Kapitulo 14
Say Karlangan na Mangatatawen a Trono nen Jehova
Pasingawey 2—Apocalipsis 4:1–5:14
Tema: Makapakelkelaw iran nagagawa ed arap na trono na panangukom na Dios
Panaon na kasumpalan: Sayan pasingawey so mangidadatak ed saray ebenton nagagawa nanlapula’d 1914 ya anggad panampot na Milenyo tan ed lampas ni na saya, sano amin a pinalsa a walad tawen tan ed dalin so mangidayew ed si Jehova.—Apocalipsis 5:13
1. Akin a nepeg ya interesado itayon maong ed saray pasingawey ya inanabang nen Juan ed sikatayo?
INGGAPO nen Juan ya inabang ed sikatayo so nagkalalo nin makapaligsay-kamarerwa iran pasingawey. Diad panamegley na panangipuyan et sikatoy wala nin siansia ed agew na Katawan. Kanian, say dedeskribien to so walaan na aralem a kabaliksan ed sikatayo ya aktual a manbibilay ed satan ya agew. Diad panamegley na sarayan pasingawey, inekal nen Jehova so sakbong a manasanib ed mangatatawen iran inkapeteg tan inter to ed sikatayo so dilin panmoria to ed saray panangukom to a nagawa ed dalin. Sakey ni, balanglan walaan itayo na mangatatawen odino mangaraldalin ya ilalo, sarayan panangiparungtal so ontulong ed sikatayon nanengneng so pasen tayo diad gagala nen Jehova. Amin tayo, sirin, so nepeg a mantultuloy ya interesadon maong ed balikas nen Juan: “Mapalar so manbasa, tan saray ondengel ed sarayan salita na saya ya angipropetaan, tan unoren da so saray bengatlan wadman a nisulat.”—Apocalipsis 1:3.
2. Anto natan so naeksperiensya nen Juan?
2 Say onggendan ya anengneng nen Juan et palumbasan toy anggan dinan ya impabantay ed modernon too panamegley na video! Insulat to: “Kayari sarayan bengatla anengneng ko, tan nia, so sakey a pinto a nilukas dia ed tawen: tan say inmuna a boses a nadngel ko, sakey a boses a singa tanol na trumpeta a misasalita ed siak, a kuanto, Segep ka dia, tan ipanengneng ko ed sika so saray bengatlan nakaukolan a nagawa ed kayari na saraya.” (Apocalipsis 4:1) Diad panamegley na pasingawey et akaloob si Juan ed agnanengneng a katawenan a kawalaan nen Jehova, a lampas ni na pisikal a liwang ya asukisok na saray totoon astronaut, dia ed lampas ni ingen na saray galaksi ed pisikal ya uniberso. Singa onloloob ed sakey a lukas a puerta, si Juan so naimbitaan a manliket ed saray nanengneng na mata to ya alay abig a maaw-awang a bibistaen na kapantokan na espiritun katawenan a nitronoan nen Jehova a mismo. (Salmo 11:4; Isaias 66:1) Agaylan pribilehyo!
3. Anto so ipapanonot na boses “a singa tanol na trumpeta,” tan siopa so seguradon Lapuan na satan?
3 Ag-ipapabidbir na Biblia iyan ‘unonan boses.’ Singa ed mabiskeg a boses nen Jesus a nadngel ed akadkauna, walaan itan na manangimandon tanol a singa-trumpeta. (Apocalipsis 1:10, 11) Ipapanonot na satan so makmaksil a tanol na trumpeta ya angisinyal ed kiwawala nen Jehova diad Palandey Sinai. (Exodo 19:18-20) Agpanduaruwaan, si Jehova so matalonggaring a Lapuan na tawag. (Apocalipsis 1:1) Nilukasan to so puerta ta pian si Juan, diad pasingawey, et makaloob ed sankasantosan a pasen ed interon maaw-awang ya ayaman na inkasoberano nen Jehova.
Masnag a Kiwawala nen Jehova
4. (a) Antoy kabaliksan na pasingawey nen Juan ed saray alanaan a Kristiano? (b) Antoy kabaliksan na pasingawey ed saramay say ilalo ra et say pambilay na andi-anggaan ed dalin?
