Pinaligen na Ilalo, Pinakiwas na Aro

“Mansiansia so pananisia, ilalo, aro, sarayan talo; et say kabalbalgan ed saraya say aro.”​—1 CORINTO 13:13.

1. Anton pasakbay so iiter nen apostol Pablo ed sikatayo?

PAPASAKBAYAN itayo nen apostol Pablo a, singa say barko, say pananisia tayo so nayarin nagaygay. Sinaglawi toy ‘pansiansia ed pananisia tan dia ed sakey a maabig a linawa; ta dia ed impangikaindan na arum ed saraya sikara so nagba [“agaygay,” NW] ed pananisia.’ (1 Timoteo 1:19) Nen inmunan siglo K.P., saray panluluganan ed dayat so gawa’d kiew. Say inkamakana na saratan ed dayat so nandependi’d klase na tabla tan ed inkaeksperto ed panaggaway barko.

2. Akin a nepeg a nipaalagey a malet so barko na pananisia tayo, tan antoy kakaukolanen na saya ed sikatayo?

² Say nikuan a barko na pananisia tayo so nepeg a mansiansian akaletaw ed pegley na madaldaluyon a kadayatan na katooan. (Isaias 57:20; Apocalipsis 17:15) Kanian nepeg a malet so inkagawa to, tan mandedependi iya ed sikatayo. Sanen say ‘kadayatan’ na Judio tan Romanon mundo so ompapalalon madaluyon parad inmuunan Kristiano, insulat nen Judas: “Inaro, ipaalage’yo so inkasikayo ed sankasantosan a pananisia, a manpipikasi kayo ed espiritu santo, mansiansia kayo ed panangaro na Dios, tan manalagar kayo ed panangasi na Katawan tayo a Jesu-Kristo ya onkana ed bilay ya andi-angga.” (Judas 20, 21) Lapud sinaglawi met nen Judas so pilaban parad ‘pananisia a niiter ed saray sasanto,’ say balikas a “sankasantosan a pananisia” so nayarin ontukoy ed intiramintin nasasakopan na Kristiano iran bangat, pati say maong a balita na kilalaban. (Judas 3) Si Kristo so pundasyon na satan a pananisia. Nakakaukolan so mabiskeg a pananisia no labay tayoy ompeket ed tuan Kristianon pananisia.

Subaen so Bagyon “Takot ed Sekta”

3. Panoy panguusar na arum ed “takot ed sekta”?

³ Diad agano niran taon, walaray makapakebbiew a kaso na impanbikkel na amayamay, panagpatey, tan panangataki na terorista a nagagawa ed angkelag labat iran sekta. Tua, dakel ya indibidual, pati masimoon iran lider ed politika, so mangipapanengneng na kapagaan parad kaprotektaan na inosintin totoo, nagkalalo la ed saray kalangweran, manlapud saratan a mapeligron sekta. “[Say] dios na sayan panaon,” ya andi-duaruwan walad benegan na sarayan makapakigtot a krimen, so amalesa na tatawagen na arum a takot ed sekta, tan uusaren to iya sumpad totoo nen Jehova. (2 Corinto 4:4; Apocalipsis 12:12) Arum so mangaanamot ed sayan kipapasen pian sagyaten so isusumpa ed kimey tayo. Diad pigaran bansa, sikaray amawala na sakey a kampanya a mapatnag ya inggagala parad panalimbeng ed totoo manlapud “mapeligro iran sekta” balet ta sililingon mangaakusa ed saray Tastasi nen Jehova tan diad ontan et aakusaan da itayo na panagpalikdo. Lapud saya, mairap so manpulong ed kabkaabungan diad pigaran bansa ed Europa tan sengegan la na impangitunda na arum ed pipiaral da ed sikatayo na Biblia. Bilang resulta, walaan iya na negatibon epekto ed pigaran agagi tayo.

