Kaukolan Mo ta a Talaga so Mipulangan?

‘AGAK balot akipulangan,’ insulat nen George Bernard Shaw. ‘Say agawa so asumpal la,’ nayarin ikuan na arum.

Anganko ta sikatayon mismo so masuyat a mangako ed impakalingo tayo diad takot a napabaingan. Ompan ikatunongan tayon say problema et walad arum a too. Odino labay tayo pa met so mipulangan balet ta ipapaleen tayo ni itan ya anggad diad pakadesir tayo et agla alimeng ed kaunoran iman a pamaakaran.

Kanian, importanti ta so pipupulangan? Talaga ta’n wala so bengatlan nagawaan na saraya?

Say Aro so Mangoobliga ed Sikatayon Mipulangan

Say inaagin aro so sakey a pakabirbiran a tanda ed saray tuan patumbok nen Jesu-Kristo. Inkuanto: “Lapu ed saya amin a too nabirbiran da a sikayo ray babangatan ko, no wala so aro yo ed sikayo ed sakey tan sakey.” (Juan 13:35) Papasesegen na Kasulatan iray Kristiano a “manaaroan kayo komon a malet ya angga ed utel na puso yo.” (1 Pedro 1:22) Say pirmin aro so mangoobliga ed sikatayon mipulangan. Akin? Lapud say atooan ya ag-inkayadyari so agnapaliisan a pansesengegan na isakit na linawa a mamupuger ed aro no saratan so agnatambal.

Alimbawa, lapud walaan itayo na personal ya agpakapipaknaan ed sakey diad loob na Kristianon kongregasyon, ompan labay tayon agla katongtongen. No sikatayo so akaopendi, panon kasin nipawil so maaron relasyon? Kaslakan, diad pipulangan tan insan panggunaetan a mitongtong ed maligsan paraan. Otang tayo so aro ed saray kapananisiaan tayo, tan sano ibaga tayon panermenan tayo so impakaopendi ed sikato, babayaran tayo so pigara ed satan ya otang.​—Roma 13:8.

Diad pangiyilustra: Abayag lan san-amiga so duaran Kristianon bibii, sikara di Mari Carmen tan Paqui. Balet, lapud panisiaan nen Mari Carmen so sakey a makaderal a tsismis, say pikakaaro to ed si Paqui so binmetel. Anggapo labat lay eksplinasyon et basta sigpot lan inarawian toy Paqui. Ngalngali sakey taon ed saginonor, naamtaan nen Mari Carmen a say tsismis so aliwan tua. Anto so ginawa to? Say aro so anagdag ed sikaton asinggeran si Paqui tan sipapaabeban kinmerew na despensa ed aliwliwan inkiwas to. Nanakisan iran dua, nanlapulad saman et nagmaliw a lalon malet so impankaaro ra.

Anggaman liknaen tayon anggapoy ginawa tayo met a mauges, say pipulangan so manresolbi ed agpantatalosan. Onia so nanonotan ni nen Manuel: “Dakel a taon lay apalabas sikamin sanasawa so nanayam ed abung na sakey ed agagi tayon bibii legan na impakaospital to. Ginawa mi anggaay nayarian mi a natulongan tan saray anak to legan na pansasakit to. Balet kasempet to la, inreklamo to ed sakey ya agin agmi kono inasikason maong iray gagastosen ed abung.

“Binisita mi tan insalaysay a nayarin lapud inkatobonbalo mi tan kakulangay eksperiensia et agmi naasikaso iray bengatla a singa ed pakaasikaso to. Sikaton tampol so inmebat diad impangibagan, sikato so walaay baleg ya otang a linawa ed sikami tan talagan pisalamatan ton tuloy so amin a ginawa mi parad sikato. Aresolbi so problema. Satan ya eksperiensia so angibangat ed sikami ed kaimportantian na sipapaabeban ikerew na panamerdona sano onlesay agpantatalosan.”

