“Maabig a Balita” Manlapud Apocalipsis

“Anengneng ko so sananey ya anghel a mantektekkiab dia ed pegley na tawen, a wala ed sikato so andi-angga a maabig a balita pian sikato so ipulong to ed saray manaayam dia ed dalin.”​—APOCALIPSIS 14:6.

1. Anggaman manisia iray Tastasi nen Jehova ed inkipuyan na libron Apocalipsis, akin ya aliwa iran “sektan mangipapasakbay na kadederal”?

MISUNIAN ed saray akusasyon ed sikara, saray Tastasi nen Jehova so aliwan “sektan mangipapasakbay na kadederal” odino sakey a “kulton mangikakalar na agew na panangukom.” Anggaman ontan, papanisiaan da so Apocalipsis, odino libro na Puyan, bilang kabiangan na apuyanan a Salita na Dios. Tua, akasulat ed Apocalipsis iray mensahe nipaakar ed kaukom na saray mauges. Balet diad panpupulong da’d totoo, say manunan iyaapasakey na saray lingkor na Dios so nipaakar ed alay abig ya ilalon nidatak ed Biblia, pati say walad Apocalipsis, odino Puyan. Kanian, agda aaruman odino babawasan iray mapropetikon salita a naromog ditan.​—Apocalipsis 22:18, 19.

Saray Manangiyabawag na Maabig Iran Balita

2. Anto so pigaran teksto a mabetbet ya uusaren na Tastasi nen Jehova diad panpupulong da?

² Say mabetbet a nisitas a Makasulatan a basiyan na mapublikon ministeryo na Tastasi nen Jehova et saray balikas nen Jesus: “Sayan maong a balita na panarian so niyabawag ed amin ya atooan a dalin ya onkanan pantasi ed saray amin a nasyon; insan onsabi la so anggaan.” (Mateo 24:14, paimano’d-leksab, NW) Anto iyan “maong a balita na panarian”? Onebat so dakel a Tastasi diad pangaon da ed saray bersikulon walad Apocalipsis kapitulo 20 tan 21 a manutukoy ed Sanlibon Taon ya Uley nen Kristo tan say gobiernon Panarian to, tan say sosyedad na totoo, ya “anggapo la” so ipatey, inangis, tan ot-ot.​—Apocalipsis 20:6; 21:1, 4.

3. Anton misyon so pitunosan na mapublikon ministeryo na Tastasi nen Jehova?

³ Bilang manangiyabawag ed sarayan maabig a balita, saray Tastasi nen Jehova so peteg a pinagkasangiyan na sakey a simbolikon mangatatawen a mensahero a say misyon to et adeskribe met ed Apocalipsis. “Anengneng ko so sananey ya anghel a mantektekkiab dia ed pegley na tawen, a wala ed sikato so andi angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley.” (Apocalipsis 14:6) Laktipen na “andi-angga a maabig a balita” so panangiyanunsio a say “nanarian [odino, pananguley] na mundo” et “agawa ran nanarian na Katawan tayo, tan si Kristo to” tan sinmabi la so ‘aturon panaon’ nen Jehova pian ‘bagbagen iramay mamabagbag ed dalin.’ (Apocalipsis 11:15, 17, 18) Agta talagan maong a balita itan?

No Anto so Itatarya na Apocalipsis ed Sikatayo

4. (a) Antoran manunan katuaan so nidatdatak ed Apo kapitulo 1 na Apocalipsis? (b) Anto so kakaukolanen ed saramay malabay a minabang ed maabig iran balita?

⁴ Say pilimeron kapitulo na libroy Apocalipsis so mangipaparungtal ed si Jehova bilang say “Alfa tan say Omega, . . . a wala natan tan wala nensaman tan say onladia, say Makapanyarin-amin.” Tan ipaparungtal met na satan so nipaakar ed Anak to, si Jesu-Kristo, bilang “say Tasi a Matoor,” “say panguloan ya anak ed saray inatey,” tan say “Uloen na saray arari ed dalin.” Sasaglawien to met si Jesus bilang “saman so angaro ed sikatayo, tan anguras ed saray kasalanan tayo ed dili to a dala.” (Apocalipsis 1:5, 8) Kanian, manlapulad gapo et inyosa-osa la na Apocalipsis so manunaan iran katuaan a manangiliktar-bilay. Agnapinabangan na “saray manaayam dia ed dalin” so maabig iran nibabalita ed sikara no agda bidbiren so inkasoberano nen Jehova, agda agamilen so pananisia ed nipaagus a dala nen Jesus, tan agmanisia a sikatoy pinaoli nen Jehova tan si Kristo so tinuro na Dios a Manuley diad dalin natan.​—Salmo 2:6-8.

