Saray Magayagan “Mananumpal na Salita”
“Awaten tekep na kaumildian so inkitanem na salita a makayarin mangisalba ed saray kamarerwa yo. Anggaman ontan, magmaliw a mananumpal na salita, tan aliwan dumerengel lambengat.”—SANTIAGO 1:21, 22.
1. Panon ya ipasen so tinaon a teksto tayo parad 1996?
“MAGMALIW A MANANUMPAL NA SALITA.” Sayan simplen balikas so mangipapasabi na mabiskeg a mensahe. Satan so inaon manlapud “Say Sulat nen Santiago” diad Biblia, tan satan so ipeket ed saray Kingdom Hall bilang say tinaon a teksto na Tastasi nen Jehova parad taon 1996.
2, 3. Akin a matukoy a si Santiago so kaukolan a mangisulat ed sulat a mangaakbibit ed ngaran to?
2 Si Santiago, ya agi ed ina nen Katawan a Jesus, so prominenti ed inmunan Kristianon kongregasyon. Diad sakey ya okasyon kayari inkioli nen Jesus, say Katawan tayo so personal a nampanengneng ed si Santiago tan insan ed amin ya apostol. (1 Corinto 15:7) Saginonor, sanen mamilagron nibulos si apostol Pedro manlapud prisoan, imbaga to ed nandaragup a Kristiano: “Ireport yo irayan bengatla ed si Santiago tan ed agagi.” (Gawa 12:17) Ompatnag a si Santiago, anggaman sikaton mismo et aliwan apostol, so angimaton ed pantitipon na mananguley ya ulop diad Jerusalem sanen nandeside iray apostol tan mamatatken a saray akombertin Hentil so agla kaukolan a galsiman. Sinegek nen Santiago iray bengatla, tan say desisyon a pinaletan na masanton espiritu so impawit ed amin a kongregasyon.—Gawa 15:1-29.
3 Mapatpatnag, baleg so apresasyon ed say matatken a panagkatunongan nen Santiago. Anggaman ontan, sipapaabeban inaksobi ton sikaton mismo so “aripen [lambengat] na Dios tan ed Katawan a Jesu-Kristo.” (Santiago 1:1) Say impuyan a sulat to so mankarga na mararakep a konseho tan panamaseseg parad saray Kristiano natan. Satan so akompleto ngalngali apatiran taon sakbay na inmunan inlusob na saray Romano ed Jerusalem diad panangidaulo nen Heneral Cestius Gallus kayarin say maong a balita so malaknab a nipulong “ed amin a pinalsa ed silong na tawen.” (Colosas 1:23) Saraman so maatap a panaon, tan kabat a tuloy na ariripen nen Jehova a say panangukom To so ngalngali la nipakat ed Judion nasyon.
4. Anto so mangipapanengneng a saray inmunan Kristiano so walaay baleg a kompiyansa diad Salita na Dios?
4 Walaan ed saman iray Kristiano na interon Hebreon Kasulatan tan say dakel et say Griegon Kasulatan. Singa impanengneng na mabetbet a panagsaglawi ra na asasakbay a sulsulat, mapatpatnag a baleg so kompiyansa na saray Kristianon managsulat na Biblia diad Salitay Dios. Ontan met, kaukolan tayo natan a sisisimoon ya aralen so Salita na Dios tan iyaplika itan ed bilay tayo. Pian makapansungdo, kaukolan tayo so espiritual a biskeg tan tepel ya itatarya na satan a Masanton Kasulatan.—Salmo 119:97; 1 Timoteo 4:13.
5. Akin a kaukolan tayo so nikadkaduman giya natan, tan iner so pakaromogan tayo ed satan?
5 Natan say katooan so manalalagey ed tambib na “baleg a kairapan a satan et agni agawa nanlapulad kagapo na mundo ya anggad natan, andi, nisay nagawa lamet.” (Mateo 24:21) Say kililiktar tayo so mandependi ed pakawalaan na madibinon panangiya. Panon tayon naromog iya? Diad panamegley na pangilukas ed kapusoan tayo ed bangabangat na Salitay Dios ya impuyan na espiritu. Saya so mangitonton ed sikatayo a “magmaliw a mananumpal na salita,” a singa ed matoor ya ariripen nen Jehova ed inmunan panaon. Nepeg tayon basaen tan aralen a sikukuli so Salitay Dios tan usaren itan ed kirayewan nen Jehova.—2 Timoteo 2:15; 3:16, 17.
