Kasin Akaloob Ka la ed Painawa na Dios?
“Say linmoob ed panpainawa to [“na Dios,” NW], dili a sikato nanpainawa met ed saray kimey to.”—HEBREOS 4:10.
1. Akin a panpilpilalekay painawa?
PAINAWA. Agaylan makapalikliket tan marakerakep a salita! Diad pambibilay ed sayan talikarkaran tan matrabahon mundo, maslak so miabobon ed sikatayo a kalkaliktaney daiset a painawa. Ugaw man odino matatken, walay asawa odino anggapo, sikatayon amin so nakekesawan tan nababanalan nisesengeg ed inagew-agew a panagbilay. Parad saramay walaay limitasyon odino sakit ed laman, kada agew et sakey ya angat. Unong ya ibabaga na Biblia, “[say] lapag a pinalsa maningel ira ya amin tan maniirap ira a mananak ya anggad natan.” (Roma 8:22) Say toon manpapainawa et agto labay ya ibagan mangiras. Say painawa et sakey a pankaukolan na too a nepeg a napenek.
2. Nanlapula’d kapigan a si Jehova so manpapainawa la?
2 Si Jehova a Dios mismo et manpapainawa. Diad libro na Genesis et nabasa tayo: “Onia so inkasumpal na saray katawenan tan say dalin, tan amin a lugan da. Insan sanen komapito ya agew intunda na Dios so kimey to a ginawa to; et nanpainawa ed amin a kimey to a ginawa to ed saman a komapito ya agew.” Isisiglaot nen Jehova so nikaduman kaimportantian ed “komapito ya agew,” ta ituloy ya ikuan na apuyanan a rekord: “Say Dios benindisionan to so komapito ya agew, tan sinantipika to [“pinagmaliw ton sagrado,” NW].”—Genesis 2:1-3.
Nampainawa so Dios ed Kimey To
3. Anto so agnayari iran rason no akin a say Dios et nampainawa?
3 Akin a nampainawa so Dios ed “komapito ya agew”? Siempre, agto nampainawa lapud sikatoy naksawan la. Si Jehova so walaay “[alay] kabaleg a tuloy na biskeg . . . ed pakapanyari” tan “ag-onkapuy tan agmet nakesawan.” (Isaias 40:26, 28) Nisay nampainawa so Dios lapud kaukolan toy ontundan magano odino manguman na kurang, ta imbaga la’d sikatayo nen Jesus: “Si Amak mankikimey ni angga ed natan, tan siak mankimey ak.” (Juan 5:17) Diad dinanman a kaso, “say Dios sikatoy sakey ya Espiritu” tan sikatoy agnisilong ed saray sikulo na laman tan saray pankaukolan na pisikal iran palsa.—Juan 4:24.
4. Diad anton dalan a say “komapito ya agew” et duma manlapud apalabas iran anemiran “agew”?
4 Panon tayon nagamoray aralem a pakatalos no akin a say Dios et nampainawa ed “komapito ya agew”? Diad pangimano ed satan, anggaman aliketan a tuloy ed agawaan to ed loob na andukey a peryodo na say anemiran apalabas a panamalsa ‘iran agew,’ espisipikon benindisionan na Dios so “komapito ya agew” tan improklama itan a “sagrado.” Uukeran na Concise Oxford Dictionary so “sagrado” bilang “nikabkabiig a nidedika odino nitukoy (ed sakey a dios odino ed relihyoson gagala).” Kanian, say impamendision nen Jehova ed “komapito ya agew” tan impangiproklama’d satan a sagrado so mangipapanengneng a satan tan say “painawa” to et talagan walay koneksion ed sagradon linawa tan gagala to imbes a lapud walay pankaukolan ed biang to. Anto itan a koneksion?
5. Anto so pinakurang na Dios legan na inmunan anemiran panamalsan “agew”?
5 Legan na inmunan anemiran panamalsa ‘iran agew,’ ginawa tan pinakurang na Dios so amin a sikulo tan leyes a manguuley ed kikurang na say dalin tan amin a bengatla’d liber to. Natan et natatalosan la na saray sientista a talagan makapakelkelaw so inkadesinyo na saraya. Diad pansamposampot na “komanem ya agew,” pinalsa na Dios so inmunan sankaparis a too tan impasen ira ed “sakey a tanamanan ed Eden ed dapit bukig.” Kaunoran, improklama na Dios so gagala to nipaakar ed atooan a pamilya tan ed dalin diad sarayan mapropetikon salita: “Manbunga kayo, tan ondakel kayo, tan makmakan yo so dalin, tan sikato so patuloken yo, tan niiter ed sikayo so pakauley ed saray sirasira na dayat, tan pakauley ed saray manok ya atap ed saray tawen, tan amin a bengatla a mabilay ya onggalaw dia ed dalin.”—Genesis 1:28, 31; 2:8.
