Kristianon Panagparawes ed Sakey a Naapag a Mundo

“Sikatayo sirin nepeg tayo ra ya akoen so saraya, pian mankatangbayan itayo ed katuaan.”​—3 JUAN 8.

1. Antoran panpilpilalekan a langkap so iiter na Manamalsa ed katooan?

“LAPU ed say too andian na magmaong a bengatla ed leksab na banwa nen say pangan tan say iyinum, tan say panliket, ta satan mansiansia ed sikato ed kimey to ed saray amin ya agew na panbilay to a say Dios initer to ed sikato ed leksab na banwa.” (Eclesiastes 8:15) Diad saratan a salita, say Hebreon managtibukel ed inmunan panaon so mangibabaga ed sikatayo ya aglabat labay nen Jehova a Dios a magmaliw a magayaga tan maliket iray totoon pinalsa to noagta angitarok met na saray paraan pian sikaray magmaliw ya ontan. Diad interon awaran na too ompatnag a saksakey so pilalek na totoo ed inerman a pasen, salanti, say panggayaga tan panliliket da.

2. (a) Panon ya inabuso na katooan so gagala nen Jehova parad sikara? (b) Anto so resulta?

² Manbibilay itayo natan ed sosyedad a puro liket ya andi lay panpapagaan na totoo et saray panggayaga tan panliliket. Dakel a totoo so nagmaliw a “maaro ed saray lamalaman da, . . . maaro ed saray likeliket a lalo nen say dia ed Dios,” a singa impasakbay na Biblia. (2 Timoteo 3:1-4) Siempre, saya so sakey a graben panamikewet ed gagala nen Jehova a Dios. Sano say gegemtan parad panliliket so magmaliw a manunan kalat, odino say dilin-panliketan so magmaliw a mogmon getma, anggapo so tuan kapenek, tan ‘amin so nagawan kaapaan tan panguusil ed dagem.’ (Eclesiastes 1:14; 2:11) Bilang resulta, say mundo so apusek na begtebegtew tan sinmaew a totoo, a mangipapaarap ed dakel a problema ed sosyedad. (Uliran 18:1) Magmamaliw a masuspetsa so totoo ed sakey tan sakey tan magmamaliw a naapag lapud rasa, tribu, sosyal, tan ekonomiya.

3. Panon tayon naroromog so tuan gayaga tan kapenek?

³ Agaylan duma so bengabengatla komon no inalig na totoo so dalan na pidedeneng nen Jehova ed arum​—maabig, mabunlok, tan maparawes! Impalinew to a say sekreto ed tuan liket so ag-onsasaral ed panggunaet tayon peneken so dilin pilalek tayo. Imbes, saya so tombok: “Lalo a mapalar so mangiter nen say mangawat.” (Gawa 20:35) Pian naromog so tuan gayaga tan kapenek, nepeg tayon talonaan iray babeng tan dibisyon a nayarin mamuger ed sikatayo. Tan nepeg tayon inatnat ed saramay kaiba tayon manlilingkor ed si Jehova. Importantin tumboken tayo so simbawan: “Sikatayo sirin so nepeg tayo ra ya akoen so saraya, pian mankatangbayan itayo ed katuaan.” (3 Juan 8) Say pangipanengneng na inkamaparawes ed saray makanepegan, unong ed nayarian tayo, so makagungguna ed duaran dalan​—manggungguna ed namparan manangiter tan ed manangawat. Siopa, sirin, iramay makanepegan ya ‘akoen tayo’?

‘Asikasoen Iray Ulila tan Babalo a Bibii’

4. Anton pananguman ed saray siglaotan a panpamilya so naiimano anggan ed limog na totoo nen Jehova?

⁴ Mataltalag natan so maligen iran pamilya tan maliket a panamaley. Say ondaraak a diborsyo tan ondarakel iran marikit ya ina ed interon mundo so biglan anguman ed tradisyonal a pamilya. Lapud saya, dakel a nagmaliw a Tastasi nen Jehova ed agano niran taon so nanlapud abuybuyak iran pamilya. Sikara so balanglan diborsiado odino sian ed asawa ra, odino nipibilang ira ed saray pamilyan walaay mansusulon-ateng. Niarum ni, singa ed impasakbay la nen Jesus, say katuaan ya imbangat to so nansumpal ed inkaapag-apag ed dakel a pamilya.​—Mateo 10:34-37; Lucas 12:51-53.