Panagsungdo Tekep na Gayaga
6. Akin a naromog tayo so gayaga diad pangabet ed saray subok?
6 Diad pangilukas na sulat to, sinalambit nen Santiago so gayaga, say komaduan bunga na espiritu na Dios. Oniay insulat to: “Konsideraen yon amin a gayaga, agagik, sano sikayo so makakaabet ed nanduruman subok, ta amta yo a sayan asubok a kualidad na pananisia yo so manggagawa na panagsungdo. Balet paulyan a sumpalen na panagsungdo so gawa na saya, pian sikayo so magmaliw a nagnap tan maptek ed amin a pamaakaran, ya ag-onkukulang na antokaman a bengatla.” (Santiago 1:2-4; Galacia 5:22, 23) Panon a nibagan “amin a gayaga” so pakaabet ed amayamay a subok? Bueno, anggan si Jesus inkuanto diad Sermon to ed Palandey: “Maliket kayo sano sikayo so pabaingan na totoo tan pasegsegangen kayo tan sititilan mansalita na kada nengneng na katilaan a bengatla sumpad sikayo nisengeg ed siak. Manggayaga kayo tan manlukso lapud gayaga, ta baleg so tumang yo diad katawenan.” (Mateo 5:11, 12) Wala so gayaga tan inkapnek diad pakanengneng a bebendisyonan nen Jehova so pansasagpot tayo legan a manggugunaet tayon mamapaarap ed andi-anggaan a bilay.—Juan 17:3; 2 Timoteo 4:7, 8; Hebreos 11:8-10, 26, 35.
7. (a) Panon itayon natulongan a mansungdo? (b) Singa si Job, panon a nayarin sikatayo so natumangan?
7 Nansungdo a mismo si Jesus “lapud gayagan niiyan ed arapan to.” (Hebreos 12:1, 2) Diad inenengneng a mapetepet ed makpel ya uliran nen Jesus, sikatayo met so makapansungdo! Singa ed sinalambit nen Santiago ed pansamposampot na sulat to, siyayaman a tutumangan nen Jehova iray manamenben integridad. “Nia! Iyaabawag tayon maliket iramay nansungdo,” kuan nen Santiago. “Nadngel yo so impansungdo nen Job tan anengneng so pinawayan ya inter nen Jehova, a si Jehova so matamoy a tuloy ed panamabli tan mapangasi.” (Santiago 5:11) Tandaan no panon ya atumangan so integridad nen Job sanen sikato so nipawil ed maong a bunigas tan ed impanggayaga na sigpot, maliket a bilay a kaiba iray inad-aro. Say panagsungdon atekepay integridad so makapangitarok ed sikayo na mipadparan panggayaga ed nisipan a Paraiso na balon mundo na Dios, bilang kapantokan ed gayagan panlilingkor ed si Jehova natan.
Panaanap na Kakabatan
8. Panon itayon makaromog na tua, praktikal a kakabatan, tan anto so betang na pikakasi ed saya?
8 Say magunaet a panagaral tayo ed Salitay Dios, pati ed saray praktikal ya aplikasyon to, so manbunga na maridios a kakabatan, a manggawa ed sikatayon nasungdoan iray subok ed utel na inkabulok na manpapanabos a sistema nen Satanas. Panon itayon napaseguroan a naromog so ontan a kakabatan? Ibabaga ed sikatayo nen Santiago: “No siopaman ed sikayo so onkukulang na kakabatan, mantultuloy ya onkerew ed Dios, lapud sikato so sibubunlok a mangiiter ed amin tan agmamapabaing; tan niiter ed sikato. Balet mantultuloy ya onkerew tekep na pananisia, ya agbalot manduaruwa, ta samay manduaruwa et singa sakey a daluyon ed dayat ya itutulak na dagem tan nipalirpalir.” (Santiago 1:5, 6) Nepeg itayon sisisimoon a manpikasi, tekep na agnagiing a kompiyansan dengelen nen Jehova iray ey-ey tayo tan ebatan to iratan ed dilin nigeter a panaon tan dalan to.
