Kapitulo 42
Sakey a Balon Tawen tan Sakey a Balon Dalin
1. Anto so dedeskribien nen Juan sanen sikatoy ipapawil na anghel ed gapo na Sanlibon Taon ya Uley?
SAYAN maglorian pasingawey so mantutultuloy a nipaparungtal legan a si Juan so ipapawil na anghel ed gapo na Sanlibon Taon ya Uley. Anto so dedeskribien to? “Tan akanengneng ak na sakey a tawen a balo tan sakey a dalin a balo: ta say una a tawen tan say una a dalin linmabas la ra; tan say dayat andi la.” (Apocalipsis 21:1) Sakey a mabisbistan nenengnengen so pinmarungtal!
2. (a) Panon ya asumpal ed nipawil iran Judio nen 537 B.C.E. so propesiya nen Isaias nipaakar ed balon katawenan tan balon dalin? (b) Panoy pakaamta tayo a wala ni kiyaplikaan na propesiya nen Isaias, tan panon ya asumpal iyan sipan?
2 Nilasus a taon antis na panaon nen Juan, onia so inkuan nen Jehova ed si Isaias: “Ta, nia, mamalsa ak na saray balo a tawen tan balo a dalin; ta saray inmuna a bengatla ag-ira la nanonotan, ag-ira la onla ed nonot.” (Isaias 65:17; 66:22) Sayan propesiya so walaan na inmunan kasumpalan sanen pinmawil iray matoor a Judio ed Jerusalem nen 537 B.C.E. kayari na 70-taon ya inkibantak da ed Babilonia. Diad saman a panangipawil, sikaray amorma na sakey ya alinisan a sosyedad, sakey a “balo a dalin,” diad silong na balon sistema a pananguley, salanti, “saray balo a tawen.” Balet, tinukoy nen apostol Pedro so sakey nin kiyaplikaan na propesiya, a kuanto: “Balet, unong ed sipan to alagden tayo so saray tawen a balo tan dalin a balo, a sikara so panayaman na katunongan.” (2 Pedro 3:13) Ipapanengneng natan nen Juan a sayan sipan so nasusumpal legan na agew na Katawan. “Say una a tawen tan say una a dalin,” salanti, say inorganisa a sistema na bengabengatla nen Satanas a pati saray gobiernon uksoyan na satan ya inimpluensyaan nen Satanas tan saray demonyo to, so onlabas odino mangangga la. Say agmaligen a “dayat” na marelmeng, rebelyoson katooan so naandi la. Onsalat ed satan so “sakey a tawen a balo tan dalin a balo”—sakey a balon mangaraldalin a sosyedad diad silong na balon gobierno, say Panarian na Dios.—Ikompara so Apocalipsis 20:11.
3. (a) Anto so dedeskribien nen Juan, tan anto so Balon Jerusalem? (b) Panon ya ‘oneepas so [Balon Jerusalem] manlapud tawen’?
3 Intuloy nen Juan: “Tan anengneng ko so masantos a syudad, say balo a Jerusalem, ya inmepas a nanlapu ed tawen dia ed Dios, a nitadia a singa sakey a nobya ya akawesan nipaakar ed asawa to.” (Apocalipsis 21:2) Say Balon Jerusalem so nobya nen Kristo, a tugyopen na alanaan iran Kristiano a nansiansian matoor anggad impatey da tan apaoli a magmaliw ya arari tan saserdote a kaiba na niglorian Jesus. (Apocalipsis 3:12; 20:6) No panon a say mangaraldalin a Jerusalem et nagmaliw a kabisera na gobierno ed Israel nensaman, say alay dakep a Balon Jerusalem tan say Nobyo to so manugyop ed gobierno na balon sistema na bengabengatla. Saya imay balon tawen. Aliwan literal ya ‘oneepas so nobya manlapud tawen,’ noag diad pantalos ya ipaarap na satan so imano to ed sayan dalin. Say nobya na Kordero so magmaliw a matoor a katulongan to ed pangipakurang na matunong a gobierno ed amin a katooan. Peteg a bendisyon parad balon dalin!
