Kapitulo 3
Saray Bengatlan Nakaukolan lan Nagawa ed Magano
1. Panon kan makaliktar ed pangipaakseb na panangukom na Dios ed sayan mundo?
NEPEG a pampagaan mon tuloy iray nagagawa ed mundo natan. Akin? Lapud agnaliktaran na sayan mundo so pangipaakseb na Dios ed panangukom to. Balet nayarian moy makaliktar. Nagawaan mo iya no mansiansia kan ‘ag-taga mundo’ a nigana la’d kadederal. Agkabaliksan na saya a manbilay kan singa ermitanyo ya alablabas mo lan pegetan so inkasika. Kabaliksan na saya ya anggaman panggagayagaan moy makapaliket, makabaliksan a bilay, et isian moy inkasika manlapud marutak a politika, maagum a komersyalismo, tan relihyon a mamapabanday ed Dios, ontan met ed marawal tan imoral a walna. Ontan met a nepeg mon tumboken iray atagey ya estandarte na Dios nipaakar ed kondukta tan panggunaetan a gawaen so linawa to. (Juan 17:14-16; Sofonias 2:2, 3; Apocalipsis 21:8) Ipapabitar na libro na Biblia ya Apocalipsis so kaimportantian na pangiyaplikam ed sarayan pamaakaran, a manggawa na pananguman a nakaukolan diad paraan na kabibilay mo.
2. Panon so impangiparungtal nen apostol Juan ed engranden propesiya na Apocalipsis, tan siopa so angiteran na Dios ed sayan ambelat a mensahe?
2 Imparungtal nen apostol Juan iyan engranden propesiya diad sarayan salita: “Say puyan nen Jesu-Kristo ya initer na Dios ed sikato, pian ipakaba’to ed saray ariripen to, salanti saray bengatlan nakaukolan da so nagawa a magano.” (Apocalipsis 1:1a) Sirin say apaolin Jesu-Kristo so angawat ed sayan importantin mensahe a nanlapud Dios. Imbes a kabiangan na misteryon Trinidad, si Jesus so ipapabitar dia a walad pakauley nen Ama to. Ontan met, “saray ariripen” a tugyopen na Kristianon kongregasyon so pauuleyan ed si Jesu-Kristo, ta pian ‘[itultuloy] dan tumboken anggan iner so laen to.’ (Apocalipsis 14:4; Efeso 5:24) Balet siopa natan iray tuan “ariripen” na Dios, tan panon iran nagugunggonaan ed Apocalipsis?
3. (a) Sioparay “ariripen” a walad pakauley nen Jesu-Kristo? (b) Anton kimey so gagawaen na saray matoor ya “ariripen” diad panangidirehi na saray anghel?
3 Deneskribe nen apostol Juan, ya angisulat ed Apocalipsis, so inkasikato bilang ontan ya aripen. Sikatoy unor a nambilay ya apostol tan sakey ed saray apilin alanaan na espiritun grupo na “ariripen” a manawir na imortal a bilay ed katawenan. Wala labat natan so piganlibo ed saraya a nakekeraan ed dalin. Say Dios so walaan met na arum a lingkor, sakey a baleg ya ulop, lalaki, bibii, tan ugugaw, a minilyon so bilang da la natan. Diad panangidirehi na saray anghel, saraya so kaiba na alanaan ya “ariripen” diad panangiyabawag ed magnayon a maong a balita ed amin a katooan. Agayla so pambabanikel na amin na sarayan “ariripen” ta pian tulongan iray mauyamo ed dalin a makaromog na kilalaban! (Mateo 24:14; Apocalipsis 7:9, 14; 14:6) Ipapabitar na Apocalipsis no antoy nepeg mon gawaen pian nagunggonaan manlapud makapaliket a maong a balita.
4. (a) Panon a nibaga nen Juan a ‘saray bengatla so nakaukolan lan nagawa ed magano’ anta masulok lan 1,900 a taon so linmabas manlapud impangisulat to ed Apocalipsis? (b) Antoy ipapabitar na ebidensya natan nipaakar ed saray bengatlan nipasakbay?