9. Panon so impaneskribe nen Santiago ed maridios a kakabatan tan say aplikasyon to?
9 Say maridios a kakabatan so regalon manlalapud si Jehova. Diad panedeskribe ed ontan iran regalo, oniay inkuan nen Santiago: “Kada maong a regalo tan kada ayadyarin langkap so manlalapud tagey, ta satan so onleleksab a manlapud Ama na mangatatawen iran liwawa, tan diad sikato et anggapoy panguman-uman ed arapen na anino.” Diad pangituloy na sulat to, insalaysay nen Santiago so resulta na pakagamor na tuan kakabatan sanen inkuanto: “Siopa so makabat tan makatalos ed limog yo? Ipanengneng to diad maabig a kondukta to iray kimey to tekep na kaumildian a kien na kakabatan. . . . Say kakabatan a manlapud tagey so ununa ed amin et malinis, insan mareen, makatunongan, akaparaan ya ontulok, napno na panangasi tan maong iran bunga, agmanggagawa na panangidumaduma, aliwan mansimpisimpitan.”—Santiago 1:17; 3:13-17.
10. Panon a miduma so palson relihyon ed tua?
10 Diad sankamundoan ya imperyo na palson relihyon, balanglan walad Kakristianoan odino walad arum a daldalin, mabetbet a kostumbre parad saray managdayew a mankanta na pigaran himno, ontalineng ed paulit-ulit iran pikakasi, tan anganko et ondengel ed sakey a diskurso. Anggapoy panamaseseg a niiiter ed panangiproklama na mensahe ilalo, ta maslak a relihyon et agmakakanengneng na masnag ya iilaloan parad arapen. Say maglorian ilalo ed Mesianikon Panarian na Dios so agbalot sinalambit odino nagnap ya ag-atalosan. Oniay mapropetikon inkuan nen Jehova nipaakar ed papatumbok na Kakristianoan: “Walay duaran mauges a bengatla a ginawa na totook: Tinaynan da ak ni ingen, say panlalapuan na danum a mabilay, ta pian mankotkot parad inkasikaran dili na saray bobon, na saray aderal a bobon, ya agmakapankarga ed say danum.” (Jeremias 2:13) Andian la ra na danum na katuaan. Anggapolay kakabatan manlapud tawen.
11, 12. (a) Panon so nepeg a pamakiwas na madibinon kakabatan ed sikatayo? (b) Nipaakar ed anto a say madibinon kakabatan so mamapasakbay ed sikatayo?
11 Agaylan duma itan ed limog na Tastasi nen Jehova natan! Tekep na inter-Dios a dinamikon enerhya, sikaray manedelap ed dalin na maong a balita na onsasabin Panarian To. Say kakabatan ya itotongtong da so mapekder a nibase’d Salitay Dios. (Ikompara so Uliran 1:20; Isaias 40:29-31.) On, praktikal ya uusaren da so tuan pikakabat tan pakatalos diad panangiproklama ed engraden gagala na Dios tan Manamalsa tayo. Say nepeg a pilalek tayo et amin a kabiangay kongregasyon so “napano na suston pikakabat na linawa [na Dios] tekep na amin a kakabatan tan espiritual a pakatalos.” (Colosas 1:9) Diad pakawalaan na onian letnegan, namparan saray ugaw ni tan maedad la so nabayuboan a lawas “magmaliw a mananumpal na salita.”
12 “Say kakabatan a manlapud tagey” so mamapasakbay ed sikatayo nipaakar ed saray kasalanan a manbunga na agpanangabobon na Dios. “Amtaen yo iya, agagin inad-arok,” kuan nen Santiago. “Kada too so nepeg a magmaliw a masiglat ya ondengel, matantan a mansalita, matantan ya onsanok; ta say sanok na too so agmanggagawa na inkatunong na Dios.” On, nepeg tayo so magmaliw a masiglat tan magunaet ya ontalineng ed konseho na Dios tan diad panangiyaplika’d satan. Anggaman ontan, nepeg tayoy manbantay sumpad aliwan panangusar ed satan a “melag a membro,” say dila. Diad panamegley na panaglastog, agmakabat a panagtalabutob, odino panangibalitay dilin-opinyon to, say dila so nayarin mamarngat ed ‘baleg a kakiewan’ ed piguratibon paraan. Sikatayo sirin so kaukolan a mamayubo na inkamakaingganyo tan dilin-dangka ed amin a pililimog tayo.—Santiago 1:19, 20; 3:5.
