Sikaray Andi-siblet a Kinmiwas ed Panangaro na Dios
“O komon a saray totoo et misalamat ed si Jehova lapud maaron-panangasi to tan ed makapakelaw iran kimey to ed ananak na totoo.”—SALMO 107:8.
1. Panon ya indanet nen Jesus so kalidad na panangaro ed ununan sulat to?
“SAY Dios aro.” Agaylan napnoan na kabaliksan iraman a salita! Agpankelawan ya alikna nen Juan a nakaukolan ya uliten iratan ed ununan sulat to. (1 Juan 4:8, 16) Aliwa lambengat a si Jehova a Dios et aro balet sikato met so pakanengnengan, odino personikasyon, na aro.
2. Diad antoran dalan ya impanengneng na Dios so panangaro ed inpamalsa na laki tan bii tan panagsustine ed sikara?
2 Isipen so panangaro na Dios ya impanengneng ed dalan na impamalsa to ed sikatayo. Saray maapresyan salita nen David so ontanlan matukotukoy. Bilang sakey ya apuyanan a salmista, inkuanto: “Pisalamatan ta ka lapud diad makapatakot-apuyanan a dalan a siak so makapakelkelaw a ginawam.” (Salmo 139:14) Pian sikatayoy manbilay ed kabunigasan tan liket, nanggaway agmanggangan pangayagaan so Dios a posible ed sikatayo diad panamegley na limaran sentido tayo—pakanengneng, pakadngel, pakataway, pakaangob, tan pakalikna. Agaylan nanengneng tayoy dakep na inkapalsa ya akaliber ya amin ed sikatayo! Agaylan makapakelaw so dakel tan nanduruman tamtanaman tan ayayep, ya ag-ibabagay karakpan na atooan a nengneng tan itsura! Nangyan met so Dios na nagkalalon makapenek ed kinarakel na prutas, pisi-pising, tan arum iran tagano a walan nadampot. (Salmo 104:13-16) Diad maabig a rason, impanonot na apostol Pablo ed saray manaayam ed kadaanan a Listra a say Dios “so nanggawa na maabig, a mangiiter na uran a manlapud tawen tan mabungan panaon, a panoen iray kapusoan yo ed nagnap na tagano tan maabig ya inawa.”—Gawa 14:17.
3. Diad anton makapakelaw iran abilidad a walan tinarokan tayo na Dios?
3 Isipen met ya amin iray bendisyon a miulibay ed maliket a panagbilay na pamilya. Nagkalalo nen satan, isipen pa ya amin iray gayagan posible parad sikatayon panliketan lapud mental tan emosyonal iran abilidad: imahinasyon, panagrason, memorya, konsiensia, tan nagkalalo ni ed kapasidad na panagdayew—amin na satan so mangipasen ed sikatayon mas atagtagey nen saray ayayep; nisay ag-imanoen iray likeliket ya iter na musiko ed sikatayo. Saraya tan dakel ya arum a palangkap so paneknek na panangaro na Dios ed sikatayo.
4. Anto iran paneknek na panangaro na Dios so walan naeksperiensia na totoo nanlapulad impankasalanan na inmunan atateng da?
4 Anggapo so panduwaruwa a si Adan tan si Eva so nangayaga ed dakel iran ligliwa ed ayadyarin kipapasen diad hardin na Eden. (Genesis 2:7-9, 22, 23) Balet sanen sikaray sinmaew ya inmebat ya andi-siblet ed amin iray paneknek na madibinon panangaron pangayagaan, kasin impulisay na Dios so atooan a rasa? Aliwan ontan! Tampol a sikatoy angitarok na panametek ed amin iray kaugsan a nanresulta a manlapud impankasalanan na inmunan atateng tayo. (Genesis 3:15) Angipatnag na panangaro si Jehova diad panamegley a siaanos a tinmalindeg dingan na ag-ayadyarin ilalak nen Adan. (Roma 5:12) Diad panon kabayag? Akin, diad loob na 6,000 taon ya anggad natan! Nagkalautlan walan impanengneng na Dios so panangaro ed impedeneng ed saray ariripen to. Tua iray salitan: “Jehova, Jehova, a Dios a manpangasi tan mapaaro, mapalna ya onsanok tan daakan ed maaron abig na linawa tan katuaan, a mangigagana na maaro ya abig na linawa ed saray nilibu, mamerdona na inkauges tan isumpa tan kasalanan.”—Exodo 34:6, 7.
