Anggaman ed Subsubok, Ompeket ed Pananisiam!

“Agagik ira, ibilang yo ya amin a liket no napelag kayo ed nambabangil a katuksoan.”​—SANTIAGO 1:2.

1. Anggaman ed anto a siansian saray totoo nen Jehova et manlilingkor ed sikato diad pananisia tan tekep na “liga na puso”?

SARAY totoo nen Jehova so manlilingkor bilang Tastasi to tekep na pananisia ed sikato tan “liga na puso.” (Deuteronomio 28:47; Isaias 43:10) Gagawaen da iya anggaman napapaliberan iray dakel a pakasubokan. Anggaman manasagmak iray ir-irap, naliligliwa ira na saray salitan: “Agagik ira, ibilang yo ya amin a liket no napelag kayo ed nambabangil a katuksoan. Amtaen yo a say panalsali ed pananisia yo gawaen to so anos.”​—Santiago 1:2, 3.

2. Anto so amta nipaakar ed managsulat na sulat nen Santiago?

² Satan so nisulat ed ngalngali 62 K.P. nen babangatan a Santiago, ya agi ed ina nen Jesu-Kristo. (Marcos 6:3) Sakey a matatken ed saman si Santiago ed kongregasyon na Jerusalem. Diad tua et sikato, si Cefas (Pedro), tan Juan so “singa [ra] lusek”​—mabiskeg, putel a nipirmin pinagkasuporta na kongregasyon. (Galacia 2:9) Sanen niparungtal so pansasangsangan a panaggalsim ed “saray apostoles tan saray mamasiken” ed ngalngali 49 K.P., say improponi nen Santiago a base’d Kasulatan so inadapta na saman ya inmunan-siglon mananguley ya ulop.​—Gawa 15:6-29.

3. Antoray pigaran probleman kipapaarapan na inmunan-siglon Kristianos, tan panon itayon nagunggunaan a maong manlapud sulat nen Santiago?

³ Bilang manangiyansakit ya espiritual a pastol, ‘amta nen Santiago so kipapasen na saray karnero.’ (Uliran 27:23) Amoria ton pirmi kasusubok ed saman na saray Kristiano. Kaukolan ya ipetek-lamet so kaisipan na arum, ta papaboran daray mayaman. Parad dakel et sakey labat a pormalidad so panagdayew. Arum so sengegay pakakasakitan lapud agnabanlongan iran dila ra. Makaderal so epekto na minumundon espiritu, tan dakel so agmakankaanos nisay mapikasi. Diad tua, mansasakit ed espiritual so arum a Kristianos. Ontan iran pamaakaran so angiyarapan na sulat nen Santiago diad makapaalagey a paraan, tan say konseho to so praktikal met natan a singa ed inmunan siglo K.P. Nagunggunaan tayon maong no usisaen tayo iyan sulat bilang sakey a nisulat ed sikatayon mismo.a

Sano Nasusubok Itayo

4. Panon so panmoria tayo ed saray pakasubokan?

⁴ Ipapanengneng nen Santiago ed sikatayo no panon tayon moriaen iray subok. (Santiago 1:1-4) Agsasaglawien so pikanayon to ed Anak na Dios, sipapaabeban impakabat toy inkasikato bilang “aripen na Dios tan Katawan a Jesu-Kristo.” Sinulat nen Santiago so “saray labindua a baranggay [tribu]” na “abuybuyak” ya espiritual ya Israel, diad inmuna lapud panamasegsegang. (Gawa 8:1; 11:19; Galacia 6:16; 1 Pedro 1:1) Bilang Kristianos, napapasegsegang itayo met, tan ‘napepelag itayo ed nambabangil a katuksoan.’ Balet no isipen tayon saray asungdoan a subok et mamabiskeg ed pananisia tayo, ‘nibilang tayo iratan ya amin a liket’ sano nagawa ed sikatayo. No napansiansia tayoy integridad tayo ed Dios kaleganay pakakasubok, itarok na saya ed sikatayo so magnayon a liket.