4. Akin ya ag-itayo nadismaya ed isusumpa?

⁴ Balet, imbes a nadismaya itayo, say isusumpa so mamabiskeg ed kombiksyon tayon aagamilen tayoy tuan Inkakristiano. (Mateo 5:11, 12) Saray inmunan Kristiano so inakusa bilang onsusumpan sekta, tan sikaray ‘sinumpa’ ed inerman a pasen. (Gawa 24:5; 28:22) Balet pinaseguroan lamet nen apostol Pedro iray kapara ton mananisia, ya insulat to: “Inararok ira, agyo komon pankelawan so inmapuy a panali ed sikayo, ya onsabi ed sikayo pian pakasalian yo, singa bilang bengatla a pankelawan a nagawaan ed sikayo, noag ingen panliketan yo komon so pidama’yo ed saray irirap nen Kristo, pian dia ed kipatnag na gloria to manliket kayo met ed alablabas a gayaga.” (1 Pedro 4:12, 13) Mipadpara, onia so insulat na sakey a membro na inmunan-siglon mananguley ya ulop: “Agagik ira, ibilang yo ya amin a liket no napelag kayo ed nambabangil a katuksoan; amtaen yo a say panalsali ed pananisia yo gawaen to so anos. Tan paulyan komon so anos a wala so ayadyarin gawa to [“gawaen toy kimey to,” NW], pian ayadyari kayo komon tan napnek kayo ya andi kulang.” (Santiago 1:2-4) No panon a say manasibengbeng a dagem et manubok ed kabiskeg na barko ed dayat, saray bagyo na isusumpa so mangipatnag ed dinanman ya inkaletey na barko na pananisia tayo.

Say Kairapan so Mamawala na Panagsungdo

5. Panoy pakaseguro tayo a say pananisia tayo so maligen ed silong na kairapan?

⁵ Naseguro na saray Kristiano so inkasungdo ra tan ed inkaligen na pananisia ra sano asuba da laray bagyo na kairapan. Say inkasungdo tayo et “gawaen toy kimey to” ed mabagyon kadayatan sano ‘ayadyari itayo tan napnek [la ed amin a pamaakaran], ya andi kulang,’ pati mabiskeg a pananisia. Insulat nen Pablo: “Dia ed balang bengatla imamatalek mi inkasikamin dili, a singa ministros na Dios, dia ed dakel ya anos, dia ed ermen, dia ed pankaukolan, dia ed kairapan.”​—2 Corinto 6:4.

6. Akin a nepeg itayon ‘manliket [anggaman] ed saray kairapan,’ tan panon iyan mamabiskeg ed ilalo tayo?

⁶ No maminsan et say manasibengbeng a dagem na kairapan a nayarin nasagmak tayo so nikonsidera iran pankanawnawa pian paneknekan no kasin mabiskeg tan maligen so barko na pananisia tayo. Parad saray Kristiano ed Roma, insulat nen Pablo: “Manliket itayo ni ed saray kairapan tayo: tan amta tayo a say kairapan, mangiter na anos; tan say anos, pakapatnagan; tan say pakapatnagan, ilalo; tan say ilalo agmangibabaing.” (Roma 5:3-5) Say pagmaliw ya agnagiing ed silong na saray subok so manresulta’d panangabobon nen Jehova ed sikatayo. Tan saya met so mamabiskeg ed ilalo tayo.

No Akin a Manasagmak so Arum na Inkagaygay

7. (a) Singa ipapanengneng na saray salita nen Pablo, panon ya asagmak na arum so espiritual ya inkagaygay? (b) Panon a say arum natan so onkakasipa ed katuaan?