5. Panon ya impanengneng nen Jehova so maaron anus ed impedeneng ed nasyon na Israel?
5 On, peteg a baleg so anus ya impanengneng nen Jehova a Dios ed saray pidedeneng to ed saray Israelita a manlapud panaon sanen intarok to ra bilang nasyon diad saludsor na Palandey Sinai anggad say inkatungganga da so mamasuot ed sikato a kompleton mangitalirak ed sikara. Unong a nabasa tayo ed 2 Awaran 36:15, 16: “Si Jehova a Dios na saray atateng da so nanpatuloy a nanbaki a sumpa ed sikara ed panamegley na saray mensahero, a mangibaki lan mangibaki, lapud sikatoy manlikna na panangabagey ed baley to tan ed ayaman a pasen to. Balet niludlurey daray mensahero na tuan Dios tan minudmora ra iray salita to tan binalaw iray propeta, ya angga ed say sanok nen Jehova et inmalagey a sumpa ed baley to, ya anggad anggapoy pakatambal.” Balet walaramay kinmiwas ya andi-siblet ed panangaro nen Jehova a Dios. Pian nanengneng no panon a ginawa ra, usisaen tayo natan iray bilay na pigara ed sarayan sinansakey. Saya so angyan na letnegan ed pangipanengneng no panon a sikatayo ed inkasikatayo ya onkiwas ed panangaro nen Jehova ed saray praktikal iran dalan.
Panon A Kinmiwas Ya Andi-Siblet si Moises
6. Diad anto iran dalan a say alimbawa nen Moises so manuna, tan ed antoran nabebetangan a naeksperiensia to so panangaro na Dios?
6 Si Moises so sakey ed manunan alimbawa na toon kinmiwas ya andi-siblet ed panangaro na Dios. Agaylan pankanawnawa so niparayag ed arap nen Moises a bilang atagibin anak a bii nen Paraon! Balet pinili to “so nilabi a mantepel ed irap na saman a baley na Dios nen say minabang ed saray onlabas a liket na kasalanan. A pinabli to a balbaleg a kayamanan so kamormora ed Kristo nen saray kayamanan na Ehipto ta wala ya inyan to so mata to ed katumangan.” (Hebreos 11:25, 26) Diad aminsan, kaliktan nen Moises ya iliktar iray agagi to, saray Israelitas, a manlapud inkaaripen ed Ehipsios. Kayari na saray dekada, anggaman ontan et agda inapresyay gunaet to, nisay panaon na kililiktar da ed Dios. (Gawa 7:23-29) Lapud pananisia tan andi-siblet a pilalek nen Moises ya ontulong ed agagi to, sikatoy pinabtangan nen Jehova a manggawa na dakel iran milagro tan manlikor ed Israelitas ed loob na 40 taon bilang propeta, ukom, manangiter-ganggan, tan manamegley To. Diad sarayan nabebetangan, naeksperiensia nen Moises iray dakel a kipapasen na panangaro nen Jehova ed sikato tan saray kapara ton Israelita.
7. Panon so inkiwas nen Moises ed saray balikas na panangaro na Dios?
7 Panon so inkiwas nen Moises ed panangaro tan agkanepegan a panangasi na Dios? Kasin sikatoy ‘angawat ed agkanepegan a panangasi nen Jehova tan sinmaew ed gagala to’? (2 Corinto 6:1) Andin balot! Andi-siblet a kinmiwas si Moises ed saray balikas na panangaro nen Jehova ed sikato diad impagmaliw a nailuam-ed-Dios. Onnenengneng ed Jehova ed amin a panaon tan walaan na sakey a maapit a relasyon ed Manamalsa to. Agaylan indayew a tuloy na Dios si Moises sanen binaat to si Aaron tan si Miriam diad inpamalaw ed agi ra! On, sinalita nen Jehova ed “sangi ed sangi” ed si Moises tan inabuloyan to ya onnengneng “ed itsura nen Jehova.” (Numeros 12:6-8) Anggaman dakel iray pribilehyo nen Moises, sikatoy nantultuloy a sankamaabebaan ed amin a totoo tan tinmulok ed saray ganggan nen Jehova ya “onman ya onman.”—Exodo 40:16; Numeros 12:3.