13. Akin ya importanti ya awaten tayo so “inkitanem na salita”?
13 “Kanian,” insulat nen Santiago, “ekalen yon amin so inkarumsis tan say inka-alablabas na saman a bengatla, say inkauges, tan awaten a tekep na kaumildian so inkitanem na salita a makayarin mangisalba ed saray kamarerwa yo.” (Santiago 1:21) Sayan maagum a mundo, pati say mapasirayew, materyalistiko, makasarilin istiloy kabibilay tan abeban moralidad to, so asingger lan onlabas. “Balet samay manggagawa na linawa na Dios so mansiansia ed ando lan ando.” (1 Juan 2:15-17) No ontan, agaylan importanti ya awaten tayo so “inkitanem na salita”! Say kakabatan ya itatarya na Salitay Dios so talagan midumaan ed inkauges na sayan manpapanabos a mundo. Agtayo labay itan ya inkauges. (1 Pedro 2:1, 2) Kaukolan tayon aroen so katuaan tan itanem ed kapusoan tayo so mabiskeg a pananisia, ta pian sikatayoy magmaliw a determinadon ag-onsuwawi ed matunong iran dalan nen Jehova. Balet magenap ta la so idengel ed Salita na Dios?
Pagmaliw a “Mananumpal na Salita”
14. Panon itayon magmaliw a namparan “dumerengel” tan “mananumpal” na Salita?
14 Diad Santiago 1:22, nabasa tayo: “Magmaliw a mananumpal na salita, tan aliwan dumerengel lambengat, a papalikdoen yo so inkasikayo na palson panagkatunongan.” “Magmaliw a mananumpal na salita”! Sayan tema so maseguron nipapabitar ed sulat nen Santiago. Nepeg itayon ontalineng, insan gawaey “onman ya onman”! (Genesis 6:22) Ibabaga na dakel a totoo natan a magenap lay idengel ed sakey a sermon odino pibiang ed sakey a pormalistikon panagdayew a tunggal paminsan, balet anggad diman labat. Nayarin isipen da a basta sikaray walaay ‘maong a bilay’ unong ed saray estandarte ra, satan so magenap la. Ingen inkuan nen Jesu-Kristo: “No siopaman a manlabay ya ontumbok ed siak, ikaindan to so inkasikato tan sakbaten to so panamairapan a palitek to tan mantultuloy a tumboken toak.” (Mateo 16:24) Say dilin-panagsakripisyon kiwas tan panagsungdo ed panutumbok ed padron nen Jesus ed panggawa na linawa na Dios so malinlinew a kakaukolanen ed tuan Kristianos. Parad sikara, say linawa na Dios natan so mipadpara a singa ed samay niwalad inmunan siglo sanen inganggan na pinaolin Jesus: “Onla kayo sirin tan manggawa na saray babangatan ed totoo ed amin a nasyon.” (Mateo 28:19) Komusta so nagagawaan mo ed sayan pamaakaran?
15. (a) Anton ilustrasyon so iiter nen Santiago, a mangipapanengneng no panon itayon magmaliw a maliket bilang “mananumpal na salita”? (b) Akin ya agmagenap so basta pormal a panagdayew?
