“Uusaren a Susto so Salita na Katuaan”

SAY Salita na Dios so simpenan na saray prinsipyon makana parad matalonan panbilay. Natulongan to so sakey a ministro a manbangat, mamaat, tan mangorehi. (2 Timoteo 3:16, 17) Anggaman ontan, pian sigpot a nagunggunaan manlapud inter-Dios a giya, nepeg tayon tumboken so konseho nen apostol Pablo ed si Timoteo: “Gawam so anggaay nayarian mon iparungtal mo so inkasikan naabobonan na Dios, komikimey ya anggapoy babaingan, uusaren a susto so salita na katuaan.”​—2 Timoteo 2:15.

Nilikud ni ed arum a bengatla, inyaaliling so Salitay Dios ed makapabunigas a gatas, anawet a tagano, makaparepresko tan makapalinis a danum, sakey ya espeho, tan makdem a kampilan. Say pakatalos ed sarayan termino so ontutulong ed sakey a ministron usaren a marondunong so Biblia.

Panangiter ed Gatas na Salita na Dios

Gatas so tagano na kapangianak ya ugugaw. Legan ya ombabaleg so kapangianak, kalkalnan pakanen na anawet a tagano, balet unona et say gatas lambengat so nayarian to. Diad dakel a paraan, saramay dagdaiset so amta ra nipaakar ed Salitay Dios so singa saray kapangianak. Balang lan say sakey a too et balo nin interesado diad Salita na Dios odino akabatan to la itan ed loob na pigaran panaon, no sikatoy walaan lambengat na akaunan pakatalos ed ibabaga na Biblia, sikato so kapangianak ni ed espiritual tan mankakaukolan na mainomay-a-tunawen a tagano​—espiritual a “gatas.” Agto ni natunaw so “anawet a tagano,” aralem iran bengatla nipaakar ed Salitay Dios.​—Hebreos 5:12.

Onia so situasyon na balon aporman kongregasyon diad Corinto sanen insulat nen Pablo ed sikara: “Pinainum ta kayo na gatas, aliwan bengatlan nakan, ta anggapo ni magenap a biskeg yo.” (1 Corinto 3:2) Kaukolan nin aralen na saray taga Corinto so “elementarya iran bengatla na saray sagradon balikas na Dios.” (Hebreos 5:12) Diad nabot da lan inyaligwas, agda ni natunaw “iray aralem a bengatla na Dios.”​—1 Corinto 2:10.

Singa si Pablo, ipapanengneng na saray Kristianon ministro natan so panangiyansakit da ed espiritual iran kapangianak diad pangiiter ed sikara na “gatas,” salanti, diad pantulong ed sikaran makatalindeg a malet ed manunan Kristianon doktrina. Papasesegen daray balo ni odino agni matatken a “nawalaan na panpirawat ed ag-alaokan a gatas a kien na salita.” (1 Pedro 2:2) Impanengneng nen apostol Pablo ya atebek to so nikaduman panangimanon kaukolan na saray balo ni sanen insulat to: “Kada sakey a maniinum na gatas so andian na amta ed salita na inkatunong, ta sikato so sakey a kapangianak.” (Hebreos 5:13) Say anos, panangonsidera, pakatalos, tan inkatamoy so kakaukolanen ed saray ministro na Dios legan ya ipapanabang da so puron gatas na Salita ed saray balo tan ag-eksperiensiado diad panangiyaral na Biblia tan diad kongregasyon.

Uusaren so Anawet a Tagano na Salita na Dios

Ta pian onaligwas a mamaarap ed kilalaban, mas ni nen say “gatas” so kaukolan na sakey a Kristiano. Bektaman a saray manunan katuaan na Biblia so malinlinew a natalosan tan naawat, sikato la so akaparaan ya ombaling ed ‘anawet a taganon kien na matatken a totoo.’ (Hebreos 5:14) Panon ton nagawaan iya? Manuna ed amin, diad panamegley na regular a rotina na personal a panagaral tan pililimog ed Kristianon miting. Saratan a maong ya ugali so ontulong pian say sakey a Kristiano so ombiskeg ed espiritual, ontatken, tan epektibo diad ministeryo. (2 Pedro 1:8) Agtayo lilingwanan a niarum ed pikakabat et say panggawa na linawa nen Jehova so manibukel met ed espiritual a tagano.​—Juan 4:34.