8. Panon ya impanengneng nen Moises a sikatoy petepeteg a nailuam-ed-Dios?
8 Impanengneng met nen Moises a sikatoy andi-siblet a nailuam-ed-Dios ed panamegley na paga a nipanengneng to ed ngaran nen Jehova, reputasyon, tan puron panagdayew. Kanian, ed duaran okasyon a si Moises et matalonan akikasi ed pangilaknab na panangasi nen Jehova ed Israel lapud say ngaran na Dios so nalalanor. (Exodo 32:11-14; Numeros 14:13-19) Sanen saray Israelita so akibiang ed tinatalintaon panagdayew ed kilaw, angidemostra na seseg si Moises ed puron panagdayew diad impanawag a: “Siopa so walad dapag nen Jehova? Diad siak!” Kayari na saman, si Moises tan saraman dingan ed sikato et naukom ed 3,000 iran managtalintao. Peteg ya anggapo so panduwaruwa ed si Moises a kinmiwas ya andi-siblet ed saray balikas na panangaro na Dios, ya angiletneg na maabig ya alimbawa parad sikatayo natan.—Exodo 32:26-28; Deuteronomio 34:7, 10-12.
Maabig a Kiwas nen David
9. (a) Panon so inkiwas nen David ed panangaro nen Jehova a Dios? (b) Singa si David, panon tayon igalang si Jehova dingan na mabli iran kayaryan tayo?
9 Sananey a manunan too ed Biblia ya angitarya na maabig ya alimbawa ed andi-siblet ya ikikiwas ed panangaro na Dios et say salmistan si David, a komaduan ari na Israel. Say seseg to ed ngaran nen Jehova so abayuboan to a mibakal ed managludlurey a Filisteo a higanten Goliat, ya impagamor na Dios ed si David so pananalo. (1 Samuel 17:45-51) Saman a parehon seseg so amilit ed si David ya angitarok na kaban na sipan ed Jerusalem. (2 Samuel 6:12-19) Tan agta say pilalek nen David a mangipalagey na templo nen Jehova et sananey a balikas na seseg to tan panamabli ed panangaro tan kaabigan na Dios? Siempre onman. Say pangiburi na saman a pribilehyo so ag-angamper ed si David ed panamalaknab na proyekto tan panamagalang ed si Jehova diad personal a pangiter na balitok, pilak, tan ankabli iran bato ed baleg a tuloy a balor. (2 Samuel 7:1-3; 1 Awaran 29:2-5) Mipadparan andi-siblet a kiwas na panangaro ed Dios so mamayubo ed sikatayon ‘igalang si Jehova a pati kayaryan mo’ diad pangusar na materyal iran kayaryan tayo ed pangilaknab na interes na Panarian.—Uliran 3:9, 10; Mateo 6:33.
10. Diad anton pamaakaran a say kurso nen David so makanakanan pangaligan?
10 Anggaman si David so akapanggawa na seryoso iran lingo, diad interon impanbilay to pinaneknekan to a magmaliw a ‘lakin maunor ed puso nen Jehova.’ (1 Samuel 13:14; Gawa 13:22) Saray salmo to so napnoan na saray balikas na panamabli ed panangaro na Dios. Ibabaga na The International Standard Bible Encyclopædia a si David “so napnoan a maong tan ed lalon pisasalamat nen dinan man ya abitla ed Masanton Kasulatan.” Inkuan na salmistan si Asap a say Dios et “pinili to si aripen ton David tan inala to a manlapud koral na pulok. . . . Sikatoy angitarok ed sikato a magmaliw a pastol ed totoo nen Jacob tan ed Israel a tawir to. Tan ginmapon amastol ed sikara unong ed integridad na puso to.” (Salmo 78:70-72) Peteg, say kurso nen David so sakey ya aligen tayo.
Si Jesu-Kristo, say Ayadyarin Alimbawa Tayo
11, 12. Panon ya impanengneng nen Jesus a sikatoy petepeteg a nailuam-ed-Dios?
11 Siempre, si Jesu-Kristo so sankaabigan a Makasulatan ya alimbawa na toon kinmiwas ya andi-siblet ed panangaro na Dios. Anto so amakiwas ed saya ed si Jesus a gawaen? Ununa ed amin, sikatoy abayuboan a mangiter ed si Jehova na sigpot a debosyon. Anggapoy panduwaruwa a si Jesus so nailuam-ed-Dios a mao-maong. Say panamabli ed panangaro na mangatatawen ya Ama to tan kaabigan so mamakiwas ed sikaton magmaliw a tuan espiritual a too. Sikatoy walaan na sakey ya asingger, maapit a relasyon dingan na Dios. Si Jesus so sakey a lakin mapikasi, tan laba-labay to so mitongtong ed mangatatawen ya Ama to. Mabetbet, nabasa tayo a si Kristo so manpipikasi. Diad sakey ya okasyon sikatoy nansanlabi a nanpikasi. (Lucas 3:21, 22; 6:12; 11:1; Juan 17:1-26) Diad ebat na panangaro ed Dios, si Jesus so nambilay ed katuaan a ‘say too et agmanbilay ed tinapay lambengat balet ed kada balikas ya ompaway a manlapud sangi nen Jehova.’ Diad tua, say pangggawa na linawa nen Ama to so tagano parad sikato. (Mateo 4:4; Juan 4:34) Agta sikatayo met so mipadparan onebat ed panangaro na Dios, a mangiter ed sikato na sigpot a debosyon?