4 Anto so anengneng nen Juan? Ontalineng, legan ya inanabang to natan ed sikatayo so engranden eksperiensya to: “Naani bigla a wala ak ed espiritu: tan nia, sakey a trono a niyan dia ed tawen, tan dia ed tapew na trono wala so sakey a manyurong.” (Apocalipsis 4:2) Diad sakey a bekta, si Juan so inyalis na aktibon puersa na Dios ed mismon trono nen Jehova diad espiritual a paraan. Agaylan makapaliket ed si Juan! Dia et sikatoy naikdan na masnag a pasimar ed saramay mismon katawenan a no iner et nireserba ed sikato tan ed arum iran alanaan a Kristiano so “tawir ya agnaderal, tan agnarumsisan tan agnaumas.” (1 Pedro 1:3-5; Filipos 3:20) Parad saramay say ilalo ra et say pambilay na ando lan ando ed dalin, say pasingawey ed si Juan so walaan met na baleg a kabaliksan. Ontulong itan ed sikara a manebek ed gloria na kiwawala nen Jehova tan say uksoyan na mangatatawen a pananguley ya uusaren nen Jehova diad panangukom ed saray nasyon tan insan diad panguley ed bilay na totoo diad dalin. Peteg a si Jehova so Dios na sankaabigan ya uksoy!
5. Anto so aktual ya anengneng nen Juan ya insimbolo na sakob na kaban na sipan?
5 Dakel ed anengneng nen Juan ed tawen so miulibay ed saray kabiangan na tabernakulo ed kalawakan. Saya so impaalagey ed ngalngalin 1,600 taon lay apalabas bilang santuaryo na tuan panagdayew parad saray Israelita. Diad Sankasantosan na saman a tabernakulo et wadman so kaban na sipan, tan diad tagey na puron balitok a sakob na saman a Kaban so nansalitaan nen Jehova a mismo. (Exodo 25:17-22; Hebreos 9:5) Kanian, say sakob na Kaban so kinmana bilang simbolo na trono nen Jehova. Anengneng natan nen Juan so inkapeteg na saman a simbolikon representasyon: say Soberanon Katawan a Jehova a mismo a manyudyurong ed sankarakpan a karlangan ed atagey a mangatatawen a trono to!
6. Anton impresyon nipaakar ed si Jehova so inter nen Juan ed sikatayo, tan akin a matukotukoy iya?
6 Aliwan singa saray akadkaunan propeta ya awalaan na saray pasingawey nipaakar ed trono nen Jehova, ag-detalyadon deneskribe nen Juan so Masanton Sakey ya akayurong ed satan. (Ezequiel 1:26, 27; Daniel 7:9, 10) Balet inikdan itayo nen Juan na impresyon to ed samay Sakey a nitrono diad sarayan salita: “Tan say wala a manyurong dia ed pakanengneng kapara na sakey a bato a jaspe tan sakey a sardio: tan sakey a kabunlalakaw so wala ed kaliberliber na trono, a miparpara ed nengneng na esmeralda.” (Apocalipsis 4:3) Agaylan agnikompara a karlangan! Anengneng nen Juan so mapalna, mansyayap a karakpan a singa masileng, mankirlap iran mablin bato. Agaylan mitukoyan iya ed impaneskribe nen babangatan a Santiago nipaakar ed si Jehova bilang say “Ama na saray liwawa”! (Santiago 1:17) Kayarin tuloy na impangisulat nen Juan ed Apocalipsis, inkuanto a mismo: “Say Dios so silew, tan dia ed sikato anggapon balot so kabilungetan.” (1 Juan 1:5) Peteg ya agaylan maglorian Persona si Jehova!