5. Anton betang so inkilitratoan nen Kristo diad Apo kapitulo 2 tan 3 na Apocalipsis?

⁵ Say ontumbok a duaran kapitulo so mangililitrato ed si Kristo Jesus bilang say maaron mangatatawen a Manangasikaso ed saray kongregasyon na saray babangatan to diad dalin. Walan akasulat ed lukot a parad apilin pitoran Kristianon kongregasyon a niletneg diad Asia Minor nen inmunan siglo K.P. so panamaseseg tan mabiskeg a simbawa a siansia nin onaaplika natan. Saray mensahen impasabi ed saray kongregasyon so kaslakan ya onggagapo ed saray salitan ‘Amtak iray gawa yo’ odino ‘Amtak iray irap yo.’ (Apocalipsis 2:2, 9) On, amta nen Kristo so amin a nagagawa ed loob na saray kongregasyon na saray babangatan to. Kinomendaan to so arum lapud aro, pananisia, sagpot da ed ministeryo, panagsungdo, tan inkamatoor da ed ngaran tan salita to. Binaat to so arum lapud inabuloyan dan ombetel so aro ra ed si Jehova tan ed Anak to, odino naplag ira ed seksual ya imoralidad, idolatriya, odino apostatan sektarianismo.

6. Say pasingawey a nikurit ed Apo kapitulo 4 so ontulong ed totoo a natalosan so anto?

⁶ Itatarya na kapitulo 4 so makapakelkelaw a pasingawey na mangatatawen a trono nen Jehova a Dios. Ipaparungtal to so pasimar na gloriay kiwawala nen Jehova tan say mangatatawen ya uksoy na pananguley ya usaren to. Saray abalangetan a manuley, a saray trono ra et akapaliber ed pinagkasentron trono ed uniberso, so dinmakmomo ed si Jehova tan oniay inyabawag da: “Sika so manepeg, Katawan mi tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.”​—Apocalipsis 4:11.

7. (a) Anto so inyabawag na anghel a nepeg a gawaen na saray manaayam diad dalin? (b) Anto so sakey ya importantin kabiangan na edukasyonal a kimey tayo?

⁷ Wala kasi so kabaliksan na saya ed totoo natan? Talagan wala. No labay day manbilay ed silong na Milenyon Panarian, nepeg dan talinengen so “anghel a mantektekkiab dia ed pegley na tawen” a mangiyaabawag na: “Takotan yo so Dios, tan iter yo ed sikato so gloria: ta say oras na pangukom to sinmabi la.” (Apocalipsis 14:6, 7) Say sakey ed manuna iran gagala na edukasyonal a kimey a gagawaen na Tastasi nen Jehova nipaakar ed Biblia et say panulong ed “saray manaayam dia ed dalin” a makapikabat tan makapangidayew ed si Jehova, mamidbir ed Inkamanamalsa to, tan mabulos a manpasakop ed matunong ya inkasoberano to.

Manepeg a Galangen so Kordero

8. (a) Panon a nilitrato si Kristo ed Apo kapitulo 5 tan 6? (b) Anto so naaralan na amin ya ontalineng ed maabig iran balita manlapud sayan pasingawey?

⁸ Say ontumbok a duaran Apo kapitulo, 5 tan 6, so mangipaparungtal ed si Jesu-Kristo bilang Kordero a manepeg a mamuskag ed sakey a lukot a walaay pitoran tatak, a diad ontan a paraan et niparungtal ed simbolikon salita iray ebenton nagagawa ed panaon tayo. (Ikompara so Juan 1:29.) Oniay inkuan na saray bosis ed tawen nipaakar ed sayan simbolikon Kordero: “Manepeg ka a mangala ed libro, tan mangekal ed saray selyo to ra: ta sika pinatey ka tan sinaliw mo ya inggana ed Dios, lapu ed dalam, so totoo ed balang kailalakan, tan salita tan baley tan nasyon: Tan ginawam ira a panarian tan saserdote nipaakar ed Dios mi; et manari ra ed tapew na dalin.” (Apocalipsis 5:9, 10) Ibabangat na sayan pasingawey a base ed nipaagus a dala nen Kristo, walaray natawag a totoon nanduruma so nanlapuan da pian nakaiba ira nen Jesus ed tawen tan “manari ra ed tapew na dalin.” (Ikompara so Apocalipsis 1:5, 6.) Say limitadon bilang da so niparungtal ed saginonor diad Apocalipsis.