4. Anton sipan so ginawa na Dios a mipadpara ed samay ginawa to ed balobalo nin aporma a nasyon na Israel?
4 Onia so ibabaga ni nen Juan ed sikatayo: “Tan nadngel ko so sakey a baleg a boses ed tawen, a kuanto, Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da.” (Apocalipsis 21:3) Sanen akigawaan si Jehova na Ganggan a sipanan ed balon nasyon na Israel nensaman, insipan to: “Tan ipasen ko naani tabernakulok ed nanleleetan yo, tan say kamarerwak agto kayo la gulaen. Tan miulop-ulop ak ed nanleleetan yo, tan siak la so Dios yo, tan sikayo la so katooan ko.” (Levitico 26:11, 12) Natan et manggagawa si Jehova na mipadparan sipan ed matoor a katooan. Legan na sanlibon taon ya Agew na Panangukom, sikara so magmaliw ya espisyal a totoo parad sikato.
5. (a) Panon a miayam so Dios ed katooan legan na Milenyon Uley? (b) Panon a manayam so Dios ed limog na katooan kayari na Sanlibon Taon ya Uley?
5 Legan na Milenyon Uley, si Jehova so “manayam” ed limog na katooan ed temporaryon uksoyan, a sikatoy irepresenta na arin Anak to, si Jesu-Kristo. Balet, diad sampot na Sanlibon Taon ya Uley, sano iyawat la nen Jesus so Panarian ed Ama to, agla kaukolan so maarin representanti odino manamegley. Diad espiritual a paraan, si Jehova so permanente tan direkta lan manayam ed “baley to.” (Ikompara so Juan 4:23, 24.) Agaylan ekselentin pribilehyo parad nipawil a katooan!
6, 7. (a) Antoran engranden sipan so ipaparungtal nen Juan, tan siopa so manggayaga ed saray bendisyon? (b) Panon a dedeskribien nen Isaias so namparan espiritual tan pisikal a paraiso?
6 Intuloy ya inkuan nen Juan: “Tan punasen to so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apocalipsis 21:4) Maminsan lamet, nipanonot ed sikatayo iray akadkaunan apuyanan a sipasipan. Tatalaranan met nen Isaias so panaon sano say patey tan pannangis et naandi la tan say ermen so nasalatan lay panliket. (Isaias 25:8; 35:10; 51:11; 65:19) Pepekderan natan nen Juan a sarayan sipan so walaan na makapakelaw a kasumpalan legan na sanlibon taon ya Agew na Panangukom. Unona et say baleg ya ulop so manggayaga ed saray bendisyon. “Say Kordero a wala ed pegley na trono,” a mantultuloy a mamastol ed sikara, et “irawa’to [ira] ed saray subol na danudanum na bilay: tan say Dios punasen to so balang lua ed saray kamataan da.” (Apocalipsis 7:9, 17) Balet diad saginonor et amin na saramay paolien tan mangagamil na pananisia ed saray probisyon nen Jehova so nakaiba ra, a panggayagaan da so namparan espiritual tan pisikal a paraiso.
7 “Satan la” inkuan nen Isaias, “nilukas so saray mata na bulag, tan say layag na saray telek nibuang naani.” On, “satan la manlukso so piley a singa sakey ya ulsa, tan say dila na emel mankanta naani.” (Isaias 35:5, 6) Diad satan met a panaon, “ipaalagey da naani so saray abung, tan manayam ira naani; et mantanem ira naani na saray ubas, tan mangan ira naani ed saray bunga ra. Sikara ag-ira naani mangipaalagey, et sananey so manayam; ag-ira naani mantanem et sananey naani mangan; ta singa saray agew na sakey a kiew ontan ira naani so saray agew na baley ko, et saray pinilik manliket ira naani a maando ed saray gawa na saray lima ra.” (Isaias 65:21, 22) Kanian sikara so agnabagot ed dalin.