5. Anto so imbaga nen Jesus a nayarin panlapuan na panamaseseg ed saramay naapag a pamilya?

⁵ Makapaligsa ed puso tayo so pakanengneng ed saray balo ni a tinmalindeg ed katuaan, tan mabetbet tayoran ligliwaen ed makapaseseg a sipan nen Jesus: “Tua kuan ko ed sikayo, Anggapoy too ya anaynan na abung ono agagin lalaki ono agagin bibii ono ina ono saray anak ono daldalin nisengeg ed siak tan nisengeg ed evangelio ingen awaten to so maminlasus natan ed sayan panaon, abu-abung tan agagin lalaki tan agagin bibii tan saray ina tan saray anak tan daldalin, pati saray kapasegsegang, tan dia ed mundo ya onsabi say bilay a maando.”​—Marcos 10:29, 30.

6. Panon itayon magmaliw ya ‘agagin lalaki, agagin bibii, ina, tan ananak’ ed “ulila tan babalo a bibii” a walad limog tayo?

⁶ Balet siopa irayan ‘agagin lalaki ono agagin bibii ono ina ono saray anak’? Say pakanengneng labat ed baleg a bilang na totoo ed sakey a Kingdom Hall, mabetbet et nilasus odino dakel ni, a mantatawagan a sanaagi so ag-automatikon mangipalikna ed sakey a saraya so agagi ton lalaki, bibii, ina, tan ananak. Konsideraen pa iyan punto: Papanonotan itayo nen babangatan a Santiago a pian naabobonan nen Jehova so panagdayew tayo et nepeg tayon “dalawen [asikasoen, NW] so saray ulila tan babalo a bibii ed kaermenan da tan say pansiansia ya andi mancha to ed mundo.” (Santiago 1:27) Kabaliksan ton agtayo nepeg ya abuloyan so minumundon awawey a pagmaliw a mankinon lapud kayamanan tan atagey a kipapasen ed sosyal a mangikaput ed puerta tayo na pangabagey ed saray “ulila tan babalo a bibii.” Imbes, nepeg tayon mabulos ya inatnat ed sikara so pitutuyaw tan panagparawes.

7. (a) Anto so peteg a gagala na pagmaliw a maparawes ed “saray ulila tan babalo a bibii”? (b) Siopa ni so nayarin makapibiang ed pangipanengneng na Kristianon panagparawes?

⁷ Aglawas sasaglawien na panagparawes ed “saray ulila tan babalo a bibii” so pangiter na pankaukolan da ed materyal. Saray pamilyan walaay mansusulon-ateng odino pamilyan naapag lapud relihyon so agmet lawas mairap ed pinansyal. Balet, say marakep a piuulop, say kaliber-liber na sakey a pamilya, tan pitutuyaw ed totoo a walaay nanduruman edad, tan pinanabang ed espiritual na maong a bengabengatla​—saraya so importantin aspeto na bilay. Kanian, no tandaan ya, aliwan say inkasagpot na okasyon, noagta say espiritu na aro tan pankakasakey so importanti, agaylan abig ta, no maminsan, anggan “saray ulila tan babalo a bibii” so makapibiang ed pagmaliw a maparawes ed kaparan Kristianos!​—Ikompara so 1 Arari 17:8-16.

Wala ta Iray Sankaili ed Limog Tayo?

8. Anton pananguman so nanenengneng ed dakel a kongregasyon na Tastasi nen Jehova?

⁸ Manbibilay itayo ed panaon na malaknab ya itatalin na populasyon. “Masulok a 100 milyon a totoo ed interon mundo so manaayam ed saray bansan aliwa iran mibabaley to, tan 23 milyon so apilitan a tinaynan day dilin bansa ra,” kuan na World Press Review. Sakey a direktan resulta na saya et diad dakel a lugar, lalo la ed ankakabaleg a syudad, saray kongregasyon na totoo nen Jehova a datin titibukelen labat na saksakey a rasa odino nasyonalidad so walaan la natan na totoon nanlalapud nanduruman parti na mundo. Anganko ta tua met iya ed kawalaan yo. Balet panon so nepeg tayon panmoria ed sarayan “dayo” tan “sankaili” a singa tawag na mundo ed sikara, a say lenguahe, kaugalian, tan istiloy kabibilay so duma ed sikatayo?

9. Anton seryoson patit so nayarin mamalikdo ed sikatayo nipaakar ed panmoria ed “saray dayo” tan “sankaili” ya onloloob ed Kristianon kongregasyon?