9. Panon a niparungtal si Kristo ed Apo kapitulo 6?

⁹ Diad saya lanlamang a pasingawey, nipaparungtal met si Kristo bilang abalangetan ya akakabayo ed amputin kabayo, ya onlulusob a ‘manatalo, tan pian [isumpal to] so pananalo to.’ Makapaliket, ekalen to iray mauges a nagagawa ya insimbolo na talora nin managkabayo ed Apocalipsis, a lapud pirmin panalibandos da et nitarok so bakal, eras, tan patey ed katooan nanlapulad makatantandan taon a 1914. (Apocalipsis 6:1-8) Say nikaduman betang nen Kristo, say Kordero na Dios, ed kilalaban na katooan tan ed pakasumpal na makapakelaw iran gagala nen Jehova et sakey a manunan tema na panagbangat a kimey na Tastasi nen Jehova nipaakar ed Biblia.

10. (a) Anton importantin impormasyon so niiter diad Apo kapitulo 7? (b) Panon so impanawag nen Kristo ed saramay mangawat na Panarian?

¹⁰ Peteg a lugan na kapitulo 7 iray maabig a balita. Dia lambengat ed libro na Apocalipsis so pakaromogan tayo ed bilang na saramay tinawag nen Jesus a “melag a pulok” a diad sikara et iter na Ama na Kordero so Panarian. (Lucas 12:32, NW; 22:28-30) Saraya so tinatakan nen Jehova a Dios diad panamegley na espiritu to. (2 Corinto 1:21, 22) Oniay impamaneknek nen apostol Juan, ya angawat ed Apocalipsis: “Nadngel ko so bilang na saray tinatakan, sanlasus tan apataplo tan apat a libo, tinatakan ed saray balang kapolian na saray anak na Israel.” (Apocalipsis 7:4) Sayan pihon bilang so apekderan ed onsaginonor a kapitulo bilang say dagup na saramay “asaliw dia ed saray taga dalin” pian manuley a kaiba na Kordero diad mangatatawen a Palandey Sion. (Apocalipsis 14:1-4) Anggaman agnatalosan tan agmakakombinse iray paliwawa na saray iglesia na Kakristianoan nipaakar ed sayan bilang, oniay makapainteres ya inkuan nen E. W. Bullinger nipaakar ed satan: “Simplin salaysay itan na katuaan: sakey a pihon bilang a miduma ed samay agnapihon bilang a walad sayan mismon kapitulo.”

11. (a) Antoran maabig a balita so naromog ed Apo kapitulo 7? (b) Antoran ilalo so nilukas ed saramay kabiangan na “baleg ya ulop”?

¹¹ Anto so tutukoyen nen Bullinger ya agnapihon bilang? Diad bersikulo 9, oniay insulat nen apostol Juan: “Kayari sarayan bengatla ninmengneng ak, tan nia, so sakey a baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita.” (Apocalipsis 7:9) Siopay tugyopen na sayan baleg ya ulop, anto so kaplesan a talindeg da ed arap na Dios, tan anto so manatalaran ed sikara diad arapen? Say ebat na apocalipsis et maong a balita parad saray manaayam ed dalin. Oniay nabasa tayo: “Sayara sikara so nanlapu ed baleg ya irap, tan inurasan da so kawekawes da, tan sikara so pinaputi ra ed dala na Kordero.” Diad panamegley na pananisia ra ed nipaagus a dala nen Kristo, nasalimbengan ira legan na ‘baleg a kairapan.’ Si Kristo et “irawa’to [ra] ed saray subol na danudanum na bilay: tan say Dios punasen to so balang lua ed saray kamataan da.” (Apocalipsis 7:14-17) On, minilyon a totoon manbibilay natan so nayarin magmaliw a kabiangan na agnabilang ya ulop na totoo a makaliktar naani ed anggaan na kaplesan a marelmeng a sistema na bengabengatla. Bilang uuleyan na Arin Jesu-Kristo legan na Milenyon Uley to, sikaray iwanwan to ya ontundas ed andi-anggaan a bilay diad dalin. Agta maong a balita itan?

“Matua tan Matunong Iray Panangukom To”

12, 13. (a) Anto so lugan na Apo kapitulo 8 anggad 19? (b) Akin ya agnepeg a nagonigon iray matuan-impanpuson totoo ed ontan iran propesiya?