6. (a) Diad sampot na “komanem ya agew,” antoy liknaan na Dios ed amin a pinalsa to? (b) Diad anton pantalos a say “komapito ya agew” et sagrado?
6 Diad pansamposampot la na “komanem ya agew” na panamalsa, ibabaga ed sikatayo na salaysay: “Say Dios anengneng to so amin a bengatla a ginawa to, et nia maong iran tuloy.” (Genesis 1:31) Aliketan so Dios ed amin a bengatlan ginawa to. Sikato sirin so nampainawa, odino tinmunda, ed pangituloy ni na panamalsa no nipaakar ed dalin. Anggan onman la kanagnap tan kasanting so paraison tanamanan, melag lambengat a lugar so akobrian to, tan wala labat so duaran pinalsan too ed tapew na dalin. Kaukolan so panaon pian say dalin tan say atooan a pamilya et nasabi toy kipapasen unong ed ginagala na Dios. Lapud saya, inyareglo toy “komapito ya agew” a mangiyabuloy ed amin a pinalsa to ed ontumbok ya anemiran “agew” ya onaligwas a mitunosan ed sagradon linawa to. (Ikompara so Efeso 1:11.) Diad pansamposampot la na “komapito ya agew,” say dalin so magmaliw a sankagloboan a paraison napanayaman a magnayon na pamilyay ayadyarin totoo. (Isaias 45:18) Say “komapito ya agew” so nigana, odino nitalaga ed, kagawa tan kasumpal na linawa na Dios nipaakar ed dalin tan sankatooan. Diad ontan a pantalos a satan so “sagrado.”
7. (a) Diad anton pantalos a say Dios so nampainawa ed “komapito ya agew”? (b) Panoy pakasumpal na amin diad pansampot na “komapito ya agew”?
7 Kanian say Dios so nampainawa ed panamalsa to ed “komapito ya agew.” Singano sikatoy tinmunda tan inabuloyay inggapo ton pakurangen a manumpal ed kurso to. Sigpot so kompiyansa to a diad anggaan na “komapito ya agew,” amin a bengatla so eksakton mansumpal unong ed ginagala to la. Anggano walaray babeng, saratan so natalonaan. Amin a matulok a katooan so nagunggunaan sano say linawa na Dios so sigpot lan nagawa. Anggapo so makaamper ed saya lapud say panamendision na Dios so walad “komapito ya agew,” tan ginawa to itan a “sagrado.” Agaylan maglorian ilalo parad matulok a katooan!
Ag-akaloob so Israel ed Painawa na Dios
8. Kapigan tan panon ya asabin nginilinan na Israelitas so Sabaton?
8 Agunggunaan so Israel manlapud areglo nen Jehova ed kimey tan painawa. Anggan sakbay na impangiter to’d Ganggan ed Israelitas diad Palandey Sinai, imbaga la na Dios ed panamegley nen Moises: “Nengneng yo, lapu ed si Jehova et inter to ed sikayo so agew a panpainawa, kanian iter to ed sikayo ed komanem ya agew so tagano ed duay agew, agkayo onaalis, balang sakey a too ed pasen to, anggapo komon so too ya ompaway ed pasen to ed komapito ya agew.” Say resulta et “saray katooan so nampainawa ra ed komapito ya agew.”—Exodo 16:22-30.
9. Akin a say ganggan ed Sabaton so andi-duaruwan inabrasan pananguman parad saray Israelita?
9 Sayan areglo so balo ed saray Israelita, a kapkapanbulos da manlapud inkaaripen ed Ehipto. Anggaman say panagkuenta na saray Ehipsio tan arum nira ed panaon et peryodo na limara ya anggad samploran agew, imposiblin naabuloyan iray naaripen ya Israelitas a manpainawa na sakey agew. (Ikompara so Exodo 5:1-9.) Makatunongan sirin ya ibagan naabrasa na totoo na Israel iyan pananguman. Imbes a minoria so kakaukolanen a Sabaton bilang sakey a pabelat odino panameget, kaukolan a panliketan da komon a tumboken itan. Diad tua, diad saginonor et imbaga ed sikara na Dios a say Sabaton et onkana bilang panonot ed inkaaripen da ed Ehipto tan ed impangiliktar to’d sikara—Deuteronomio 5:15.