8. Anto so ibabaga nen Jehova a mismo nipaakar ed inkanapanmatalkan na sarayan engranden sipan?
8 Agaylan marakep iran pagpaunan panangiparungtal nipaakar ed arapen so nipaslep ed kaisipan tayo leleg ya uumamengen tayo irayan sipan! Akatarya iray alay abig a probisyon parad matoor a katooan ed silong na maaron mangatatawen a gobierno. Kasin mairap a panisiaan irayan sipan? Kasin kugkugip labat iraya na sakey a masiken a nibantak ed isla na Patmos? Si Jehova a mismo so oneebat: “Tan say manyurong ed trono kuanto: Nia, siak gawaen ko a balo so saray amin a bengatla. Tan kuanto ed siak: Isulat mo; ta saraya a salita sikara so matoor tan matua. Tan kuanto ed siak: Agawa la. Siak so Alfa tan Omega, say sengeg tan say anggaan.”—Apocalipsis 21:5, 6a.
9. Akin a sarayan bendisyon ed arapen et nepeg a moriaen a segseguradon nagawa?
9 Singano manpipirma si Jehova a mismo na sakey a garantiya, odino kaletan a titulo, ed sarayan bendisyon ed arapen parad matoor a katooan. Siopa ni makakuestion ed ontan a Mangagarantiya? Agayla, diad inka-segsegurado na sarayan sipan nen Jehova et sinalita ton singano asumpal la iraya: “Agawa la”! Agta si Jehova so “Alfa tan Omega . . . , a wala natan tan wala nensaman tan say onla dia, say Makapanyarin-amin”? (Apocalipsis 1:8) Peteg a sikatoy ontan! Inyabawag ton mismo: “Siak so inmuna tan say kaunoran; et anggapo la so arum a Dios noag siak.” (Isaias 44:6) Lapud saya, nayarian toy mangipuyan na saray propesiya tan sumpalen iratan anggad kamelmelagan a detalye. Agaylan makapabiskeg na pananisia! Kanian insipan to: “Nia, siak gawaen ko a balo so saray amin a bengatla”! Imbes a kuestionen no kasin peteg a nagawa irayan makapakelkelaw a bengatla, oniay seguradon nepeg a panumamengan tayo: ‘Anto so nepeg kon gawaen a mismo pian natawir iratan a bendisyon?’
“Danum” Parad Saray Napgaan
10. Anton “danum” so iyoopresi nen Jehova, tan anto so kabaliksan na satan?
10 Si Jehova a mismo so mangibabaga: “Say napgaan sikato so ikdan ko na inumen ed subol na danum na bilay ya andi bayar to.” (Apocalipsis 21:6b) Pian napenek itan a kapgaan, nepeg a sinononot so sakey a too ed espiritual a pankaukolan to tan magmaliw a mabulos a mangawat ed “danum” ya itatarya nen Jehova. (Isaias 55:1; Mateo 5:3) Anton “danum”? Si Jesus a mismo so inmebat ed sayan tepet sanen mantatasi ed sakey a bii diad abay na bobon ed Samaria. Inkuanto ed sikato: “Siopaman ya oninum ed danum ya iter ko ed sikato agnaapgaan anggan kapigan, ingen say danum ya iter ko ed sikato magmaliw ed sikato a sakey a bobon na danum a mansusbol angga ed maandon bilay.” Satan a “subol na danum na bilay” so onaagus manlapud Dios diad panamegley nen Kristo bilang probisyon to parad kipawil na katooan ed ayadyarin bilay. Singa say Samaritanan bii, agaylan pirawat tayo so oninum ed satan a subol! Tan singa saman a bii, agaylan akaparaan itayon mangisakripisyo ed saray minumundon interes pian nipanabang ed arum so maong a balita!—Juan 4:14, 15, 28, 29.
Saray Mananalo
11. Antoy insipan nen Jehova, tan diad siopa unonan onaaplika iratan a salita?
11 Saraman so oninum na satan a makarepreskon “danum” so kaukolan met a manalo, unong ya intuloy ya inkuan nen Jehova: “Say manalo tawiren to so amin a bengatla; et siak so Dios to, et sikato so ana’ko naani.” (Apocalipsis 21:7) Sayan sipan so miulibayan ed sipasipan ya aromog ed saray mensahe parad pitoran kongregasyon; kanian, sarayan salita so nepeg ya unonan onaplika ed alanaan iran babangatan. (Apocalipsis 2:7, 11, 17, 26-28; 3:5, 12, 21) Saray espiritual ya agagi nen Kristo nanlapula’d saman ya anggad natan so mantindek lan maniilalo ed pribilehyo a magmaliw a kabiangan na Balon Jerusalem. No sikara so manalo, a singa ed impanalo nen Jesus, nagamoran da iray ilalo ra.—Juan 16:33.