5. Antoray lalaktipen na subsubok tayo, tan antoy nagawa sano sitatalonan nasungdoan tayo iratan?

⁵ Ilalaktip na subsubok iray probleman kaslakan ed katooan. Alimbawa, say makapuy a bunigas so nayarin mamakbak ed sikatayo. Agmanggaway Dios na mamilagron panagtambal, balet ta eebatan toy pikakasi tayo parad kakabatan tan biskeg a nakakaukolan ta pian naasikasoy sakit. (Salmo 41:1-3) Napapairap tayo met nisesengeg ed inkatunong bilang napapasegsegang a Tastasi nen Jehova. (2 Timoteo 3:12; 1 Pedro 3:14) Sano sitatalonan nasungdoan tayo iratan a subok, napaneknekan so pananisia tayo, magmamaliw a sakey ya ‘asali la.’ Tan sano manbiktorya so pananisia tayo, “gawaen to so anos.” Say pananisian apabiskeg lapud subsubok so ontulong ed pakapansungdo tayo ed onsabi niran panalsali.

6. Panon a ‘say anos et ayadyari so gawa to,’ tan antoray praktikal a kundang a naala sano nasusubok itayo?

⁶ “Tan,” kuan nen Santiago, “paulyan komon so anos a wala so ayadyarin gawa to.” No pantultuloyen tayoy subok ya agpapanganggaen itan a tampol diad agmakasulatan a paraan, mankimey so sungdo ed ‘panggawa’ to ed pakapagmaliw tayon kompleto bilang Kristianos, ya ag-onkulang ed pananisia. Siempre, no iparungtal na subok so kakapuyan tayo, kaukolan a patulongan itayo ed si Jehova pian natalonaan itan. Anto no say subok et say pakatukso ed seksual ya imoralidad? Kaukolan tayon ipikasi so problema tan onkiwas a mitunosan ed saray pikakasi tayo. Ompan kaukolan a salatan tayoy paniimpleyoan tayo odino mangala na arum niran kundang ta pian napansiansiay integridad ed Dios.​—Genesis 39:7-9; 1 Corinto 10:13.

Pangegemtan Parad Kakabatan

7. Panon itayon natulongan a pidenengan iray pakasubokan?

⁷ Ipapanengneng nen Santiago ed sikatayo no antoy gawaen no agtayo amtan pidenengay sakey a subok. (Santiago 1:5-8) Ag-itayo balawen nen Jehova lapud kulang tayo na kakabatan tan ipipikasi itan tekep na pananisia. Tulongan to itayon dugay pakamoria ed subok tan ed pakapan-anos ed satan. Nayarin nipaimano ed sikatayo iray Kasulatan na saray kapananisiaan odino diad panagaral na Biblia. Saray nigiyay Dios ya agawa so nayarin mangipanengneng ed sikatayo no antoy kaukolan tayon gawaen. Niwanwan itayo ni ingen na espirituy Dios. (Lucas 11:13) Pian napanggayagaan iratan a bendision, singa iilaloan nepeg itayon onapit ed Dios tan ed totoo to.​—Uliran 18:1.

8. Akin ya anggapoy naawat na manduaruwa manlapud si Jehova?

⁸ Papagamoran itayo nen Jehova na kakabatan pian natalonaan iray subok no sikatayo so “pakerewen ed [pananisia, NW], . . . ya andi panduaruwa.” Say sakey a manduaruwa et nipalirpalir a “[singa] daluyon ed dayat a nagalaw-galaw na dagem, tan nibantak ed biek tan biek.” No ontan so ag-inkaligen tayo’d espiritualidad, ‘agtayo isisipen a naawat tayoy antokaman ed Jehova.’ Kaukolan ya agtayo magmamaliw a “nankadua [ed] kanonotan” tan “agmakapansiansia” diad panagpikasi odino ed arum niran paraan. Imbes, nawalaan tayo na pananisia ed si Jehova, say Lapuan na kakabatan.​—Uliran 3:5, 6.

