Saray Anghel—No Anto so Nagawaan Da ed Sikatayo

DIAD impaneskribe nen propeta Daniel ed anengneng ton pasingawey nipaakar ed anghelikon pamilya na Dios, oniay insulat to: “Libolibo so saray [anghel a] nanlingkor ed sikato [Dios], tan samplon libo ed maminsamplon libo so inmalagey ed arap to.” (Daniel 7:10) Ipaparungtal na sayan bersikulo so gagala na Dios ed impamalsa to ed saray anghel. Sikara so manlingkor ed sikato tan lawas akaparaan a manumpal ed saray iganggan to.

Uusaren na Dios iray anghel no maminsan pian manggawa na pigaran bengatla parad totoo. Konsideraen tayo no panon to iran uusaren a mamabiskeg tan manalimbeng ed totoo to, mangipasabi na saray mensahe ed totoo, tan mangipaakseb na panangukom to ed saray mauges.

Saray Anghel so Mamapabiskeg tan Manasalimbeng

Nanlapula’d impakaimaton na saray anghel ed inkapalsa na dalin tan say inmunan totoo, ipapatnag da la so aralem ya interes ed katooan. Bilang personipikasyon na kakabatan sakbay na inkiwala to bilang too, oniay inkuan nen Jesu-Kristo: “Say panggayagaan ko wala nensaman ed saray anak na too.” (Uliran 8:31) Tan ipapakabat ed sikatayo na Biblia a “kaliktan na saray angheles a nanengneng” iray katuaan nipaakar ed Kristo tan say arapen a niparungtal ed saray propeta na Dios.​—1 Pedro 1:11, 12.

Diad ilalabas na panaon, naimatonan na saray anghel a karaklan ed katooan et agmanlilingkor ed maaron Manamalsa ra. Agaylan panermenan itan na saray matoor ya anghel! Diad biek a dapag, sano magbabawi tan ompawil ed si Jehova so sakey a nankasalanan, ‘saray anghel so manliket.’ (Lucas 15:10, Maung a Balita) Say pinonot na saray anghel et say pankaabigan na saramay manlilingkor ed Dios, kanian aminpiga iran inusar nen Jehova a mamabiskeg tan manalimbeng ed saray matoor a lingkor to diad dalin. (Hebreos 1:14) Konsideraen so pigaran alimbawa.

Tinulongan na duaran anghel so matunong a Lot tan saray marikit to a makaliktar ed kaderal na marelmeng iran syudad a Sodoma tan Gomorra diad impangipaway ed sikara manlapud saman a lugar.a (Genesis 19:1, 15-26) Pigaran siglo ed saginonor, si propetan Daniel so impelag ed ungib na saray leon balet sikatoy agsinakitan na saratan. Akin? Oniay inkuanto: ‘Say Dios ko imbaki to so anghel to, tan pinepetan to so sangi na saray leon.’ (Daniel 6:22) Tinulongan na saray anghel si Jesus diad kagapo na ministeryo to diad dalin. (Marcos 1:13) Tan sakbay a tuloy na impatey nen Jesus, pinmanengneng ed sikato so sakey ya anghel ya “amabiskeg ed sikato.” (Lucas 22:43) Agaylan apaseseg a tuloy si Jesus lapud tinulongan na anghel legan na saraman a mairap a panaon ed bilay to! Si apostol Pedro so imbulos met na sakey ya anghel manlapud prisoan.​—Gawa 12:6-11.

Kasin sasalimbengan itayo na saray anghel natan? No mandadayew itayo ed si Jehova unong ed Salita to, makaseguro itayo a saray makapanyari tan agnanengneng ya angheles to so manalimbeng ed sikatayo. Oniay isisipan na Biblia: “Say anghel nen Jehova mankampamento ed liberliber na saray ontakot ed sikato, tan iliktar to ra.”​—Salmo 34:7.

Balet, nepeg tayon bidbiren a say manunan panlilingkoran na saray anghel et say Dios, aliwan saray totoo. (Salmo 103:20, 21) Onkikiwas ira ed panangidirehi na Dios, aliwan diad saray kerew na too. Kanian, say nepeg tayon kerewan na tulong et si Jehova a Dios, aliwan saray anghel. (Mateo 26:53) Siempre, lapud agtayo nanenengneng iray anghel, agtayo amta no kaunongan kalaknab so panguusar na Dios ed sikara pian tulongan so totoo diad nanduruman pamaakaran. Balet amta tayo a si Jehova et “ompatnag a mabiskeg ya ontulong ed saray ayadyari puso ra a dapit ed sikato.” (2 Awaran 16:9; Salmo 91:11) Tan makaseguro itayo a ‘no onkerew itayo na bengatla unong ed linawa na Dios, sikatayo so dengelen to.’​—1 Juan 5:14.

Ibabaga met ed sikatayo na Kasulatan a say Dios lambengat so nepeg tayon pampikasian tan pandayewan. (Exodo 20:3-5; Salmo 5:1, 2; Mateo 6:9) Ontan so ipapaseseg na matoor iran anghel a gawaen tayo. Alimbawa, sanen dinmakmomo si apostol Juan ed sakey ya anghel, sikatoy binano na satan ya espiritun pinalsa, ya inkuan to: “Aleg! Agmo gagawaen itan! . . . Idayew mo so Dios.”​—Apocalipsis 19:10, NW.