4 Balet, panon a nibaga nen Juan a nipanengneng ed sarayan ‘ariripen iray bengatlan kaukolan lan nagawa ed magano’? Agta saratan a salita so nibaga, masulok a 1,900 a taon lay apalabas? Manlapud punto de bista nen Jehova, a diad sikato to et say sanlibon taon et “singa labat karuman,” say 1,900 a taon so antiktikey no ikompara ed agnabilang a panaon ya inusar to ed impamalsa tan impangiparaan ed dalin a panayaman na too. (Salmo 90:4) Si apostol Pablo so angisulat nipaakar ed dili ton ‘marlang a panangalagar tan panilalo,’ lapud andi-duaruwa a parad sikato et ompatnag ya asingger to lan nagamoran so tumang to. (Filipos 1:20) Natan balet, daakan so ebidensya ya amin a bengabengatlan nipasakbay so nagawa unong ed eskedyul. Agnin balot agawa ed awaran nensaman a say mismon kililiktar na katooan so niiyan ed kapeligroan. Say Dios lambengat so walaan na solusyon!—Isaias 45:21.
Paralanan na Pitatalosan
5. Panon so inkipasabi na Apocalipsis ed si apostol Juan tan insan diad saray kongregasyon?
5 Intuloy na Apocalipsis 1:1b, 2: “Tan impawit to [Jesus] tan impaliwawa to [so Apocalipsis] [“diad saray tanda,” NW] ed panamegley na anghel to ed aripen to a Juan, a sikato so nantasi ed salita na Dios, tan impantasi nen Jesu-Kristo, salanti amin a bengatla ya anengneng to.” Sirin, inawat nen Juan so apuyanan a rekord panamegley na sakey a mensaheron anghel. Insulat to itan ed sakey a lukot, ya impasabi to ed saray kongregasyon ed panaon to. Makapaliket, impreserba itan na Dios parad sikatayo pian pakapasesegan na ngalngali 100,000 a kongregasyon na saray nankakasakey ya ariripen to ed dalin natan.
6. Panon ya impabidbir nen Jesus so paralanan ya usaren to ed pangitarya na espiritual a tagano parad ‘saray ariripen’ to natan?
6 Say Dios so walaan na sakey a paralanan pian nipasabi so Apocalipsis ed panaon nen Juan, tan si Juan so kabiangan na satan a paralanan ed dalin. Ontan met, say Dios so walaan na sakey a paralanan diad pangipapagamor na espiritual a tagano ed ‘saray ariripen’ to natan. Diad matalonggaring a propesiya to nipaakar ed konklusyon na sistema na bengabengatla, impabidbir nen Jesus so kabiangan na sayan paralanan ed dalin bilang “matoor tan makabat ya aripen, a sikato’y impasen na katawan to a mangimaton ed sankaabungan to, a mangiter ed sikara na tagano ed panaon a kinepeg to.” (Mateo 24:3, 45-47) Uusaren to iyan Juan a klase diad panangiparungtal ed kabaliksan na propesiya.
7. (a) Panon so nepeg a pangapekta ed sikatayo na saray tanda a naromog diad Apocalipsis? (b) Panon kabayag so impakapibiang na arum ed Juan a klase ed kasumpalan na saray pasingawey ed Apocalipsis?
7 Insulat nen apostol Juan ya imparungtal nen Jesus so Apocalipsis “diad saray tanda,” odino saray simbolo. Saraya so mabitar tan makapasagyat ya usisaen. Ililitrato na saratan so dinamikon kimey tan nepeg a mamaseseg iratan ed sikatayo ya ipakabat ed arum so propesiya tan say kabaliksan na satan. Ipaparungtal na Apocalipsis ed sikatayo so pigaran makapalikliket a pasingawey, a diad kada sakey ed saratan et si Juan so balanglan aktibon akibiang odino angimaton. Maliket iramay kabiangan na Juan a klase, ya arum ed sikara et akibiang ed loob na dakel lan dekada ed kasumpalan na sarayan pasingawey, lapud say espiritu na Dios so angiparungtal ed kabaliksan ta pian nayarian dan ipaliwawa itan ed arum.
8. (a) Anto so mabitar nipaakar ed kada sakey ed saray pasingawey ed Apocalipsis? (b) Panon ya ontulong ed sikatayo so propesiya nen Daniel a natalosan so pakabidbiran na saray atap ya ayep ed Apocalipsis?