Natan, say “matoor tan makabat ya aripen” so aturo a mangisuplay ed ariripen na Dios na tagano ed suston panaon tan ontulong ed sikaran talosan so “abalbaleg a kakabatan na Dios.” Diad panamegley na espiritu to, ipaparungtal nen Jehova so Makasulatan iran katuaan diad panamegley na sayan aripen, a sitotoor a mangipapalapag na espiritual a “tagano ed suston panaon.” (Mateo 24:45-47; Efeso 3:10, 11; ikompara so Apocalipsis 1:1, 2.) Balang indibidual a Kristiano so responsabli a nagnap a mangusar ed saratan a nipalapag iran probisyon.​—Apocalipsis 1:3.

Siempre, walaray pigaran bengatla ed Biblia a “mairap a talosan,” anggan ed matatken laran Kristiano. (2 Pedro 3:16) Walaray makapawetwet a balikas, propesiya, tan saray ilustrasyon a kakaukolanen toy panagaral ni tan panagdalepdep. Kanian, lalaktipen na personal a panagaral so pankotkot ed Salita na Dios. (Uliran 1:5, 6; 2:1-5) Saray mamatatken so nagkalalo lan walaan na responsabilidad no nipaakar ed saya sano sikaray manbabangat ed kongregasyon. Balanglan mangikondukta ed Panagaral na Libro ed Kongregasyon odino ed Panagaral na Panag-Bantayan, mangiiter na publikon paliwawa, odino manlilingkor ed antokaman niran kapasidad ed panagbangat, nepeg a pamilyar a tuloy iray matatken ed materyal da tan akaparaan a mangimano ed “dunong na panagbangat” da legan ya ipapasabi ra so anawet ya espiritual a tagano ed kongregasyon.​—2 Timoteo 4:2.

Danum a Makaparepresko tan Makapalinis

Imbaga nen Jesus ed Samaritana a walad abay na bobon ya ikdan to na bengatlan nainum a magmaliw a “sakey a subol na danum pian mangiter na andi-anggaan a bilay.” (Juan 4:13, 14; 17:3) Sayan manangiter-bilay a danum et lalaktipen ton amin iray probisyon na Dios pian nagamoran so bilay diad panamegley na Kordero na Dios, tan sarayan probisyon so nisalaysay ed Biblia. Bilang indibidual a napepegaan ed satan a “danum,” awaten tayo so imbitasyon ya inter diad panamegley na espiritu tan say nobya nen Kristo a “mangala na danum na bilay ya anggapoy bayar.” (Apocalipsis 22:17) Say pakainum ed sayan danum et kabaliksan to so andi-anggaan a bilay.

Niarum ni, ileletneg na Biblia so moral tan espiritual iran estandarte parad tuan Kristianos. Legan ya iyaaplika tayo irayan madibinon estandarte, nalilinisan itayo na Salita nen Jehova, “naurasan a malinis” ed amin ya agagamil a bubusolen nen Jehova a Dios. (1 Corinto 6:9-11) Lapud saya, say katuaan a lugan na apuyanan a Salita so tatawagen a “panames ed danum.” (Efeso 5:26) No agtayo abuloyan so katuaan a manlinis ed sikatayo diad onian dalan, agto awaten so panagdayew tayo.

Makapainteres, saray mamatatken a ‘manguusar a susto ed salita na katuaan’ so niyaliling met ed danum. Kuan nen Isaias a sikaray “singa agos na danum ed anggapoy danum a bansa.” (Isaias 32:1, 2) Susumpalen na maaron mamatatken iyan deskripsyon sano bibisitaen daray agagi ra bilang espiritual a pastol, ya uusaren so makarepreskon Salita na Dios pian mangiter na makapaalagey, makapaligliwa, espiritual ya impormasyon a mamabiskeg tan mamaelet.​—Ikompara so Mateo 11:28, 29.a

Saray membro na kongregasyon so manatalaran a sigugunaet ed ibisita na mamatatken. “Amtak no kaunongan a ligliwa so itarok na mamatakten, tan siak so ontanlay liket ed impangitarok nen Jehova ed sayan probisyon,” kuan nen Bonnie. Onia met so insulat nen Lynda, sakey a mansusulon ina: “Diad panamegley na Makasulatan a panamaseseg, tinulongan ak na mamatatken ya ontalona. Tinalineng da ak tan angipanengneng ira na panangabagey.” Oniay kuan nen Michael: “Impalikna ra a siak so kabiangan na sakey ya organisasyon a maasikaso.” “Saray impanbisita na mamatatken so tinmulong ed siak a natalonaan iray panaon na graben depresyon,” kuan na sananey. Say makapabiskeg ed espiritual ya ibibisitan manlalapud sakey a matatken so singa met ambetel, makaparepreskon iinumen. Naliligliwa iray malakarneron totoo legan a sikaray tutulongan na maaron mamatatken a talosan no panon ya onaaplika ed kipapasen da iray Makasulatan a prinsipyo.​—Roma 1:11, 12; Santiago 5:14.