Makapanggayaga Iray Mayaman tan Duruka

9. Akin a walay katunongan tayo a makapanggayaga bilang managdayew nen Jehova?

⁹ Anggano say inkaduka so sakey ed pakakasubokan tayo, ipaslep tayo’d kanonotan tayo a parehon makapanggayaga iray mayaman tan duruka a Kristianos. (Santiago 1:9-11) Sakbay a nagmaliw a papatumbok nen Jesus, maslak ed saray alanaan so anggapoan da ed materyal tan melmelagen na say mundo. (1 Corinto 1:26) Balet ta makapanggayaga ra lapud “atagey a kipapasen” da ed maong a reputasyon da a tomatawir na Panarian. (Roma 8:16, 17) Diad kabaliktaran, saramay mayaman a datin napapagalangan so makakaeksperiensiay ‘kiabeba’ bilang papatumbok nen Kristo lapud panleglemew na mundo ed sikara. (Juan 7:47-52; 12:42, 43) Balet, bilang ariripen nen Jehova, amin tayo so makapanggayaga lapud say kayamanan ed mundo tan say atagey ya estado so andiay kakanaan no ikompara ed espiritual a kayamanan a panggagayagaan tayo. Tan alay pisalsalamat tayo a diad limog tayo et anggapoy kinon no nipaakar ed talindeg ed sosyedad!​—Uliran 10:22; Gawa 10:34, 35.

10. Panon so panmoria na sakey a Kristiano ed materyal a kayamanan?

¹⁰ Natulongan itayo nen Santiago a natebek a say dukey na bilay tayo so agmandedepende ed kayamanan tan minumundon nagagawaan. No panon a say karakpan na bolaklak et agmangamper ed ipatey to lapud “sankapetangan a banwa,” ontan met say kayamanan na too so agmamarukey ed bilay to. (Salmo 49:6-9; Mateo 6:27) Nayarin sikatoy ompatey legay pangegemtan to’d “awawey [kabibilay, NW] to,” anganko ed negosyo to. Kanian, say importantin bengatla et say pagmaliw a “mayaman dia ed Dios” tan say pamasya ed pangiyalibansay intereses na Panarian.​—Lucas 12:13-21; Mateo 6:33; 1 Timoteo 6:17-19.

Maliket Iramay Susungdoan Day Subok

11. Antoray iilaloan parad saramay ompeket ed pananisia ra diad arap na saray subok?

¹¹ Mayaman man odino pobri, makapanliket itayo labat no nasungdoan tayoray subok. (Santiago 1:12-15) No sungdoan tayo iray subok ya agnagirogiro so pananisia tayo, niyabawag tayon maliket, ta wala so gayaga ed panggawa na maptek ed imaton na Dios. Diad ipeket da ed pananisia ra anggad ipapatey, saray atagibi’d-espiritun Kristianos so makaawat na “balanget na bilay,” imortalidad ed katawenan. (Apocalipsis 2:10; 1 Corinto 15:50) No walaan itayo na mangaraldalin ya ilalo tan mantiniey pananisia tayo’d Dios, nailaloan tayo so andi-anggaan a bilay ed paraison dalin. (Lucas 23:43; Roma 6:23) Agaylay kamaong nen Jehova ed amin na saramay mangaagamil na pananisia ed sikato!

12. Sano manasagmak na kairapan, akin ya agtayo ibagan: “Tinukso ak na Dios”?

¹² Posibli ta a suboken itayo nen Jehova a mismo diad panamegley na kairapan? Andi, agtayo ibabagan: “Tinukso ak na Dios.” Agmamapalesay Jehova na pankasalananan tayo noagta seguradon tulongan to itayo tan ikdan to itayo na biskeg a nakakaukolan pian nasungdoan iray subok daput no mansiansia itayon agnagiing ed pananisia. (Filipos 4:13) Masanto so Dios, kanian agto itayo iiyan ed saray sirkumstansian mamakapuy ed pakaresisti tayo’d gawan-mauges. No nipaarap tayoy inkasikatayo’d agmakasulatan a situasyon tan makapankasalanan, sikatoy agtetelen, “ta say Dios agnayari a tuksoen na mauges tan agmet manukso na siopaman a too.” Anggaman nayarin iyabuloy nen Jehova so sakey a subok a manisiplina ed sikatayo parad kagunggunaan tayo, agto itayo sasalien tekep na mauges a getma. (Hebreos 12:7-11) Nayarin tuksoen itayo nen Satanas a manggawa na mauges, balet ta nipaliis itayo na Dios manlapud satan a marelmeng.​—Mateo 6:13.

