Mansiansian Niyagel Bilang Kabiangay Organisasyon Na Dios
“Say ngaran nen Jehova sikato so mabiskeg ya ilang. Say maptek ombatik ya onloob ed sikato tan nilaban.”—ULIRAN 18:10.
1. Unong ed pikakasi nen Jesus, anton mairap a situasyon so kidudungetan na saray Kristianos?
SAKBAY a tuloy na impatey to, nampikasi si Jesus ed mangatatawen ya Ama to nisesengeg ed saray patumbok to. Tekep na maaron panangiyansakit, inkuanto: “Inter ko ed sikara so salitam, et say mundo ginula tora, lapud ag-ira taga-mundo, salanti unong ya agak taga-mundo. Agko pikasi ya ekalen mora ed mundo, noag ingen ilaban mora ed mauges.” (Juan 17:14, 15) Amta nen Jesus a say mundo so magmaliw a mapeligron pasen parad saray Kristiano. Satan so manggula ed sikara diad pamauges tan pamasegsegang ed sikara. (Mateo 5:11, 12; 10:16, 17) Panlapuan met itan na kabulok.—2 Timoteo 4:10; 1 Juan 2:15, 16.
2. Iner so espiritual a kiagelan na saray Kristiano?
2 Say mundon mamusol ed saray Kristiano so tugyopen na saramay niarawi ed Dios tan walad panangontrol nen Satanas. (1 Juan 5:19) Sayan mundo so mas babaleg nen say Kristianon kongregasyon, tan si Satanas a mismo et mas mabibiskeg nen say siopaman a too. Kanian, say panggula na mundo so talagan makapasesga. Iner so espiritual a kiagelan na saray patumbok nen Jesus? Say komento ed Disyembre 1, 1922, a paway na The Watchtower so angisuheri na ebat: “Wala tayo la natan ed mauges ya agew. Nagagawa lay bakal ed baetan na organisasyon nen Satanas tan say organisasyon na Dios. Mapeligro itan a panbabakal.” Diad sayan labanan, say organisasyon na Dios so pasen na espiritual a kiagelan. Say salitan “organisasyon” so agnaromog ed Biblia, tan nen dekaday 1920, say “organisasyon na Dios” so sakey a balon balikas. Sirin, anto iyan organisasyon? Tan panon tayon naromog so proteksion ed satan?
Organisasyon nen Jehova
3, 4. (a) Unong ed sakey a diksyonaryo tan ed The Watchtower, anto so sakey ya organisasyon? (b) Diad anton pantalos a say internasyonal a pantutuyaw na Tastasi nen Jehova so natawag ya organisasyon?
3 Unong ed Concise Oxford Dictionary, say organisasyon et “sakey ya organisadon ulop.” Sinononot ed satan, natalosan tayo a lapud inorganisa na apostoles so inmunan-siglon Kristianos ed lokal iran kongregasyon diad silong na panangasikasoy mananguley ya ulop diad Jerusalem, manepeg a tawagen itan ya “impanaagi” bilang sakey ya organisasyon. (1 Pedro 2:17) Ontan met so uksoyay organisasyon na Tastasi nen Jehova natan. Say pankakasakey na inmunan-siglon ulop so pinabiskeg na saray “langkap a totoo,” a singa saray “pastol tan managbangat.” Nambiahe so arum ed saraya diad kada kongregasyon, bangta say arum et mamatatken ed lokal iran kongregasyon. (Efeso 4:8, 11, 12, NW; Gawa 20:28) Ontan met iran “langkap” so mamapabiskeg ed pankakasakey na Tastasi nen Jehova natan.