12. Panon a say sipan nen Jehova ed Apocalipsis 21:7 so nasumpal ed baleg ya ulop?
12 Say baleg ya ulop a nanlapud amin a nasyon so maniilalo met ed sayan sipan. Nepeg met iran manalo, tan sitotoor a manlingkor ed Dios anggad makapaway ira ed baleg a kairapan. Insan onloob ira ed mangaraldalin a tawir da, say ‘panarian ya imparaan ed sikara a nanlapu ed inkiletneg na mundo.’ (Mateo 25:34) Saraya tan saray arum a mangaraldalin a karnero na Katawan ya akapasa ed subok diad sampot na sanlibon taon so natawag a “sasantos.” (Apocalipsis 20:9) Panggayagaan da so sagrado tan singa san-aman siglaotan ed Manamalsa ra, si Jehova a Dios, bilang kabiangan na sankatalbaan ya organisasyon to.—Isaias 66:22; Juan 20:31; Roma 8:21.
13, 14. Pian natawir irayan engranden sipan na Dios, antoran ag-agamil so nepeg a mapekder tayon paliisan, tan akin?
13 Lapud sayan engranden ilalo, agaylan importante so pansiansian malinis na saray Tasi nen Jehova natan manlapud makadutak iran bengatla ed mundo nen Satanas! Kaukolan tayoy magmaliw a mabiskeg, mapekder, tan determinado ya ag-itayon balot natangguyor na Diablo a miulop ed deneskribe a mismo nen Jehova dia: “Balet saray matakot, tan agmanisia, tan saray makapaingongot, tan saray akapatey, tan saray managlawan, tan saray manag-anito, tan saray manangigalang ed kinondios, tan saray amin a matila, say apag da wala naani ed dayat a mandarlang ed apoy tan asupre; a sikato so komadua ya ipapatey.” (Apocalipsis 21:8) On, say manpilalek a magmaliw a tomatawir et kaukolan ya ompaliis ed saray agamil ya anutak ed sayan daan a sistema na bengabengatla. Nepeg a sikatoy manalo diad panamegley na pansiansian matoor anggaman ed amin a desdes tan tukso.—Roma 8:35-39.
14 Say Kakristianoan, anggaman ibabaga ton sikatoy nobya nen Kristo, so mangipapatnag na saray makapadimlan gawagawa ya idedeskribe dia nen Juan. Kanian sikatoy mansumpal ed andi-anggaan a kadederal a kaiba iray arum nin kabiangan na Babilonia a Baleg. (Apocalipsis 18:8, 21) Ontan met, siopaman ed nakdaan odino ed baleg ya ulop a mangagamil ed ontan a kaugsan, odino onggapon mangipaseseg ed satan, so mamaarap ed andi-anggaan a kadederal. No ipilit dan gawaen iraya, agda natawir iray sipan. Tan dia ed balon dalin, siopaman a mangigapo na ontan iran ag-agamil so naderal a tampol, a mamaarap ed komaduan ipapatey ya andian na ilalo a kioli.—Isaias 65:20.
15. Sioparay matalonggaring bilang mananalo, tan diad anton pasingawey a say Apocalipsis et nitarok ed alay abig a kapantokan?
15 Saray matalonggaring bilang mananalo et say Kordero, si Jesu-Kristo, tan say nobya to a 144,000, say Balon Jerusalem. Matukoy, sirin, a say Apocalipsis et nitarok ed alay abig a kapantokan panamegley na pinal, andian na kaparan nenengnengen a Balon Jerusalem! Dedeskribien natan nen Juan so kaunoran lan pasingawey.
[Saray litrato ed pahina 302]
Diad balon dalin a sosyedad, walay magayagan kimey tan panlilimog parad amin