Kapitulo 1

Apocalipsis​—Say Maliket a Kapantokan To!

1. Panoy pakaamta tayo a labay na Dios a manliket itayo?

SAY APOCALIPSIS ODINO PUYAN ED SI JUAN—itatarok na sayan makapasagyat a libro na Biblia so madibinon rekord ed maliket a kapantokan. Akin ya ibabaga tayon maliket? Bueno, say Autor na Biblia so adeskribe bilang “bendito [“maliket,” NW] a Dios,” ya angimatalek na ‘maglorian ebanghelyo’ ed saraman so mangaaro ed sikato. Labay To itayon manliket met. Kanian, diad gapo ni labat et ipapaseguro la ed sikatayo na Apocalipsis: “Mapalar [odino maliket] so manbasa . . . ed sarayan salita na saya ya angipropetaan.” Diad unor a kapitulo na satan et nibaga ed sikatayo: “Mapalar so saray mangunor ed saray salita na propesiya na sayan libro.”—1 Timoteo 1:11; Apocalipsis 1:3; 22:7.

2. Antoy nepeg tayon gawaen pian naromog so liket panamegley na libron Apocalipsis?

² Panon tayon naromog so liket panamegley na libro na Apocalipsis? Nagawaan tayo itan diad pansukimat ed kabaliksan na saray mabitar a tanda, odino simbolo na satan, tan onkiwas a mitukoyan ed satan. Say magulon awaran na katooan so magano lan makasabi ed makaderal a kapantokan, sano ipaakseb la na Dios tan si Jesu-Kristo so panangukom ed marelmeng a sistema natan, a salatan na “sakey a tawen a balo tan sakey a dalin a balo,” a ditan “anggapo la naani ipatey.” (Apocalipsis 21:1, 4) Agta amin tayo so malabay a manbilay ed ontan a balon mundo, ed tuan kareenan tan kaligenan? Makapambilay itayo no pabiskegen tayoy pananisia tayo panamegley na panagaral ed Salita na Dios, pati say makapasagyat a propesiya na Apocalipsis.

Apocalipsis—Anto Itan?

3. Antoy iisipen na dakel a totoo a kabaliksan na Apocalipsis tan Armagedon?

³ Agta say Apocalipsis et atawag met a Puyan? On, lapud say “puyan” a patalos ed Biblian Pangasinan et a·po·kaʹly·psis ed Griegon teksto. Dakel a totoo so mangibabaga a say Apocalipsis et kadederal na mundo panamegley na nuklear a guerra. Diad sakey a syudad ed Texas, E.U.A., a nanggawaan na dakerakel a bomban nuklear, imbaga na saray relihyoson totoo, “Sikatayo so unonan naandi.” Nireport a saray klero ed satan a pasen so “akombinse a say Armagedon et aliwa labat lan agnapaliisan noagta asingsingger met la, tan say pinal a pambabakal na puersa na maong tan mauges, Dios tan si Satanas, so nagawa bilang nuklear a holocaust.”a

4. Anton talaga so kabaliksan na salitan “apocalipsis,” tan akin a say unor a libro na Biblia so matukoy ya apauloan na “Apocalipsis”?

⁴ Balet anton talaga so apocalipsis odino puyan? Anggaman inikdan itan na saray diksionaryo na kabaliksan diad impangusar ed saray termino a singa say “magano lan kaderal na uniberso,” say manunan kabaliksan na Griegon a·po·kaʹly·psis et “pangekal na sakbong” odino “panangiparungtal.” Kanian, say unor a libro na Biblia so manepeg ya apauloan na “Apocalipsis.” Dia et naromog tayo met so panangiparungtal ed saray madibinon katuaan a nepeg a mangiletneg ed kapusoan tayo na masnag ya ilalo tan agnagiing a pananisia, ya aliwa labat lan say mensahe nipaakar ed nigeter lan kadederal na mundo.

5. (a) Siopa so naderal ed Armagedon, tan siopa so makaliktar? (b) Anton engranden arapen so manatalaran ed saray niliktar ed Armagedon?

⁵ Tua, say Armagedon so adeskribe ed unor a libro na Biblia bilang “bakal na baleg ya agew na Dios, a Makapanyarin-amin.” (Apocalipsis 16:14, 16) Balet ta miduman tuloy itan ed nuklear a holocaust! Say ontan a holocaust et nayarin mankabaliksan na kaderal na amin a bilay ed dalin. Diad pidumaan, iyoopresi na Salita na Dios so makapaliket a paseguro a saray marelmeng labat ya onsusumpa ed Dios so naderal—diad panamegley na saray puersa a kontrolado na Dios. (Salmo 37:9, 10; 145:20) Sakey a baleg ya ulop na totoo, a nanlapu ed amin a nasyones, so makaliktar ed kapantokan na madibinon panangukom diad Armagedon. Diad satan et ipastol tan iwanwan nen Kristo Jesus iraya diad bilay ya andi-anggaan ed paraison dalin. Kasin labay moy magmaliw a sakey ed sikara? Makapaliket ta ipapanengneng na Apocalipsis a nayarian moy magmaliw a sakey ed sikara!—Apocalipsis 7:9, 14, 17.