⁷ Sanen impasakbay nen Pablo so nipaakar ed pakasagmak na ‘kagaygay,’ et sikatoy sinononot ed pigaran “angikaindan” ed maong a konsiensia ra tan abalang day pananisia ra. (1 Timoteo 1:19) Arum ed sikara et di Himeneo tan Alejandro a nan-apostasya, a kinmasipa ed katuaan tan nansalitan sumpa. (1 Timoteo 1:20, NW, paimano’d-leksab; 2 Timoteo 2:17, 18) Natan, saray apostata, ya onkakasipa ed katuaan, so insangin mamapairap ed “say matoor tan makabat ya aripen,” a singa da keketketen so lima a mamapakan ed sikara ed espiritual. Walaray miulibay ed “mauges ya aripen,” a mangibabagan, “Say katawan ko manbayag.” (Mateo 24:44-49; 2 Timoteo 4:14, 15) Ibuburi ray magano lan pangangga na sayan marelmeng a sistema na bengabengatla tan babalawen da so aliing ed espiritual ya aripen a klase ed pamapasiansia’d inkaganatan ed limog na totoo nen Jehova. (Isaias 1:3) Saratan ya apostata so tinmalona ed ‘pangogotgot ed pananisia na arum,’ a mangisasagyat na kagaygay ed espiritual.​—2 Timoteo 2:18.

8. Antoy makasengeg na inkagaygay na arum odino inkilereg na barko na pananisia ra?

⁸ Arum a dedikadon Kristiano et agaygay so barko na pananisia ra diad impangibaliwala ra’d konsiensia ra tan inggalet day inkasikara ed agnabanlongan a panag-anap na liket tan seksual ya imoralidad na sayan mundo. (2 Pedro 2:20-22) Saray arum met so mangilelereg ed barko na pananisia ra lapud ta diad panmoria ra et singa mabayag ni so maligen a pasen ed balon sistema na bengabengatla. Lapud agpakakalkula ed panaon nipaakar ed kasumpalan na saray pigaran propesiya, tan ed impangiwaklit ed “agew nen Jehova” ed kanonotan da, intalirak day tuan panagdayew. (2 Pedro 3:10-13; 1 Pedro 1:9) Kabekta et naimano ray inkasikaran pinmawil ed mapitek, magalaw a kadanuman na peles a sistema na bengabengatla. (Isaias 17:12, 13; 57:20) Say pigaran tinmunda lan milimog ed Kristianon kongregasyon so siansian manisia a mangaagamil itan na tuan relihyon. Balet, mapatnag ya ag-ira makaanos tan makapansungdo a manalagar ed balon mundo ya insipan nen Jehova a Dios. Parad sikara et say bilay ed Paraiso et mabaybayag ni ya onsabi.

9. Antoy gagawaen na pigaran dedikadon Kristiano, tan antoy itonton na sarayan katuaan a konsideraen tayo?

⁹ Pigaran dedikadon Kristiano ed arum a parti na mundo so ompatnag ya angileksab ed saray layag na barko na pananisia ra. Siansian akaletaw ni so barko, balet imbes ya onabanti tekep na sigpot a pananisia, tinmantan ira. Lapud atangguyor ed ilalon “magano lay Paraiso,” arum so angisekar ed inkasikara pian nadampot itan​—maseseg ed panagpulong tan regular ed iyaatendi’d amin a miting, asamblea, tan kombension. Natan ta iisipen dan say kagawa na saray iilaloan da et mabayag ni nen say iilaloan da, agla ra mabulos a mangisekar a nagkalalo ed inkasikara. Saya so napatnagan ed intayam da la ed panagpulong, aliwa lan regular ed saray miting, tan anggano nasaew da lad’tan so arum a parti ed saray programa ed asamblea odino kombension. Arum so manguusar na dakel a panaon ed panagligliwaan tan ed panangamor na materyal iran pakainawaan. Sarayan katuaan so mangitonton ed sikatayon mangikonsidera ed no antoy nepeg a mamakiwas ed kabibilay tayo a mitunosan ed dedikasyon tayo’d si Jehova. Kasin say seseg tayo ed panaglingkor ed sikato so akadependi ed ilalo a “magano lay Paraiso”?