15 No mantultuloy tayo ed maapit ya inenengneng ed Salitay Dios, satan so magmaliw a singa sakey ya espiho a mangipanengneng ed sikatayo no antoy inkatoo tayo. Oniay kuan nen Santiago: “Saman so mankunineng ed ayadyarin ganggan a nipaakar ed kawayangan tan mantultuloy ed saya, sayan too, lapud sikato so nagmaliw, aliwan sakey a mililingwan a dumerengel, noagta sakey a mananumpal na gawa, so magmaliw a maliket ed panggagawa ed satan.” (Santiago 1:23-25) On, sikato so magmaliw a maliket a “mananumpal na salita.” Niarum ni, importanti so pagmaliw a “mananumpal” ed kada detalye na bilay tayo bilang Kristiano. Agtayon balot nepeg a palikdoen so inkasikatayo ed panisip a say basta pormal a panagdayew et magenap la. Ikokonseho nen Santiago ed sikatayo a sumpalen so pigaran aspeto na tuan panagdayew a nayarin napapaulyanan na anggan saray maseseg a Kristiano. Insulat to: “Say porma na panagdayew a malinis tan ag-atilolan ed imaton na Dios tan Ama tayo et saya: asikasoen iray ulila tan bibiin balo ed kairapan da, tan alwaran so sarili ya andian na mantsa manlapud mundo.”—Santiago 1:27.
16. Diad antoran paraan a si Abraham so nagmaliw a “kaaro nen Jehova,” tan panon itayon nayarin nagamoran so pikakaaro To?
16 Agmagenap so basta pangibagan, ‘Manisia ak ed Dios,’ tan anggad diman labat. Oniay sasaglawien na Santiago 2:19: “Sisiaen mon wala so saksakey a Dios, agta ontan? Duga so gagawaen mo. Tan ingen saray demonyo so manisia tan manggiwgiw.” Indanet nen Santiago a “say pananisia, no anggaporay gawa to, so inatey ed inkasikato,” tan tinukoy to si Abraham, diad impangikuan: “Say pananisia to so nankimey a kaiba iray gawa to tan diad panamegley na saray gawa to et apayadyari so pananisia to.” (Santiago 2:17, 20-22) Lalaktipen na saray gawa nen Abraham so pangitarok na tulong ed kakanayon to, pagmaliw a maparawes, panparaan ed pangibagat ed si Isaac, tan ‘sipupublikon iyaabawag’ so agnagiing a pananisia diad sipan na Dios a “syudad a walaay tua iran pundasyon,” say arapen a Mesianikon Panarian. (Genesis 14:16; 18:1-5; 22:1-18; Hebreos 11:8-10, 13, 14; 13:2) Matukotukoy, si Abraham so “atawag a ‘kaaro nen Jehova.’” (Santiago 2:23) Sikatayo met so napibilang bilang ‘kakaaro nen Jehova’ legan a siaaktibon iproklama tayo so pananisia tan ilalo tayo ed onsasabin Panarian na inkatunong.
17. (a) Akin a si Rahab so “niyabawag a matunong,” tan panon a sikatoy atumangan? (b) Anton andukey a listaan so itatarya na Biblia ed saramay ‘nagmaliw a mananumpal na salita’? (c) Panon ya atumangan si Job, tan akin?
17 Saramay “magmaliw a mananumpal na salita” so talagan “niyabawag a matunong diad panamegley na saray gawa, tan aliwan diad pananisia lambengat.” (Santiago 2:24) Tinekepan nen Rahab na gawa so pananisia to ed “salita” a nadngel to nipaakar ed saray makapanyarin gawa nen Jehova. Inyamot toray espiyan Israelita tan tinulongan iran makataynan, tan insan to tinipon so sankaabungan na ama to pian sikaray niliktar. Diad kioli, agaylay panggayaga ton naamtaan a say pananisia to, a tinekepay gawa, so nansumpal ed impagmaliw ton nanlapuan na Mesias! (Josue 2:11; 6:25; Mateo 1:5) Itatarya na Hebreos kapitulo 11 so andukey a listaan na arum nin ‘nagmaliw iran mananumpal’ diad impangidemostra na pananisia ra, tan sikaray siyayaman a natumangan. Nisay nalingwanan tayo si Job, a nisilong ed mairap a subok a nankuan: “Abuloyan a mantultuloy a nabendito so ngaran nen Jehova.” Singa naimano tayo la, say pananisia tan gawa to so nanresulta ed engranden tumang. (Job 1:21; 31:6; 42:10; Santiago 5:11) Ontan met, say panagsungdo tayo natan bilang ‘saray mananumpal na salita’ so mangitatarok na imis na abobon nen Jehova.