10, 11. (a) Diad pagmaliw a matulok, anto komoy nailaloan na Israelitas a panggayagaan? (b) Akin ya ag-akaloob iray Israelita ed painawa na Dios?
10 No matulok iray Israelitan pinmaway ed Ehipton kaiba day Moises, naikdan ira komon na pribilihyon makaloob ed insipan a “dalin a panagosan na gatas tan dilo.” (Exodo 3:8) Ditan et panggayagaan da komon so tuan painawa, aliwan kaleganay Sabaton labat noagta legay bilay da. (Deuteronomio 12:9, 10) Balet, aliwan ontan so agawa. Nipaakar ed sikara, oniay insulat nen apostol Pablo: “Siopara, so anggan nadngel da, sinagyat da? Nensaman aliwa ta ya amin so saray pinmaway diman ed Ehipto lapu ed kinen Moises? Tan siopa so saray binarongan to ed apataploy taon? Aliwa ta’n saraman so nankasalanan, a saray bankay da naplag ira ed lawak? Tan siopa so saray sinambaan to ya ag-ira makaloob ed painawaan to, noag saraman so agtinmulok? Tan nanengneng tayo lanti ya agda ayarian so linmoob lapu ed agda pananisia.”—Hebreos 3:16-19.
11 Agaylan mabiskeg a leksion parad sikatayo! Lapud inkaandi pananisia ra ed si Jehova, ag-agamoran na satan a kailalakan so inawan insipan to’d sikara. Imbes, sikara so inaatey ed kalawakan. Agda atebek a bilang kapolian nen Abraham, sikaray maapit a nisiglaot ed linawa na Dios diad kitarok na bendisiones ed amin a nasyon na dalin. (Genesis 17:7, 8; 22:18) Imbes a mankimey a mitunosan ed madibinon linawa, sigpot iran agirogiro lapud mauges tan maagum a pilpilalek da. Komon ta agtayo napelag ed ontan a kurso!—1 Corinto 10:6, 10.
Wala Ni Panagpainawa
12. Anton iilaloan so siansian wala parad saray inmunan-siglon Kristiano, tan panon dan nadampot itan?
12 Kayarin impabitar so ag-inloob na Israel ed painawa na Dios lapud inkaandi pananisia, imbaling nen Pablo so imano to ed saray kapananisiaan to. Singa naimano ed Hebreos 4:1-5, pinaseguroan to ira a “wala ni keran sipan ed pakaloob ed painawaan [na Dios].” Pinaseseg ira nen Pablo a mangagamil na pananisia ed “maabig a pakabat,” ta “sikatayo ya anisia onloob itayo ed painawaan.” Lapud nakal la so Ganggan diad panamegley na dondon bagat nen Jesus, agtutukoyen dia nen Pablo so literal a pampainawa ya intarok na Sabaton. (Colosas 2:13, 14) Diad impangaon ed Genesis 2:2 tan Salmo 95:11, pinaseseg nen Pablo iray Hebreon Kristiano ya onloob ed painawa na Dios.
13. Diad impangaon ed Salmo 95, akin ya impaimano nen Pablo so salitan “natan”?
13 Say posibilidad na iloob ed painawa na Dios so “maabig a pakabat” komon parad saray Hebreon Kristiano, no panon a say painawa a Sabaton et nagmaliw a “maabig a pakabat” ed saray Israelitan akadkauna ed sikara. Kanian, pinaseseg nen Pablo iray kapananisiaan to ya agda uuliten so impakalingoan na Israel ed kalawakan. Diad impangisitas ed Salmo 95:7, 8, impaimano toy salitan “natan,” anggaman satan so abayag la, nanlapulad impanpainawa na Dios ed panamalsa. (Hebreos 4:6, 7) Antoy punto nen Pablo? Say “komapito ya agew,” ya inggetar na Dios pian abuloyay sigpot a pakasumpal na gagala to nipaakar ed dalin tan katooan, a siansian onkukurang ed kurso to. Kanian, inkaganatan parad kapara ton Kristianos a mankimey unong ed satan a gagala imbes a magmaliw ya okupado ed sinisiblet iran gegemtan. Imbalikas to lamet so pasakbay ya: “Agyo papaaweten so kapusoan yo.”