Pansukimat ed Saray Madibinon Sekreto

6. Diad inlabas na saray taon, antoran libro so impalapag na saray Tasi nen Jehova ya angisindag na liwawa ed Apocalipsis?

⁶ Nen 1917 ni, say Watch Tower Society so angipalapag la ed libron The Finished Mystery. Saya so bersikulo-por-bersikulon komentaryo ed saray libro na Biblia ya Ezequiel tan Apocalipsis. Insan, legan a mantutultuloy a nagagawa iray ebento ed mundo bilang kasumpalan na propesiya na Biblia, sakey a nipanpanaon a duaran-tomo a libro ya apauloan na Light so niparaan, ya impaway nen 1930. Saya so angitarya na apasimbalon impanaral ed Apocalipsis. Say liwawa so mantutultuloy ya ‘onsisinag ed matunong,’ kanian nen 1963 et impalapag na saray Tasi nen Jehova so 704-pahina a libron “Babylon the Great Has Fallen!” God’s Kingdom Rules! Saya so angiter na detalyadon tuloy ya awaran na intalindeg tan inkagba na Babilonia a Baleg, say sankamundoan ya empiryo na palson relihyon, tan satan so amantok ed impaningbat ed unor a siameran kapitulo na Apocalipsis. Legan a ‘say basbas na matunong so onliliwawa,’ nagkalautla nipaakar ed saray kimey a parad kongregasyon, tinmumbok nen 1969 so 384-pahina a tomon, “Then Is Finished the Mystery of God,” ya aningbat ed unonan 13 kapitulo na Apocalipsis.—Salmo 97:11; Uliran 4:18.

7. (a) Akin ya intarya na saray Tasi nen Jehova iyan libro nipaakar ed Apocalipsis? (b) Antoran katulongan ed panagbangat so nitarya ed libro parad pakagunggonaan na saray manbabasa?

⁷ Akin ya impalapag tan inimprinta lamet so sananey nin libro nipaakar ed Apocalipsis ed sayan peles a panaon? Dakel ed saray impormasyon a pinmaway la so detalyadon tuloy, tan ag-itan impatalos tan impalapag ed sankamundoan ed dakel iran lenguahe. Kanian, naimano a matukoy so pangitarya na sakey a libro nipaakar ed Apocalipsis diad sakey lambengat a tomo tan diad istilo a mainomay a nipatalos ed dakel iran lenguahe. Sakey ni, inanamot so pankanawnawa ed sayan tomo pian itarya iray tulong ed panagbangat, pati saray ilustrasyon, tsart, tan saray sumaryo, ya ontulong ed saray manbabasa pian natebek dan maong so makapasagyat a kabaliksan na sayan alay abig a propesiya.

8. Anto so mas mapuersan rason diad impangipalapag ed sayan libro?

⁸ Say sakey nin mas mapuersan rason ed impangipalapag ed sayan libro et lapud kaukolan a mansiansia itayon makapibansag ed peles a katuaan. Si Jehova so mantutultuloy a mangisisindag na babaleg a liwawa ed kabaliksan na Salita to, tan nailaloan tayo a say pakatalos tayo ed Apocalipsis, ontan met ed arum niran propesiya, so napaaralem legan itayon manasingger ed baleg a kairapan. (Mateo 24:21; Apocalipsis 7:14) Importante a sikatayo so napakabatan a maong. Unong ya insulat nen apostol Pedro nipaakar ed madibinon propesiya: “Maong no imatleken yo a singa bilang sakey a silewan ya onsisinag ed pasen ya ambilunget, angga ed ipelnak na kabuasan ompelnak ed kapusoan yo.”—2 Pedro 1:19.

9. (a) Tekep na arum niran propesiya, anto so ipapabitar na Apocalipsis a palsaen na Dios? (b) Anto so balon mundo, tan panon kan makaliktar tan makaloob ed satan?

⁹ Iyaarum na Apocalipsis so testimonya na satan ed dakel niran propesiya na Biblia, a mangipapabitar a gagala nen Jehova a Dios so mamalsa na balon katawenan tan sakey a balon dalin. (Isaias 65:17; 66:22; 2 Pedro 3:13; Apocalipsis 21:1-5) Say mensahe na satan so manunan parad saray alanaan a Kristiano, a sinaliw nen Jesus panamegley na dala to pian magmaliw a kaiba ton manuley ed balon katawenan. (Apocalipsis 5:9, 10) Anggaman ontan, sayan maong a balita so mamabiskeg met ed pananisia na saraman so minilyon a manatalaran ed andi-anggaan a bilay ed silong na Panarian nen Kristo. Kasin sakey ka ed saraya? Sirin say Apocalipsis so mamabiskeg ed ilalom a pambilay ed Paraiso, bilang kabiangan na balon dalin, tekep na panggayaga ed inkadaakan na kareenan, alay abig a bunigas, tan daakan iran probisyon na Dios ya agbalot mangangga. (Salmo 37:11, 29, 34; 72:1, 7, 8, 16) No labay moy makaliktar ya onloob ed satan a balon mundo, inkaganatan, on, kakkaukolan, a sika so mangimano ed malinew a deskripsion na Apocalipsis ed makatantandan kapantokan ya asingger la.—Sofonias 2:3; Juan 13:17.

[Paimano ed leksab]

[Interon-pahina a litrato ed pahina 7]