Kapitulo 19
Panagtatak ed Israel na Dios
Pasingawey 4—Apocalipsis 7:1-17
Tema: Saray 144,000 so atatakan, tan sakey a baleg ya ulop so anengneng a manal-alagey ed arap na trono nen Jehova tan ed arap na Kordero
Panaon na kasumpalan: Manlapud inkitrono nen Kristo Jesus nen 1914 anggad Milenyon Uley to
1. “Siopa so makayari ya ontanyareg” kaleganan na baleg ya agew na madibinon sanok?
“SIOPA so makayari ya ontanyareg?” (Apocalipsis 6:17) On, siopa kasi? Sano deralen la na baleg ya agew na madibinon sanok so sistema nen Satanas, nayarin ontan so itepet na saray manuley tan totoo na mundo. Parad sikara et ompatnag a say manasingger lan kadederal so manigway ed amin a mabilay a too. Balet kasin ontan? Makapaliket, ipapaseguro ed sikatayo na propeta na Dios: “Anggan siopa ya ontawag ed ngaran nen Jehova; nilaban naani.” (Joel 2:32) Pekderan itan a katuaan di apostol Pedro tan Pablo. (Gawa 2:19-21; Roma 10:13) On, saramay ontatawag ed ngaran nen Jehova so niliktar. Siopa iraya? Nengnengen tayo legan a nipaparungtal so ontumbok a pasingawey.
2. Akin a makatantanda a walaray niliktar ed agew na panangukom nen Jehova?
2 Peteg a makatantanda a siopaman et nayarin makaliktar ed agew na panangukom nen Jehova, lapud satan so deneskribe na sananey nin propeta na Dios ed onia iran salita: “Nia, so bagyo nen Jehova, salanti sanok to, pinmaway la a sakey a mamalis a bagyo, sikato naani ompelag ed ulo na marelmeng. Say masebeg a sanok nen Jehova agnaani ompawil, angga ed nagawa to, tan angga ed nasumpal to so saray kanonotan na puso to.” (Jeremias 30:23, 24) Maganat ya onkiwas pian makatalindeg itayo ed satan a bagyo!—Uliran 2:22; Isaias 55:6, 7; Sofonias 2:2, 3.
Saray Apatiran Dagem
3. (a) Anton nikadkaduman serbisyo a gagawaen na saray anghel so anengneng nen Juan? (b) Anto so isisimbolo na “apatiran dagem”?
3 Sakbay a bulosan nen Jehova iyan sanok, saray mangatatawen ya anghel so manggawa na sakey a nikadkaduman serbisyo. Satan so nanenengneng natan nen Juan ed pasingawey: “Tan kayari na saya akanengneng ak na apatira ya anghel ya akaalagey ed saray apatiran suyok na dalin, a popokpokan da so apatiran dagem na dalin, pian ag-onsibok so dagem dia ed tapew na dalin, anggan dia ed tapew na dayat, anggan dia ed tapew na dinan a kiew.” (Apocalipsis 7:1) Antoy kabaliksan na saya ed sikatayo natan? Sarayan “apatiran dagem” so mabitar a simbolo na makaderal a panangukom a ngalngali la bulosan ed marelmeng a mangaraldalin a sosyedad, diad madaluyon a “dayat” na marelmeng a katooan, tan diad ataragey a singa-kiew iran manuley a mangaala na suporta tan sustento ed saray totoo ed dalin.—Isaias 57:20; Salmo 37:35, 36.
4. (a) Anto so irerepresenta na saray apatiran anghel? (b) Anto so epekto ed mangaraldalin ya organisasyon nen Satanas sano bulosan la so apatiran dagem?