4 Oniay impanaglawi na Nobyembre 1, 1922, a paway na The Watchtower nipaakar ed salitan “organisasyon”: “Say organisasyon et sakey ya ulopan na totoo diad gagalan sumpaley sakey a plano.” Intuloy ya impaliwawa na The Watchtower a say panawag ed Tastasi nen Jehova a sakey ya organisasyon so agmanggawa’d sikaran “sakey a sekta diad pantalos a kauusaray termino, noagta mankabaliksan lambengat itan a panggugunaetan na saray Estudyante na Biblia [Tastasi nen Jehova] a sumpalen iray gagala na Dios tan gagawaen da itan unong ed panusumpal na Katawan ed amin a bengatla, diad mauksoy a paraan.” (1 Corinto 14:33) Impanengneng nen apostol Pablo ya ontan met kauksoy so inkiwas na saray Kristiano ed agew to. Inyaliling to ed laman na too so pantutuyaw na alanaan a Kristianos, a walaay dakel a parti, a susumpalen na balang sakey so betang to ta pian sustoy kikurang na laman. (1 Corinto 12:12-26) Ekselenti itan ya ilustrasyon na sakey ya organisasyon! Akin ya organisado iray Kristiano? Pian manlingkor parad “saray gagala na Dios,” a gawaey linawa nen Jehova.
5. Anto so nanengneng ya organisasyon na Dios?
5 Impasakbay na Biblia a saray tuan Kristiano natan so mankakasakey, ya impanuulop ed sakey a “dalin” bilang saksakey a “nasyon,” a ditan ira magmaliw a “silesilew dia ed mundo.” (Isaias 66:8; Filipos 2:15) Sayan organisadon “nasyon” natan so manbilang na masulok a limara tan kapalduan milyon. (Isaias 60:8-10, 22) Balet, aliwa labat lan satan so manibukel ed organisasyon na Dios. Nasasaglawi met iray angheles.
6. Diad sankalaknaban a talos to, siopay manitibukel na organisasyon na Dios?
6 Dakel so inkagawan akikimey iray anghel ed totoon lingkor na Dios. (Genesis 28:12; Daniel 10:12-14; 12:1; Hebreos 1:13, 14; Apocalipsis 14:14-16) Matukotukoy, sirin ya oniay inkuan na Mayo 15, 1925, a paway na The Watchtower: “Amin a masanton anghel et kabiangay organisasyon na Dios.” Niarum ni, inkuanto: “Diad tagey na organisasyon na Dios, say walaay amin a pakayari tan autoridad, [et] say Katawan a Jesu-Kristo.” (Mateo 28:18) Kanian, diad sankalaknaban a talos to, say organisasyon na Dios et tibukelen na amin na saramay walad tawen tan walad dalin a nankakasakey a mankikimey pian gawaen so linaway Dios. (Nengnengen so kahon.) Agaylan makapakelaw a pribilihyo so pagmaliw a kabiangan na saya! Tan agaylan gayaga so pantalaran ed panaon sano amin a mabilay a palsa, mangatatawen man odino mangaraldalin, so naorganisan mangidayew ed si Jehova a Dios diad inkasaksakey! (Apocalipsis 5:13, 14) Balet, anton proteksion so itataryay organisasyon na Dios natan?
Protektado ed Organisasyon na Dios—Panon?
7. Diad anton paraan a proprotektaan itayoy organisasyon na Dios?
7 Ontulong so organisasyon na Dios a manalimbeng ed sikatayo sumpad si Satanas tan saray pakana to. (Efeso 6:11) Si Satanas so manedesdes, mamapasegsegang, tan manutukso’d saray managdayew nen Jehova tekep na saksakey a kalat ed kanonotan: pian paarawien ira ed ‘say dalan a laen da komon.’ (Isaias 48:17; ikompara so Mateo 4:1-11.) Agtayon balot sigpot a napaliisan iratan a panangataki diad sayan sistema na bengabengatla. Balet, say maapit a relasyon tayo ed Dios tan ed organisasyon to so mamabiskeg tan manalimbeng ed sikatayo tan diad ontan et natulongan itayon mansiansia’d “say dalan.” Bilang resulta, ag-itayo natalo no nipaakar ed ilalo tayo.