Nikompara so Ilalo ed Pataga

10, 11. Diad anto so angiyalilingan nen Pablo ed ilalo tayo, tan akin a matukoy iyan panangikompara?

¹⁰ Impabitar nen Pablo ya angisipan si Jehova na saray bendision ya onsabi diad panamegley nen Abraham. Insan impaliwawa na apostol: “[Say] Dios . . . insale’to so samba to: Pian lapud saray duaran bengatla ya agnauman [say salita tan say samba to], a sikara so agnayarin pantilaan na Dios wala so sakey a mabiskeg a ligliwa mi, sikami a binmatik pian onsalimbeng kami, ya inagamil mi so ilalo a niyan ed arap mi; a sikato so wala ed sikami a singa sakey a nailaloan tan malet a pataga na kamarerwa.” (Hebreos 6:17-19; Genesis 22:16-18) Say ilalon para ed alanaan iran Kristiano et say imortal a bilay diad tawen. Natan, karaklan a lingkor nen Jehova so walaan na masnag ya ilalon andi-anggaan a bilay ed paraison dalin. (Lucas 23:43) No anggapo itan ya ilalo, agnawalaan na pananisia so sakey.

¹¹ Say pataga so mabiskeg a kagawaan parad inkaligen, makanakana parad pamuger ed barko tan mangamper ed kianor to. Anggapoy tripulante ya ombuat ed daungan ya anggapoy pataga. Lapud asali nen Pablo so aminpigan inkakneb na barko, unong ed eksperiensia to et amta ton saray bilay na tripulante et mabetbet ya akadependi ed saray pataga na barko ra. (Gawa 27:29, 39, 40; 2 Corinto 11:25) Nen inmunan siglo, say barko so andiay makina a mamasarag ed kapitan a mangimaneobra ed labay to. Likud ed bebegsayan iran barko parad guerra, saray barko so nandependin manuna ed dagem parad kiyabanti. No say barko to ed walad kapeligroan ya onsadsar la’d kabatoan, say mogmon polaing na kapitan et say pangipelag ed pataga pian naliktaran so bagyo, diad paniilalon say pataga so onsegkal ed dalin. Kanian inkompara nen Pablo so ilalo na Kristiano ed “sakey a nailaloan tan malet a pataga na kamarerwa.” (Hebreos 6:19) Sano ondapo ed sikatayo iray bagyo na isusumpa odino makasagmak na arum a subsubok, say makapakelkelaw ya ilalo tayo so niyaliling ed pataga a mamaligen ed sikatayo bilang mabilay a kakamarerwa, ta pian say barko na pananisia tayo so agniyanor ed mapeligro iran bunton na kabueran na panduaruwa odino makadesyang a kabatoan na apostasya.​—Hebreos 2:1; Judas 8-13.

12. Panon tayon napaliisan so yarawi ed si Jehova?

¹² Pinasakbayan nen Pablo iray Hebreon Kristiano: “Nengneng yo, agagi, agla piga no wala naani ed sikayo so sakey a puson mauges ed agpanisia, diad yarawi to ed Dios a mabilay.” (Hebreos 3:12) Diad Griegon teksto, a “yarawi” et literal a mankabaliksan na “isian,” salanti, panapostata. Balet napaliisan tayoy ontan a sigpot a pakagaygay. Say pananisia tan ilalo so ontulong ed sikatayo ya ompeket ed si Jehova anggan legay sankabiskegan iran bagyo na subok. (Deuteronomio 4:4; 30:19, 20) Say pananisia tayo so agmagmaliw a singa sakey a barko ya ibabansiwet na saray dagem na apostatan bangat. (Efeso 4:13, 14) Tan lapud ilalo a pinagkapataga tayo, nasarag tayon subaen iray bagyo ed bilay bilang lingkor nen Jehova.