14. Panon ya impanengneng nen Pablo a say ‘painawa’ na Dios et wala nin siansia?
14 Niarum ni, impanengneng nen Pablo a say insipan a ‘painawa’ so aliwa lambengat a pamaakaran a panayam ed Insipan a Dalin diad silong na panangidaulo nen Josue. (Josue 21:44) “Tano si Josue inter to komon ed sikara so panpainawa,” inkatunongan nen Pablo, ‘agkomon sasalitaen [na Dios] ed kayari to nia, so sananey ya agew.’ Nisesengeg ed satan, inyarum nen Pablo: “Wala so nakdaan ni sirin a sakey a panpainawa nipaakar ed baley na Dios.” (Hebreos 4:8, 9) Anto so “sabaton a panpainawa”?
Onloob ed Painawa na Dios
15, 16. (a) Antoy kabaliksan na terminon “sabaton a panpainawa”? (b) Antoy kabaliksan na ‘pampainawa ed dilin kimkimey na sakey’?
15 Say balikas a “sabaton a panpainawa” so nipapatalos manlapud Griegon salitan mankabaliksan na “panag-sabaton.” (Kingdom Interlinear) Oniay kuan nen Propesor William Lane: “Inawat na termino so partikular a kualidad to manlapud bilin ed Sabaton ya atibukel diad Judaismo unong ed Exod 20:8-10, a nidanet ditan a say painawa tan dayew et mankaulop . . . Idadanet [to] so nikaduman aspekto na piesta tan gayaga, a nibalikas diad pangigalang tan pangidayew ed Dios.” Kanian, sirin, say insipan a painawa so aliwa lambengat a kibulos manlapud trabaho. Pakauman met itan manlapud makapakesaw, andiay gagalan sagpot a mamaarap ed magayagan serbisyon mamagalang ed Dios.
16 Saya so asalambit ed ontumbok iran salita nen Pablo: “Ta say linmoob ed pampainawa na Dios, dili a sikato nanpainawa met ed saray kimey to unong a say Dios tinmunda ed saray kimey to.” (Hebreos 4:10) Agnampainawa so Dios ed komapiton panamalsan agew lapud naksawan. Imbes, tinmunda manlapud mangaraldalin a panagpalsa ta pian abuloyan toy kinimeyan to ya ombulaslas tan sigpot a nigloria, ed kirayewan tan kigalangan to. Bilang kabiangan na palsa na Dios, kaukolan a mitunosan itayo met ed satan ya areglo. Kaukolan a sikatayo so ‘manpainawa ed dilin kimkimey tayo,’ salanti, tundaan tayon salien ya ikatunongay inkasikatayo ed imaton na Dios diad getman nagamoray kilalaban. Imbes, kaukolan a panisiaan tayo a mandedependi so kilalaban tayo ed dondon bagat nen Jesu-Kristo, a diad panamegley to amin a bengatla lamet so nitarok a mitunosan ed gagala na Dios.—Efeso 1:8-14; Colosas 1:19, 20.
Mangisesekar na Pakayari so Salitay Dios
17. Antoy kurson ginegemtan na Israel ed laman a nepeg tayon paliisan?
17 Ag-akaloob iray Israelita ed insipan a painawa na Dios lapud inkatunganga tan inka-andi pananisia ra. Bilang kasumpalan, pinaseseg nen Pablo iray Hebreon Kristiano: “Pansesegan tayo sirin so onloob ed saman a panagpainawaan, pian anggapo so napelag unong ed saman lanlamang ya alimbawa na ag-itulok” (Hebreos 4:11) Maslak ya inmunan-siglon Judio so ag-angagamil na pananisia ed si Jesus, tan dakel ed sikara so nanirap a tuloy sanen angangga so Judion sistema na bengabengatla nen 70 K.P. Agaylan importanti a walaan itayo na pananisia ed salitan sipan na Dios natan!
18. (a) Antoray rason ya inter nen Pablo pian naagamil so pananisia’d salitay Dios? (b) Panon a say salitay Dios et “makdem nen say anggan dinan a kampilan a duaray tarem”?