7. Anto so naaralan tayo ed katuaan a wala so kabunlalakaw ed kaliberliber na trono nen Jehova?
7 Imanoen ya anengneng nen Juan ed kaliberliber na trono so sakey a kabunlalakaw, a kolor birdin esmeralda. Say Griegon salita a nipatalos dia a kabunlalakaw (irʹis) et mangisusuheri na nagnap a malimpek a porma. Say kabunlalakaw so unonan asalambit ed Biblia a misiglaotan ed panaon nen Noe. Sanen inmekat la so danum na Delap, pinawala nen Jehova so sakey a kabunlalakaw a pinmatnag ed lurem, tan impaliwawa to no antoy insimbolo na satan ed sarayan salita: “Yan ko so kabunlalakaw ko ed lurem, et sikato naani pakabidbiran na saya a sipanan, siak tan say dalin. Et nodnonoten ko so sipan ko, a sikato lanti sipanan tayo, siak tan sikayo tan amin a mabilay a pinalsa ed amin a laman; et saray danudanum agla ra naani onggawa a delap a manawtaw na amin a laman.” (Genesis 9:13, 15) Anto, sirin, so ipapanonot na mangatatawen a pasingawey ed si Juan? Say kabunlalakaw ya anengneng to so maseguron angipanonot ed sikato a kaukolan so mareen a relasyon ed si Jehova, a singa say panggagayagaan na Juan a klase natan. Nipaslep met ed sikato so inkapalna tan kareenan na kiwawala nen Jehova, inkapalna ya onsaknap ed amin a matulok a totoo sano inatnat nen Jehova so tolda to ed katooan diad balon dalin a sosyedad.—Salmo 119:165; Filipos 4:7; Apocalipsis 21:1-4.
Panamidbir ed 24 a Mamasiken
8. Sioparay anengneng nen Juan ed kaliberliber na trono, tan siopa so irerepresenta na saraya?
8 Amta nen Juan a saray saserdote et aturon manlingkor diad kadaanan a tabernakulo. Kanian nayarin sikatoy asurprisa diad impakanengneng ed ontumbok a deskribien to: “Tan dia ed kaliberliber na trono wala so duamplo tan apat a tronos; tan anengneng ko a manyurong so duamplo tan apat a mamasiken ed saray tronos, ya akawesan ira na kawekawes ya amputi; tan dia ed ulo ra wala so balanget da a balitok.” (Apocalipsis 4:4) On, imbes a saray saserdote, wala so 24 a mamasiken, a nitrono tan akoronaan a singa arari. Siopa irayan mamasiken? Anggapoy arum noag saray alanaan ed Kristianon kongregasyon, ya apaoli tan wala la’d mangatatawen a posisyon ya insipan nen Jehova ed sikara. Panoy pakaamta tayo ed satan?
9, 10. Panoy pikabat tayo a saray 24 a mamasiken so mangirerepresenta ed alanaan a Kristianon kongregasyon diad maglorian mangatatawen a posisyon?
9 Unona ed amin, sikaray akasulong na korona. Sinalambit na Biblia a saray alanaan a Kristiano so makagamor na ‘agnaderal a balanget’ odino korona tan makadampot na andi-anggaan a bilay, salanti, imortalidad. (1 Corinto 9:25; 15:53, 54) Balet lapud sarayan 24 a mamasiken so manyudyurong ed trono, saray binmalitok a korona ed sayan konteksto so mangirerepresenta na maarin autoridad. (Ikompara so Apocalipsis 6:2; 14:14.) Saya so manusuporta ed konklusyon a say 24 a mamasiken so mangililitrato ed saray alanaan a patumbok nen Jesus dia ed mangatatawen a posisyon da, lapud nanggawa si Jesus na sakey a sipanan ed sikara a sikaray onyurong ed saray trono diad Panarian to. (Lucas 22:28-30) Si Jesus tan sarayan 24 a mamasiken lambengat—agkaiba anggan saray anghel—so adeskribin manuley ed tawen diad kiwawala nen Jehova.
10 Mitukoyan iya ed sipan nen Jesus ed kongregasyon ed Laodicea: “Say manalo, iter ko ed sikato a miyurong ed siak dia ed tronok.” (Apocalipsis 3:21) Balet say mangatatawen ya asainmin na 24 a mamasiken so aglambengat nigeter ed panguley ed gobierno. Diad gapo na libro na Apocalipsis, onia so inkuan nen Juan nipaakar ed si Jesus: “Ginawa to itayo a panarian tan saserdote nipaakar ed Dios tan Ama to.” (Apocalipsis 1:5, 6) Saraya so namparan arari tan saserdote. “Sikara so nagawa a saserdote na Dios tan si Kristo, et miari ra ed sikato ed sanlibon taon.”—Apocalipsis 20:6.