Pinakiwas na Aro tan Masanton Espiritu

13, 14. (a) Akin a say pataga na ilalo tayo et agmagenap a mismo? (b) Antoy nepeg a manamakiwas a puersa ed panangisaklang tayoy sagradon serbisyo ed si Jehova, tan akin?

¹³ Ag-ontundas so sakey a Kristiano ed balon sistema no say motibo to labat ed panaglingkor ed si Jehova et lapud ilalon pambilay ya ando lan ando ed paraison dalin. Legan ton pansiasiansiaen so pataga na pananisia to bilang manamaligen ed bilay to, kaukolan ton aruman itan ontan met ed pananisia to na manamakiwas a puersa na aro. Indanet nen Pablo iya sanen insulat to: “Natan mansiansia so pananisia, ilalo, aro, sarayan talo; et say kabalbalgan ed saraya say aro.”​—1 Corinto 13:13.

¹⁴ Nepeg a say impapuson panangaro ed si Jehova so manamakiwas a puersa tayo ed pangisaklang na sagradon serbisyo, bilang kiwas ed agnasukat a panangaro to’d sikatayo. Insulat nen apostol Juan: “Say agmangaro agto kabat so Dios; ta say Dios sikato so aro. Dia ed saya nipatnag so aro na Dios ed sikatayo, a say Dios imbaki to ed mundo so Anak ton bogbogtong, pian manbilay itayo ed panamegley to. Aroen tayo ta sikato so angaro ed sikatayo ya inmuna.” (1 Juan 4:8, 9, 19) Lapud otang a linawa ed si Jehova, say manunan kapagaan tayo et kaukolan ya, aliwan say pakagamor na personal a kilalaban, noagta pian tasian so kapasantos na masanton ngaran to tan say kiyalangon na matunong ya inkasoberano to.

15. Panon a say aro tayo ed si Jehova et mitunosan ed isyu nipaakar ed inkasoberano to?

¹⁵ Labay nen Jehova a manlingkor itayo ed sikato lapud sikatoy inaro tayo, aliwan lapu labat ed Paraiso. Onia so inkuan na encyclopedia na Biblia ya Insight on the Scriptures:a “Iglogloria si Jehova lapud inkasoberano to tan say pananuporta ed satan na saray pinalsa to so manunan nibase ed panangaro. Panpilalekan to labat iraman so mangaaro ed inkasoberano to lapud maabig iran kualidad to tan lapud matunong itan, a malabay ed inkasoberano to nen say antokaman ni. (1Co 2:9) Pilien day manlingkor ed silong na inkasoberano to nen say panggunaetan so pagmaliw ya independenti​—saya so lapud pikakabat da ed sikato tan ed panangaro, hustisya, tan kakabatan to, a namomoria ran lampasan ton tuloy so dili ra. (Sal 84:10, 11)”​—Tomo 2, pahina 275.

16. Panon a say aro ed si Jesus et manamakiwas a puersa ed bilay tayo?

¹⁶ Bilang Kristianos, ipapanengneng tayo met so panangaro tayo ed si Jesus bilang ebat ed panangaro to’d sikatayo. Inkatunongan nen Pablo: “Say aro nen Kristo pasooten to kami; ta isipen mi, a no inatey so sakey lapu ed amin, sirin amin da inatey ira nensaman. Tan sikato so inatey lapud amin, pian saray manbilay ag-ira manbilay komon na andukdukey ed sikaran dili, noag dia ed saman so inatey lapu ed sikara tan inmolin binmilay lamet.” (2 Corinto 5:14, 15) Si Kristo so mismon pundasyon ya inkiletnegan na espiritual a kabibilay, pananisia, tan ilalo tayo. Say aro tayo ed si Kristo Jesus so mamaelet ed ilalo tayo tan mamabiskeg ed pananisia tayo, nagkalalo la ed panaon na mabagyon subok.​—1 Corinto 3:11; Colosas 1:23; 2:6, 7.