8. Panon a susuportaan na agnanengneng ya organisasyon nen Jehova iray mangaraldalin a lingkor to?
8 Panon so pamoprotektay organisasyon na Dios? Unona, walaan itayoy seguradon pananuporta na saray espiritun lingkor nen Jehova. Sanen pirmin nadedesdes si Jesus, sikatoy inantabayan na sakey ya anghel. (Lucas 22:43) Sanen walad sesgay ipapatey, si Pedro so mamilagron insalba na sakey ya anghel. (Gawa 12:6-11) Anggaman anggapo la natan so ontan iran milagro, napapaseguroan iray totoo nen Jehova ed pananulong na anghel diad panagpulong da. (Apocalipsis 14:6, 7) Mabetbet iran walaay biskeg a labas nen say normal sano nipapaarap ira’d mairap iran situasyon. (2 Corinto 4:7) Niarum ni, amta ran “say anghel nen Jehova mankampamento ed liberliber na saray ontakot ed sikato, tan iliktar tora.”—Salmo 34:7.
9, 10. Panon a nibagan “say ngaran nen Jehova sikato so mabiskeg ya ilang,” tan panon ya onaplika iyan prinsipyo ed organisasyon na Dios bilang intiraminti?
9 Say nanengneng ya organisasyon na Dios et proteksion met. Panon? Diad Uliran 18:10, oniay nabasa tayo: “Say ngaran nen Jehova sikato so mabiskeg ya ilang. Say maptek ombatik ya onloob ed sikato tan nilaban.” Agto labay ya ibagan say pangulit-ulit labat ed ngaran na Dios et mangiter lay proteksion. Imbes, say panpasalimbeng tayo ed ngaran na Dios et mankabaliksan a manmamatalek itayo ed si Jehova a mismo. (Salmo 20:1; 122:4) Say labay ton ibaga et pananuporta ed inkasoberano to, panangitandoro ed saray ganggan tan prinsipyo to, tan pakawalaay pananisia ed saray sipan to. (Salmo 8:1-9; Isaias 50:10; Hebreos 11:6) Lalaktipen toy pangiter na nikabkabiig a debosyon ed si Jehova. Saraman lambengat so mandadayew ed si Jehova ed onian paraan so makapangibaga’d inkuay salmista: “Say puso tayo so manggayaga ed [si Jehova], nisengeg ed nanmatalek itayo ed masanto a ngaran to.”—Salmo 33:21; 124:8.
10 Natan et ibabaga na amin a walad nanengneng ya organisasyon na Dios so kuan nen Miqueas: “Manakar itayo naani dia ed ngaran nen Jehova a Dios tayo ed ando lan ando lawas.” (Miqueas 4:5) Say modernon-agew ya organisasyon so dinmagup ed “[say] Israel na Dios,” a tinawag ed Biblia a “totoo a nipaakar ed ngaran to.” (Galacia 6:16; Gawa 15:14; Isaias 43:6, 7; 1 Pedro 2:17) Kanian, say pagmaliw a kabiangay organisasyon nen Jehova et kabaliksan toy pagmaliw a kabiangay totoon manaanap, tan mangaawat, na proteksion diad ngaran na Dios.
11. Diad antoran espisipikon paraan a proprotektaay organisasyon nen Jehova iramay kabiangan na satan?
11 Niarum ni, say nanengneng ya organisasyon na Dios so totoon walaay pananisia, sakey ya ulopan na mankakapananisiaan a manpapabiskegan tan manpapasesegan. (Uliran 13:20; Roma 1:12) Ditan so pangaasikasoay Kristianon papastol ed saray karnero, pamapasesegan ed mansasakit tan nagogonigon, tan pangipapawilan ed saramay nankasalanan. (Isaias 32:1, 2; 1 Pedro 5:2-4) Itatarya na “[say] matoor tan makabat ya aripen” so “tagano ed panaon a kinepeg to” diad panamegley na organisasyon. (Mateo 24:45) Itatarya na satan ya “aripen,” a tugyopen na alanaan a Kristianos, so sankaabigan a maespiritual iran maong a bengatla—susto, nibase’d-Biblian pikakabat a mangitonton ed andi-anggaan a bilay. (Juan 17:3) Nisesengeg ed panangigiyan manlalapud say “aripen,” namamantini na saray Kristiano iray atagey ya estandarte ed moral tan magmamaliw a ‘makalkalakal a singa saray uleg, tan mauyamo a singa saray malapati’ diad mapeligron kaliberliber da. (Mateo 10:16) Tan lawas iran natutulongan pian nawalaay ‘daakan a kimey ed Katawan,’ a satan a mismo et mabiskeg a proteksion.—1 Corinto 15:58.