18 Walaan itayo na saray makatunongan a rason a mangagamil na pananisia ed salita nen Jehova. Insulat nen Pablo: “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” (Hebreos 4:12) On, say salita, odino mensahe na Dios, so “makdem nen say anggan dinan a kampilan a duaray tarem.” Kaukolan a tandaan na Hebreon Kristianos no antoy agawa ed saray inmunan atateng da. Ibabaliwalay panangukom nen Jehova a sikaray natawtaw ed kalawakan, sinali ray onloob ed Insipan a Dalin. Balet pinasakbayan ira nen Moises: “Say Amalecita tan say Cananeo wala ra ed arapan yo, et ontakba kayo naani ed saray kampilan da.” Sanen anawet-tenten ya impilit na Israelitas, “saray Amalecitas linmasor ira tan saray Cananeo a nanayam ed saman a palandey, et kinabil dara tan dinanel dara ya angga ed Jorma.” (Numeros 14:39-45) Mas makdem so salita nen Jehova nen say dinanman a duaray tarem a kampilan, tan siopaman a sigagalan mangibaliwala ed satan et seguradon manani ed saray pansumpalan to.—Galacia 6:7-9.
19. Panoy kabiskeg na ‘panalos’ na salitay Dios, tan akin a kaukolan tayon bidbiren a walaan tayoy pikuekuentaan ed Dios?
19 Alay biskeg na salitay Dios ya “ontalos ya angga ed pansianan na kamarerwa tan espiritu, tan angga ed saray langolangoan tan saray utek”! Talosen toray kanonotan tan motibo na saray totoo, diad piguratibo et anggad utek a walad sankaaralman a kabiangay pukepukel! Anggaman saray nibulos ya Israelita manlapud inkaaripen na Ehipto so akipaknan tuloken day Ganggan, amta nen Jehova a diad kapusoan da et agda inapresia iray probisyon tan kakaukolanen to. (Salmo 95:7-11) Imbes a gawaen day linawa to, say panpapagaan da et say kapenek na silalaman a pilpilalek da. Kanian, ag-ira akaloob ed insipan a painawa na Dios, noagta aderal ed kalawakan. Kaukolan tayon ipapuso iya, ta “anggapo so bengatlan pinalsa ya agnipanengneng ed arap [na Dios]: noag ingen saray amin a bengatla wala ra a lakseb tan mapatnag ed saray mata na pangitdan tayo na bilang.” (Hebreos 4:13) Komon ta sumpalen tayo so dedikasyon tayo ed si Jehova tan ‘ag-onsener a nabalang.’—Hebreos 10:39.
20. Antoy walad arapen, tan antoy nepeg tayon gawaen natan pian makaloob ed painawa na Dios?
20 Anggaman say “komapito ya agew”—agew na panagpainawa na Dios—so tuloytuloy ni, sikatoy alerto ed pakasusumpal na gagala to nipaakar ed dalin tan ed katooan. Agla manbayag, say Mesianikon Ari, si Jesu-Kristo, so onkiwas a mamagit ed amin a sumusumpa ed linawa na Dios ed dalin, pati si Satanas a Diablo. Legan na Sanlibon Taon ya Uley nen Kristo, si Jesus tan say 144,000 a kaiba ton manuley so mangitarok ed dalin tan ed katooan ed kipapasen a ginagala na Dios. (Apocalipsis 14:1; 20:1-6) Natan la so panaon tayon mamaneknek a say kabibilay tayo et nisentro ed linawa nen Jehova a Dios. Imbes a panggunaetan tayon ikatunongay inkasikatayo ed imaton na Dios tan anapey dilin interes tayo, natan la so panaon a sikatayo so ‘manpainawa manlapud dilin kimkimey tayo’ tan sigpot-puso a lingkoran so intereses na Panarian. Diad panggawa ed satan tan pansiansian matoor ed mangatatawen ya Ama tayo, si Jehova, napribilihyoan tayon panggayagaan iray gungguna na painawa na Dios natan tan ed ando lan ando.
Kasin Nisalaysay Yo?
◻ Diad anton gagala a say Dios et nampainawa ed “komapito ya agew”?
◻ Anton painawa komon so nanggayagaan na Israelitas, balet akin ya ag-ira akaloob ed satan?
◻ Antoy nepeg tayon gawaen ta pian makaloob ed painawa na Dios?
◻ Panon a say salitay Dios et mabilay, mabiskeg, tan mas makdem nen say dinanman a duaray tarem a kampilan?
[Litrato ed pahina 16, 17]
Nginilinan na Israelitas so Sabaton, balet ta ag-ira akaloob ed painawa na Dios. Antam no akin?