17. Anton dinamikon puersa so itatarya nen Jehova ed sikatayo, tan panon a nipanengneng so kaimportantian na satan diad Gawa 1:8 tan Efeso 3:16?

¹⁷ Bangta say aro tayo ed Dios tan ed Anak to so manunan manamakiwas a puersa na kabibilay tayo bilang Kristianos, mangitatarya si Jehova na sananey nin mamakiwas, mamakasil, tan mamabiskeg ed sikatayo pian onabanti ed panaglingkor ed sikato. Satan et say aktibon puersa, odino masanton espiritu to. Say Hebreo tan Griego iran salita a nipatalos ya “espiritu” so manunan ontutukoy ed mabiskeg a galaw na dagem. Saray panaglayag a barko a singa ed saramay niluganan nen Pablo so nandependi ed agnanengneng a puersa na dagem pian makasabi ed destinasyon da. Mipadpara, nakaukolan tayoy aro tan say tulong na agnanengneng ya aktibon puersa na Dios ta pian say barko na pananisia tayo so mamaabanti ed sikatayo ed panaglingkor ed si Jehova.​—Gawa 1:8; Efeso 3:16.

Onabanti ed Destinasyon Tayo!

18. Antoy ontulong ed sikatayo pian nasungdoan so dinanman ya arapen a subsubok ed pananisia tayo?

¹⁸ Say pananisia tan aro tayo so nayarin nasubok a maong sakbay itayon makasabi ed balon sistema na bengabengatla. Balet ta angitarya si Jehova ed sikatayo na pataga a “nailaloan tan malet”​—say makapakelkelaw ya ilalo tayo. (Hebreos 6:19; Roma 15:4, 13) Sano napapairap itayo lapud isusumpa odino arum a subsubok, makapansungdo itayo no akaligen itayo panamegley na ilalo tayo. Kayarin kimalmada lay sakey a bagyo balet ta onggapo ni labat so sananey, komon ta determinado itayon mamaelet ed ilalo tayo tan mamabiskeg ed pananisia tayo.

19. Panon tayon napansiansian onkurang so barko na pananisia tayo anggad makasabi ed maligen a pasen na balon mundo na Dios?

¹⁹ Sakbay a sinalambit nen Pablo so ‘pataga na kamarerwa,’ inkuanto: “Panpirpirawatan mi a balang sakey ed sikayo ipanengneng to so onman a seet [“papelesen,” NW, paimano’d-leksab] nipaakar ed inkapno na andi-kaatapan ya ilalo angga ed kasampotan: Ya agkayo mangiras, noag ingen umaalig ed saraman so lapu ed pananisia tan anos tawiren da so saray sipasipan.” (Hebreos 6:11, 12) Diad impamakiwas na panangaro ed si Jehova tan ed Anak to tan pinabiskeg na masanton espiritu, pansiansiaen tayo sirin ya onkurang so barko na pananisia tayo anggad makasabi itayo ed maligen a pasen na insipan na Dios a balon mundo.

[Paimano ed leksab]

Bilang Repaso

◻ Nipaakar ed pananisia tayo, anton pasakbay so inter nen Pablo ed sikatayo?

◻ Panoy impakasagmak na arum ed espiritual a kagaygay, tan panoy itatantan na arum?

◻ Anton maridios a kualidad so kaukolan ya itekep ed pananisia tayo?

◻ Antoy ontulong ed sikatayo pian makasabi ed maligen a pasen ya insipan na Dios a balon mundo?

[Litrato ed pahina 16]

Say barko na pananisia tayo so nepeg a ginawan malet ta pian makatalindeg ed saray bagyo ed bilay

[Litrato ed pahina 17]

Say pananisia tayo so nayarin managmak na kagaygay

[Litrato ed pahina 18]

Say ilalo so pataga na bilay tayo bilang Kristianos