Anto so Isabi na Kristo?
Say ebat na Biblia
Dakel so ibabaga na Biblia nipaakar ed isabi na Kristo pian ukomen iray totoo diad dalin.a Singa bilang, ibabaga na Mateo 25:31-33:
“Sano say Anak na too [Jesu-Kristo] et onsabi ed gloria to, tan kaiba toy amin ya anghel, diad satan et sikatoy onyurong ed maglorian trono to. Natipon ed arap to so amin a nasyon, tan pambibiiganen to iray totoo, a singa sakey a managpastol ya ibibiig to iray karnero ed saray kanding. Tan saray karnero et ipasen to diad kawanan to, balet saray kanding et diad kawigi to.”
Sayan panaon na panangukom et nagawa legan na “baleg a kairapan.” Sayan kairapan et agnin balot agawa tan mansampot ed guerra na Armagedon. (Mateo 24:21; Apocalipsis 16:16) Saray kalaban nen Kristo, ya tinukoy ed ilustrasyon bilang kanding et “naukom tan say dusa ra et andi-anggaan a kadederal.” (2 Tesalonica 1:9; Apocalipsis 19:11, 15) Balet saray matoor a lingkor to, saray karnero, et nawalaan na “bilay ya andi-anggaan.”—Mateo 25:46.
Kapigan so isabi na Kristo?
Imbaga nen Jesus: “Nipaakar ed satan ya agew tan oras et anggapoy siopaman a makaamta.” (Mateo 24:36, 42; 25:13) Balet, imbaga ton wala ray nagawa a kaiba ed nanengneng a “tanda” pian naamtaan tayo so panaon ya magano lay isabi to.—Mateo 24:3, 7-14; Lucas 21:10, 11.
Kasin onsabi so Kristo diad espiritu o diad laman?
Si Jesus et binilay lamet bilang espiritu, kanian onsabi bilang espiritu, aliwan diad laman. (1 Corinto 15:45; 1 Pedro 3:18) Lapud saya, nibaga nen Jesus ed saray apostol to diad samay agew antis na impatey to: “Agla manbayag et agak la nanengneng na mundo.”—Juan 14:19.
Saray lingon pakatalos nipaakar ed isabi na Kristo
Lingon pakatalos: Say kabaliksan na ibabaga na Biblia ya nanengneng na totoo si Jesus “ya onsasabi diad saray lurem” et nanengneng so isabi nen Jesus.—Mateo 24:30.
Katuaan: Mabetbet ya ikokonekta na Biblia iray lurem ed saray agnanengneng. (Levitico 16:2; Numeros 11:25; Deuteronomio 33:26) Singa bilang, imbaga na Dios ed si Moises: “Onla ak ed sika diad panamegley na ambilunget a lurem.” (Exodo 19:9) Agmet talaga anengneng nen Moises so Dios. Ontan met, no ‘onsabi diad saray lurem’ so Kristo, naamtaan na totoo so isabi to anggano agdan talaga nanengneng.
Lingon pakatalos: Saray salita ya “sikatoy nanengneng na amin a mata” ya walad Apocalipsis 1:7 nipaakar ed isabi na Kristo et literal so kabaliksan to.
Katuaan: Saray Griegon salita ya inusar ed Biblia parad “mata” tan “nanengneng” et nayari met ya usaren parad pakatebek odino pakatalos imbes ya diad literal ya pakanengneng.b (Mateo 13:15; Lucas 19:42; Roma 15:21; Efeso 1:18) Ibabaga na Biblia ya say binilay lamet a si Jesus et “manaayam ed agnaasinggeran a liwawa, a sikatoy . . . agnanengneng na too.” (1 Timoteo 6:16) Kanian, say labay ya ibaga na “sikatoy nanengneng na amin a mata” et natalosan dan si Jesus so mangiter na panangukom na Dios.—Mateo 24:30.
a Anggaman dakel a totoo so manguusar na salitan “second coming” odino “komaduan isabi” pian tukoyen so isabi na Kristo, ag-iya nabasa ed Biblia.
b Nengnengen so The New Thayer’s Greek-English Lexicon of the New Testament (1981), pahina 451 tan 470.