4 Anggapoy duaruwa, sarayan apatiran anghel so mangirerepresenta ed apatiran anghelikon grupo, ya uusaren nen Jehova a mamokpok ed kipaakseb na panangukom ya anggad aturon panaon. Sano bulosan la na saray anghel iratan a dagem na madibinon sanok pian manbabansag ya onsiplog manlapud amianen, abalaten, bukig, tan sagur, say desyang so abalbaleg. Mipadpara itan, balet diad makapakigtot a laknab, ed impangusar nen Jehova ed apatiran dagem ya angitayak ed saray kadaanan ya Elamita, ya aneral tan angupot ed sikara. (Jeremias 49:36-38) Satan so abalbaleg ya alimbusabos a nagkalalon makadesyang nen say “bagyo” ya impaneral nen Jehova ed nasyon na Ammon. (Amos 1:13-15) Anggapo so kabiangan na organisasyon nen Satanas ed dalin a makatalindeg ed agew na sanok nen Jehova, sano alangonen to so inkasoberano to ed magnayon ya onsabi.—Salmo 83:15, 18; Isaias 29:5, 6.
5. Panon ya ontulong ed sikatayo so propesiya nen Jeremias a natalosan a saray panangukom na Dios so onsaknap ed interon dalin?
5 Kasin makaseguro itayo a saray panangukom na Dios et saknapen toy interon dalin? Ontalineng lamet ed si propeta ton Jeremias: “Nia, say mauges ompaway naani a manlapu ed nasyon angga ed nasyon et sakey a baleg a bagyo so onalagey naani a manlapu ed kasampotan a kabiangan na dalin. Et saray pinatey nen Jehova sikara naani ed satan ya agew manlapu ed sakey a sampot na dalin angga met lanlamang ed sananey a sampot na dalin.” (Jeremias 25:32, 33) Kaleganan na sayan abalbaleg a bagyo a sayan mundo so nabalkot na kabilungetan, saray manuley ya ahensia na satan so nayugayog ed sigpot a kaandi. (Apocalipsis 6:12-14) Balet say arapen so aliwan ambilunget parad amin. Nisesengeg ed siopa, sirin, a saray apatiran dagem so popokpokan?
Say Panagtatak ed Ariripen na Dios
6. Siopa so mangibabaga ed saray anghel a pokpokan da iray apatiran dagem, tan mangiyaabuloy iya na panaon parad anto?
6 Intuloy nen Juan a deneskribe no panon a saray arum so namarkaan parad kililiktar, a kuanto: “Tan anengneng ko so sananey ya anghel ya onsesegep ed letakan na banwa, a wala ed sikato so tatak na Dios a mabilay: tan tinmawag ed baleg a boses ed saray apatira ya anghel, a sikara so angitdan na pamasakit dia ed dalin tan dayat, a kuanto, Agyo pasakitan so dalin, anggan say dayat, anggan saray kiew, angga ed agmi natatakan so saray aripen na Dios tayo dia ed saray moling da.”—Apocalipsis 7:2, 3.
7. Siopan peteg so komaliman anghel, tan anton ebidensya so ontulong ed sikatayon napekderan so pakabidbiran ed sikato?
7 Anggaman sayan komaliman anghel so ag-angaranan, amin ya ebidensya so mamaneknek a sikato so niglorian Katawan a Jesus. Mitukoyan ed kipapasen nen Jesus ya Arkanghel, sikato so nipanengneng dia a walaan na pakauley ed saray arum ya anghel. (1 Tesalonica 4:16; Judas 9) Sikato so onsesegep manlapud bukig, a singa “saray ari a manlapu ed letakan [na banwa]”—si Jehova tan say Kristo to—ya onsabin mangipaakseb na panangukom, a singa ginawa na ararin Dario tan Ciro sanen impaabeba ra so kadaanan a Babilonia. (Apocalipsis 16:12; Isaias 45:1; Jeremias 51:11; Daniel 5:31) Sayan anghel so miulibay met ed si Jesus unong ta nimatalek ed sikato so panagtatak ed saray alanaan a Kristiano. (Efeso 1:13, 14) Niarum ni, sano bulosan iray dagem, si Jesus so mangipangulo ed saray mangatatawen ya armada diad pangipaakseb na panangukom ed saray nasyon. (Apocalipsis 19:11-16) Makatunongan sirin, a si Jesus so mangigaganggan a pokpokan ni so kaderal na mangaraldalin a muyongan nen Satanas anggad natatakan iray ariripen na Dios.