⁹ Diad simplin panangibaga, nepeg ya agtayo abuloyan so antokaman a tendensyan ontakot tan manbusol ed saray sankaili a mangipalikna ed sikatayo ya anggan panon et mas makanepegan tayo ed pribilihyon mangamta na katuaan nen say saramay nanlapud miduma odino ed nikuan a paganon dalin; nisay liknaen tayon sarayan balo et misasalet ed panguusar na Kingdom Hall odino arum niran kayarian. Kaukolan a panonotan nen apostol Pablo iray pigaran inmunan-siglon Judion Kristianos, a walaan na onman a panmoria, a diad tua et anggapo so siopaman a makanepegan; say agmakanepegan a panangasi na Dios so nanggawan posible parad siopaman a makagamor na kilalaban. (Roma 3:9-12, 23, 24) Kaukolan a panggayagaan tayo a say agkanepegan a panangasi na Dios so nipapasabi la natan ed dakdakel a totoo a dati et anggan panon et asibletan na pankanawnawan narengelay maong a balita. (1 Timoteo 2:4) Panon tayon nipanengneng a peteg a laba-labay tayo ra?

10. Panon tayon naipanengneng a sikatayo so masimoon a managparawes ed “saray sankaili” a walad limog tayo?

¹⁰ Natumbok tayo so simbawa nen Pablo: “Kanian manaakoan kayo, unong a si Kristo met inako to itayo, onkana ed gloria na Dios.” (Roma 15:7) Diad pakaamtan saray totoon nanlapud sananey a daldalin odino abenegan so mabetbet a nasisibletan, kaukolan tayon panengnengan ira na kaabigan tan panangiyansakit sano nayarian tayon gawaen itan. Kaukolan tayon abrasaen ira ed leet tayo, ya itrato so balang sakey ed sikara a “singa say nianak ed abung yo,” tan ‘aroen a singa sika a dili.’ (Levitico 19:34) Aliwan mainomay itan a gawaen, balet ontalona tayo no tandaan tayo so simbawa: “Agkayo miaabobon unong ed sayan mundo, noag ingen manguman kayo lapu ed kapasimbalo na kanonotan yo, pian nasali yo no anto so maong tan makapaliket tan nasnaspot a linawa na Dios.”​—Roma 12:2.

Minabang ed Saray Sasanto

11, 12. Anton nikaduman konsiderasyon so initer ed pigaran ariripen nen Jehovah ed (a) kadaanan ya Israel (b) inmunan siglo?

¹¹ Kabiangan na saramay talagan makanepegan na konsiderasyon tan panamarawes tayo et saray matatken lan Kristiano a mamapasyan mankikimey parad espiritual a pankaabigan tayo. Angiter si Jehova na nikaduman probisyon parad saray saserdote tan saray Levita ed kadaanan ya Israel. (Numeros 18:25-29) Diad inmunan siglo, pinaseseg met iray Kristiano ya asikasoen iramay manlilingkor ed sikara diad nikaduma iran kapasidad. Ipaparungtal ed sikatayo na salaysay ed 3 Juan 5-8 so maapit a bedber na aroan a wala ed limog na asakbay a Kristianos.

¹² Pinablin tuloy na masiken lan apostol Juan so kaabigan tan inkamaparawes nen Gayo ed saramay managbiahen agagin nibakin ombisita ed kongregasyon. Sarayan agagi​—pati si Demetrio, mapatnag a say angipawitan na sulat​—so estranghero odino datin agkabat nen Gayo. Balet ta sikaray inabrasan tuloy “nisengeg ed ngaran [na Dios] sinmolong ira.” Oniay impangidatak nen Juan: “Sikatayo sirin nepeg tayo ra ya akoen so saraya, pian mankatangbayan itayo ed katuaan.”​—3 Juan 1, 7, 8.

13. Siopara ed limog tayo natan so lalon makanepegan a ‘mangawat na panamarawes’?

¹³ Natan, diad loob na organisasyon nen Jehova, dakel so mangisesekar na inkasikara nisesengeg ed interon asosasyon na sanaagi. Lalaktipen na saraya so managbiahen manangasikaso, ya uusaren day panaon tan biskeg da a sinimba ed pamaseseg ed saray kongregasyon; saray misionero, a tinaynan daray pamilya tan kakaaro ra ta pian manpulong ed biek-taew; saramay manlilingkor ed Bethel odino sangan opisina, ya iboboluntaryoy serbisyo ra pian suportaan so sankamundoan a panagpulong a kimey; tan saramay manpapayunir, a manguusar na baleg a kabiangay panaon da tan biskeg da ed lawak a ministeryo. Manuna, amin na saraya so mamapasyan mankimey, aliwan lapud antokaman a personal a kigloriaan odino gungguna, noagta lapud panangaro ra ed Kristianon impanaagi tan parad si Jehova. Makanepegan ya aligen tayo ra lapud interon-kamarerwan debosyon da tan makanepegan a ‘mangawat na panamarawes.’