13. Antoy nagawa no agtayo ipulisay so mauges a pilalek?

¹³ Kaukolan tayo so magmaliw a mapikasi ta say sakey a situasyon et nayarin mangipaarap ed mauges a pilalek a pakasagyatan tayon mankasalanan. Kuan nen Santiago: “Noag ingen sinansakey a too natukso, no natangguyor tan naayat na kaibgan na laman to a dili.” Agtayo natetel so Dios lapud kasalanan tayo no pinaulyanan tayoy kapusoan tayon nisentro ed makasalanan a pilalek. No agtayo iwaklit so mauges a pilalek, ‘manlukon itan,’ nabayuboan ed puso, tan “yanak to so kasalanan.” Sano agawa lay kasalanan, satan et “yanak to so patey.” Mapatnag, kaukolan tayon bantayan so kapusoan tayo tan resistiay makasalanan iran inklinasyon. (Uliran 4:23) Apasakbayan la si Cain a sikatoy ngalngali la daegen na kasalanan, balet ta agto niresistian. (Genesis 4:4-8) Kanian, anto no onggapo tayo lan usilan so sakey ya agmakasulatan a kurso? Seguradon pisalamatan tayo no saray Kristianon mamatatken et salien dan ipetek itayo ta pian agtayo makapankasalanan ed Dios.​—Galacia 6:1.

Dios—Lapuan na Maong a Bengabengatla

14. Diad anton pantalos a nibagan saray langkap na Dios so “ayadyari”?

¹⁴ Kaukolan tayon tandaan a si Jehova so Lapuan, na aliwan subsubok, noagta maong a bengabengatla. (Santiago 1:16-18) Tinawag nen Santiago iray kapananisian to bilang “inararok ira ya agagi” tan impanengneng to a say Dios so Manangiter na ‘amin a maong a palangkap tan amin ya ayadyarin palangkap.’ Saray espiritual tan materyal a langkap nen Jehova so “ayadyari,” odino kompleto, anggapoy kulang to. Saratan so “manlapu ed tagey,” manlalapud ayaman na Dios diad katawenan. (1 Arari 8:39) Si Jehova so “Ama na saray liwawa”​—say banwa, say bulan, tan bibitewen. Iikdan to itayo met na espiritual a liwawa tan katuaan. (Salmo 43:3; Jeremias 31:35; 2 Corinto 4:6) Aliwan singa say banwa a nauman toray anino legan na igagalaw to tan walad kapantokan to labat no kaagwan, say Dios so lawas walad kapanpantokan to diad pangitarya na maong. Seguradon kinlongan to itayo diad arap na saray subok no sigpot tayon anamoten iray espiritual a probisyon to a nisusuplay diad panamegley na Salita to tan ed “matoor tan makabat ya aripen.”​—Mateo 24:45.

15. Anto so sakey ed sankaabigan iran regalo nen Jehova?

¹⁵ Antoy sakey ed saray sankaabigan a regalo na Dios? Say impangitarok ed espiritual ya ananak diad panamegley na masanton espiritu, a mitukoyan ed maong a balita, odino “salita na katuaan.” Saramay akaeksperiensia na inkianak ed espiritu so “unona a bunga,” apili ed limog na katooan a magmaliw a mangatatawen a “panarian tan saserdote.” (Apocalipsis 5:10; Efeso 1:13, 14) Nayarin walad isip nen Santiago iray unonan bunga na sebada a niyapay nen Nisan 16, petsan inkioli nen Jesus, tan ed impangiyapay na duaran trigon tinapay ed agew na Pentecostes, sanen nikalbo so masanton espiritu. (Levitico 23:4-11, 15-17) Diad satan a kaso, si Jesus so magmaliw ya unonan bunga tan saray kaiban tomatawir to et “saray unona a bunga.” Balet anto no say ilalo tayo et mangaraldalin? Bueno, diad pagmaliw a sinononot ed mangaraldalin ya ilalo tayo et natulongan itayon ompeket ed pananisia tayo ed Manangiter na “amin a maong a palangkap,” a ginawa ton posibli so andi-anggaan a bilay ed silong na uley na Panarian.

