasin abuloyan tayo iramay bubulagen nen Satanas a mamagyaw tan mamatalaw ed liknaan tayo pian ibaing so maong a balita? Abuloyan tayo ta iray katilaan nipaakar ed katuaan a mangapekta’d regular a pipiaral tan panagpulong tayo? Odino ontalindeg tayon malet tan magmaliw a makpel tan mas determinado nen say kapiganman ya itultuloy so pangiyabawag na katuaan nipaakar ed si Jehova tan say Panarian to?
17. Anton panamaseguro so managyat ed sikatayon ituloy so pangipanengneng na pananisia?
17 Unong ed asumpal a propesiya na Biblia, manbibilay ti la’d utel na panaoy anggaan. Saray nibase’d Biblian iilaloan tayo parad balon mundo na inkatunong so maseguron magmaliw a makapaliket a kasumpalan. Anggad agni asabi itan ya agew, agamilen tayo komon ya amin so agnatenyeg a pananisia ed Salita na Dios tan paneknekan tayoy pananisia tayo diad ag-itayer ed pangipulong na maong a balita na Panarian ed sankamundoan. Isipen paray nilibon balon babangatan a nababautismoan ed kada simba. Agta magenap itan a rason pian pisalsalamatan tayo so panaanos nen Jehova nipaakar ed panangipaakseb ed panangukom to a manresulta’d kilalaban na dakel nin totoo? Agtayo ta panggayagaan ya iyaabuloy na Dios iyan manangisalbay-bilay a panagpulong nipaakar ed Panarian a mantultuloy ni? Tan agta naliliketan tayo ya aawaten na minilyon so katuaan tan idedemostra ray pananisia ra?
18. Antoy determinasyon mo no nipaakar ed panaglingkor ed si Jehova?
18 Agtayo nibaga no kaunongan kabayag ni na kaplesan a panagsubok ed pananisia tayo. Balet saya so segsegurado: Intadia nen Jehova so agew na pikuentaanan to’d sayan kaplesan a marelmeng a katawenan tan dalin. Ambegya, determinado tayo komon ya aligen so matalonggaring a kualidad na asubok a pananisian impatnag na Manamayadyari na pananisia tayo, si Jesus. Tan tumboken tayo komon so alimbawa na ontatatken lan alanaan a nakdaan pati saramay arum a sipapakpel a manlilingkor ed limog tayo.
19. Antoy nasegurom a manaeg ed sayan mundo?
19 Kaukolan a determinado tayon iyabawag ya andi-tunda so andi-anggaan a maong a balita ed balang nasyon, tribu, pansasalita, tan totoo bilang pikokoopera ed mantektekkiab ya anghel ed pegley-tawen. Iparengel ed sikara so anghelikon pangiyaabawag: “Takotan yo so Dios, tan iter yo ed sikato so gloria; ta say oras na panangukom to sinmabi la.” (Apocalipsis 14:6, 7) Sano nipaakseb itan a madibinon panangukom, antoy panresultaay asubok a kualidad na pananisia tayo? Agta magmaliw itan a maglorian itatalona—kililiktar manlapud peles a sistema na bengabengatla ya ompugta’d matunong a balon mundo na Dios? Diad pakakasungdo’d saray pakasubokay pananisia tayo, nayarian tayon ikuan, so singa inkuan nen apostol Juan: “Saya so pananalo a manaeg ed mundo, salanti say pananisia tayo.”—1 Juan 5:4.
[Saray paimano ed leksab]
a Nengnengen so The Watchtower na Hunyo 1, 1973, pahina 336-43, tan Hulyo 1, 1973, pahina 409-11.
b Nengnengen so The Watchtower na Hulyo 15, 1983, pahina 27-31.
Kasin Natandaan Yo?
◻ Panon a saray subok ed pananisia tayo et pansengegay gayaga?
◻ Antoray pigaran subok ed pananisia tayo a medyo mairap a nabidbiran?
◻ Panon tayon magnayon a nagunggunaan diad panalona ed subsubok ed pananisia tayo?
[Saray litrato ed pahina 17]
Si A. H. Macmillan (arap a kawigi) ngalngali ed panaon sanen sikato tan saray opisyal na Watch Tower Society so agmakatunongan ya impisok
Sikatoy delegado ed kombension diad Detroit, Michigan, 1928
Diad kaunoran iran taon to, si Brother Macmillan so siansian mangipapatnag na pananisia
[Litrato ed pahina 18]
Singa sayan pamilya, dakel a Kristiano diad Aprika so angipatnag la na asubok a kualidad na pananisia