Ipapasabi na Saray Anghel Iray Mensahe na Dios

Say kabaliksan na salitan “anghel” et “mensahero,” tan satan so sananey nin paraan a panlilingkor na saray anghel ed Dios​—bilang mensaheros to ed totoo. Singa bilang, ‘si anghel Gabriel et imbaki na Dios diad sakey a syudad na Galilea, a manngaran na Nazaret.’ Akin? Pian ipakabat ed malangwer a biin manngaran na Maria ya anggaman sikatoy sakey a birhen, sikatoy manlukon tan mangiyanak na sakey a laki ya ingaran na Jesus. (Lucas 1:26-31) Nibaki met so sakey ya anghel ed saray managpastol diad uma pian ipakabat ed sikara a nianak la so “Kristo a Katawan.” (Lucas 2:8-11) Mipadpara, saray anghel so angipasabi ed saray mensahe na Dios ed si Abraham, Moises, Jesus, tan ed arum nira ya asalambit diad Biblia.​—Genesis 18:1-5, 10; Exodo 3:1, 2; Lucas 22:39-43.

Panon a manlilingkor natan iray anghel bilang mensaheros na Dios? Imanoen pa so kimey ya impasakbay nen Jesus a gawaen na saray patumbok to sakbay a mangangga iyan sistema na bengabengatla. Inkuan to: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (Mateo 24:3, 14) Diad tinaon et saray Tasi nen Jehova so manguusar na masulok a sakey bilyon ya oras diad panangipulong ed maong a balita na Panarian na Dios. Balet amta yo ta a kabiangan met iray anghel ed sayan kimey? Si apostol Juan so anukoy ed pasingawey ya anengneng to, a kuan to: “Anengneng ko so sananey ya anghel . . . , a wala ed sikato so andi-angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley.” (Apocalipsis 14:6, 7) Ipapabitar na sayan teksto so sankaimportantian a kimey natan na saray anghel parad totoo.

Nanenengneng na saray Tasi nen Jehova so ebidensya na panangiwanwan na saray anghel legan iran manpupulong ed kabkaabungan. Mabetbet et nakakatongtong da iray indibidual a mangipipikasi a wala komon so ontulong ed sikara pian naamtaan da iray gagala na Dios. Bilang resulta na pangiwawanwan na saray anghel tan pankikimey a mismo na saray Tasi, kada taon et nilasus nilibo so makakagamor na kakabatan nipaakar ed si Jehova. Sakey ka komon a nagunggonaan ed sayan manangiliktar-bilay a kimey ya iwawanwan na saray anghel.

Saray Anghel so Mangipapaakseb ed Panangukom na Dios

Anggaman ag-autorisado iray anghel a mangukom ed totoo, sikaray aglabat la akatanyareg. (Juan 5:22; Hebreos 12:22, 23) Impaakseb da iray panangukom na Dios diad apalabas a panaon, unong a niganggan ed sikara a gawaen itan. Alimbawa, inusar na Dios iray anghel diad impilaban to ed saray Ehipsio nensaman, ya angaripen ed saray Israelita. (Salmo 78:49) Tan diad sakey labat a labi et kinabil na “anghel nen Jehova” so sanlasus walomplo tan lima a libo a sundalo diad kampo na saray kalaban na totoo na Dios.​—2 Arari 19:35.

Diad arapen et idapo met na saray anghel so ambelat a panangukom na Dios. Onsabi si Jesus a ‘kaiba to iray makapanyari ya angheles to diad mandarlang ya apoy, pian iter to so panamales ed saray agmikabat ed Dios, tan dia ed saray ag-ontulok ed ebanghelyo.’ (2 Tesalonica 1:7, 8) Balet, satan a kadederal et sagmaken lambengat na saraman so ag-onkikiwas unong ed mensahe a nipupulong natan ed sankamundoan a susuportaan na saray anghel. Saraman so manaanap ed Dios tan manguunor ed Makasulatan iran bangat so niliktar.​—Sofonias 2:3.

Agaylan misalsalamat itayo ed saray matoor ya anghel, a lawas manusumpal ed saray igaganggan na Dios! Sikaray uusaren nen Jehova pian tulongan tan salimbengan iray matoor a lingkor to diad dalin. Saya so makaligliwan maong ed sikatayo lapud wala iray mauges ya espiritun pinalsa a tatawagen a dedemonyo a malabay a mamasakit ed sikatayo.

Saray Demonyo​—Siopa Ira?

Legan na 15 a siglo kayari na impamalikdo nen Satanas ed si Eva diad Eden, naimatonan na pamilya na saray anghel na Dios a tinmalona si Satanas a Diablo diad impangikasipa to ed amin a totoo manlapud Dios nilikud ed pigaran matoor ya indibidual, a singa si Abel, Enoc, tan Noe. (Genesis 3:1-7; Hebreos 11:4, 5, 7) Wala met iray anghel ya impaimpluensyaan ed si Satanas. Sikaray tinukoy na Biblia bilang matungangan espiritu “ed saray agew nen Noe.” (1 Pedro 3:19, 20) Panon ya apatnagan so inkamatunganga ra?