12 Diad ikikiwas ya andi-siblet ed panangaro na Dios, lawas idirekta nen Jesu-Kristo so imano ed Dios tan Ama to. Sanen tinmawag so sakey ed si Jesus a bilang “Maong a Managbangat,” sinumlang to tan inkuan: “Angapon balot so maabig, nilikud ed sakey, Dios.” (Lucas 18:18, 19) Inulit-ulit nen Jesus ya indanet ya anggapoy nagawaan to ed dilin bunek to. Agton balot sinmaew ed pankanawnawan mangalangon ed ngaran na Ama to, tan matukotukoy ton inggapo so modelon pikakasi to ed ikekerew a: “Nagalang komon so ngaran mo.” Tan ag-abayag sakbay na impatey to, inkuan nen Kristo ed Ama to; “Walan ingloria ta ka ed dalin, a walan sinumpal so kimey ya inter mo ed siak a gawaen.” (Mateo 6:9; Juan 12:28; 17:4) Peteg, diad ikiwas ed panangaro na Dios, nepeg tayon anapen so pangigloria ed si Jehova, ya ipipikasi so kialangon na masanton ngaran to.
13. Panon a say panangaro na Dios et amakiwas ed si Jesus?
13 Natan, ipangasin imanoen so komaduan dalan a say andi-siblet a kiwas ed panangaro na Dios so amayubo ed si Jesus. Amakiwas ed sikaton mangaro ed inkatunong tan mamusol ed kaugsan, unong a nipasakbay ed Salmo 45:7. (Hebreos 1:9) Sikato so “matoor, andi-mantsa, niarawi a manlapud saray managkasalanan.” (Hebreos 7:26) Si Jesus inangat toray malisyoson kalaban ton sikatoy husgaan a nankasalanan, balet agda nagawaan. (Juan 8:46) Diad duaran kipapasen, say panamusol to ed kaugsan so sengegan na impanlinis to ed templo na maagum iran relihyonista. (Mateo 21:12, 13; Juan 2:13-17) Tan agaylan makpel ya inkaindan nen Jesus iray mansimpisimpitan a relihyoson papangulo, ya anggan ibabagan sikaray nanlapud Diablo!—Mateo 6:2, 5, 16; 15:7-9; 23:13-22; Juan 8:44.
14. Diad ebat ed panangaro nen Jehova, panon so impedeneng nen Jesus ed saray babangatan to?
14 Sananey nin dalan a say panangaro nen Jehova so amayubo ed si Jesus et naimano ed impedeneng to ed saray apostoles to tan arum a babangatan. Agaylan sikatoy maaro, maanus, tan andukey-a-panagtepel ed sikara! Nayarin sinubok da ed saray panriribal, pansasangsangan anggad diad mismon labi na kitapat to nipaakar ed no siopa so sankatagyan. (Lucas 22:24-27) Ingen, lawas impanengneng nen Jesus ed inkasikato so kauyamoan tan maapabeba ed puso. (Mateo 11:28-30) Tua, intapat nen Judas si Jesus, sikatoy imburi nen Pedro ed taloran danay, tan saray arum ya apostoles so binmatik sanen sakey a magulon ulop so sinmabin mangaresto ed sikato. Balet sikatoy agbalot nagmaliw ya ansakit so linawa odino onsanok. Panon tayon kabat? Bueno, nen akitipon lamet ed saray apostoles kayariy kioli to, ag-angiter si Jesus ed sikara na makapasakit a panamaat ed isuko diad takot. Imbes, nanasikaso tan pinabiskeg tora parad kaaruman a serbisyo ed Panarian.—Juan 20:19-23.