Usaren so Salita na Dios Bilang Sakey ya Espeho

Sano mangakan na anawet a tagano so sakey, say gagala et aliwan say basta panggayagaay taway. Imbes, iilaloan ton makala na sustansyan mamakayari ed sikaton makapankimey. No sikatoy sakey ya ugaw, iilaloan ton say tagano so ontulong ed sikaton ombaleg pian magmaliw a sakey ya adulto. Mipadpara itan ed espiritual a tagano. Say personal a panagaral na Biblia so makapagayaga, balet aliwan satan labat so rason nipaakar ed saya. Nakaukolan a mamasimbalo so espiritual a tagano ed sikatayo. Ontutulong iya ed sikatayon naamtaan tan nipatnag so bunga na espiritu tan mangaasisti ed sikatayo pian mangisulong ed “balon personalidad, a diad panamegley na suston pikakabat et nagawa a balo unong ed indengan na Sakey ya amalsa ed satan.” (Colosas 3:10; Galacia 5:22-24) Say espiritual a tagano so ontutulong ed sikatayon ombulaslas ed inkatatken, a mamainomay ed pangiyaplika tayo na Makasulatan iran prinsipyo ed iyarap ed saray problema tayo tan diad itulong ed arum ya onarap ed problema ra met.

Panon tayon nibaga no kasin say Biblia et walaay ontan ya epekto ed sikatayo? Uusaren tayo so Biblia a singa ed sakey ya espeho. Inkuan nen Santiago: “Magmaliw a mananumpal na say salita, tan aliwan dumerengel lambengat . . . No siopaman so dumerengel na say salita, tan aliwan mananumpal, sayan sakey so singa sakey a toon onnenengneng ed natural a lupa to ed espeho. Ta nenengnengen to so inkasikato, tan sikato so onalis tan tamtampol ya alingwanan no antoy nengneng to a too. Balet saman so onkonineng ed ayadyarin ganggan a kien na kawayangan tan mantutultuloy ed satan, sayan too, lapud sikato so nagmaliw, ya aliwan sakey a mililingwan a dumerengel, noagta sakey a mananumpal na kimey, so magmaliw a maliket ed panggawa to ed satan.”​—Santiago 1:22-25.

‘Kokoninengen’ tayo so Salitay Dios sano maapit tayon uusisaen itan tan ikokompara so inkatoo tayo ed inkatoon kaukolan tayon kapeten unong ed saray estandarte na Dios. Diad panggawa ed satan, sikatayoy magmaliw a “mananumpal na salita, tan aliwan dumerengel lambengat.” Say Biblia so walaan sirin na maabig ya epekto ed sikatayo.

Say Salita na Dios Bilang Kampilan

Kaunoran, tutulongan itayo nen apostol Pablo pian nanengneng no panon tayon usaren so Salita na Dios bilang sakey a kampilan. Sanen papasakbayan itayo sumpad “saray gobierno, sumpad saray autoridad, sumpad saray manuley na mundo na sayan kabilungetan, sumpad marelmeng iran espiritun puersa diad mangatatawen a pasen,” papasesegen to itayon “awaten . . . so kampilan na espiritu, salanti, salita na Dios.” (Efeso 6:12, 17) Say Salita na Dios so sakey ya importantin ayura a nausar tayo diad pangekal na antokaman iran ideya ya “apalesa sumpad pikakabat ed Dios.”​—2 Corinto 10:3-5.

Agnasuppiat, “say salita na Dios so mabilay tan mangisesekar na pakayari.” (Hebreos 4:12) Mitotongtong si Jehova ed katooan diad panamegley na saray pahina na apuyanan a Salita to. Usaren itan a maong diad panbangat ed arum tan diad pangiwalwal ed palso iran doktrina. Anamoten so pangusar ed satan pian pasesegen, pabiskegen, represkoen, ligliwaen, pakiwasen, tan pabiskegen ed espiritual so arum. Tan komon ta “kinlongan kayo [nen Jehova] ed amin a maong a bengatla pian gawaen so linawa to,” ta pian naynay yon gawaen no anto so “makapaliket ed imaton to.”​—Hebreos 13:21.

[Paimano ed leksab]