Say Kaunoran ya Agew na Bilay nen Jesus Bilang Too

Mansirunget la ed saman a Biernes, Nisan 14, 33 K.P. Sakey a grupo na lalaki tan bibii so mangiponpon la ed pinablin kaaro. Sakey ed saray lalaki, si Nicodemo, so angawit na pabalingit pian iparaan so bangkay ed kiponpon. Sakey a lakin manngaran na Jose so angiter na malinis a lienzo a pamalkot ed asugatsugat tan adanel a bangkay.

SIOPA irayan totoo? Tan siopay iponpon da? Kasin amin na saya et mangapekta ed sika? Pian naebatan irayan tepet, pawilen tayoy gapoan na satan ya importantin agew.

Huebes na Labi, Nisan 14

Say managaag a tulao so kalkalnan mamapaatagey ed Jerusalem. Say matoon syudad so ondedeen la kayari matrabahon agew. Sayan labi et say dagem so angob na ikakalot a kordero. On, nilibon totoo so manpaparaan parad espisyal ya ebento​—say tinaon a selebrasyon na Paskua.

Diad sakey a baleg a kuarto, naromog tayoy Jesu-Kristo tan say 12 apostol to diad niparaan a lamisaan. Ontalineng! Mansasalitay Jesus. “Nanpilalekan ko a sipipilalek so mikan ed sikayo ed saya a pasko [“paskua,” NW] ed arapen na panirap ko,” inkuanto. (Lucas 22:15) Kabat nen Jesus a saray relihyoson kakabusol to so mangegetman mamatey ed sikato. Balet sakbay a nagawa itan, walay bengatlan makabkabaliksan a nagawa ed satan a labi.

Kayarin aselebraan so Paskua, inyabawag nen Jesus: “Sakey ed sikayo yawat toak naani.” (Mateo 26:21) Angonigon iya ed saray apostol. Siopa kasi? Kayari aganon impansisingbat, inkuan nen Jesus ed si Judas Iscariote: “Satan so gawaen mo gawam a magano.” (Juan 13:27) Anggaman agnatebek na arum, si Judas so manangitapat. Sikatoy tinmaynan pian gawaen so payakot a papel to ed pakanan sumpad si Jesus.

Sakey ya Espisyal a Selebrasyon

Ileletneg natan nen Jesus so intiramintin balon selebrasyon​—sakey a pakanodnonotan ed ipatey to. Sikatoy angala na tinapay, akisalamat tan pinisagpisag to itan. “Ala yo,” so inkuanto. “Saya sikatoy laman ko a niiter nisengeg ed sikayo.” Sanen akapangan la na tinapay so balang sakey ed sikara, sikatoy angala na sankopa ya ambalangan alak tan impabendisionan to itan. “Oninum kayo ya amin ed saya,” so inkuan nen Jesus ed sikara, ya ipapaliwawa ton: “Saya a kopa sikato so balon sipan dia ed dalak, a naibung nisengeg ed sikayo.” Binilin toy nakekeraan a 11 a matoor iran apostol: “Gawayo’ ya a pakanodnonotan ed siak.”​—Mateo 26:26-28; Lucas 22:19, 20; 1 Corinto 11:24, 25.

Sipapangasin ipaparaan nen Jesus iray matoor ya apostol to ed satan a labi parad magano lan nagawa tan pinekderan toy aralem a panangaro to’d sikara. “Andian so too na babaleg ya aro nen saya,” ipapaliwawa to, “a sakey a too italaga to so bilay to nipaakar ed saray kakaaro to. Sikayo so kakaarok, no gawaen yo so saray bengatla ya ingganggan ko ed sikayo.” (Juan 15:13-15) On, pinaneknekan na 11 ya apostol a sikaray tuan kakaaro diad impansiansia ra ed si Jesus legan na saray subok to.

Diad aralem lan labi​—anganko et lampas lay pegley labi​—angibalikas na makatantandan pikakasi si Jesus, kayari to et sikaray angansion na saray kanta na panangidayew ed si Jehova. Insan, diad liwawa na tulao, tinaynan day syudad tan bineltang day Lawak na Kidron.​—Juan 17:1–18:1.

Diad Harden na Getsemane

Ag-abayag et akasabi ira di Jesus tan saray apostol diad harden na Getsemane. Intilak toray waloran apostol diad lolooban na harden tan intagar nen Jesus ira di Pedro, Santiago, tan Juan diad kawalaan na saray kiew na olibo. “Say kamarerwak maermen a tuloy ya angga ed ipapatey,” so inkuan to ed talora. “Natila’kayo dia, tan manbantay kayo.”​—Marcos 14:33, 34.