11. Akin a matukotukoy a say bilang na mamasiken et 24, tan anto so kabaliksan na satan a bilang?
11 Anto so nikadkaduma nipaakar ed bilang a 24, unong a si Juan so akanengneng na 24 a mamasiken ed kaliberliber na trono? Diad dakel iran pamaakaran, saraya so inrepresenta na saray matoor a saserdote ed kadaanan ya Israel. Insulat nen apostol Pedro ed saray alanaan a Kristiano: “Sikayo so apili a kapolian, peteg ya inkasaserdote, masantos a nasyon, sakey a baley na Dios a dilin kayarian to.” (1 Pedro 2:9) Makapainteres, saman a kadaanan a Judion inkasaserdote so naapag ed 24 a dibisyon. Kada dibisyon so apabtangan na saray dili to ran simba ed taon pian manlilingkor ed arap nen Jehova, ta pian tuloytuloy a nisaklang so sagradon serbisyo. (1 Awaran 24:5-19) Matukotukoy, sirin, a walaray 24 a mamasiken a nilitrato diad pasingawey nen Juan nipaakar ed mangatatawen ya inkasaserdote lapud sayan inkasaserdote so tuloytuloy a manlingkor ed si Jehova, ya anggapoy tunda. Sano nakompleto, wala so 24 a dibisyon, kada dibisyon so walaan na 6,000 a mananalo, lapud ibabaga ed sikatayo na Apocalipsis 14:1-4 a 144,000 (24 x 6,000) so “asaliw . . . dia ed saray totoo” ya onalagey ed mangatatawen a Palandey Sion a kaiba na Kordero, si Jesu-Kristo. Lapud say bilang a 12 et mankabaliksan na organisasyon a walaan na madibinon inkabalanse, say 24 so manobli—odino mamabiskeg—ed ontan ya uksoyan.
Saray Kirmat, Boses, tan Karokarol
12. Anto so ontumbok ya anengneng tan nadngel nen Juan, tan anto so ipapanonot na “saray kirmat tan karol tan boses”?
12 Anto kasi so ontumbok a nanengneng tan narengel nen Juan? “Tan dia ed trono ompapaway so saray kirmat tan karol tan boses.” (Apocalipsis 4:5a) Agaylan manangipanonot ed arum niran makapadinayew a panangipatnag na mangatatawen a pakapanyari nen Jehova! Alimbawa, sanen “linmeksab” si Jehova ed Palandey Sinai, imbaga nen Moises: “Agawa a nen kabuasan na komatlo ya agew, wala so karokarol tan kirkirmat, tan sakey a makapal a lurem diman ed tagey na palandey, tan say tanol na trumpeta mapalaloy tubaw. . . . Et sanen say tanol na trumpeta tinmanol na andukey, tan kinmasil a kinmasil, nansalita si Moises, et say Dios inebatan to na sakey a boses.”—Exodo 19:16-19.
13. Anto so ililitrato na saray kirmat ya ompapaway ed trono nen Jehova?
13 Legan na agew na Katawan, ipatnag nen Jehova so pakapanyari tan kiwawala to diad makapadinayew a paraan. Andi, aliwan diad literal a kirmat, lapud say nanenengneng nen Juan dia et saray tanda. Anto, sirin, so irerepresenta na saray kirmat? Bueno, saray kiddiam na kirmat so makapangiter na liwawa, balet ta nayarin pateyen met na saratan so sakey. Kanian, sarayan kirmat ya ompapaway ed trono nen Jehova so matukotukoy a mangililitrato ed saray kiddiam na pakakaliwawaan a tuloytuloy ton iiter ed totoo to tan, nagkalautla ed saray mangapuy-apoy a mensahe na panangukom to.—Ikompara so Salmo 18:14; 144:5, 6; Mateo 4:14-17; 24:27.
14. Panon a narerengelan iray boses natan?
14 Anto met so nipaakar ed saray boses? Legan na samay inyakseb nen Jehova ed Palandey Sinai, walay boses a nansalita ed si Moises. (Exodo 19:19) Saray boses a nanlapud tawen so mangiiter na dakel ed saray ganggan tan panangiyabawag ed libro na Apocalipsis. (Apocalipsis 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Natan, si Jehova so angiter met na saray ganggan tan panangiyabawag ed totoo to, a liliwawaan to so pakatalos da ed saray propesiya tan prinsipyo na Biblia. Saray pakaliwawaan ya impormasyon so mabetbet a nipaparungtal diad saray internasyonal a kombension, tan saray ontan a katuaan na Biblia so niyaabawag met ed sankamundoan. Onia so imbaga nen apostol Pablo nipaakar ed saray matoor a managpulong na maong a balita: “On, peteg, dia ed ami dalin pinmaway so tanol da, tan saray salita ra angga ed saray sampot na mundo.”—Roma 10:18.