8. Anto so panagtatak, tan kapigan ginmapo itan?
8 Anto iyan panagtatak, tan siopa irayan ariripen na Dios? Say panagtatak so ginmapo nen Pentecostes 33 C.E. sanen saray inmunan Judion Kristiano so alanaan na masanton espiritu. Diad saginonor, intuloy na Dios a tinawag tan nilanaan ‘iray Gentil.’ (Roma 3:29; Gawa 2:1-4, 14, 32, 33; 15:14) Insulat nen apostol Pablo so nipaakar ed impakawalaan na saray alanaan a Kristiano na garantiya a sikara so ‘[kayarian] nen Kristo’ tan inyarum to a say Dios et “sikato met so [nantatak] ed sikatayo, tan angiter ed sikatayo na sanla [odino panandaan] na espiritu dia ed kapusoan tayo.” (2 Corinto 1:21, 22; ikompara so Apocalipsis 14:1.) Kanian, sanen sarayan ariripen so tinagibi bilang espiritual ya ananak na Dios, naawat da lan unona so panandaan na mangatatawen a tawir da—sakey a tatak, odino sipan. (2 Corinto 5:1, 5; Efeso 1:10, 11) Nayarian da la ed satan ya ibaga: “Say dilin espiritu so mamatua ed espiritu tayo, ya anak itayo na Dios: Tan no anak itayo, tomatawir itayo met; tomatawir na Dios, tan mitatawir ed Kristo; a no ontan a mantepel itayo pati sikato, pian iba to itayo a nigloria.”—Roma 8:15-17.
9. (a) Anton panagsungdo so kakaukolanen ed saray nakekeraan a nailalak ed espiritun ananak na Dios? (b) Anggad kapigan mantultuloy so panagsubok ed saray alanaan?
9 “No ontan a mantepel itayo pati sikato”—anto so kabaliksan na satan? Ta pian naawat so balanget na bilay, nepeg a mansungdo iray alanaan a Kristiano, matoor ya anggad patey. (Apocalipsis 2:10) Ag-itan mankabaliksan a no ‘bektaman a nilaban et lawas lan nilaban.’ (Mateo 10:22; Lucas 13:24) Imbes, sikara so abilin: “Pampelengan yo ni komon a paligenen so inkatawag tan inkapili yo.” Singa si apostol Pablo, diad kaunoran et nepeg a nibaga ra: “Akibakal ak ed maabig a pibabakal, asumpal ko so binati’ko, inunor ko so pananisia.” (2 Pedro 1:10, 11; 2 Timoteo 4:7, 8) Kanian dia ed dalin et say panagsubok tan panagyakayak ed nakekeraan a nailalak ed espiritun ananak na Dios so nepeg a mantultuloy anggad mapekder lan atatakan nen Jesus tan saray kakaiba ton anghel ‘so moling’ na amin na saraya, a mangipabidbir ed sikara bilang agpanduaruwaan, agmanguman, asubok tan matoor ya ‘ariripen na Dios tayo.’ Diad ontan et magmaliw a permanentin marka itan a tatak. Mapatnag, sano bulosan la so apatiran dagem na kairapan, amin ya espiritual ya Israel so asumpal lan atatakan, anggaman wala nin siansia so pigaran mabilay ed pisikal a laman. (Mateo 24:13; Apocalipsis 19:7) Say interon membro so nakompleto!—Roma 11:25, 26.
Pigara so Tinatakan?
10. (a) Antoran teksto so pakapatnagan a limitado so bilang na saray tinatakan? (b) Anto so dagup a bilang na saray tinatakan, tan panon so inkilista na saratan?