Magmaliw a ‘Mananumpal na Salita’

16. Akin a kaukolan a magmaliw tayon ‘masiglat ya ondengel balet ta matantan a mansalita tan matantan a manpasnok’?

¹⁶ Makasasagmak man itayo odino andi na saray subok ed pananisia tayo, nepeg itayon magmaliw a “mananumpal . . . na salita.” (Santiago 1:19-25) Kaukolan a magmaliw itayon ‘masiglat ya ondengel’ ed salitay Dios, bilang matulok a mananumpal ed satan. (Juan 8:47) Diad biek a dapag, magmaliw itayon “mapalna ed pansalita,” siaalwar a tantyaen so ibaga tayo. (Uliran 15:28; 16:23) Anganko ta sisimbawaen itayo nen Santiago ya agbengat-bengat a mangibagan saray subok tayo et manlalapud Dios. Nasisimbawa itayo met a magmaliw a “mairap [matantan, NW] a manpasnok; ta say sanok na too agto gawaen so kaptekan na Dios.” No makapasnok ed imbaga na sakey, komon ta ‘agmanapurasta’ ta pian napaliisay iyebat na ansakit. (Efeso 4:26, 27) Say mapasnok ya awawey a sengegay problema tan pansyodotay arum so agmamawalay konduktan matukoy ed toon walaay pananisia ed matunong a Dios tayo. Sakey ni, no “baleg so pakatalos” tayo, magmaliw itayon “matantan a manpasnok,” tan napaapit iray agagi tayo ed sikatayo.​—Uliran 14:29.

17. Antoy resulta na pangekal tayo na kaugsan ed kapusoan tan kanonotan tayo?

¹⁷ Kaukolan a magmaliw itayon bulos ed ‘amin a karumsisan’​—amin a bengatlan makapadimla ed Dios tan mamapalesay inkasanok. Niarum ni, nepeg ya ‘arawian tayon amin so karumsisan tan inkaalablabas na karelmengan.’ Kaukolan tayon amin a taynan iray marutak a kakikiwas odino awawey. (2 Corinto 7:1; 1 Pedro 1:14-16; 1 Juan 1:9) Akatulong so pangekal na kaugsan manlapud kapusoan tan kanonotan tayo ed ‘impakaawat tekep na kauyamoan ed kitanem na salita’ na katuaan. (Gawa 17:11, 12) Anggan panon lay kabayag tayo bilang Kristianos, nepeg tayon tuloytuloy ya abuloyan so kitanem na dakel nin Makasulatan a katuaan ed sikatayo. Akin? Lapud diad panamegley na espiritu na Dios, say nitanem a salita et mamawala na “balon too” a pakagamoray kilalaban.​—Efeso 4:20-24.

18. Panon a say sakey labat a dumerengel ed salita et midumaan manlapud sakey a mananumpal met ed satan?

¹⁸ Panon tayon nipanengneng a say salita so giya tayo? Diad pagmaliw a matulok a ‘mananumpal na salita, ya aliwan dumerengel labat.’ (Lucas 11:28) Saray “mananumpal” so walaan na pananisia a mamapawalay kimkimey a singa say maseseg a kimey ed Kristianon panagministro tan regular a pibibiang ed saray miting na totoo na Dios. (Roma 10:14, 15; Hebreos 10:24, 25) Say basta dumerengel labat na say salita et “kapara to so sakey a too a nenengnengen to so sipor a lupa to ed sakey a salming.” Mansalming, insan to onalis ya alingwanan lay nakakaukolan a panayos ed itsura to. Bilang ‘mananumpal na salita,’ inasasikaso tayon aaralen tan tutuloken so “ayadyarin katunongan,” na Dios a lalaktipen ton amin so kakaukolanen to’d sikatayo. Kanian say kawayangan a panggagayagaan tayo et mismon kasunian na pakakaaripen ed kasalanan tan ipapatey, ta satan so mangitonton ed bilay. Kanian sikatayo komon so ‘manimano ed ayadyarin katunongan,’ lawas mangusisa tan ontulok ed satan. Tan isipen pa! Bilang ‘mananumpal ed gawa, aliwa a mililingwan a dumerengel,’ nakayarian tayo so gayagan resulta na pabor na Dios.​—Salmo 19:7-11.