Sioparay Kabiangay Organisasyon na Dios?
12. Sioparay abidbiran a kabiangay mangatatawen ya organisasyon na Dios?
12 Lapud walay proteksion ed saramay kabiangay organisasyon na Dios, sioparay lalaktipen na saya? No nipaakar ed mangatatawen ya organisasyon, anggapoy duaruwa ed ebat na sayan tepet. Si Satanas tan saray anghel to et anggapo lara’d tawen. Diad biek a dapag, wadman niray matoor ya angheles “ed singbatan na saray lapag.” Anengneng nen apostol Juan a legan na saray kaunoran ya agew, “say Kordero,” saray kerubin (“saray apatiran mabilay a palsa”), tan “dakel ya angheles” so walad kaliberliber na trono na Dios. Kaiba ray 24 a mamasiken—a mangirerepresenta ed saramay alanaan a Kristianon linmoob la ed maglorian tawir da ed tawen. (Hebreos 12:22, 23; Apocalipsis 5:6, 11, NW; 12:7-12) Amin et mabitar a kabiangay organisasyon na Dios. Balet, diad saray totoo, agtanton malinew a nidatak iray bengatla.
13. Panon ya impabidbir nen Jesus iramay kabiangan tan agkabiangay organisasyon na Dios?
13 Oniay imbaga nen Jesus ed arum a mankuan ya ontutumbok ed sikato: “Dakel naani ray mankuan ed siak no saman ya agew, ‘Katawan, Katawan, agkami ta angipropeta lapu ed ngaran mo, tan diad ngaran mo pinapaway miray demonyo, tan lapud ngaran mo nanggawa kami makapakelaw iran gawa?’ Et saman ko la ipaliwawa naani ed sikara: Agta kayo apikabkabatan a balot! Arawi kayod siak, sikayo a managgawa na kaugsan.” (Mateo 7:22, 23) No say sakey et managgaway kaugsan, seguradon sikatoy agkabiangay organisasyon na Dios, anggan anto lay ibabaga to, tan anggan iner so laen ton pandayewan. Impanengneng met nen Jesus no panon a nabidbir no say sakey et kabiangay organisasyon na Dios. Inkuanto: “Aliwan balang sakey a mankuan ed siak na, ‘Katawan, Katawan,’ et onloob naani ed panariay tawen, noag ingen say mangunor na linawa nen Amak a wala ed tawen.”—Mateo 7:21.
14. Antoran aspekto na linaway Dios so nipabidbir bilang obligasyon na saramay kabiangay organisasyon na Dios?
14 Kanian, pian magmaliw a kabiangay organisasyon na Dios—a “[say] panariay tawen” so manunan kabiangan to—kaukolan a gawaen na sakey so linawa na Dios. Anto so linawa to? Impabidbir nen Pablo so makanan aspekto na satan sanen inkuanton: “Say linawa [na Dios] et amin a nengneng na totoo so nilaban tan makarateng ed suston pikakabat ed katuaan.” (1 Timoteo 2:4, NW) No talagan panggugunaetan na sakey a too so makagamor na suston pikakabat manlapud Biblia, ya iyaplika itan ed bilay to, tan ikayat itan ed “amin a nengneng na totoo,” gagawaen toy linawa na Dios. (Mateo 28:19, 20; Roma 10:13-15) Linawa met na Dios a napakan tan naasikaso iray karnero nen Jehova. (Juan 21:15-17) Saray Kristianon miting so walaay importantin betang ed saya. Say toon mawayang ya onatendi ed ontan iran miting balet ta papaulyanan to itan so agmangaapresia ed pasen to diad loob na organisasyon na Dios.—Hebreos 10:23-25.