15. Antoran karol so ompapaway ed trono legan na sayan kabiangan na agew na Katawan?
15 Kaslakan a say kirmat et tumbokan na karol. Tinukoy nen David so literal a karol bilang “say boses nen Jehova.” (Salmo 29:3, 4) Sanen akilaban si Jehova ed biang nen David sumpad saray kakabusol to, nibagan walay karol a nanlapud Sikato. (2 Samuel 22:14; Salmo 18:13) Imbaga nen Elihu ed si Job a say boses nen Jehova so tinmanol a singa karol, legan a gagawaen To iray ‘baleg a bengabengatla ya agtayo natalosan.’ (Job 37:4, 5) Legan na sayan kabiangan na agew na Katawan, si Jehova so ‘mangikakarol,’ ya ipapasakbay to iray baleg a gawa a gawaen to sumpad saray kakabusol to. Sarayan simbolikon laldis na karol so paulit-ulit ya onaaniweng ed interon dalin. Maliket ka no sika so mangiimano ed sarayan singa karol a panangiyabawag tan makabat a manguusar ed dilam pian lalon onkasil iratan!—Isaias 50:4, 5; 61:1, 2.
Saray Lampara na Apoy tan Dayat a Singa Salming
16. Anto so kabaliksan na “pitora a tingkaw [odino lampara] na apoy”?
16 Anto ni so nanenengneng nen Juan? Saya: “Tan wala so pitora a tinkaw [odino lampara] na apoy a mandarlang ed arap na trono, a sikara so pitora ya espiritu na Dios; tan dia ed arap na trono, wala so singa sakey a dayat a salming a kapara na kristal.” (Apocalipsis 4:5b, 6a) Si Juan a mismo so mangibabaga’d sikatayo ed kabaliksan na pitoran lampara: “Sikara so pitora ya espiritu na Dios.” Say bilang a pitora so mangisisimbolo ed madibinon inkakompleto; kanian say pitoran lampara so maseguron mangirepresenta ed inkagnap na puersa na masanton espiritu a manliwawa. Agaylan misalsalamat so Juan a klase natan a nimatalekan ed sayan pakaliwawaan, tekep na responsabilidad a pangipasa ed satan diad saray naeerasan ed espiritual a totoo ed dalin! Agaylan maliket itayo a kada taon et masulok a nilasus milyon a kopya na magasin a Panag-Bantayan so mantutultuloy a mangisisindag ed sayan liwawa diad ngalngali 150 a lenguahe!—Salmo 43:3.
17. Anto so isisimbolo na “dayat a salming a kapara na kristal”?
17 Anengneng met nen Juan so “dayat a salming a kapara na kristal.” Anto so isisimbolo na saya no nipaakar ed saramay naimbitaan ed mangatatawen a korte nen Jehova? Tinukoy nen Pablo so paraan na impamasanto nen Jesus ed kongregasyon, ya “inorasan to [itan] ed pananguras na danum, lapud salita.” (Efeso 5:26) Sakbay na impatey to, imbaga nen Jesus ed saray babangatan to: “Sikayo malinis kayo la nisengeg ed salita a sinalitak ed sikayo.” (Juan 15:3) Kanian, sayan dayat a singa salming a kapara na kristal so nepeg a mangirepresenta ed makalinis a nirekord a Salita na Dios. Saramay kabiangan ed maarin inkasaserdote a sinmingger ed kiwawala nen Jehova so maseguron nagnap ya alinisan panamegley na Salita to.
Nengneng Yo so “Apatira a Mabilay [a Pinalsa]”!
18. Anto so anengneng nen Juan ed pegley tan kaliberliber na trono?
18 Naimatonan natan nen Juan so sananey nin nengneng. Insulat to: “Tan dia ed pegley na trono, tan kaliberliber na trono, wala so apatira a mabilay ya ayep [“pinalsa,” NW] a napno na mata ed arap tan beneg.”—Apocalipsis 4:6b.