10 Imbaga nen Jesus ed saramay akalinya ed sayan panagtatak: “Agkayo antakot, daiset a papastolan; ta kaliktan na Ama yo ya iter ed sikayo so panarian.” (Lucas 12:32) Say arum a teksto, a singa say Apocalipsis 6:11 tan Roma 11:25, so mangipatnag a say bilang na daiset a papastolan et talagan limitado tan, diad tua, akauna lan nigeter. Saray onggendan a salita nen Juan so mamekder ed saya: “Tan nadngel ko so bilang na saray tinatakan, sanlasus tan apataplo tan apat a libo, tinatakan ed saray balang kapolian na saray anak na Israel. Dia ed poli nen Juda, wala so labinduan libo a tinatakan; dia ed poli nen Ruben labinduan libo; dia ed poli nen Gad labinduan libo; dia ed poli nen Aser labinduan libo; dia ed poli nen Neftali labinduan libo; dia ed poli nen Manases labinduan libo; dia ed poli nen Simeon labinduan libo; dia ed poli nen Levi labinduan libo; dia ed poli nen Isacar labinduan libo; dia ed poli nen Zabulon labinduan libo; dia ed poli nen Jose labinduan libo; dia ed poli nen Benjamin, wala so labinduan libo a tinatakan.”—Apocalipsis 7:4-8.
11. (a) Akin a say impanukoy ed 12 tribu so ag-onaplika ed literal, natural ya Israel? (b) Akin ya inlista na Apocalipsis so 12 tribu? (c) Akin ya anggapo so eksklusibon maari odino makasaserdoten tribu ed Israel na Dios?
11 Agkasi ontutukoy iya ed literal, natural ya Israel? Andi, lapud nikaduma so Apocalipsis 7:4-8 ed kaslakan a panangilista ed tribu. (Numeros 1:17, 47) Mapatnag, say listaan dia so aliwan nisengeg ed gagalan pangipabidbir ed saray natural a Judio panamegley na saray tribu ra noagta pian ipanengneng so mipadparan inkasangal na organisasyon parad espiritual ya Israel. Saya so balanse. Nepeg a wala so eksakton 144,000 a membro na sayan balon nasyon—12,000 manlapud kada 12 tribu. Anggapoy tribu ed sayan Israel na Dios so eksklusibon maari odino makasaserdote. Say interon nasyon so manuley bilang arari, tan say interon nasyon so manserbi bilang saray saserdote.—Galacia 6:16; Apocalipsis 20:4, 6.
12. Akin a matukoy a kakantaen na saray 24 a mamasiken ed arap na Kordero iray salita ed Apocalipsis 5:9, 10?
12 Anggaman saray Judio ed laman tan saray Judion proselita so naikdan na unonan pankanawnawan napili bilang kabiangan na espiritual ya Israel, daiset lambengat ed saman a nasyon so kinmiwas. Kanian impasabi nen Jehova so imbitasyon ed saray Gentil. (Juan 1:10-13; Gawa 2:4, 7-11; Roma 11:7) Singa ed kipapasen na saray taga-Efeso, a diad apalabas et ‘niyarawi ed pibabaley ed Israel,’ natan et saray aliwan-Judio so nayarin natatakan na espiritu na Dios tan magmaliw a kabiangan na kongregasyon na saray alanaan a Kristiano. (Efeso 2:11-13; 3:5, 6; Gawa 15:14) Matukoy, sirin, ed 24 a mamasiken so pankanta ed arap na Kordero: “Sinaliw mo ya inggana ed Dios, lapu ed dalam, so totoo ed balang kailalakan, tan salita tan baley tan nasyon: Tan ginawam ira a panarian tan saserdote nipaakar ed Dios mi; et manari ra ed tapew na dalin.”—Apocalipsis 5:9, 10.
13. Akin a matukoy ed agi nen Jesus ed ina a si Santiago so pangipaarap na sulat to “dia ed saray labindua a barangay a walaran abuybuyak”?