Nagkalalo ni nen say Basta Pormal Iran Managdayew

19, 20. (a) Unong ed Santiago 1:26, 27, anto so kakaukolanen na malinis a panagdayew ed sikatayo? (b) Antoray pigaran alimbawa na ag-atilolan a panagdayew?

¹⁹ Ta pian panggayagaan tayoy madibinon pabor, kaukolan tayon tandaan a say tuan panagdayew et aliwan basta pormalidad labat. (Santiago 1:26, 27, NW) Nayarin isipen tayo a sikatayoy naabobonan a ‘pormal a managdayew’ nen Jehova, balet ta say pakanengneng to’d balang sakey ed sikatayo so peteg ya importanti. (1 Corinto 4:4) Sakey a seryoson kalilingoan et say isaew ed ‘agpakapokpokay dila.’ Titilaan tayoy inkasikatayo no isipen tayon say Dios so naliliketan ed panagdayew tayo no papalikdoen tayo so arum, mantitila, odino ed agsuston pakakausaray dila. (Levitico 19:16; Efeso 4:25) Maseguro, agtayo labay a ‘say relihyon’ tayo et magmaliw ya “andi kakanaan” tan agnaaksobi na Dios lapud antokaman a rason.

²⁰ Anggaman ag-sinalambit nen Santiago so amin ya aspekto na malinis a panagdayew, inkuanto a lalaktipen na satan so ‘idadalaw ed saray ulila tan babalo a bibii ed kaermenan da.’ (Galacia 2:10; 6:10; 1 Juan 3:18) Nikaduman interes so ipapatnag na Kristianon kongregasyon diad panatarya ra ed saray balo. (Gawa 6:1-6; 1 Timoteo 5:8-10) Lapud say Dios so Mananalimbeng na saray balo tan ulila ed ama, mikoopera tayo ed Sikato diad panggawa’d nayarian tayo ed pakatulong ed sikara diad espiritual tan materyal a paraan. (Deuteronomio 10:17, 18) Say malinis a panagdayew et kabaliksan to met so ‘pansiansia ya andi mantsa ed mundo,’ say agmatunong a sosyedad na too a mandukdukol ed pakayari nen Satanas. (Juan 17:16; 1 Juan 5:19) Paliisan tayo sirin so andiay-dios a kondukta na mundo ta pian nigloria tayo si Jehova tan magmaliw a mausar ed serbisyo to.​—2 Timoteo 2:20-22.

21. Misiglaotan ed sulat nen Santiago, anto niran tepet so kaukolan a konsideraen tayo?

²¹ Anggan panon et say konseho nen Santiago a kinonsidera tayo la so talagan makatulong ed sikatayo a sungdoan iray subok tan ompeket ed pananisia tayo. Nepeg a mamaaralem itan na apresasyon tayo ed maaron Manangiter na maong iran langkap. Tan saray salita nen Santiago so ontulong ed sikatayon mangagamil na malinis a panagdayew. Anto ni ipapaimano to’d sikatayo? Antoray kaaruman nin kundang ya alaen tayo pian napaneknekan a walaan tayo na tuan pananisia ed si Jehova?

[Paimano ed leksab]

Panon Yon Ebatan?

◻ Anto so ontulong ed sikatayon nasungdoan iray subok?

◻ Anggaman ed subsubok, akin a makapanggayaga iray Kristiano?

◻ Panon itayon magmaliw a mananumpal na salita?

◻ Anto so sasaglawien na malinis a panagdayew?

[Litrato ed pahina 9]

Sano nasusubok, agamilen so pananisia ed pakayari nen Jehova a mangebat ed pikakasi

[Saray litrato ed pahina 10]

‘Saray mananumpal na salita’ so mangiproproklamay Panarian na Dios ed sankamundoan