19. Anto so ililitrato na apatiran mabilay a pinalsa, tan panon so pakaamta tayo ed saya?
19 Anto so ililitrato na sarayan pinalsa? Say sakey a pasingawey ya inreport na sananey a propeta, si Ezequiel, so ontulong ed sikatayon naamtaan so ebat. Anengneng nen Ezequiel si Jehova a nitrono ed mangatatawen a karwahe, ya inulop na saray mabilay a pinalsan walaan na saray nengneng a mipadpara ed saramay deneskribe nen Juan. (Ezequiel 1:5-11, 22-28) Diad saginonor, anengneng lamet nen Ezequiel itan a karwahen trono ya inulop na saratan a mabilay a pinalsa. Balet, diad sayan pankanawnawa et tinukoy to so mabilay iran pinalsa bilang kerubin. (Ezequiel 10:9-15) Seguradon irerepresenta na apatiran mabilay a pinalsan anengneng nen Juan so dakel iran kerubin na Dios—saray pinalsa a walaan na atagey a rangko diad espiritun organisasyon To. Ag-inisip nen Juan a nikadkaduma so pakanengneng ed saray kerubin ya akapueston asingsingger ed inkapersona nen Jehova, lapud diad tabernakulon uksoyan nensaman, duaran kerubin a balitok so niiyan ed tapew na sakob na kaban na sipan, ya angirepresenta ed trono nen Jehova. Manlapud baetan na sarayan kerubin, say boses nen Jehova so angipasabi na saray ganggan ed nasyon.—Exodo 25:22; Salmo 80:1.
20. Diad anton dalan a nibagan saray apatiran mabilay a pinalsa so walad “pegley na trono, tan kaliberliber na trono”?
20 Sarayan apatiran mabilay a pinalsa so walad “pegley na trono, tan kaliberliber na trono.” Anto so eksakton kabaliksan na saya? Nayarin kabaliksan na satan a saratan so akaposisyon ed kaliberliber na trono diad paraan a say kada sakey so manal-alagey ed pegley na kada diking na trono. Kanian, oniay impangibaga na saray managpatalos ed Maung a Balita ed orihinal a Griegon balikas: “akaliber ed trono, diad balang dapag to.” Nayari met a say balikas et kabaliksan ton saray apatiran mabilay a pinalsa so walad sentron posisyon ed tawen a kawalaan na trono. Maseguron satan so rason no akin ya impatalos na The Jerusalem Bible so balikas a: “diad sentro, ya atugyop ed liber na trono a mismo.” Say importantin bengatla et say inka-asingger na saray kerubin ed trono nen Jehova, a mipara ed saramay kerubin ya anengneng nen Ezequiel ed kada suyok na organisasyonal a karwahe nen Jehova. (Ezequiel 1:15-22) Amin na saya so mitukoyan ed saray salita ed Salmo 99:1: “Si Jehova man-ari. . . . Sikato [so] manyudyurong ed pegley na saray kerubines.”
21, 22. (a) Panoy impaneskribe nen Juan ed apatiran mabilay a pinalsa? (b) Anto so irerepresenta na indengan na kada sakey ed apatiran mabilay a pinalsa?
21 Intuloy nen Juan: “Tan say unaan ya ayep kapara na sakey a leon, tan say komadua ya ayep kapara na sakey a kilaw na baka, tan say komatlo ya ayep wala so lupa to a singa say too, tan say komapat ya ayep kapara na sakey ya agila a mantiktekkiab.” (Apocalipsis 4:7) Akin et nandurumaan so itsura na sarayan apatiran mabilay a pinalsa? Sarayan nikadkaduman mabilay a pinalsa so mapatnag a mangipapabitar na espesipikon maridios iran kalidad. Unona, wadtan so leon. Say leon so nausar ed Biblia bilang simbolo na inkakpel, nagkalautla diad panggegemtan ed inkahustisya tan inkatunong. (2 Samuel 17:10; Uliran 28:1) Kanian, say leon so matukoy a mangirerepresenta ed maridios a kalidad a makpel ya inkahustisya. (Deuteronomio 32:4; Salmo 89:14) Say komaduan mabilay a pinalsa so miulibay ed sakey a kilaw a kalakian a baka. Anton kalidad na kalakian a baka so nanonotan yo? Diad saray Israelita, say baka so mabmablin kayarian lapud biskeg na satan. (Uliran 14:4; nengnengen met so Job 39:9-11.) Say kalakian a baka, sirin, so mangirerepresenta ed biskeg, dinamikon enerhiya ya iiter nen Jehova.—Salmo 62:11; Isaias 40:26.