Diad panaon nen Noe et walaray rebelden anghel ya ag-amtay bilang da ya anaynan ed mangatatawen a pamilya na Dios, linmeksab diad dalin, tan nankinon too. Akin? Awalaan ira na pilalek a mirelasyonan ed saray bibii. Bilang resulta, sikaray nanilalak na Nefilim, saray maramsak a higante. Niarum ni, “say kabaglan na too ed dalin abalbaleg, tan mauges labat a lanang so amin a pimorekdek na nonot na puso to.” Balet, ag-inabuloyan nen Jehova a Dios a mantultuloy iyan kaugsan na katooan. Intarok to so Delap ed interon dalin, a niyanep na satan so amin a mauges a totoo a pati saray Nefilim. Say akaliktar lambengat a totoo et saray matoor a lingkor na Dios.​—Genesis 6:1-7, 17; 7:23.

Anggaman ontan, ag-apideral iray rebelyoson anghel diad panaon na Delap. Nilakseb da iray pisikal a laman da tan pinmawil ira ed ayaman na saray espiritun pinalsa. Kayari na saman et sikara lay tinukoy bilang dedemonyo. Dinmapag ira ed si Satanas a Diablo, a tinawag a manuley odino “katawan na saray demonyo.” (Mateo 12:24-27) Singa say manuley da, pirawat na sarayan demonyo a dayewen ira na totoo.

Mapeligro iray demonyo, balet agtayo ra nepeg a takotan lapud limitado so pakapanyari ra. Sanen pinmawil iray matungangan anghel diad tawen, agla ra naabuloyan a milimog ed pamilya na matoor iran anghel na Dios. Imbes, agla ra makaawat na antokaman ya espiritual a pakaliwawaan manlapud Dios, ya anggapo lan balot so ilalo ra ed arapen. On, sikaray nipukok ed espiritual a kabilungetan a tatawagey Tartaro. (2 Pedro 2:4, NW) Inkulong ira nen Jehova diad “andi-angga a panamangawan,” kanian wala ira ed espiritual a kabilungetan. Niarum ni, agda la sarag so mankinon too.​—Judas 6.

Anto so Nepeg Mon Gawaen?

Kasin iimpluensyaan nin siansia na saray demonyo iray totoo? On, gagawaen da itan diad panamegley na saray “pangalot,” odino panamalingo, a singa saramay uusaren na manuley da a si Satanas a Diablo. (Efeso 6:11, 12) Balet, nalabanan tayo iray demonyo diad pangiyaplika tayo ed simbawa na Salitay Dios. Niarum ni, saramay mangaaro ed Dios et sasalimbengan na saray makapanyarin anghel.

Agaylan makana ya aralen mo iray kakaukolanen na Dios a nidatak diad Kasulatan tan onkiwas ka unong ed naaaralan mo! Dakel ni so naaralan mo nipaakar ed saray bangat na Biblia diad pitongtong mo ed saray Tasi nen Jehova diad lugar yo odino diad pansulat ed saray manangipalapag na sayan magasin. Malikeliket iray Tasi nen Jehova a mangiyaral ed sika na Biblia ya anggapoy bayar tan diad panaon a kombeniente ed sika.

[Paimano ed leksab]

[Kahon ed pahina 6]

SARAY ANGHEL​—NO PANON IRAN INORGANISA

Si Jehova so walaan na baleg a pamilya na saray anghel ya inorganisa a singa ed onggendan:

Say anghel a walaan na sankatageyan a pakapanyari tan autoridad et si Miguel ya arkanghel, odino si Jesu-Kristo. (1 Tesalonica 4:16; Judas 9) Walad silong to iray serafin, kerubin, tan arum niran anghel.

Saray serafin et walaan na atagey a posisyon diad uksoyan na Dios. Sikaray manlilingkor diad kawalaan na trono na Dios. Kabiangan ed kimey da so pangiyabawag ed inkasanto na Dios tan pamasiansia ed totoo to a malinis ed espiritual.​—Isaias 6:1-3, 6, 7.

Saray kerubin et akapaliber ed trono na Dios tan itatandoro ra so karlangan nen Jehova.​—Salmo 80:1; 99:1; Ezequiel 10:1, 2.

Saray arum ya anghel et ibabaki nen Jehova, tan susumpalen da so madibinon linawa to.

[Litrato ed pahina 4]

Saray anghel so angulop ed si Lot tan saray marikit to pian makasabi ira diad maligen a pasen

[Litrato ed pahina 5]

Sanen dinmakmomo si apostol Juan ed sakey ya anghel, oniay inkuan to ed sikato: “Agmo gagawaen itan!”

[Litrato ed pahina 6]

Saray anghel so mangipapaakseb ed panangukom na Dios

[Litrato ed pahina 7]

Kasin nagugunggonaan ka ed kimey a panagpulong ya ididirehi na saray anghel?