Benendisyonan nen Jehova iyan sanasawa lapud impangipanengneng na aro tan ‘impanumbok ed saray bengatla a manggawa na kareenan.’ (Roma 14:19) Sasaglawien met na aro so pangonsidera ed liknaan na arum. Sisimbawaen itayo nen Pedro a mangipanengneng na ‘liknaan na piaagi.’ (1 Pedro 3:8, NW) No walaan itayo na liknaan na piaagi, mainomay tayon nalikna so ot-ot a pinawala tayo lapud bengatbengat a salita odino kiwas tan sikatayo so nadagdag a mipulangan.

“Balkesan Yoy Inkasikayo na Panagpaabeba”

Anggan saray matoor a Kristianon mamatatken so nayarin walaan na ampetang a pansasangsangan tunggal paminsan. (Ikompara so Gawa 15:37-39.) Saraya so okasyon sano say pipulangan so makagunggunan tuloy. Balet anto so ontulong ed matatken odino siopaman nin Kristiano a naiirapan a mipulangan?

Say inkamapaabeba so tombok. Insimbawa nen apostol Pedro: “On, amin yo balkesan yoy inkasikayo na panagpaabeba a manlingkoran so sinansakey.” (1 Pedro 5:5) Anggaman tua a maslak ed saray sangsangan et parehon natetel so duaran partido, isipen na mapaabeban Kristiano so dilin impakalingo to tan akaparaan a mangaksobi ed saratan.​—Uliran 6:1-5.

Samay pipupulangan so kaukolan a mangawat ed satan diad mapaabeban paraan. Bilang panangiyilustra, iyan la bilang a duaran lalaki a kaukolan a mantalosan, so akaalagey ed toktok na duaran nandumaan a palandey. Talagan imposibli so pantongtong ed baetan na kelas a mangibibiig ed sikara. Balet, sano say sakey ed sikara so onlasor ed lawak tan ontumbok met so sakey ed alimbawa to, mainomay iran makapantalosan. Mipadpara, no kaukolan a resolbien na duaran Kristiano so agpantatalosan ed baetan da, paulyanan a balang sakey so miabetan ed sakey tan sakey ed lawak, a singa panangibaga, tan manggawa na matukoy a pipupulangan.​—1 Pedro 5:6.

Importantin Tuloy so Pipupulangan ed Panamaley

Say impanasawa na duaran ag-ayadyarin totoo so maseguron mangitatarok na saray pankanawnawan manpulangan. Tan no say sanasawa so parehon walaan na liknaan na piaagi, satan so managdag ed sikaran mipulangan no bilang ta akapansalita odino kinmiwas iran agmakonsidera. Idadanet na Uliran 12:18: “Wala so mansalita a botakbotak a singa saray kisaksak na kampilan, balet say dila na makabat sikato so kasil.” Say ‘botakbotak a kisaksak,’ so agla nababawi, balet saratan so natambal na masimoon a pipupulangan. Siempre, kakaukolanen na saya so mantultuloy a panangonsidera tan sagpot.

Sasaglawien so panamaley to, oniay kuan nen Susana: “Sikami nen Jack* so 24 taon lan kasal, balet ta siansia nin walay naaamtaan miran balon bengatla nipaakar ed sakey tan sakey. Makapaermen, aminsan diad apalabas et sikami nansian tan nambilay a biig ed loob na pigaran simba. Balet, tinalineng mi so Makasulatan a konsehon nanlapud mamatatken tan nampawilan kami. Amoria mi natan a lapud nandumaan a tuloy so personalidad mi, maseguron onlesa iray panbalingaan. Sano nagawa iya, tampol kamin mipulangan tan panggunaetan a talagan talosan so punto de bista na sananey. Maliket ak a mangibagan say panamaley mi so apaaligwas a tuloy.” Inyarum nen Jack: “Naaralan mi met a naimano iray okasyon a mainomay mi mansenti. Diad satan a panaon et inanatnat mi panpasensiya ed sakey tan sakey.”​—Uliran 16:23.