13 Say Kristianon kongregasyon so sakey ya “apili a kapolian, peteg ya inkasaserdote, masantos a nasyon.” (1 Pedro 2:9) Sinandian to so natural ya Israel bilang nasyon na Dios, nagmaliw itan a sakey a balon Israel a “peteg ya ‘Israel.’” (Roma 9:6-8, NW; Mateo 21:43)a Nisengeg ed sayan rason, matukotukoy a tuloy ed agi nen Jesus ed ina a si Santiago so pangipaarap ed panagpastol a sulat to “dia ed saray labindua a barangay [odino tribu] a walaran abuybuyak,” salanti, diad sankamundoan a kongregasyon na saray alanaan a Kristiano a diad kaunoran et manbilang na 144,000.—Santiago 1:1.
Say Israel na Dios Natan
14. Anto so mangipanengneng a saray Tasi nen Jehova so nansiansia ed panmoria a say 144,000 so literal a bilang na saramay manugyop ed espiritual ya Israel?
14 Makapainteres, atebek nen Charles T. Russell, a say 144,000 et literal a bilang na saray indibidual a manugyop ed espiritual ya Israel. Diad The New Creation, Tomo VI na Studies in the Scriptures to, ya impalapag nen 1904, insulat to: “Walaan itayo na amin a rason pian panisiaan a say piho, permanentin bilang na pinili [saray pinilin alanaan] et samay aminpigan nibaga ed Apocalipsis (7:4; 14:1); salanti, 144,000 ‘a dinondon ed limog na totoo.’” Diad Light, Libro Uno, ya impalapag nen 1930 na saray Estudyante na Biblia, et nibaga met: “Say 144,000 a membro na laman nen Kristo so wala sirin ed pantitipon a nipanengneng bilang pinili tan alanaan, odino atatakan.” Saray Tasi nen Jehova so nansiansia ed panmoria a literal a 144,000 iran alanaan a Kristiano so manugyop ed espiritual ya Israel.
15. Sakbay a tuloy na agew na Katawan, anto so inisip na saray masimoon ya estudyante na Biblia a napanggayagaan na saray natural a Judio kayari pangangga na Panaon na Gentil?
15 Anggaman kuan, agta say natural ya Israel natan so makanepegan na pigaran nikaduman pabor? Diad panaon sakbay a tuloy na agew na Katawan, sanen nasusukayan lamet na saray masimoon ya estudyante na Biblia iray dakel a manunan katuaan na Salita na Dios, inisip da a diad impangangga na Panaon na Gentil et nawalaan lamet iray Judio na apribilehyoan a talindeg ed Dios. Kanian, say libro nen C. T. Russell a The Time Is at Hand (Tomo II na Studies in the Scriptures), ya impalapag nen 1889, so angiyaplika ed Jeremias 31:29-34 ed saray natural a Judio, tan nankomento: “Naimatonan na mundo a say dusa na Israel ed leksab na pananguley na saray Gentil so nantultuloy nanlapula’d B.C. [607], a siansia nin mantutultuloy, tan anggapo so rason na panilalo ed kaorganisa lamet na nasyon da ed mas masasakbay nen say A.D. 1914, say getar na ‘pitoran panaon’ da—2520 a taon.” Diad saman et singano saray Judio so makaeksperiensya na kipawil na interon nasyon, tan sayan iilaloan so singa nagawa la nen 1917, sanen say Deklarasyon na Balfour so angisipan na suporta na Britanya diad panggawa ed Palestina bilang nasyon ya ayaman na saray Judio.
16. Antoran sagpot so ginawa na saray Tasi nen Jehova pian nipasabi ed saray Judio ed laman so Kristianon mensahe, tan anto so resulta?