22 Say komatlon mabilay a pinalsa so walaan na lupa a singa lupa na too. Saya so maseguron mangirepresenta ed singa-dios ya aro, lapud diad dalin et say too lambengat so apalsa a walaan na superlatibon kalidad ya aro, unong ed indengan na Dios. (Genesis 1:26-28; Mateo 22:36-40; 1 Juan 4:8, 16) Agpanduaruwaan, saray kerubin so mangipapatnag ed sayan kalidad legan a sikara so manseserbi ed kaliberliber na trono nen Jehova. Anto natan so nipaakar ed komapat a mabilay a pinalsa? Say itsura na sayan sakey et singa mantekkiab ya agila. Si Jehova a mismo so angipaimano ed makdem a pakanengneng na agila: “Sikato so nengnengen na saray mata to manlapu ed arawi.” (Job 39:29) Kanian, say agila so mangisisimbolo ed kakabatan ya arawi nabantag to. Si Jehova so Subol na kakabatan. Saray kerubin to so mangaagamil na madibinon kakabatan legan a tutuloken daray ganggan to.—Uliran 2:6; Santiago 3:17.
Onaaniweng so Panangidayew ed si Jehova
23. Antoy isisimbolo na say katuaan a saray apatiran mabilay a pinalsa so ‘napno na mata,’ tan antoy idadanet na impakawalaan da na taloran paris a payak?
23 Intultuloy nen Juan so salaysay to: “Tan saray apatira a mabilay ya ayep, balang sakey ed sikara wala so anemiran payak da, wala a napno’ra na mata diad kaliberliber tan dia ed loob: tan anggapo so painawa ra ed agew tan labi, a mankuan: Santo, santo, santo, so Katawan a Dios, say Makapanyarin-amin, a sikato so wala nensaman tan sikato so wala natan, tan sikato so onsabi naani.” (Apocalipsis 4:8) Sayan pagmaliw a napno na saray mata so mangisusuheri na nagnap tan matudio a pakanengneng. Andi-tundan naagamil iya na saray apatiran mabilay a pinalsa, lapud agda nakaukolan so ugip. Aaligen da imay Sakey a diad sikato et nisulat: “Ta saray mata nen Jehova ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.” (2 Awaran 16:9) Lapud dakdakel so mata na saray kerubin, nanengneng da so anggan iner a pasen. Anggapo so makalegyas ed imano ra. Kanian sikara so akinlongan a maong a manlingkor ed Dios diad panangukom a kimey to. Diad sikato et nibaga: “Saray mata nen Jehova wala ed balang pasen, a manbabantay ed mauges tan maong.” (Uliran 15:3) Tan diad impakawalaan da na taloran paris a payak—say bilang a talora so nausar ed Biblia parad pangidanet—saray kerubin so makagalaw tekep na singa kirmat a siglat diad pangiyabawag tan pangipaakseb ed saray panangukom nen Jehova.
24. Panon so pandadayew na saray kerubin ed si Jehova, tan anto so kabaliksan na satan?
24 Ontalineng! Alay abig a melodya, makapaligsay kamarerwa a kanta na panagdayew so kakansionen na saray kerubin ed si Jehova: “Santo, santo, santo, so Katawan a Dios, say Makapanyarin-amin, a sikato so wala nensaman tan sikato so wala natan, tan sikato so onsabi naani.” Lamet, say impamitlo et pakapatnagan na inkapirmi. Mabiskeg a pepekderan na saray kerubin so kasantosan nen Jehova a Dios. Sikato so Subol tan say ultimon Estandarte na kasantosan. Sikato met so “Ari ya andi-angga,” say lawas ya “Alfa tan Omega, say sengeg tan kasumpalan, say una tan unor.” (1 Timoteo 1:17; Apocalipsis 22:13) Saray kerubin so agmanpapainawa legan ya iyaabawag da so agnaparaan iran kalidad nen Jehova ed arap na amin a pinalsa.