Nepeg mo ta so mipulangan no isipen mon agmo met kasalanan? Sano nalalanor iray sakit na linawa, mairap so pagmaliw a makatunongan nipaakar ed no siopa so nepeg a tetelen. Balet say importantin bengatla et say kareenan na panamaley. Konsideraen pay Abigail, sakey ya Israelitan say masiken to so nanmaltrato ed si David. Anggaman sikatoy agnatetel ed inkaatiw na masiken to, akipulangan. “Paandien mo komon, pikasik ed sika, so inpakalukso na aripen mo a bii,” so impikasi to. Kinmiwas si David diad makonsideran tratamento ed sikato, a sipapaabeban inaksobi a no aliwan lapud sikato et akapaagus na inosentin dala.​—1 Samuel 25:24-28, 32-35.

Ontan met, liknaen na sakey a Kristianon bii a manngaran na June, a 45 taon lan kasal, a kakaukolanen ed matalonan panamaley so pagmaliw ya akaparaan ya unonan mipulangan. Kuanto: “Ibabagak ed inkasiak a say panamaley mi so mas importanti nen say liknaan ko bilang indibidual. Kanian sano mipulangan ak, liknaen kon walay niiiter ko ed panamaley mi.” Sakey a masiken a manngaran a Jim so nankuan: “Mipupulangan ak ed akulaw ko anggad diad ankekelag a bengatla. Nanlapulad impakaopera to, sikatoy mainomay ya onsyodot. Kanian naynay kon aabarayan tan ibagan, ‘Pasensya ka la, Darling. Agko gagalan pasakitan ka.’ Singa sakey a tanaman ya asalog, tampol a sikato so onsayaksak.”

No asakitan tayo so toon inad-aro tayo, say tampolan a pipulangan so epektibon tuloy. Si Milagros so impapuson miabobon, diad impangibagan: “Manasagmak ak na inkaandi dilin-talek, tan bengat-bengat a salita na masiken ko so pakasyodotan ko. Balet sano sikatoy mipulangan, tampol ya onkepa so liknaan ko.” Matukoy, ya ibabaga ed sikatayo na Kasulatan: “Saray makapaliket a salsalita so singa kolaba na dilo, masamit ed kamarerwa tan kasil ed saray pukel.”​—Uliran 16:24.

Agamilen so Dunong na Pipupulangan

No iyugali tayo so pipulangan sano kapilitan, maseguron naromog tayon onkiwas a paborable ed sikatayo so totoo. Tan ompan sikara ni ingen so mipulangan. Sano naimano tayon apasakitan tayo so sakey, akin ya ag-iyugali pipulangan imbes a mandarak na panaon tan sagpot a paliisan so pangako ed antokaman ya impakalingo? Liknaen na mundo a say pipupulangan et tanda na kaleteyan, balet satan so talagan paneknek na Kristianon inkatatken. Siempre, agtayo labay so magmaliw a singa saramay mamidbir ed inkalingo balet ta ibabaliwala ray responsabilidad da. Singa bilang, kasin mipupulangan itayo balet ta aliwan masimoon? No atrasadoy insabi tayo tan alay impipulangan tayo, determinado ta itayon paaligwasen so pagmaliw tayon onsabi ed susto ed oras?

Kanian, sirin, peteg kasin kaukolan tayo so mipulangan? On, kaukolan. Otang tayo ed inkasikatayo tan arum nira a gawaen so ontan. Say pipulangan so mamainawa ed ot-ot a sengegan na ag-inkayadyari, tan natambal to so balingaan na relasyon. Balang pipulangan a gawaen tayo so sakey a leksion na inkamapaabeba tan nipapasal tayon magmaliw a mas makonsidera ed liknaan na arum. Bilang resulta, moriaen itayo na saray kapananisiaan, kapareha, tan arum a totoo a makanepegan na panamabli tan talek da. Nawalaan itayo na deen na nonot, tan bendisyonan itayo nen Jehova.

[Paimano ed leksab]

[Saray litrato ed pahina 23]

Saray masimoon a pipulangan so mangiyalibansa na Kristianon aro