Pikakaaro ed Mundo
15. Anto so impasakbay nen Santiago ed saray kongregasyon ed agew to?
15 Ngalngalin 30 taon kayari na impatey nen Jesus, say agi to’d ina a si Santiago so angipabidbir ed pigaran sengegan a makaderal ed pasen na sakey diad organisasyon na Dios. Insulat to: “Sikayo a palalawanan, agyo ta amta a say pikakaaro ed mundo et sikato so pibubusol ed Dios? Kanian siopaman a magmaliw naani a kaaro na mundo sikato so kabusol na Dios.” (Santiago 4:4) Say kabusol na Dios so seguradon agkabiangay organisasyon to. Anto, sirin so pikakaaro ed mundo? Nipapaliwawa itan diad nanduruman nengneng, a singa say panamayubo odino pakapilanor ed saray mauges a kaulop. Niarum ni, iyaapasakey nen Santiago so bengatlan espisipikon tuloy—mauges iran mental ya awawey a mangitonton ed agmanepeg a kondukta.
16. Anto so kontekstoy pasakbay nen Santiago a say pikakaaro ed mundo et pigugulaan ed Dios?
16 Diad Santiago 4:1-3, nabasa tayo: “Iner so panlapuan na bakal tan sepakan ed sikayo? Ag-ira kasi manlalapu, ya anggan diad saray likeliket yo a manbabakal ira ed saray kabiangan yo? Man-agum kayo, et anggapoy wala ed sikayo; mamatey kayo, et pirawat yo so makagegemtan, et agyo nagamoran; mikolkol tan mibakal kayo, et agyo ni nagegemtan lapu ed agkayo onkerew. Onkerew kayo et agkayo mangawat, lapu ed mauges so ikekerew yo, pian ikana yo ed saray kalikaliktan na laman yo.” Impasakbay nen Santiago so sumpad pikakaaro ed mundo kayari ton insulat irayan salita.
17. Diad anton paraan a walaray “panbabakal” tan “pisasangsangan” diad inmunan-siglon Kristianon kongregasyon?
17 Pigaran siglo kayari impatey nen Santiago, nambabakal tan nampapateyan iray palson Kristiano diad literal a pantalos. Balet, say sinulat nen Santiago et saray inmunan-siglon membro na “say Israel na Dios,” saray prospektibon mangatatawen a ‘saserdote tan arari.’ (Apocalipsis 20:6) Ag-ira nampapateyan odino nankekeretan diad literal a bakabakal. Akin sirin a sinaglawi nen Santiago so ontan a bengabengatla diad limog na saray Kristiano? Bueno, tinawag nen apostol Juan so siopaman a manggugula’d agi to et sakey a managpatey. Tan sinaglawi nen Pablo so panbabalingaan ed personalidad tan pansisiblangan diad loob na saray kongregasyon bilang “pisasangsangan” tan “pikokolkol.” (Tito 3:9; 2 Timoteo 2:14; 1 Juan 3:15-17) Mitunosan ed saya, say mabitar a walad kanonotan nen Santiago et—manunaan, say isaew ed pangaro’d kaparan Kristianos. Diad limog da, saray Kristiano so onkikiwas diad paraan a singa say mabetbet a pidedeneng na saramay walad mundo ed balang sakey ed sikara.
18. Anto so mangitonton ed saray agmaaron kiwas tan liknaan ed limog na saray Kristiano?
18 Akin a nagagawa iratan diad saray Kristianon kongregasyon? Lapud mauges iran awawey, a singa say inkaagap tan “saray kalikaliktan na laman.” Say kinon, imon, tan inka-ambisyon so makaderal met ed maaron Kristianon pantutuyaw diad loob na kongregasyon. (Santiago 3:6, 14) Say ontan iran awawey so manggawa ed sakey a kaaro na mundo tan, sirin et kabusol na Dios. Agnailaloan na siopaman a walaan na onia iran awawey a mansiansian kabiangay organisasyon na Dios.
19. (a) Siopa so manunan natetel no naromogan na sakey a Kristiano ya onlalamot ed puso to so ontan a makapuy a kanonotan? (b) Panon a natalonaay sakey a Kristiano so makapuy a kanonotan?