25. Panon a mankakasakey iray mabilay a pinalsa tan saray 24 a mamasiken diad panangidayew ed si Jehova?
25 Say tawen na katawenan so onaaniweng ed panangidayew ed si Jehova! Oniay katuloyan na deskripsion nen Juan: “Tan no saray mabilay ya ayep mangiter ira na gloria tan galang tan pisasalamat ed manyurong ed trono, ed saman so mabilay ed ando lan ando, saray duamplo tan apat a mamasiken ondunget ira ed arap na manyurong ed trono, tan igalang da so manbilay ed ando lan ando, tan ibuntok da so balanget da ed arap na trono, a kuan da, Sika so manepeg, Katawan mi tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.” (Apocalipsis 4:9-11) Diad interon Kasulatan, saya so sakey ed saray sankatalonggaringan a panangiyabawag na panangigalang ed si Jehova, say Dios tan Soberanon Katawan tayo!
26. Akin ya ibubuntok na saray 24 a mamasiken iray korona ra ed arap nen Jehova?
26 Saray 24 a mamasiken so walaan na kipapasen na nonot a mipara ed impatnag nen Jesus, imbuntok da ni ingen iray korona ra ed arap nen Jehova. Arawi ed kanonotan da so pangiyalangon ed inkasikara diad arapan na Dios. Sipapaabeba ran bibidbiren a say mogmon gagala na inkaari ra et say pangitarok na dayew tan gloria ed sikato, a singa naynay a ginawa nen Jesus. (Filipos 2:5, 6, 9-11) Mapasakop dan bibidbiren so dilin inkaabeba ra tan ipapatua ran say pananguley da so akadepende ed inkasoberano nen Jehova. Kanian, sikaray impapuson mitutunosan ed saray kerubin tan ed amin a matoor a pinalsa diad pangiiter na dayew tan gloria ed Dios ya amalsa ed amin a bengatla.—Salmo 150:1-6.
27, 28. (a) Panon itayon naapektoan na deskripsion nen Juan ed sayan pasingawey? (b) Antoran tepet so onlesa no nipaakar ed ontumbok a nanengneng tan narengel nen Juan?
27 Siopa so agnapakiwas diad pamasa ed salaysay nen Juan ed sayan pasingawey? Agaylay karakpan tan inka-engrande na satan! Balet, anto kasi so peteg a nengneng na aktual a katawenan? Say mismon karlangan nen Jehova so nepeg a mamaligsa ed siopaman a walaan na maapresyan puso a mibiang ed apatiran mabilay a pinalsa tan ed saray 24 a mamasiken diad pangidayew ed Sikato, diad pikakasi tan diad mapublikon panangiyabawag ed ngaran To. Saya so Dios a pribilehyon tasian natan na saray Kristiano. (Isaias 43:10) Nonoten a say pasingawey nen Juan so onaplika ed agew na Katawan, a pambibilayan tayo la natan. Saray “pitora ya espiritu” so lawas akaparaan a mangigiya tan mamabiskeg ed sikatayo. (Galacia 5:16-18) Say Salita na Dios so wala natan ya ontulong ed sikatayon magmaliw a masanto diad panlingkor ed sakey a masanton Dios. (1 Pedro 1:14-16) Segurado, sikatayo so maliket a mamasan maksil ed saray salita na sayan propesiya. (Apocalipsis 1:3) Agaylan pananagyat so iiter na saratan pian magmaliw itayon matoor ed si Jehova tan ag-abuloyan so mundo a mangisuawi ed sikatayo manlapud aktibon panangikanta na saray panangidayew ed sikato!—1 Juan 2:15-17.
28 Anggad sayan punto, deneskribe nen Juan so anengneng to sanen sikato so naimbitaan ya onasingger panamegley na saman ya alukasan a puerta ed tawen. Diad sankatalonggaringan a paraan, imbalita ton si Jehova, ed amin a karakpan na karlangan tan dignidad To, so manyudyurong ed mangatatawen a trono To. Sikato so apaliberan na sankabiskegan ed amin ya organisasyon—a mansinag ed karlangan tan katooran. Say madibinon Korte so walaan na sesyon. (Daniel 7:9, 10, 18) Say entablado so niparaan la parad nikadkaduman nagawa. Anto itan, tan panon itayon aapektaan na satan natan? Bantayan tayo legan a nipaparungtal so eksena!
[Interon-pahina a litrato ed pahina 75]
[Interon-pahina a litrato ed pahina 78]