Manaalagar iray taloran apostol bangta si Jesus so linmoob ni na daiset ed harden pian manpikasi. Tekep na pirmin pandageyem tan lua, iyeey-ey to: “Ama, no labay mo, yarawim so saya a kopa ed siak.” Nipasakbat ed si Jesus so abalbaleg a responsabilidad. Agaylan makapaot-ot so pannononot to ed ibaga na kakabusol nen Jehova no say bogbogtong ya Anak To so nipasak a singa sakey a kriminal! Say nagkalalo nin makapaot-ot ed si Jesus et say pannononot to’d kabalawan a nibunton ed pinabli ton mangatatawen ya Ama to no onsaew ed sayan alay irap a subok. Nampikasi si Jesus a masimsimoon tan alikna to itan a pirmin ot-ot a say linget to et nagmaliw a singa tedter na dala ed dalin.​—Lucas 22:42, 44.

Kasumsumpal labat nen Jesus a nampikasi ed komatlon pankanawnawa. Onsasabi laray lalaki ya akaawit na silewan tan lamparaan. Say walad unaan et anggapoy arum noagta si Judas Iscariote, a dinmiretso ed si Jesus. ‘Nagalang ka, Managbangat!’ so inkuanto, ya inangoban toy Jesus a matamoy a tuloy. “Judas,” inkuan nen Jesus, “diad sakey ya angob yawat mo so Anak na too?”​—Mateo 26:49; Lucas 22:47, 48; Juan 18:3.

Biglan amoria na saray apostol so nagagawa. Say Katawan da tan pinabpabli ran kaaro et naerel la! Kanian sinamsam nen Pedro so kampilan tan tinipas toy layag na aripen na atagey a saserdote. “Yabulo’yo ni ed sikara so saya,” so tampol ya inkelyaw nen Jesus. Inmasingger tan pinaabig toy aripen tan ingganggan to’d si Pedro: “Ipawil mo so kampilan mo ed pasen to; ta saray amin a mangala na kampilan ompatey ira naani ed kampilan.” (Lucas 22:50, 51; Mateo 26:52) Saray opisyal tan sundalo so aningkat ed si Jesus insan da binalor. Lapud takot tan kaguguloan, inkaindan na saray apostol si Jesus tan batik ira ed saman a labi.​—Mateo 26:56; Juan 18:12.

Biernes na Kabuasan, Nisan 14

Lampas lan maong so pegley-labi ed masasakbay iran oras na Biernes. Pilimero et inyakar si Jesus ed abung na datin Atagey a Saserdote a si Anas, a siansian walaan na baleg ya impluensia tan pakayari. Sikatoy tinetepetan nen Anas insan impaawit to ed abung na Atagey a Saserdote a si Caifas a nandaragupan na Sanedrin.

Saray relihyoson lider natan so manasalin mananap na tastasi pian mamabrika na kaso sumpad si Jesus. Balet, anggan saray palson tastasi so agmantutunosan ed testimonya ra. Sanlegan to, nansiansian andi-esel si Jesus. Diad panguuman nen Caifas ed saray taktika, ingganggan to: “Ibilin ko’d sika lapu ed Dios a mabilay, ya ibagam ed sikami no sika kasi so Kristo, ya Anak na Dios.” Saya so katuaan ya agniburi, kanian makmakpel ya inyebat nen Jesus: “Siak: et nanengneng yo naani so Anak na too a manyudyurong ed nikawanan a lima na pakayari, tan onsabi a pati saray lurem na tawen.”​—Mateo 26:63; Marcos 14:60-62.

“Sikatoy nansalita na ayew,” so inkelyaw nen Caifas. “Anto ni pankaukolan tayo ed saray tasi?” Insan walaray anampal tan nanlutda ed si Jesus. Arum so amoniti ed sikato tan binalawbalaw da. (Mateo 26:65-68; Marcos 14:63:65) Tampol ed kabkabuasan na Biernes, say Sanedrin so nandaragup lamet, nayarin diad getman pagmaliwen a legal so ilegal a bista ed labi. Lamet sipapakpel ya impanengneng nen Jesus a sikatoy Kristo, say Anak na Dios.​—Lucas 22:66-71.