19 Siopay natetel tayo no naromog tayon onlalamot ed puso tayo so makapuy a kanonotan? Si Satanas? Diad sakey a dapag, on. Sikato so “pangulo na pakayari na dagem” na sayan mundo, a no iner et kasmak so ontan iran awawey. (Efeso 2:1, 2; Tito 2:12) Balet, gendagendat a saray lamot na makapuy a kanonotan so akadependi’d ag-ayadyarin laman tayon dili. Kayarin amasakbay sumpad pikakaaro ed mundo, insulat nen Santiago: “Isipen yo lagi a say masantos a sulat ibaga to ya andi kakanaan: ‘Say espiritu kasi a manayam ed sikatayo pirawat to so pakakaibeg’?” (Santiago 4:5) Amin tayo so walaay nisipor a tendensyan manggaway makapuy. (Genesis 8:21; Roma 7:18-20) Balet, nalabanan tayo itan a tendensya no aksobien tayoray kakapuyan tayo tan mandependi’d tulong nen Jehova pian natalonaan iratan. Inkuan nen Santiago: “[Say Dios a] mangiter na balbaleg a grasya [nen say nisipor a tendensya tayon onibeg].” (Santiago 4:6) Diad tulong na masanton espiritu na Dios tan say suporta na matoor a Kristianon agagi, tan diad panamegley na merito na dondon bagat nen Jesus, saray matoor a Kristiano so agnadaeg na saray kakapuyan na laman da. (Roma 7:24, 25) Maligen ira ed loob na organisasyon na Dios, a kakaaro na Dios, aliwan ed mundo.
20. Antoran mayaman a bendision so panggagayagaan na saramay kabiangay organisasyon na Dios?
20 Isisipan na Biblia: “Si Jehova mangiter na biskeg ed saray totoo; si Jehova bendisionan to so totoo to na kareenan.” (Salmo 29:11) No talagan kabiangan itayo na modernon-agew a “nasyon,” nen Jehova, say nanengneng ya organisasyon to, minabang itayo ed biskeg ya iiter to tan manggayaga ed kareenan ya ipapalabo to’d totoo to. Tua, mas baleg so mundo nen Satanas nen say nanengneng ya organisasyon nen Jehova, tan mas mabiskeg si Satanas nen say sikatayo. Balet si Jehova so Makapanyarin-amin. Agnadaeg so aktibon puersa to. Saray makapanyarin anghel to met so kamuyong tayon manlilingkor ed Dios. Kanian, anggaman ed gulan aarapen tayo, makatalindeg itayon malet. Singa si Jesus, natalo tayo so mundo.—Juan 16:33; 1 Juan 4:4.
Kasin Nisalaysay Yo?
◻ Anto so nanengneng ya organisasyon na Dios?
◻ Diad antoran paraan so panproprotekta na organisasyon na Dios?
◻ Sioparay kabiangay organisasyon na Dios?
◻ Panon tayon napaliisay pakapikaaro ed mundo?
[Kahon ed pahina 9]
Anto So Organisasyon Na Dios?
Diad literaturay Tastasi nen Jehova, say balikas ya “organisasyon na Dios” so nausar ed taloran paraan.
1 Say mangatatawen, agnanengneng ya organisasyon nen Jehova a tibukelen na saray matoor ya espiritun palsa. Diad Biblia et tatawagen iyan “Jerusalem a wala ed tagey.”—Galacia 4:26.
2 Say atooan, nanengneng ya organisasyon nen Jehova. Natan et tugyopen iya na alanaan a nakdaan a kaibay baleg ya ulop.
3 Sankatalbaan ya organisasyon nen Jehova. Natan et tugyopen iya na mangatatawen ya organisasyon nen Jehova a kaibay alanaan, atagibin ananak to’d dalin, a walaay espiritual ya ilalo. Nasabi panaon, laktipen to met so ayadyari lan totoo ed dalin.
[Litrato ed pahina 10]
Nitatarya so sankaabigan ya espiritual a tagano diad panamegley na organisasyon nen Jehova