Magmaliw a Limpio ed Panagnonot Legan a Manasingger so Anggaan
1 Paulit-ulit a dedeskribien na Salitay Dios ya onsabi so agew nen Jehova a “singa matakew”—salanti, bigbigla, tampolan, tan agnaliklikas. (1 Tes. 5:2; Mat. 24:43; 2 Ped. 3:10; Apoc. 3:3; 16:15) “Kanian,” kuan nen Jesus, “manparaan kayo met komon; ta dia ed oras ya agyo isisipen onsabi’ Anak na too.” (Mat. 24:44) Panon tayon napansiansia so inka-alerto tayo ed espiritual legan a manasingger so anggaan? Say tombok et naromog ed pinuyanan a bilin: “Magmaliw a limpio ed panagnonot.”—1 Ped. 4:7, NW.
2 Lalanoren na inkalimpio na panagnonot so inengneng ed saray bengatla unong ed punto de bista nen Jehova. (Efe. 5:17) Ontulong itan pian nipasen tayoy inkasikatayo a singa “sankaili tan manakarakar [“temporaryon manaayam,” NW]” diad leet na kaplesan a sistema na bengabengatla. (1 Ped. 2:11) Ontulong met itan pian natebek tayo no anto so petepeteg a sankaimportantian, pian niletneg tayoray prayuridad tayo, tan pian makapandesisyon itayo na maabig.—Fil. 1:10.
3 Mangiletneg na Espiritual Iran Kalat: Say pangiletneg tan pakawalaan na espiritual iran kalat so ontulong ed sikatayo pian magmaliw a limpio so panagnonot tayo. Kasin walaan kayo na espiritual iran kalat a peles yon gegegemtanen? Kasin maseet kayon manbabasa na Biblia ed inagew-agew, onaatendi ed amin a miting na Kristiano, manbabasa ed kada isyu na Say Panag-Bantayan tan Awake!, odino kasin mibibiang kayo a nagkalalo diad ministeryo? No mangiletneg kayo na saray kalat a matukoy ed sikayo tan mantultuloy yon gegemtanen itan, tan kerewen yo ed si Jehova a bendisyonan to iray sagpot yo, nasurprisa kayo ed saray resulta.
4 Tinepetan na sakey a matatken so malangwer nin sanasawa no antoray espiritual a kalat da. Lapud satan et ninonot da a no pasimplien day panagbilay da tan bayaran lan amin so makapabelat ya otang da, sarag da so manpayunir. Denesidi ran gawaen itan a kalat da. Sineetan dan binayaran so otang da tan nananap iray paraan pian nabawasay agnakakaukolan iran aktibidad a manguupot ed panaon tan biskeg da. Dugaruga kayari sakey taon, adampot da so kalat da. Anto so resulta? Oniay inkuan na asawan laki: “No anggapo ray kalat mi, anggapo kami ed kipapasen mi natan. Malikeliket kami. Mas mareen tan maabig so bilay mi. Walaan itan na peteg a kabaliksan tan gagala.”
5 Legan tayon aalagden so agew nen Jehova, mantinien tayo komon so inka-alerto tayo ed espiritual diad pambilay a walaan na limpion panagnonot, a niyapasakey lawas ed panggawa na linaway Dios.—Tito 2:11-13.