Ontumbok et saray atagey a saserdote tan mamasiken so amaawit ed si Jesus pian usayen nen Pontio Pilato, say Romanon gobernador na Judea. Inakusa ray Jesus a pupuligaren toy nasyon, ya isesebel toy panagbayar na buis ed si Cesar, tan “kuanton sikato so Kristo a sakey ya ari.” (Lucas 23:2; ikompara so Marcos 12:17.) Kayarin tinepetan nen Pilato si Jesus, inyabawag to: “Anggapoy naromog kon kasalanan ed sayan too.” (Lucas 23:4) Sanen naamtaan nen Pilato a taga-Galilea si Jesus, sikatoy impaiyakar to’d si Herodes Antipas, say manuley na Galilea, a wadman ed Jerusalem lapud Paskua. Ag-interesado si Herodes ed pananap na inkahustisya. Labay to labat a nanengneng si Jesus a manggaway milagro. Lapud agpinenek nen Jesus so inkaupapet to tan nansiansian andi-esel, sikatoy nanelekan di Herodes tan saray sundalo to tan impaipawil da ed si Pilato.

“Anto ta’n mauges so ginawa tonian too?” so intepet nen Pilato lamet. “Anggapo so sengeg a pamateyan ya aromog ko ed sikato: sikato so dusaen ko sirin insan ko la ibulos.” (Lucas 23:22) Kanian impalatiko toy Jesus a binmibiret ed beneg to. Insan saray sundalo so angipanek na koronan sabisabit ed ulo to. Sikatoy niludlurey da tan pinekpek day putel a tanubong, a lalon angipanek ed koronan sabisabit ed ulo to. Anggaman ed amin na say agnadeskribin ot-ot tan panangabuso, amantini nen Jesus so matalonggaring a dignidad tan biskeg.

Sikatoy imparungtal lamet nen Pilato ed karaklan​—nayarin diad paniilalon ompan say apairap lan kipapasen nen Jesus so mangalay simpatiya. “Nia,” inkelyaw nen Pilato, “Sikato so ipaway ko ed sikayo, pian nakabatan yo ya anggapo so naromog ko a kasalanan ed sikato.” Balet saray manunan saserdote so kinmelyaw: ‘Ipasak mo! Ipasak mo!’ (Juan 19:4-6) Lapud lalon mapilit so karaklan, sinmuko si Pilato tan impalima to lay pangipasak ed Jesus.

Makapaot-ot ya Impatey

Natan et kaagwan la tan nayarin magano lay kapetepetekay agew. Impaway si Jesus ed Jerusalem ya inyakar ed pasen a tinawag a Golgota. Angkabaleg iran pasak so impasak ed saray lima tan sali nen Jesus diad panamairapan a kiew. Agnadeskribi so ot-ot legan a say belat na laman to so mamibinat ed saray amasakan sanen impaalagey so panamairapan a kiew. Nantitipon so karaklan pian nengnengen si Jesus tan say duaran kriminal ya akapasak. Dakel so maabuson nansalita ed si Jesus. “Inlaban to so saray arum,” so ludlurey na saray manunan saserdote tan arum, “say inkasikato agto nayarian ya ilaban.” Anggan saray sundalo tan duaran impasak a kriminal so nanludlurey ed si Jesus.​—Mateo 27:41-44.

Kabekta diad kapegleyay agew, nen akapasak la ed kiew si Jesus, walay makapakebbiew a bilunget a nanlapud Dios a binmayag na taloy oras ed saman a lugar.a Anganko saya so amakiwas ed sakey ed samay kriminal pian baaten to imay sakey. Insan, inmarap ed si Jesus, inkerew to: “Nonot moak sano onsabi ka ed panarian mo.” Agaylan makapakelkelaw a pananisia ed arap na paganigani lan ipatey! “Tua kuan ko ed sika natan,” so inyebat nen Jesus, “Nakaiba taka ed Paraiso.”​—Lucas 23:39-43, NW.

Diad ngalngali alas tres na ngarem, alikna nen Jesus a magano lay ipatey to. ‘Napgaan ak,’ inkuan to. Insan tekep na maksil a bosis, inkelyaw to: “Dios ko! Dios ko, akin et inkaindan moak?” Nalikna nen Jesus a say Ama to, a singa panangibaga, et agto sinalimbengan pian abuloyan a nasubok so katooran to, tan inaon toray salita nen David. Walay angidepel na esponghan impasepsep ed tuka ed bibil nen Jesus. Sanen atimtiman nen Jesus so tuka, inab-abot toy linawa to: “Asumpal la.” Insan to inkelyaw, “Ama, dia ed saray limam imatale’ko so espirituk,” tinmuek insan la inatey.​—Juan 19:28-30; Mateo 27:46; Lucas 23:46; Salmo 22:1.