14. (a) Panon itayon magmamaliw a magmaong a Kristianos sano maparawes tayo ed saray matoor? (b) Akin ya imbaga nen Jesus a pinili nen Maria so “maong a betang”?

¹⁴ Sano “akoen so saraya,” indanet nen apostol Juan, “mankatangbayan itayo ed katuaan.” Diad sakey a pantalos et magmaliw tayon magmaong a Kristiano bilang resulta to. Saya so lapud lalaktipen na saray gawan Kristiano so panggawa na maong ed saray kapananisiaan. (Uliran 3:27, 28; 1 Juan 3:18) Walara met so tumang diad arum nin dalan. Sanen pinatuloy nen Maria tan Marta si Jesus ed ayaman da, labay nen Marta a magmaliw a maong a managbisita diad panparaan na “dakel a kapagaan” parad si Jesus. Nanparawes met si Maria ed midumaan a dalan. Sikato so “imyorong ed salian nen Jesus tan nandengel na salita to,” tan kinomendaan nen Jesus lapud impanpili to na “maong a betang.” (Lucas 10:38-42) Say pitotongtong tan pidiskusyon ed saramay walaan na abayag lan taon na eksperiensia so mabetbet a pabitar a kabiangan na labin pilimogan ira.​— Roma 1:11, 12.

Diad Saray Nikaduman Okasyon

15. Antoran nikaduman okasyon so nayarin napaneknekan a maliket a panaon parad totoo nen Jehova?

¹⁵ Anggaman agtutumboken na tuan Kristianos so popular iran kaugalian odino ngingilinan iray minumundon piesta opisyal tan piesta, walaray okasyon a sikaray mandaragup pian panggayagaay panuulop. Alimbawa, inmatendi si Jesus ed sakey a ponsia diad Cana tan pinaliket to so okasyon diad impanggawa na sankaunaan a milagro diman. (Juan 2:1-11) Ontan met natan, maliket a manuulop iray totoo nen Jehova ed mipadparan nikaduma iran okasyon, tan saratan ya inkagawa so natetekepan na matukoy a selebrasyon tan piesta. Balet, anto ta so matukoy?

16. Antoran panangigiya so wala ed sikatayo nipaakar ed manepeg a kondukta anggan ed saray espesyal ya okasyon?

¹⁶ Manlapud impanaral tayo na Biblia, naaralan tayo no anto so matukoy a kondukta parad Kristianos, tan saya so tutumboken tayo ed amin a panaon. (Roma 13:12-14; Galacia 5:19-21; Efeso 5:3-5) Saray sosyal a pantitipon, balanglan nisisiglaot ed bansal odino antokaman niran rason, so agmangiiter ed sikatayo na kawayangan ya ikaindan tayoray Kristianon estandarte odino gawaen so sakey a bengatlan agtayo gendat a gagawaen; nisay obligado tayon tumboken so amin a kaugalian ed dalin a panaayaman tayo. Dakel ed saratan so nibase’d palson relihyoson agagamil odino an-anito, tan say arum et mangilalanor ed konduktan malinlinew ya ag-aabobonan ed saray Kristiano.​—1 Pedro 4:3, 4.

17. (a) Antoran sengegan so mangipapanengneng a say ponsia na bansal ed Cana so organisadon tuloy tan dugay inkikurang to? (b) Anto so mangipapanengneng ya inabobonan nen Jesus itan ya okasyon?

¹⁷ Diad panbasa na Juan 2:1-11, agmairap parad sikatayo a nanengneng a say okasyon so masagpot tan dakel so bisitan wadman. Anggaman ontan, si Jesus tan saray babangatan so bisitan ‘binagaan’; ag-ira basta sinmabi diman, anggan panon et walaray arum ed sikara so maseguron walay pisiglaotan ed managparawes. Naimano tayo met a wadman iray “manseserbi” ontan met ed sakey a “mananguksoy,” a mangiiter na direksion no anto so iserbi odino gawaen. Amin na saya so mangipapanengneng a say okasyon so organisadon tuloy tan dugay inkikurang to. Nansumpal so salaysay diad impangibagan diad ginawa to diman ed ponsia et “inpatnag [nen Jesus] so gloria to.” Kasin pilien to iman ya okasyon pian gawaen so onman no saya so magmaliw a sakey a maingal tan magulon okasyon? Maseguron andi.