¹² Lapud walan akasulat ed saray Apo kapitulo 8 anggad 19, papanisiaan na arum a say libron Apocalipsis, odino Puyan et sakey a libron mangipapasakbay na saray makapataktakot a desyang. Lugan na saratan so mapuersa iran mensahe na panangukom (ya insimbolo na maksil iran tanol na trumpeta, saray bakbak, tan saray yaong na sanok na Dios) ya impaarap sumpad nanduruman elemento na sistema na bengabengatla nen Satanas. Sarayan panangukom so nipaakseb ya unona sumpad palson relihyon (“Babilonia a Baleg”), insan sumpad agmaridios a mapolitikan sistema, ya insimbolo na masebeg ya ayayep.​—Apocalipsis 13:1, 2; 17:5-7, 15, 16.a

¹³ Ililitrato na sarayan kapitulo so impanlinis ed katawenan, ya inkibasilengan la nen Satanas tan saray demonyo to diad kaliberliber na dalin. Itatarya na saya so alenleneg a makatunongan a paliwawa nipaakar ed nikadkaduman kagogonigon na mundo nanlapulad 1914. (Apocalipsis 12:7-12) Diad simbolikon salita, dedeskribien met na saratan so nipaakar ed kaderal na marelmeng a sistema na bengabengatla nen Satanas diad dalin. (Apocalipsis 19:19-21) Nepeg kasin nakigtot iray matuan-impanpuson totoo ed ontan iran makapataktakot ya ebento? Andi, lapud ta diad kipaakseb na saray panangukom na Dios, onkelyaw so sakey a mangatatawen a karaklan: “Idayew si Jah, sikayoran totoo! Say kilalaban tan say gloria tan say pakayari et kien na Dios tayo, lapud matua tan matunong iray panangukom to.”​—Apocalipsis 19:1, 2, NW.

14, 15. (a) Panon a nagawa so pangangga na kaplesan a marelmeng a sistema diad inkatunong? (b) Akin a sayan kabiangan na Apocalipsis et nepeg a panliketan na matuan-impanpuson totoo?

¹⁴ Ag-itarok nen Jehova so sakey a matunong a sistema na bengabengatla no agto ni apagit ed dalin iramay manederal ed satan. (Apocalipsis 11:17, 18; 19:11-16; 20:1, 2) Anggaman ontan, anggapo so autoridad odino pakayari na too odino mapolitikan estado a makapanggawa ed saya. Si Jehova lambengat tan say tinuro ton Ari tan Ukom, si Kristo Jesus, so makapanggawa ed saya diad inkatunong.​—2 Tesalonica 1:6-9.

¹⁵ Unong a malinlinew ya ipaparungtal na Apocalipsis, inggagala la nen Jehova a panganggaen iyan kaplesan a marelmeng a sistema. Sayan katuaan so nepeg a panliketan na lalaki tan bibii a “mansibek tan manakis lapu ed amin a kadimlaan a nagagawa.” (Ezequiel 9:4) Nepeg a mangipaslep iya ed sikara nipaakar ed inkaganatan ya ontalineng ed kelyaw na anghel a tarok toray maabig a balita, ya angiyabawag: “Takotan yo so Dios, . . . ta say oras na pangukom to sinmabi la; tan igalang yo so nanggawa ed tawen tan dalin.” (Apocalipsis 14:7) Komon ta saratan a totoo so mandayew tan manlingkor ed si Jehova kaiba iray Tastasi to, a “manguunor ed ganggan na Dios, tan wala ed sikara so impantasi nen Jesus.”​—Apocalipsis 12:17.

Say Maglorian Uley ed Milenyo

16. (a) Akin ya impulisay na saray iglesia na Kakristianoan so ilalon nipaakar ed Milenyo? (b) Akin papanisiaan na Tastasi nen Jehova a naebatan so modelon pikakasi?

¹⁶ Lugan na saray Apo kapitulo 20 anggad 22 na libroy Apocalipsis so Makasulatan a basiyan na ilalo nipaakar ed Milenyo. Saya so alenleneg a parti na Biblia a talagan analambit ed sanlibon-taon a peryodo a magmaliw a gapo na magnayon a liket diad tawen tan ed dalin. Impulisay na saray iglesia na Kakristianoan so ilalon nipaakar ed Milenyo. Lapud say ibabangat na iglesia et onla’d tawen iray matunong tan onla’d impierno iray mauges, agton balot ibabangat so nipaakar ed paraison dalin. Say modelon pikakasi, a mangikekerew a “nagawa la komon so linawa [na Dios] diad dalin a singa met ed tawen,” so naandian lay kabaliksan parad maslak a membro na saray iglesia na Kakristianoan. (Mateo 6:10, New International Version) Balet ta aliwan ontan ed saray Tastasi nen Jehova. Mapekder dan papanisiaan ya agpinalsa nen Jehova a Dios so dalin a “kibalatar,” noagta ‘pian panayaman.’ (Isaias 45:12, 18) Kanian, mantutunosan ya amin so kadaanan a propesiya, say modelon pikakasi, tan say ilalo a walad Apocalipsis nipaakar ed Milenyo. Legan na Sanlibon Taon ya Uley nen Kristo, seguroen ton nagawa so linawa nen Jehova diad dalin, a singa met ed tawen.