Lapud ngarngarem la, kalimbuatay impangiparaan parad pangiponpon ed si Jesus sakbay na Sabaton (Nisan 15) ya onggapo ed kaselek na agew. Si Jose na Arimatea, kabkabat a membro na Sanedrin a nagmaliw a maamot a babangatan nen Jesus, so angalay permiso parad pangiponpon ed sikato. Si Nicodemo, membro met na Sanedrin a sekreton angipatua ed pananisia to’d si Jesus, so angitulong na 33 a kilo na mira tan aloes. Inapapiger dan imparukol so bangkay nen Jesus ed asingger a balon pakanodnonotan a lubok.

Mabilay Lamet!

Ambilunget ni na kabkabuasay Simba sanen si Maria Magdalena tan pigara nin bibii so inmasingger ed lubok nen Jesus. Balet nia! Say bato ed arap na lubok so nitolin. Agayla, anggapoy karga na lubok! Si Maria Magdalena so nanapuran angibalita ed si Pedro tan Juan. (Juan 20:1, 2) Kataynan to et sakey ya anghel so pinmayawar ed arum a bibii. Inkuanto: “Agkayo antakot.” Imbilin to met: “Onla kayo a maganat, tan ibaga yo ed saray binangatan to, sikato so inmoli ed bilay a nanlapud saray inaatey.”​—Mateo 28:2-7.

Diad panggaganat da, nabet da si Jesus mismo! “Onla kayon mangibaga ed saray agagik,” inkuanto ed sikara. (Mateo 28:8-10) Saginonor, si Maria Magdalena so walad lubok a mannangnangis sanen pinmayawar si Jesus ed sikato. Sikatoy aliketan tan nanapuran angibalita ed arum a babangatan ed makapakelkelaw a balita. (Juan 20:11-18) Diad tua, aminlima ed saman ya agnalingwanan a Simba, say apaolin Jesus so pinmayawar ed nanduruman babangatan, ya amaneknek a talagan sikatoy mabilay lamet!

No Panon Kan Apektado

Panon a saray ebenton 1,966 lay apalabas et mangapekta ed sika natan diad gapo na koma-21 a siglo? Onia so isasalaysay na akatasi ed saraman ya ebento: “Dia ed saya nipatnag so aro na Dios ed sikatayo, a say Dios imbaki to ed mundo so Anak ton bogbogtong, pian manbilay itayo ed panamegley to. Onia so panangaro: aliwa a lapu ed sikatayo so angaro ed Dios, noag ingen sikato so angaro ed sikatayo, tan imbaki to so Anak to a makapamaandi kasalanan tayo.”​—1 Juan 4:9, 10.

Diad anton dalan a say impatey nen Kristo et “makapamaandi [a bagat]”? Satan so makapamaandi lapud pagmaliwen ton posibli so paborablin relasyon ed Dios. Say inmunan too, si Adan, so nanrebeldi ed Dios tan diad ontan et nipatawir to’d saray kapolian to so kasalanan tan patey. Si Jesus, ed biek a dapag, so angiter ed bilay to bilang dondon pian ibayar parad kasalanan tan ipapatey na katooan, sirin et nitaryay basiyan parad panangasi tan pabor na Dios. (1 Timoteo 2:5, 6) Diad pangagamil na pananisia ed mananakbong-kasalanan a bagat nen Jesus, naibulos ka manlapud panangondena ya atawir mo manlapud managkasalanan ya Adan. (Roma 5:12; 6:23) Bilang resulta, saya so angilukas na makapakelkelaw a pankanawnawa ed pakawalaan moy personal a relasyon ed maaron mangatatawen ya Ama, si Jehova a Dios. Diad antikey, say supremon bagat nen Jesus et kabaliksan toy agbalot manganggan bilay parad sika.​—Juan 3:16; 17:3.

Saraya tan say misiglaotan iran pamaakaran so singbaten no Huebes na labi, Abril 1, diad nilibon paspasen ed sankamundoan sano minilyon a totoo so mantitipon pian nodnonoten so impatey nen Jesu-Kristo. Imbitado kan onatendi. Saray Tastasi nen Jehova ed lugar mo so maliket a mangibaga ed sika no iner tan kapigan so nayarin atendian mo. Say pagmaliw a presenti so andi-duaruwan mamaaralem na apresasyon mo ed ginawa na maaron Dios tayo tan pinabli ton Anak ed say kaunoran ya agew na bilay nen Jesus bilang too.

[Paimano ed leksab]

[Tsart/Saray litrato ed pahina 7]

IMPATEY TAN INKIOLI NEN JESUS

NISAN 33 K.P. SARAY EBENTO GREATEST MANb