15. Panon ya andi-siblet a nanministro si Jesus ed saray pisikal a pankaukolanen na totoo?
15 Imanoen tayo ni so sananey a dalan a no iner ya andi-siblet a kinmiwas si Jesu-Kristo ed panangaro na Dios. Ginawa to diad impangisaklang ed inkasikato ed biang na arum, ed makapabaing tan makapasakit a patey ed sakey a panamairapan a kiew. (Filipos 2:5-8) Nanministro si Jesus ed pisikal a pankaukolan na totoo diad mamilagron impamakan ed saray ulop tan nanggawa na dakel a panagtambal. (Mateo 14:14-22; 15:32-39) Lawas ton inyuna so interes na arum nen say dili to. Satan no akin ya inkuanto: “Saray kuyangen walay balaong da tan saray manok ed tawen walaan iray obong, balet say Anak na too anggapoy pangisaralan to na ulo to.” (Mateo 8:20) Si Jesus so akalikna ed maneobra na espiritu na Dios unong a pinmaway manlapud sikato ed mamilagron panagtambal. Agbalot sinalin angalay gungguna ed materyal diad impangusar na, singa ontan a makapakelkelaw a pakayari, sanen sakey a bii a walaay pantoro na dala ed 12 taon so aniwit ed akinpaway a kawes to ed pananisia et atambal. (Marcos 5:25-34) Niarum ni, agbalot inusar nen Jesus so makapakelkelaw a pakayari ed dilin biang to.—Ipareng so Mateo 4:2-4.
16. Diad anto iran dalan a si Kristo so nanministro ed espiritual a pankaukolan na totoo?
16 Anggaman andi-siblet ya inimano nen Jesus iray pisikal a kakaukolanen na totoo ed impanambal ed liliknaen da tan pinakan to ran mamilagro, say manunan manamayubo ed mangaraldalin a ministeryo to et say panpulong na maong a balita na Panarian na Dios, a manbangat, tan manggaway babangatan. Anggaman ed amin a makapakelaw a pantambal a ginawa to, ag-akabat a bilang Baleg a Managtambal odino Milagron-Kumikimey balet bilang Maong a Managbangat. (Mateo 4:23, 24; Marcos 10:17) Tinukoy nen Jesus so inkasikato a bilang Managbangat, unong a ginawa na saray babangatan to tan anggan saray kakabusol to. (Mateo 22:16; 26:18; Marcos 9:38) Tan agaylaran katuaan so imbangat to, a singa ed Sermon to ed Palandey! (Mateo 5:1–7:29) Agaylan dugaruga iray ilustrasyon to, tan agaylan mapatnag iray mapropetikon parabolo to tan arum iran propesiya! Agpankelawan a saray imbakin sundalon manaresto ed si Jesus ed sakey ya okasyon et agmakapangitarok ed inkasikara a sikatoy erelen!—Juan 7:45, 46.
17. (a) Panon a si Jesus so angitarok ed sikatayo na ayadyarin padron na panangaro? (b) Anto so onsublay a nasingbat ed ontumbok ya artikulo?
17 Agpanduwaruwaan, si Jesu-Kristo so angitarya ed sikatayo na ayadyarin alimbawa ed ikiwas ya andi-siblet ed saray demostrasyon na panangaro na Dios ed sikatayo. Inter nen Jesus ed mangatatawen ya Ama to so panangiyuna ed bilay tan panangaro to. Petepeteg ya inaro to so inkatunong, ya akideneng a simamaaro dingan na saray apostoles tan arum iran babangatan to, tan inusar so bilay to a manministro ed espiritual tan material iran kakaukolanen na totoo. Kaunoran, binalangetan nen Jesus so ministeryo to ed impangiter ed bilay to bilang dondon. (Mateo 20:28) Balet anto met ed sikatayo ? Tua, sikatayoy ag-ayadyari, a singa si Moises tan si David. Anggaman ontan, unong ya impanengneng na ontumbok ya artikulo, walaray praktikal a dalan a nayarin naalig tayoy Alimbawa tayo diad andi-siblet ya inkiwas ed saray paneknek na panangaro na Dios.
Panon so Iyebat Yo?
◻ Akin a nibaga a “say Dios aro”?
◻ Panon so inkiwas nen Moises ed saray paneknek na panangaro na Dios?
◻ Diad anto iran dalan a si David so kinmiwas ed panangaro nen Jehova a Dios?
◻ Anton alimbawa so inletneg nen Jesus-Kristo ed ikikiwas ed panangaro na Dios?
[Litrato ed pahina 8]
Amta yo ta no panon a kinmiwas si Moises ed panangaro na Dios?
[Saray litrato ed pahina 10, 11]
Si Jesus so kinmiwas ed panangaro na Dios diad itulong ed arum ed espiritual tan pisikal tan ed impangiter na bilay to a bilang dondon