18. Anto so nepeg a seryoson isipen ed antokaman a sosyal ya okasyon?

¹⁸ No ontan, komusta met so antokaman ya espesyal ya okasyon a sikatayo met so managparawes? Labay tayon tandaan a say gagala na maparawes a pangabrasa ed arum et pian sikatayon amin so ‘mankatangbayan ed katuaan.’ Kanian, agmagenap so panawag ed sakey ya okasyon a pandaragup na “Tasi.” Nayarin itepet, Satan ta so talagan paneknek ed no siopa itayo tan ed no anto so sisiaen tayo? Agtayon balot momoriaen iratan ya okasyon bilang pankanawnawa ed pangamta no anggad iner so pakapilaslasan ed mundo ed saray pakana to, diad inkigalet ed “kilalawan na laman tan kilalawan na mata tan maapan gloria na bilay.” (1 Juan 2:15, 16) Imbes, sarayan okasyon so nepeg a suston mangisindag ed papel tayo bilang Tastasi nen Jehova, tan kaukolan tayon seguroen a say kondukta tayo so mangiglogloria tan mangigagalang ed si Jehova.​—Mateo 5:16; 1 Corinto 10:31-33.

‘Manparawes ya Andi Talabutob’

19. Akin a kaukolan tayon “magmaliw a maparawes ya andi talabutob”?

¹⁹ Legan ya onloloor so kipapasey mundo tan lalon naaapag-apag so totoo ed kapiganman, kaukolan tayon gawaen so anggaay nayarian tayo pian paeleten so maapit a siglaotan ed limog na tuan Kristianos. (Colosas 3:14) Lapud saya, nepeg itayon nawalaan na ‘agkomon naumas ya aro ed sakey tan sakey,’ singa ed impaseseg ed sikatayo nen Pedro. Insan, diad praktikal iran termino, inyarum to: “Manpaparawesan kayo na andi talabutob.” (1 Pedro 4:7-9) Kasin mabulos tayon magmaliw a maparawes ed agagi tayo, ya isesekar tayo so pagmaliw a maabig tan matulong? Odino kasin sikatayo so mantalabutob sano onlesa itan a pankanawnawa? No ontan, pagmamaliwen tayon andi-kakanaan so gayagan nayarin niwala komon ed sikatayo tan naibabalang tayo so liket a tumang ed panggawa na maong.​—Uliran 3:27; Gawa 20:35.

20. Antoran bendisyon so manatalaran ed sikatayo no iyugali tayo so pagmaliw a maparawes ed naapag a mundo natan?

²⁰ Say pitulongan a maapit ed kapara tayon Kristianos, pagmaliw a maabig tan maparawes ed sakey tan sakey, so mangitarok na daakan a bendisyon. (Mateo 10:40-42) Diad ontan a totoo so angisipanan nen Jehova ya “ibuskag to so tabernakulo to ed sikara. Agla ra naerasan tan aglara naapgaan.” Say kiwala ed tolda nen Jehova et mankabaliksan na panggayaga ed proteksion tan panagparawes to. (Apocalipsis 7:15, 16; Isaias 25:6) On, wadtan labat ed arapan tayo so ilalon maandon panggayaga ed panagparawes nen Jehova.​—Salmo 27:4; 61:3, 4.

Kasin Naisalaysay Yo?

◻ Anto so nepeg ya agtayo ibaliwala no labay tayon naromog so tuan gayaga tan pakapenek?

◻ Siopara so “ulila tan babalo a bibii,” tan panon tayon ‘asikasoen’ ira?

◻ Panon so nepeg a panmoria ed “saray dayo” tan “saray sankaili”ed limog tayo?

◻ Siopara so makanepegan ed partikular a konsiderasyon natan?

◻ Panon so nepeg a pangisindag ed tuan espiritu na inkamaparawes diad saray espesyal ya okasyon?

[Saray litrato ed pahina 16, 17]

Diad makapaliket iran okasyon nayari tayon magmaliw a maparawes ed saray sankaili, ugugaw ya ulila’d-ama, ed saray walad sigpot-panaon a serbisyo, tan arum niran bisita