18, 19. Panon a say abayag lan pinairap ya agagi so ‘magmamaliw a mananumpal na salita,’ tan anton bendisyon so inkitarokan na aktibidad da?
18 Kaiba ed saramay nansungdo na baleg ed apalabas iran taon et saray agagi tayo ed Mamabukig a Europa. Natan ta nakal lay dakel a panameget, saraya so talagan ‘nagmaliw a mananumpal na salita’ ed balon kaliberliber da. Inmalis diman iray misionero tan payunir manlapud kabangibang a daldalin pian mangasisti ed panagbangat tan panangorganisa. Say sanga na Finland tan arum niran kabangibang a sanga na Watch Tower Society so angibaki na saray onsianon managpaalagey, tan ginastosan na mabunlok a sankamundoan ya impanaagi so panangipaalagey ed balo iran sangan opisina tan Kingdom Hall.—Ikompara so 2 Corinto 8:14, 15.
19 Agaylan siseseseg so ikikiwas ed lawak na saramay agagin abayag lan pinairap! Sikara ‘so mankikimey na impasya tan mangisesekar na inkasikara’ pian makabawi, a singa panangibaga, ed saray pankanawnawan agnilukas legan na “magulon tiempo.” (1 Timoteo 4:10; 2 Timoteo 4:2) Alimbawa, diad sayan apalabas ya Abril diad Albania, a ditan et maruksan tuloy so pananetdet, say interon suplay na Kingdom News ya apauloan na “Akin a Napnapno na Problema so Bilay?” so nibunog ed loob lambengat na taloran agew. Saya so sakey a marakep a balita a tinumbokan na Memoryal na impatey nen Jesus, ya inatendian na 3,491 a totoo—a dakel ni nen say 538 ya aktibon manangipalapag da.
20. Anto so ipapanengneng na say inmaatendi ed Memoryal ed agano ni, tan panon a nayarin natulongan so dakel?
20 Baleg met so walan niarum na arum a daldalin ed saray inmatendi ed Memoryal, satan so dinmaak ed agano niran taon ya anggad masulok a 10,000,000. Diad dakel a pasen saray balo ni, ya apabiskeg so pananisia ra diad inyatendi tan impangimaton ed Memoryal, so ‘magmamaliw a mananumpal na salita.’ Napaseseg tayo kasi dakel nin balon kalimog ya onkualipika ed sayan pribilihyo?
21. Mitunosan ed tinaon a teksto tayo, anton kurso so nepeg a gemtanen tayo, tan tekep na anton kalat?
21 Singa saramay maseseg a Kristiano ed inmunan siglo, tan dakel ni nanlapud saman, komon ta sikatayo so magmaliw a determinado a mangisekar na inkasikatayo diad “panggegemtan a mamaarap ed kalat” ya andi-anggaan a bilay, balanglan satan so diad mangatatawen a Panarian odino diad mangaraldalin a sakop to. (Filipos 3:12-14) Makana ed amin a sagpot tayo so pakadampot ed satan a kalat. Aliwa iyan panaon ya itunda ed pagmaliw a dumerengel lambengat, noagta say panaon na amin a panaon pian ‘magmaliw a mabiskeg tan mankimey.’ (Aggeo 2:4; Hebreos 6:11, 12) Walan ‘naawat so inkitanem na salita,’ komon ta ‘magmaliw itayon magayagan mananumpal na salita’ natan tan ed magnayon.
Panon Yon Ebatan?
◻ Panon itayon makapansungdo tekep na gayaga?
◻ Anto so “say kakabatan a manlapud tagey,” tan panon itayon nagegemtan itan?
◻ Akin a sikatayo so nepeg a “magmaliw a mananumpal na salita, tan aliwan dumerengel lambengat”?
◻ Antoran report so nepeg a mamaligsa ed sikatayo a magmaliw a “mananumpal na salita”?
[Litrato ed pahina 17]
Lukasan tayo komon met iray puso tayo ed madibinon bangat
[Litrato ed pahina 18]
Atumangan so integridad nen Job diad panamegley na inkipawil to ed sigpot, maliket a bilay kaiba iray inad-aro