16 Kayari na inmunan guerra mundial, say Palestina so nagmaliw ya impabtang a teritoryan sakop na Gran Britanya, tan alukasan so kipawil na dakel a Judio ed satan a dalin. Nen 1948, apawala so politikal ya Estado na Israel. Agta impatnag na saya a saray Judio so mangawat na madibinon bendisyon? Diad loob na dakel a taon et ontan so sinisia na saray Tasi nen Jehova. Kanian, nen 1925 et impalapag da so 128-pahina a libron, Comfort for the Jews. Nen 1929 et impaway da so marakerakep a 360-pahinan tomo a Life, ya ingagalan managyat ed saray Judio tan manisingbat met ed libro na Biblia a Job. Ginawa so baleg a sagpot, nagkalautla diad Syudad na New York, pian nipasabi ed saray Judio iyan Mesianikon mensahe. Makapaliket, wala so pigaran kinmiwas, balet saray kaslakan a Judio, singa saray atateng da nen inmunan siglo, so angipulisay ed ebidensya na kiwawala na Mesias.
17, 18. Antoy atalosan na saray ariripen na Dios ed dalin nipaakar ed balon sipanan tan saray propesiya na Biblia nipaakar ed panangipawil?
17 Mapatnag a say inka-Judio, bilang totoo tan bilang sakey a nasyon, et aliwan say Israel ya adeskribe ed Apocalipsis 7:4-8 odino ed arum niran propesiya na Biblia a misiglaotan ed agew na Katawan. Diad panutumbok ed tradisyon, saray Judio so nantultuloy a pinmaliis ed pangusar ed ngaran na Dios. (Mateo 15:1-3, 7-9) Diad panisingbat ed Jeremias 31:31-34, say libron Jehovah, ya impalapag na saray Tasi nen Jehova nen 1934, so agnanduaruwan angikuan: “Say balon sipanan so andian na pisiglaotan ed saray natural a kapolian na Israel tan ed katooan ed inkalapagan, noagta . . . nigeter [itan] ed espiritual ya Israel.” Saray propesiya na Biblia nipaakar ed panangipawil so agmanutukoy ed saray natural a Judio nisay politikal ya Israel, a sakey a membro na Nasyones Unidas tan kabiangan na mundo a tinukoy nen Jesus ed Juan 14:19, 30 tan 18:36.
18 Nen 1931, saray ariripen na Dios ed dalin so angawat, tekep na baleg a gayaga, ed ngaran a saray Tasi nen Jehova. Interon puso iran mipapakna ed saray salita na Salmo 97:11: “Say liwawa nitanem ya onkana ed matunong, tan say liket onkana ed maptek a puso.” Malinew dan natetebek a say espiritual ya Israel lambengat so kabiangan ed balon sipanan. (Hebreos 9:15; 12:22, 24) Say agkinmiwas a natural ya Israel so andian na pibiangan ed satan, nisay say katooan ed inkalapagan. Sayan pakatalos so angiparaan ed dalan parad masnag a sinag na madibinon liwawa, a matalonggaring ed saray rekord na teokratikon awaran. Saya so mangiparungtal ed daakan a panangipatnag nen Jehova na panangasi, maaron-kaabigan, tan katuaan to ed amin a totoon onasingger ed sikato. (Exodo 34:6; Santiago 4:8) On, saray arum nilikud ed Israel na Dios so nagunggonaan diad pamupokpok na saray anghel ed apatiran dagem na kadederal. Siopa iraya? Kasin sakey ka ed sikara? Nengnengen tayo natan.
[Paimano ed leksab]
a Matukotukoy, say ngaran ya Israel et kabaliksan toy “Mipupuligesgesan so Dios; Mipuligesgesan (Misusungdo) a kaiba so Dios.”—Genesis 32:28, New World Translation Reference Bible, paimano’d-leksab.
[Interon-pahina a litrato ed pahina 114]
[Saray litrato ed pahina 116, 117]
Say inkalapagan ya impamili ed tuan Israel na Dios so ginmapo manlapud panaon na Pentecostes 33 C.E. anggad 1935 sanen, diad maawaran a kombension na saray Tasi nen Jehova ed Washington, D.C., et nipaarap so imano ed panagtipon ed baleg ya ulop a walaan na mangaraldalin iran ilalo (Apocalipsis 7:9)