17. Anto so mangipapabitar a say “sanlibon taon” et nepeg a talosan a literal?

¹⁷ Say terminon “sanlibon taon” so aminem a pinmatnag ed pilimeron pitoran bersikulo na Apocalipsis kapitulo 20 bersikulo 1-7. Makatantanda so punto ya amipat itan a nausar ed New World Translation a Biblia a walaan na definite article a “the,” a mangipapabitar a say tutukoyen na satan et literal a milenyo, aliwan sakey lambengat ya ag-espisipikon karukey a panat na panaon, unong ya ibabaga na saray komentarista na Kakristianoan a nepeg tayon panisiaan. Anto so nagawa legan na Milenyo? Unona, agmakapangimpluensia si Satanas ed loob na satan ya intiron panat na panaon. (Apocalipsis 20:1-3; ikompara so Hebreos 2:14.) Agaylan maong a balita itan!

18. (a) Akin a say Milenyo et natawag ya “agew” na panangukom? (b) Anto so nagawa diad anggaan na sanlibon taon?

¹⁸ Lapud niiter so “pakauley a mangukom” ed saramay “miari ed sikato [Kristo] ed sanlibon taon,” sayan peryodo et, diad tua, sanlibon-taon ya “agew” na panangukom. (Apocalipsis 20:4, 6; ikompara so Gawa 17:31; 2 Pedro 3:8.) Napaoli iray inaatey tan, pati saray makaliktar ed “baleg ya irap,” parapara iran naukom unong ed saray gawa, odino kiwkiwas da, legan na satan a panaon. (Apocalipsis 20:12, 13) Diad sampot na sanlibon taon, nibulos a magano si Satanas ta pian niiyan ed kaunoran a subok so katooan, insan sikato, saray demonyo to, tan siopaman a manrebeldi diad dalin a tinmumbok ed sikato so magnayon lan natawtaw. (Apocalipsis 20:7-10) Permanenti lan nisulat diad “libro na bilay” so kangaranan na saramay totoon makapasa ed subok tan sikaray ontundas ed magnayon a maliket a bilay, a manlilingkor tan mandadayew ed si Jehova diad paraison dalin.​—Apocalipsis 20:14, 15; Salmo 37:9, 29; Isaias 66:22, 23.

19. (a) Akin a makaseguro tayon sigpot a nasumpal iray makapakelaw a sipan a nidatdatak ed libro na Apocalipsis? (b) Anto so konsideraen ed ontumbok ya artikulo?

¹⁹ Saratan so maabig a balitan nidatdatak ed Apocalipsis. Aliwa iratan a pabes a sipasipan a ginawa labat na too. Insulat nen apostol Juan: “Say manyurong ed trono kuanto: Nia, siak gawaen ko a balo so saray amin a bengatla. Tan kuanto ed siak: Isulat mo; ta saraya a salita sikara so matoor tan matua.” (Apocalipsis 21:5) Anto so nepeg tayon gawaen pian makapibiang itayo ed kasumpalan na sarayan maabig a balita? Lugan na libro na Apocalipsis so dakel a simbawa parad saramay malabay a mamaliket ed Dios. Nagamoran tayoy magnayon a liket, natan tan ed andi-anggaan, no tumboken tayo iratan a simbawa, unong ya ipanengneng na ontumbok ya artikulo.

[Paimano ed leksab]

Saray Punton Repasoen

◻ Antoran manunan katuaan a naromog ed Apocalipsis kapitulo 4 anggad 6 so manitibukel ed importantin kabiangan na maabig iran balita?

◻ Antoran maabig a balita so naromog ed Apocalipsis kapitulo 7?

◻ Akin ya agnepeg a nagonigon iray matuan-impanpuson totoo ed saray mensahe na panangukom a naromog ed Apocalipsis?

◻ Diad antoran dalan a magmaliw ya “agew” na panangukom so Milenyo?

[Litrato ed pahina 10]

Sigpot a panganggaen nen Arin Jesu-Kristo so bakal, eras, tan ipapatey diad dalin