8 Sarayan pasingawey ed Apocalipsis so agniparungtal unong ed kronolohiya. Kada sakey so walaan na dilin panaon na kasumpalan. Dakel ed saray pasingawey so miulibay ed saray salita na akadkauna la iran propesiya a mangipagamor na pakatalos no nipaakar ed interpretasyon na saratan. Alimbawa, deneskribe na propesiya nen Daniel so apatiran makapataktakot ya atap ya ayep, ya impaliwawa ton saraya so angilitrato ed manuuley iran pakapanyari ed dalin. Kanian, atulongan itayon talosan a saray atap ya ayep ed Apocalipsis so mangirerepresenta ed mapolitika iran organisasyon, a kabiangan la iraya’y wala natan.—Daniel 7:1-8, 17; Apocalipsis 13:2, 11-13; 17:3.
9. (a) Singa si Juan, anton awawey so impanengneng na Juan a klase? (b) Panon ya ipapanengneng ed sikatayo nen Juan so paraan pian magmaliw a mapalar odino maliket?
9 Si Juan so matoor diad panagtasi ed mensahe ya inter ed sikato na Dios diad panamegley nen Jesu-Kristo. Detalyado ton deneskribe so “amin a bengatla ya anengneng to.” Say Juan a klase so magunaet a kinmerew na panangiwanwan na Dios tan si Jesu-Kristo ta pian sigpot dan natalosan so propesiya tan nipakabat iray maabig a punto na satan ed saray totoo na Dios. Parad pakagunggonaan na alanaan a kongregasyon (tan ontan met ed internasyonal a baleg ya ulop ya iliktar na Dios ed baleg a kairapan), insulat nen Juan: “Mapalar [odino maliket] so manbasa, tan saray ondengel ed sarayan salita na saya ya angipropetaan, tan unoren da so saray bengatlan wadman a nisulat; ta say [“aturon,” NW] panaon asingger la.”—Apocalipsis 1:3.
10. Antoy nepeg tayon gawaen nipaakar ed Apocalipsis pian nadampot so liket?
10 Nagunggonaan kan maong diad pamasa ed Apocalipsis tan nagkalalo la diad panumpal ed saray bengatlan nisulat ditan. Onia so impaliwawa nen Juan diad sakey ed saray sulat to: “Saya so aro na Dios, a sumpalen tayo so saray ganggan to: tan saray ganggan to aliwa ran ambelat. Ta siopaman a nianak ed Dios, daegen to so mundo: et saya so pananalo a manaeg ed mundo, salanti say pananisia tayo.” (1 Juan 5:3, 4) Nayarian moy magmaliw a maliket a maong diad pamayubo na ontan a pananisia!
11. (a) Akin a maganat so panumpal tayo ed saray salita na propesiya? (b) Anton panaon so talagan asingsingger la?
11 Maganat so panumpal tayo ed saray salita na propesiya, “ta say [aturon] panaon asingger la.” Aturon panaon parad anto? Parad kasumpalan na saray propesiya na Apocalipsis, a pati saray panangukom na Dios. Asingger la so panaon a pangipaakseb na Dios tan si Jesu-Kristo ed pinal a panangukom ed sankamundoan a sistema nen Satanas. Sanen wadiad dalin si Jesus, imbaga to a say Ama to lambengat so mikabat ed ‘satan ya agew odino oras.’ Lapud akauna to lan anengneng iray gonigon a dinmaak diad dalin ed panaon tayo, inkuan met nen Jesus: “Sayan kailalakan agnaani onlabas angga ed kasumpal na saraya ya amin a bengatla.” Kanian say aturon panaon parad pangipaakseb na desisyon na Dios et talagan asingsingger la. (Marcos 13:8, 30-32) Unong ya ibabaga na Habacuc 2:3: “Say pasingawey sikato ni nipaakar ed nigeter a panaon, tan mansiglat ya onarap ed anggaan, et agnaani mantila. Anggan manabala, sikato so alagden mo; ta petepeteg ya onsabi, ya agmanbayag.” Say kisalba tayo legan na baleg a kairapan so mandedependi ed panumpal tayo ed mapropetikon Salita na Dios.—Mateo 24:20-22.
[Kahon ed pahina 15]
Pian natalosan so libro na Apocalipsis nakaukolan tayon
● Awaten so tulong na espiritu nen Jehova
● Tebeken no kapigan so inggapo na agew na Katawan
● Bidbiren so matoor tan makabat ya aripen natan